ဘုရားသခင့်နှုတ်ကပါဌ်တော်ကို သင်မှန်ကန်စွာကိုင်တွယ်သလော

^၁ မြေကြီးပေါ်အသက်ရှင်ခဲ့သမျှတွင် ယေရှုခရစ်သည် အကြီးမြတ်ဆုံးဆရာဖြစ်သည်။ ကိုယ်တော်သည် လူတို့၏နှလုံးကိုထိမိသောနည်းဖြင့် မိန့်တော်မူခဲ့သည်၊ သူတို့၏စိတ်လှုပ်ရှားမှုကို နှိုးဆွပေးခဲ့သည်၊ ကောင်းမွန်သည့်အလုပ်များကို လက်တွေ့လုပ်ဆောင်ရန် လှုံ့ဆော်ပေးခဲ့သည်။ (မ. ၇:၂၈၊ ၂၉) ကိုယ်တော်သည် မိမိသွန်သင်ချက်အတွက် ဘုရားသခင့်နှုတ်ကပါဌ်တော်ကို အခြေပြုရာအဖြစ် အမြဲသုံးခဲ့သည်။ (လု. ၂၄:၄၄၊ ၄၅) ကိုယ်တော်သည် မိမိသိနားလည်ခဲ့သမျှနှင့် သွန်သင်ပေးနိုင်ခဲ့သမျှအတွက် ယေဟောဝါဘုရားသခင်အား ဂုဏ်တင်ခဲ့သည်။ (ယော. ၇:၁၆) ယေရှုသည် ဘုရားသခင့်နှုတ်ကပါဌ်တော်ကို မှန်ကန်စွာကိုင်တွယ်ခြင်းဖြင့် မိမိနောက်တော်လိုက်များအတွက် အလွန်ကောင်းမွန်သည့်ပုံသက်သေကိုထားခဲ့သည်။—၂ တိ. ၂:၁၅။

^၂ တမန်တော်ပေါလုသည်လည်း ဘုရားသခင့်နှုတ်ကပါဌ်တော်ကို ထိရောက်စွာကိုင်တွယ်ခြင်းဖြင့် အလွန်ကောင်းမွန်သည့်ပုံသက်သေအဖြစ် အသုံးတော်ခံခဲ့သည်။ သူသည် အခြားသူများကို ကျမ်းစာဖတ်ပြရုံမျှမက လုပ်ဆောင်ခဲ့သည်; ဖတ်သည့်အကြောင်းအရာပေါ် ရှင်းပြပြီး ဆင်ခြင်သုံးသပ်ခဲ့သည်၊ ယေရှုသည် ခရစ်တော်ဖြစ်ကြောင်း ဘုရားသခင့်နှုတ်ကပါဌ်တော်မှ သက်သေတင်ပြသည်။ (တ. ၁၇:၂-၄) အလားတူ နှုတ်သတ္တိနှင့်ပြည့်စုံသောတပည့်တော်အာပေါလုသည် “ကျမ်းစာတော်ကို အထူးပင်တတ်ကျွမ်း” ပြီးသမ္မာတရားကို တန်ခိုးပါစွာတင်ဆက်ရာတွင် ယင်းတို့ကို မှန်ကန်စွာကိုင်တွယ်ခဲ့သည်။—တ. ၁၈:၂၄၊ ၂၈၊ သတင်းကောင်း။

^၃ ဘုရားသခင့်နှုတ်ကပါဌ်တော်ကိုသွန်သင်သူတစ်ဦးဖြစ်ပါ– မျက်မှောက်ခေတ်နိုင်ငံတော်ကြွေးကြော်သူများသည် သမ္မာကျမ်းစာမှရည်ညွှန်းပြီးဆင်ခြင်သုံးသပ်ခြင်းအားဖြင့်နှလုံးရိုးဖြောင့်သူများကို သွန်သင်ပေးရာတွင် အလွန်ကောင်းမွန်သည့်အောင်မြင်မှုရရှိခဲ့ကြသည်။ အဖြစ်အပျက်တစ်ခုတွင် ညီအစ်ကိုတစ်ဦးသည် ဓမ္မဆရာတစ်ဦးနှင့် သူ၏အသင်းသားသုံးယောက်တို့နှင့်အတူ ဆိုးသွမ်းမှုနှင့်ဖြောင့်မတ်မှုတို့၏ နောင်ခံစားရမည့်အကျိုးရလဒ်အပေါ် ဆင်ခြင်သုံးသပ်ရန် ဆက်စပ်နေသောကျမ်းချက်များနှင့်တကွ ယေဇကျေလ ၁၈:၄ ကိုအသုံးပြုနိုင်ခဲ့သည်။ ရလဒ်အနေနှင့် ချာ့ချ်အသင်းသားအချို့သည် စတင်သင်အံမှုပြုကြပြီး သူတို့အထဲမှတစ်ဦးသည် နောက်ဆုံးတွင် သမ္မာတရားကိုလက်ခံခဲ့သည်။ နောက်အဖြစ်အပျက်တစ်ခုတွင် ညီအစ်မတစ်ဦးသည် ခရစ္စမတ်နှင့်မွေးနေ့ပွဲများကို ယေဟောဝါသက်သေများ အဘယ်ကြောင့်မကျင်းပသည်ကို စိတ်ဝင်စားခဲ့သူတစ်ဦး၏ အတိုက်အခံပြုသောခင်ပွန်းသည်ကိုရှင်းပြရန် တောင်းဆိုခံခဲ့ရသည်။ ကျိုးကြောင်းဆင်ခြင် စာအုပ်မှကျမ်းစာအဖြေများကို တိုက်ရိုက်ဖတ်ပြသောအခါ ထိုသူလက်ခံခဲ့သည်။ ထိုသူလက်ခံခဲ့ခြင်းကြောင့် သူ၏ဇနီး အလွန်ပျော်သွားကာ ဤသို့ပြောသည်– “ကျွန်မတို့ ရှင်တို့ရဲ့စည်းဝေးတွေကိုလာခဲ့မယ်နော်။” ယင်းကို ခင်ပွန်းသည် သဘောတူခဲ့ပါသည်တကား!

