တရားရေးသတင်း

တရားရေး တိုက်ပွဲတွေ၊ ခက်ခဲချိန်တွေအတွင်း ခရစ်ယာန် ညီအစ်ကို/မတွေဟာ ယေဟောဝါဘုရားအပေါ် သစ္စာစောင့်သိကြောင်း သက်သေပြကြတယ်။ သူတို့ရဲ့ ပုံသက်သေက ယုံကြည်ခြင်း ခိုင်မြဲဖို့၊ “ယေဟောဝါက မိမိအပေါ် သစ္စာစောင့်သိသူကို အရေးတယူ ဆက်ဆံ” မှန်း ယုံကြည်စိတ်ချဖို့ ကျွန်တော်တို့အားလုံးကို အားပေးတယ်။—ဆာ. ၄:၃။

အာဂျင်တီးနား | သားသမီးတွေကို ဘာသာရေးအကြောင်း သင်ပေးပိုင်ခွင့်

ရုသ်ဟာ ခရစ်ယာန်မိသားစုမှာ ကြီးပြင်းလာပေမဲ့ လူငယ်ပိုင်းရောက်တော့ မလှုပ်မရှား ဖြစ်သွားတယ်။ နောက်ပိုင်း အမျိုးသားတစ်ယောက်နဲ့ အတူနေပြီး သမီးလေး တစ်ယောက် ရလာတယ်။ တစ်နေ့၊ လာပလာတာမြို့မှာ ယေဟောဝါသက်သေတွေ လူထုရှေ့ သက်သေခံနေတာကို သတိပြုမိပြီး မိမိရဲ့ ခရစ်ယာန်အမွေအနှစ်ကို အောက်မေ့မိတယ်။ အသင်းတော်နဲ့ ပြန်ပူးပေါင်းဖို့၊ သမီးလေးကို ကျမ်းစာသင်ပေးဖို့ လှုံ့ဆော်ခံလိုက်ရတယ်။ သမီးရဲ့ အဖေက ရုသ်ရဲ့ ဘာသာရေး လုပ်ဆောင်မှုတွေကို ဆန့်ကျင်ပြီး သမီးကို ကျမ်းစာ သင်ပေးတာ၊ အသင်းတော် အစည်းအဝေးတွေ ခေါ်သွားတာကို တားဆီးဖို့ တရားရုံးမှာ လျှောက်ခဲ့တယ်။

မိဘနှစ်ယောက်စလုံးမှာ သားသမီးတွေကို ဘာသာရေး ယုံကြည်ချက်တွေအကြောင်း သင်ပေးပိုင်ခွင့်ရှိကြောင်း၊ ဘာသာရေး သွန်သင်ချက်ကြောင့် သားသမီးမှာ ထိခိုက်မှု ရှိတယ်ဆိုတဲ့ အထောက်အထား မရှိသရွေ့ တရားရုံးက ဝင်ရောက်စွက်ဖက်လို့ မရကြောင်း ရုသ်ရဲ့ ရှေ့နေ ပြောတယ်။ အဲဒီအချိန်မှာ သမီးဟာ လေးနှစ်ပဲ ရှိသေးပေမဲ့ ဘာသာရေးနဲ့ပတ်သက်ပြီး သမီးရဲ့ လွတ်လပ်စွာ ရွေးချယ်ပိုင်ခွင့်ကို မိဘတွေ လေးစားဖို့ တရားရုံးက စီရင်ချက်ချတယ်။ ဘာသာရေးနဲ့ပတ်သက်ပြီး ကိုယ်ပိုင်ဆုံးဖြတ်ဖို့ ကလေး သိပ်ငယ်နေကြောင်း၊ မိဘနှစ်ယောက်စလုံးမှာ သမီးကို ဘာသာရေးကိစ္စတွေ သင်ပေးဖို့ တန်းတူအခွင့်အရေးရှိကြောင်း အယူခံတရားရုံးက ရှင်းလင်းစေခဲ့တယ်။

ရုသ်ရဲ့ သမီးလေးဟာ ညတိုင်း ကျမ်းစာဖတ်ပြီး အမေနဲ့အတူ အစည်းအဝေးတွေ လိုက်တက်နေတယ်။ ဘွေနိုဆိုင်းရေးမြို့မှာရှိတဲ့ ဗေသလကို လည်ပတ်ဖို့ စိတ်ပြင်းပြနေတယ်။

