“ဘုရားသခင်သည် ခပ်သိမ်းသောအမှုတို့ကို တတ်နိုင်တော်မူသည်”

^၁ ခရစ်ယာန်အသင်းတော်၏အဓိကလုပ်ငန်းမှာ နိုင်ငံတော်သတင်းကို ကမ္ဘာအနှံ့ဟောပြောရန်ဖြစ်၏။ (မ. ၂၄:၁၄) ယင်းသည် ကြီးမားလှသောလုပ်ငန်းတစ်ခုဖြစ်၏။ အကဲခတ်ကြည့်ရှုနေသူများစွာအတွက် ယင်းသည် ကျွန်ုပ်တို့ပိုင်ဆိုင်သည့်ဥစ္စာအင်ခွင်များထက်မက ရှိဖို့လိုအပ်ပုံပေါက်သည်။ အခြားသူတို့အတွက်မူ ကျွန်ုပ်တို့သည် ပြက်ရယ်ပြုမှု၊ အတိုက်အခံပြုမှုနှင့် နှိပ်စက်ညှဉ်းပန်းမှုတို့ကို ခံနေရသောကြောင့် ယင်းတာဝန်ကိုကျေပွန်ခြင်းဟူသည် မဖြစ်နိုင်သောအရာဖြစ်၏။ (မ. ၂၄:၉; ၂ တိ. ၃:၁၂) သံသယဝင်သူများက ဤလုပ်ငန်းသည် ပြီးမြောက်ရန်မဖြစ်နိုင်သောအရာဖြစ်သည်ဟု ယုံကြည်လက်ခံထားကြသည်။ သို့သော် ယေရှုက “ဘုရားသခင်သည် ခပ်သိမ်းသောအမှုတို့ကို တတ်နိုင်တော်မူသည်” ဟုမိန့်ကြားခဲ့သည်။—မ. ၁၉:၂၆။

^၂ တုပရန် အပြုသဘောပါသည့်ပုံသက်သေများ– ယေရှုသည် အစီအစဉ်စနစ်တစ်ခုလုံးကိုဆန့်ကျင်သူတစ်ဦးအနေဖြင့် မိမိ၏ဓမ္မအမှုကိုစတင်ခဲ့သည်။ ကိုယ်တော်အား အောင်မြင်မှုမရရှိစေရန် ဟန့်တားဖို့ကြိုးစားသည့်အနေနှင့် အတိုက်အခံပြုသူများက စိတ်ကူး၍ရနိုင်သမျှ သိက္ခာချအရှက်ခွဲမှုအမျိုးမျိုးပြုခဲ့ကာ နောက်ဆုံးတွင် ပြင်းစွာသောဝေဒနာဖြင့်သေဆုံးစေခဲ့သည်။ သို့တိုင် နောက်ဆုံးတွင် ယေရှုက “ငါသည် လောကကိုအောင်ပြီ” ဟုစိတ်ချလက်ချကြေညာခဲ့သည်။ (ယော. ၁၆:၃၃) အမှန်ပင် မယုံနိုင်လောက်အောင် ပြီးမြောက်အောင်မြင်မှုတစ်ခုပါတကား!

^၃ ယေရှု၏တပည့်များသည် ခရစ်ယာန်ဓမ္မအမှုတွင် အလားတူရဲရင့်သောစိတ်ဓာတ်နှင့်ဇွဲကို တင်ပြခဲ့ကြသည်။ များစွာသောသူတို့သည် ကြိမ်ဒဏ်ပေးခြင်း၊ ရိုက်နှက်ခြင်း၊ ထောင်ချခြင်းနှင့် အသေသတ်ခြင်းကိုပင် ခံခဲ့ကြရသည်။ သို့တိုင် သူတို့သည် “သခင်ယေရှု၏နာမတော်ကြောင့် မိမိတို့သည် အရှက်ကွဲခြင်းကိုခံထိုက်ကြသည်ဟု မှတ်တော်မူသောကြောင့် ဝမ်းမြောက်သောစိတ်ရှိ” ကြသည်။ (တ. ၅:၄၁) ဖြစ်နိုင်ခြေအလားအလာမရှိသည့်ကြားမှ သူတို့သည် မဖြစ်နိုင်ဟုထင်ရသော “မြေကြီးစွန်းတိုင်အောင်” သတင်းကောင်းဟောပြောခြင်းတာဝန်ကို ပြီးမြောက်စေခဲ့ကြသည်။—တ. ၁:၈; ကော. ၁:၂၂၊ ၂၃။

^၄ ကျွန်ုပ်တို့ခေတ်တွင် အောင်မြင်မှုရရှိနိုင်ပုံ– ကျွန်ုပ်တို့သည်လည်း ဖြစ်နိုင်ခြေအလားအလာမရှိပုံပေါက်သည့်ကြားမှ နိုင်ငံတော်ဟောပြောခြင်းလုပ်ငန်းကို ဇွဲရှိရှိလုပ်ဆောင်ခဲ့ကြပြီ။ လုပ်ငန်းပိတ်ပင်ခြင်း၊ နှိပ်စက်ညှဉ်းပန်းခြင်း၊ အကျဉ်းချခံရခြင်းနှင့် ကျွန်ုပ်တို့ကိုရပ်တန့်သွားစေရန် အခြားအကြမ်းဖက်နည်းအမျိုးမျိုးကြားမှ ကျွန်ုပ်တို့အောင်မြင်မှုရရှိနေကြပါသည်။ မည်သို့ဖြစ်နိုင်သနည်း။ “‘ဤအမှုသည် ဗိုလ်ခြေအားဖြင့်မဟုတ်၊ အာဏာတန်ခိုးအားဖြင့်မဟုတ်၊ ငါ့ဝိညာဉ်အားဖြင့်ဖြစ်လိမ့်မည်’ ဟုကောင်းကင်ဗိုလ်ခြေအရှင် ထာဝရဘုရားမိန့်တော်မူ၏။” (ဇာ. ၄:၆) ကျွန်ုပ်တို့ဘက်တွင် ယေဟောဝါရပ်တည်သ၍ အဘယ်အရာကမျှ ကျွန်ုပ်တို့၏လုပ်ငန်းကို မရပ်စဲစေနိုင်ပါ!—ရော. ၈:၃၁။

^၅ ကျွန်ုပ်တို့ဟောပြောသည့်အခါ ရှက်ကြောက်စရာ၊ ကြောက်ရွံ့စရာ သို့မဟုတ် အရည်အချင်းမရှိဟုခံစားရစရာအကြောင်းမရှိပါ။ (၂ ကော. ၂:၁၆၊ ၁၇) နိုင်ငံတော်သတင်းကောင်းပျံ့နှံ့ရေးကို မမှိတ်မသုန်ဆက်လုပ်ဆောင်ရန် သာလွန်ကောင်းမွန်သည့်အကြောင်းများ ကျွန်ုပ်တို့တွင်ရှိသည်။ ယေဟောဝါ၏အကူအညီဖြင့် ‘မဖြစ်နိုင်သောအမှု’ ကိုကျွန်ုပ်တို့ပြီးမြောက်အောင်မြင်ကြပါလိမ့်မည်!—လု. ၁၈:၂၇။