နိုင်ငံတော် သီချင်းသစ်များ

^၁ ၂၀၁၄၊ အောက်တိုဘာ ၄ ရက်နေ့မှာကျင်းပတဲ့ ပဲင်စီလ်ဗေးနီးယား ကင်းမျှော်စင် သမ္မာကျမ်းစာနှင့် ဝေစာအသင်းရဲ့ နှစ်ပတ်လည်အစည်းအဝေးမှာ လက်ရှိသီချင်းစာအုပ်ကို ပြန်လည်တည်းဖြတ်မယ့် အစီအစဉ်အကြောင်း ကြေညာခဲ့ပါတယ်။ စိတ်လှုပ်ရှားစရာကောင်းတဲ့ သတင်းပါပဲ။ နိုင်ငံတော်သီချင်းတွေဟာ ဝတ်ပြုရေးမှာ အရေးပါတယ်ဆိုတာ ပရိသတ်အားလုံး အမှတ်ရခဲ့ကြတယ်။—ဆာ. ၉၆:၂။

^၂ ‘လက်ရှိသီချင်းစာအုပ်ကို ဘာဖြစ်လို့ ပြန်လည်တည်းဖြတ်ဖို့ လိုတာလဲ’ ဆိုပြီး သင်သိချင်မှာပဲ။ ပြန်လည်တည်းဖြတ်ဖို့လိုရတဲ့ အကြောင်းရင်းတွေ ရှိပါတယ်။ ပထမ၊ ကျမ်းစာသားတွေကို ကျွန်ုပ်တို့ရဲ့နားလည်မှုက ပိုမိုရှင်းလင်းလာတဲ့အတွက် သီချင်းစာသားတွေအပေါ်လည်း အကျိုးသက်ရောက်မှု ရှိလာပါတယ်။ (သု. ၄:၁၈) ဒုတိယ၊ လက်ရှိသီချင်းစာအုပ်မှာပါတဲ့ အသုံးအနှုန်းတွေနဲ့ စာသားအများစုဟာ ကမ္ဘာသစ်ဘာသာပြန်ကျမ်းစာအုပ် အဟောင်းကနေ ကောက်နုတ်ထားတာ ဖြစ်ပါတယ်။ ဒါကြောင့် ကမ္ဘာသစ်ဘာသာပြန်ကျမ်းအသစ်ထဲက အသုံးအနှုန်းတွေနဲ့ ကိုက်ညီအောင် သီချင်းစာသားတွေကို ပြုပြင်ပြောင်းလဲရမယ်။ သီချင်းစာသားတွေကို လက်ရှိကျမ်းစာသားတွေနဲ့ကိုက်ညီဖို့ ပြုပြင်ပြောင်းလဲမှု အများကြီးလုပ်ရမှာဖြစ်တဲ့အတွက် သီချင်းအသစ်အနည်းငယ်ကို ထပ်ဖြည့်ဖို့ ဆုံးဖြတ်ခဲ့ကြတယ်။

^၃ သီချင်းအသစ်တွေ ဆိုနိုင်ဖို့ ပုံနှိပ်ထုတ်ဝေတဲ့အထိ စောင့်နေရမှာလား။ စောင့်စရာ မလိုပါဘူး။ နောက်လတွေမှာ သီချင်းအသစ်တချို့ကို jw.org ဝက်ဘ်ဆိုက်မှာ တင်ထားပေးမယ်ဆိုတာ ဝမ်းမြောက်စွာ အသိပေးလိုက်ပါတယ်။ သီချင်းအသစ်တစ်ပုဒ် တင်ပြီးတဲ့အခါတိုင်း “သီချင်းအသစ်” ဆိုတဲ့အမှတ်အသားနဲ့ လုပ်ငန်းတော်စည်းဝေးနိဂုံးပိုင်းမှာ ထည့်ပေးဖို့ စီစဉ်ထားပါတယ်။

^၄ သီချင်းအသစ်တွေကို သင်ယူနိုင်ပုံ– သီချင်းအသစ်တစ်ပုဒ်ကို သင်ယူဖို့ ခက်ခဲနိုင်ပါတယ်။ ဒါပေမဲ့ ဆာလံဆရာလို ကျွန်ုပ်တို့လည်း အသင်းတော်အစည်းအဝေးတွေမှာ အားရပါးရ သီဆိုချင်ကြတယ်။ “နှုတ်ဆိတ်” ပြီးမနေချင်ကြဘူး။ (ဆာ. ၃၀:၁၂၊ ကဘ) သီချင်းအသစ်တစ်ပုဒ် သင်ယူနိုင်ဖို့ အောက်ပါအဆင့်လေးဆင့်အတိုင်း လေ့ကျင့်ပါ။

• စန္ဒယားနဲ့တီးထားတဲ့ သီချင်းသံစဉ်ကို ခဏခဏနားထောင်ပေးပါ။ အဲဒီသံစဉ်ကို ကျွန်ုပ်တို့ရဲ့ဝက်ဘ်ဆိုက်မှာ တင်ထားပေးမှာ ဖြစ်တယ်။ တေးသံသာကို ခဏခဏ နားထောင်တဲ့အခါ မှတ်မိဖို့ လွယ်ကူလာမှာဖြစ်တယ်။

