လူငယ်တို့၊ တခြားသူတွေရဲ့ ယုံကြည်စိတ်ချမှု ဘယ်လို ရနိုင်မလဲ

၁။ လူငယ်တွေမှာ ဘာအားသာချက်တွေ ရှိသလဲ။

လူငယ်တို့၊ သင်တို့ဟာ အသင်းတော်အတွက် အသုံးဝင်သူတွေ ဖြစ်နိုင်တယ်။ ကျန်းမာသန်စွမ်းပြီး ခွန်အား ရှိကြတယ်။ (ပညာ. ၂၀:၂၉) ညီအစ်ကို/မတွေအတွက် တကယ် အားထားရသူတွေ ဖြစ်တယ်။ အသင်းတော် အမှုထမ်းအဖြစ် ခန့်အပ်ခံရမယ့်အချိန်ကို သင်တို့ မျှော်လင့်နေမှာပဲ။ ဒါပေမဲ့ အရေးကြီး တာဝန်တွေ ရဖို့ အသက်ငယ်လွန်းသေးတယ်၊ အတွေ့အကြုံ သိပ်နုသေးတယ်လို့ တခြားသူတွေ မြင်နေတယ်ဆိုပြီး ခံစားနေရနိုင်တယ်။ အသက်ငယ်ပေမဲ့ အသင်းတော်မှာရှိတဲ့ ညီအစ်ကို/မတွေရဲ့ ယုံကြည်စိတ်ချမှု၊ လေးစားမှု ရဖို့ လောလောဆယ် လုပ်ဆောင်နိုင်တာတွေ ရှိပါတယ်။

၂။ ဒီဆောင်းပါးမှာ ဘာအကြောင်း ဆွေးနွေးကြမလဲ။

^၂ ဒီဆောင်းပါးမှာ ဘုရင်ဒါဝိဒ်အကြောင်း၊ အာသနဲ့ ယောရှဖတ်ဆိုတဲ့ ယုဒဘုရင် နှစ်ပါးအကြောင်း ဆွေးနွေးပါမယ်။ သူတို့ ဘယ်အခက်အခဲတွေ ကြုံရသလဲ၊ ဘယ်လို ဖြေရှင်းခဲ့သလဲ၊ သူတို့ရဲ့ ပုံနမူနာကနေ လူငယ်တွေ ဘာသင်ယူနိုင်သလဲဆိုတာလည်း သုံးသပ်သွားပါမယ်။

ဘုရင်ဒါဝိဒ်ဆီကနေ သင်ယူပါ

၃။ အသင်းတော်မှာရှိတဲ့ အသက်ကြီးသူတွေကို လူငယ်တွေ ကူညီပေးနိုင်တဲ့ နည်းတစ်နည်းက ဘာလဲ။

^၃ ဒါဝိဒ်ဟာ လူငယ်ဘဝမှာကတည်းက တခြားသူတွေ နှစ်သက်အားကျရတဲ့ စွမ်းရည်တွေ သင်ယူတတ်မြောက်ထားတယ်။ ယေဟောဝါနဲ့ ရင်းနှီးတဲ့ ဆက်ဆံရေး ရှိထားတယ်။ ဂီတစွမ်းရည်လည်း ရှိတယ်။ အဲဒီစွမ်းရည်ကို သုံးပြီး ဘုရား ခန့်အပ်ထားတဲ့ ဘုရင် ရှောလုကို ဖျော်ဖြေပေးတယ်။ (၁ ရှ. ၁၆:၁၆၊ ၂၃) လူငယ်တို့၊ သင်တို့မှာကော အသင်းတော်မှာရှိတဲ့ တခြားသူတွေကို အထောက်အကူပြုမယ့် စွမ်းရည်တစ်မျိုးမျိုး ရှိထားသလား။ အများစုမှာ ရှိပါတယ်။ ဥပမာ၊ ကိုယ်ပိုင်လေ့လာမှုနဲ့ အသင်းတော် အစည်းအဝေးတွေအတွက် တက်ဘလက်၊ တခြား အီလက်ထရောနစ် ကိရိယာတွေ ဘယ်လို သုံးရမလဲဆိုတာ ပြပေးတဲ့အခါ သက်ကြီး ညီအစ်ကို/မတွေ သိပ်ကျေးဇူးတင်ကြမှာပဲ။ သင်တို့ရဲ့ နည်းပညာ ကျွမ်းကျင်မှုက သူတို့အတွက် များစွာ အထောက်အကူ ဖြစ်နိုင်တယ်။

