ညစ်ညမ်းရုပ်ပုံစာပေ စွဲနေရင် ဘယ်လိုလုပ်ရမလဲ

သင်လုပ်ဆောင်နိုင်ရာ

ညစ်ညမ်းရုပ်ပုံစာပေက ဘာအတွက်လဲဆိုတာ နားလည်ပါ။ ညစ်ညမ်းရုပ်ပုံစာပေဆိုတာ ဘုရားသခင် ဖန်ဆင်းထားတဲ့ ဂုဏ်သိက္ခာရှိတဲ့အရာကို ရှုတ်ချမှု ဖြစ်စေတာကလွဲလို့ ဘာအကျိုးမှ မရှိဘူး။ ညစ်ညမ်းရုပ်ပုံစာပေကို အဲဒီလိုရှုမြင်ထားမယ်ဆိုရင် “မကောင်းသောအမှုကို ရွံရှာဖို့” အထောက်အကူရမှာ ဖြစ်တယ်။—ဆာလံ ၉၇:၁၀။

အကျိုးဆက်တွေကို စဉ်းစားပါ။ ညစ်ညမ်းရုပ်ပုံစာပေက ပါဝင်သူတွေကို တန်ဖိုးမဲ့စေသလို ကြည့်တဲ့သူတွေကိုလည်း တန်ဖိုးမဲ့စေတယ်။ အကြောင်းကောင်းရှိလို့ သမ္မာကျမ်းစာက ခုလိုဆိုထားတာ ဖြစ်တယ်– “စဉ်းစားဉာဏ်ရှိသူတို့သည် မိမိတို့ ကြုံတွေ့ရမည့်ဒုက္ခကို ကြိုတင်တွေ့မြင်၍ ရှောင်ရှားတတ်ကြ၏။”—သုတ္တံ ၂၂:၃၊ ခမ။

ကတိသစ္စာပြုပါ။ “ငါသည် မိန်းမပျိုကို အဘယ်အခါ၌မျှ ရာဂစိတ်နှင့် မကြည့်ရန် ကတိသစ္စာပြုခဲ့ပြီ” လို့ သစ္စာရှိသူ ယောဘ ပြောခဲ့တယ်။ (ယောဘ ၃၁:၁၊ ခမ) အောက်မှာဖော်ပြထားရာတွေက သင်ပြုနိုင်တဲ့ “ကတိသစ္စာ” တချို့ ဖြစ်တယ်–

• ငါတစ်ယောက်တည်းရှိနေချိန်မှာ အင်တာနက် မသုံးဘူး။

• ရုတ်တရက်ပေါ်လာတဲ့ မသင့်တော်တဲ့ဆိုက်တွေကို ငါ ချက်ချင်းပိတ်မယ်။

• ဒုံရင်းအခြေအနေကို ပြန်ရောက်သွားရင် ရင့်ကျက်တဲ့ မိတ်ဆွေတစ်ယောက်ကို ငါ ပြောပြမယ်။

ဒီကိစ္စအတွက် ဆုတောင်းပါ။ ဆာလံဆရာက ယေဟောဝါကို ခုလိုဆုတောင်းခဲ့တယ်– “တန်ဖိုးမဲ့တဲ့အရာတွေကို မကြည့်မိအောင် ကျွန်တော့်မျက်စိကို လွှဲပေးပါ။” (ဆာလံ ၁၁၉:၃၇၊ ကဘ) ဘုရားသခင်က သင့်ကို အောင်မြင်စေချင်တယ်။ သင် ဆုတောင်းမယ်ဆိုရင် မှန်ကန်ရာကို လုပ်နိုင်ဖို့ သင့်ကို ကိုယ်တော် ခွန်အားပေးပါလိမ့်မယ်။—ဖိလိပ္ပိ ၄:၁၃။

တစ်ယောက်ယောက်ကို ပြောပြပါ။ တစ်ယောက်ယောက်ကို ရင်ဖွင့်ပြောပြခြင်းက ဒီအကျင့်ကို ဖြတ်ပစ်ဖို့ အရေးကြီးတဲ့ ခြေလှမ်းဖြစ်လေ့ရှိတယ်။—သုတ္တံ ၁၇:၁၇။

ဒီအချက်ကို သတိရပါ– ညစ်ညမ်းရုပ်ပုံစာပေကို သင် တစ်ကြိမ် ရှောင်လိုက်တိုင်း အရေးပါတဲ့အောင်ပွဲတစ်ခု သင် ရလိုက်တာပဲ။ ဒီအောင်ပွဲအကြောင်း ယေဟောဝါဘုရားကို ပြောပြပါ။ ခွန်အားပေးတဲ့အတွက် ကျေးဇူးတင်ကြောင်း ပြောပါ။ ညစ်ညမ်းရုပ်ပုံစာပေကို ရှောင်ကြဉ်ခြင်းအားဖြင့် ကိုယ်တော့်ရဲ့စိတ် ရွှင်လန်းအောင် သင် လုပ်ဆောင်ရာ ရောက်တယ်။—သုတ္တံ ၂၇:၁၁။