အဇာဘိုင်ဂျန် | ဘာသာရေး ယုံကြည်ချက် ထုတ်ဖော်ပိုင်ခွင့်

စစ်မှန်တဲ့ ခရစ်ယာန်အသင်းတော်မှာ “အစိတ်အပိုင်းတစ်ခု ဝေဒနာခံစားရရင် ကျန်တဲ့အစိတ်အပိုင်းအားလုံး ထပ်တူခံစားရတယ်” လို့ တမန်တော်ပေါလု ပြောခဲ့တယ်။ (၁ ကော. ၁၂:၂၆) အဲဒါ မှန်ပါတယ်။ ကမ္ဘာတစ်ဝန်းမှာရှိတဲ့ ယေဟောဝါသက်သေတွေဟာ အဇာဘိုင်ဂျန်မှာရှိတဲ့ ညီအစ်မ အီရီနာ ဇာကာချန်ကာနဲ့ ဗာလီဒါ ဂျာဘရာယီလိုဗာတို့အတွက် အကြီးအကျယ် စိတ်မကောင်း ဖြစ်ကြရတယ်။ ၂၀၁၅ ခုနှစ်၊ ဖေဖော်ဝါရီလမှာ အာဏာပိုင်တွေက ဒီညီအစ်မနှစ်ယောက်ကို တရားမဝင် ဘာသာရေးလှုပ်ရှားမှုနဲ့ စွဲချက်တင်ခဲ့တယ်။ တရားသူကြီးက သူတို့ကို အချုပ်ထဲမှာ ထားတယ်။ ရုံးတင်စစ်ဆေးဖို့ ခဏခဏ အချိန်ရွှေ့ဆိုင်းနေတာကြောင့် ညီအစ်မတွေဟာ ထောင်ထဲမှာ တစ်နှစ်နီးပါး နေခဲ့ရတယ်။ ရိုင်းစိုင်းကြမ်းတမ်းစွာ ဆက်ဆံခံရပြီး လိုအပ်တာတွေ မရရှိဘဲ နေခဲ့ရတယ်။

နောက်ဆုံး ၂၀၁၆၊ ဇန်နဝါရီလမှာ အမှုစစ်တဲ့အခါ တရားသူကြီးက ညီအစ်မတွေကို အပြစ်ရှိတယ်လို့ စီရင်ပြီး ဒဏ်ငွေရိုက်ခဲ့တယ်။ ဒါပေမဲ့ အချုပ်ခန်းထဲမှာ အကြာကြီး နေခဲ့ရလို့ ဒဏ်ငွေ မဆောင်ခိုင်းတော့ဘဲ အိမ်ပြန်ခွင့် ပြုလိုက်တယ်။ ညီအစ်မတွေက ရာဇဝတ်ပြစ်မှုအဖြစ် ဘာကူ အယူခံတရားရုံးမှာ လျှောက်ထားပေမဲ့ ပယ်ချလိုက်တဲ့အတွက် တရားရုံးချုပ်မှာ အယူခံဝင်ခဲ့ကြတယ်။ အဲဒီအပြင် နှိပ်စက်ခံရလို့၊ ဘာသာရေး ယုံကြည်ချက် ထုတ်ဖော်ပိုင်ခွင့် ချိုးဖောက်ခံရလို့ ကုလသမဂ္ဂ လူ့အခွင့်အရေး ကော်မတီမှာလည်း တိုင်တန်းထားတယ်။

ဒီအတောအတွင်း ညီအစ်မတွေဟာ တုန်လှုပ်ချောက်ချားဖွယ် အတွေ့အကြုံကနေ ပြန်နာလန်ထူလာကြတယ်။ သူတို့အတွက် ဆုတောင်းပေးတာ၊ စိတ်ပူပေးတာတွေအတွက် လှိုက်လှိုက်လှဲလှဲ ကျေးဇူးတင်ကြောင်း ပြောတယ်။ အုပ်ချုပ်ရေးအဖွဲ့ဆီ ညီအစ်မ ဂျာဘရာယီလိုဗာ ဒီလိုရေးတယ်– “ညီအစ်ကိုတို့ရဲ့ ဆုတောင်းချက်က အခက်အခဲကိုခံရပ်နိုင်ဖို့ ကူညီပေးတယ်။ ကျွန်မ အဲဒီလို တကယ်ခံစားခဲ့ရတယ်။ ယေဟောဝါ၊ ညီအစ်ကိုတို့နဲ့ ကမ္ဘာတစ်ဝန်းက ညီအစ်ကို/မတွေ ပြတဲ့ မေတ္တာနဲ့ ဂရုစိုက်မှုကို ကျွန်မ ဘယ်တော့မှ မေ့မှာမဟုတ်ပါဘူး။”