၄။ ဒါဝိဒ်လိုပဲ ဘယ်အရည်အသွေးတွေကို လူငယ်တွေ မွေးမြူနိုင်သလဲ။ (မျက်နှာဖုံးပုံကို ကြည့်ပါ။)

^၄ ဒါဝိဒ်ဟာ တာဝန်သိတတ်သူ၊ ယုံကြည်စိတ်ချထိုက်သူ ဖြစ်တယ်။ ဥပမာ၊ လူငယ် ဖြစ်ပေမဲ့ ဖခင်ရဲ့ သိုးအုပ်ကို ကြိုးကြိုးစားစား ထိန်းကျောင်းတယ်။ သိုးထိန်းအလုပ်ဟာ အန္တရာယ် သိပ်များတယ်။ “ကျွန်တော်ဟာ အဖေ့သိုးအုပ်ကို ထိန်းကျောင်းရသူပါ။ ခြင်္သေ့တစ်ကောင်က သိုးကို လာဆွဲဖူးတယ်။ ဝက်ဝံလည်း လာဆွဲဖူးတယ်။ ကျွန်တော် လိုက်ပြီး တိုက်ခိုက်တော့ သိုးကို သားရဲပါးစပ်ထဲကနေ ကယ်နိုင်ခဲ့တယ်” လို့ နောက်ပိုင်းမှာ ဘုရင်ရှောလုကို ဒါဝိဒ် ပြောတယ်။ (၁ ရှ. ၁၇:၃၄၊ ၃၅) သိုးတွေကို ကာကွယ်ဖို့ တာဝန်ရှိတယ်လို့ ခံစားရတဲ့အတွက် အန္တရာယ်တွေကို သတ္တိရှိရှိ ရင်ဆိုင်တိုက်ခိုက်ခဲ့တယ်။ လူငယ်တွေလည်း ပေးအပ်ခံရတဲ့ ဘယ်တာဝန်ကိုမဆို ကျေပွန်အောင် ထမ်းဆောင်ခြင်းအားဖြင့် ဒါဝိဒ်ကို တုပနိုင်တယ်။

၅။ ဆာလံ ၂၅:၁၄ အရ လူငယ်တွေ လုပ်ဆောင်နိုင်တဲ့ အရေးကြီးဆုံး အရာတစ်ခုက ဘာလဲ။

^၅ လူငယ်ဒါဝိဒ်ဟာ ယေဟောဝါနဲ့ ရင်းနှီးတဲ့ ဆက်ဆံရေး ရှိအောင် ကြိုးစားတယ်။ အဲဒီဆက်ဆံရေးဟာ ဒါဝိဒ်ရဲ့ ရဲစွမ်းသတ္တိ၊ ဂီတစွမ်းရည်ထက် ပိုအရေးကြီးတယ်။ ဒါဝိဒ်အတွက် ယေဟောဝါဟာ ဘုရားသာမက အရင်းနှီးဆုံး မိတ်ဆွေလည်း ဖြစ်ခဲ့တယ်။ (ဆာလံ ၂၅:၁၄ ကိုဖတ်ပါ။) လူငယ်တို့၊ သင်တို့ လုပ်ဆောင်နိုင်တဲ့ အရေးကြီးဆုံး အရာတစ်ခုကတော့ ကောင်းကင်ဖခင်နဲ့ ဆက်ဆံရေး ခိုင်မြဲအောင် လုပ်ခြင်းပါပဲ။ ဒါဆိုရင် ထပ်ဆင့်အခွင့်ထူးတွေ ရလာနိုင်တယ်။

