ဂုဏ်သိက္ခာတင်ပြခြင်းဖြင့် ခရစ်တော်နောက်သို့လိုက်လော့

^၁ စကြဝဠာ အကြွင်းမဲ့ပိုင်သအုပ်စိုးရှင် ယေဟောဝါသည် ဂုဏ်သိက္ခာနှင့် တန်ဆာဆင်တော်မူ၏ဟု ကျမ်းစာဖော်ပြထားသည်။ (ဆာ. ၁၀၄:၁၊ ကဘ) ယေရှုသည် မိမိခမည်းတော်နှင့် ခမည်းတော်၏ပြင်ဆင်မှုများကို ဂုဏ်တင်သည့်နည်းဖြင့် အမြဲမိန့်မြွက် ပြုမူကျင့်ကြံခဲ့သည်။ (ယော. ၁၇:၄) လာမည့် “ခရစ်တော်နောက်သို့လိုက်လော့!” ခရိုင်စည်းဝေးကြီးများအတွင်း ကျွန်ုပ်တို့ယောက်တိုင်း ယေရှုကိုတုပရန်နှင့် ယေဟောဝါကို ဂုဏ်တင်ရန် အခွင့်အရေးများရှိကြမည်ဖြစ်သည်။

^၂ ဂုဏ်သိက္ခာရှိသောဝတ်ပြုမှု– ကျွန်ုပ်တို့အတွက် ယေဟောဝါပြင်ဆင်ပေးထားသည့် ဝိညာဏအစာကို တက်ရောက်စားသုံးရန် အစီအစဉ်ဆွဲခြင်းဖြင့် ကိုယ်တော်အား ကျွန်ုပ်တို့ဂုဏ်တင်နိုင်သည်။ သောကြာနေ့အပါအဝင် စည်းဝေးကြီးနေ့ရက်တိုင်းကို တက်ရောက်ရန် သင့်အလုပ်ရှင်နှင့်စကားပြောပြီး ကိစ္စရပ်များ စီစဉ်ထားပြီးပြီလော။ ထိုင်ခုံနေရာရဖို့ စောစီးစွာရောက်ရန်၊ အဖွင့်သီချင်းနှင့် ဆုတောင်းခြင်းတွင် ပါဝင်ရန် စီစဉ်ထားပြီးပြီလော။ စည်းဝေးကြီး၌ သင့်ညီအစ်ကိုများနှင့်အတူ နေ့လယ်စာစားသုံးရန် စီစဉ်ထားပြီးပြီလော။ အစီအစဉ်ပိုင်းတစ်ခုစီ၏အစတွင် တေးသံမစမီ မိမိတို့ထိုင်ခုံများတွင် နေရာယူရန် သဘာပတိက ကြင်နာစွာပြောလာသည့်အခါ ကျွန်ုပ်တို့သည် အချင်းချင်းစကားပြောနေသည်ကို အလျင်အမြန်ရပ်သင့်ပြီး အစီအစဉ်စတင်ရန်အတွက် ထိုင်ခုံတွင်အသင့်ရှိနေပါ။

^၃ အစီအစဉ်ကို အသေအချာအာရုံစိုက်နားထောင်ခြင်းသည်လည်း ကျွန်ုပ်တို့၏ကောင်းကင်ခမည်းတော်ကို ဂုဏ်တင်ရာရောက်၏။ ဒေသတစ်ခုတွင် ကျင်းပသောခရိုင်စည်းဝေးကြီးတစ်ခုကို အကဲခတ်လေ့လာပြီးနောက် သတင်းထောက်တစ်ဦးက “သူတို့သည် ဝိညာဏရေးရာမှာ ဆွေမျိုးတော်စပ်သူများဖြစ်ကြောင်း ထင်ရှားပြီး ဟောပြောသည့်အရာကို လေးလေးစားစား တိတ်ဆိတ်စွာနားထောင်ကြသည့်အတွက် တက်ရောက်သူတို့၏ကောင်းမွန်သောအမူအကျင့်” ကဘေးမှကြည့်ရှုသူတို့ကို အထင်ကြီးစွဲမှတ်စေလိမ့်မည်ဟု ရေးသားခဲ့သည်။ ဤသို့လည်း ပြောသေး၏– “ကလေးများထူးခြားသည်မှာ . . . အားလုံး အမူအကျင့်ကောင်းတင်ပြကြခြင်းနှင့် သမ္မာကျမ်းစာပါ အခန်းငယ်များရှာဖွေသုံးသပ်နေခြင်း၌ပင် အလုပ်များနေကြခြင်းမှာ ထူးဆန်းသည်။” အစီအစဉ်ကျင်းပနေစဉ်အတွင်း မလိုအပ်ဘဲစကားပြောခြင်း၊ စားသောက်ခြင်း သို့မဟုတ် အနီးအနားတွင် သွားလာခြင်းအတွက် အချိန်မဟုတ်ပါ။ လူငယ်များသည် မိဘများနှင့်အတူ ထိုင်သင့်သည်၊ သို့မှသာ အစီအစဉ်မှအကျိုးရရန် သူတို့ကို မိဘများကူညီပေးနိုင်မည်ဖြစ်သည်။ (တရား. ၃၁:၁၂; သု. ၂၉:၁၅) ဤသို့သောကြိုးစားအားထုတ်မှုများသည် အခြားသူများကို လေးစားကြောင်းနှင့် တင်ဆက်သည့် အရေးကြီးသောဘုရားသခင်ပြင်ဆင်ပေးသည့်ပုံဆောင်အစာကို လေးမြတ်တန်ဖိုးထားကြောင်း တင်ပြရာရောက်သည်။

