နားမကြားသူတွေ မေ့လျော့မခံရ

ယေဟောဝါဘုရားက လူအားလုံးကို ဘယ်လိုအခြေအနေပဲရှိရှိ မိမိအကြောင်း၊ ကောင်းကင်နိုင်ငံတော်အကြောင်း သိစေချင်တယ်။ (၁ တိမောသေ ၂:​၃၊ ၄) ဒါကြောင့် ယေဟောဝါသက်သေတွေက ကျမ်းစာနဲ့ ကျမ်းစာအခြေပြုစာပေတွေကို လူများနိုင်သမျှ များများအတွက် ထုတ်ဝေကြတယ်။ နားမကြားသူတွေအတွက်လည်း ပါတယ်။ ကျွန်တော်တို့အဖွဲ့အစည်းဟာ ထောင်ပေါင်းများစွာသော လက်သင်္ကေတပြစာပေတွေကို ဗီဒီယိုအသွင်နဲ့a ထုတ်ဝေခဲ့တယ်။ လက်သင်္ကေတပြဘာသာစကား ၁၀၀ ကျော်နဲ့ ရရှိနိုင်ပါတယ်။ စာပေတွေကို လက်သင်္ကေတပြဘာသာစကားနဲ့ ဘယ်လိုထုတ်လုပ်ဖြန့်ချိသလဲ။ နှစ်တွေတစ်လျှောက် ဘယ်လိုတိုးတက်ပြောင်းလဲခဲ့သလဲ။

လက်သင်္ကေတပြဘာသာစကားနဲ့ ဗီဒီယိုတွေကို ဘယ်လိုထုတ်လုပ်သလဲ

ကမ္ဘာတစ်ဝန်းက ဘာသာပြန်အဖွဲ့တွေက လက်သင်္ကေတပြဘာသာစကားနဲ့ စာအုပ်စာပေတွေကို ထုတ်လုပ်ကြတယ်။ ဘာသာပြန်မယ့်စာပေတွေကို ဘာသာပြန်အဖွဲ့ဝင်တိုင်းက ဂရုတစိုက် လေ့လာသုံးသပ်ကြတယ်။ အဲဒီနောက် အချက်အလက်တွေကို လက်သင်္ကေတပြဘာသာစကားနဲ့ ဘယ်လိုပြန်ဆိုရင် အကောင်းဆုံးဖြစ်မယ်ဆိုတာ ဆုံးဖြတ်ကြတယ်။ ပြီးတဲ့နောက် ဗီဒီယိုရိုက်ကူးတယ်။ လောလောဆယ် ဘာသာပြန်အဖွဲ့ ၆၀ ဟာ လက်သင်္ကေတပြဘာသာစကားနဲ့ ကျမ်းစာအခြေပြုစာပေတွေကို ပုံမှန် ဘာသာပြန်ဆိုနေကြတယ်။ နောက်ထပ်အဖွဲ့ ၄၀ ကတော့ လိုအပ်သလို ပြန်ဆိုနေတယ်။

အရင်တုန်းက လက်သင်္ကေတပြဘာသာစကားနဲ့ ဗီဒီယိုတွေထုတ်ဖို့ ငွေကုန်ကြေးကျ အတော်များတယ်။ ဗီဒီယိုကင်မရာတွေနဲ့ တခြားကိရိယာတွေက အခုအချိန်ကထက် ပိုစျေးကြီးတယ်။ ဗီဒီယိုရိုက်ကူးမယ့် စတူဒီယိုတွေကိုလည်း ကိုယ့်ဘာသာကိုယ် ဆောက်ရတယ်။ တစ်ခါတလေ အဆောက်အအုံကို ပြုပြင်မွမ်းမံရတယ်။ လက်သင်္ကေတပြ ဘာသာပြန်အဖွဲ့အတွက် ပစ္စည်းကိရိယာအစအဆုံး တပ်ဆင်ဖို့ ဒေါ်လာ ၃၀,၀၀၀b ကျော် ကုန်ကျတယ်။

