“ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြုလော့”

^၁ တမန်တော်ပေါလုက တိမောသေအား “ယုံကြည်ခြင်းနှင့်ဆိုင်၍ ကောင်းစွာသောတိုက်လှန်ခြင်းကိုပြု” ရန်မှာကြားခဲ့သည်။ (၁ တိ. ၆:၁၂) ပေါလုကိုယ်တိုင် ထိုစကားများနှင့်အညီနေထိုင်ခဲ့သည်။ သူ့အသက်တာကုန်ဆုံးခါနီးတွင် သူသည် ကောင်းသောတိုက်လှန်ခြင်းကို ကိုယ်တိုင်ကိုယ်ကျပြုခဲ့ပြီဟု ယုံကြည်စိတ်ချစွာပြောခဲ့သည်။ (၂ တိ. ၄:၆-၈) သူသည် မည်သည့်နည်းဖြင့်မဆို ရဲစွမ်းသတ္တိနှင့် ခံနိုင်ရည်တို့ဖြင့် ဓမ္မအမှုကိုဆောင်ရွက်ခဲ့သည်။ သူ၏ပုံသက်သေကိုတုပခြင်းဖြင့် ကျွန်ုပ်တို့သည်လည်း ခရစ်ယာန်ယုံကြည်ခြင်းအတွက် တိုက်လှန်ရာတွင် အတတ်နိုင်ဆုံးလုပ်ဆောင်နေသည်ဟူသော ထပ်တူအတွင်းယုံကြည်စိတ်ချမှုကို ရရှိနိုင်သည်။

^၂ လိုအပ်သောလုံ့လကိုစိုက်ထုတ်ပါ– ပေါလုသည် ကြိုးစားပမ်းစားအမှုဆောင်ခဲ့သည်။ (၁ ကော. ၁၅:၁၀) ကျွန်ုပ်တို့၏ရပ်ကွက်ရှိထိုက်တန်သူများအားလုံးကို ရှာဖွေသည့်အခါတွင်လည်း ထိုသို့ကျွန်ုပ်တို့ပြုကြသည်။ (မ. ၁၀:၁၁) ၎င်းတို့အထဲမှအချို့သူတို့ထံရောက်ရှိဖို့ဟူသည် လမ်းပေါ်တွင် ကျွန်ုပ်တို့တွေ့သူများကို သက်သေခံရန် စောစောအိပ်ရာထရပါမည်။ သို့မဟုတ် လူတို့အား သူတို့၏အိမ်များသို့ ပြန်လာကြပြီးနောက်တွေ့ဆုံရန် မွန်းလွဲနှောင်းပိုင်း သို့မဟုတ် ညနေအစောပိုင်းတွင် အမှုဆောင်ရပါမည်။

^၃ လယ်ကွင်းလုပ်ငန်းအတွက် ကျွန်ုပ်တို့၏စာအုပ်ကြီးသင်တန်းအုပ်စုနှင့်တွေ့ဆုံသည့်အခါ အချိန်တိကျမှုရှိဖို့ မိမိကိုယ်ကိုကြပ်မတ်ပေးရန်နှင့် အစီအစဉ်ဇယားကောင်းရှိရန်လိုသည်။ ဥပမာ၊ ဗေသလမိသားစုဝင်အချို့သည် စနေတနင်္ဂနွေနေ့များတွင် သူတို့တာဝန်ကျရာအသင်းတော်များနှင့်အတူ ဓမ္မအမှုတွင်ပါဝင်ရန် မိနစ် ၆၀ အထိခရီးနှင်ရသည်။ ထို့အပြင် အတော်အတန်ဝေးသည့်ခရီးကိုနှင်ရသော်လည်း အချိန်မီရောက်ကြသည့် ကျွန်ုပ်တို့၏အသင်းတော်ရှိ ကြေညာသူနှင့်မိသားစုအချို့ကို ကျွန်ုပ်တို့ချီးမွမ်းမိကြပေမည်။ ဝီရိယနှင့်စီစဉ်ဆောင်ရွက်မှုဆိုင်ရာ ထိုသို့သောပုံသက်သေများသည် တုပထိုက်သည်။

^၄ ကျွန်ုပ်တို့တွေ့ရှိသောစိတ်ဝင်စားသူအားလုံးထံ ပြန်သွားရန် လှုံ့ဆော်ခံရသင့်သည်။ လမ်းပေါ်တွင် သို့မဟုတ် အလွတ်သဘောအခြေအနေများတွင် စာပေများဝေငှသည့်အခါ၌ပင် လူတစ်ဦး၏လိပ်စာ သို့မဟုတ် တယ်လီဖုန်းနံပါတ်ကို ရယူရန်ကြိုးစားဖို့လိုပါသည်။ ယင်းနောက် စိတ်ဝင်စားမှုကို ပြုစုပျိုးထောင်ပေးရန် သူ့ထံပြန်သွားကာ ကျမ်းစာသင်အံမှုစရန်ကြိုးစားနိုင်သည်။

^၅ လုပ်ငန်းတော်တွင်မှန်မှန်ပါဝင်ပါ– ပေါလုသည် တစ်သမတ်တည်းနှင့် နှံ့နှံ့စပ်စပ်ဟောပြောခဲ့သည်။ (ရော. ၁၅:၁၉) အသင်ကော။ ဓမ္မအမှုတွင် မှန်မှန်ပါဝင်သလော။ ဤလတွင် လယ်ကွင်းလုပ်ငန်း၌ သင်ပါဝင်ခဲ့ပြီလော။ အသင်းတော်စာအုပ်ကြီးသင်တန်းမှူးများသည် ဩဂုတ်လအတွင်း ဓမ္မအမှု၌ မိမိတို့၏အုပ်စုရှိ ယောက်တိုင်းပါဝင်သည်ကို တွေ့ မြင်ရဖို့ စိတ်ဝင်စားကြသည်။ ထိုသို့ပြုရန် သင့်အား သူတို့ကူညီပေးပါလိမ့်မည်။

^၆ သတင်းကောင်းကို အပြည့်အဝထောက်ခံရာတွင် ပေါလု၏ပုံသက်သေကိုတုပခြင်းဖြင့် ကျွန်ုပ်တို့သည် “ယုံကြည်ခြင်းနှင့်ဆိုင်၍ကောင်းစွာသောတိုက်လှန်ခြင်း” ကိုဆက်၍ပြုနေမည်ဖြစ်သည်။