အထူးအစည်းအဝေးနေ့ အစီအစဉ်အသစ်

^၁ သတင်းကောင်းကို အဘယ်ကြောင့် အဆက်မပြတ်ကြေညာသင့်သနည်း။ သတင်းကောင်းဟောပြောသူ၌ ရှိသင့်ရှိအပ်သောလိုအပ်ချက်များကား အဘယ်နည်း။ ရှက်ကြောက်သူများပင် သူတစ်ပါးအား သတင်းကောင်းကို မည်သို့စတင်ဟောပြောနိုင်သနည်း။ “သတင်းကောင်း၏ဓမ္မအမှုဆောင်များအဖြစ် အရည်အချင်းပြည့်မီခြင်း” အဓိကခေါင်းစဉ်ရှိ လာမည့်နွေရာသီအတွင်း စတင်ကျင်းပမည့် အထူးအစည်းအဝေးနေ့အစီအစဉ်တွင် ဤမေးခွန်းများနှင့် အခြားစဉ်းစားစရာမေးခွန်းများကို ဖြေဆိုပါလိမ့်မည်။—၂ ကောရိန္သု ၃:၅ နှိုင်းယှဉ်။

^၂ ယေဟောဝါ၏လူမျိုးအနေနှင့် ကျွန်ုပ်တို့၏အမူအကျင့်ကို သတိပြုသင့်သည်။ လူငယ်များသည် သက်တူရွယ်တူများ၏ဖိအားကို မည်သို့တွန်းလှန်နိုင်ခဲ့သည့် အားရှိဖွယ်တွေ့ ကြုံမှုများကို တင်ပြကြမည်။ သားသမီးများကို ဘုရားသခင့်ဓမ္မအမှုဆောင်များဖြစ်လာစေရန် မိဘများ လေ့ကျင့်ပေးဖို့လိုကြောင်း မေတ္တာပါအားပေးစကားများ ကြားနာရမည်။ ဟောပြောဖို့လိုကြောင်းနှင့် ယင်းကြောင့် ကျွန်ုပ်တို့သော်လည်းကောင်း၊ ကျွန်ုပ်တို့၏တရားစကားကို နားထောင်သူများသော်လည်းကောင်းရမည့် ကောင်းချီးများကို တန်ဖိုးထားလေးမြတ်ရန် ကျွန်ုပ်တို့အားလုံးအကူအညီရလိမ့်မည်။—၁ တိ. ၄:၁၆။

^၃ ထိုနေ့ရက်တွင် နှစ်ခြင်းပေးခြင်းသည် အထူးစိတ်ဝင်စားစရာဖြစ်လိမ့်မည်။ ယင်းသို့မပြုမီ ဆက်ကပ်အပ်နှံခါစသူများအတွက် အထူးရည်ရွယ်ဟောပြောသည့် ကျမ်းစာအခြေခံသောဟောပြောချက်ကို ပေးပါမည်။ နှစ်ခြင်းယူခြင်းအကြောင်းကိုဆွေးနွေးကာ ယင်း၏အနက်အဓိပ္ပာယ်ကိုရှင်းပြရာတွင် တက်ရောက်သူအားလုံးသည် ဂရုစိုက်နားထောင်လိုကြမည်။ စည်းဝေးတွင် နှစ်ခြင်းယူလိုသူ မည်သူမဆိုသည် ဦးစီးကြီးကြပ်မှူးအား ကြိုတင်အကြောင်းကြားထားသင့်သည်။ သို့မှသာသူသည် သတ်မှတ်ထားသောမေးခွန်းများကို နှစ်ခြင်းယူမည့်သူများနှင့် အကြီးအကဲများဆင်ခြင်သုံးသပ်အောင် အချိန်အလုံအလောက်ရှိရန် စီစဉ်ပေးနိုင်ပါလိမ့်မည်။

^၄ အမှတ်ထင်ထင်ဖြစ်မည့် အခြားတစ်ခုမှာ ဧည့်သည်ဟောပြောသူပေးမည့် အဓိကဟောပြောချက်ဖြစ်သည်။ ယင်း၏ခေါင်းစဉ်မှာ “ဘုရားသခင့်ဓမ္မအမှုဆောင်များအဖြစ် အရည်အချင်းပြည့်မီပြီး အသင့်ရှိခြင်း” ဖြစ်သည်။ ဓမ္မအမှုဆောင်များအဖြစ် ကျွန်ုပ်တို့ကို ပြင်ဆင်ပေးမည့် အဓိကပြင်ဆင်ချက်လေးခုကို ဆွေးနွေးတင်ပြလိမ့်မည်။ ဟောပြောချက်တွင် ယုံကြည်ခြင်းတည်ဆောက်သော တွေ့ကြုံမှုများ ပါဝင်ပါမည်။

^၅ အစီအစဉ်အစမှအဆုံးတက်ဖြစ်ရန် ယခုကတည်းက စီစဉ်ပါ။ စိတ်ဝင်စားသူများနှင့် ကျမ်းစာသင်သားများပါ ဤနေ့ရက်၏ သီအိုကရက်တစ်ပညာပေးအစီအစဉ်မှ အကျိုးခံစားရစေရန် သူတို့ကို ဖိတ်ဖြစ်အောင်ဖိတ်ပါ။ ဤနည်းဖြင့် သတင်းကောင်း၏ ဓမ္မအမှုဆောင်များအဖြစ် ကျွန်ုပ်တို့သည် “တတ်စွမ်းနိုင်သောသူ” များ အသေအချာဖြစ်လာနိုင်သည်။