ထပ်၍တိုးတက်ခြင်းငှာ အပြုသဘောပါပါလုပ်ကိုင်ခြင်း

^၁ ဤအချိန်ဆိုလျှင် 1992 Yearbook ကို ဖတ်ပြီးသူများဖြစ်ကြလိမ့်မည်။ ၁၉၉၁ ကမ္ဘာချီနှုန်းသစ်ဖြစ်သည့် နိုင်ငံပေါင်း ၂၁၁ နိုင်ငံ၌ ၆.၅ ရာခိုင်နှုန်းဖြစ်သည့် လေးသန်းခွဲနီးပါးရှိနိုင်ငံတော်ကြေညာသူများအကြောင်း သိရှိသည့်အတွက် ပီတိဖြစ်နိုင်ကြပါသည်။ ဟေရှာယ ၂:၂-၄ နှင့် မိက္ခာ ၄:၁-၄ သည်ထူးခြားစွာပြည့်စုံနေကြောင်း ယခုကမ္ဘာတစ်ဝန်း နိုင်ငံတော်တိုးတက်မှုက ထင်ရှားစေသည်။

^၂ ၁၉၉၂ လုပ်ငန်းတော်နှစ်အတွက်မှတ်တမ်း မပြည့်စုံသေးသော်လည်း ထူးခြားသောတိုးတက်မှုများစွာဖြင့် ဤလုပ်ငန်းတော်နှစ်ကို ယေဟောဝါအောင်မြင်စွာပြီးမြောက်စေကြောင်း သက်သေထူသည်။ ကျွန်ုပ်တို့၏ အပြည်ပြည်ဆိုင်ရာ ကြီးမားသောညီအစ်ကိုများအသင်းအပင်းအဝင်ဖြစ်လာရန် ဖိတ်ကြားချက်ကိုဆက်ပြုလုပ်နေဆဲရှိသည်။ သတိရအောက်မေ့ပွဲနှင့် ခရိုင်စည်းဝေးပွဲတက်ရောက်သူဦးရေအရ နိုင်ငံတော်သတင်းတရားကို နားစွင့်နေသူ သန်းပေါင်းများစွာရှိနေကြောင်း တင်ပြပါသည်။ “လာကြလော့၊ ထာဝရဘုရား [ယေဟောဝါ၊ ကဘ] ၏တောင်တော်၊ ယာကုပ်အမျိုး၏ဘုရားသခင့်အိမ်တော်သို့တက်သွားကြကုန်အံ့။ လမ်းခရီးတော်တို့ကိုပြသသွန်သင်တော်မူ၍ ငါတို့သည် ခြေတော်ရာသို့လိုက်သွားကြမည်” ဟူသောဖိတ်ခေါ်ချက်ကို တိုင်းနိုင်ငံအသီးသီးမှသူတို့သည် တုံ့ပြန်နေကြပါသည်။

^၃ တိုးတက်ခြင်းငှာ စိတ်ဆုံးဖြတ်ပါ။ ယေဟောဝါ၏အဖွဲ့အစည်းသည် ချီတက်လှုပ်ရှားနေသည်။ ယေဟောဝါ၏စစ်မှန်သောဝတ်ပြုရေးတောင်တော်သို့ မြောက်မြားစွာသောလူသစ်တို့သည် တဖွဲဖွဲတက်သွားနေကြသည့်အတွက် ဝိညာဉ်ရေးဘက် တစ်ဦးစီတိုးတက်နေပြီး မိမိထက်နောက်ကျဝင်လာသောလူသစ်များအားလည်း ထပ်တူပင်ပြုလုပ်စေရန် ကူညီပေးဖို့အရေးကြီးပါသည်။ ယေဟောဝါတောင်ပေါ်သို့လာကြရန် ဖိတ်ကြားချက်ကိုလက်ခံသူများအနေနှင့် အခြားသူများအား “လာကြပါ” ဟုထပ်ဆင့်ဖိတ်ခေါ်ရမည်ဟုဆိုထားခြင်းက ဤသို့တိုးတက်ရန်လိုကြောင်း သဘောပေါက်စေသည်။ ဗျာဒိတ် ၂၂:၁၇ တွင်တမန်တော်ယောဟန်သည် ဤသို့ထပ်တူဆိုထားသည်။ “ဝိညာဉ်တော်နှင့်မင်္ဂလာဆောင်သတို့သမီးတို့က ‘လာခဲ့ပါ’ ဟုဆိုကြ၏။ ကြားသောသူကလည်း ‘လာခဲ့ပါ’ ဟုဆိုပါစေ။”