၆။ ဒါဝိဒ်ကို တခြားသူတွေ ဘယ်လို မြင်ကြသလဲ။

^၆ ဒါဝိဒ် ကြုံရတဲ့ အခက်အခဲတစ်ခုကတော့ တခြားသူတွေရဲ့ အပျက်သဘောထားပဲ။ ဥပမာ၊ ဂေါလျတ်ကို ဒါဝိဒ် ထွက်တိုက်မယ်လုပ်တော့ ဘုရင် ရှောလုက “မင်းက ချာတိတ်လေးပဲ ရှိသေးတာ” လို့ ပြောပြီး တားဖို့ ကြိုးစားတယ်။ (၁ ရှ. ၁၇:၃၁-၃၃) အစောပိုင်းတုန်းကလည်း ဒါဝိဒ်ရဲ့ အစ်ကိုက ဒါဝိဒ်ကို တာဝန်မသိတတ်ဘူးလို့ စွပ်စွဲတယ်။ (၁ ရှ. ၁၇:၂၆-၃၀) ဒါပေမဲ့ ယေဟောဝါကတော့ ဒါဝိဒ်ကို ငယ်လွန်းတယ်၊ တာဝန်မသိတတ်ဘူးလို့ မယူဆဘူး။ ဒါဝိဒ်ကို ကောင်းကောင်း သိတယ်။ ဒါဝိဒ်ဟာ အစွမ်းခွန်အား ရဖို့ မိတ်ဆွေ ယေဟောဝါကို အားကိုးတဲ့အတွက် ဂေါလျတ်ကို အောင်နိုင်ခဲ့တယ်။—၁ ရှ. ၁၇:၄၅၊ ၄၈-၅၁။

၇။ ဒါဝိဒ်ဆီကနေ ဘာသင်ယူနိုင်သလဲ။

^၇ ဒါဝိဒ်ဆီကနေ သင်ယူနိုင်တာ နောက်တစ်ခုကတော့ စိတ်ရှည်ဖို့ပါပဲ။ ကိုယ့်ကို ငယ်ငယ်လေးကတည်းက သိခဲ့သူတွေက ကလေးလို့ပဲ မြင်နေတုန်း ဖြစ်နိုင်တယ်။ ဒါပေမဲ့ ယေဟောဝါက အပြင်ပန်းကိုပဲ မကြည့်ဘူး၊ သင် ဘယ်သူလဲ၊ ဘာတွေ လုပ်နိုင်သလဲဆိုတာ ကောင်းကောင်း သိကြောင်း စိတ်ချနိုင်ပါတယ်။ (၁ ရှ. ၁၆:၇) ဒါကြောင့် ဘုရားနဲ့ ဆက်ဆံရေး ခိုင်မြဲအောင် လုပ်ပါ။ ဒါဝိဒ်ဟာ ယေဟောဝါရဲ့ ဖန်ဆင်းခြင်း လက်ရာတွေကို လေ့လာခြင်း၊ အဲဒီလက်ရာတွေက ဖန်ဆင်းရှင်အကြောင်း ဘာသင်ပေးသလဲဆိုတာ တွေးတောခြင်းအားဖြင့် ဘုရားနဲ့ ဆက်ဆံရေး ခိုင်မြဲအောင် လုပ်ခဲ့တယ်။ (ဆာ. ၈:၃၊ ၄။ ၁၃၉:၁၄။ ရော. ၁:၂၀) သင် လုပ်ဆောင်နိုင်တာ နောက်တစ်ခုကတော့ အစွမ်းခွန်အား ရဖို့ ယေဟောဝါကို အားကိုးခြင်းပါပဲ။ ဥပမာ၊ ယေဟောဝါသက်သေ ဖြစ်နေလို့ အတန်းဖော်တွေ လှောင်ပြောင်သလား။ ဒါဆိုရင် ခံနိုင်ရည် ရှိအောင် ကူညီပေးပါလို့ ယေဟောဝါဆီ ဆုတောင်းပါ။ ကျမ်းစာ၊ ကျမ်းစာအခြေပြုစာပေ၊ ဗီဒီယိုတွေမှာ ပါတဲ့ လက်တွေ့ကျ အကြံပြုချက်တွေကို ကျင့်သုံးပါ။ အခက်အခဲတစ်ခုကို ရင်ဆိုင်ဖြေရှင်းနိုင်အောင် ယေဟောဝါ ကူညီပေးတာကို မြင်ရတိုင်း ဘုရားအပေါ် ယုံကြည်စိတ်ချမှု တိုးများလာပါလိမ့်မယ်။ အဲဒီအပြင် ယေဟောဝါကို သင် ယုံကြည်အားကိုးမှန်း တခြားသူတွေ မြင်တဲ့အခါ သင့်ကို ယုံကြည်စိတ်ချလာပါလိမ့်မယ်။