• သီချင်းစာသားတွေကို အလွတ်ရအောင် ကြိုးစားပါ။

• တေးစာသားတွေကို သံစဉ်နဲ့ တွဲဖက်သီဆိုပါ။ ကျွမ်းကျွမ်းကျင်ကျင်သီဆိုနိုင်တဲ့အထိ လေ့ကျင့်ပါ။

• မိသားစုဝတ်ပြုမှုအစီအစဉ်မှာ မကြာခဏ လေ့ကျင့်ပါ။ အဲဒီသီချင်းတွေကို မိသားစုတွေ ကောင်းကောင်းဆိုလာနိုင်တဲ့အထိ လေ့ကျင့်ပါ။

^၅ သီချင်းအသစ်တစ်ပုဒ်ကို လုပ်ငန်းတော်စည်းဝေးနိဂုံးပိုင်းမှာ ထည့်ပေးတဲ့အခါတိုင်း စန္ဒယားနဲ့တီးခတ်ထားတဲ့ သံစဉ်ကို အသင်းတော်မှာ တစ်ကြိမ် ဖွင့်ပြပါလိမ့်မယ်။ အဲဒီအခါ ပရိသတ်က ဆိုနေကျပုံစံအတိုင်းပဲ သီချင်းလိုက်ဆိုကြမှာ ဖြစ်တယ်။

^၆ အသင်းတော်အစည်းအဝေးတွေမှာ ယေဟောဝါဘုရားကို ချီးမွမ်းဖို့ အားပါးတရ သံပြိုင်သီဆိုနိုင်မှာ ဖြစ်တယ်။ ဒါကြောင့် သီချင်းအသစ်စဖွင့်တဲ့အခါ မလိုအပ်ဘဲ ကိုယ့်နေရာကနေ ထွက်မသွားပါနဲ့။

^၇ မြင့်မြတ်တဲ့တေးသံကို ကျေးဇူးတင်လေးမြတ်ကြောင်း ဖော်ပြနိုင်တဲ့ နည်းတစ်နည်းရှိပါသေးတယ်။ တိုက်နယ်စည်းဝေးတွေနဲ့ ခရိုင်စည်းဝေးတွေမှာ အစီအစဉ်မစခင် တေးသံသာကို ဖွင့်ပေးထားပါတယ်။ ကမ္ဘာအနှံ့မှာရှိတဲ့ ဘုရားကိုချစ်တဲ့ ညီအစ်ကိုညီအစ်မတွေက နယူးယောက်မြို့ ပက်တာစင်ကို ကိုယ်ပိုင်စရိတ်နဲ့ တစ်နှစ် ၂ ကြိမ် ရောက်လာပြီး နိုင်ငံတော်သီချင်းတေးသံသာတွေ တီးခတ်ပေးကြတယ်။ ဒါကြောင့် ကိုယ့်နေရာမှာထိုင်ပြီး တေးသံသာကိုနားဆင်ဖို့ စည်းဝေးသဘာပတိ ပြောတဲ့အခါ ကျွန်ုပ်တို့ ထိုင်ပြီးနားထောင်သင့်ပါတယ်။ အဲဒီလိုနားထောင်တာက မကြာခင်စတင်မယ့် စည်းဝေးအစီအစဉ်ကို အာရုံစိုက်ဖို့ အသင့်ပြင်ဆင်ထားရာ ရောက်ပါတယ်။—ဧဇ. ၇:၁၀။

^၈ ဒီနေ့ စည်းဝေးအစီအစဉ်ကို “တည်ထောင်ပြီးသားနိုင်ငံတော် လာပါစေ” သီချင်းအသစ်နဲ့ နိဂုံးချုပ်မှာဖြစ်တယ်။ ပြီးခဲ့တဲ့ နှစ်ပတ်လည်အစည်းအဝေးမှာ အလေးပေးဖော်ပြခဲတဲ့ ဒီသီချင်းက နိုင်ငံတော်တည်ထောင်တာ အနှစ် ၁၀၀ ပြည့်တဲ့ အထိမ်းအမှတ်နဲ့ သီကုံးဖွဲ့ဆိုထားတာ ဖြစ်ပါတယ်။

^၉ သီချင်းအသစ်တွေဟာ ယေဟောဝါဘုရားဆီကရတဲ့ “ကောင်းသောအရာများ” ဖြစ်တယ်ဆိုတာ သေချာပါတယ်။ (မ. ၁၂:၃၅က) သီချင်းအသစ်တွေကို သင်ယူပြီး အားရပါးရသီဆိုနိုင်ဖို့ စိတ်ပိုင်းဖြတ်ထားကြပါစို့။ အဲဒီသီချင်းတွေနဲ့ ကျွန်ုပ်တို့ရဲ့ဘုရားသခင် ယေဟောဝါကို ချီးမွမ်းဂုဏ်တင်ကြပါစို့။—ဆာ. ၁၄၇:၁။