၂ ဘုရင်များ
၉ အဲဒီနောက် ပရောဖက်ဧလိရှဲဟာ ပရောဖက်အုပ်စုထဲက တစ်ယောက်ကို ခေါ်ပြီး “ခင်ဗျားရဲ့ဝတ်လုံကို ခါးမှာ လိပ်တင်၊ ဒီဆီဘူးကို အမြန်ယူပြီး ရာမုတ်ဂိလဒ်မြို့ကို+ သွားပါ။ ၂ အဲဒီကိုရောက်ရင် နိမ်ရှိရဲ့မြေး၊ ယောရှဖတ်ရဲ့သား ယေဟုကို+ သွားရှာပါ။ တွေ့ရင် သူ့ညီအစ်ကိုတွေထဲကနေ ခေါ်ထုတ်ပြီး အတွင်းခန်းထဲ ခေါ်သွားပါ။ ၃ ဆီဘူးကို ယူ၊ သူ့ခေါင်းပေါ် လောင်းပြီး ‘“မင်းကို အစ္စရေးဘုရင်အဖြစ် ဘိသိက်ပေးလိုက်ပြီ”+ လို့ ယေဟောဝါဘုရားပြောတယ်’ ဆိုပြီးပြောပါ။ ပြီးရင် တံခါးဖွင့်ပြီး ပြေးပေတော့” လို့မှာတယ်။
၄ ဒါနဲ့ ပရောဖက်ဧလိရှဲရဲ့ နောက်လိုက်လည်း ရာမုတ်ဂိလဒ်မြို့ကို သွားတယ်။ ၅ သူရောက်သွားတော့ အဲဒီမှာ ဗိုလ်ချုပ်တွေ ထိုင်နေတယ်။ သူက “ဗိုလ်ချုပ်၊ ပြောစရာရှိပါတယ်” ဆိုတော့ ယေဟုက “ဘယ်ဗိုလ်ချုပ်ကိုလဲ” လို့မေးတယ်။ “ခင်ဗျားကိုပဲ” လို့ပြန်ဖြေတဲ့အခါ၊ ၆ ယေဟုလည်း ထပြီး အိမ်ထဲဝင်သွားတယ်။ သူက ယေဟုရဲ့ခေါင်းပေါ် ဆီလောင်းပြီး “အစ္စရေးတို့ရဲ့ဘုရား ယေဟောဝါပြောတာက ‘မင်းကို ယေဟောဝါဘုရားရဲ့ လူမျိုး အစ္စရေးတွေရဲ့ ဘုရင်အဖြစ် ဘိသိက်ပေးလိုက်ပြီ။+ ၇ မင်းရဲ့သခင် အာဟပ်ရဲ့အမျိုးကို ပယ်ရှင်းရမယ်။ ယေဇဗေလလက်ချက်နဲ့ သေသွားတဲ့ ငါ့ပရောဖက်တွေနဲ့ ယေဟောဝါရဲ့ ကျွန်အားလုံးရဲ့ သွေးအတွက် လက်စားချေမယ်။+ ၈ အာဟပ်အမျိုး တစ်မျိုးလုံး ပျက်စီးရမယ်။ အစ္စရေးပြည်မှာရှိတဲ့ ခိုကိုးရာမဲ့သူနဲ့ နိမ့်ကျသူအပါအဝင် အာဟပ်အမျိုးထဲက ယောက်ျားမှန်သမျှ ငါပယ်ရှင်းမယ်။+ ၉ အာဟပ်ရဲ့အမျိုးကို နေဗတ်သား ယေရောဗောင်ရဲ့အမျိုးလို၊+ အဟိယသား ဗာရှာရဲ့အမျိုးလို+ ဖြစ်စေမယ်။ ၁၀ ယေဇဗေလကိုတော့ ယေဇရေလမြို့ကမြေကွက်မှာ ခွေးတွေ စားလိမ့်မယ်။+ သင်္ဂြိုဟ်တဲ့သူရှိမှာ မဟုတ်ဘူး’” လို့ပြောပြီးတာနဲ့ တံခါးဖွင့်ပြီး ထွက်ပြေးသွားတယ်။+
