ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇန်နဝါရီ ၆-၁၂
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၁-၂
“ကမ္ဘာပေါ်က သက်ရှိတွေကို ယေဟောဝါ ဖန်ဆင်း”
(ကမ္ဘာဦး ၁:၃၊ ၄) ဘုရားသခင်က “အလင်း ဖြစ်စေ” လို့ ပြောတဲ့အခါ အလင်း ဖြစ်လာတယ်။ ၄ အဲဒီအလင်း ကောင်းတယ်ဆိုတာကို မြင်ပြီးနောက် အလင်းနဲ့ အမှောင်ကို ဘုရားသခင် ခွဲခြားလိုက်တယ်။
(ကမ္ဘာဦး ၁:၆) ဘုရားသခင်က “ရေထုကြားမှာ ဟင်းလင်းပြင်ကြီး ဖြစ်ပေါ်ပြီး ရေထုနှစ်ခုကို ခြားထားစေ” လို့ ပြောတယ်။
(ကမ္ဘာဦး ၁:၉) ဘုရားသခင်က “မိုးကောင်းကင်အောက်က ရေတွေအားလုံး တစ်နေရာမှာ စုဝေးစေ၊ ကုန်းမြေ ပေါ်စေ” လို့ ပြောတဲ့အခါ အဲဒီအတိုင်း ဖြစ်လာတယ်။
(ကမ္ဘာဦး ၁:၁၁) “မြေပေါ်မှာ မြက်ပင်တွေ၊ မျိုးစေ့ပါတဲ့ အပင်တွေ၊ မျိုးစေ့ပါတဲ့ သီးပင်တွေ အမျိုးအလိုက် ပေါက်စေ” လို့ ပြောတဲ့အခါ အဲဒီအတိုင်း ဖြစ်လာတယ်။
it-1 ၅၂၇-၅၂၈
ဖန်ဆင်းခြင်း
ပထမနေ့မှာ ယေဟောဝါက “အလင်း ဖြစ်စေ” လို့ ပြောတဲ့အခါ ကမ္ဘာ့မျက်နှာပြင်ပေါ် မရောက်လာသေးတဲ့ အလင်းတန်းက တိမ်လွှာတွေကို ဖောက်ပြီး ဖြာကျလာတာ ဖြစ်ပုံရတယ်။ “အလင်းက တဖြည်းဖြည်း ဖြစ်လာတယ်” လို့ ဆိုတဲ့ ဘာသာပြန်သူ ဂျေ. ဒဗ္ဗလျူ. ဝပ်စ်ရဲ့ ဖော်ပြချက်အရ ဒါဟာ အဆင့်ဆင့် ဖြစ်လာတဲ့ ဖြစ်စဉ် ဖြစ်ပုံရတယ်။ (က ၁:၃၊ A Distinctive Translation of Genesis) ဘုရားက အလင်းနဲ့ အမှောင်ကို ခွဲခြားလိုက်ပြီး အလင်းကို နေ့၊ အမှောင်ကို ညလို့ ခေါ်တယ်။ ကမ္ဘာဟာ မိမိရဲ့ ဝင်ရိုးပေါ်မှာ လည်နေရင်း နေကို ပတ်နေတယ်။ ဒါကြောင့် ကမ္ဘာလုံးရဲ့ အရှေ့နဲ့ အနောက် တစ်ခြမ်းစီမှာ အလင်းနဲ့ အမှောင် ဖြစ်ပေါ်တယ်။—က ၁:၃၊ ၄။
ဒုတိယနေ့မှာ ဘုရားသခင်ဟာ “ရေထုနှစ်ခုကို ခြား” လိုက်ပြီး အဲဒီနှစ်ခုကြားမှာ ဟင်းလင်းပြင်ကြီး ဖြစ်ပေါ်စေတယ်။ ရေတချို့က ကမ္ဘာမြေပေါ်မှာ ဆက်တည်ရှိတယ်။ ပမာဏအများစုက ကမ္ဘာ့မျက်နှာပြင် အထက်ကို ရောက်သွားတယ်။ အဲဒီနှစ်ခုကြား ဟင်းလင်းပြင်တစ်ခု ဖြစ်ပေါ်လာတယ်။ ဘုရားက အဲဒီဟင်းလင်းပြင်ကို မိုးကောင်းကင်လို့ ခေါ်တယ်။ ဒါပေမဲ့ ဟင်းလင်းပြင်ဟာ ကမ္ဘာမြေနဲ့ ဆက်နွှယ်မှု ရှိနေတယ်။ ဟင်းလင်းပြင်အထက်မှာရှိတဲ့ ရေထုဟာ အာကာသကောင်းကင်မှာရှိတဲ့ ကြယ် ဒါမှမဟုတ် တခြားအရာတွေကို ဝိုင်းရံထားတယ်လို့ မပြောထားဘူး။—က ၁:၆-၈။
တတိယနေ့မှာ ဘုရားသခင်ရဲ့ အံ့ဖွယ်အမှုလုပ်ဆောင်တဲ့တန်ခိုးနဲ့ ကမ္ဘာပေါ်က ရေတွေအားလုံးကို တစ်နေရာမှာ စုဝေးလိုက်တဲ့အခါ ကုန်းမြေ ပေါ်လာတယ်။ ဘုရားက အဲဒါကို မြေကြီးလို့ ခေါ်တယ်။ အဲဒီနေ့မှာ ဘုရားသခင်က ဆင့်ကဲဖြစ်စဉ်အားဖြင့် မဟုတ်ဘဲ ဒြပ်စင်တွေကို အသက်သွင်းပေးလိုက်တဲ့အခါ မြက်ပင်တွေ၊ အပင်တွေ၊ သီးပင်တွေ ပေါက်လာတယ်။ အဲဒီ မတူညီတဲ့ အမျိုးအစားတွေဟာ “အမျိုးအလိုက်” ဆက်ပွားနိုင်တယ်။—က ၁:၉-၁၃။
