သံသယတွေ ဖျောက်ပါ

၁-၂။ (က) ဘုရားကျေးကျွန်တွေ ဘယ်လို သံသယဝင်မိနိုင်သလဲ။ (ခ) ဒီဆောင်းပါးမှာ ဘာအကြောင်း သုံးသပ်ကြမလဲ။

အသက်ကြီးကြီးငယ်ငယ် ကျွန်တော်တို့အားလုံး သံသယa ဝင်တတ်ကြတယ်။ ဥပမာ၊ ကိုယ့်ကို ယေဟောဝါဘုရား တကယ် ဂရုစိုက်ရဲ့လားဆိုပြီး သက်သေခံ လူငယ်တစ်ယောက် သံသယဝင်နေလို့ နှစ်ခြင်းခံဖို့ ချီတုံချတုံ ဖြစ်မိနိုင်တယ်။ ညီအစ်ကိုတစ်ယောက် လူငယ်ဘဝမှာ ငွေနောက် မလိုက်ဘဲ အမှုဆောင်လုပ်ငန်းကို ဦးစားထားခဲ့တယ်။ သက်လတ်ပိုင်း ရောက်လာတော့ မိသားစု စားနိုင်ရုံသောက်နိုင်ရုံလောက်ပဲ ထောက်ပံ့နိုင်တဲ့အခါ ငယ်ငယ်က ချခဲ့တဲ့ ဆုံးဖြတ်ချက် မှန်ရဲ့လားဆိုပြီး သံသယဝင်မိနိုင်တယ်။ သက်ကြီး ညီအစ်မတစ်ယောက် ဇရာထောင်းလာပြီး အရင်က လုပ်နိုင်တာတွေ မလုပ်နိုင်တော့လို့ စိတ်ဓာတ်ကျမိနိုင်တယ်။ ‘ငါ့ကို ယေဟောဝါ တကယ် ဂရုစိုက်ရဲ့လား၊ ယေဟောဝါအတွက် ကိုယ်ကျိုးစွန့်ခဲ့တာတွေ တန်ရဲ့လား၊ ယေဟောဝါအတွက် အသုံးဝင်သေးရဲ့လား’ လို့ သင်ကော သံသယဝင်ဖူးသလား။

^၂ သံသယဝင်လာတဲ့အခါ အဖြေမရှာဘဲ ထားရင် ဝတ်ပြုရေး ထိခိုက်တဲ့အထိ ဖြစ်လာနိုင်တယ်။ (၁) ကိုယ့်ကို ယေဟောဝါ တကယ် ဂရုစိုက်ရဲ့လား၊ (၂) အရင်က ချခဲ့တဲ့ ဆုံးဖြတ်ချက်တွေ မှန်ရဲ့လား၊ (၃) ယေဟောဝါအတွက် အသုံးဝင်ရဲ့လားဆိုတဲ့ သံသယတွေ ဖျောက်ဖို့ ကျမ်းစာ ဘယ်လို ကူညီပေးနိုင်ကြောင်း ဒီဆောင်းပါးမှာ သုံးသပ်သွားပါမယ်။

သံသယတွေ ဘယ်လို ဖျောက်မလဲ

၃။ သံသယတွေ ဖျောက်နိုင်တဲ့ တစ်နည်းက ဘာလဲ။

^၃ သံသယတွေ ဖျောက်နိုင်တဲ့ တစ်နည်းကတော့ ကျမ်းစာကနေ အဖြေရှာတာပါ။ ကျမ်းစာကနေ အဖြေရှာတဲ့အခါ ယေဟောဝါနဲ့ ဆက်ဆံရေး ပိုကောင်းလာမယ်။ “ယုံကြည်ခြင်း ခိုင်မြဲနေ” နိုင်မယ်။—၁ ကော. ၁၆:၁၃။

၄။ ဘယ်လိုနည်းနဲ့ “အရာရာကို မှန်မမှန် အသေအချာ စစ်ဆေး” နိုင်သလဲ။ (၁ သက်သာလောနိတ် ၅:၂၁)