^၄ ဤဖိတ်ကြားချက်ကို မည်သို့ပေးကြရမည်အကြောင်း ယေရှုဖော်ပြထားသည်။ ကိုယ်တော်၏သွန်သင်ချက်ကို လူတို့လက်သင့်ခံကြသည့်အခါ ဓမ္မအမှု၌ပါဝင်ရန်နှင့် ယင်းကို မည်သို့ဆောင်ရွက်ရန် ကိုယ်တော်သွန်သင်ပေးခဲ့သည်။ (မ၊ ၄:၁၉။ ၁၀:၅-၇၊ ၁၁-၁၄) တပည့်တော်များသည် ကိုယ်တော်နောက်လိုက်၍ မည်သို့ပြုလုပ်ဆောင်ရွက်သည်ကို ဂရုပြုခြင်းအားဖြင့် ထိရောက်သောနည်းလမ်းများကို သင်ယူခဲ့သည်။ ထိုနောက် ဓမ္မအမှုကို ကိုယ်တော်ဆောင်ရွက်သည့်အတိုင်း ဆောင်ရွက်ကြသည်။ ကိုယ်တော်၏နည်းလမ်းများကို ကောင်းစွာတတ်မြောက်ခဲ့ကြသောကြောင့် သူတို့၏ ရဲရင့်ခြင်းသတ္တိနှင့်သက်သေခံချက်ကို ရန်သူများတွေ့မြင်ပြီး သူတို့သည် ယေရှုတပည့်တော်များဖြစ်ရမည်ကို သိရှိခဲ့ကြသည်။ တမန်တော် ၄:၁၃ ကဤသို့မှတ်တမ်းတင်သည်။ “ထိုသူတို့သည် ပေတရုနှင့်ယောဟန်တို့၏ရဲခြင်းသတ္တိကိုမြင်၍ . . . အထက်ကယေရှုနှင့်အတူရှိသည်ကို သတိရ” ကြသည်။

^၅ တပည့်တော်များသွန်သင်ခံခဲ့ရသည်နည်းတူပင် တစ်ဆင့်သွန်သင်ပေး၍ တပည့်သစ်များဖြစ်စေခြင်းအားဖြင့် ခရစ်ယာန်ဓမ္မအမှုကို ဆက်ပြုလုပ်သွားကြရန် ယေရှုကောင်းကင်သို့ပြန်မတက်မီ မိန့်မှာတော်မူခဲ့သည်။ မဿဲ ၂၈:၁၉၊ ၂၀ တွင်ယေရှုဤသို့မိန့်တော်မူသည်။ “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက် . . . ငါသည် သင်တို့အားပေးသမျှသောပညတ်တော်တို့ကိုစောင့်ရှောက်စေခြင်းငှာ ဆုံးမသြဝါဒပေးကြလော့။” ဤလုပ်ငန်းကို ကျွန်ုပ်တို့ခေတ်သမယတိုင် ဆက်လုပ်ကိုင်သွားစေလိုကြောင်း ဤသို့ထပ်ဆင့်အာမခံတော်မူသေးသည်။ “ငါသည်လည်း ကပ်ကမ္ဘာကုန်သည်တိုင်အောင် သင်တို့နှင့်အတူ အစဉ်မပြတ်ရှိသည်။”

^၆ ယေရှုခရစ်၏စစ်မှန်သောတပည့်တော်များသည် မိန့်မှာခံရသည်အတိုင်း ကိုယ်တော်သွန်သင်ခဲ့သမျှကို တပည့်အသစ်များအားပို့ချပေးခဲ့ပြီ။ သို့ရာတွင် ယေဟောဝါသက်သေများ၏ ကမ္ဘာချီအသင်းတော်၏ ထူးခြားသောတိုးတက်မှုကြောင့် အသင်းတော်ရှိ နှစ်ခြင်းယူခါစလူသစ်များနှင့် နှစ်ခြင်းမယူရသေးသည့် ကြေညာသူများအပြင် ကျွန်ုပ်တို့နှင့်ကျမ်းစာလေ့လာနေပြီး အသင်းတော်အစည်းအဝေးများကို တက်ရောက်စပြုနေသူများ၏ အထူးလိုအပ်ရာများကို ထည့်စဉ်းစားပေးဖို့လိုပါသည်။