၈-၉။ ဘုရင် ဖြစ်မလာခင် စိတ်ရှည်စွာ စောင့်ဆိုင်းဖို့ ဒါဝိဒ်ကို ဘာက ကူညီပေးသလဲ။ ဒါဝိဒ်ဆီကနေ လူငယ်တွေ ဘာသင်ယူနိုင်သလဲ။

^၈ ဒါဝိဒ် ကြုံရတဲ့ နောက်အခက်အခဲတစ်ခု ရှိသေးတယ်။ ဘုရင်အဖြစ် ဘိသိက်ပေးခံရပြီးနောက်မှာတောင် အစ္စရေးဘုရင်အဖြစ် တရားဝင် နန်းထိုင်ဖို့ နှစ်ပေါင်းများစွာ စောင့်ခဲ့ရတယ်။ (၁ ရှ. ၁၆:၁၃။ ၂ ရှ. ၂:၃၊ ၄) အဲဒီအတောအတွင်း စိတ်ရှည်စွာ စောင့်ဆိုင်းဖို့ ဘာက ကူညီပေးသလဲ။ စိတ်ဓာတ်ကျမယ့်အစား လုပ်နိုင်တာကို အာရုံစိုက်တယ်။ ဥပမာ၊ ဖိလိတိပြည်မှာ ဝရမ်းပြေးအဖြစ် နေထိုင်တုန်းက အစ္စရေးလူမျိုးရဲ့ ရန်သူတွေကို တိုက်ခိုက်ခြင်းအားဖြင့် ရတဲ့ အခွင့်အရေးကို အကောင်းဆုံး အသုံးချပြီး အစ္စရေး ပိုင်နက်ကို ကာကွယ်ပေးတယ်။—၁ ရှ. ၂၇:၁-၁၂။

^၉ ဒါဝိဒ်ဆီကနေ လူငယ်တွေ ဘာသင်ယူနိုင်သလဲ။ ရလာတဲ့ အခွင့်အရေး မှန်သမျှကို သုံးပြီး ညီအစ်ကို/မတွေရဲ့ အကျိုး သယ်ပိုးပါ။ ညီအစ်ကို ရီကာဒိုအကြောင်း စဉ်းစားကြည့်ပါ။b ဆယ်ကျော်သက်အရွယ်ကတည်းက မှန်မှန်ရှေ့ဆောင်အဖြစ် အမှုဆောင်ချင်တယ်။ ဒါပေမဲ့ အဆင်သင့် မဖြစ်သေးဘူးလို့ အကြီးအကဲတွေ ပြောတယ်။ ရီကာဒို လက်လျှော့၊ စိတ်ဓာတ်ကျမယ့်အစား အမှုဆောင်မှာ ပိုပါဝင်တယ်။ “ပြန်တွေးကြည့်လိုက်တော့ အဲဒီတုန်းက ကျွန်တော့်မှာ တိုးတက်စရာတွေ ရှိသေးတယ်။ ဒါကြောင့် စိတ်ဝင်စားသူတိုင်းဆီ ပြန်သွားဖို့ ကြိုးစားတယ်။ ပြန်လည်ပတ်မှုတိုင်းအတွက် ကြိုတင်ပြင်ဆင်တယ်။ ဦးဆုံးကျမ်းစာသင်အံမှုကိုတောင် စနိုင်ခဲ့တယ်။ အတွေ့အကြုံ ရလာတာနဲ့အမျှ ကိုယ့်ကိုယ်ကိုယ် ယုံကြည်စိတ်ချမှု တိုးများလာတယ်” လို့ ရီကာဒို ပြောတယ်။ အခု ရီကာဒိုဟာ မှန်မှန်ရှေ့ဆောင်နဲ့ အသင်းတော် အမှုထမ်းအဖြစ် အမှုဆောင်နေပြီ။