အလှူငွေတွေကို အကျိုးရှိရှိ အသုံးပြုနိုင်ဖို့ အဖွဲ့အစည်းဟာ ဘာသာပြန်လုပ်ငန်းစဉ်ကို တိုးတက်အောင်၊ ရိုးရှင်းအောင် ကြိုးစားလုပ်ဆောင်ခဲ့တယ်။ ဒါကြောင့် ဘက်စုံအသုံးပြုနိုင်ပြီး အကုန်အကျလည်း သိပ်မများတဲ့ ခေတ်မီကိရိယာတွေကို အသုံးပြုနေပါတယ်။ ဘာသာပြန်အဖွဲ့တွေဟာ စတူဒီယိုထဲမှာ ရိုက်ကူးမယ့်အစား အစိမ်းရောင်မျက်နှာပြင်လို့ခေါ်တဲ့ အစိမ်းရောင်နောက်ခံကို တပ်ဆင်ပြီး ရုံးခန်းထဲမှာပဲ ဗီဒီယိုတွေကို ရိုက်ကူးနိုင်ကြပြီ။ လက်သင်္ကေတပြပေးမယ့် ညီအစ်ကို/မတွေလည်း စတူဒီယိုကို သွားစရာမလိုဘဲ ကိုယ့်ရုံးခန်း၊ အိမ်ကနေ ရိုက်ကူးနိုင်ကြတယ်။

လက်သင်္ကေတပြသူတွေအတွက် အလုပ်တွင်ကျယ်စေဖို့ ဆော့ဖ်ဝဲတွေကိုလည်း ကျွန်တော်တို့ ထုတ်လုပ်ခဲ့ကြတယ်။ ဒါကြောင့် ဘာသာပြန်အဖွဲ့တွေဟာ လက်သင်္ကေတပြဘာသာစကားနဲ့ စာအုပ်စာပေတွေကို ထုတ်လုပ်ရာမှာ အချိန်တစ်ဝက် လျှော့ချနိုင်ခဲ့တယ်။ ဒီလိုတိုးတက်မှုတွေအတွက် ညီအစ်ကို/မတွေလည်း ကျေးဇူးတင်ကြတယ်။ အလက်ဇန်းဒရားလို့ခေါ်တဲ့ ညီအစ်ကိုတစ်ယောက် အခုလိုပြောပြတယ် - “လက်သင်္ကေတပြဗီဒီယိုတွေကို အရင်ကထက် ပိုများများ ထုတ်လုပ်နိုင်ခဲ့လို့ သိပ်ဝမ်းသာတယ်။ ဗီဒီယိုတွေကို ကျွန်တော် နေ့တိုင်းကြည့်တယ်။”

အခုဆိုရင် ဘာသာပြန်အဖွဲ့တစ်ဖွဲ့အတွက် စက်ကိရိယာတွေ တပ်ဆင်ဖို့ ဒေါ်လာ ၅,၀၀၀ လောက်ပဲ ကုန်ကျတော့တယ်။ ဒါကြောင့် လက်သင်္ကေတပြဘာသာစကားများစွာနဲ့ ဗီဒီယိုတွေ ထုတ်လုပ်နိုင်ခဲ့တယ်။

လက်သင်္ကေတပြဘာသာစကားနဲ့ ဗီဒီယိုတွေကို ဘယ်လိုဖြန့်ချိသလဲ

လက်သင်္ကေတပြဘာသာစကား စာပေတွေကို ဘာသာပြန်အဖွဲ့ ရိုက်ကူးပြီးရင် ဗီဒီယိုတွေကို ကြည့်ရှုနိုင်ပါပြီ။ အရင်တုန်းက ဗီဒီယိုခွေ၊ ဒီဗီဒီခွေတွေနဲ့ ထုတ်လုပ်ခဲ့ပေမဲ့ အဲဒီလိုလုပ်တာက အချိန်လည်းကုန်၊ လူလည်းပင်ပန်း ငွေကုန်ကြေးကျလည်း များတယ်။ အခွေတွေကူးဖို့ အပြင်က ကုမ္ပဏီတွေဆီမှာလည်း အပ်ရတယ်။ ပြီးရင် ဗီဒီယိုခွေနဲ့ ဒီဗီဒီခွေတွေကို အသင်းတော်တွေဆီ ပို့ကြတယ်။ ၂၀၁၃ တစ်နှစ်တည်းမှာတင် လက်သင်္ကေတပြဘာသာစကားနဲ့ ဒီဗီဒီခွေတွေ ထုတ်လုပ်ဖို့ ဒေါ်လာ ၂,၀၀၀,၀၀၀ ကျော် အသုံးပြုခဲ့တယ်။