^၄ ၁ သက်သာလောနိတ် ၅:၂၁ ကို ဖတ်ပါ။ “အရာရာကို မှန်မမှန် အသေအချာ စစ်ဆေးပါ” လို့ ကျမ်းစာ အားပေးတယ်။ ဘယ်လို စစ်ဆေးနိုင်သလဲ။ ကိုယ့်အတွေးအခေါ် မှန်မမှန် ကျမ်းစာနဲ့ တိုက်စစ်ခြင်းအားဖြင့်ပါ။ ကိုယ့်ကို ဘုရား တကယ် ဂရုစိုက်ရဲ့လားလို့ သံသယဝင်နေတဲ့ လူငယ်လေးအကြောင်း သုံးသပ်ကြည့်ပါ။ ဘုရား ဂရုမစိုက်လို့ပဲ ဒီလိုအတွေးဝင်လာတာဆိုပြီး သဘောထားသင့်သလား။ မထားသင့်ဘူး။ ယေဟောဝါရဲ့ အတွေးအခေါ်ကို သိဖို့ ကျမ်းစာမှာ အဖြေရှာခြင်းအားဖြင့် “အရာရာကို မှန်မမှန် အသေအချာ စစ်ဆေး” သင့်တယ်။

၅။ တစ်ခုခုကို သံသယဝင်နေရင် ယေဟောဝါရဲ့ အဖြေကို ဘယ်လို “ကြား” နိုင်သလဲ။

^၅ ကျမ်းစာဖတ်တဲ့အခါ ယေဟောဝါ ပြောတာကို “ကြား” ရတယ်။ ဒါပေမဲ့ တစ်ခုခုကို သံသယဝင်နေလို့ အဖြေကြားချင်ရင် ကျမ်းစာဖတ်ရုံနဲ့ မလုံလောက်ဘူး။ ဖတ်ရင်းနဲ့ အဖြေရှာတွေ့လာမှာပါလို့ တွေးလို့မရဘူး။ အဖြေရစေမယ့် ကျမ်းပိုဒ်တွေ ရှာဖတ်ရမယ်။ အဖွဲ့အစည်းစာပေတွေ၊ လေ့လာမှု ကိရိယာတွေ သုံးပြီး သတ်သတ်မှတ်မှတ် ရှာဖွေလေ့လာရမယ်။ (ပညာ. ၂:၃-၆) လေ့လာမှုကနေ အဖြေရှာတွေ့ဖို့ ဆုတောင်းရမယ်။ အဲဒီနောက် ကိုယ့်အခြေအနေနဲ့ ကိုက်တဲ့ ကျမ်းစာမူတွေ၊ လက်တွေ့ကျအချက်တွေ ရှာရမယ်။ ကိုယ်နဲ့ အခြေအနေ တူတဲ့ သစ္စာရှိ ကျေးကျွန်တွေအကြောင်း ကျမ်းမှတ်တမ်းတွေလည်း ဖတ်နိုင်တယ်။

၆။ သံသယတွေ ဖျောက်ဖို့ အစည်းအဝေးတွေက ဘယ်လို ကူညီပေးနိုင်သလဲ။

^၆ အစည်းအဝေး မှန်မှန် တက်တဲ့အခါလည်း ယေဟောဝါ ပြောတာကို “ကြား” ရတယ်။ ဟောပြောချက်မှာ ကြားရတာတစ်ခုခု၊ မှတ်ချက်တစ်ခုခုဟာ ကျွန်တော်တို့ သံသယတွေ ဖျောက်ဖို့ လိုနေတာ ကွက်တိ ဖြစ်နေနိုင်တယ်။ (ပညာ. ၂၇:၁၇) သံသယတချို့ကို ဘယ်လို ဖျောက်နိုင်မလဲ သုံးသပ်ကြည့်ရအောင်။