၁၀။ တစ်ကြိမ်မှာ အရေးကြီး ဆုံးဖြတ်ချက် မချခင် ဒါဝိဒ် ဘာလုပ်သလဲ။

^၁၀ ဒါဝိဒ် ကြုံရတဲ့ နောက်အခြေအနေတစ်ခုကို စဉ်းစားကြည့်ပါ။ ဒါဝိဒ်နဲ့ သူ့လူတွေ ဝရမ်းပြေးဘဝတုန်းက တစ်ကြိမ်မှာ မိသားစုကို ထားရစ်ခဲ့ပြီး ရန်သူတွေကို သွားတိုက်ကြတယ်။ သူတို့ မရှိတုန်း ကျန်ရစ်ခဲ့တဲ့ မိသားစုကို ရန်သူတွေ ဝင်တိုက်ပြီး ဖမ်းခေါ်သွားတယ်။ အတွေ့အကြုံရှိ စစ်သည်တစ်ယောက်အနေနဲ့ ဖမ်းခေါ်သွားခံရသူတွေကို ပြန်ကယ်ဖို့ ဒါဝိဒ် ချက်ချင်း စီစဉ်မယ်ဆိုရင် စီစဉ်နိုင်တယ်။ ဒါပေမဲ့ လမ်းညွှန်မှု ရဖို့ ယေဟောဝါကို အားကိုးတယ်။ ပုရောဟိတ် အဗျာသာကတစ်ဆင့် “ဒီဓားပြတွေနောက်ကို လိုက်ရမလား” ဆိုပြီး ယေဟောဝါကို မေးတယ်။ လိုက်ပါ၊ နိုင်မယ်လို့ ယေဟောဝါ ဖြေတယ်။ (၁ ရှ. ၃၀:၇-၁၀) ဒီအဖြစ်အပျက်ကနေ ဘာသင်ယူနိုင်သလဲ။

၁၁။ ဆုံးဖြတ်ချက် မချခင် ဘာလုပ်နိုင်သလဲ။

^၁၁ ဆုံးဖြတ်ချက် မချခင် အကြံဉာဏ် တောင်းပါ။ မိဘတွေနဲ့ တိုင်ပင်ပါ။ အတွေ့အကြုံရှိ အကြီးအကဲတွေနဲ့ စကားပြောခြင်းအားဖြင့်လည်း အကြံဉာဏ်ကောင်းတွေ ရနိုင်တယ်။ အဲဒီခန့်အပ်ခံ အမျိုးသားတွေကို ယေဟောဝါ ယုံကြည်စိတ်ချလို့ သင်လည်း စိတ်ချနိုင်ပါတယ်။ သူတို့ကို အသင်းတော်အတွက် “လက်ဆောင်” အဖြစ် ယေဟောဝါ ပေးထားတာ။ (ဧ. ၄:၈) အကြီးအကဲတွေရဲ့ ယုံကြည်ခြင်းကို တုပခြင်း၊ သူတို့ရဲ့ ပညာရှိ အကြံဉာဏ်တွေကို လိုက်နာခြင်းအားဖြင့် သင် အကျိုးရနိုင်တယ်။ အခု ဘုရင်အာသဆီကနေ ဘာသင်ယူနိုင်ကြောင်း ဆွေးနွေးကြစို့။