(ကမ္ဘာဦး ၁:၁၄) ဘုရားသခင်က “နေ့နဲ့ ညကို ပိုင်းခြားဖို့ ကောင်းကင်ပြင်မှာ အလင်းအိမ်တွေ ပေါ်လာစေ။ အလင်းအိမ်တွေက ဥတုရာသီတွေ၊ နေ့ရက်တွေ၊ နှစ်တွေကို သတ်မှတ်ပေးမယ်။
(ကမ္ဘာဦး ၁:၂၀) ဘုရားသခင်က “ရေထဲမှာ သတ္တဝါတွေ ပေါက်ဖွားစေ။ ပျံတတ်တဲ့ သတ္တဝါတွေလည်း မြေပြင်အထက် မိုးကောင်းကင်မှာ ပျံသန်းစေ” လို့ ပြောပြီး၊
(ကမ္ဘာဦး ၁:၂၄) ဘုရားသခင်က “သားယဉ်၊ တွားသွားသတ္တဝါ၊ သားရဲစတဲ့ သတ္တဝါတွေ မြေပေါ်မှာ အမျိုးအလိုက် ပေါက်ဖွားစေ” လို့ ပြောတဲ့အခါ အဲဒီအတိုင်း ဖြစ်လာတယ်။
(ကမ္ဘာဦး ၁:၂၇) ဘုရားသခင်က မိမိပုံသဏ္ဌာန်အတိုင်း လူကို ဖန်ဆင်းတယ်။ ဘုရားသခင့် ပုံသဏ္ဌာန်အတိုင်း ယောက်ျားနဲ့ မိန်းမကို ဖန်ဆင်းတယ်။
it-1 ၅၂၈ ပိုဒ်. ၅-၈
ဖန်ဆင်းခြင်း
ကမ္ဘာဦး ၁:၁၆ မှာ “ဖန်ဆင်း” လို့ အဓိပ္ပာယ်ရှိတဲ့ ဟီဘရူးကြိယာ ဘာရာကို မသုံးထားဘူး။ “ပြုလုပ်” လို့ အဓိပ္ပာယ်ရှိတဲ့ ဟီဘရူးကြိယာ အာဆာကို သုံးထားတယ်။ ကမ္ဘာဦး ၁:၁ မှာ ဖော်ပြထားတဲ့ “ကောင်းကင်” မှာ နေ၊ လ၊ ကြယ်တွေ ပါဝင်လို့ အဲဒါတွေကို စတုတ္ထနေ့ မတိုင်ခင် အတော်ကြာကြာကတည်းက ဖန်ဆင်းပြီးသား ဖြစ်တယ်။ စတုတ္တနေ့မှာ ဘုရားသခင်က အဲဒီအလင်းအိမ်တွေက အလင်းတွေ ကမ္ဘာ့မျက်နှာပြင်၊ ကမ္ဘာ့မျက်နှာပြင်အထက် ဟင်းလင်းပြင်ပေါ် ကျရောက်လာအောင် ဆက် “ပြုလုပ်” တယ်။ ဘုရားက ‘အဲဒီအလင်းအိမ်တွေကို ကောင်းကင်ပြင်မှာ ထားလိုက်တယ်။ ကမ္ဘာမြေကို အလင်းပေးဖို့ပဲ’ ဆိုပြီး ပြောတဲ့အခါ အဲဒီအလင်းအိမ်တွေဟာ ကောင်းကင်ပြင်မှာ ရှိနေပေမဲ့ ကမ္ဘာမြေကနေ ရှင်းရှင်းလင်းလင်း မြင်နိုင်ပြီဆိုတာ ဖော်ပြတယ်။ “အလင်းအိမ်တွေက ရာသီဥတုတွေ၊ နေ့ရက်တွေ၊ နှစ်တွေကို သတ်မှတ်ပေး” တယ်လို့ ပြောတဲ့အတွက် နောက်ပိုင်းမှာ လူတွေကို နည်းလမ်းအမျိုးမျိုးနဲ့ လမ်းညွှန်ပေးတယ်။—က ၁:၁၄။
ပဉ္စမနေ့မှာတော့ ကမ္ဘာပေါ်မှာ လူသား မဟုတ်တဲ့ တခြား သက်ရှိသတ္တဝါတွေကို ဖန်ဆင်းတယ်။ ဘုရားက သက်ရှိတစ်မျိုးကိုပဲ ဖန်ဆင်းပြီး ဆင့်ကဲဖြစ်စဉ်နဲ့ အမျိုးမျိုး ဖြစ်လာစေဖို့ ရည်ရွယ်ခဲ့တာ မဟုတ်ဘူး။ ဘုရားရဲ့ တန်ခိုးနဲ့ သက်ရှိသတ္တဝါတွေကို ဖြစ်ပေါ်စေခဲ့တယ်။ “ပင်လယ်သတ္တဝါကြီးတွေ၊ ရေထဲမှာ သွားလာတဲ့ သတ္တဝါတွေ၊ ပျံတတ်တဲ့ သတ္တဝါတွေကို အမျိုးအလိုက် ဖန်ဆင်းတယ်” လို့ ဖော်ပြထားတယ်။ မိမိ ဖြစ်ပေါ်စေခဲ့တဲ့အရာတွေကို နှစ်သက်အားရပြီး သူတို့ကို ဘုရား ကောင်းချီးပေးတယ်။ “ပွားများ” ပါလို့ ဘုရား ပြောတယ်။ အဲဒီများပြားလှတဲ့ သတ္တဝါအမျိုးအစားတွေမှာ “အမျိုးအလိုက်” မျိုးပွားနိုင်စွမ်းကို ဘုရား ထည့်သွင်းပေးခဲ့တယ်။—က ၁:၂၀-၂၃။
ဆဋ္ဌမနေ့မှာ ဘုရားသခင်က “သားယဉ်၊ သားရဲ၊ တွားသွားသတ္တဝါတွေကို အမျိုးအလိုက် ပေါက်ဖွားစေတယ်။” အဲဒါလည်းပဲ ရှေ့က ဘုရားရဲ့ ဖန်ဆင်းခြင်း လက်ရာတွေလိုပဲ ကောင်းတယ်။—က ၁:၂၄၊ ၂၅။
