တခြားဘာသာစကားကို ဘာဖြစ်လို့ သင်ယူတာလဲ

ကိုယ့်ကိုယ်ကိုယ် ကြပ်မတ်နိုင်စွမ်းနဲ့ နှိမ့်ချမှု ရှိမရှိ တခြားဘာသာစကားတစ်ခုကို သင်ယူပြီး စမ်းသပ်နိုင်တယ်။ ကြိုးစားရကျိုး နပ်ရဲ့လား။ လူငယ်အများစုက “ကြိုးစားရကျိုး နပ်ပါတယ်” လို့ ပြောကြတယ်။ ဒီဆောင်းပါးမှာ သူတို့ တခြားဘာသာစကားကို ဘာကြောင့် သင်ယူကြသလဲဆိုတာ ရှင်းပြပါလိမ့်မယ်။

• ဘာကြောင့် သင်ယူတာလဲ

• ဘယ်လို အခက်အခဲတွေ ရှိသလဲ

• ဘာအကျိုးရသလဲ

• ရွယ်တူချင်းတွေ ပြောဆိုရာ

ဘာကြောင့် သင်ယူတာလဲ

အများစုကတော့ ကျောင်းသင်ခန်းစာမှာ ပါနေလို့ တခြားဘာသာစကားကို သင်ယူကြတာ။ တခြားသူတွေကျတော့ အားပေးတိုက်တွန်းမှု တစ်ခုခု ရှိလို့ပါ။ ဥပမာ–

• သြစတြေးလျနိုင်ငံက အန်နာက သူ့အမေရဲ့ မိခင်ဘာသာစကား လတ်ဗီးယားစကား သင်ယူဖို့ ဆုံးဖြတ်ခဲ့တယ်။ “လတ်ဗီးယားနိုင်ငံကို ကျွန်မတို့မိသားစု အလည်သွားကြမလို့။ အဲဒီကို ရောက်ရင် အမျိုးတွေနဲ့ စကားစမြည် ပြောချင်တယ်” လို့ အန်နာ ပြောတယ်။

• အမေရိကန်နိုင်ငံက ယေဟောဝါသက်သေတစ်ဦး ဖြစ်တဲ့ ဂျီနာဟာ အမေရိကန် လက်သင်္ကေတစကား (ASL) သင်ယူပြီး ဘလိဇ်နိုင်ငံမှာ သွားအမှုဆောင်တယ်။ “နားမကြားတဲ့သူတွေနဲ့ ပြောဆိုဆက်သွယ်နိုင်တဲ့သူ လက်တစ်ဆုပ်စာပဲ ရှိတယ်။ သူတို့ဘာသာစကားနဲ့ ကျမ်းစာသင်ပေးဖို့ ASL ကိုသင်ယူထားတယ်လို့ ပြောပြရင် သူတို့ တော်တော်လေး သဘောကျတယ်” ဆိုပြီး ဂျီနာ ရှင်းပြတယ်။

သင်သိပါသလား။ ကျမ်းစာက “လူမျိုး၊ လူမျိုးနွယ်၊ ဘာသာစကား” အမျိုးမျိုးပြောတဲ့ လူတွေကို ဘုရားသခင်နိုင်ငံတော် သတင်းကောင်း ကြေညာလိမ့်မယ်လို့ ကြိုဟောထားတယ်။ (ဗျာဒိတ် ၁၄:၆) ဒီကျမ်းချက် ပြည့်စုံဖို့ ယေဟောဝါသက်သေလူငယ် တော်တော်များများက ဘာသာစကားအသစ် သင်ယူပြီး ကိုယ့်နိုင်ငံ ဒါမှမဟုတ် တခြားနိုင်ငံမှာ တိုးချဲ့အမှုဆောင်နေကြတယ်။

ဘယ်လို အခက်အခဲတွေ ရှိသလဲ

ဘာသာစကားအသစ်ကို သင်ယူတာက မလွယ်ဘူး။ “စကားလုံးအသစ်တွေ မှတ်ယူဖို့ပဲလို့ ကျွန်မထင်ခဲ့တာ။ တကယ်တော့ ယဉ်ကျေးမှုအသစ်၊ အတွေးအခေါ်အသစ်ကိုပါ သင်ယူလိုက်ရတာ။ အချိန်တော့ တော်တော်လေး ပေးလိုက်ရတယ်” ဆိုပြီး ဆယ်ကျော်သက် ကော်ရီနာ ပြောပြတယ်။