၁၁ ယေဟုက တခြားဗိုလ်ချုပ်တွေဆီ ပြန်လာတော့ “အခြေအနေ ကောင်းရဲ့လား။ ဒီအရူးက ခင်ဗျားဆီ ဘာလာလုပ်တာလဲ” လို့ ဝိုင်းမေးကြတယ်။ ဒါနဲ့ ယေဟုက “အရူးဆိုတော့ ပေါက်ကရတွေ ပြောမှာပေါ့” လို့ပြန်ဖြေတယ်။ ၁၂ ဒါပေမဲ့ သူတို့က “မဟုတ်သေးပါဘူး။ အမှန်အတိုင်း ပြောစမ်းပါ” ဆိုတော့ ယေဟုက “ငါ့ကို ဒါတွေ ပြောသွားတာပဲ။ ပြီးတော့ ပြောသေးတယ်– ‘ယေဟောဝါဘုရားက “မင်းကို အစ္စရေးဘုရင်အဖြစ် ငါဘိသိက်ပေးလိုက်ပြီ”+ တဲ့။’” ၁၃ သူတို့လည်း ချက်ချင်းပဲ ကိုယ့်အဝတ်ကိုယ်ယူပြီး ယေဟုနင်းမယ့် လှေကားထစ်တွေပေါ် ခင်းပေးကြတယ်။+ တံပိုးမှုတ်ပြီး “ယေဟု ဘုရင်ဖြစ်ပြီ”+ လို့ကြွေးကြော်ကြတယ်။ ၁၄ ဒီလိုနဲ့ နိမ်ရှိရဲ့မြေး၊ ယောရှဖတ်ရဲ့သား ယေဟုက+ ယောရံမင်းကို ပုန်ကန်ဖို့ လျှို့ဝှက်ကြံစည်တယ်။
ယောရံက အစ္စရေးတွေနဲ့အတူ ဆီးရီးယားဘုရင် ဟာဇေလကိုတိုက်ဖို့+ ရာမုတ်ဂိလဒ်မြို့ကို+ စောင့်ကြပ်တယ်။ ၁၅ နောက်တော့ ဆီးရီးယားဘုရင် ဟာဇေလနဲ့+ တိုက်ခိုက်ချိန်မှာ ဆီးရီးယားတွေကြောင့်ရတဲ့ ဒဏ်ရာကို ကုဖို့ ယေဇရေလမြို့ကို ပြန်သွားတယ်။+
ယေဟုကလည်း “ခင်ဗျားတို့သဘောတူရင် ယေဇရေလမြို့ကို ဒီသတင်းမပို့နိုင်အောင် ရာမုတ်ဂိလဒ်မြို့ထဲကနေ ဘယ်သူကိုမှ မထွက်စေနဲ့” လို့ပြောတယ်။ ၁၆ ပြီးတော့ ယေဟုက ဒဏ်ရာရထားတဲ့ ယောရံရှိရာ ယေဇရေလမြို့ဆီ မြင်းရထားစီးပြီး သွားတယ်။ ယုဒဘုရင် အာခဇိလည်း ယောရံကို ကြည့်ဖို့ ဆင်းသွားတယ်။ ၁၇ ယေဇရေလမြို့ မျှော်စင်ပေါ်မှာ ရပ်နေတဲ့ ကင်းစောင့်က ယေဟုနဲ့ သူ့လူတွေလာနေတာကို တွေ့တဲ့အခါ “လူတစ်အုပ် လာနေတယ်” လို့အော်ပြောတယ်။ ယောရံကလည်း “မြင်းစီးသူရဲတစ်ယောက်ကို လွှတ်ပြီး ‘ကောင်းသောလာခြင်းလား’ လို့မေးခိုင်းပါ” ဆိုပြီး အမိန့်ပေးတယ်။ ၁၈ မြင်းစီးသူရဲက ယေဟုဆီ လာပြီး “‘ကောင်းသောလာခြင်းလား’ လို့ ဘုရင်မေးခိုင်းတယ်” ဆိုပြီးပြောတော့ ယေဟုက “ကောင်းသောလာခြင်း ဟုတ်မဟုတ် မင်းနဲ့ မဆိုင်ဘူး။ ငါ့နောက်ကနေ လိုက်ခဲ့” လို့ပြောတယ်။
အဲဒီအခါ ကင်းစောင့်က “သူတို့ဆီ တမန်ရောက်သွားပေမဲ့ ပြန်မလာဘူး” ဆိုပြီးသတင်းပို့တယ်။ ၁၉ ဒါနဲ့ ဒုတိယမြင်းစီးသူရဲကို လွှတ်လိုက်တယ်။ သူက “ကောင်းသောလာခြင်းလား’ လို့ ဘုရင်မေးခိုင်းတယ်” ဆိုပြီးပြောတော့ ယေဟုက “ကောင်းသောလာခြင်း ဟုတ်မဟုတ် မင်းနဲ့ မဆိုင်ဘူး။ ငါ့နောက်ကနေ လိုက်ခဲ့” လို့ပြောတယ်။