ကိုယ့်ကို ယေဟောဝါ ဂရုစိုက်ရဲ့လားဆိုတဲ့ သံသယ

၇။ တချို့ ဘယ်လို တွေးမိနိုင်သလဲ။

^၇ ‘ငါ့ကို ယေဟောဝါ တကယ် ဂရုစိုက်ရဲ့လား’ လို့ သံသယဝင်ဖူးသလား။ ကိုယ့်ကိုယ်ကိုယ် အရေးမပါဘူးလို့ ခံစားနေရရင် စကြဝဠာ ဖန်ဆင်းရှင်နဲ့ မိတ်ဆွေ ဘယ်လိုမှ မဖြစ်နိုင်ဘူးလို့ တွေးမိမယ်။ ဘုရင်ဒါဝိဒ်လည်း အဲဒီလိုတွေးခဲ့ပုံပဲ။ လူတွေကို ယေဟောဝါ ဂရုစိုက်တာ ဒါဝိဒ် တအံ့တဩ ဖြစ်ခဲ့တယ်။ “အို ယေဟောဝါ၊ လူဟာ ဘာမို့လို့ ကိုယ်တော် ဂရုစိုက်နေရတာလဲ။ သေမျိုးဖြစ်တဲ့လူဟာ ဘာမို့လို့ ကိုယ်တော် အာရုံစိုက်နေရတာလဲ” လို့ မေးခွန်းထုတ်တယ်။ (ဆာ. ၁၄၄:၃) ဒီမေးခွန်းရဲ့ အဖြေကို ဘယ်မှာ ရှာတွေ့နိုင်သလဲ။

၈။ ၁ ရှမွေလ ၁၆:၆၊ ၇၊ ၁၀-၁၂ အရ လူတွေကို ကြည့်တဲ့အခါ ယေဟောဝါ ဘာသတိထားမိသလဲ။

^၈ တခြားသူတွေအမြင်မှာ အရေးမပါပုံပေါက်သူတွေကို ယေဟောဝါ သတိထားမိကြောင်း ကျမ်းစာကနေ သိရတယ်။ ဥပမာ၊ ယေရှဲရဲ့ သားတစ်ယောက်ကို အစ္စရေးမင်းလောင်းအဖြစ် ဘိသိက်ပေးဖို့ ရှမွေလကို ယေဟောဝါ လွှတ်လိုက်တယ်။ သားရှစ်ယောက်ထဲက ခုနစ်ယောက်ကို ယေရှဲ ခေါ်ပြတယ်။ အငယ်ဆုံးသား ဒါဝိဒ်ကိုတော့ ခေါ်မပြဘူး။b ဒါပေမဲ့ ယေဟောဝါ ရွေးတာ ဒါဝိဒ် ဖြစ်နေတယ်။ (၁ ရှမွေလ ၁၆:၆၊ ၇၊ ၁၀-၁၂ ကို ဖတ်ပါ။) ဒါဝိဒ်ရဲ့ နှလုံးသားကို ယေဟောဝါ မြင်တယ်။ မိမိကို ဒီလူငယ်လေး ဘယ်လောက် ချစ်မှန်း သိတယ်။

၉။ သင့်ကို ယေဟောဝါ ဂရုစိုက်ကြောင်း ဘာကြောင့် စိတ်ချနိုင်သလဲ။ (ရုပ်ပုံကိုလည်း ကြည့်ပါ။)

