၂ ဘုရင်များ
၁၄ အစ္စရေးဘုရင် ယောခတ်ရဲ့သား ယဟောရှမင်း နန်းစံ ဒုတိယနှစ်မှာ+ ယုဒဘုရင် ယောရှရဲ့သား အာမဇိ နန်းတက်လာတယ်။ ၂ အာမဇိ နန်းတက်ချိန်မှာ အသက် ၂၅ နှစ်ရှိပြီ။ ဂျေရုဆလင်မြို့မှာ ၂၉ နှစ် စိုးစံတယ်။ မယ်တော်က ဂျေရုဆလင်မြို့သူ ယုဒ္ဒင်လို့ခေါ်တယ်။+ ၃ အာမဇိမင်းက ယေဟောဝါရှေ့မှာ မှန်ရာကို ဆက်လုပ်ပေမဲ့ ဘိုးဘေးဒါဝိဒ်လိုတော့ မလုပ်နိုင်ခဲ့ဘူး။+ ခမည်းတော်ယောရှ လုပ်ခဲ့သမျှအတိုင်း လုပ်တယ်။+ ၄ အထွတ်အမြတ်နေရာတွေ ရှိနေဆဲဖြစ်လို့+ လူတွေက အဲဒီမှာ ယဇ်တွေဆက်သပြီး မီးရှို့ပူဇော်နေကြတုန်းပဲ။+ ၅ နိုင်ငံတော်အာဏာ တည်မြဲလာတာနဲ့ ခမည်းတော်မင်းကြီးကို လုပ်ကြံခဲ့တဲ့ အမှုထမ်းတွေကို ကွပ်မျက်လိုက်တယ်။+ ၆ ဒါပေမဲ့ “သားသမီးရဲ့ အပြစ်ကြောင့် ဖခင်ကို သေဒဏ်မပေးရဘူး။ ဖခင်ရဲ့ အပြစ်ကြောင့် သားသမီးကို သေဒဏ်မပေးရဘူး။ လူတိုင်း ကိုယ့်အပြစ်ကြောင့်ပဲ သေဒဏ်ခံရမယ်” ဆိုပြီး မောရှေပညတ်ကျမ်းမှာ ရေးထားတဲ့ ယေဟောဝါရဲ့ မိန့်မှာချက်နဲ့အညီ လုပ်ကြံသူတွေရဲ့ သားသမီးတွေကိုတော့ မသတ်ဘူး။+ ၇ အာမဇိက ဆားချိုင့်ဝှမ်းမှာ+ ဧဒုံလူ+ ၁၀,၀၀၀ ကို နှိမ်နင်းပြီး သေလအရပ်ကို တိုက်ခိုက်သိမ်းပိုက်လိုက်တယ်။+ အဲဒီအရပ်ကို ယုသေလလို့ ဒီနေ့အထိ ခေါ်တွင်နေတုန်းပဲ။
၈ အဲဒီနောက် အာမဇိက အစ္စရေးဘုရင် ယေဟုရဲ့မြေး၊ ယောခတ်ရဲ့သား ယဟောရှဆီ တမန်တွေလွှတ်ပြီး “လာပါ။ ငါတို့ တိုက်ကြစို့” လို့ မှာလိုက်တယ်။+ ၉ ဒါနဲ့ အစ္စရေးဘုရင် ယဟောရှက ယုဒဘုရင် အာမဇိကို “လက်ဘနွန်က ဆူးပင်ဟာ လက်ဘနွန်က သစ်ကတိုးပင်ကို ‘မင်းရဲ့သမီးကို ငါ့သားနဲ့ ပေးစားပါ’ လို့ ကမ်းလှမ်းတယ်။ ဒါပေမဲ့ လက်ဘနွန်သားရဲတစ်ကောင် ဖြတ်လာတဲ့အခါ ဆူးပင် နင်းချေခံလိုက်ရတယ်။ ၁၀ မင်းကြီးက ဧဒုံပြည်ကို အနိုင်ရခဲ့လို့+ ဘဝင်မြင့်နေတာပဲ။ ကိုယ့်ကိုယ်ကိုယ်ဂုဏ်ယူပြီး ကိုယ့်နန်းတော်မှာပဲ နေစမ်းပါ။ ယုဒပြည်ကိုပါ ဒုက္ခရောက်ပြီး အရေးနိမ့်သွားအောင် ဘာလို့လုပ်ချင်ရတာလဲ” ဆိုပြီး အကြောင်းပြန်လိုက်တယ်။ ၁၁ ဒါပေမဲ့ အာမဇိ နားမထောင်ဘူး။+
ဒါနဲ့ အစ္စရေးဘုရင် ယဟောရှလည်း ချီတက်လာပြီး ယုဒပြည်၊ ဗက်ရှေမက်မြို့မှာ+ ယုဒဘုရင်အာမဇိနဲ့ တိုက်ခိုက်တော့တယ်။+ ၁၂ အစ္စရေးတွေ အနိုင်ရသွားတဲ့အတွက် ယုဒလူတွေ ကိုယ့်အိမ်ကိုယ့်ရာဆီ ထွက်ပြေးကြတယ်။ ၁၃ အစ္စရေးဘုရင် ယဟောရှက အာခဇိရဲ့မြေး၊ ယောရှရဲ့သား ယုဒဘုရင် အာမဇိကို ဗက်ရှေမက်မြို့မှာ ဖမ်းဆီးလိုက်ပြီးနောက် ဂျေရုဆလင်မြို့ကို ခေါ်သွားတယ်။ ယဟောရှက ဂျေရုဆလင်မြို့ရိုးကို ဧဖရိမ်တံခါးကနေ+ မြို့ထောင့်တံခါးအထိ+ အတောင် ၄၀၀* ဖြိုချလိုက်တယ်။ ၁၄ ယေဟောဝါရဲ့ အိမ်တော်နဲ့ နန်းတော်ဘဏ္ဍာတိုက်ထဲမှာ တွေ့သမျှ ရွှေငွေ၊ ပစ္စည်းဥစ္စာတွေကို သိမ်းသွားတဲ့အပြင် ဓားစာခံတွေကိုလည်း ဖမ်းခေါ်ပြီး ရှမာရိမြို့ကို ပြန်သွားတယ်။