^၄ သိက္ခာရှိသောအသွင်အပြင်– များစွာသောသူတို့သည် “ခရစ်ယာန်ဂုဏ်သိက္ခာရှိကြောင်း အချိန်မရွေးတင်ပြခြင်း” ဟူသောလွန်ခဲ့သည့်ခရိုင်စည်းဝေးကြီးဟောပြောချက်ပါ သတိပေးချက်များကို လေးမြတ်တန်ဖိုးထားခဲ့ကြသည်၊ ယင်းသတိပေးချက်များတွင် ဘုရားသခင့်ကျေးကျွန်များ မိမိတို့၏ဝတ်စားဖြီးလိမ်းပုံတွင် ခရစ်ယာန်ဂုဏ်သိက္ခာတင်ပြဖို့ ကြိုးစားသင့်ကြောင်း အလေးပေးဖော်ပြခဲ့သည်။ ဤနှစ်တွင်လည်း ဤကိစ္စကိုပင် ကျွန်ုပ်တို့၏အလေးအနက်အာရုံစိုက်ရာ ဖြစ်သင့်သည်။ ကျွန်ုပ်တို့၏အသွင်အပြင်သည် ယေဟောဝါနှင့် ကိုယ်တော့်သက်သေများဖြစ်ရခြင်းအခွင့်ထူးအတွက် ကျွန်ုပ်တို့၏ခံစားချက်များကို တင်ပြ၏။ ကျွန်ုပ်တို့သည် “ဘုရားသခင်အားရိုသေလေးမြတ်ခြင်းကို ဝန်ခံပြုစု” သူတို့ကဲ့သို့ အမြဲဝတ်စားဆင်ယင်သင့်သည်။—၁ တိ. ၂:၉၊ ၁၀။

^၅ အစီအစဉ် တက်ရောက်နေချိန်၌သာ ဂုဏ်သိက္ခာရှိသောအသွင်အပြင်ကို တင်ပြသင့်သလော။ စည်းဝေးကြီးကျင်းပသည့်မြို့တွင် ကျွန်ုပ်တို့ရှိနေကြစဉ် ကျွန်ုပ်တို့ စည်းဝေးကြီးရင်ထိုးကတ်ပြား တပ်ဆင်ထားသည်ကို များစွာသောသူတို့က သတိပြုကြပါလိမ့်မည်။ ကျွန်ုပ်တို့၏အသွင်အပြင်က ကျွန်ုပ်တို့သည် အများပြည်သူတို့နှင့်မတူကြောင်း တင်ပြသင့်သည်။ ထို့ကြောင့် အစီအစဉ်ပြီးနောက် အပြင်ထွက်စားသောက်သည့်အခါကဲ့သို့သော အပန်းဖြေချိန်၌ပင် ကျွန်ုပ်တို့သည် ဂျင်းဘောင်းဘီများ၊ တိုနံ့နံ့အဝတ်အစားများ သို့မဟုတ် တီရှပ်များစသည့်အဝတ်အစားများ မဝတ်သင့်ဘဲ ခရစ်ယာန်စည်းဝေးကြီးတက်ရောက်ရန် ရည်ရွယ်ချက်ဖြင့်ရောက်ရှိနေသူများဖြစ်ရာ ဓမ္မအမှုဆောင်များနှင့်သင့်လျော်သည့်ပုံစံ ဝတ်ဆင်သင့်သည်။ ယင်းသည် ရပ်ကွက်အတွက် သက်သေခံချက်တစ်ရပ် ဖြစ်ပေလိမ့်မည်! ကျွန်ုပ်တို့၏အသွင်အပြင်က ဓမ္မအမှုဆောင်များအဖြစ် ကျွန်ုပ်တို့၏ကဏ္ဍကို ထင်ရှားသိသာစေသောအခါ ယေဟောဝါ ရွှင်လန်းတော်မူ၏။