အီရီထရီးယား | ယုံကြည်ချက်ကြောင့် ထောင်ချခံရ

၂၀၁၆၊ ဇူလိုင်လမှာ အီရီထရီးယား အစိုးရက ယေဟောဝါသက်သေ ၅၅ ယောက်ကို သူတို့ရဲ့ ယုံကြည်ချက်ကြောင့် ထောင်ချခဲ့တယ်။ ညီအစ်ကို ပေါ်လိုစ် အီယာဆူ၊ အိုင်းဇက် မိုဂိုစ်၊ နီဂီဒီ တက်ကလီမာရီယမ်တို့ သုံးယောက်ဟာ ၁၉၉၄၊ စက်တင်ဘာလကစပြီး ထောင်ကျနေတယ်။ နောက်ညီအစ်ကို ကိုးယောက်ကိုလည်း အစိုးရ ထောင်ချထားတာ အနည်းဆုံး ဆယ်နှစ် ရှိပြီ။

၂၀၁၄၊ ဧပြီလတုန်းက အက်စမာရာမြို့၊ အောက်မေ့ရာပွဲမှာ ဖမ်းထားတဲ့ သက်သေခံတွေကို စစ်ဆေးဖို့ခေါ်လာတဲ့ ၂၀၁၆၊ ဇန်နဝါရီလမှာ အခြေအနေ တိုးတက်လာတယ်။ ဦးဆုံးအကြိမ်အနေနဲ့ အာဏာပိုင်တွေဟာ သက်သေခံတွေကို “ရာဇဝတ်မှု” အဖြစ် တရားဝင် စွပ်စွဲပြီး ခုခံချေပဖို့ အခွင့်အရေး ပေးခဲ့တယ်။ မျှော်လင့်ထားတဲ့အတိုင်း စစ်ဆေးခံရတဲ့ ညီအစ်ကို/မ အများစုဟာ “တရားမဝင်” တဲ့ အစည်းအဝေး တက်ရောက်လို့ အပြစ်ရှိတယ်လို့ သတ်မှတ်ခံရတယ်။ ဒဏ်ငွေရိုက်ပြီး ပြန်လွှတ်ပေးလိုက်ကြတယ်။ ဒါပေမဲ့ စွပ်စွဲခံရတဲ့ ညီအစ်မ ဆာရွန် ဂီဘရူကတော့ ဒဏ်ငွေ မဆောင်တဲ့အတွက် ထောင်ဒဏ် ခြောက်လ ချမှတ်ခံရတယ်။ ညီအစ်မ ဂီဘရူဟာ တစ်ပတ်တစ်ခါ ဧည့်သည် လက်ခံခွင့် ရှိတယ်။ ထောင်ထဲမှာ ကောင်းကောင်းမွန်မွန် ဆက်ဆံခံရတယ်လို့ ညီအစ်မ ဂီဘရူ ပြောတယ်။ ထောင်ကျနေတဲ့ ညီအစ်မ ဂီဘရူနဲ့ တခြားသက်သေခံ ၅၄ ယောက်ဟာ “အကျဉ်းကျနေတဲ့သူတွေကို ကိုယ်လည်း သူတို့နဲ့အတူ အကျဉ်းကျနေတယ်လို့ သဘောထားပြီး သတိရ” ဆုတောင်းပေးတဲ့ ဆုတောင်းချက်များစွာကို ကျေးဇူးတင်လေးမြတ်ကြတယ်။—ဟီ. ၁၃:၃။

ဂျာမနီ | ဘာသာရေး လွတ်လပ်မှု၊ တရားဝင် အသိအမှတ်ပြုမှု

၂၀၁၅၊ ဒီဇင်ဘာ ၂၁ ရက်မှာ ဂျာမနီ အနောက်မြောက်ပိုင်း ဘရီမန်ပြည်နယ်ဟာ ဂျာမနီမှာရှိတဲ့ ယေဟောဝါသက်သေ ဘာသာရေးအဖွဲ့အစည်းကို အရင်ကထက် မြင့်မားတဲ့ တရားရေး အနေအထား သတ်မှတ်ပေးလိုက်တယ်။ ဒီသတ်မှတ်ချက်က ဂျာမနီတရားရုံးတွေမှာ လေးနှစ်တာ တရားရေးကြိုးပမ်းမှုကို အဆုံးသတ်ပေးလိုက်တယ်။ ဘာလင်မြို့ အထက်တရားရုံး ဆုံးဖြတ်ချက်အရ ဂျာမနီရဲ့ အဓိကပြည်နယ် ၁၆ ခုဟာ ယေဟောဝါသက်သေတွေကို ပြည်သူ့တရားဥပဒေအဆင့် သတ်မှတ်ပေးခဲ့တယ်။ ဒါပေမဲ့ ဆန့်ကျင်သူတွေ ဖြန့်ထားတဲ့ မတရားစွပ်စွဲချက်တွေကြောင့် ဘရီမန် အာဏာပိုင်တွေက သက်သေခံတွေကို အဲဒီအဆင့် မသတ်မှတ်ပေးဖို့ ဆုံးဖြတ်လိုက်ကြတယ်။