^၇ ၁၉၉၂ လုပ်ငန်းတော်နှစ်စတွင် ကြေညာသူ ၉ ယောက်အနက် ၁ ယောက်သည် ဓမ္မအမှု၌ပါဝင်နေသည်မှာ တစ်နှစ်သာရှိသေးသည်။ ၆ ယောက်အနက် ၁ ယောက်မှာမူ သုံးနှစ်ခန့်သာရှိသေးသည်။ ၄ ယောက်အနက် ၁ ယောက်ဆိုလျှင် ဓမ္မအမှု၌စပါဝင်ချိန် ငါးနှစ်မကျော်သေးပါ။ လူသစ်အမြောက်အမြားတို့သည် အသင်းသားများဖြစ်လာကတည်းက သူတို့၏တိုးတက်မှုနှုန်းသည် ချီးမွမ်းထိုက်သော်လည်း သူတို့၏ဝိညာဏတိုးတက်မှုကို လျင်မြန်စေရန် အချို့ကဏ္ဍများတွင် ထပ်ဆင့်ကူညီပေးစရာလိုနေသေးသည်။

^၈ ဟေဗြဲ ၆:၁ က “စုံလင်သောအဖြစ်သို့တက်ကြ” ရန်အားပေးတိုက်တွန်းထားသည်။ ခရစ်ယာန်ပါရမီရင့်ကျက်မှုသည် မှတ်တမ်းသွင်းရုံထက်မကပါ။ ကိုယ်ပိုင်လေ့လာမှု၊ မှန်မှန်စည်းဝေးတက်ခြင်းနှင့် လယ်ကွင်းဓမ္မအမှုတွင် ဇွဲရှိရှိပါဝင်ခြင်းတို့တွင် တိုးတက်နေခြင်းလည်းပါဝင်သည်။ ကယ်တင်ခြင်းရရန် သမ္မာတရားပညာကို သူတစ်ပါးအားရစေခြင်းလည်း ပါဝင်သေးသည်။ ‘ကျမ်းစာကိုအမှီပြု၍ ဆွေးနွေးနှီးနှောခြင်း’ အစွမ်းထက်မြက်လာရန် ကြိုးစားဖို့လည်းလိုပါသည်။ (တ၊ ၁၇:၂) ပါရမီရင့်ကျက်လာရန် အချိန်ပေးဖို့လိုသည်။ ကိုယ်ကိုယ်တိုင်၏ဘုရားရေးရာဆက်ကပ်အပ်နှံခြင်းဝတ် နှင့် လယ်ကွင်းဆင်း၍ အတွေ့အကြုံရယူခြင်းတို့အပေါ် များစွာမူတည်သည်။ ကိုယ်ကိုယ်တိုင်၏ ဘုရားရေးရာဆက်ကပ်အပ်နှံခြင်းဝတ် မည်မျှနက်ရှိုင်းသည်ကို ထိန်းသိမ်းပေးနိုင်သည်မှန်သော်လည်း အတွေ့အကြုံများလာရန် ပါရမီရင့်ကျက်သော အခြားညီအစ်ကို၊ ညီအစ်မများထံမှ အကူအညီတောင်းခံခြင်းသည် ပညာရှိလမ်းစဉ်ဖြစ်ပါသည်။ အထူးသဖြင့် လယ်ကွင်းဓမ္မအမှုတွင် သူတို့၏အတွေ့အကြုံမှ သင်ယူစရာများစွာရှိသည်။ မိမိဖာသာစမ်းတဝါးဝါးဖြင့် အရာခပ်သိမ်းကို သင်ယူတတ်မြောက်လာစရာမလိုပါ။

^၉ အတွေ့အကြုံမရှိသူများအတွက် အကူအညီ။ အကူအညီပေးခြင်းပုံစံကို ခရစ်ယာန်အသင်းတော်တည်ထောင်ခါစကတည်းက ချမှတ်ထားသည်။ တပည့်တော်များကို ယေရှုသွန်သင်ပေးတော်မူခဲ့သည်။ (မာ၊ ၃:၁၄။ လု၊ ၉:၁။ ၁၀:၁) သူတို့သည်လည်း အခြားသူများကို တစ်ဆင့်သွန်သင်ပေးသည်။ တိမောသေသည် တမန်တော်ပေါလုထံမှ အထူးအားပေးမှုနှင့်အကူအညီရရှိခဲ့ပါသည်။ တပည့်တော်အာပေါလုသည် သူ့ထက်ရင့်ကျက်သော အာကုလနှင့်ပြစ်ကိလတို့၏ အကူအညီကြောင့် တိုးတက်လာခဲ့ပါသည်။ (တ၊ ၁၈:၂၄-၂၇။ ၁ ကော၊ ၄:၁၇) ယနေ့လည်း ခရစ်ယာန်အသင်းတော်ရှိ ပါရမီရင့်ကျက်သောအသင်းသားများသည် သူတို့ပုံသက်သေကိုအတုယူကာ အတွေ့အကြုံနုနယ်သေးသည့် အထူးသဖြင့် လူသစ်များနှင့်လူငယ်များကို သွန်သင်အားပေးကြပါသည်။ ရောမ ၁၅:၁၊ ၂ ဆိုသည်အတိုင်းပင် “အားရှိသောငါတို့သည် ကိုယ်အလိုသို့မလိုက်၊ အားနည်းသောသူတို့၏အားနည်းခြင်းကို သည်းခံရကြမည်။”

