၂ ဘုရင်များ

၁၃ ယုဒဘုရင်  အာခဇိရဲ့သား+ ယောရှ+ နန်းစံ ၂၃ နှစ်မှာ ယေဟုရဲ့သား ယောခတ်က+ အစ္စရေးပြည်မှာ နန်းတက်လာပြီး ရှမာရိမြို့မှာ ၁၇ နှစ် စိုးစံတယ်။ ၂ ယောခတ်က ယေဟောဝါရှေ့မှာ မကောင်းတာကို ဆက်လုပ်တယ်။ အစ္စရေးတွေကို အပြစ်ကျူးလွန်စေတဲ့ နေဗတ်သား  ယေရောဗောင်ရဲ့လမ်းစဉ်ကို မစွန့်ဘဲ လိုက်မြဲလိုက်တယ်။+ ၃ ဒါကြောင့်  ယေဟောဝါက အစ္စရေးတွေကို အမျက်ထွက်ပြီး+ ဆီးရီးယားဘုရင် ဟာဇေလနဲ့+ သားတော်ဗင်ဟာဒဒ်လက်ထဲ+ အကြိမ်ကြိမ် အရေးနိမ့်စေတယ်။

၄ နောက်ပိုင်းမှာ ယောခတ်က ယေဟောဝါရဲ့ မျက်နှာသာရဖို့ အသနားခံတယ်။ ယေဟောဝါကလည်း ဆီးရီးယားဘုရင်ရဲ့ ဖိနှိပ်မှုကြောင့် အစ္စရေးတွေ ဒုက္ခရောက်နေတာကို မြင်တဲ့အတွက် သူအသနားခံတာကို နားထောင်ပေးတယ်။+ ၅ အဲဒီအခါ ယေဟောဝါက ဆီးရီးယားရဲ့  လက်အောက်ကနေ အစ္စရေးတွေလွတ်မြောက်ဖို့ ကယ်တင်မယ့်သူတစ်ယောက်  ပေါ်ထွန်းစေတယ်။+ ဒါကြောင့် အစ္စရေးတွေဟာ အရင်လိုပဲ ကိုယ့်အိမ်ကိုယ့်ရာမှာ နေထိုင်နိုင်ကြတယ်။ ၆ (ဒါပေမဲ့ အစ္စရေးတွေက သူတို့ကိုအပြစ်ကျူးလွန်စေတဲ့ ယေရောဗောင်အမျိုးရဲ့ လမ်းစဉ်ကို မစွန့်ဘဲ ဆက်လိုက်ကြတယ်။+ ရှမာရိမြို့မှာလည်း ကိုးကွယ်ရာသစ်တိုင်*+ ရှိနေတုန်းပဲ။) ၇ ဆီးရီးယားဘုရင်က အစ္စရေးတပ်ကို ဖျက်ဆီးပြီး+ ကောက်နယ်တလင်းက မြေမှုန့်လို နင်းချေပစ်တဲ့အတွက်+  ယောခတ်မင်းဆီမှာ မြင်းစီးသူရဲ ၅၀၊ မြင်းရထား ၁၀ စီး၊ ခြေလျင်စစ်သည် ၁၀,၀၀၀ ပဲ ကျန်တော့တယ်။

၈ ယောခတ်ရဲ့  ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေကို  အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၉ နောက်ပိုင်းမှာ ယောခတ်မင်း  ကွယ်လွန်သွားတဲ့အတွက် ရှမာရိမြို့မှာ  သင်္ဂြိုဟ်လိုက်တယ်။+ သားတော်ယဟောရှက ထီးနန်းဆက်ခံတယ်။

၁၀ ယုဒဘုရင် ယောရှနန်းစံ ၃၇နှစ်မှာ ယောခတ်ရဲ့သား ယဟောရှက+ အစ္စရေးပြည်မှာ နန်းတက်လာပြီး ရှမာရိမြို့မှာ ၁၆ နှစ် စိုးစံတယ်။ ၁၁ ယဟောရှက  ယေဟောဝါရှေ့မှာ  မကောင်းတာကို ဆက်လုပ်တယ်။ အစ္စရေးတွေကို ကျူးလွန်စေတဲ့ နေဗတ်သား ယေရောဗောင်ရဲ့အပြစ်တွေကို  တစ်ခုမကျန် လိုက်လုပ်တယ်။+ အဲဒီလမ်းစဉ်အတိုင်း ဆက်လိုက်တယ်။

၁၂ ယဟောရှမင်းရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေ၊ ယုဒဘုရင် အာမဇိနဲ့ စစ်ဆင်နွှဲပုံတွေကို+ အစ္စရေးဘုရင်တွေရဲ့  ရာဇဝင်မှတ်တမ်းမှာ ရေးထားတယ်။ ၁၃ နောက်ပိုင်းမှာ  ယဟောရှ  ကွယ်လွန်သွားတဲ့အတွက် ယေရောဗောင်က+  ထီးနန်းဆက်ခံတယ်။ ယဟောရှကို ရှမာရိမြို့မှာ အစ္စရေးဘုရင်တွေနဲ့အတူ  သင်္ဂြိုဟ်လိုက်တယ်။+