^၆ ကျေနပ်မှုပေးသောရလဒ်များ– စည်းဝေးကြီးများ၌ ခရစ်ယာန်ဂုဏ်သိက္ခာတင်ပြခြင်းက အလွတ်သဘောသက်သေခံရန် အခွင့်အရေးများရရှိစေပြီး လေ့လာအကဲခတ်သူများအား နှစ်သက်စွဲမှတ်သွားစေ၏။ စည်းဝေးကြီးတစ်ခုပြီးဆုံးသောအခါ အရာရှိတစ်ဦး ဤသို့ပြောခဲ့သည်– “ဒီလို ကောင်းကောင်းမွန်မွန် ပြုမူနေထိုင်တဲ့လူတွေကို ကျွန်တော်တို့တစ်ခါမှ မတွေ့ဖူးဘူး။ ဘုရားသခင် ကျွန်တော်တို့ကို ဖြစ်စေချင်တဲ့နည်းလမ်းအတိုင်း ခင်ဗျားတို့က နေထိုင်ကြတယ်။” ဂုဏ်သိက္ခာတင်ပြခြင်းသည် တစ်ဦးနှင့်တစ်ဦး ချစ်ခင်ရိုသေလေးစားမှုရှိကြောင်း တင်ပြပြီး ယေဟောဝါကို ဂုဏ်တင်ရာရောက်၏။ (၁ ပေ. ၂:၁၂) ယင်းက ကျွန်ုပ်တို့၏ဘုရားရေးရာကြောက်ရွံ့မှုနှင့် ခမည်းတော်၏လမ်းညွှန်မှုခံရခြင်း အခွင့်ထူးအတွက် ကျွန်ုပ်တို့၏လေးမြတ်တန်ဖိုးထားမှုကို ဖော်ပြ၏။ (ဟေဗြဲ ၁၂:၂၈) ကျွန်ုပ်တို့သည် ဤနှစ် “ခရစ်တော်နောက်သို့လိုက်လော့!” ခရိုင်စည်းဝေးကြီးတွင် ပါဝင်တက်ရောက်ကြစဉ် ဂုဏ်သိက္ခာကို ကြိုးစားတင်ပြနိုင်ကြပါစေ။

[လေ့လာရန်မေးခွန်းများ]

၁။ ဤနှစ်စည်းဝေးကြီးခေါင်းစဉ်သည် ဂုဏ်သိက္ခာတင်ပြခြင်းနှင့် မည်သို့ဆက်နွှယ်မှုရှိသနည်း။

၂။ အစီအစဉ်ပိုင်းတစ်ခုစီတွင် ရောက်ရှိနေရန် ကျွန်ုပ်တို့၏ပြင်ဆင်မှုက ယေဟောဝါအား မည်သို့ဂုဏ်တင်သနည်း။

၃။ အစီအစဉ်ကို အသေအချာအာရုံစိုက်နားထောင်ခြင်းက ကျွန်ုပ်တို့၏ဝတ်ပြုမှုကို မည်သို့ဂုဏ်တင်သနည်း။

၄။ ကျွန်ုပ်တို့သည် စည်းဝေးကြီးတက်ရောက်စဉ်တွင် အဘယ်ကြောင့် သိက္ခာရှိသောအသွင်အပြင်ဖြင့် ရှိနေသင့်သနည်း။

၅။ ကျွန်ုပ်တို့သည် စည်းဝေးကြီးကျင်းပသည့်မြို့တွင် အပန်းဖြေချိန်အတွင်း ဂုဏ်သိက္ခာရှိသောအသွင်အပြင်ကို မည်သို့ထိန်းသိမ်းနိုင်သနည်း။

၆။ ခရစ်ယာန်ဂုဏ်သိက္ခာတင်ပြခြင်း၏ နှစ်သက်ဖွယ်ရလဒ်များကား အဘယ်နည်း။

[စာမျက်နှာ ၆ ပါ လေးထောင့်ကွက်]

ခရိုင်စည်းဝေးကြီးသတိပေးချက်များ

◼ အစီအစဉ်အချိန်များ– အစီအစဉ်ကို သုံးရက်စလုံး နံနက် ၉:၂၀ နာရီတွင် စတင်မည်။ နံနက် ၈:၀၀ နာရီတွင် တံခါးများကိုဖွင့်မည်။ ပဏာမနိုင်ငံတော်တေးသံသာစတင်သောအခါ မိမိတို့၏ထိုင်ခုံများ၌ အားလုံးထိုင်နေသင့်သည်၊ သို့မှသာ အစီအစဉ်ကို သိက္ခာရှိရှိ၊ စနစ်တကျစတင်နိုင်မည်ဖြစ်သည်။ သောကြာနေ့နှင့် စနေနေ့တွင် ညနေ ၅:၀၅ နာရီ၌၊ တနင်္ဂနွေနေ့တွင်မူ ညနေ ၄:၁၀ နာရီ၌ အစီအစဉ်ကို နိဂုံးချုပ်ပါမည်။

