ထက်သန်သောဓမ္မအမှုဆောင်များအတွက် ဆုတောင်းပြီးတွေးတောဆင်ခြင်ခြင်းက မရှိမဖြစ်လိုအပ်
၁။ အဓိကလုပ်ငန်းကနေ အာရုံလွဲမသွားစေဖို့ ယေရှုကို ဘာက ကူညီပေးသလဲ။
၁ ယေရှုဟာ ညနေခင်းမှာ လူတွေကို ကုသပေးပြီး နတ်ဆိုးတွေကို နှင်ထုတ်ပေးခဲ့တယ်။ နောက်နေ့မှာ သူ့ကို တပည့်တွေတွေ့တဲ့အခါ အံ့ဖွယ်အမှုတွေကို ဆက်လုပ်စေလိုတဲ့အတွက် “လူအပေါင်းတို့သည် ကိုယ်တော်အား ရှာနေကြပါသည်” လို့ပြောကြတယ်။ ဒါပေမဲ့ ယေရှုက သူ့ရဲ့အဓိကအလုပ်ဖြစ်တဲ့ သတင်းကောင်းဟောပြောခြင်းကနေ အာရုံလွဲမသွားခဲ့ဘူး။ သူ ဒီလိုပြန်ပြောခဲ့တယ်– “အနီးအနားရှိအခြားမြို့ရွာများ၌လည်း ဟောပြောရန် သွားကြစို့။ ထိုအတွက် ငါရောက်လာသည်။” အာရုံလွဲမသွားအောင် ယေရှုကို ဘာက ကူညီပေးခဲ့သလဲ။ ဆုတောင်းဖို့၊ တွေးတောဆင်ခြင်ဖို့ သူ မနက်စောစောထခဲ့တယ်။ (မာ. ၁:၃၂-၃၉) ဆုတောင်းပြီးတွေးတောဆင်ခြင်ခြင်းက ထက်သန်တဲ့ဟောပြောသူဖြစ်ဖို့ ကျွန်တော်တို့ကိုကော ဘယ်လိုကူညီပေးနိုင်မလဲ။
၂။ ဓမ္မအမှုမှာ စိတ်ထက်သန်နေအောင် ဘာအကြောင်းတွေးတောဆင်ခြင်နိုင်သလဲ။
၂ ဘာအကြောင်း တွေးတောဆင်ခြင်ရမလဲ။ လူတွေဟာ “အရေဆုတ်ခြင်း၊ ပစ်ထားခြင်းခံရသည့် ထိန်းသူမဲ့သိုးများကဲ့သို့ဖြစ်ကြ” တာကို ယေရှုတွေ့မြင်ခဲ့တယ်။ (မ. ၉:၃၆) အလားတူပဲ လူတွေ သတင်းကောင်း ဘယ်လောက်လိုအပ်နေသလဲဆိုတာကို ကျွန်တော်တို့ တွေးတောနိုင်တယ်။ အချိန်ကာလရဲ့ အရေးကြီးမှုကိုလည်း စဉ်းစားကြည့်နိုင်တယ်။ (၁ ကော. ၇:၂၉) ယေဟောဝါရဲ့ လုပ်ဆောင်မှုနဲ့ အရည်အသွေးတွေ၊ ယေဟောဝါသက်သေဖြစ်ရတဲ့ အခွင့်ထူး၊ ကျမ်းစာကနေ ကျွန်တော်တို့သိရှိခဲ့ပြီး ရပ်ကွက်ကလူတွေမသိသေးတဲ့ အမှန်တရားဆိုင်ရာ အဖိုးတန်ဘဏ္ဍာတွေအကြောင်း ဆင်ခြင်ကြည့်နိုင်တယ်။—ဆာ. ၇၇:၁၁-၁၃; ဟေရှာ. ၄၃:၁၀-၁၂; မ. ၁၃:၅၂။
၃။ ဘယ်အချိန်တွေမှာ တွေးတောဆင်ခြင်နိုင်မလဲ။
၃ ဘယ်အချိန်မှာ တွေးတောဆင်ခြင်မလဲ။ တချို့သူတွေဟာ ယေရှုနည်းတူ တိတ်ဆိတ်တဲ့မနက်စောစောအချိန်မှာ ထကြတယ်။ တခြားသူတွေကျတော့ အိပ်ရာမဝင်ခင် တွေးတောဆင်ခြင်ခြင်းက အကောင်းဆုံးဖြစ်ကြောင်း တွေ့ရှိခဲ့ကြတယ်။ (က. ၂၄:၆၃) အလုပ်များရင်တောင်မှ တွေးတောဆင်ခြင်ဖို့အချိန် ရှာတွေ့နိုင်ပါတယ်။ တချို့က ကားစီးနေစဉ် တွေးတောဆင်ခြင်ကြတယ်။ တခြားသူတွေကျတော့ အနှောင့်အယှက်မရှိတွေးတောဆင်ခြင်နိုင်တဲ့ နေ့လယ်နားချိန်ကို အသုံးပြုကြတယ်။ ဓမ္မအမှုမှာမပါဝင်ခင် ခဏလေးပဲဖြစ်ဖြစ် တွေးတောဆင်ခြင်ခြင်းက ပိုပြီးစိတ်ထက်သန်စွာနဲ့ ရဲရင့်စွာဟောပြောဖို့ အကူအညီဖြစ်စေကြောင်း လူများစွာတွေ့ရှိခဲ့ကြတယ်။
၄။ ကျွန်တော်တို့ ဘာကြောင့် တွေးတောဆင်ခြင်သင့်သလဲ။
၄ ဆုတောင်းပြီးတွေးတောဆင်ခြင်ခြင်းက ယေဟောဝါအမှုတော်ဆောင်လိုတဲ့ဆန္ဒကို ပြင်းပြစေတယ်၊ ဘုရားရေးရာအမြင်ကို ထက်မြက်စေပြီး ဆက်ဟောပြောမယ်ဆိုတဲ့ ကျွန်တော်တို့ရဲ့သန္နိဋ္ဌာန်ကို ခိုင်မာစေတယ်။ ဘုရားသခင့် ဓမ္မအမှုဆောင်ချုပ်ယေရှုက တွေးတောဆင်ခြင်ခြင်းမှအကျိုးရရှိခဲ့သလို ကျွန်တော်တို့လည်း အကျိုးရရှိပါလိမ့်မယ်။