^၉ သင့်ကို ဂရုစိုက်ကြောင်း ယေဟောဝါ ဘယ်လို ပြသလဲ စဉ်းစားကြည့်ပါ။ သင့်အခြေအနေနဲ့ ကွက်တိကျတဲ့ အကြံဉာဏ်တွေ ပေးတယ်။ (ဆာ. ၃၂:၈) သင့်အကြောင်း ဂဃနဏ မသိဘဲ ဒီလိုအကြံပေးနိုင်ပါ့မလား။ (ဆာ. ၁၃၉:၁) အကြံဉာဏ်အတိုင်း လိုက်လျှောက်လို့ အကျိုးရတဲ့အခါ ကိုယ့်ကို ယေဟောဝါ ဂရုစိုက်တယ်ဆိုတာ ယုံကြည်စိတ်ချလာမယ်။ (၁ ရာ. ၂၈:၉။ တ. ၁၇:၂၆၊ ၂၇) သင် ကြိုးစားပြီး အမှုဆောင်တာ၊ နာခံတာကို ယေဟောဝါ မြင်တယ်။ သင့်အရည်အသွေးကောင်းတွေကို မြင်ပြီး သင်နဲ့ မိတ်ဆွေ ဖြစ်ချင်တယ်။ (ယေ. ၁၇:၁၀) သင့်ဘက်ကလည်း မိတ်ဆွေ ဖြစ်ချင်တာကို မြင်တဲ့အခါ ယေဟောဝါ သိပ်ပျော်မယ်။—၁ ယော. ၄:၁၉။

အရင်က ချခဲ့တဲ့ ဆုံးဖြတ်ချက်တွေ မှန်ရဲ့လား ဆိုတဲ့ သံသယ

၁၀။ အရင်က ချခဲ့တဲ့ ဆုံးဖြတ်ချက်တွေနဲ့ပတ်သက်ပြီး ဘယ်လို တွေးမိနိုင်သလဲ။

^၁၀ အရင်က ချခဲ့တဲ့ ဆုံးဖြတ်ချက်တွေ မှန်ရဲ့လားလို့ တချို့ သံသယဝင်မိနိုင်တယ်။ ယေဟောဝါအတွက် အပြည့်အဝ အမှုဆောင်နိုင်အောင် အလုပ်အကိုင်ကောင်း၊ စီးပွားရေးကောင်းတွေ လက်လွှတ်အဆုံးရှုံးခံခဲ့တာ ဖြစ်နိုင်တယ်။ ဒီလိုနဲ့ နှစ်ဆယ်ချီ ကြာသွားတယ်။ ကိုယ်နဲ့ မတူတဲ့ လမ်းကို လျှောက်ခဲ့ကြတဲ့ အသိမိတ်ဆွေတွေကို ကြည့်လိုက်တဲ့အခါ ငွေအများကြီး ရှာနိုင်ကြပုံပဲ၊ သက်သောင့်သက်သာ နေနိုင်ကြပုံပဲ။ ဒါကြောင့် ‘ယေဟောဝါအတွက် ငါ ကိုယ်ကျိုးစွန့်ခဲ့တာတွေ တန်ရဲ့လား။ အလုပ်များများ လုပ်ပြီး ပိုက်ဆံပိုရှာခဲ့သင့်တာ’ လို့ တွေးလာနိုင်တယ်။

၁၁။ ဆာလံ ၇၃ ကျမ်းရေးသူ ဘာကြောင့် စိတ်အနှောင့်အယှက်ဖြစ်ခဲ့သလဲ။

^၁၁ သင်လည်း သံသယဝင်လာရင် ဆာလံ ၇၃ ကျမ်းရေးသူအကြောင်း စဉ်းစားလိုက်ပါ။ ယေဟောဝါကို ဝတ်မပြုသူတွေ ကျန်းကျန်းမာမာ၊ ချမ်းချမ်းသာသာ၊ အပူအပင်ကင်းကင်း နေနေရပုံပဲ။ (ဆာ. ၇၃:၃-၅၊ ၁၂) သူတို့ ကြီးပွားကောင်းစားပုံပေါက်နေတာကို ဆာလံကျမ်းရေးသူ မြင်တဲ့အခါ ဘုရားအမှုဆောင်ဖို့ ကိုယ်ကျိုးစွန့်ခဲ့တာတွေ မတန်သလို ခံစားလာရတယ်။ အဲဒီခံစားချက်ကြောင့် စိတ်အနှောင့်အယှက်ဖြစ်ပြီး “တစ်နေ့လုံး ဒုက္ခခံနေရတယ်။” (ဆာ. ၇၃:၁၃၊ ၁၄) အဲဒီခံစားချက်ကို ဘယ်လို ဖျောက်ခဲ့သလဲ။