အခုလိုပြင်ဆင်ပေးမှုတွေကို နားမကြားသူတွေ ကျေးဇူးတင်လေးမြတ်ကြတယ်။ ဒါပေမဲ့ ဗီဒီယိုခွေနဲ့ ဒီဗီဒီခွေတွေ များသထက်များလာတဲ့အခါ ဗီဒီယိုတွေကို အသုံးပြုရတာ သိပ်မလွယ်တော့ဘူး။ တစ်ခါတလေ ကျမ်းစာတစ်စောင်တည်းကိုတင် ရိုက်ကူးဖို့ ဒီဗီဒီခွေ အများကြီး သုံးရတယ်။ ဘရာဇီးနိုင်ငံက ညီအစ်ကို ဇီနာ အခုလို ပြန်ပြောင်းပြောပြတယ်- “ကျမ်းချက်တစ်ချက် ဖတ်ချင်ပြီဆိုရင် အဲဒီကျမ်းချက်ပါတဲ့ ဗီဒီယိုခွေကို ရှာရတယ်။ ပြီးရင် ကျမ်းချက်ကို ရှာရတယ်။ တော်တော်ခက်တယ်။” လက်သင်္ကေတပြဘာသာစကားနဲ့ ဒီဗီဒီခွေတွေကို အသုံးပြုခဲ့တဲ့ ညီအစ်မ ဟာဖာရာနီ အခုလို ပြောပြတယ်- “ကျမ်းချက်တွေ၊ အညွှန်းတွေကို ရှာဖို့ အချိန်အများကြီးကြာလို့ ကိုယ်ပိုင်လေ့လာမှုလုပ်ရတာ တအားပင်ပန်းတယ်။” အမှုဆောင်မှာဆိုလည်း ညီအစ်ကို/မတွေက ဒီဗီဒီခွေတွေ၊ ဗီဒီယိုခွေတွေ ယူသွားကြရတယ်။ စိတ်ဝင်စားသူတွေအိမ်က တီဗွီမှာ ပြရတယ်။ တချို့ညီအစ်ကိုတွေဆိုရင် ကိုယ်ပိုင် ဒီဗီဒီစက်ကိုတောင် ယူသွားကြတယ်။ နောက်ပိုင်းမှာ တီဗီဖန်သားပြင်လည်းပါတဲ့ သယ်ရလွယ် ဒီဗီဒီစက်လေးတွေပေါ်လာပြီး ညီအစ်ကို/မ အများစု သုံးခဲ့ကြတယ်။ အမေရိကန်ပြည်ထောင်စုက ဘော်ဘီလို့ခေါ်တဲ့ ညီအစ်ကိုတစ်ယောက် အခုလိုပြောပြတယ် - “ကျမ်းချက်တစ်ချက်ပြပြီးလို့ နောက်တစ်ချက် ပြချင်တယ်ဆိုရင် နောက်အခွေတစ်ခုကို ပြောင်းရတယ်။ ဒါကြောင့် စကားပြောတဲ့အခါ ကျမ်းစာသုံးဖို့ အချိန်လည်းကုန်၊ ကရိကထလည်း များတယ်။”

၂၀၁၃ ခုနှစ်မှာ ယေဟောဝါရဲ့အဖွဲ့အစည်းက လက်သင်္ကေတပြဘာသာစကားနဲ့ JW Library Sign Language အက်ပ်ကို ထုတ်လုပ်ပေးခဲ့တဲ့အတွက် ညီအစ်ကို/မတွေဟာ လက်သင်္ကေတပြဗီဒီယိုတွေကို ကိုယ်ပိုင်ဖုန်း၊ တက်ဘလက်တွေမှာ ကူးယူကြည့်ရှုနိုင်ခဲ့တယ်။ အက်ပ်ကို အမေရိကန် လက်သင်္ကေတပြဘာသာစကားနဲ့ ဦးဆုံး ထုတ်လုပ်ခဲ့တယ်။ ၂၀၁၇ ခုနှစ်မှာတော့ အက်ပ်ကို အဆင့်မြှင့်တင်ပေးခဲ့လို့ ကျန်လက်သင်္ကေတပြဘာသာစကားအားလုံးလည်း သုံးနိုင်ပြီ။ ကမ္ဘာတစ်ဝန်းက ညီအစ်ကို/မတွေ အတိုင်းထက်အလွန် ပျော်ခဲ့ကြတယ်။ ဘရာဇီးနိုင်ငံက ညီအစ်ကိုဂျူစီလီနို အခုလိုပြောတယ်- “ယုံတောင်မယုံနိုင်ဘူး။ အုပ်ချုပ်ရေးအဖွဲ့က ကျွန်တော်တို့လို နားမကြားသူတွေကို ဘယ်လိုမေတ္တာပြမလဲ၊ စကားပြောတတ်တဲ့သူတွေလို ကျွန်တော်တို့ကိုလည်း အမှန်တရားမှာ ဆက်တိုးတက်လာအောင် ဘယ်လိုလုပ်ပေးမလဲဆိုတာကို အမြဲသိချင်ခဲ့တာ။ ကျွန်တော် တအားစိတ်လှုပ်ရှားတယ်။ ဒီအက်ပ်ကြောင့် ကျမ်းစာကို ပိုလေ့လာဖို့ လှုံဆော်ခံရတယ်။”