^၁၀ မိမိသားသမီးများ ဝိညာဉ်ရေးဘက်တိုးတက်ရန် အပြုသဘောပါပါလုပ်ကိုင်ခြင်းငှာ မိဘများမှာတာဝန်ရှိသည်။ ယင်းသို့ပြုရန် မိသားစုသင်အံမှု၊ ကိုယ်ပိုင်လေ့လာမှုပြုတတ်ရန် သားသမီးများကိုသွန်သင်ပေးခြင်း၊ စည်းဝေးများကိုမှန်မှန်တက်၍ ပါဝင်ဖြေဆိုခြင်း၊ သင်ယူတတ်မြောက်လာသည့်အရာများကို ကျင့်သုံးခြင်းတို့ပါဝင်သည်။ (ဧ၊ ၆:၄။ ၁ တိ၊ ၅:၈) အထူးသဖြင့် အသင်းတော်စာအုပ်ကြီးသင်တန်းမှူးများသည် မိမိတို့၏စာအုပ်ကြီးသင်တန်းနှင့် လယ်ကွင်းလုပ်ငန်းအုပ်စုရှိသူအပေါင်းအား ဝိညာဉ်ရေးဘက်တိုးတက်ရန် စီစဉ်ပေးဖို့ ဦးစီးဦးဆောင်သင့်သည်။ လုပ်ငန်းတော်ကြီးကြပ်မှူးနှင့် အခြားအကြီးအကဲများအပြင် ဓမ္မအမှုထမ်းများနှင့် အခြားအသင်းသားများလည်း ကူညီပေးနိုင်ပါသည်။

^၁၁ လိုအပ်ရာကိုပေးကမ်းပါ။ ကိုယ်ပိုင်လေ့လာမှုပြုလုပ်ခြင်းအစရှိသည့် ခရစ်ယာန်လုပ်ငန်းတစ်မျိုးတစ်မည်၌သာ အကူအညီလိုနေခြင်းဖြစ်ကောင်းဖြစ်မည်။ လက်တွေ့ကျလေ့လာမှုအစီအစဉ်ရှိဖို့အတွက် အကြံပြုချက်ပေးရန်လိုနေသူတစ်ဦးဖြစ်မည်။ အခြားတစ်ဦးမူကား အဖြေများရှာ၍ပေးခြင်း၊ သို့မဟုတ် စည်းဝေး၌တာဝန်များပြင်ဆင်တတ်ခြင်းဘက် အကူအညီလိုနေပေမည်။ အခြားသူများမှာမူ ကျမ်းစာအကြောင်းများကို ဆည်းပူးလေ့လာတတ်ရန် အကူအညီလိုနေပေမည်။

^၁၂ လူသစ်အမြောက်အမြားကျလျှင် လယ်ကွင်းဓမ္မအမှုတွင် အကူအညီလိုကြပါသည်။ ကြေညာသူတစ်ဦးသည် တစ်အိမ်မှတစ်အိမ်လုပ်ငန်း၊ ပြန်လည်ပတ်မှုပြုခြင်း၊ ကျမ်းစာသင်အံမှုစပေး၍ ဆက်ကျင်းပနိုင်ခြင်းဘက် ပိုမိုထိရောက်သူဖြစ်လိုပေမည်။ Reasoning စာအုပ်၊ သို့မဟုတ် ကျွန်ုပ်တို့နိုင်ငံတော်ဓမ္မအမှု တွင်အကြံပြုထားသောနိဒါန်းနှင့် တင်ဆက်ပုံများကိုအသုံးပြုကာ တစ်ကြိမ်နှစ်ကြိမ်လေ့ကျင့်လိုက်ရုံသာလိုပေမည်။ အခြားသူများအတွက်မူ လယ်ကွင်းလုပ်ငန်းတွင် လက်တွေ့ကျအစီအစဉ်ရှိရန် အကြံပြုချက်များနှင့် ယင်းအစီအစဉ်အရ လုပ်ဆောင်သွားခြင်းဘက် အကူအညီပေးဖို့သာလိုအပ်ပေမည်။ အကူအညီလိုသူနှင့်အတူတွဲအမှုဆောင်ရန် အတိအကျစီစဉ်ပေးခြင်းဖြင့် ရည်ရွယ်ချက်ပန်းတိုင်သို့တိုးတက်ရန် အကူအညီပေးနိုင်ပေမည်။

