ဓမ္မအမှုတွင်—မိသားစုဝင်များ အပြည့်အဝပါဝင်ရန်အတွက် ပူးပေါင်းလုပ်ဆောင်ပုံ

^၁ ယေဟောဝါ၏နာမတော်ကို လူထုရှေ့ချီးမွမ်းကာ ခရစ်ယာန်ဓမ္မအမှုတွင် လင်ယောက်ျားနှင့်ဇနီး၊ မိဘနှင့်သားသမီးတို့အတူတကွလုပ်ဆောင်သည်ကို တွေ့ မြင်ရခြင်းထက် ပို၍ကြည်နူးစရာကောင်းသည့်အရာရှိနိုင်ပါမည်လော။ (ဆာ. ၁၄၈:၁၂၊ ၁၃) မိသားစုအားလုံးသည် လယ်ကွင်းလုပ်ငန်းတွင် မှန်မှန်ပါဝင်ရန်အတွက် လုပ်ရိုးလုပ်စဉ်ကောင်းတစ်ခုရှိသင့်သည်။ သင့်မိသားစုတွင် ဓမ္မအမှု၌အသုံးပြုရန် အပတ်စဉ် သတ်မှတ်ထားသောရက်တစ်ရက်ရှိသလော။ ရှိမည်ဆိုလျှင် ယောက်တိုင်းသည် မည်သည့်အစီအစဉ်ရှိသည်ကို အတိအကျသိရှိကာ အပြည့်အဝပါဝင်နိုင်သည်။—သု. ၂၁:၅က။

^၂ မိသားစုလုပ်ငန်းတော်နေ့မတိုင်မီ သင့်မိသားစုအသုံးပြုမည့်တင်ဆက်နည်းများကို ပြင်ဆင်ရန် ပူးပေါင်းလုပ်ဆောင်သည့်အစီအစဉ်တစ်ခုကို ပြုလုပ်ပါလေ။ လေ့ကျင့်မှုအစီအစဉ်များသည် အကူအညီအဖြစ်ဆုံးဖြစ်စေနိုင်ပြီး ယင်းတို့သည် ပူးပေါင်းဆောင်ရွက်လိုသည့် မိသားစုစိတ်ဓာတ်အမှန်ကို ဖြစ်ပေါ်စေသည်။ လယ်ကွင်းဓမ္မအမှုသည် မိသားစုအရေးကိစ္စတစ်ခုဖြစ်ပြီး မိသားစုဝင်တိုင်း ကောင်းစွာပြင်ဆင်ကြသောအခါ မည်မျှအကျိုးဖြစ်ထွန်းပါမည်တကား!

^၃ နယ်လှည့်ကြီးကြပ်မှူးတစ်ဦးသည် မဂ္ဂဇင်းလုပ်ငန်းတွင် မိသားစုတစ်ခုလုံးနှင့်အတူပါဝင်ခဲ့သည်။ သူသည် သမီးများထဲမှတစ်ဦးနှင့်အတူ တစ်အိမ်မှတစ်အိမ်အမှုဆောင်နေစဉ် ထိုအမျိုးသမီးငယ်က “ကျွန်မနဲ့ဘယ်လောက်ကြာကြာအတူအမှုဆောင်မလဲ” ဟုမေးသည်။ ထို့နောက် မိမိ၏ဖခင်နှင့် နောက်တစ်အိမ်တွင် အတူအမှုဆောင်မည်ဖြစ်ကြောင်း အမျိုးသမီးငယ်ကရှင်းပြသည်။ သမီးဖြစ်သူနှင့်ဖခင်သည် လုပ်ငန်းတော်တွင်အတူလုပ်ဆောင်ရခြင်းကို အမှန်ပျော်ရွှင်ကြကြောင်းထင်ရှားသည်။ အလွန်ကောင်းသည့် မိသားစုစိတ်ဓာတ်ပါတကား!

^၄ မိသားစုအချို့သည် တစ်နှစ်တွင်တစ်လ အရန်ရှေ့ဆောင်အတူလုပ်နိုင်ကြပေမည်။ သို့မဟုတ် အနည်းဆုံး မိသားစုထဲမှတစ်ဦးသည် အရန်ရှေ့ဆောင်ဆက်တိုက်လုပ်နိုင်ပေမည် သို့မဟုတ် မှန်မှန်ရှေ့ဆောင်တစ်ဦးအဖြစ်ပင် စာရင်းသွင်းနိုင်ပေမည်။ ကောင်းစွာဖွဲ့စည်းစီစဉ်မှုနှင့်ပူးပေါင်းဆောင်ရွက်မှုတို့နှင့်တကွ ရှေ့ဆောင်လုပ်နေသူတစ်ဦးကို ထောက်မပေးခြင်းဖြင့် အိမ်သားအားလုံးသည် လုပ်ငန်းတော်တွင် မိမိတို့၏တစ်ဦးစီပါဝင်မှုကို တိုးမြှင့်နိုင်ကောင်းတိုးမြှင့်နိုင်ပေမည်။ မိသားစုသည် ဤသို့တိုးမြှင့်လုပ်ဆောင်မှုနှင့် ဓမ္မအမှုတွင်ရရှိခဲ့သည့် တွေ့ ကြုံမှုကောင်းများအားဖြင့် ကောင်းချီးခံစားရမည်မှာသေချာသည်။—မာလ. ၃:၁၀။

^၅ ဧဝံဂေလိဟောပြောခြင်းလုပ်ငန်းတွင် အပြည့်အဝပါဝင်ခြင်းက မိသားစုများအား ရင်းနှီးမှုရှိရန်၊ ဇွဲရှိရန်၊ အကျိုးဖြစ်ထွန်းရန်နှင့် ယေဟောဝါ၏လုပ်ငန်းတွင်ပျော်ရွှင်ရန် အကူအညီဖြစ်စေပါလိမ့်မည်!—ဖိလိပ္ပိ ၂:၁၊ ၂ နှိုင်းယှဉ်။