ဝတ်ပြုရာ

၁၀ နောက်ပိုင်း  အာရုန်ရဲ့သား နာဒပ်နဲ့ အဘိဟုက+ မီးခဲခွက်ကိုယ်စီယူ၊ မီးထည့်၊ မီးပေါ်မှာ နံ့သာပေါင်းတင်ပြီး+ ယေဟောဝါ မမိန့်မှာတဲ့၊ တားမြစ်ထားတဲ့ မီးကို ပူဇော်တယ်။+ ၂ အဲဒီအခါ ယေဟောဝါဆီက  မီးကျလာပြီး  သူတို့ကို  လောင်ကျွမ်းတဲ့အတွက်+ ယေဟောဝါရှေ့မှာ သေဆုံးသွားကြတယ်။+ ၃ မောရှေက အာရုန်ကို ခေါ်ပြီး “ယေဟောဝါဘုရားက ‘ငါ့အနားမှာရှိတဲ့လူတွေ+ ငါ့ကို အထွတ်အမြတ်ထားရမယ်။ ဒါမှ လူအားလုံး ငါ့ကို ဂုဏ်တင်ကြလိမ့်မယ်’ ဆိုပြီး ပြောထားတာပဲ”  လို့ပြောတယ်။  အာရုန်လည်း ဘာမှပြန်မပြောဘဲ နေတယ်။

၄ မောရှေက  အာရုန်ရဲ့ဘထွေး ဩဇေလရဲ့သား+ မိရှေလနဲ့ဧလဇာဖန်ကို ခေါ်ပြီး “ခင်ဗျားတို့ရဲ့ ညီအစ်ကိုတွေကို သန့်ရှင်းရာ ဌာနတော်ကနေ စခန်းအပြင် ထုတ်သွားကြ” လို့ပြောတယ်။ ၅ သူတို့လည်း မောရှေပြောတဲ့အတိုင်း  ဝတ်လုံရှည်ဝတ်ထားတဲ့ အလောင်းတွေကို စခန်းအပြင်ဘက် ထုတ်သွားကြတယ်။

၆ မောရှေက အာရုန်နဲ့ ကျန်တဲ့သား ဧလာဇာ၊ ဧသမာတို့ကို “ဆံပင်တွေ မဖြီးဘဲမနေနဲ့။ အဝတ်တွေကိုလည်း မဆုတ်ဖြဲနဲ့။+ ဒီလိုမှမဟုတ်ရင် ခင်ဗျားတို့ သေလိမ့်မယ်။ အစ္စရေးလူစုကို ဘုရားသခင် အမျက်ထွက်လိမ့်မယ်။ ယေဟောဝါ မီးနဲ့ဖျက်ဆီးလိုက်တဲ့သူတွေအတွက် ခင်ဗျားတို့ရဲ့ညီအစ်ကို အစ္စရေးတွေပဲ ငိုကြွေးရမယ်။ ၇ ခင်ဗျားတို့ကိုတော့ ယေဟောဝါရဲ့ ဘိသိက်ဆီ လောင်းထားတဲ့အတွက်+ တွေ့ဆုံရာတဲတော် ဝင်ပေါက်နားမှာပဲ နေကြပါ။ ထွက်သွားရင် သေလိမ့်မယ်” လို့ပြောတယ်။ သူတို့လည်း မောရှေပြောတဲ့အတိုင်း လုပ်ကြတယ်။

၈ ယေဟောဝါက  အာရုန်ကို၊ ၉ “မင်းရော၊ မင်းရဲ့သားတွေရော တွေ့ဆုံရာတဲတော်ကို လာတဲ့အခါ စပျစ်ဝိုင်ဖြစ်စေ၊  တခြားအရက်ယမကာဖြစ်စေ  မသောက်နဲ့။+ သောက်ရင် သေလိမ့်မယ်။  ဒါဟာ  မင်းတို့အမျိုးအစဉ်အဆက် လိုက်နာရမယ့် အမြဲတည်တဲ့ ဥပဒေပဲ။ ၁၀ ဒါမှ မင်းတို့က မြင့်မြတ်ရာနဲ့ ညစ်ညူးရာ၊ သန့်ရှင်းရာနဲ့  မသန့်ရှင်းရာကို  ခွဲခြားသိနိုင်မယ်။+ ၁၁ မောရှေကတစ်ဆင့်  ငါယေဟောဝါပြောတဲ့ စည်းမျဉ်းအားလုံးကို  အစ္စရေးလူမျိုးကို သွန်သင်ပေးနိုင်မယ်”+ လို့ပြောတယ်။