ဖန်ဆင်းရာနေ့ ဆဋ္ဌမနေ့ ကုန်ဆုံးခါနီးမှာ ကောင်းကင်တမန်ထက် နိမ့်ပေမဲ့ တိရစ္ဆာန်တွေထက် အဆင့်မြင့်တဲ့ သတ္တဝါအသစ်တစ်မျိုးကို ဘုရား ဖြစ်ပေါ်စေခဲ့တယ်။ အဲဒီလူယောက်ျားဟာ ဘုရားသခင်ရဲ့ ပုံသဏ္ဌာန်အတိုင်း ဖန်ဆင်းခံရတယ်။ ကမ္ဘာဦး ၁:၂၇ မှာ ဘုရားသခင်က “ယောက်ျားနဲ့ မိန်းမကို ဖန်ဆင်းတယ်” လို့ အတိုချုပ် ဖော်ပြထားတယ်။ ကျမ်းပြိုင်ဖြစ်တဲ့ ကမ္ဘာဦး ၂:၇-၉ မှာ ယေဟောဝါဘုရားက လူကို မြေမှုန့်နဲ့ ပုံဖော်ပြီး နှာခေါင်းထဲ အသက်စွမ်းအားကို မှုတ်လိုက်တဲ့အခါ လူဟာ အသက်ရှင်သူ ဖြစ်လာတယ်။ သူ့အတွက် ပရဒိသုစံအိမ်နဲ့ အစားအစာတွေ ပြင်ဆင်ပေးထားတယ်။ ယောက်ျားကို ဖန်းဆင်တဲ့အခါ ယေဟောဝါက မြေကြီးဒြပ်စင်ကို အသုံးပြုခဲ့တယ်။ လူမိန်းမကိုတော့ အာဒံရဲ့ နံရိုးတစ်ချောင်းနဲ့ ဖန်ဆင်းခဲ့တယ်။ (က ၂:၁၈-၂၅) မိန်းမကို ဖန်ဆင်းပြီးတဲ့အခါ ယောက်ျားဟာ ပြည့်ဝစုံလင်တဲ့ လူသား အမျိုးတစ်မျိုး ဖြစ်လာတယ်။—က ၅:၁၊ ၂။
ရှာဖွေလေ့လာ ဘုရားရေးရာရတနာ
(ကမ္ဘာဦး ၁:၁) အစအဦးမှာ ဘုရားသခင်က ကောင်းကင်နဲ့ မြေကြီးကို ဖန်ဆင်းတယ်။
သိပ္ပံပညာက သင့်ဘဝကို အကျိုးပြုပုံ
ကမ္ဘာမြေကြီးနဲ့ စကြဝဠာရဲ့ သက်တမ်း
ကမ္ဘာမြေကြီးရဲ့ သက်တမ်းက နှစ်ပေါင်း ၄ ဘီလီယံခန့် ရှိပြီး စကြဝဠာရဲ့ သက်တမ်းက ၁၃၊ ၁၄ ဘီလီယံခန့် ရှိပြီလို့ သိပ္ပံပညာရှင်တွေ ခန့်မှန်းကြတယ်။ ကျမ်းစာမှာတော့ စကြဝဠာ ဖန်ဆင်းတဲ့နေ့ကို အတိအကျ မဖော်ပြထားပါဘူး။ ဒါကြောင့် ကမ္ဘာမြေကြီးရဲ့ သက်တမ်းက နှစ်ထောင်ပေါင်း အနည်းငယ်ပဲ ရှိသေးတယ် ဆိုပြီး အခိုင်အမာ ပြောလို့ မရပါဘူး။ “အစအဦး၌ ဘုရားသခင်သည် ကောင်းကင်နှင့် မြေကြီးကို ဖန်ဆင်းတော်မူ၏” လို့ သမ္မာကျမ်းစာရဲ့ အစပိုင်းမှာ ဖော်ပြထားပါတယ်။ (ကမ္ဘာဦး ၁:၁) အဲဒီလိုဖော်ပြထားတဲ့အတွက် သိပ္ပံပညာရှင်တွေက တိကျတဲ့ သိပ္ပံအချက်အလက်တွေနဲ့အညီ ကမ္ဘာမြေကြီးရဲ့ သက်တမ်းကို တွက်ချက်ခွင့် ရသွားကြတယ်။
(ကမ္ဘာဦး ၁:၂၆) ဘုရားသခင်က “ငါတို့ရဲ့ ပုံသဏ္ဌာန်အတိုင်း၊ ငါတို့နဲ့တူတဲ့ လူကို ဖန်ဆင်းကြစို့။ သူက ပင်လယ်ငါးတွေ၊ မိုးကောင်းကင်မှာ ပျံတဲ့ ငှက်တွေ၊ သားယဉ်တွေ၊ တွားသွားသတ္တဝါတွေနဲ့ မြေတစ်ပြင်လုံးကို အုပ်စိုးစေ” လို့ ပြောတယ်။
it-2 ၅၂
ယေရှုခရစ်
တွဲဖက်ဖန်ဆင်းရှင် မဟုတ်။ ဖန်ဆင်းခြင်းလုပ်ငန်းမှာ သားတော် ပါဝင်လုပ်ဆောင်ခဲ့ပေမဲ့ တွဲဖက်ဖန်ဆင်းရှင်အနေနဲ့တော့ မဟုတ်ဘူး။ ဖန်ဆင်းခြင်းတန်ခိုးဟာ ဘုရားသခင်ရဲ့ သန့်ရှင်းသော စွမ်းအားတော်ကတစ်ဆင့် သက်ရောက်တယ်။ (က ၁:၂။ ဆ ၃၃:၆) ယေဟောဝါဟာ အသက်အားလုံးရဲ့ ပင်ရင်း ဖြစ်လို့ မျက်စိနဲ့ မမြင်နိုင်တဲ့၊ မြင်နိုင်တဲ့ သက်ရှိအားလုံးရဲ့ အသက်ကို ဘုရား ပိုင်တယ်။ (ဆ ၃၆:၉) သားတော်ဟာ တွဲဖက်ဖန်ဆင်းရှင် ဖြစ်မယ့်အစား ဖန်ဆင်းရှင် ယေဟောဝါရဲ့ ကိုယ်စားလှယ်၊ အကူအညီပေးသူ ဖြစ်တယ်။ ကျမ်းစာမှာ ဖော်ပြထားသလို ဖန်ဆင်းခြင်းနဲ့ပတ်သက်လာရင် ယေရှု ကိုယ်တိုင် ဘုရားသခင်ကို ဂုဏ်တင်ခဲ့တယ်။—မ ၁၉:၄-၆။
ကျမ်းစာဖတ်ရှုခြင်း
ဇန်နဝါရီ ၁၃-၁၉
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၃-၅
“ပထမဆုံး မုသာရဲ့ ဆိုးကျိုးများ”
