ယေဟောဝါကို ကျွန်ုပ်တို့ပေးဆက်နိုင်

^၁ လူသားတို့သည် ဘုရားသခင်အား တစ်စုံတစ်ခုပေးဆက်နိုင်ကြောင်း သင်သိသလော။ အာဗေလသည် ၎င်း၏တန်ဖိုးရှိသည့် တိရိစ္ဆာန်အချို့ကို ယေဟောဝါထံ ယဇ်ပူဇော်ခဲ့ပြီး နောဧနှင့်ယောဘလည်း အလားတူပူဇော်သကာများကို ဆက်သခဲ့ကြသည်။ (က. ၄:၄; ၈:၂၀; ယောဘ ၁:၅) ဖန်ဆင်းရှင်သည် ထိုအရာအားလုံးကို ပိုင်ဆိုင်ပြီးဖြစ်သောကြောင့် ထိုကဲ့သို့ပူဇော်ရာများက ကိုယ်တော်အား မည်သည့်နည်းဖြင့်မျှ ပို၍ကြွယ်ဝမသွားစေပါ။ သို့သော် ပူဇော်ရာယဇ်များသည် ထိုသစ္စာရှိသူများတွင် ဘုရားအားနက်ရှိုင်းသည့် မေတ္တာရှိကြောင်း ဖော်ပြသည်။ ယနေ့အချိန်တွင် ကျွန်ုပ်တို့၏ အချိန်၊ ခွန်အားနှင့် ပိုင်ဆိုင်ရာများကို အသုံးပြုခြင်းဖြင့် “ချီးမွမ်းခြင်းယဇ်” ကို ယေဟောဝါအား ပေးဆက်နိုင်သည်။—ဟေဗြဲ ၁၃:၁၅။

^၂ အချိန်– အမှုဆောင်လုပ်ငန်းတွင် အပြည့်အဝပါဝင်ရန် အရေးမကြီးသည့်အရာအချို့မှ အချိန်ကို “ဝယ်ယူ” ခြင်းသည် ချီးမွမ်းဖွယ်ပင်! (ဧ. ၅:၁၅-၁၆၊ ကဘ) တစ်နှစ်တွင် အရန်ရှေ့ဆောင် တစ်လ သို့မဟုတ် ထိုထက်မက လုပ်ဆောင်နိုင်ရန် ကျွန်ုပ်တို့၏ အချိန်ဇယားကို ပြုပြင်ပြောင်းလဲနိုင်သည်။ အမှုဆောင်လုပ်ငန်းတွင် ပုံမှန်အသုံးပြုသည့်အချိန်ထက် ပို၍အသုံးပြုနိုင်သည်။ တစ်ပတ်တွင် အပိုမိနစ် ၃၀ လယ်ကွင်းတွင်ရှိနေခြင်းက တစ်လတွင် အနည်းဆုံးနှစ်နာရီ ကျွန်ုပ်တို့၏ဓမ္မအမှုကို တိုးချဲ့စေလိမ့်မည်!

^၃ ခွန်အား– ကျွန်ုပ်တို့၏ခွန်အားကို အမှုဆောင်လုပ်ငန်းတွင် အသုံးပြုရန်အတွက် ယေဟောဝါကို ကျွန်ုပ်တို့၏အကောင်းဆုံးအရာများ မပေးဆက်နိုင်လောက်သည့်အထိ ပင်ပန်းနွမ်းနွယ်စေသည့် အပန်းဖြေခြင်းနှင့် အလုပ်လုပ်ခြင်းတို့ကို ရှောင်ရှားရန်လိုသည်။ ဘုရားအတွက်အမှုဆောင်ရာတွင် အသုံးပြုမည့် ကျွန်ုပ်တို့၏ခွန်အားကို ပျောက်ဆုံးစေပြီး စိတ်နှလုံးကို “ညှိုးငယ်” စေနိုင်သည့် စိုးရိမ်ပူပန်မှုများကို ဘေးဖယ်ထားရန်လည်းလိုအပ်သည်။ (သု. ၁၂:၂၅) အကယ်၍ ကျွန်ုပ်တို့တွင် အမှန်စိုးရိမ်သင့်သည့်ကိစ္စများရှိနေလျှင်ပင် “ထမ်းရွက်ရသောဝန်ကို ထာဝရဘုရားထံ၌ ချထား” နိုင်ခြင်းသည် မည်မျှကောင်းလိုက်လေခြင်း!—ဆာ. ၅၅:၂၂; ဖိ. ၄:၆၊ ၇။

^၄ ပိုင်ဆိုင်ရာများ– ကျွန်ုပ်တို့၏ ရုပ်ပစ္စည်းပိုင်ဆိုင်ရာများကို ဟောပြောခြင်းလုပ်ငန်းတွင်ထောက်ပံ့ရန် ပေးဆက်နိုင်သည်။ ပုံမှန် “ဥစ္စာတစ်ဖို့ကို ထုတ်၍စုထားကြ” ခြင်းဖြင့် လိုအပ်နေသူများအား တစ်စုံတစ်ခုကူညီပေးနိုင်ရန် ခရစ်ယာန်ချင်းများကို ပေါလုအားပေးခဲ့သည်။ (၁ ကော. ၁၆:၁၊ ၂) အလားတူ ကျွန်ုပ်တို့လည်း ငွေအချို့စုထားခြင်းဖြင့် ဒေသခံအသင်းတော်လိုအပ်ရာများကိုသာမက ကမ္ဘာချီလုပ်ငန်းအတွက်ပါ ပါဝင်လှူဒါန်းနိုင်သည်။ အနည်းငယ်ပင်ဖြစ်ပါစေ ကျွန်ုပ်တို့၏ နှလုံးထဲမှပေးဆက်ရာများကို ယေဟောဝါတန်ဖိုးထားပေသည်။—လု. ၂၁:၁-၄။

^၅ ယေဟောဝါသည် ကျွန်ုပ်တို့အားများစွာပေးထားပါသည်။ (ယာ. ၁:၁၇) ထို့ကြောင့် ကိုယ်တော်၏အမှုတော်ကို ထမ်းဆောင်ရန် ကျွန်ုပ်တို့၏ အချိန်၊ ခွန်အားနှင့် အခြားပိုင်ဆိုင်ရာများကို လိုလိုလားလားပေးဆက်ခြင်းဖြင့် ကျေးဇူးတင်လေးမြတ်ကြောင်း ဖော်ပြကြသည်။ ထိုကဲ့သို့လုပ်ဆောင်ခြင်းဖြင့် “စေတနာစိတ်နှင့်လှူသောသူကိုသာ နှစ်သက်တော်မူသည့် ဘုရားသခင်” ယေဟောဝါကို ဝမ်းသာစေနိုင်သည်။—၂ ကော. ၉:၇။