၁၂ အဲဒီနောက် မောရှေက အာရုန်နဲ့ ကျန်တဲ့သား ဧလာဇာ၊ ဧသမာကို “ယေဟောဝါဘုရားအတွက်  မီးရှို့ဆက်သတဲ့  အလှူတွေထဲက ကျန်တဲ့ကောက်နှံအလှူကို ယူ၊ တဆေးမဲ့မုန့် ဖုတ်ပြီး ပူဇော်ရာပလ္လင်အနားမှာ စားပါ။+ ဒါဟာ အသန့်ရှင်းဆုံးအရာပဲ။+ ၁၃ အဲဒါက  ယေဟောဝါဘုရားအတွက် မီးရှို့ဆက်သတဲ့ အလှူတွေထဲက ခင်ဗျားနဲ့ ခင်ဗျားသားတွေရဲ့ ဝေစုဖြစ်လို့ သန့်ရှင်းရာဌာနတော်မှာပဲ စားရမယ်။+  ဒီလိုလုပ်ဖို့  ကျွန်တော့်ကို မိန့်မှာထားတယ်။ ၁၄ ခင်ဗျားနဲ့ ခင်ဗျားရဲ့ သားသမီးတွေက+ ချီလွှဲရာအလှူဖြစ်တဲ့ ရင်ဒူးသား၊ မြင့်မြတ်ရာဝေစုဖြစ်တဲ့ ပေါင်သားကို+ သန့်ရှင်းရာဌာနတော်မှာ  စားရမယ်။ အဲဒါတွေကို အစ္စရေးလူမျိုးရဲ့ မိတ်သဟာယ ပူဇော်သက္ကာတွေထဲကနေ ခင်ဗျားနဲ့ ခင်ဗျားရဲ့သားတွေအတွက် ဝေစုပေးထားတယ်။ ၁၅ လူတွေက မီးရှို့ပူဇော်မယ့် အဆီတွေနဲ့အတူ မြင့်မြတ်ရာဝေစုဖြစ်တဲ့ ပေါင်သား၊ ချီလွှဲရာအလှူဖြစ်တဲ့ ရင်ဒူးသားကို ယူလာလိမ့်မယ်။ ယေဟောဝါဘုရားရှေ့မှာ ချီလွှဲရာအလှူအဖြစ် ချီလွှဲပေးရမယ်။  အဲဒီအသားတွေဟာ ယေဟောဝါ မိန့်မှာတဲ့အတိုင်း ခင်ဗျားနဲ့ ခင်ဗျားရဲ့သားတွေ အမြဲရမယ့်ဝေစု ဖြစ်လိမ့်မယ်”+ လို့ပြောတယ်။

၁၆ မောရှေက အပြစ်ဖြေရာအလှူဖြစ်တဲ့  ဆိတ်ကို  အသည်းအသန် လိုက်ရှာတဲ့အခါ+ မီးရှို့ပူဇော်ပြီးသွားမှန်း သိလိုက်ရတော့ အာရုန်ရဲ့သား ဧလာဇာနဲ့ဧသမာကို  ဒေါသထွက်ပြီး၊ ၁၇ “အပြစ်ဖြေရာအလှူဖြစ်တဲ့ တိရစ္ဆာန်ရဲ့ အသားကို သန့်ရှင်းရာဌာနတော်မှာ ဘာလို့မစားတာလဲ။+ အဲဒီအသားက  အသန့်ရှင်းဆုံးအရာ မဟုတ်လား။  ယေဟောဝါဘုရားရှေ့မှာ အစ္စရေးတစ်မျိုးလုံးရဲ့ အမှားအတွက် တာဝန်ယူပြီး အပြစ်ဖြေပေးဖို့ ကိုယ်တော်ပေးထားတာ မဟုတ်လား။ ၁၈ ယဇ်ကောင်ရဲ့သွေးကိုလည်း  သန့်ရှင်းရာဌာနတော်ထဲ  မယူလာပါလား။+ တကယ်ဆို  ဘုရား မိန့်မှာထားတဲ့အတိုင်း အဲဒီအသားကို သန့်ရှင်းရာဌာနတော်မှာ စားရမှာလေ” လို့ပြောတယ်။ ၁၉ အာရုန်က “ဒီနေ့ အပြစ်ဖြေရာအလှူနဲ့ မီးရှို့ရာအလှူကို ယေဟောဝါဘုရားရှေ့ လူတွေ ယူလာကြပေမဲ့+ ကျွန်တော်က ဒီလိုအဖြစ်ဆိုး ကြုံခဲ့ရပြီလေ။ အပြစ်ဖြေရာအလှူကို ဒီနေ့ ကျွန်တော်စားရင် ယေဟောဝါဘုရား  လက်ခံပါ့မလား” လို့ ပြန်ဖြေတယ်။ ၂၀ ဒါကိုကြားတော့  မောရှေလည်း  ကျေနပ်သွားတယ်။