(ကမ္ဘာဦး ၃:၁-၅) မြွေဟာ ယေဟောဝါဘုရား ဖန်ဆင်းတဲ့ တိရစ္ဆာန်တွေထဲမှာ သတိအကြီးဆုံးပဲ။ မြွေက မိန်းမကို “ဥယျာဉ်ထဲမှာရှိတဲ့ အပင်အားလုံးရဲ့ အသီးကို မစားနဲ့လို့ ဘုရားသခင် တကယ်ပဲ ပြောသလား” ဆိုပြီး မေးတယ်။ ၂ မိန်းမက “ဥယျာဉ်ထဲမှာရှိတဲ့ အပင်တွေရဲ့ အသီးကို ကျွန်မတို့ စားလို့ရပါတယ်။ ၃ ဥယျာဉ်ထဲက အပင်တစ်ပင်ရဲ့ အသီးကိုတော့ ‘မစားနဲ့၊ မထိနဲ့။ စားမယ်၊ ထိမယ်ဆိုရင် သေရမယ်’ ဆိုပြီး ဘုရားသခင် မှာထားတယ်” လို့ ပြန်ဖြေတယ်။ ၄ မြွေကလည်း “မင်းတို့ လုံးဝ သေမှာ မဟုတ်ဘူး။ ၅ တကယ်တော့ အဲဒီအသီးကို စားတဲ့နေ့မှာပဲ မျက်စိ ပွင့်လာမယ်၊ အကောင်းအဆိုးကို သိလာပြီး ဘုရားလို ဖြစ်လာမယ်ဆိုတာ ဘုရားသခင် သိတယ်” လို့ ပြောတယ်။
ယေဟောဝါရဲ့ ရည်ရွယ်ချက် ပြည့်စုံမယ်
၉ စာတန်မာရ်နတ်ဟာ မြွေတစ်ကောင်ကို သုံးပြီး ဖခင်ယေဟောဝါကို မနာခံဖို့ ဧဝကို လှည့်ဖြားသွေးဆောင်ခဲ့တယ်။ (ကမ္ဘာဦး ၃:၁-၅ ကိုဖတ်ပါ။ ဗျာ. ၁၂:၉) “ဥယျာဉ်၌ ရှိသမျှသော အပင်တို့၏ အသီး” ကို လူ့သားသမီးတွေ စားခွင့် မရှိတာကို စာတန် ရေးကြီးခွင်ကျယ် လုပ်ခဲ့တယ်။ ‘ကိုယ်လုပ်ချင်တာကို လုပ်ခွင့် မရှိဘူးပေါ့’ လို့ ပြောနေသလိုပါပဲ။ အဲဒီနောက် “သင်တို့သည် ဧကန်အမှန် သေရမည် မဟုတ်” လို့ ဗြောင်ဗြောင်တင်းတင်း လိမ်ညာခဲ့တယ်။ “ထိုအသီးကို စားသောနေ့၌ သင်တို့သည် မျက်စိ ပွင့်လင်း . . . [မည်] ကို ဘုရားသခင် သိတော်မူသည်” လို့ ပြောပြီး ဘုရားသခင်ကို နာခံဖို့ မလိုကြောင်း ဧဝ ယုံကြည်လာအောင် လှည့်ဖြားခဲ့တယ်။ ဉာဏ်အလင်း ပွင့်လာမှာမို့ အသီးကို ယေဟောဝါ မစားစေချင်သယောင် စာတန် ပြောခဲ့တယ်။ “ကောင်းမကောင်းကို သိ၍ ဘုရားသခင်ကဲ့သို့ ဖြစ်” မယ်လို့လည်း လိမ်ပြောခဲ့တယ်။
(ကမ္ဘာဦး ၃:၆) အဲဒီအပင်ရဲ့ အသီးဟာ စားချင်စရာ၊ လှပပြီး မက်မောစရာကောင်းတာကို မိန်းမ မြင်တဲ့အခါ ခူးစားလိုက်တယ်။ လူယောက်ျားကို ပေးတော့ သူလည်း စားတယ်။
ပထမလူသားမောင်နှံထံမှ ကျွန်ုပ်တို့ သင်ယူနိုင်
ဧဝ၏ အပြစ်သည် မရှောင်မလွှဲနိုင်ရာလော။ လုံးဝ မဟုတ်ပါလေ! သူ့နေရာ၌ သင် နေကြည့်ပါ။ စာတန်၏ အဆိုသည် ဘုရားသခင်နှင့် အာဒံတို့ ပြောဆိုရာတို့နှင့် လုံးဝ ပြောင်းပြန် ဖြစ်နေသည်။ သူစိမ်းတစ်ဦးက သင် ချစ်ခင်ယုံကြည်သူတစ်ဦးကို မရိုးသားဟု စွပ်စွဲလျှင် သင် မည်သို့ ခံစားရမည်နည်း။ ဧဝသည် ခံပြင်းဒေါသထွက်ကြောင်း ပြပြီး နားထောင်ဖို့ပင် ငြင်းပယ်ကာ ခြားနားစွာ တုံ့ပြန်ခဲ့သင့်သည်။ အမှန်မှာ ဘုရားသခင့် ဖြောင့်မတ်ခြင်းနှင့် သူ့ယောက်ျား၏ စကားကို စောကြောရအောင် မြွေကား အဘယ်သူမို့လို့နည်း။ ဦးစီးမှု မူကို လေးစားစိတ်ဖြင့် ဧဝသည် ဆုံးဖြတ်ချက် တစ်စုံတစ်ရာ မချမီ အကြံပေးချက်ကို ရယူသင့်သည်။ ကျွန်ုပ်တို့လည်း ဘုရားသခင် ပေးသည့် ညွှန်ကြားချက်များနှင့် ဆန့်ကျင်သော သတင်းအချက်အလက်ကို ရရှိခဲ့ပါက အလားတူ ပြုလုပ်သင့်သည်။ သို့သော် ဧဝသည် သွေးဆောင်သူ၏ စကားကို ယုံစားကာ အမှားနှင့် အမှန်ကို မိမိကိုယ်တိုင် ဆုံးဖြတ်လိုခဲ့သည်။ ထိုစိတ်ကူးကို သူကြာရှည် စဉ်းစားလေလေ နှစ်သက်စရာ ကောင်းလေလေ ဖြစ်သည်။ မှားယွင်းသော အလိုဆန္ဒကို စိတ်ထဲမှ ထုတ်ပစ်ခြင်း သို့မဟုတ် သူ၏ အိမ်ထောင်ဦးစီးနှင့် ကိစ္စရပ်များကို ဆွေးနွေးခြင်း ပြုမည့်အစား ယင်းကို စိတ်ထဲ သိုထားခြင်းဖြင့် ဤမျှ ကြီးမားသည့် အမှားကို သူမှားခဲ့လေခြင်း!