၂၀၁၅ ဟောပြောသွန်သင်ခြင်းသင်တန်းက သွန်သင်ခြင်းစွမ်းရည် တိုးတက်လာအောင် ထောက်ကူပေး

^၁ “ကျွန်တော့်ကျောက်ဆောင်၊ ကျွန်တော့်ရွေးနုတ်ရှင်ဖြစ်တဲ့ ယေဟောဝါ၊ ကျွန်တော့်နှုတ်ကထွက်တဲ့စကားတွေနဲ့ စိတ်ထဲကအတွေးတွေဟာ ကိုယ်တော့်အတွက် နှစ်သက်စရာဖြစ်ပါစေ” ဆိုပြီး ဆာလံဆရာဒါဝိဒ် ရေးခဲ့ပါတယ်။ (ဆာ. ၁၉:၁၄၊ ကဘ) အသင်းတော်မှာ၊ အမှုဆောင်မှာ အမှန်တရားဟောပြောရတဲ့ အခွင့်ထူးကို သိပ်တန်ဖိုးထားတဲ့အတွက် ယေဟောဝါဘုရား နှစ်သက်မယ့်စကားတွေကို ကျွန်ုပ်တို့လည်း ပြောချင်ကြတယ်မဟုတ်လား။ ဟောပြောသွန်သင်ခြင်းသင်တန်းက အမှုဆောင်လုပ်ငန်းအတွက် ကျွန်ုပ်တို့ကို ယေဟောဝါဘုရားလေ့ကျင့်ပေးတဲ့ နည်းလမ်းတစ်ခုပါပဲ။ ဒီသင်တန်းကို ကမ္ဘာတစ်ဝန်းရှိ အသင်းတော်ပေါင်း ၁၁၁,၀၀၀ ကျော်မှာ ပတ်စဉ်ကျင်းပနေကြပါတယ်။ နောက်ခံအသီးသီးကလာတဲ့ ကမ္ဘာတစ်လွှားရှိ ညီအစ်ကိုညီအစ်မတွေကို အရည်အချင်းရှိတဲ့ သတင်းကောင်းဟောပြောသူတွေဖြစ်လာအောင်၊ ဆွဲဆောင်မှုရှိရှိ၊ ရဲစွမ်းသတ္တိရှိရှိ၊ လိမ္မာပါးနပ်မှုအပြည့်နဲ့ သွန်သင်သူဖြစ်လာအောင် ဒီသင်တန်းက ထောက်ကူပေးခဲ့ပါပြီ။—တ. ၁၉:၈; ကော. ၄:၆။

^၂ သမ္မာကျမ်းစာကနေ သိရှိနိုင်ရာများ [igw] ဘရိုရှာနဲ့ ကျမ်းစာဖြင့် ကျိုးကြောင်းဆင်ခြင် [rs-BU] စာအုပ်ကို အခြေခံပြီး ၂၀၁၅ ခုနှစ် ဟောပြောသွန်သင်ခြင်းသင်တန်းကို တင်ဆက်သွားပါမယ်။ ဒါ့အပြင် ကျမ်းစာပေါ်လွင်ချက်နဲ့ တာဝန်နံပါတ် ၁ တို့အတွက်သတ်မှတ်ချိန်ပြောင်းလဲထားပါတယ်။ သင်တန်းမှာ ဘယ်လိုတင်ဆက်သွားရမလဲဆိုတဲ့ ညွှန်ကြားချက်တွေနဲ့အတူ ပြောင်းလဲမှုတွေကိုပါ အောက်စာပိုဒ်တွေမှာ သုံးသပ်သွားပါမယ်။

