မြင့်မြတ်သောသွန်သင်ခြင်းသည် တန်ခိုးပါစွာ ဩဇာလွှမ်းမိုး

^၁ မြင့်မြတ်တော်မူသောအရှင် ဖန်ဆင်းရှင်၊ ယေဟောဝါဘုရားသခင်၏သွန်သင်မှုကို ကျွန်ုပ်တို့ခံရခြင်းသည် အခွင့်ထူးလှပါသည်တကား! (ဆာ၊ ၅၀:၁; ဟေရှာ၊ ၃၀:၂၀ခ) ယနေ့ စစ်မှန်သောဝတ်ပြုရေးထမ်းဆောင်ရာ ကိုယ်တော်၏တောင်တော်သို့ လူမျိုးအပေါင်းတို့မှ မြောက်မြားစွာသောသူတို့သည် ကိုယ်တော်၏ သွန်သင်မှုကိုခံယူခြင်းငှာ တဖွဲဖွဲလာနေကြသည်။ (မိ၊ ၄:၂) အခြားသန်းပေါင်းများစွာသောသူတို့သည် လူ့အတွေးအခေါ်နှင့် လောကီပညာကိုချီးမြှင့်သည့်ကျောင်းများကို တက်ကြပါသည်။ သို့သော် ယေဟောဝါနှင့် ကိုယ်တော်၏နှုတ်ကပါဌ်တော်ကို လျစ်လျူရှုသောပညာသည် ဘုရားသခင့်မျက်မှောက်တော်တွင် မိုက်မဲပါသည်။ ယင်းကိုလိုက်လျှောက်သူများသည်လည်း အသိပညာကင်းမဲ့ကြလေသည်။​—ဆာ၊ ၁၄:၁; ၁ ကော၊ ၁:၂၅။

^၂ ဘုရားသခင့်နှုတ်ကပါဌ်တော်နှင့်အတူ ကိုယ်တော်၏ဝိညာဉ်တော်သည် ကမ္ဘာချီ ညီအစ်ကိုများအသင်းအပင်းတွင် ကျွန်ုပ်တို့အား စည်းလုံးမှုရှိစေပါသည်။ ကျွန်ုပ်တို့ဥပဓိရုပ်ကို ပုံသွင်းပေးကာ နတ်ဆိုးနှင့်ဆိုင်သောသွန်သင်ချက်များမှ ကာကွယ်ထားသည်။ သာ၍ကောင်းသောဓမ္မအမှုဆောင်များဖြစ်လာကြရန်လည်း လေ့ကျင့်ပေးပါသည်။ မြင့်မြတ်သောသွန်သင်ခြင်းမှ ကိုယ်ကိုယ်တိုင် အဘယ်အကျိုးခံစားခဲ့ပြီနည်း။ မြင့်မြတ်သောသွန်သင်ခြင်း ခရိုင်စည်းဝေးပွဲကြီးနှင့် ပတ်စဉ်စည်းဝေးများကိုပါ အားလုံးတက်ရောက်ကြရန် အခိုင်အမာတိုက်တွန်းပေးပါသည်။

^၃ ခရစ်ယာန်အသက်တာအပေါ် အကျိုးသက်ရောက်မှု– မြင့်မြတ်သောသွန်သင်ခြင်းသည် ကျွန်ုပ်တို့သြတ္တပ္ပစိတ်များကို ပုံသွင်းနိုင်ရန် အကူအညီပေးပါသည်။ ကျွန်ုပ်တို့အားလုံး ဩတ္တပ္ပစိတ်နှင့်တကွ ဖွားမြင်လာကြသည်။ သို့သော် ဖြောင့်မတ်ခြင်းတရားလမ်းအတိုင်းလိုက်ပြီး ယေဟောဝါအလိုတော်နှင့်တွေ့သောလုပ်ငန်းတော်တွင် ပါဝင်နေနိုင်ကြရန် ယင်းကိုလေ့ကျင့်ပေးရမည်။ (ဆာ၊ ၁၉:၇၊ ၈; ရော၊ ၂:၁၅) လောကီသားများသည် ဘုရားသခင့်နှုတ်ကပါဌ်တော်အတိုင်း မိမိတို့အတွေးအခေါ်ကို ပုံမသွင်းခဲ့သောကြောင့် သူတို့သည် ဇဝေဇဝါဖြစ်ကြကာ အမှားအမှန်ကို အသေအချာမသိကြပါ။ စာရိတ္တနှင့် ယင်း၏စံချိန်များနှင့်ပတ်သက်၍ အငြင်းပွားနေကြခြင်းမှာမိမိကမှန်သည်ဟု ထင်သည့်အတိုင်း ပြုလုပ်မည့်အကြံရှိခြင်းကြောင့်တည်း။ အများစုက မိမိဘဝလမ်းစဉ်ကိုမိမိဘာသာ လွတ်လပ်စွာဆုံးဖြတ်လိုပါသည်။ စစ်မှန်သောဉာဏ်ပညာ၏ တစ်ပါးတည်းသောပင်ရင်းအမြစ်၏စကားကို နားမထောင်လိုကြချေ။ (ဆာ၊ ၁၁၁:၁၀; ယေ၊ ၈:၉; ဒံ၊ ၂:၂၁) သို့သော် မြင့်မြတ်သောသွန်သင်ခြင်းက ကျွန်ုပ်တို့အတွက် ဤကဲ့သို့သောပြဿနာများကို လျော့ပေါ့စေခဲ့ပါပြီ။ ကိုယ်တော်၏သွန်သင်မှုကို ကျွန်ုပ်တို့ရရှိခဲ့သောကြောင့် ဘုရားသခင့်အိမ်ထောင်စုအနေနှင့် စည်းလုံးနေနိုင်ပြီ။ သို့ ဖြစ်၍ ကျွန်ုပ်တို့၏ဓမ္မအမှုတွင် အလုပ်များနေလျက် ကြည်လင်သောသြတ္တပ္ပစိတ်နှင့် အနာဂတ်ကို စိတ်ချလက်ချ ရင်ဆိုင်ကြပါသည်။