၁၅ ယဟောရှမင်းရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေ၊ ယုဒဘုရင်အာမဇိနဲ့ စစ်ဆင်နွှဲပုံတွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၁၆ နောက်ပိုင်းမှာ ယဟောရှ ကွယ်လွန်သွားတဲ့အတွက် အစ္စရေးဘုရင်တွေနဲ့အတူ ရှမာရိမြို့မှာ သင်္ဂြိုဟ်လိုက်တယ်။+ သားတော် ယေရောဗောင်က*+ ထီးနန်းဆက်ခံတယ်။
၁၇ ယုဒဘုရင် ယောရှရဲ့သား အာမဇိမင်းက+ အစ္စရေးဘုရင် ယောခတ်ရဲ့သား ယဟောရှ+ ကွယ်လွန်ပြီးနောက် ၁၅ နှစ်အထိ အသက်ရှင်သေးတယ်။+ ၁၈ အာမဇိရဲ့ ကျန်တဲ့သမိုင်းကြောင်းတွေကို ယုဒဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၁၉ နောက်ပိုင်းမှာ အာမဇိကို လုပ်ကြံဖို့ ဂျေရုဆလင်မြို့မှာ လျှို့ဝှက်ကြံစည်ကြတယ်။+ လာခိရှမြို့ကို အာမဇိ ထွက်ပြေးသွားပေမဲ့ အဲဒီကို လူလွှတ်ပြီး လုပ်ကြံကြတယ်။ ၂၀ သူ့အလောင်းကို ဂျေရုဆလင်မြို့ဆီ မြင်းရထားနဲ့ သယ်လာပြီး ဒါဝိဒ်မြို့မှာ ဘိုးဘေးတွေနဲ့အတူ သင်္ဂြိုဟ်လိုက်တယ်။+ ၂၁ အဲဒီနောက် ယုဒလူတွေက အသက် ၁၆ နှစ်အရွယ်+ အာဇရိကို*+ ခမည်းတော် အာမဇိနေရာမှာ မင်းမြှောက်လိုက်တယ်။+ ၂၂ ခမည်းတော်အာမဇိ ကွယ်လွန်သွားပြီးနောက် အာဇရိက ဧလတ်မြို့ကို ပြန်တည်ဆောက်ပြီး+ ယုဒပြည်ထဲ ပြန်သိမ်းလိုက်တယ်။+
၂၃ ယုဒဘုရင် ယောရှရဲ့သား အာမဇိမင်း နန်းစံ ၁၅ နှစ်မှာ အစ္စရေးဘုရင် ယဟောရှရဲ့သား ယေရောဗောင်+ နန်းတက်လာပြီး ရှမာရှိမြို့မှာ ၄၁ နှစ် စိုးစံတယ်။ ၂၄ ယေဟောဝါရှေ့မှာ မကောင်းတာကို သူ ဆက်လုပ်တယ်။ အစ္စရေးတွေကို အပြစ်ကျူးလွန်စေတဲ့ နေဗတ်သား ယေရောဗောင်ရဲ့ လမ်းစဉ်အတိုင်း လိုက်တယ်။+ ၂၅ အစ္စရေးတို့ရဲ့ဘုရား ယေဟောဝါက ဂါသေဖာမြို့မှာနေတဲ့+ အမိတ္တဲရဲ့သား၊ မိမိရဲ့ကျွန် ပရောဖက်ယောနကတစ်ဆင့်+ ပြောခဲ့တဲ့အတိုင်း ဟာမတ်လမ်းဝကနေ+ အရာဗာအိုင်အထိ+ အစ္စရေးနယ်မြေ တစ်လျှောက်လုံးကို ယေရောဗောင်မင်း ပြန်သိမ်းယူခဲ့တယ်။ ၂၆ အစ္စရေးတွေ အကြီးအကျယ် ဒုက္ခရောက်နေတာကို ယေဟောဝါမြင်တယ်။+ အစ္စရေးတွေကို ကူညီပေးနိုင်မယ့်သူ မရှိဘူး။ ခိုကိုးရာမဲ့သူနဲ့ နိမ့်ကျသူတွေတောင် မကျန်တော့ဘူး။ ၂၇ ယေဟောဝါက အစ္စရေးရဲ့နာမည်ကို မြေပြင်ပေါ်ကနေ မပယ်ဖျက်ဘူးလို့ ကတိပေးထားတဲ့အတွက်+ ယဟောရှရဲ့သား ယေရောဗောင်ကတစ်ဆင့် သူတို့ကို ကယ်တင်ခဲ့တယ်။+
၂၈ ယေရောဗောင်မင်းရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေ၊ ဒမတ်စကတ်မြို့နဲ့+ ဟာမတ်မြို့ကို+ စစ်ဆင်နွှဲပြီး ယုဒနဲ့အစ္စရေးပိုင်နက်ထဲ ပြန်သိမ်းယူပုံတွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။ ၂၉ နောက်ပိုင်းမှာ ယေရောဗောင် ကွယ်လွန်သွားတယ်။ သားတော်ဇာခရိက+ ထီးနန်းဆက်ခံတယ်။