၂၀ အဲဒီအခါ ကင်းစောင့်က “သူတို့ဆီ တမန်ရောက်သွားပေမဲ့ ပြန်မလာဘူး။ ရှေ့ဆုံးက မြင်းရထား ခပ်ကြမ်းကြမ်း မောင်းလာပုံကိုကြည့်ရင် နိမ်ရှိရဲ့မြေး ယေဟုပဲဖြစ်မယ်” ဆိုပြီးသတင်းပို့တယ်။ ၂၁ ဒါနဲ့ ယောရံက “မြင်းရထားကို အသင့်ပြင်ကြ” လို့ပြောတယ်။ စစ်မြင်းရထားကို အသင့်ပြင်ပေးတဲ့အခါ အစ္စရေးဘုရင် ယောရံနဲ့ ယုဒဘုရင်အာခဇိတို့ဟာ+ မြင်းရထားကိုယ်စီ စီးပြီး ယေဟုနဲ့တွေ့ဖို့ ထွက်လာတယ်။ ယေဇရေလမြို့သား နာဗုတ်ရဲ့မြေကွက်မှာ ဆုံကြတယ်။+
၂၂ ယောရံမင်းက ယေဟုကို တွေ့တာနဲ့ “ကောင်းသောလာခြင်းလား” လို့မေးတယ်။ ဒါပေမဲ့ ယေဟုက “မင်းကြီးရဲ့မယ်တော် ယေဇဗေလ ပြည့်တန်ဆာလုပ်နေသရွေ့၊+ ပယောဂအတတ် လိုက်စားနေသရွေ့+ ဘယ်လိုလုပ် ကောင်းသောလာခြင်း ဖြစ်နိုင်မှာလဲ” လို့ဖြေတယ်။ ၂၃ ဒါနဲ့ ယောရံက “ငါတို့ လှည့်စားခံလိုက်ရပြီ” လို့အာခဇိကိုပြောရင်း မြင်းရထားကို လှည့်ပြီး ပြေးဖို့ ပြင်တယ်။ ၂၄ အဲဒီအခါ ယေဟုက လေးတင်ပြီး ယောရံရဲ့ နောက်ကျောတည့်တည့်ကို ပစ်လိုက်တဲ့အခါ မြားက နှလုံးကို ထုတ်ချင်းခွင်းလိုက်တဲ့အတွက် မြင်းရထားပေါ်မှာ လဲကျသွားတယ်။ ၂၅ ဒါနဲ့ ယေဟုက တပ်မှူးဗိဒကကို “သူ့ကို မပြီး ယေဇရေလမြို့သား နာဗုတ်ရဲ့မြေကွက်မှာ ပစ်ထားလိုက်။+ သူ့ဖခင်အာဟပ်နောက်မှာ ငါတို့ မြင်းရထားအတူစီးတုန်းက သူနဲ့ပတ်သက်ပြီး ယေဟောဝါဘုရား ကိုယ်တိုင် ဒီလိုစီရင်ချက်ချခဲ့တာကို+ မှတ်မိတယ်မဟုတ်လား။ ၂၆ ‘ယေဟောဝါဘုရားပြောတာက “နာဗုတ်တို့သားအဖတွေ ဘယ်လိုအသတ်ခံခဲ့ရတယ်ဆိုတာ မနေ့က ငါကိုယ်တိုင် မြင်တယ်။+ ဒါကြောင့် ဒီမြေကွက်မှာပဲ မင်းကို ငါလက်စားချေမယ်၊”+ ဒါဟာ ယေဟောဝါဘုရားရဲ့ အမိန့်ပဲ။’ အခု သူ့ကို မပြီး ယေဟောဝါရဲ့ အမိန့်အတိုင်း ဒီမြေကွက်မှာ ပစ်ထားလိုက်”+ လို့ပြောတယ်။