^၄ ရနိုင်သောအကူအညီကိုအသုံးပြုပါ– ကျွန်ုပ်တို့၏နိုင်ငံတော်ဓမ္မအမှုနှင့် လုပ်ငန်းတော်စည်းဝေးအစီအစဉ်သည် ဘုရားသခင့်နှုတ်ကပါဌ်တော်ကိုကိုင်တွယ်ရာတွင် ကျွန်ုပ်တို့ကိုအကူအညီဖြစ်စေရန်ကောင်းမွန်သောညွှန်ကြားချက်ကိုပေးသည်။ ကြေညာသူများစွာတို့သည် ကျွန်ုပ်တို့အကျိုးအတွက် ထုတ်ဝေပြီး ဖော်ပြထားသော အကြံပြုထားသည့်တင်ဆက်ပုံအမျိုးမျိုးအတွက် လေးမြတ်ကြကာ ယင်းတို့သည် အလွန်ပင်အခန့်သင့်ဖြစ်ပြီး ထိရောက်ကြောင်း သက်သေထူခဲ့ကြသည်။ ကျမ်းစာဖြင့်ကျိုးကြောင်းဆင်ခြင်ခြင်းစာအုပ်တွင် ဘုရားသခင့်နှုတ်ကပါဌ်တော်၌မိန့်ဆိုထားသည့်အဓိကအကြောင်းအရာ ၇၀ ကျော်ကို မှန်ကန်စွာရှင်းပြပုံနှင့်စပ်လျဉ်း၍ အကြံပြုချက်မြောက်မြားစွာပါဝင်သည်။ ထာဝရအသက်ရစေသောအသိပညာစာအုပ်သည် လူသစ်များနားလည်ရန်လိုအပ်သည့် အခြေခံကျသောကျမ်းစာသွန်သင်ချက်အားလုံးကို လိုရင်းအချက်ပေါ်အောင်တိုတုတ်စွာတင်ပြထားသည်။ သီအိုကရက်တစ်ဓမ္မအမှုကျောင်းလမ်းညွှန်စာအုပ်ပါ သင်ခန်းစာ ၂၄ နှင့် ၂၅ တွင် ကျွမ်းကျင်သောသွန်သင်သူများသည် ကျမ်းချက်များကို မည်သို့ လျောက်ပတ်စွာနိဒါန်းပျိုး၊ ဖတ်ရှု၍အသုံးပြုရမည်ကို တင်ပြထားသည်။ ကျွန်ုပ်တို့အတွက်အဆင်သင့်ရရှိထားသော ဤအကူအညီအားလုံးကို ကောင်းကောင်းအသုံးပြုသင့်သည်။

^၅ ကျွန်ုပ်တို့သည် ဘုရားသခင့်နှုတ်ကပါဌ်တော်ကို မှန်ကန်စွာကိုင်တွယ်သောအခါ ကျွန်ုပ်တို့ဟောလိုက်သည့်သူများသည် “အသက်ရှင်ခြင်း၊ တန်ခိုးနှင့်ပြုပြင်ခြင်း . . . စိတ်နှလုံးအကြံအစည်များကိုလည်းသိမြင်တတ်” သည်ကိုတွေ့ရပေမည်။ (ဟေဗြဲ ၄:၁၂) ဘုရားသခင့်နှုတ်ကပါဌ်တော်ဖြင့်အောင်မြင်မှုရခြင်းက ပို၍ထူးကဲသောရဲစွမ်းသတ္တိဖြင့်ဟောပြောရန် ကျွန်ုပ်တို့အားလှုံ့ဆော်မှုဖြစ်စေမည်တကား!—တ. ၄:၃၁။