—၁ ကောရိန္သု ၁၁:၃; ယာကုပ် ၁:၁၄၊ ၁၅။
မယား၏ စကားကို အာဒံ နားထောင်
မကြာမီ ဧဝသည် မိမိနှင့်အတူ အပြစ်ပြုရန် အာဒံကို တိုက်တွန်းခဲ့သည်။ သူ၏ ပျော့ညံ့စွာ လိုက်လျောမှုကို ကျွန်ုပ်တို့ မည်သို့ ရှင်းပြမည်နည်း။ (ကမ္ဘာဦး ၃:၆၊ ၁၇) သစ္စာစောင့်သိမှုများဆိုင်ရာ လွန်ဆွဲပွဲကို အာဒံ ရင်ဆိုင်ရလေပြီ။ သူချစ်ရသောကြင်ဖော် ဧဝအပါအဝင် အရာခပ်သိမ်းကို ပေးအပ်ထားသော သူ၏ ဖန်ဆင်းရှင်ကို နာခံမည်လော။ သူ ယခု ပြုလုပ်မည့်အရာနှင့်ပတ်သက်၍ ဘုရားသခင့် ညွှန်ကြားချက်ကို အာဒံ ရှာကြံမည်လော။ သို့မဟုတ် သူ၏ ရှေ့ခရီးကို ဇနီးလက်ထဲ ဝကွက်အပ်လိုက်မည်လော။ တားမြစ်ထားသော အသီးကို စားခြင်းဖြင့် ရရှိဖို့ သူ့ဇနီး မျှော်လင့်ထားရာသည် လှည့်စားမှုသာ ဖြစ်ကြောင်း အာဒံ ကောင်းကောင်း သိထားသည်။ တမန်တော် ပေါလုသည် ဤသို့ ရေးသားဖို့ မှုတ်သွင်းခံခဲ့ရသည်– “အာဒံသည် လှည့်ဖြားခြင်းကို မခံ၊ မိန်းမသည် လှည့်ဖြားခြင်းကို ခံ၍ လွန်ကျူး၏။” (၁ တိမောသေ ၂:၁၄) ထို့ကြောင့် အာဒံသည် ယေဟောဝါကို တမင် ဖီဆန်ခဲ့သည်။ ထင်ရှားသည်မှာ အခြေအနေကို ပြုပြင်ရန် ဘုရားသခင်၏ စွမ်းရည်၌ ယုံကြည်ခြင်းထက် သူ့ဇနီးနှင့် ခွဲရမည် စိုးသည့် စိတ်က ပို၍ အားများနေသည်။
(ကမ္ဘာဦး ၃:၁၅-၁၉) မင်းနဲ့ မိန်းမကိုရော မင်းရဲ့ မျိုးနွယ်နဲ့ မိန်းမရဲ့ မျိုးနွယ်ကိုပါ ငါရန်ငြိုးဖွဲ့စေမယ်။ သူက မင်းရဲ့ ခေါင်းကို ကြိတ်လိမ့်မယ်။ မင်းလည်း သူ့ဖနောင့်ကို ပေါက်ရလိမ့်မယ်” လို့ ပြောတယ်။ ၁၆ မိန်းမကိုလည်း “မင်းဟာ ကိုယ်ဝန်ဆောင်ချိန်မှာ ဒုက္ခအများကြီး ကြုံရမယ်။ ဝေဒနာခံစားပြီး သားဖွားရမယ်။ ကိုယ့်ယောက်ျားကို တမ်းတမ်းစွဲ ဖြစ်နေလိမ့်မယ်။ သူက မင်းကို ဩဇာလွှမ်းမိုးလိမ့်မယ်” လို့ ပြောတယ်။ ၁၇ အာဒံကိုတော့ “မင်းက မိန်းမစကား နားထောင်ပြီး ‘မစားနဲ့’ လို့ ငါမိန့်မှာထားတဲ့ အပင်ရဲ့ အသီးကို စားတဲ့အတွက် မြေကြီးဟာ ကျိန်စာသင့်ပြီ။ မြေထွက်သီးနှံ စားရဖို့ တစ်သက်လုံး မင်း ပင်ပင်ပန်းပန်း လုပ်ကိုင်ရလိမ့်မယ်။ ၁၈ မြေပေါ်မှာ ဆူးပင်တွေ၊ ချုံပင်တွေ ပေါက်လာမယ်။ မြေပေါ်မှာ ပေါက်တဲ့ အပင်တွေကို မင်း စားရမယ်။ ၁၉ မြေကြီးက ဖြစ်လာတဲ့ မင်းဟာ မြေကြီးကို ပြန်သွားချိန်အထိ ချွေးထွက်အောင် ပင်ပင်ပန်းပန်း လုပ်မှ အစာစားရမယ်။ မင်းဟာ မြေမှုန့် ဖြစ်တဲ့အတွက် မြေမှုန့်ကိုပဲ ပြန်ရမယ်” လို့ ပြောတယ်။
အမျိုးသမီးတွေကို ဘုရားသခင် ဂရုစိုက်သလား
ဘုရားသခင်က အမျိုးသမီးတွေကို ကျိန်စာတိုက်ထားသလား။