၂၇ ဒီအဖြစ်အပျက်ကို တွေ့တဲ့အခါ ယုဒဘုရင်အာခဇိက+ ဥယျာဉ်ဂေဟာလမ်းအတိုင်း ထွက်ပြေးတယ်။ (ယေဟုက သူ့နောက်က လိုက်ရင်း “သူ့ကိုလည်း သတ်ကြ” လို့အမိန့်ပေးတယ်။ ဒါကြောင့် အိဗလံမြို့အနား၊+ ဂုရအရပ်ဘက် အတက်လမ်း မြင်းရထားပေါ်မှာ အာခဇိမင်းကို လုပ်ကြံတယ်။ ဒါပေမဲ့ အာခဇိက မေဂိဒေါမြို့အထိ ဆက်ပြေးပြီး အဲဒီမှာ သေဆုံးသွားတယ်။ ၂၈ အဲဒီနောက် မင်းမှုထမ်းတွေက သူ့ကို မြင်းရထားပေါ်တင်ပြီး ဂျေရုဆလင်မြို့ကို သယ်သွားကြတယ်။ ပြီးတော့ ဒါဝိဒ်မြို့မှာရှိတဲ့+ သူ့ရဲ့သင်္ချိုင်းဂူမှာ ဘိုးဘေးတွေနဲ့အတူ သင်္ဂြိုဟ်လိုက်တယ်။ ၂၉ အာဟပ်သား ယောရံနန်းစံ ၁၁ နှစ်မှာ အာခဇိက+ ယုဒပြည်မှာ နန်းတက်တယ်။)
၃၀ ယေဇရေလမြို့ကို+ ယေဟုရောက်လာတဲ့သတင်း ကြားတော့ ယေဇဗေလက+ မျက်လုံးကို အနက်ရောင်ခြယ်၊ ဆံပင်ကို ထုံးဖွဲ့ပြီးနောက် ပြတင်းပေါက်ကနေ ငုံ့ကြည့်တယ်။ ၃၁ မြို့တံခါးကနေ ယေဟုဝင်လာတဲ့အခါ ယေဇဗေလက “ကိုယ့်သခင်ကိုသတ်တဲ့ ဇိမရိတစ်ယောက် ကောင်းစားခဲ့လို့လား”+ ဆိုပြီးမေးတယ်။ ၃၂ ယေဟုက ပြတင်းပေါက်ကို မော့ကြည့်ပြီး “ငါ့ဘက်မှာ ဘယ်သူရပ်တည်မလဲ”+ လို့မေးတဲ့အခါ နန်းတွင်းအရာရှိနှစ်ယောက် သုံးယောက် ချက်ချင်းငုံ့ကြည့်တယ်။ ၃၃ ယေဟုက “သူ့ကို တွန်းချလိုက်” လို့ပြောတော့ သူတို့ တွန်းချလိုက်တဲ့အခါ နံရံကိုရော မြင်းတွေကိုပါ သွေးတွေစဉ်သွားတယ်။ ယေဟုလည်း ယေဇဗေလရဲ့ အလောင်းပေါ် မြင်းရထားကို ဖြတ်မောင်းသွားတယ်။ ၃၄ အဲဒီနောက် ယေဟုဝင်လာပြီး စားသောက်တယ်။ “ကျိန်စာသင့်တဲ့ ဒီမိန်းမကို သင်္ဂြိုဟ်ပေးလိုက်ပါ။ ဘာပဲဖြစ်ဖြစ် သူဟာ ဘုရင့်သမီးတော်ပဲ”+ လို့ပြောတယ်။ ၃၅ ဒါပေမဲ့ သူ့ကို သင်္ဂြိုဟ်ဖို့သွားတဲ့အခါ ဦးခေါင်းခွံ၊ ခြေထောက်နဲ့ လက်ဖဝါးတွေကလွဲလို့ ဘာမှမတွေ့ဘူး။+ ၃၆ သူတို့ပြန်လာပြီး ပြောပြတဲ့အခါ ယေဟုက “ကျွန်ဖြစ်သူ တိရှဘိရွာသား ဧလိယကတစ်ဆင့် ယေဟောဝါဘုရား ပြောခဲ့တဲ့အတိုင်း ဖြစ်လာပြီ။+ ‘ယေဇရေလမြို့က မြေကွက်မှာ ယေဇဗေလကို ခွေးတွေစားလိမ့်မယ်။+ ၃၇ “ဒါဟာ ယေဇဗေလပဲ” လို့ ဘယ်သူမှမပြောနိုင်အောင် ယေဇဗေလရဲ့ အလောင်းဟာ ယေဇရေလမြို့က မြေကွက်မှာ နောက်ချေးပုံလို ဖြစ်ရလိမ့်မယ်’ လို့ ပြောထားတယ်” ဆိုပြီးပြောတယ်။