၁၂။ ဆာလံ ၇၃:၁၆-၁၈ အရ စိတ်အနှောင့်အယှက်ဖြစ်စေတဲ့ ခံစားချက်ကို ဆာလံကျမ်းရေးသူ ဘယ်လို ဖျောက်ခဲ့သလဲ။

^၁၂ ဆာလံ ၇၃:၁၆-၁၈ ကို ဖတ်ပါ။ သန့်ရှင်းရာဌာနတော်ကို ဆာလံကျမ်းရေးသူ သွားတယ်။ သန့်ရှင်းရာဌာနတော်မှာ ယေဟောဝါကို ဝတ်ပြုသူတွေအလယ် ရောက်မှပဲ ရှင်းရှင်းလင်းလင်း စဉ်းစားနိုင်သွားတယ်။ လူတချို့ သက်သောင့်သက်သာဘဝ ပိုင်ဆိုင်ထားပုံပေါက်ပေမဲ့ အနာဂတ် မျှော်လင့်ချက် မပိုင်ဆိုင်ထားတာ သဘောပေါက်သွားတယ်။ ဒါကြောင့် ဆာလံကျမ်းရေးသူ စိတ်အနှောင့်အယှက်ဖြစ်မနေတော့ဘူး။ ဘုရားအမှုဆောင်တာကို ဦးစားထားတာကသာ အကောင်းဆုံး ဆုံးဖြတ်ချက် ဖြစ်မှန်း စိတ်ချသွားတယ်။ ဘုရားအမှု ဆက်ဆောင်မယ်ဆိုတဲ့ ဆုံးဖြတ်ချက် ခိုင်မာလာတယ်။—ဆာ. ၇၃:၂၃-၂၈။

၁၃။ အရင်က ချခဲ့တဲ့ ဆုံးဖြတ်ချက်တွေ မှန်ရဲ့လားလို့ သံသယဝင်တဲ့အခါ ဘာလုပ်နိုင်သလဲ။ (ရုပ်ပုံကိုလည်း ကြည့်ပါ။)

^၁၃ ဆာလံကျမ်းရေးသူလိုပဲ သင်လည်း စိတ်အနှောင့်အယှက်ဖြစ်စေတဲ့ ခံစားချက်ကို ဖျောက်နိုင်ပါတယ်။ ဘယ်လိုနည်းနဲ့လဲ။ ဘုရားကောင်းချီးတွေ အပါအဝင် ကိုယ့်မှာ ရှိတဲ့ ကောင်းမွန်ရာတွေကို လောကက လူတွေမှာ ရှိတဲ့အရာတွေနဲ့ နှိုင်းယှဉ်ကြည့်လိုက်ပါ။ လောကက လူတွေဟာ လောကက ပေးသလောက်ပဲ ပိုင်ဆိုင်ကြရတယ်။ အနာဂတ် မျှော်လင့်ချက် မရှိလို့ ဒီဘဝမှာ သက်သောင့်သက်သာ နေရဖို့က အရေးကြီးဆုံးလို့ ခံယူထားကြတယ်။ သင်ကတော့ အခုအချိန်မှာ ဘုရားကောင်းချီးတွေ ရနေတယ်။ အနာဂတ်မှာလည်း ဒီထက်ကောင်းတဲ့ ကောင်းချီးတွေ ရဦးမယ်။ (ဆာ. ၁၄၅:၁၆) ဒါ့အပြင် စဉ်းစားစရာက အခု လျှောက်နေတဲ့ လမ်းကို မရွေးဘဲ တခြားလမ်း ရွေးခဲ့ရင်ကော ကိုယ့်ဘဝအခြေအနေ ဘယ်လို ရှိနေမယ်ဆိုတာ တပ်အပ်ပြောနိုင်လို့လား။ သေချာတာကတော့ ယေဟောဝါနဲ့ လူလူချင်းကို ချစ်တဲ့ မေတ္တာကို အခြေခံပြီး ဆုံးဖြတ်ချက် ချသူတွေဟာ ကောင်းမွန်ရာတစ်ခုမှ လက်လွတ်မဆုံးရှုံးရဘူးဆိုတာပါပဲ။