ဘုရင်အာသဆီကနေ သင်ယူပါ

၁၂။ နန်းတက်စတုန်းက ဘုရင်အာသမှာ ဘယ်အရည်အသွေးတွေ ရှိသလဲ။

^၁၂ ဘုရင်အာသဟာ လူငယ်ဘဝမှာ နှိမ့်ချပြီး ရဲစွမ်းသတ္တိရှိသူ ဖြစ်တယ်။ ဥပမာ၊ ဖခင်အဘိယရဲ့ ထီးနန်းကို ဆက်ခံတဲ့အခါ တစ်ပြည်လုံးမှာ ရှိတဲ့ ရုပ်တုတွေကို ဖယ်ရှားတယ်။ “ဘိုးဘေးတို့ရဲ့ ဘုရား ယေဟောဝါကို ရှာဖို့၊ ပညတ်တရားနဲ့ မိန့်မှာချက်ကို လိုက်နာဖို့ ယုဒလူတွေကို တိုက်တွန်းတယ်။” (၂ ရာ. ၁၄:၁-၇) ယုဒပြည်ကို တိုက်ဖို့ အီသီယိုးပီးယားလူမျိုး ဇေရ စစ်သည် ၁,၀၀၀,၀၀၀ နဲ့ ချီတက်လာတဲ့အခါ “ယေဟောဝါဘုရား၊ ကိုယ်တော်က အင်အားကြီးသူတွေကိုဖြစ်စေ၊ အင်အားနည်းသူတွေကိုဖြစ်စေ ကူညီပေးနိုင်ပါတယ်။ ကျွန်တော်တို့ရဲ့ ဘုရား ယေဟောဝါ၊ ကိုယ်တော့်ကို အားကိုးတဲ့အတွက် ကူညီပေးပါ” ဆိုပြီး ယေဟောဝါဆီ အာသ အားကိုးတကြီး အကူအညီ တောင်းတယ်။ ယေဟောဝါရဲ့ ကယ်တင်နိုင်စွမ်းကို အာသ ဘယ်လောက် ယုံကြည်စိတ်ချကြောင်း အဲဒီစကားတွေက ဖော်ပြတယ်။ ကောင်းကင်ဖခင်ကို အာသ ယုံကြည်ကိုးစားတဲ့အတွက် ‘ယေဟောဝါက အီသီယိုးပီးယားလူတွေကို ရှုံးနိမ့်စေတယ်။’—၂ ရာ. ၁၄:၈-၁၂။

၁၃။ နောက်ပိုင်း အာသ ဘာဖြစ်သွားသလဲ။ ဘာကြောင့်လဲ။

^၁၃ စစ်သည် ၁,၀၀၀,၀၀၀ ဆိုတာ နည်းနည်းနောနော အင်အား မဟုတ်ဘူး။ ဒါတောင် ယေဟောဝါကို အားကိုးတဲ့အတွက် အာသ အောင်မြင်ခဲ့တယ်။ ဒါပေမဲ့ နောက်အခက်အခဲတစ်ခု ကြုံရချိန်မှာတော့ ယေဟောဝါကို အာသ အားမကိုးတော့ဘူး။ အစ္စရေး မင်းဆိုး ဗာရှာ စစ်ချီလာတဲ့အခါ အကူအညီ ရဖို့ ဆီးရီးယား ဘုရင်ကို အာသ အားကိုးတယ်။ အဲဒီဆုံးဖြတ်ချက်ကြောင့် အဖြစ်ဆိုးတွေ ကြုံရတယ်။ “မင်းကြီးက ယေဟောဝါဘုရားကို အားမကိုးဘဲ ဆီးရီးယားဘုရင်ကို အားကိုးတဲ့အတွက် ဆီးရီးယားဘုရင်ရဲ့ စစ်တပ်ဟာ မင်းကြီးလက်ထဲကနေ လွတ်မြောက်သွားပြီ” လို့ အာသကို ယေဟောဝါရဲ့ ပရောဖက် ဟာနေနိ ပြောတယ်။ တကယ်လည်း အဲဒီအချိန်ကစပြီး အာသနဲ့ ဗာရှာ အမြဲ စစ်ဆင်နွှဲခဲ့ကြတယ်။ (၂ ရာ. ၁၆:၇၊ ၉။ ၁ ဘု. ၁၅:၃၂) ဘာသင်ခန်းစာ ရသလဲ။

၁၄။ ယေဟောဝါကို အားကိုးကြောင်း ဘယ်လို ပြနိုင်သလဲ။ ၁ တိမောသေ ၄:၁၂ အရ ယေဟောဝါကို အားကိုးရင် ဘာအကျိုးရမလဲ။