^၃ ကျမ်းစာပေါ်လွင်ချက်– ဒီအပိုင်းမှာ တာဝန်ကျတဲ့ညီအစ်ကိုဟာ ပတ်စဉ်ကျမ်းစာဖတ်ရှုခြင်းကနေ စိတ်ဝင်စားစရာကောင်းပြီး လက်တွေ့ကျတဲ့ ကျမ်းချက်တစ်ချက်တည်းကို ၂ မိနစ်အတွင်း တင်ဆက်ရမှာ ဖြစ်တယ်။ ကောင်းကောင်းပြင်ဆင်ထားတာက သတ်မှတ်ချိန်အတွင်း အသင်းတော်အတွက် အကျိုးရှိမယ့်အချက်တစ်ချက်ကို ဝေမျှပေးနိုင်မှာဖြစ်တယ်။ ပတ်စဉ်ကျမ်းစာဖတ်ရှုခြင်းကနေ သိရှိလာတဲ့အချက်တွေကို စက္ကန့် ၃၀ ဒါမှမဟုတ် ဒီထက်နည်းတဲ့ မှတ်ချက်တိုတွေပေးဖို့ ပရိသတ်က ၆ မိနစ်ခန့် ရရှိပါမယ်။ စက္ကန့် ၃၀ အတွင်းမှာ အဓိပ္ပာယ်ရှိတဲ့ မှတ်ချက်တွေပေးနိုင်အောင် ကောင်းစွာပြင်ဆင်မှုနဲ့ လေ့ကျင့်မှု လိုပါတယ်။ ဒါပေမဲ့ အဲဒီလိုလုပ်တာက ကျွန်ုပ်တို့ကို ကောင်းကောင်းလေ့ကျင့်ပေးနေတာ ဖြစ်တယ်။ ဒါ့အပြင် တခြားသူတွေလည်း သူတို့ကိုယ်ပိုင် ရှာဖွေထားရာတွေကို မှတ်ချက်ပေးခွင့်ရစေပါတယ်။

^၄ တာဝန်နံပါတ် ၁– ကျမ်းစာဖတ်ရှုခြင်းအတွက် သတ်မှတ်ချိန်ကို ၃ မိနစ် ဒါမှမဟုတ် အဲဒီထက်နည်းအဖြစ် လျှော့ချလိုက်ပြီး ဖတ်ရမယ့်အကြောင်းအရာလည်း နည်းသွားပါတယ်။ ဒီအပိုင်းမှာ တာဝန်ကျသူက အကြောင်းအရာကို အသံကျယ်ကျယ်နဲ့ဖတ်ပြီး အသံထွက်မှန်အောင်၊ သွက်လက်ပြေပြစ်အောင် အကြိမ်ကြိမ် အစမ်းလေ့ကျင့်ထားသင့်ပါတယ်။ ဒါမှ ဖတ်တဲ့အခါ ဆိုလိုရင်းအဓိပ္ပာယ် ပေါ်လာမှာဖြစ်တယ်။ ဖတ်ရှုခြင်းက ဝတ်ပြုရေးမှာ အင်မတန်အရေးပါတဲ့အတွက် ယေဟောဝါရဲ့ကျေးကျွန်အားလုံး ကောင်းကောင်းဖတ်တတ်အောင် ကြိုးစားရမယ်။ ကလေးငယ်တွေ ကောင်းကောင်းစာဖတ်တဲ့အခါ ကျွန်ုပ်တို့ ဝမ်းသာပီတိဖြစ်ကြတယ် မဟုတ်လား။ သားသမီးတွေ ကောင်းကောင်းစာဖတ်တတ်အောင် ဂရုတစိုက် ကြိုးစားကူညီပေးကြတဲ့ မိဘတွေဟာ တကယ်ပဲ ချီးမွမ်းခံထိုက်ပါတယ်။

^၅ တာဝန်နံပါတ် ၂– ညီအစ်မတစ်ဦးကို ဒီတာဝန်ပေးမှာဖြစ်ပြီး သတ်မှတ်ချိန်က ၅ မိနစ် ဖြစ်တယ်။ ပေးထားတဲ့အကြောင်းအရာကိုပဲ တင်ဆက်သင့်တယ်။ တင်ဆက်ရမယ့်အရာက သမ္မာကျမ်းစာကနေ သိရှိနိုင်ရာများ ဘရိုရှာကို အခြေခံတယ်ဆိုရင် ဒေသခံရပ်ကွက်အတွက် သဘာဝကျတဲ့၊ လက်တွေ့ကျတဲ့ပုံစံမျိုးနဲ့ တင်ဆက်သင့်တယ်။ တကယ်လို့ ကျိုးကြောင်းဆင်ခြင်စာအုပ်ကို အခြေခံထားတယ်ဆိုရင် သင်တန်းသူက အကြောင်းအရာကို ရင်းနှီးကျွမ်းဝင်အောင်၊ သင့်တော်တဲ့ကျမ်းချက်တွေ သုံးတတ်အောင်အပြင် ဘယ်အချက်တွေကို သင်ခန်းစာယူနိုင်မလဲဆိုတာကိုပါ လေ့လာထားသင့်တယ်။ ညွှန်းထားတဲ့ကျမ်းချက်တွေအပြင် အကြောင်းအရာနဲ့ ဆက်စပ်နေတဲ့ တခြားကျမ်းချက်တွေကိုလည်း သုံးနိုင်ပါတယ်။ သင်တန်းကြီးကြပ်မှူးက သင်တန်းသူအတွက် အကူတစ်ဦးကို ခန့်အပ်ပေးမှာ ဖြစ်တယ်။

