ကျမ်းပိုဒ် ရှင်းပြချက်များ
ယေရမိ ၂၉:၁၁—“မင်းတို့နဲ့ပတ်သက်ပြီး ငါဘာတွေ တွေးနေမှန်း ငါသိတာပေါ့”
“‘ယေဟောဝါa ပြောတာက- ‘မင်းတို့နဲ့ပတ်သက်ပြီး ငါဘာတွေ တွေးနေမှန်း ငါသိတာပေါ့။ မင်းတို့ကို ငြိမ်သက်အေးချမ်းစေချင်တယ်။ ဘေးဆိုး မကြုံစေချင်ဘူး။ မင်းတို့ မျှော်လင့်တဲ့ အနာဂတ်မျိုး ပေးချင်တယ်။’”—ယေရမိ ၂၉:၁၁၊ ကမ္ဘာသစ်ဘာသာပြန်ကျမ်း။
“သင်တို့အတွက် ငါပြုလုပ်ထားသည့် အကြံအစည်များကို ငါသာလျှင် သိ၏။ ထိုအကြံအစည်တို့သည် သင်တို့ ကောင်းစားမှု၊ သင်တို့ စောင့်မျှော်နေသည့် အနာဂတ်ကို ထုတ်ဖော်ပေးမှုနှင့်ဆိုင်သော အကြံအစည်များ ဖြစ်ပေသည်။ သင်တို့အား ဘေးအန္တရာယ် ရောက်စေမည့် အကြံအစည်များ မဟုတ်။”—ယေရမိ ၂၉:၁၁၊ ခေတ်သုံးကျမ်းစာ။
ယေရမိ ၂၉:၁၁ ရဲ့ အဓိပ္ပာယ်
ယေဟောဝါဘုရားက မိမိကို ဝတ်ပြုသူတွေကို ငြိမ်သက်အေးချမ်းတဲ့ အနာဂတ် ရှိစေမယ်လို့ ကတိပေးတယ်။ ရှေးခေတ် မိမိလူတွေကို ပေးခဲ့တဲ့ ကတိဟာ ဒီနေ့ခေတ် လူတွေနဲ့လည်း သက်ဆိုင်တယ်။ ဘုရားသခင်ဟာ “မျှော်လင့်ချက် ပေးတဲ့ အရှင်” ပါ။ (ရောမ ၁၅:၁၃) ကောင်းမွန်တဲ့ အနာဂတ်အတွက် “မျှော်လင့်ချက် ရှိစေ” တဲ့ ကတိတော်တွေကို ကျမ်းစာမှာ မှတ်တမ်းတင်စေတယ်။—ရောမ ၁၅:၄။
ယေရမိ ၂၉:၁၁ ရဲ့ အထက်အောက်စကား
ဒီစကားတွေဟာ ဂျေရုဆလင်ကနေ ပြည်နှင်ခံရလို့ ဗာဗုလုန်ကို ရောက်နေတဲ့ အစ္စရေးတွေဆီ ရေးတဲ့ စာထဲကပါ။b (ယေရမိ ၂၉:၁) ပြည်နှင်ခံအဖြစ် အကြာကြီး နေရမှာ ဖြစ်လို့ အိမ်တွေ ဆောက်၊ ဥယျာဉ်တွေ စိုက်ပျိုးပြီး သားသမီးတွေ မွေးရမယ်လို့ ဘုရားသခင် မှာတယ်။ (ယေရမိ ၂၉:၄-၉) ဒါပေမဲ့ “ဗာဗုလုန်မှာ အနှစ် ၇၀ ပြည့်တဲ့အခါ မင်းတို့ကို ငါ ပြန်ကြည့်ရှုမယ်။ ငါ့ရဲ့ ကောင်းမွန်တဲ့ ကတိအတိုင်း မင်းတို့ကို [ဂျေရုဆလင်ဆီ] ငါ ပြန်ခေါ်လာမယ်” လို့ ဆက်ပြောတယ်။ (ယေရမိ ၂၉:၁၀) ဒီနည်းနဲ့ သူတို့ကို မေ့မထားဘူး၊ အိမ်ပြန်လာရမယ်ဆိုတဲ့ မျှော်လင့်ချက်အတိုင်း ဖြစ်လာမယ်လို့ အာမခံတယ်။—ယေရမိ ၃၁:၁၆၊ ၁၇။
ဘုရားသခင်ဟာ အစ္စရေးတွေကို ပေးတဲ့ ကတိအတိုင်း လုပ်ဆောင်တယ်။ ကြိုဟောချက်အတိုင်း ပါးရှားဘုရင် ဆိုင်းရပ်က ဗာဗုလုန်ကို အနိုင်ရတယ်။ (ဟေရှာယ ၄၅:၁၊ ၂။ ယေရမိ ၅၁:၃၀-၃၂) အဲဒီနောက် ဂျူးတွေကို နေရင်းပြည် ပြန်ခွင့်ပေးလိုက်တယ်။ နှစ်ပေါင်း ၇၀ ပြည်နှင်ခံဘဝ ရောက်ပြီးနောက် ဂျေရုဆလင်ကို ပြန်လာကြတယ်။—၂ ရာဇဝင်ချုပ် ၃၆:၂၀-၂၃။ ဧဇရ ၃:၁။