^၁၃ ကျွန်ုပ်တို့၏ဝိညာဏတိုးတက်မှုကို ထင်ရှားစေရန် ဘုရားသခင့်နှုတ်ကပါဌ်တော်က အားပေးတိုက်တွန်းထားပါသည်။ ဤသို့ပင် လုပ်ဖော်ဆောင်ဖက်ချင်းတိမောသေအား ပေါလုမှာကြားခဲ့သည်။ (၁ တိ၊ ၄:၁၅) ထိုအားပေးမှုနှင့်အညီ အားကစားပြိုင်ပွဲဝင်ဖို့အတွက်၊ သို့မဟုတ် ဝိညာဏစစ်ပွဲတွင်အောင်မြင်စွာတိုက်ခိုက်နိုင်ရန်အတွက် လေ့ကျင့်ပေးရန်လိုအပ်ကြောင်း တမန်တော်အလေးအနက်ဖော်ပြခဲ့သည်။ (၁ ကော၊ ၉:၂၄-၂၇။ ၂ ကော၊ ၁၀:၅၊ ၆) ကျွန်ုပ်တို့တွင် စစ်မှန်သောခရစ်ယာန်ယုံကြည်ခြင်း၏ ရှင်သန်သောပုံသက်သေများထင်ရှားပေါ်လွင်နေရန် ဘုရားသခင့်အလိုတော်နှင့်ပတ်သက်၍ သိရှိလာသမျှကို လက်တွေ့ကျင့်သုံးရန်လျင်မြန်သင့်သည်။ ထိုနည်းတူပင် ယေရှုခရစ်၏ဆက်ကပ်အပ်နှံတပည့်များဖြစ်လာကြရန် သူတစ်ပါးကိုသွန်သင်ပေးနိုင်စွမ်းတိုးတက်နေသင့်သည်။​—ယာ၊ ၁:၂၂-၂၅။ ၁ တိ၊ ၄:၁၂-၁၆။

^၁၄ တိုးတက်မှုတွင် စုံစမ်းခြင်းများကိုခံရပ်နိုင်ခြင်းပါဝင်။ ယေရှုခရစ်ပင်လျှင် ဆင်းရဲဒုက္ခခံခြင်းအားဖြင့် တန်ဖိုးဖြတ်မရသင်ခန်းစာများရရှိခဲ့သည်။ (ဟေ၊ ၅:၈) ကျွန်ုပ်တို့လည်း ထပ်တူအကျိုးခံစားနိုင်သည်။ ထိုနည်းလည်းကောင်းပင် ယာကုပ် ၁:၂၊ ၃ တွင်ထောက်ခံထားသည့် အပြုသဘောပါသည့်စိတ်ထားရှိခြင်းအားဖြင့် ဝိညာဏတိုးတက်မှုတိုးပွားလာလိမ့်မည်။ “ငါညီအစ်ကိုတို့၊ သင်တို့၏ယုံကြည်ခြင်းကို စစ်ကြောစုံစမ်းခြင်းအရာသည် သည်းခံခြင်းကိုပွားစေတတ်သည်ဟုသိမှတ်လျက် အထူးထူးအပြားပြားစုံစမ်းနှောင့်ယှက်ခြင်းနှင့်တွေ့ကြုံသောအခါ ဝမ်းမြောက်စရာအကြောင်းသက်သက်ဖြစ်သည်ဟုမှတ်ကြလော့။” သို့ဖြစ်၍ နာတာရှည်ရောဂါများ၊ စီးပွားရေးအခက်အခဲများ၊ ယုံကြည်ခြင်းမတူသူနှင့် အိမ်ထောင်ဖက်ခြင်း၊ ရပ်ကွက်တွင် အတိုက်အခံကြုံရခြင်း၊ သို့မဟုတ် ဆိုးရွားသောအခြားအခြားအခြေအနေများကို ရင်ဆိုင်နေရဦးတော့ ယေဟောဝါ၏အကူအညီဖြင့် ယင်းတို့ကိုအောင်မြင်စွာဖြေရှင်းနိုင်၍ ကိုယ်တော့်ဝတ်ပြုရေးတွင် ဆက်တိုးတက်နေနိုင်ကြောင်း ယေဟောဝါ၏အာမခံချက်ကို ရရှိထားပါသည်။ (၁ ကော၊ ၁၀:၁၃။ ၂ ကော၊ ၁၂:၉။ ၁ ပေ၊ ၅:၈-၁၁) အခြေအနေအမျိုးမျိုးအောက်တွင် တည်ကြည်ခြင်းအားဖြင့်၊ ‘ဘုရားသခင်သည် အရာရာ၌ ယေရှုခရစ်အားဖြင့်ဘုန်းတော်ထင်ရှားစေမည်အကြောင်း၊ ဘုရားသခင်၏ဗျာဒိတ်တော်နှင့်အညီ ဟောပြောကာ ဘုရားသခင်ပေးသနားတော်မူသောအစွမ်းသတ္တိအတိုင်း ဆောင်ရွက်’ ခြင်းအားဖြင့် ဖြစ်မြောက်အောင်မြင်ပါလိမ့်မည်။​—၁ ပေ၊ ၄:၁၁။