^၆ တာဝန်နံပါတ် ၃– ညီအစ်ကို ဒါမှမဟုတ် ညီအစ်မတစ်ဦးကို တာဝန်ပေးမှာဖြစ်ပြီး သတ်မှတ်ချိန်က ၅ မိနစ် ဖြစ်တယ်။ ညီအစ်မတစ်ဦးက ဒီတာဝန်ရတယ်ဆိုရင် တာဝန်နံပါတ် ၂ အတိုင်း တင်ဆက်ရမှာဖြစ်တယ်။ ကျိုးကြောင်းဆင်ခြင် စာအုပ်အပေါ် အခြေခံထားတယ်ဆိုရင် တာဝန်ကျတဲ့ညီအစ်ကိုက ပရိသတ်ကို ဟောပြောတဲ့ပုံစံနဲ့ တင်ဆက်သင့်တယ်။ ပေးထားတဲ့အဓိကအကြောင်းကို အဆင့်ဆင့်ရှင်းလင်းသင့်တယ်။

^၇ နံပါတ် ၃ တာဝန်ကျတဲ့ ညီအစ်ကိုတွေအတွက် ပြောင်းလဲမှု– သမ္မာကျမ်းစာကနေ သိနိုင်ရာများ ဘရိုရှာကို အခြေခံထားတယ်ဆိုရင် တာဝန်ကျတဲ့ညီအစ်ကိုက မိသားစုဝတ်ပြုမှုပုံစံမျိုး ဒါမှမဟုတ် အမှုဆောင်လုပ်ငန်းမှာ ပါဝင်တဲ့ပုံစံမျိုးနဲ့ တင်ဆက်သင့်ပါတယ်။ သင်တန်းကြီးကြပ်မှူးက သင်တန်းသားအတွက် အကူတစ်ဦးနဲ့ ဇာတ်အိမ်ကို ရွေးချယ်ပေးသွားပါမယ်။ အကူလုပ်မယ့်သူက သင်တန်းသားရဲ့မိသားစုဝင် ဒါမှမဟုတ် ညီအစ်ကိုတစ်ဦး ဖြစ်သင့်ပါတယ်။ အဓိကအကြောင်းအရာနဲ့ ဆက်စပ်နေတဲ့ ကျမ်းချက်ကို အသုံးပြုပါ။ တစ်ခါတလေ အကြီးအကဲတစ်ဦးကို ဒီတာဝန် ပေးနိုင်ပါတယ်။ တာဝန်ကျအကြီးအကဲက အကူနဲ့ ဇာတ်အိမ်ကို ကိုယ်တိုင်ရွေးချယ်နိုင်ပါတယ်။ အကြီးအကဲက သူ့မိသားစုဝင်တစ်ဦးနဲ့၊ ဒါမှမဟုတ် ညီအစ်ကိုတစ်ဦးနဲ့အတူ သွန်သင်ခြင်းနည်းပညာကို ပြသသွားတာက အသင်းတော်အတွက် အားပေးမှုဖြစ်စေမှာ အမှန်ပါပဲ။

^၈ သွန်သင်ချက်– သင်တန်းကြီးကြပ်မှူးက တင်ဆက်မှုတစ်ခုပြီးတိုင်း သီအိုကရက်တစ် ဓမ္မအမှုကျောင်းမှ အကျိုးရယူစာအုပ်အပေါ် အခြေခံပြီး ချီးမွမ်းပြောဆိုဖို့၊ တည်ဆောက်မှုဖြစ်စေတဲ့မှတ်ချက်တွေ ပေးဖို့အတွက် အချိန် ၂ မိနစ် ရရှိပါမယ်။ သင်တန်းသား/သူကို မိတ်ဆက်ချိန်မှာ သင်တန်းကြီးကြပ်မှူးက သင်တန်းသား/သူ ပြုလုပ်သွားမယ့် စကားပြောအရည်အသွေးကို ကြေညာမှာ မဟုတ်ပါဘူး။ တင်ဆက်မှုပြီးသွားတိုင်း ကြီးကြပ်မှူးက သင်တန်းသား/သူကို စိတ်ရင်းမှန်နဲ့ ချီးမွမ်းပြီးတဲ့အခါ၊ သင်တန်းသားပြုလုပ်သွားတဲ့ စကားပြောအရည်အသွေးကို ပြောပြမှာဖြစ်တယ်။ အဲဒီအရည်အသွေးကို သင်တန်းသားပြုလုပ်သွားတာက ဘာကြောင့်ကောင်းတယ်ဆိုတာ သတ်သတ်မှတ်မှတ် ပြောနိုင်တယ်။ ဒါမှမဟုတ် အဲဒီအရည်အသွေးကို ဒီထက်ပို ကြိုးစားလုပ်ဆောင်မယ်ဆိုရင် ဘာကြောင့် အကျိုးရှိတယ်ဆိုတာ ကြင်နာစွာရှင်းပြနိုင်တယ်။