ယေဟောဝါအတွက် အသုံးဝင်ရဲ့လားဆိုတဲ့ သံသယ

၁၄။ ဘုရားကျေးကျွန်တချို့ ဘယ်အခြေအနေတွေ ကြုံနေနိုင်သလဲ။ ဘယ်လို တွေးမိနိုင်သလဲ။

^၁၄ ဘုရားကျေးကျွန်တချို့ဟာ အသက်ကြီးလာလို့၊ ကျန်းမာရေး မကောင်းလို့၊ မသန်စွမ်းလို့ အမှုတော်မှာ ဆန္ဒရှိသလောက် မပါဝင်နိုင်ကြဘူး။ ဒါကြောင့် ယေဟောဝါအတွက် အရေးမပါဘူးလို့ ခံစားရနိုင်တယ်။ ‘ယေဟောဝါအတွက် အသုံးဝင်ရဲ့လား’ လို့ တွေးမိနိုင်တယ်။

၁၅။ ဆာလံ ၇၁ ကျမ်းရေးသူ ဘာကို စိတ်ချသလဲ။

^၁၅ ဆာလံ ၇၁ ကျမ်းရေးသူလည်း အဲဒီလိုခံစားခဲ့ရတယ်။ “အားအင် ဆုတ်ယုတ်သွားချိန်မှာ မပစ်ထားလိုက်ပါနဲ့” လို့ ဆုတောင်းတယ်။ (ဆာ. ၇၁:၉၊ ၁၈) ဒါပေမဲ့ သစ္စာရှိရှိသာ အမှုဆောင်ရင် ဘုရား ထောက်မပေးမယ်ဆိုတာ စိတ်ချတယ်။ အကန့်အသတ်တွေ ရှိပေမဲ့ အတတ်နိုင်ဆုံး အမှုဆောင်သူတွေကို ဘုရား နှစ်သက်မှန်း သဘောပေါက်တယ်။—ဆာ. ၃၇:၂၃-၂၅။

၁၆။ သက်ကြီး ညီအစ်ကို/မတွေဟာ ယေဟောဝါအတွက် ဘယ်နည်းတွေနဲ့ အသုံးဝင်နေသလဲ။ (ဆာလံ ၉၂:၁၂-၁၅)

^၁၆ သက်ကြီး ညီအစ်ကို/မတို့၊ ကိုယ့်ကို ယေဟောဝါ မြင်သလို မြင်ပါ။ အကန့်အသတ်တွေ ရှိပေမဲ့ သင် သစ္စာရှိရှိ အမှုဆောင်ဖို့ ယေဟောဝါ ကူညီပေးနိုင်တယ်။ (ဆာလံ ၉၂:၁၂-၁၅ ကို ဖတ်ပါ။) မလုပ်နိုင်တော့တာတွေကို အာရုံမစိုက်ပါနဲ့။ လုပ်နိုင်တာတွေကိုပဲ အာရုံစိုက်ပါ။ ဥပမာ၊ သစ္စာရှိ စံနမူနာ ပြပြီး တခြားသူတွေကို အားပေးနိုင်တယ်။ တခြားသူတွေကို စိတ်ဝင်တစား ရှိနိုင်တယ်။ နှစ်တွေတစ်လျှောက် ယေဟောဝါ ဘယ်လို ထောက်မခဲ့ကြောင်း၊ ဘယ်အနာဂတ် ကတိတွေကို သင် ထက်ထက်သန်သန် စောင့်မျှော်နေကြောင်း ပြောပြနိုင်တယ်။ တခြားသူတွေအတွက် ဆုတောင်းပေးနိုင်တယ်။ ဆုတောင်းခြင်းရဲ့ အစွမ်းကို လျှော့မတွက်ပါနဲ့။ (၁ ပေ. ၃:၁၂) သင့်အခြေအနေ ဘယ်လိုပဲ ရှိပါစေ ယေဟောဝါအတွက်၊ တခြားသူတွေအတွက် လုပ်ပေးနိုင်တာ တစ်ခုခုတော့ ရှိပါတယ်။

