လန်းဆန်းစေသောလုပ်ငန်း

^၁ ကျမ်းစာသတင်းတရားသည် ယင်းကို အသက်တာတွင် လက်ခံကျင့်သုံးသူအားလုံးအား လန်းဆန်းစေ၏။ (ဆာ. ၁၉:၇၊ ၈) ယင်းက သူတို့အား မှားယွင်းသည့်သွန်သင်ချက်များနှင့် အန္တရာယ်ရှိသောအကျင့်များမှ လွတ်မြောက်စေကာ အနာဂတ်အတွက် စိတ်ချရသောမျှော်လင့်ချက်ကို ပေးသည်။ သို့သော် သတင်းကောင်းကို လက်ခံသူများသာ အကျိုးခံစားရသည် မဟုတ်ချေ။ အခြားသူများအား လန်းဆန်းစေသော ကျမ်းစာသမ္မာတရားကို ဝေငှသူများလည်း ကိုယ်တိုင်လန်းဆန်းမှု ခံစားကြရသည်။—သု. ၁၁:၂၅။

^၂ ဓမ္မအမှုက အားတက်လန်းဆန်းစေ– ယေရှုက ဟောပြောခြင်းနှင့် တပည့်ဖြစ်စေခြင်းလုပ်ငန်းပါဝင်သော ခရစ်ယာန်တပည့်ဖြစ်ခြင်းထမ်းပိုးကို ထမ်းသူများ၏ “စိုးလ်သည် လန်းဆန်း” မှုရရှိမည်ဟု မိန့်ဆိုခဲ့သည်။ (မ. ၁၁:၂၉၊ ကဘ) အခြားသူများအား သက်သေခံခြင်းသည် အားတက်လန်းဆန်းစေကြောင်း ကိုယ်တော်တိုင် တွေ့ရှိခဲ့သည်။ ယင်းသည် ကိုယ်တော့်အတွက် စားစရာကဲ့သို့ဖြစ်၏။ (ယော. ၄:၃၄) တပည့်တော် ၇၀ သည် ဟောပြောရန်စေလွှတ်ခံရသောအခါ မိမိတို့၏ကြိုးစားမှုများအား ယေဟောဝါကူညီပံ့ပိုးပေးနေသည်ကို တွေ့မြင်ရ၍ ဝမ်းသာကြသည်။—လု. ၁၀:၁၇။

^၃ ယနေ့ ခရစ်ယာန်များစွာလည်း ဟောပြောခြင်းလုပ်ငန်းတွင် ပါဝင်ခြင်းဖြင့် အားတက်လန်းဆန်းလာကြသည်။ ညီအစ်မတစ်ဦးက ဤသို့ဆိုသည်– “ဓမ္မအမှုဟာ ကျွန်မရဲ့ဘဝကို ညွှန်ကြားပြီး ရည်ရွယ်ချက်ရှိစေတဲ့အတွက် လန်းဆန်းစေတယ်။ လုပ်ငန်းတော်မှာ ကျွန်မပါဝင်တဲ့အခါ ကိုယ်ရေးကိုယ်တာပြဿနာတွေ၊ နေ့တိုင်းခံစားနေရတဲ့ ဖိစီးမှုတွေဟာ ဘာမှမဟုတ်သလို ဖြစ်သွားတယ်။” စိတ်ထက်သန်သောဓမ္မအမှုဆောင် နောက်တစ်ဦးက ဤသို့ဆိုသည်– “ဓမ္မအမှုက . . . ယေဟောဝါဟာ ကျွန်မအတွက် နေ့စဉ်နေ့တိုင်း တကယ့်ပုဂ္ဂိုလ်ဖြစ်လာစေပြီး အခြားဘယ်နည်းနဲ့မှမရနိုင်တဲ့ ငြိမ်သက်မှုနဲ့ အတွင်းပျော်ရွှင်မှုကိုလည်း ရစေပါတယ်။” “ဘုရားသခင်၏ လုပ်ဖော်ဆောင်ဖက်များ” ဖြစ်ရခြင်းသည် တကယ့်အခွင့်ထူးပါတကား!—၁ ကော. ၃:၉၊ ကဘ။

^၄ ခရစ်တော်၏ထမ်းပိုးသည် ထမ်းလွယ်၏– “ကြိုးစားအားထုတ်ကြ” ရန် ခရစ်ယာန်များအား တိုက်တွန်းထားသော်လည်း ယေရှုသည် ကျွန်ုပ်တို့ပေးနိုင်သည်ထက် ပို၍မတောင်းဆိုပါ။ (လု. ၁၃:၂၄) အမှန်မှာ၊ ကိုယ်တော်က ‘သူနှင့်အတူ ထမ်းပိုးထမ်း’ ရန် ကျွန်ုပ်တို့ကို မေတ္တာဖြင့်ဖိတ်ခေါ်သည်။ (မ. ၁၁:၂၉၊ ကဘ၊ အောက်ခြေမှတ်ချက်) ခက်ခဲသောအခြေအနေများနှင့် ရင်ဆိုင်ရသူများသည် အကန့်အသတ်ရှိသော်လည်း မိမိတို့၏စိုးလ်အကြွင်းမဲ့ အမှုဆောင်ခြင်းကို ဘုရားသခင်နှစ်သက်တော်မူကြောင်း စိတ်ချနိုင်သည်။—မာ. ၁၄:၆-၈; ကော. ၃:၂၃။

^၅ နာမတော်အတွက် ကျွန်ုပ်တို့လုပ်ဆောင်သမျှကို တန်ဖိုးထားသောဘုရားသခင်၏အမှုတော် ထမ်းဆောင်ရခြင်းသည် မည်မျှလန်းဆန်းမှုဖြစ်စေသည်တကား! (ဟေဗြဲ ၆:၁၀) ကိုယ်တော်အား အတတ်နိုင်ဆုံးပေးဆက်ရန် အစဉ်ကြိုးစားနိုင်ကြပါစေ။