ပြည်သူ့တရားဥပဒေအဆင့် သတ်မှတ်ပေးဖို့ ဘရီမန် အာဏာပိုင်တွေ ငြင်းဆိုတာဟာ သက်သေခံတွေရဲ့ ဖွဲ့စည်းပုံ အခြေခံ ဥပဒေ အခွင့်အရေးတွေကို ချိုးဖောက်တာဖြစ်တယ်လို့ ၂၀၁၅ ခုနှစ်မှာ ဂျာမနီ ဖယ်ဒရယ် ဖွဲ့စည်းပုံ အခြေခံဥပဒေပြု တရားရုံးက ဆုံးဖြတ်လိုက်တယ်။ ဘာသာရေး လွတ်လပ်ခွင့်ဆိုင်ရာ ဖွဲ့စည်းပုံ အခြေခံ ဥပဒေ အာမခံချက်တွေဟာ ဘရီမန်မှာရှိတဲ့ ယေဟောဝါသက်သေတွေရဲ့ ဘာသာရေး လုပ်ဆောင်မှုကို ကာကွယ်ပေးကြောင်း အဲဒီဆုံးဖြတ်ချက်က အတည်ပြုပေးတယ်။ ဂျာမနီမှာရှိတဲ့ အဓိကဘာသာရေး အဖွဲ့အစည်းတွေ ရရှိနေတဲ့ အခွန်ကင်းလွတ်ခွင့်နဲ့ တခြားအခွင့်အရေးတွေကို ဘရီမန်မှာရှိတဲ့ အသင်းတော်တွေလည်း ရရှိနေပြီ။

ကာဂျစ္စတန် | ဘာသာရေး ယုံကြည်ချက် ထုတ်ဖော်ပိုင်ခွင့်

၂၀၁၃၊ မတ်လမှာ ကာဂျစ္စတန်နိုင်ငံ၊ အို့ရှ်မြို့ အာဏာပိုင်တွေဟာ အုတ်ဆာနာ ကာရီအာကီနာနဲ့ မိခင် နာဒေဇာဒါ ဆာဂီအန်ကာတို့ကို ရာဇဝတ်မှုတွေနဲ့ လုပ်ကြံစွပ်စွဲခဲ့တယ်။ အိမ်နီးချင်းတွေကို ကျမ်းစာသွန်သင်ချက်တွေ ဝေမျှပြီး လိမ်လည်လှည့်ဖြားနေတယ်လို့ ရှေ့နေက စွပ်စွဲတယ်။ အမှုစစ်ဆေးနေစဉ်အတွင်း အကျယ်ချုပ်ထားဖို့ တရားသူကြီး စီရင်တယ်။ သက်သေအထောက်အထားတွေက အလိမ်အညာတွေ ဖြစ်မှန်း၊ လုပ်ထုံးလုပ်နည်းတွေကို ချိုးဖောက်ထားမှန်း၊ ညီအစ်မတွေမှာ အပြစ်မရှိမှန်း ၂၀၁၄၊ အောက်တိုဘာလမှာ အမှုစစ်တရားရုံးက ဆုံးဖြတ်ခဲ့တယ်။ အဲဒီဆုံးဖြတ်ချက်ကို အယူခံတရားရုံးက ၂၀၁၅၊ အောက်တိုဘာလမှာ အတည်ပြုပေးလိုက်တယ်။

ဒါပေမဲ့ အို့ရှ်မြို့ ရှေ့နေက ကာဂျစ္စတန် တရားရုံးချုပ်မှာ ပြန်အယူခံဝင်တယ်။ ညီအစ်မတွေ အပြစ်မရှိဘူးဆိုတဲ့ ဆုံးဖြတ်ချက်ကို ဒီတရားရုံးက ဖျက်သိမ်းလိုက်ပြီး အစကနေ ပြန်စစ်ဆေးဖို့ အမိန့်ချမှတ်တယ်။ ၂၀၁၆၊ ဧပြီလမှာ အမှုကြားနာတော့ ညီအစ်မတွေဘက်က ရှေ့နေတွေက ကန့်သတ်ချုပ်ချယ်မှု ဥပဒေ သက်တမ်းကုန်သွားပြီဖြစ်လို့ အမှုကို ပယ်ချပေးဖို့ အဆိုပြုတယ်။ တရားသူကြီးမှာ ရွေးချယ်စရာ မရှိတော့ဘဲ ရာဇဝတ်မှုအဖြစ် တရားစွဲဆိုမှုကို အဆုံးသတ်ပေးလိုက်ရတယ်။