^၄ မြင့်မြတ်သောသွန်သင်ခြင်းက “ခပ်သိမ်းသောသြဝါဒလေ” ကိုတွန်းလှန်နိုင်ရန် အကူအညီရရှိကြပါသည်။ (ဧ၊ ၄:၁၄) အပြစ်ရှာသူများ၊ မယုံသင်္ကာဖြစ်သူများ၊ ကိုယ့်ဘာသာကိုယ် ဆုံးဖြတ်ကြ၍ စာရိတ္တယိုယွင်းစေသည့်အတွေးအခေါ်ပညာကို ကျွန်ုပ်တို့အထင်မကြီးကြပါ။ ယေဟောဝါ၏သွန်သင်ခြင်းကို ခံလိုကြသဖြင့် လူအများကြုံတွေ့နေရသည့် ဝမ်းနည်းခြင်းနှင့် နှလုံးပူဆွေးမှုကို ရှောင်ကြဉ်နိုင်ကြပါသည်။ ယေဟောဝါ၏ပညတ်တရားနှင့် သတိပေးချက်တို့သည် ‘ကျွန်ုပ်တို့နောက်မှ’ “ဤမည်သောလမ်းသည်မှန်၏။ ဤလမ်း၌သွားလော့” ဟုပြောသောစကားသံနှင့် တူပါသည်။​—ဟေရှာ၊ ၃၀:၂၁။

^၅ ကျွန်ုပ်တို့အစည်းအဝေးမျာနှင့် ဓမ္မအမှု– ဟေဗြဲ ၁၀:၂၃-၂၅ ကိုဘုရားသခင့်အမိန့်တော်အဖြစ် ကျွန်ုပ်တို့ယူမှတ်ထားကြပါသည်။ ကျွန်ုပ်တို့အား ယေဟောဝါသွန်သင်ပေးတော်မူသည့်နေရာမှာ အသင်းတော်အစည်းအဝေးများတွင်ဖြစ်သည်။ အစည်းအဝေးများကို အမြဲတက်ရန် ကျွန်ုပ်တို့ထုံးစံရှိသလော။ သို့မဟုတ် စည်းဝေးတက်ခြင်းကို အရေးမကြီးလှသည့်အမှုကဲ့သို့ ယူမှတ်ပါသလော။ အတူတကွစည်းဝေးခြင်းအမှုသည် ကျွန်ုပ်တို့ဝတ်ပြုရေးအဝင်ဖြစ်သည်ကို သတိရပါ။ ယင်းကို မလုပ်လျှင်ဖြစ်သည့်အမှုကဲ့သို့ မယူမှတ်သင့်ပါ။ ယေဟောဝါပြင်ဆင်ထားတော်မူသည့် ဝိညာဏကျွေးမွေးခြင်းအစီအစဉ်မှ မည်သည့်အပိုင်းကဏ္ဍကိုမျှ ကျွန်ုပ်တို့လက်လွှတ်၍မဖြစ်နိုင်ပါ။

^၆ ဘုရားသခင်ထံ မောရှေဆုတောင်းသည်ကား: “အကျွန်ုပ်တို့သည် ပညာတရားကို နှလုံးသွင်းမိမည်အကြောင်း ကိုယ်နေ့ရက်ကာလကို ရေတွက်နိုင်စေခြင်းငှာ သွန်သင်တော်မူပါ” ဖြစ်သည်။ (ဆာ၊ ၉၀:၁၂) ယင်းအတိုင်း ကျွန်ုပ်တို့လည်း ဆုတောင်းကြပါသလော။ အဖိုးဖြတ်မရသည့်နေ့စဉ်နေ့တိုင်းကို ကျွန်ုပ်တို့တန်ဖိုးထားကြပါသလော။ တန်ဖိုထားမည်ဆိုလျှင် ကြီးမြတ်တော်မူသောသွန်သင်ပို့ချရှင် ယေဟောဝါဘုရားသခင်၏ဘုန်းတော်ထင်ရှားစေခြင်းငှာ နေ့စဉ်နေ့တိုင်း အကျိုးရှိရှိအသက်ရှင်ခြင်းအားဖြင့် “ပညာတရားကို နှလုံးသွင်း” ကြပါလိမ့်မည်။ မြင့်မြတ်သောသွန်သင်ခြင်းက ထိုသို့ပြုလုပ်နိုင်ရန် အထောက်အကူပြုပါလိမ့်မည်။