ယေရမိ ၂၉:၁၁ ပါ ပြည်စုံပြီးသား ကတိက ဒီနေ့ခေတ် ဘုရားကတိတော် မျှော်ကိုးသူတွေကို စိတ်ချစေတယ်။ အဲဒီကတိတွေထဲမှာ ခရစ်တော်ယေရှု အုပ်ချုပ်တဲ့ နိုင်ငံတော်အားဖြင့် ကမ္ဘာတစ်ခွင် ငြိမ်သက်အေးချမ်းစေမယ်ဆိုတဲ့ ကတိတွေ ပါဝင်တယ်။—ဆာလံ ၃၇:၁၀၊ ၁၁၊ ၂၉။ ဟေရှာယ ၅၅:၁၁။ မဿဲ ၆:၁၀။
ယေရမိ ၂၉:၁၁ နဲ့ပတ်သက်တဲ့ ယူဆချက် အမှား
ယူဆချက်အမှား။ ဘုရားသခင်မှာ တစ်ဦးစီအတွက် သတ်သတ်မှတ်မှတ် “အတွေးတွေ [အကြံအစည်တွေ]” ရှိနေတယ်။
အမှန်။ ဘုရားသခင်က လူတွေကို လွတ်လပ်စွာ ရွေးချယ် လုပ်ဆောင်ခွင့် ပေးထားတယ်။ ယေရမိ ၂၉:၁၁ ပါ စကားတွေက ဗာဗုလုန်မှာ ရှိတဲ့ အစ္စရေးတွေကို ပြောနေခြင်း ဖြစ်တယ်။ သူတို့မှာ အေးချမ်းတဲ့ အနာဂတ် ရှိစေဖို့ ဘုရား ကြံစည်ထားတယ်။ (ယေရမိ ၂၉:၄) ကတိတော်ကနေ အကျိုးရယူ/မယူ ဆိုတာကိုတော့ တစ်ဦးစီကို ရွေးချယ်ခွင့် ပေးထားတယ်။ (တရားဟောရာ ၃၀:၁၉၊ ၂၀။ ယေရမိ ၂၉:၃၂) ဘုရားကို အားကိုးဖို့ ရွေးချယ်သူတွေက စိတ်ရင်းမှန်နဲ့ ဆုတောင်းခြင်းအားဖြင့် အကျိုးရယူနေကြတယ်။—ယေရမိ ၂၉:၁၂၊ ၁၃။
ယူဆချက်အမှား။ ဘုရားသခင်က မိမိလူတွေကို ရုပ်ပစ္စည်း ချမ်းသာကြွယ်ဝစေမယ်။
အမှန်။ တချို့ကျမ်းစာထဲက ယေရမိ ၂၉:၁၁ ပါ “ကြွယ်ဝ” ဆိုတဲ့ စကားလုံးက “ငြိမ်သက်၊ ကျန်းမာ၊ အခြေအနေကောင်း” ဆိုပြီး အဓိပ္ပာယ်ရတဲ့ ဟီဘရူးစကားလုံးကို ဘာသာပြန်ထားတာ။ စကားစပ်အရ ဘုရားသခင်က ပြည်နှင်ခံ ဂျူးတွေကို ချမ်းသာကြွယ်ဝစေဖို့ မဟုတ်ဘဲ ငြိမ်သက်အေးချမ်းဖို့၊ ပျော်ပျော်ရွှင်ရွှင် နေထိုင်နိုင်ဖို့ ကတိပေးနေတာပါ။ လူမျိုးတစ်မျိုးအဖြစ် ဆက်တည်ရှိပြီး တစ်နေ့ကျရင် ဂျေရုဆလင်ကို ပြန်လာနိုင်ကြမယ်။—ယေရမိ ၂၉:၄-၁၀။
ယေရမိ အခန်းကြီး ၂၉ ကို အောက်ခြေမှတ်ချက်၊ ပြန်လှန်အညွှန်းတွေနဲ့အတူ ဖတ်ပါ။
a ယေဟောဝါဆိုတာ ဘုရားသခင်ရဲ့ နာမည် ဖြစ်တယ်။—ဆာလံ ၈၃:၁၈။
b ယေရမိ ၂၉:၁၁ နဲ့ပတ်သက်ပြီး အနက်ဖွင့်ကျမ်းတစ်စောင်မှာ ဒီလို ဖော်ပြတယ်- “ပြည်နှင်ခံတွေအပေါ် ထားတဲ့ ယာဝေး [ယေဟောဝါ] ရဲ့ ကရုဏာကို ကျမ်းစာ ဖော်ပြရာမှာ အကောင်းဆုံး ကတိတစ်ခုပါပဲ။ အပြုသဘောနဲ့ မျှော်လင့်ချက် ရှိစေတယ်။”—The Expositor’s Bible Commentary အတွဲ ၇၊ စာမျက်နှာ ၃၆၀။