၁၇။ ကိုယ့်ကိုယ်ကိုယ် တခြားသူတွေနဲ့ ဘာကြောင့် မနှိုင်းယှဉ်သင့်သလဲ။

^၁၇ အမှုတော်မှာ အရင်ကလောက် မလုပ်နိုင်တော့လို့ စိတ်ဓာတ်ကျလာရင် သင် လုပ်နိုင်သလောက် လုပ်တာကို ယေဟောဝါ တန်ဖိုးထားတယ်ဆိုတာ စိတ်ချပါ။ တခြားသူတွေနဲ့ နှိုင်းယှဉ်ချင်စိတ်ကို ဖျောက်ပါ။ ဘာကြောင့်လဲ။ ကျွန်တော်တို့ကို တခြားသူတွေနဲ့ ယေဟောဝါ မနှိုင်းယှဉ်လို့ပဲ။ (ဂလ. ၆:၄) ဥပမာ၊ ယေရှုကို မာရိ တန်ဖိုးကြီး ဆီမွှေးပေးတယ်။ (ယော. ၁၂:၃-၅) ဆင်းရဲတဲ့ မုဆိုးမကတော့ တန်ဖိုးသိပ်မရှိတဲ့ ဒင်္ဂါးငယ်နှစ်ပြားပဲ ဗိမာန်တော်မှာ လှူနိုင်တယ်။ (လု. ၂၁:၁-၄) သူတို့နှစ်ယောက်ကို ယေရှု မနှိုင်းယှဉ်ဘူး။ မာရိကော ဆင်းရဲတဲ့ မုဆိုးမပါ ယုံကြည်ခြင်း ရှိတာကို မြင်တယ်။ ယေရှုဟာ အဖယေဟောဝါကို အပြည့်အဝ အတုယူသူ ဖြစ်တယ်။ ဒါကြောင့် ယေဟောဝါကို ချစ်လို့၊ ယုံကြည်လို့ သင် ပေးဆက်သမျှကို ယေဟောဝါ မြင်တယ်ဆိုတာ စိတ်ချနိုင်တယ်။ နည်းနည်းလေးပဲ ပေးဆက်နိုင်တယ်လို့ သင် ခံစားရပေမဲ့ ယေဟောဝါ တကယ် တန်ဖိုးထားတယ်။

၁၈။ သံသယတွေ ဖျောက်ဖို့ ဘာက ကူညီပေးမလဲ။ (“သံသယတွေ ဖျောက်ဖို့ ကျမ်းစာ ကူညီပေးနိုင်” လေးထောင့်ကွက်ကိုလည်း ကြည့်ပါ။)

^၁၈ ကျွန်တော်တို့အားလုံး သံသယဝင်တတ်ကြပါတယ်။ ဒါပေမဲ့ သံသယတွေ ဖျောက်ဖို့ ကျမ်းစာ ကူညီပေးနိုင်တယ်။ ဒါကြောင့် သံသယဝင်လာတာနဲ့ အဖြေရှာပါ။ ဒါဆိုရင် စိတ်ဓာတ်ကျအားငယ်မနေဘဲ ယုံကြည်စိတ်ချမှုအပြည့် ရှိနေမယ်။ ကျွန်တော်တို့တစ်ယောက်ချင်းစီကို ယေဟောဝါ ဂရုစိုက်တယ်။ ကိုယ်ကျိုးစွန့်ခဲ့သမျှ တန်ဖိုးထားတယ်။ ဆုချမယ်။ သစ္စာရှိ ကျေးကျွန်အားလုံးကို မိမိရဲ့ မေတ္တာနဲ့ ဂရုစိုက်မှု ရထိုက်သူတွေလို့ ယေဟောဝါ သဘောထားတယ်ဆိုတာ စိတ်ချထားလိုက်ပါ။