မတိုက်ထားပါဘူး။ တကယ်တော့ ဘုရားသခင်ရဲ့ “ကျိန်ခြင်း” ကို ခံရတဲ့သူက “စာတန်ခေါ် မူလမြွေ” ဖြစ်တယ်။ (ဗျာဒိတ် ၁၂:၉; ကမ္ဘာဦး ၃:၁၄) အာဒံဟာ သူ့ဇနီးကို “အုပ်စိုး” ရမယ်လို့ ဘုရားသခင် မိန့်ဆိုခဲ့တုန်းက အမျိုးသမီးဟာ အမျိုးသား ပြုသမျှ နုရမယ်လို့ ဆိုလိုနေတာ မဟုတ်ဘူး။ (ကမ္ဘာဦး ၃:၁၆) တကယ်တော့ ပထမဆုံး လူသားမောင်နှံ အပြစ်ပြုလိုက်တဲ့အတွက် ခံရမယ့် ဆိုးကျိုးတွေကို ဘုရားသခင် ကြိုပြောလိုက်တာ ဖြစ်တယ်။
ကမ္ဘာဦးကျမ်းမှ ပေါ်လွင်ချက်များ—၁
၃:၁၇—မြေကြီးသည် အဘယ်နည်းဖြင့် ကျိန်ခြင်းခံခဲ့ရသနည်း၊ မည်မျှ ကြာသနည်း။ မြေကို ကျိန်ထားသည့်အတွက် ထွန်ယက်စိုက်ပျိုးဖို့ အလွန် ခက်ခဲလိမ့်မည် ဖြစ်သည်။ ဆူးပင်အမျိုးမျိုး ပေါက်နေသော အကျိန်ခံမြေ၏ အကျိုးဆက်များကို အာဒံ၏ သားစဉ်မြေးဆက်များ အကြီးအကျယ် ခံခဲ့ရသဖြင့် နောဧ၏ ဖခင် လာမက်က “ထာဝရဘုရား ကျိန်တော်မူသော မြေ၌ လုပ်၍ ပင်ပန်းစွာ ခံရ” ပြီဟု ပြောခဲ့သည်။ (ကမ္ဘာဦး ၅:၂၉) ရေလွှမ်းမိုးဘေးပြီးနောက် ယေဟောဝါသည် နောဧနှင့် သူ၏ သားများကို ကောင်းချီးပေးပြီး မြေကြီးကို ပြည့်စေဖို့ ကိုယ်တော်၏ ရည်ရွယ်ချက်ကို ဖော်ပြခဲ့သည်။ (ကမ္ဘာဦး ၉:၁) ထိုအချိန်တွင် မြေကြီးသည် ဘုရားသခင်၏ ကျိန်ခြင်းကို မခံရတော့ပုံ ရှိသည်။—ကမ္ဘာဦး ၁၃:၁၀။
it-2 ၁၈၆
သားဖွားဝေဒနာ
ကလေးမွေးတဲ့အခါ ခံစားရတဲ့ဒုက္ခ ဖြစ်တယ်။ ပထမဆုံး အမျိုးသမီး ဖြစ်တဲ့ ဧဝ အပြစ်လုပ်ပြီးနောက် ကလေးမွေးတဲ့အခါ ခံစားရမယ့် အကျိုးဆက်ကို ဘုရားသခင် ဖော်ပြခဲ့တယ်။ အကယ်၍သာ သူ အပြစ်မလုပ်ခဲ့ဘူးဆိုရင် ဘုရားသခင့် ကောင်းချီးကို ဆက်ခံစားရမယ်။ ကလေးမွေးတဲ့အခါ ပျော်ရွှင်မှု ခံစားရမယ်။ ဘာကြောင့်လဲဆိုတော့ “ယေဟောဝါရဲ့ ကောင်းချီးက ကြွယ်ဝစေတယ်။ အဲဒီကြွယ်ဝမှုမှာ နာကျင်စရာတွေ မရောဘူး” လို့ ပြောထားလို့ပဲ။ (ပ ၁၀:၂၂) ဒါပေမဲ့ အခုတော့ မစုံလင်တဲ့ လူ့ခန္ဓာကြောင့် ကလေးမွေးတဲ့အခါ နာကျင်မှု ခံစားရတော့မယ်။ ဘုရားသခင်က “မင်းဟာ ကိုယ်ဝန်ဆောင်ချိန်မှာ ဒုက္ခအများကြီး ကြုံရမယ်။ ဝေဒနာခံစားပြီး သားဖွားရမယ်” လို့ ပြောခဲ့တယ် (တစ်ခါတလေ ဘုရား ခွင့်ပြုလိုက်တာကို ဘုရား လုပ်သလို ဖော်ပြတတ်တယ်)။—က ၃:၁၆။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄:၂၃၊ ၂၄) နောက်တော့ လာမက်က ဇနီးအေဒါနဲ့ ဇိလအတွက် ကဗျာတစ်ပုဒ် စပ်တယ်– “လာမက်ဇနီးတို့၊ နားထောင်ကြ၊ ငါ့စကားကို နားစိုက်ကြ၊ ငါ့ကို ရိုက်တဲ့ လူငယ်လေး၊ ငါသတ်လိုက်တယ်ဟေ့။ ၂၄ ကာအိနကို သတ်မိရင် ကလဲ့စား ခုနစ်ဆ ခံရမတဲ့။ ဒီလာမက်ကို သတ်မိရင် ခံပေတော့ ကလဲ့စား ၇၇ ဆ။
it-2 ၁၉၂ ပိုဒ်. ၅
လာမက်