နှိမ့်ချဖို့လည်း လိုတယ်။ စပိန်စကားသင်ယူတဲ့ ဂျိမ်းစ် ဒီလိုပြောတယ်– “အသံထွက်တွေ မှားမှာပဲ၊ မှားတဲ့အခါ ကိုယ်ပါရောပြီး ရယ်တတ်ဖို့ လိုတယ်။ ဒါမှလည်း တတ်လာမှာ။”

အဓိကအချက်– တစ်ခါတလေ မှားသွားလို့ ရှက်ကိုးရှက်ကန်း ဖြစ်ရတာတွေကို ဖြေရှင်းတတ်ရင် ဘာသာစကားအသစ် သင်ယူဖို့ မခက်တော့ဘူး။

အကြံပြုချက်– တခြားသူတွေက ကိုယ့်ထက် ပိုတတ်မြန်ရင် စိတ်ဓာတ်မကျပါနဲ့။ ကျမ်းစာ ဒီလိုဆိုတယ်– ‘လူတိုင်း ကိုယ့်လုပ်ရပ်တွေကိုပဲ ဆန်းစစ်ပါ။ သူတစ်ပါးနဲ့ မနှိုင်းယှဉ်ပါနဲ့။ ဒါဆိုရင် ကိုယ့်လုပ်ရပ်နဲ့ပတ်သက်ပြီး ပျော်ရွှင်ကျေနပ်ရလိမ့်မယ်။’​​—ဂလာတိ ၆:​၄၊ ကဘ။

ဘာအကျိုးရသလဲ

ဘာသာစကားအသစ်တစ်ခု သင်ယူတာကနေ အကျိုးအများကြီး ရတယ်။ ဥပမာ၊ အိုလစ်ဗီယာဆိုတဲ့ ဆယ်ကျော်သက် မိန်းကလေးက “ဘာသာစကားအသစ် သင်ယူတဲ့အခါ သူငယ်ချင်းအသစ်တွေ ရတယ်” လို့ ပြောတယ်။

ဆယ်ကျော်သက် မိန်းကလေး မေရီကျတော့ ဘာသာစကားအသစ် သင်ယူခဲ့လို့ သူ့ကိုယ်သူ ပိုယုံကြည်စိတ်ချလာတယ်။ “ကျွန်မ ဘာလုပ်လုပ် ကျေနပ်တယ်ဆိုတာ မရှိသလောက်ဘဲ။ ဒါပေမဲ့ အခု ဘာသာစကားအသစ် သင်ယူနေတော့ စကားလုံးအသစ်တစ်လုံး တတ်လာတိုင်း သိပ်ပျော်တယ်။ ငါမဆိုးပါလား၊ တော်သားပဲလို့ ခံစားမိတယ်” လို့ ပြောတယ်။

အစပိုင်းမှာ ဖော်ပြခဲ့တဲ့ မိန်းကလေး ဂျီနာက လက်သင်္ကေတစကားနဲ့ ကျမ်းစာသင်ပေးရလို့ အမှုဆောင်လုပ်ငန်းမှာ ပိုပျော်လာတယ်။ “လူတွေကို သူတို့ဘာသာစကားနဲ့ ဆက်သွယ်လို့ သူတို့ ပြုံးရွှင်သွားတာကို တွေ့ရတဲ့အခါ အရမ်းပျော်တာပဲ” ဆိုပြီး သူပြောတယ်။

အဓိကအချက်– ဘာသာစကားအသစ် သင်ယူတဲ့အခါ မိတ်ဆွေသစ်တွေရတယ်၊ ကိုယ့်ကိုယ်ကိုယ် ပိုယုံကြည်စိတ်ချလာတယ်၊ အမှုဆောင်ရတာ ပိုပျော်စရာကောင်းတယ်။ ‘လူမျိုးတွေ၊ မျိုးနွယ်တွေ၊ လူစုတွေ’ ကို သတင်းကောင်းသိစေနိုင်တဲ့ နည်းလမ်းကောင်းလည်း ဖြစ်တယ်။​—ဗျာဒိတ် ၇:၉။