၁၄ ဧလိရှဲ+ နာမကျန်းဖြစ်ပြီး သေဆုံးခါနီးမှာ အစ္စရေးဘုရင် ယဟောရှ ရောက်လာတယ်။  ဧလိရှဲကိုဖက်ပြီး “အဘ၊ အဘ၊ အစ္စရေးမြင်းရထားပါလား။  အစ္စရေးမြင်းစီးသူရဲတွေပါလား”+ လို့ပြောရင်း ငိုတယ်။ ၁၅ ဒါနဲ့ ဧလိရှဲက  “လေးနဲ့မြားတွေယူလိုက်” လို့ပြောတော့ ယဟောရှလည်း လေးနဲ့မြားကို ယူတယ်။ ၁၆ “လေးကို တင်လိုက်” လို့ ပြောတော့ အစ္စရေးဘုရင် လေးတင်တဲ့အခါ ဧလိရှဲက သူ့လက်ကို ဘုရင့်လက်တွေပေါ်  တင်လိုက်တယ်။ ၁၇ ပြီးတော့ “အရှေ့ပြတင်းပေါက်ကို ဖွင့်” လို့ပြောတော့ ဘုရင်က ဖွင့်တယ်။ ဧလိရှဲက “မြားကို ပစ်” ဆိုတော့ သူပစ်တယ်။ အဲဒီအခါ ဧလိရှဲက “ယေဟောဝါဘုရားရဲ့ အောင်ပွဲခံမြား၊ ဆီးရီးယားကိုအောင်ပွဲခံမယ့် မြားပဲ။ အာဖက်မြို့မှာ+ ဆီးရီးယားတွေကို မင်းကြီး အပြီးသတ် ချေမှုန်းရလိမ့်မယ်” လို့ပြောတယ်။

၁၈ ဧလိရှဲက “မြားတွေကို ယူလိုက်ဦး” လို့ပြောတဲ့အခါ အစ္စရေးဘုရင် ယဟောရှက ယူတယ်။ အဲဒီနောက် “အဲဒီမြားနဲ့ မြေကြီးကိုရိုက်ပါ” လို့ ပြောတော့ သုံးကြိမ်ရိုက်ပြီး ရပ်လိုက်တယ်။ ၁၉ ဒါနဲ့ စစ်မှန်တဲ့ဘုရားသခင်ရဲ့လူက စိတ်ဆိုးပြီး  “ငါးကြိမ်၊ ခြောက်ကြိမ်လောက် ရိုက်ရမှာ။ ဒါဆိုရင် ဆီးရီးယားတွေကို အပြီးသတ် ချေမှုန်းနိုင်မယ်။ အခုတော့ မင်းကြီးဟာ ဆီးရီးယားတွေကို သုံးကြိမ်ပဲ ချေမှုန်းနိုင်လိမ့်မယ်”+ လို့ပြောတယ်။

၂၀ အဲဒီနောက် ဧလိရှဲ ကွယ်လွန်သွားတဲ့အတွက် သင်္ဂြိုဟ်လိုက်တယ်။ နှစ်ဆန်းပိုင်းမှာ မောဘလူမျိုး တိုက်ခိုက်လုယက်တဲ့ အဖွဲ့တွေဟာ+ တိုင်းပြည်ထဲ ဝင်လာတယ်။ ၂၁ အစ္စရေးတွေက လူတစ်ယောက်ကို သင်္ဂြိုဟ်နေတုန်း အဲဒီအဖွဲ့ကိုတွေ့တာနဲ့ အလောင်းကို ဧလိရှဲရဲ့သင်္ချိုင်းတွင်းထဲ ပစ်ချပြီး ထွက်ပြေးသွားကြတယ်။+  အဲဒီအလောင်းက ဧလိရှဲရဲ့အရိုးတွေနဲ့လည်း ထိရော အသက်ပြန်ရှင်ပြီး ထလာတယ်။

၂၂ ဆီးရီးယားဘုရင် ဟာဇေလကတော့+ ယောခတ်လက်ထက် တစ်လျှောက်လုံး  အစ္စရေးတွေကို  ဖိနှိပ်တယ်။+ ၂၃ ဒါပေမဲ့ ယေဟောဝါက အာဗြဟံ၊+ အိဇက်၊+ ယာကုပ်နဲ့ဖွဲ့ခဲ့တဲ့+ ပဋိညာဉ်ကိုထောက်ပြီး အစ္စရေးတွေကို မျက်နှာသာပေးတယ်။ ကရုဏာပြပြီး ဂရုစိုက်တယ်။+ ဘုရားက သူတို့ကို မဖျက်ဆီးချင်တဲ့အတွက် အခုချိန်ထိ ရှေ့တော်ကနေ မစွန့်ပစ်ဘူး။ ၂၄ နောက်ပိုင်းမှာ ဆီးရီးယားဘုရင် ဟာဇေလ ကွယ်လွန်သွားတဲ့အတွက် သားတော်ဗင်ဟာဒဒ်က ထီးနန်းဆက်ခံတယ်။ ၂၅ အဲဒီအခါ ယောခတ်ရဲ့သား ယဟောရှက ခမည်းတော် ယောခတ်ဆီကနေ ဟာဇေလ သိမ်းယူခဲ့တဲ့မြို့တွေကို ဟာဇေလရဲ့သား ဗင်ဟာဒဒ်ဆီကနေ ပြန်သိမ်းယူတယ်။ ယဟောရှက ဗင်ဟာဒဒ်ကို သုံးကြိမ်ချေမှုန်းနိုင်ခဲ့ပြီး+ အစ္စရေးမြို့တွေကို ပြန်သိမ်းယူတယ်။