^၁၅ ထပ်၍တိုးတက်ခြင်းငှာ အကူအညီကိုလက်ခံပါ။ ဝိညာဉ်ရေးဘက်ထပ်ဆင့်တိုးတက်ဖို့ရန် အကူအညီလိုအပ်နေသူဖြစ်ပါက အသင်းတော်ရှိ သာ၍အတွေ့အကြုံရင့်ကျက်သောသူ၏အကူအညီကို လက်ခံယူရန်အသင့်ရှိပါ။ အကူအညီပေးမည်ဟု ကမ်းလှမ်းချက်မရသည်တိုင် အကူအညီရရှိနိုင်သည့်အခွင့်အရေးကို လက်မလွတ်စေပါနှင့်။ မရှက်ပါနှင့်။ အကူအညီတောင်းခံပါ။ အသင်းတော်ရှိအတွေ့အကြုံရင့်သူ မည်သူမဆို၏အကူအညီကို လွတ်လပ်စွာတောင်းယူပါ။ သို့မဟုတ်လျှင်လည်း သင့်အသင်းတော်စာအုပ်ကြီးသင်တန်းမှူး၊ လုပ်ငန်းတော်ကြီးကြပ်မှူး၊ အခြားအကြီးအကဲတစ်ဦးဦးထံမှ လိုအပ်နေသောအကူအညီကို တောင်းဆိုနိုင်ပါသည်။​—ကမ္ဘာဦး ၃၂:၂၆။ မဿဲ ၇:၇၊ ၈ နှိုင်းယှဉ်။

^၁၆ ယေဟောဝါ၏စစ်မှန်သောဝတ်ပြုရေးတောင်တော်သို့ တဖွဲဖွဲတက်သွားနေကြသည့် အရေအတွက်တိုး၍များလာနေသော အပြည်ပြည်ဆိုင်ရာ “လူအုပ်ကြီး” အဝင်ဖြစ်ရခြင်းသည် ထူးမြတ်လှသောအခွင့်အရေးပါတကား။ (ဗျာ၊ ၇:၉) ကျွန်ုပ်တို့နှင့်အတူ တက်သွားကြရန် သူတစ်ပါးကိုပါဖိတ်ခေါ်ပေးနိုင်ခြင်းသည်လည်း အခွင့်ထူးဖြစ်သည်။ ယင်းကိုတန်ဖိုးထားစွာဖြင့်၊ ထပ်ဆင့်တိုးတက်ခြင်းငှာ အပြုသဘောပါပါ ဆက်လုပ်ကိုင်နေပြီး ကိုယ်တိုင်၌ဝိညာဉ်ရေးစိတ်ထားတိုးပွားစေခြင်း၊ ယေဟောဝါ၏လုပ်ငန်း၌ ကျွန်ုပ်တို့နှင့်အတူ သူတစ်ပါးလည်းတိုးတက်နိုင်ရန် အတတ်နိုင်ဆုံးကြိုးစားကူညီပေးနေကြစို့လေ။