အခုဆိုရင် လက်သင်္ကေတပြဘာသာစကားနဲ့ ဗီဒီယိုအားလုံးကို ဒီဂျစ်တယ်ပုံစံနဲ့ ထုတ်လုပ်ပြီး ဝက်ဆိုက်နဲ့ JW Library Sign Language အက်ပ်မှာ တင်တယ်။ ဒါကြောင့် လက်သင်္ကေတပြဘာသာစကားနဲ့ စာပေတွေကို ရက်အနည်းငယ်အတွင်းမှာတင် ဘာသာပြန်၊ ရိုက်ကူး၊ ဖြန့်ချိနိုင်ပြီ။ လနဲ့ချီ၊ နှစ်နဲ့ချီ စောင့်နေစရာမလိုတော့ဘူး။ လက်သင်္ကေတပြဘာသာစကားအများစုအတွက် စာပေတွေကို စကားပြောဘာသာစကား စာပေတွေနဲ့အတူ တစ်ပြိုက်နက် ရနိုင်ကြပြီ။

နားမကြား ညီအစ်ကို/မတချို့ရဲ့ မှတ်ချက်တွေကို လေ့လာကြည့်ပါ။ ကလီဇီယာလို့ခေါ်တဲ့ ညီအစ်မတစ်ယောက် အခုလိုပြောပြတယ်- “အဖွဲ့အစည်းက နားမကြားသူတွေကို သိပ်ဂရုစိုက်ပေးလို့ ယုံကြည်ခြင်းခိုင်ခံ့စေတဲ့အချက်အလက်တွေကို အလွယ်တကူရနိုင်အောင် ပြင်ဆင်ပေးတယ်။ ကမ္ဘာပေါ်မှာ ဘယ်အရာကမှ ယေဟောဝါရဲ့အဖွဲ့အစည်း ကျွန်မတို့အတွက် လုပ်ပေးတာနဲ့ မနှိုင်းယှဉ်နိုင်ဘူး။ ညီအစ်ကိုဘလက်ဒီမာလည်း အခုလိုပြောတယ်- “ယေဟောဝါဘုရားက နားကြားသူတွေကို ဂရုစိုက်သလို နားမကြားသူတွေကိုလည်း ဂရုစိုက်တယ်ဆိုတာ ဗီဒီယိုတွေက သက်သေပြနေပါတယ်။”

ကျွန်တော်တို့ရဲ့ လက်သင်္ကေတပြဘာသာစကား ဗီဒီယိုတွေမှာ အခုလို မကြာခဏဖော်ပြထားတယ် - “ဒီစာပေဟာ စေတနာအလျောက် ထည့်ဝင်တဲ့ အလှူငွေနဲ့ ထုတ်ဝေဖြန့်ချိထားတာ ဖြစ်ပါတယ်။ ကမ္ဘာချီ ကျမ်းစာပညာပေး အစီအစဉ်မှာ ဒီစာပေလည်း အပါအဝင် ဖြစ်ပါတယ်။” သင်တို့ရဲ့ အလှူငွေထည့်ဝင်မှုအတွက် ကျေးဇူးအထူးတင်ရှိပါတယ်။ donate.jw.org မှာလည်း အလှူငွေတွေကို ထည့်ဝင်နိုင်ပါတယ်။ အလှူငွေတွေက လက်သင်္ကေတပြစာပေတွေ အပါအဝင် လူအားလုံးအတွက် ကျမ်းစာနဲ့ ကျမ်းစာအခြေပြုစာပေတွေ ထုတ်လုပ်ရာမှာ ထောက်ကူပေးပါတယ်။