^၉ သွန်သင်ချက်ပုံစံကို ဓမ္မအမှုကျောင်းစာအုပ် စာမျက်နှာ ၇၉ နဲ့ ၈၁ တို့မှာ တွေ့နိုင်ပါတယ်။ စည်းဝေးပြီးသွားတဲ့အခါ ကြီးကြပ်မှူးက သင်တန်းသားရဲ့ ဓမ္မအမှုကျောင်းစာအုပ်ရှိ သွန်သင်ချက်ပုံစံမှာ အမှတ်ခြစ်ပေးမှာဖြစ်တယ်။ တာဝန်ကျသင်ခန်းစာနဲ့ ဆက်စပ်နေတဲ့ လေ့ကျင့်ခန်းတွေကို သင်တန်းသား/သူ လုပ်မလုပ်ဆိုတာကို သီးသန့်မေးမြန်းပါ။ သင်တန်းသား/သူကို ချီးမွမ်းပေးတာ၊ အထောက်အကူဖြစ်စေတဲ့ ထပ်ဆင့်အကြံပြုချက်တွေကို အစည်းအဝေးပြီးတဲ့အခါ ဒါမှမဟုတ် တခြားအချိန်မှာပေးနိုင်ပါတယ်။ သင်တန်းသား/သူတိုင်းက သတ်သတ်မှတ်မှတ် ရရှိတဲ့အကြံပြုချက်တွေကို ဘုရားရေးရာမှာတိုးတက်အောင် ထောက်ကူပေးတဲ့အရာအဖြစ် ရှုမြင်သင့်ပါတယ်။—၁ တိ. ၄:၁၅။

^၁၀ တကယ်လို့ သင်တန်းသား/သူတစ်ယောက်က အချိန်ကျော်တယ်ဆိုရင် သင်တန်းကြီးကြပ်မှူး ဒါမှမဟုတ် လက်ထောက်က အချိန်စေ့ပြီဖြစ်ကြောင်း ဘဲလ်တီးတာ ဒါမှမဟုတ် တခြားနည်းနဲ့အချက်ပြတာမျိုး လိမ္မာပါးနပ်စွာ အချက်ပေးသင့်ပါတယ်။ သင်တန်းသားကလည်း အချက်ပေးနေတာကို သိတဲ့အခါ ပြောလက်စကို လက်စသတ်ပြီး စင်ပေါ်ကနေ ဆင်းလာသင့်တယ်။—ဓမ္မအမှုကျောင်းစာအုပ် စာမျက်နှာ ၂၈၂၊ အပိုဒ် ၄ ကို ကြည့်ပါ။

^၁၁ တောင်းဆိုချက်တွေကို ပြည့်မီသူတိုင်း ဟောပြောသွန်သင်ခြင်းသင်တန်းမှာ စာရင်းပေးဖို့ အားပေးပါ။ (ဓမ္မအမှုကျောင်းစာအုပ် စာမျက်နှာ ၂၈၂၊ အပိုဒ် ၆ ကို ကြည့်ပါ။) နိုင်ငံတော်သတင်းကောင်းကို ယုံကြည်စိတ်ချမှုအပြည့်၊ သိက္ခာရှိရှိ၊ မေတ္တာနဲ့ ဟောပြောသွန်သင်ပေးနိုင်အောင် ယေဟောဝါရဲ့ကျေးကျွန်တွေကို ဒီသင်တန်းက အများကြီးအထောက်အကူပြုခဲ့ပါပြီ။ ဟောပြောသွန်သင်ခြင်းသင်တန်းကနေ အကျိုးကျေးဇူးများစွာ ရရှိနေကြသူတွေရဲ့ ချီးမွမ်းမှုကို ယေဟောဝါဘုရား နှစ်ခြိုက်သဘောကျမှာ သေချာပါတယ်။—ဆာ. ၁၄၈:၁၂၊ ၁၃; ဟေရှာ. ၅၀:၄။