^၁၄ နှိမ့်ချနေပါ။ ယေဟောဝါကို ဆက်အားကိုးနေပါ။ သင် နှစ်ခြင်းခံတုန်းက ယေဟောဝါကို ယုံကြည်ကိုးစားကြောင်း ပြခဲ့ပြီးပြီ။ ယေဟောဝါကလည်း သင့်ကို မိသားစုဝင် ဖြစ်ခွင့် ဝမ်းမြောက်ဝမ်းသာ ပေးခဲ့ပြီ။ အဓိကက ယေဟောဝါကို ဆက်အားကိုးနေဖို့ပဲ။ အရေးကြီး ဆုံးဖြတ်ချက်တွေ ချတဲ့အခါ ယေဟောဝါကို အားကိုးဖို့ သိပ်လွယ်တယ်။ ဒါပေမဲ့ တခြားအချိန်တွေမှာကော။ ဖျော်ဖြေရေး၊ အလုပ်အကိုင်၊ ဘဝပန်းတိုင်တွေ အပါအဝင် ဆုံးဖြတ်ချက်တွေ ချတဲ့အခါ ယေဟောဝါကို အားကိုးဖို့ သိပ်အရေးကြီးတယ်။ ကိုယ့်ဉာဏ်ပညာကို အားမကိုးပါနဲ့။ ကိုယ့်အခြေအနေနဲ့ သက်ဆိုင်မယ့် ကျမ်းစာမူတွေ ရှာဖွေပါ။ အဲဒီအတိုင်း လက်တွေ့ကျင့်သုံးပါ။ (ပညာ. ၃:၅၊ ၆) အဲဒီလို လုပ်မယ်ဆိုရင် ယေဟောဝါကို စိတ်ပျော်ရွှင်စေမယ်။ အသင်းတော်မှာရှိတဲ့ ညီအစ်ကို/မတွေရဲ့ လေးစားမှုကိုလည်း ရလာမယ်။—၁ တိမောသေ ၄:၁၂ ကိုဖတ်ပါ။

ဘုရင်ယောရှဖတ်ဆီကနေ သင်ယူပါ

၁၅။ ၂ ရာဇဝင်ချုပ် ၁၈:၁-၃ နဲ့ ၁၉:၂ အရ ဘုရင် ယောရှဖတ် ဘာအမှားတွေ လုပ်သလဲ။

^၁၅ ကျွန်တော်တို့အားလုံး မစုံလင်တဲ့အတွက် အမှားတွေ လုပ်မိနိုင်တယ်။ ဒါပေမဲ့ အမှားလုပ်မိမှာ စိုးလို့ဆိုပြီး ယေဟောဝါရဲ့ အမှုတော်မှာ အစွမ်းရှိသလောက် မပါဝင်ဘဲ နေတာမျိုး မဖြစ်သင့်ဘူး။ ဘုရင်ယောရှဖတ်အကြောင်း စဉ်းစားကြည့်ပါ။ ယောရှဖတ်မှာ အရည်အသွေးကောင်းများစွာ ရှိတယ်။ လူငယ်ဘဝမှာကတည်းက ‘ခမည်းတော်ရဲ့ ဘုရားသခင်ကို ရှာဖွေတယ်။ ဘုရားရဲ့ ပညတ်ချက်အတိုင်း လိုက်လျှောက်တယ်။’ မှူးမတ်တွေကို ယုဒမြို့တွေဆီ စေလွှတ်ပြီး ယေဟောဝါအကြောင်း သွန်သင်ခိုင်းတယ်။ (၂ ရာ. ၁၇:၄၊ ၇) ဒါပေမဲ့ ဆုံးဖြတ်ချက် မှားတဲ့အချိန်တွေလည်း ရှိတယ်။ တစ်ကြိမ်မှာ ယောရှဖတ် ဆုံးဖြတ်ချက် မှားသွားလို့ ယေဟောဝါက လူတစ်ယောက် စေလွှတ်ပြီးတော့တောင် ဆုံးမခဲ့ရတယ်။ (၂ ရာဇဝင်ချုပ် ၁၈:၁-၃။ ၁၉:၂ ကိုဖတ်ပါ။) ဘာသင်ခန်းစာ ရသလဲ။