ဇနီးတွေအတွက် လာမက် စပ်တဲ့ ကဗျာ (က ၄:၂၃၊ ၂၄) မှာ အဲဒီခေတ်ရဲ့ အကြမ်းဖက်စိတ်ဓာတ်ကို မြင်ရတယ်။ လာမက်ရဲ့ ကဗျာက “လာမက်ဇနီးတို့၊ နားထောင်ကြ၊ ငါ့စကားကို နားစိုက်ကြ၊ ငါ့ကို ရိုက်တဲ့ လူငယ်လေး၊ ငါသတ်လိုက်တယ်ဟေ့။ ကာအိနကို သတ်မိရင် ကလဲ့စား ခုနစ်ဆ ခံရမတဲ့။ ဒီလာမက်ကို သတ်မိရင် ခံပေတော့ ကလဲ့စား ၇၇ ဆ။” လာမက်က သူဟာ ကာအိနလို တမင်တကာ လူသတ်တဲ့သူ မဟုတ်ဘူးဆိုတာကို ကာကွယ်ပြီး ပြောနေတာ ဖြစ်တယ်။ မိမိကိုယ်ကို ကာကွယ်တဲ့အနေနဲ့ တိုက်ခိုက်လာသူကို သတ်လိုက်တယ်လို့ လာမက် ပြောတယ်။ ဒါကြောင့် သူ့ရဲ့ ကဗျာက ကိုယ့်ကို တိုက်ခိုက်လာသူကို လက်စားချေ သတ်ပစ်ချင်သူ ဘယ်သူ့ကိုမဆို လွတ်ငြိမ်းချမ်းသာခွင့် ပေးဖို့ အကြောင်းပြချက် ဖြစ်စေခဲ့တယ်။
(ကမ္ဘာဦး ၄:၂၆) ရှေသလည်း သားတစ်ယောက် ရပြီး ဧနုတ်လို့ နာမည်ပေးတယ်။ အဲဒီအချိန်မှာ ယေဟောဝါရဲ့ နာမည်ကို လူတွေ ခေါ်စပြုကြပြီ။
it-1 ၃၃၈ ပိုဒ်. ၂
ဘုရားကို စော်ကားပြောဆိုခြင်း
ရေလွှမ်းမိုးဘေး မတိုင်ခင် ဧနုတ်ခေတ်မှာ “ယေဟောဝါရဲ့ နာမည်ကို လူတွေ ခေါ်စပြု” တယ်လို့ ဆိုထားတာက သင့်တော်တဲ့ နည်းနဲ့ ခေါ်တာ မဖြစ်နိုင်ဘူး။ ဘာကြောင့်လဲဆိုတော့ အဲဒီအချိန် မတိုင်ခင် အချိန်အတော်ကြာကတည်းက အာဗေလဟာ ဘုရားသခင်ကို နာမည်တပ်ပြီး ခေါ်ခဲ့မှာ သေချာတယ်။ (က ၄:၂၆။ ဟီ ၁၁:၄) ကျမ်းပညာရှင်တချို့ အဆိုအရ ဘုရားသခင့် နာမည်ကို ခေါ်တယ်ဆိုတာ မတော်မလျော် အသုံးပြုတာ၊ လူတွေ၊ ရုပ်တုတွေအတွက် ယေဟောဝါရဲ့ နာမည်ကို တလွဲသုံးတာ ဖြစ်တယ်။ အဲဒီလိုလုပ်တာက ဘုရားကို စော်ကားတဲ့ လုပ်ရပ်ပဲ။
ကျမ်းစာဖတ်ရှုခြင်း
ဇန်နဝါရီ ၂၀-၂၆
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၆-၈
“မှာထားတဲ့အတိုင်း သူလုပ်တယ်”
(ကမ္ဘာဦး ၆:၉) နောဧရဲ့ သမိုင်းမှတ်တမ်း– နောဧဟာ ဖြောင့်မတ်သူ၊ တစ်ခေတ်တည်းသားတွေထဲမှာ အမှားကင်းသူ၊ ဘုရားသခင့်လမ်းစဉ်အတိုင်း လျှောက်လှမ်းသူ ဖြစ်တယ်။
(ကမ္ဘာဦး ၆:၁၃) ဘုရားသခင်က နောဧကို မိန့်မှာတယ်– “ကမ္ဘာပေါ်မှာ လူတွေရဲ့ အကြမ်းဖက်မှုနဲ့ ပြည့်နေပြီ။ ဒါကြောင့် လူအားလုံးကို အဆုံးစီရင်ဖို့ ငါဆုံးဖြတ်လိုက်ပြီ။ ကမ္ဘာမြေကိုလည်း ဖျက်ဆီးမယ်။
နောဧ၊ ဒံယေလ၊ ယောဘတို့ရဲ့ ယုံကြည်ခြင်းနဲ့ နာခံမှုကို တုပပါ
၄ နောဧ ရင်ဆိုင်ခဲ့ရတဲ့ အခက်အခဲများ။ နောဧရဲ့ အဘေး ဧနောက်ခေတ်မှာ လူတွေ ဘုရားတရား အလွန်မဲ့နေကြပြီ။ ယေဟောဝါကို “ထိတ်လန့်ဖွယ် စကား” တွေနဲ့တောင် ဆန့်ကျင်ပြောဆိုကြတယ်။ (ယု. ၁၄၊ ၁၅) အကြမ်းဖက်မှုတွေ တိုးများလာတယ်။ နောဧခေတ်ရောက်တော့ ‘ကမ္ဘာမြေဟာ အကြမ်းဖက်မှုတွေ ပြည့်နေတယ်။’ လူယောင်ဆောင်ထားတဲ့ ကောင်းကင်တမန်ဆိုးတွေ လူ့သမီးတွေနဲ့ ထိမ်းမြားပြီး ရက်စက်ကြမ်းကြုတ်တဲ့ လူ့ကပြားတွေ မွေးလာကြတယ်။ (က. ၆:၂-၄၊ ၁၁၊ ၁၂) ဒါပေမဲ့ နောဧကတော့ ထူးခြားတယ်။ “ယေဟောဝါရှေ့မှာ မျက်နှာသာရသူ ဖြစ်တယ်။ . . . တစ်ခေတ်တည်းသားတွေထဲမှာ အမှားကင်းသူ၊ ဘုရားသခင့်လမ်းစဉ်အတိုင်း လျှောက်လှမ်းသူ ဖြစ်တယ်။”—က. ၆:၈၊ ၉။