◼ ထိုင်ခုံဦးခြင်း– သင်နှင့်အတူ လာသူများ သို့မဟုတ် သင်နှင့်အတူ တစ်အိမ်တည်းနေသူများအတွက်သာ ထိုင်ခုံများဦးထားနိုင်သည်။

◼ နေ့လယ်စာ– နေ့လယ်ခေတ္တရပ်နားချိန်တွင် စည်းဝေးကြီးနေရာမှ အပြင်ထွက်ကာ အစားအစာသွားဝယ်စားမည့်အစား ကျေးဇူးပြု၍ နေ့လယ်စာယူလာပါ။ စည်းဝေးကြီးအဆောက်အအုံတွင်းသို့ အရက်ယမကာများ ယူဆောင်လာခွင့်မပြုပါ။

◼ အလှူငွေ– အတော်အတန်အကုန်အကျခံ၍ ခရိုင်စည်းဝေးကြီးကို စီစဉ်ထားသည်။ နိုင်ငံတော်ခန်းမတွင် သို့မဟုတ် စည်းဝေးကြီးတွင် ကမ္ဘာချီလုပ်ငန်းအတွက် စေတနာအလျောက် အလှူငွေများထည့်ဝင်ခြင်းဖြင့် ကျွန်ုပ်တို့၏ကျေးဇူးတင်လေးမြတ်မှုကို ပြသနိုင်သည်။

◼ မတော်တဆထိခိုက်မှုများနှင့် အရေးပေါ်အခြေအနေများ– စည်းဝေးကြီးကျင်းပသည့်နေရာတွင် ဆေးဘက်ဆိုင်ရာ အရေးပေါ်အခြေအနေပေါ်ပေါက်လျှင် ရှေးဦးသူနာပြုဌာနသို့ ချက်ချင်းအကြောင်းကြားပေးမည့် အနီးအနားရှိ ဧည့်ကြိုတစ်ဦးနှင့် ကျေးဇူးပြု၍ဆက်သွယ်ပါ၊ သို့မှသာ ကျွန်ုပ်တို့၏အရည်အချင်းရှိ ရှေးဦးသူနာပြုများက အခြေအနေသည် စိုးရိမ်စရာရှိမရှိ အကဲဖြတ်ကာ အကူအညီပေးနိုင်ပါလိမ့်မည်။

◼ အသံသွင်းခြင်း– မည်သည့်အသံဖမ်းစက်ကိုမျှ အဆောက်အအုံ၏လျှပ်စစ် သို့မဟုတ် အသံချဲ့စက်နှင့် မဆက်သွယ်သင့်ပါ၊ အခြားသူများအား အနှောင့်အယှက်မဖြစ်စေသည့်နည်းဖြင့်သာ ယင်းတို့ကို အသုံးပြုနိုင်သည်။

◼ ဆက်လိုက်ရန်ပုံစံများ–  စည်းဝေးကြီးအတွင်း ကျွန်ုပ်တို့၏အလွတ်သဘောသက်သေခံခြင်းကြောင့် စိတ်ဝင်စားမှုတင်ပြသူမည်မဆိုနှင့်ပတ်သက်သော သတင်းအချက်အလက်ကိုပေးရန် ကျေးဇူးပြု၍ဆက်လိုက်ပေးပါ (S-43) ပုံစံကို အသုံးပြုသင့်သည်။ ကြေညာသူများသည် ဆက်လိုက်ပေးပါပုံစံတစ်ခု၊ နှစ်ခုကို စည်းဝေးကြီးသို့ ယူလာသင့်သည်။ ဤပုံစံများသည် စည်းဝေးကြီးစာအုပ်ဌာနတွင်လည်း ရှိသင့်၏။ ဖြည့်စွက်ထားသောပုံစံများကို ကိုင်တွယ်သွားရန်အတွက် စာအုပ်ဌာနသို့ သို့မဟုတ် သင်ပြန်သွားသောအခါ သင့်အသင်းတော်အတွင်းရေးမှူးအား ပေးနိုင်သည်။– ၂၀၀၅ ဖေဖော်ဝါရီ၊ ကျွန်ုပ်တို့၏နိုင်ငံတော်ဓမ္မအမှု၊ စ. ၆ ကိုရှု။