ခက်ခဲတဲ့ ဒီအခြေအနေအတွင်း ညီအစ်မတွေ အပြုသဘော ဆက်ထိန်းထားကြတယ်။ “မတရားဆက်ဆံခံရချိန်မှာ လူတွေ စိတ်နာကြည်းသွားလေ့ရှိတယ်။ ဒါပေမဲ့ ကျွန်မတို့ကတော့ ညီအစ်ကို/မတွေကတစ်ဆင့် ယေဟောဝါရဲ့ မေတ္တာနဲ့ စောင့်ရှောက်မှုကို ခံစားခဲ့ရတယ်။ တစ်ယောက်တည်း ဖြစ်နေတယ်ဆိုတာ မရှိခဲ့ဘူး” လို့ ညီအစ်မ ဆာဂီအန်ကာ ပြောတယ်။ “မကြောက်နဲ့။ . . . ဖြောင့်မတ်တဲ့ ညာလက်နဲ့ မြဲမြဲကိုင်ထားမယ်” ဆိုတဲ့ ဟေရှာယ ၄၁:၁၀ မှာပါတဲ့ ကတိအတိုင်း ယေဟောဝါ လုပ်ဆောင်တာကို ညီအစ်မတွေ ကိုယ်တွေ့ခံစားခဲ့ရတယ်။

ကာဂျစ္စတန် | ဘာသာရေး လွတ်လပ်မှု၊ တရားဝင် အသိအမှတ်ပြုမှု

၂၀၁၅၊ ဩဂုတ် ၉ ရက်မှာ ကာဂျစ္စတန်နိုင်ငံ၊ အို့ရှ်မြို့ အသင်းတော် အစည်းအဝေး တစ်ခုထဲ ရဲဆယ်ယောက် ပြေးဝင်လာတယ်။ “တရားမဝင်” အစည်းအဝေးကို ချက်ချင်း ရပ်ခိုင်းပြီး တက်ရောက်သူ ၄၀ ကျော်ကို ပစ်သတ်မယ်လို့တောင် ခြိမ်းခြောက်ကြတယ်။ ညီအစ်ကိုဆယ်ယောက်ကို ရဲစခန်း ခေါ်သွားလိုက်တယ်။ သူတို့ထဲက ကိုးယောက်ကို ထိုးကြိတ်ရိုက်နှက်ပြီးမှ ပြန်လွှတ်ပေးဖို့ အရာရှိတွေ ပြောတယ်။ နှစ်ရက်ကြာပြီးနောက် ရက်ရက်စက်စက် ရိုက်နှက်ခံထားရတဲ့ ညီအစ်ကို နူလန် ရူစူဘီအဲကို ရဲတွေ ဖမ်းပြီး အစည်းအဝေး ကျင်းပတဲ့အတွက် တရားမဝင် ဘာသာရေး လုပ်ဆောင်မှုနဲ့ စွဲချက်တင်လိုက်တယ်။

ညီအစ်ကို ရူစူဘီအဲရဲ့အမှု အို့ရှ်မြို့ တရားရုံးကို ရောက်လာတဲ့အခါ တရားသူကြီးက စွပ်စွဲချက်အတွက် သက်သေအထောက်အထား မရှိလို့ အမှုကို ပယ်ချလိုက်တယ်။ ရှေ့နေက အို့ရှ်မြို့ ဒေသန္တရ တရားရုံးမှာ အယူခံဝင်တော့လည်း အမှု ပယ်ချခံရတယ်။ ယေဟောဝါသက်သေတွေဟာ ကာဂျစ္စတန်မှာ တရားဝင် မှတ်ပုံတင်ထားတာဖြစ်လို့ ညီအစ်ကို ရူစူဘီအဲမှာ တရားမဝင် ဘာသာရေး လုပ်ဆောင်မှုအပြစ် မရှိဘူးဆိုပြီး အတည်ပြုလိုက်တယ်။