၁၆။ ရာဂျစ်ရဲ့ တွေ့ကြုံမှုကနေ ဘာသင်ယူနိုင်သလဲ။

^၁၆ အကြံပေးတာကို လက်ခံ၊ လိုက်နာပါ။ လူငယ်များစွာလိုပဲ သင်လည်း ဘဝမှာ ယေဟောဝါရဲ့ အမှုတော်ကို ဦးစားထားဖို့ ခက်နေတာ ဖြစ်နိုင်တယ်။ ဒါပေမဲ့ စိတ်ဓာတ်မကျပါနဲ့။ ညီအစ်ကို ရာဂျစ်အကြောင်း စဉ်းစားကြည့်ပါ။ ဆယ်ကျော်သက်တုန်းကအကြောင်း ရာဂျစ် ဒီလိုပြောတယ်– “ဘဝမှာ လမ်းပျောက်နေတဲ့ အချိန်တွေ ရှိခဲ့ဖူးတယ်။ တခြားလူငယ်တွေလိုပဲ အစည်းအဝေး၊ အမှုဆောင် သွားဖို့ထက် အားကစားနဲ့ အပျော်အပါးကိုပဲ စိတ်ရောက်နေတယ်။” ဒါကို အကြီးအကဲတစ်ယောက် သတိထားမိပြီး အကြံပေးတယ်။ “၁ တိမောသေ ၄:၈ မှာပါတဲ့ ကျမ်းစာမူကို သုံးသပ်ဖို့ အဲဒီအကြီးအကဲ ကူညီပေးတယ်” လို့ ရာဂျစ် ပြောတယ်။ အကြံဉာဏ်ကို ရာဂျစ် နှိမ့်ချစွာ လက်ခံပြီး ဦးစားထားရာတွေကို ပြန်ဆန်းစစ်တယ်။ “ဘုရားရေးရာ ပန်းတိုင်တွေကို ဦးစားပေးချမှတ်ဖို့ ဆုံးဖြတ်လိုက်တယ်” လို့ ရာဂျစ် ပြောတယ်။ ဘာရလဒ် ရသလဲ။ “အကြံပေးခံရပြီး နှစ်အနည်းငယ် အကြာမှာ အသင်းတော် အမှုထမ်းအဖြစ် အမှုဆောင်ဖို့ အရည်အချင်း ပြည့်မီလာတယ်” လို့ ရာဂျစ် ပြောတယ်။

ကောင်းကင်ဖခင်ကို စိတ်ရွှင်လန်းစေပါ

၁၇။ ယေဟောဝါအတွက် အမှုဆောင်နေတဲ့ လူငယ်တွေကို အသက်ကြီးသူတွေ ဘယ်လို သဘောထားသလဲ။

^၁၇ သက်ကြီး ညီအစ်ကို/မတွေဟာ မိမိတို့နဲ့အတူ ယေဟောဝါကို “စည်းလုံးစွာ” ဝတ်ပြုနေတဲ့ လူငယ်တွေကို သိပ်တန်ဖိုးထားတယ်။ (ဇေ. ၃:၉) လူငယ်တွေရဲ့ စိတ်အားထက်သန်မှု၊ တက်ကြွမှုကို သူတို့ သိပ်နှစ်သက်မြတ်နိုးကြတယ်။—၁ ယော. ၂:၁၄။

၁၈။ ပညာအလိမ္မာ ၂၇:၁၁ အရ အမှုတော်မှာ ပါဝင်နေတဲ့ လူငယ်တွေနဲ့ပတ်သက်ပြီး ယေဟောဝါ ဘယ်လို ခံစားရသလဲ။

^၁၈ လူငယ်တို့၊ သင်တို့ကို ယေဟောဝါ ချစ်ပြီး ယုံကြည်စိတ်ချတယ်ဆိုတာ ဘယ်တော့မှ မမေ့ပါနဲ့။ နောက်ဆုံးကာလမှာ စေတနာစိတ်နဲ့ ကိုယ့်ကိုယ်ကိုယ် ပေးဆက်မယ့် လူငယ်များစွာ ရှိမယ်လို့ ဘုရား ကြိုဟောထားတယ်။ (ဆာ. ၁၁၀:၁-၃) ဘုရားကို သင်တို့ ချစ်ပြီး အကြွင်းမဲ့ အမှုဆောင်ချင်ကြမှန်း ဘုရား သိတယ်။ ဒါကြောင့် တခြားသူတွေကိုရော ကိုယ့်ကိုယ်ကိုယ်ပါ စိတ်ရှည်ပါ။ အမှား လုပ်မိတဲ့အခါ ရလာတဲ့ အကြံပေးဆုံးမမှုကို ယေဟောဝါဆီကလို့ သဘောထားပြီး လက်ခံပါ။ (ဟီ. ၁၂:၆) ပေးအပ်ခံရတဲ့ ဘယ်တာဝန်ကိုမဆို ကြိုးကြိုးစားစား လုပ်ဆောင်ပါ။ အရေးကြီးဆုံးကတော့ ကောင်းကင်ဖခင်ကို စိတ်ရွှင်လန်းစေပါ။—ပညာအလိမ္မာ ၂၇:၁၁ ကိုဖတ်ပါ။