ရှေ့နေက ဇွဲမလျှော့ဘဲ ကာဂျစ္စတန် တရားရုံးချုပ်မှာ အယူခံဝင်ပြန်တယ်။ တရားရုံးချုပ်က အမှုကို ၂၀၁၆၊ မတ်လမှာ ပယ်ချလိုက်လို့ ညီအစ်ကို ရူစူဘီအဲ စိတ်သက်သာရာ ရသွားတယ်။ အမှုစစ် တရားရုံးနဲ့ အယူခံတရားရုံးတွေရဲ့ အပြုသဘော ဆုံးဖြတ်ချက်တွေကို ဆက်အတည်ပြုပြီး ကာဂျစ္စတန်မှာ ယေဟောဝါသက်သေတွေ ဘာသာရေးအစည်းအဝေးတွေ ကျင်းပခွင့်ရှိတယ်လို့ ပြန်အတည်ပြုပေးခဲ့တယ်။ မတရားခံရသူတွေ အို့ရှ်မြို့ ရဲအရာရှိတွေကို ပြန်တရားစွဲထားတဲ့ သီးသန့်အမှုတွေကတော့ တရားရုံးတွေမှာ ဆိုင်းငံ့ဆဲဖြစ်တယ်။

ရုရှား | ဘာသာရေး လွတ်လပ်မှု

ရုရှား လူ့အခွင့်အရေး အာဏာပိုင်တွေ အကြီးအကျယ် တားမြစ်တဲ့ကြား ရုရှား အစိုးရက ယေဟောဝါသက်သေတွေနဲ့ သူတို့ရဲ့ ဘာသာရေးလုပ်ဆောင်မှုတွေကို ဆက်တိုက်ခိုက်နေတယ်။ နောက်ဆုံးအမှုကတော့ အဖွဲ့အစည်းထုတ်စာပေ ၈၈ ခုကို “အစွန်းရောက်စာပေ” အဖြစ် အာဏာပိုင်တွေ ကြေညာပြီး ယေဟောဝါသက်သေတွေရဲ့ တရားဝင် ဝက်ဘ်ဆိုက် jw.org ကို ပိတ်လိုက်တာပဲ။ ၂၀၁၅ ခုနှစ်မှာ အကောက်ခွန် အရာရှိတွေက ကမ္ဘာသစ် ဘာသာပြန်ကျမ်း တင်သွင်းခွင့်ကို ပိတ်ပင်လိုက်တယ်။ ဗိုင်ဘော့မြို့ တရားရုံးက ဒီခေတ်သုံးဘာသာပြန်ကျမ်းကို “အစွန်းရောက်စာအုပ်” အဖြစ် သတ်မှတ်ဖို့ သုံးသပ်နေတယ်။ ၂၀၁၆၊ မတ်လမှာ အထွေထွေရှေ့နေများရုံးက စိန့်ပီတာစဘတ်မြို့ပြင်၊ ဆိုနီချနာယာမြို့မှာရှိတဲ့ ယေဟောဝါသက်သေတွေရဲ့ ဗဟိုရုံးကို “အစွန်းရောက် လှုပ်ရှားမှု” စွဲချက်နဲ့ ပိတ်ဖို့ အတင့်ရဲစွာ ခြိမ်းခြောက်လိုက်တယ်။

ယေဟောဝါသက်သေတွေကို ဆန့်ကျင်ဖို့ အစိုးရက ရန်လိုတဲ့ ကင်ပိန်းတစ်ခုကို ကမကထပြုပေမဲ့ သတင်းကောင်းတွေလည်း ရှိပါတယ်။ ၂၀၁၅၊ အောက်တိုဘာလမှာ ရှေ့နေတစ်ယောက်က မော်စကိုမြို့ အရှေ့ဘက် မိုင် ၁,၃၀၀ လောက်မှာ တည်ရှိတဲ့ တယူမန်မြို့က ယေဟောဝါသက်သေ ဒေသခံ ဘာသာရေး အဖွဲ့အစည်းကို ပယ်ဖျက်ပေးဖို့ စွဲချက်တင်လိုက်တယ်။ တစ်ဖက်သက်သေတွေကို ရဲတွေ လုပ်ကြံဖန်တီးထားမှန်း အထောက်အထား ထင်ရှားတာတောင် တယူမန် ဒေသန္တရ တရားရုံးက ယေဟောဝါသက်သေ ဒေသခံ ဘာသာရေး အဖွဲ့အစည်းမှာ အပြစ်ရှိတယ်လို့ ဆုံးဖြတ်ခဲ့တယ်။ ဒါပေမဲ့ ၂၀၁၆၊ ဧပြီ ၁၅ မှာ ရုရှား ဗဟိုတရားရုံးချုပ်က အောက်တရားရုံး ဆုံးဖြတ်ချက်ကို ဆန့်ကျင်ပြီး “တယူမန်မြို့က ယေဟောဝါသက်သေ ဒေသခံ ဘာသာရေး အဖွဲ့အစည်းကို ဖျက်သိမ်းဖို့ ဘာအကြောင်းရင်းမှ မရှိဘူး” လို့ ဆုံးဖြတ်လိုက်တယ်။ ဆုံးဖြတ်ချက်ကို တရားသူကြီး ဖတ်ချိန်မှာ တရားရုံးမှာ ပြည့်နေတဲ့ ညီအစ်ကို/မ ၆၀ က မတ်တတ်ရပ်ပြီး အားပါးတရ လက်ခုပ်ဩဘာပေးခဲ့ကြတယ်။

ရုရှားမှာရှိတဲ့ ယေဟောဝါရဲ့လူမျိုးဟာ မိမိတို့ကို “တိုက်ခိုက်ဖို့လုပ်တဲ့ လက်နက်” တွေကြား ယေဟောဝါကို ဆက်ဝတ်ပြုဖို့ စိတ်ပိုင်းဖြတ်ထားကြပါတယ်။—ဟေရှာ. ၅၄:၁၇။

ရဝမ်ဒါ | ဘာသာရေး ခွဲခြားဆက်ဆံမှု မရှိဘဲ ပညာသင်ကြားပိုင်ခွင့်

မကြာသေးခင်နှစ်တွေတုန်းက ရဝမ်ဒါနိုင်ငံမှာရှိတဲ့ သက်သေခံ ကျောင်းသားတွေဟာ ကျောင်းရဲ့ ဘာသာရေးနဲ့ မျိုးချစ် အခမ်းအနားတွေမှာ မပါဝင်လို့ ကျောင်းထုတ်ခံခဲ့ကြရတယ်။ ဒီကိစ္စကို ဖြေရှင်းဖို့ ၂၀၁၅၊ ဒီဇင်ဘာ ၁၄ မှာ အစိုးရက ကျောင်းတွေမှာ ဘာသာရေး ခွဲခြားဆက်ဆံမှုတွေကို ဖယ်ရှားဖို့ အမိန့်ချမှတ်ခဲ့တယ်။ ဒီအမိန့်က ကျောင်းတွေအနေနဲ့ ကျောင်းသားတွေရဲ့ လွတ်လပ်စွာ ဝတ်ပြုခွင့်ကို လေးစားဖို့ ဖြစ်စေခဲ့တယ်။

၂၀၁၆၊ ဇွန် ၉ ရက်၊ jw.org သတင်းမှာ “ကျောင်းတွင်း ဘာသာရေး ခွဲခြားဆက်ဆံမှုကို ရဝမ်ဒါ ဆန့်ကျင်” ဆိုတဲ့ ဆောင်းပါး ပါလာတယ်။ ရဝမ်ဒါနိုင်ငံ၊ လူသိများတဲ့ အွန်လိုင်းသတင်းစာတစ်စောင်က အဲဒီဆောင်းပါးကို ကိုးကားခဲ့တယ်။ မကြာခင်မှာပဲ အဲဒီသတင်းစာ ဝက်ဘ်ဆိုက်ကို လူ ၃,၀၀၀ ကျော် ဝင်ကြည့်ပြီး ဖတ်ရှုသူများစွာက အစိုးရရဲ့ လုပ်ရပ်ကို ချီးမွမ်းတဲ့ မှတ်ချက်တွေ ရေးကြတယ်။ ရဝမ်ဒါမှာရှိတဲ့ သက်သေခံတွေဟာ သားသမီးတွေ ဘာသာရေး ခွဲခြားဆက်ဆံမှု မရှိဘဲ ပညာသင်ကြားပိုင်ခွင့် ရရှိစေတဲ့ အမိန့်ကြောင့် ဝမ်းသာနေကြတယ်။

တောင်ကိုးရီးယား | စစ်မှုထမ်းဖို့ ငြင်းဆိုပိုင်ခွင့်

တောင်ကိုးရီးယားမှာရှိတဲ့ အသက် ၁၉ နှစ်ကနေ ၃၅ နှစ်အတွင်း သက်သေခံ ယောက်ျားလေးတွေဟာ စစ်မှုထမ်းရေးကိစ္စ ရင်ဆိုင်ရတာ နှစ်ပေါင်း ၆၀ ကျော် ရှိနေပြီ။ တောင်ကိုးရီးယား အစိုးရက စစ်မှုထမ်းဖို့ ငြင်းဆိုပိုင်ခွင့်ကို အသိအမှတ် မပြုတဲ့အပြင် စစ်မှုအစား တခြားလုပ်ငန်းတွေကို အစားမထိုးပေးဘူး။ ဒါကြောင့် အဖိုး၊ အဖေ၊ သား စတဲ့ အစဉ်အဆက်လိုက် စစ်မှုထမ်းဖို့ ဆင့်ခေါ်ခံရတဲ့အခါ ရွေးချယ်စရာမရှိဘဲ ထောင်နန်းစံကြရတယ်။

စစ်မှုထမ်းခြင်း ဥပဒေဟာ ဖွဲ့စည်းပုံ အခြေခံ ဥပဒေဖြစ်ကြောင်း ဖွဲ့စည်းပုံ အခြေခံဥပဒေပြုတရားရုံးက နှစ်ကြိမ်တိတိ ပြဋ္ဌာန်းခဲ့တယ်။ ဒါပေမဲ့ အောက်တရားရုံးတွေ၊ ဥပဒေအရ ပြစ်ဒဏ်ပေးခံရသူတွေဟာ အမှုကို ဖွဲ့စည်းပုံ အခြေခံဥပဒေပြုတရားရုံးမှာ ထပ်လျှောက်တင်ကြတယ်။ ၂၀၁၅၊ ဇူလိုင် ၉ မှာ တရားရုံးက စစ်မှုထမ်းဖို့ ငြင်းဆိုသူတွေကိုယ်စား အမှုကြားနာခဲ့တယ်။ စစ်လေ့ကျင့်မှုကို လက်ခံဖို့ အမှားအမှန်သိစိတ် ခွင့်မပြုတဲ့အတွက် ထောင် ၁၈ လ ကျခံခဲ့တဲ့ ညီအစ်ကို မင်ဟော်ကင် ရှင်းပြတယ်– “ကျွန်တော် ပြစ်ဒဏ်ကျခံပြီးနောက် ပြန်လွတ်လာတယ်။ ဒါပေမဲ့ စစ်မှုထမ်းဖို့ ငြင်းဆိုတဲ့ တခြားသူများစွာ ပြစ်ဒဏ်မခံရစေဖို့ မျှော်လင့်ပါတယ်။ စစ်မှုအစား တခြားလုပ်ငန်းတွေကို လုပ်ခွင့်ပြုမယ်ဆိုရင် ရပ်ရွာအတွက် များစွာအကျိုးရှိပါလိမ့်မယ်။” ဖွဲ့စည်းပုံ အခြေခံဥပဒေပြုတရားရုံးက ဆုံးဖြတ်ချက်ကို မကြာခင် ကြေညာပါတော့မယ်။

တာ့ခ်မင်နစ္စတန် | ဘာရမ် ဟမ်ဒါမို

အသက် ၅၃ နှစ်အရွယ် ညီအစ်ကို ဟမ်ဒါမိုဟာ အိမ်ထောင်သည်ဖြစ်ပြီး သားလေးယောက် ရှိတယ်။ တက်ကြွစွာ အမှုဆောင်နေပြီး ရပ်ရွာမှာ ကြည်ညိုလေးစားခံရသူ ဖြစ်တယ်။ အိမ်မှာ “တရားမဝင်” ဘာသာရေး အစည်းအဝေး ကျင်းပလို့ ၂၀၁၅၊ မေလမှာ တရားရုံးက သူ့ကို အလုပ်ကြမ်းနဲ့ ထောင်ဒဏ် လေးနှစ် ချမှတ်ခဲ့တယ်။ ဆာဒီမြို့က နာမည်ဆိုးကျော်တဲ့ အလုပ်ကြမ်းစခန်းမှာ ထိန်းသိမ်းခံရတယ်။ အာဏာပိုင်တွေရဲ့ စစ်ကြောမေးမြန်းမှု၊ ရက်ရက်စက်စက် ရိုက်နှက်မှုကို အကြိမ်ကြိမ် ခံခဲ့ရတယ်။ ဒါပေမဲ့ သူကော သူ့မိသားစုပါ ယေဟောဝါဘုရားအပေါ် သမာဓိ ဆက်စောင့်ထိန်းခဲ့ကြတယ်။ ညီအစ်ကို ဟမ်ဒါမိုကို အားပေးဖို့ ဇနီး ဂူဇီရာ မကြာခဏ လည်ပတ်ခွင့်ရတယ်။

စမ်းသပ်မှုအောက် ဆက်သစ္စာစောင့်သိနေတဲ့ ယေဟောဝါရဲ့လူမျိုးအတွက် ကျွန်တော်တို့ ဆုတောင်းပေးပါတယ်။ “သစ္စာစောင့်သိသူတွေကို ဘယ်တော့မှ မစွန့်ဘူး” ဆိုတဲ့ ဆာလံ ၃၇:၂၈ ပါ ကတိစကားတွေကို ယုံကြည်စိတ်ချရင်း ဘုရားသခင်အပေါ် သစ္စာစောင့်သိမှု ခိုင်မြဲအောင် လုပ်ဆောင်ဖို့လည်း သူတို့ရဲ့ ပုံသက်သေက လှုံ့ဆော်ပေးပါတယ်။