(ကမ္ဘာဦး ၆:၁၄-၁၆) ဒီတော့ ထင်းရှူးသားနဲ့ သင်္ဘော ဆောက်ပါ။ အခန်းတွေ ဖွဲ့ပြီး အတွင်းအပြင်ကို ကတ္တရာစေး သုတ်ပါ။ ၁၅ သင်္ဘောဟာ အလျားအတောင် ၃၀၀၊ အနံအတောင် ၅၀၊ အမြင့်အတောင် ၃၀ ရှိရမယ်။ ၁၆ အလင်းရောင် ရဖို့ အမိုးအောက် တစ်တောင်အကွာမှာ ပြတင်းပေါက် ဖောက်ပါ။ သင်္ဘောထဲ ဝင်ဖို့ တံခါးပေါက်ကိုလည်း ဖောက်ပါ။ ပထမထပ်၊ ဒုတိယထပ်၊ တတိယထပ်ဆိုပြီး သုံးထပ် ရှိရမယ်။
‘စစ်မှန်သော ဘုရားသခင်နဲ့အတူ သွားလာသူ’
ဒီလုပ်ငန်းအတွက် ဆယ်စုနှစ်ချီ အချိန်ယူရပါတယ်။ နှစ်ပေါင်း ၄၀ ကနေ ၅၀ အထိ ဖြစ်နိုင်တယ်။ သစ်ပင်တွေကို ခုတ်လှဲရတယ်၊ သစ်တုံးတွေကို ရွှေ့ရတယ်၊ ပျဉ်ပြားတွေကို ဖြတ်ရတယ်၊ နောက်ဆုံး ပျဉ်တွေကို ဆက်ပြီး ပုံစံဖော်ရတယ်။ သင်္ဘောကြီးက အထပ်သုံးထပ် ဖြစ်တယ်၊ အခန်း တော်တော်များများလည်း ပါဝင်ပြီး ဘေးဘက်မှာ တံခါးတစ်ခု ရှိတယ်။ အပေါ်ဆုံးအထပ်မှာ ပြတင်းပေါက်တွေ ရှိတယ်။ မိုးရေတွေ ဘေးဘက်ကို စီးကျသွားစေဖို့အတွက် ခေါင်မိုးကို ထိပ်မှာ အနည်းငယ် မြှင့်ပြီး ဘေးတစ်ဖက်တစ်ချက် ပြေပြေလေး နိမ့်ဆင်းသွားတဲ့ပုံစံ ဆောက်ထားတယ်။—ကမ္ဘာဦး ၆:၁၄-၁၆။
(ကမ္ဘာဦး ၆:၂၂) နောဧလည်း ဘုရားသခင် မိန့်မှာသမျှအတိုင်း လုပ်တယ်။ မှာထားတဲ့အတိုင်း သူလုပ်တယ်။
အသက်ပြေးပွဲကို ခံနိုင်ရည်ရှိစွာ ပြေးကြစို့
၁၃ ယေဟောဝါရဲ့ ဒီကျေးကျွန်တွေ ခံနိုင်ရည်ရှိရှိ အဆုံးအထိ ပြေးနိုင်ဖို့ ဘာက ကူညီပေးခဲ့တာလဲ။ နောဧနဲ့ပတ်သက်ပြီး ပေါလု ပြောတာကို သတိပြုပါ။ (ဟေဗြဲ ၁၁:၇ ကိုဖတ်ပါ။) “အသက်ရှင်သော သတ္တဝါအပေါင်းတို့ကို ကောင်းကင်အောက်မှ ငါကိုယ်တိုင် ပယ်ရှင်းခြင်းငှာ မြေကြီးကို ရေလွှမ်းမိုးစေ” မယ်ဆိုတာက နောဧအတွက် “မမြင်ရသေးသောအရာ” ဖြစ်တယ်။ (က. ၆:၁၇) ဒါက တစ်ခါမှ မဖြစ်ဖူးသေးတဲ့အရာ၊ လုံးလုံး ခန့်မှန်းလို့ မရတဲ့အရာ ဖြစ်တယ်။ ဒါပေမဲ့ ရေလွှမ်းမိုးဘေး မဖြစ်နိုင်ဘူးလို့ နောဧ မစဉ်းစားခဲ့ဘူး။ အကြောင်းကတော့ ယေဟောဝါက မိန့်တော်မူသမျှအတိုင်း လုပ်ဆောင်မယ်ဆိုတာ သူယုံကြည်တဲ့အတွက် ဖြစ်တယ်။ သူ့ကို ခိုင်းတဲ့ အလုပ်က ခက်လွန်းလို့ မတတ်နိုင်ဘူးလို့လည်း မစဉ်းစားခဲ့ဘူး။ အဲဒီအစား “မှာထားတော်မူ” တဲ့အတိုင်း သူလုပ်ဆောင်ခဲ့တယ်။ (က. ၆:၂၂) နောဧ လုပ်ဆောင်ခဲ့တဲ့ အရာတွေ ဖြစ်တဲ့ သင်္ဘောဆောက်ခြင်း၊ တိရစ္ဆာန်တွေ စုသိမ်းခြင်း၊ လူနဲ့ တိရစ္ဆာန်တွေအတွက် အစားအစာ စုဆောင်းခြင်း၊ သတိပေးသတင်း ဟောပြောခြင်း၊ မိသားစုဝင်တွေ ယေဟောဝါအပေါ် ခိုင်ခံ့တဲ့ ယုံကြည်မှု ရှိအောင် လုပ်ခြင်းဆိုတာ လွယ်ကူတဲ့ အလုပ်တာဝန်တွေတော့ မဟုတ်ဘူး။ နောဧက ယေဟောဝါကို ယုံကြည်ပြီး ခံနိုင်ရည် တင်ပြခဲ့တဲ့အတွက် ယေဟောဝါက သူနဲ့ သူ့မိသားစုကို ကယ်တင်ခဲ့ပြီး ကောင်းချီးများစွာ သွန်းလောင်းခဲ့တယ်။
ရှာဖွေလေ့လာ ဘုရားရေးရာရတနာ
(ကမ္ဘာဦး ၇:၂) သန့်ရှင်းတဲ့ တိရစ္ဆာန်တွေထဲက တစ်မျိုးကို အထီးအမ ခုနစ်ကောင်စီ၊ မသန့်ရှင်းတဲ့ တိရစ္ဆာန်တွေထဲက တစ်မျိုးကို အထီးအမ နှစ်ကောင်စီ၊
ကမ္ဘာဦးကျမ်းမှ ပေါ်လွင်ချက်များ—၁
၇:၂—တိရစ္ဆာန်များ သန့်ရှင်း၊ မသန့်ရှင်းကို အဘယ်အရာပေါ် မူတည်ပြီး ခွဲခြားခဲ့သနည်း။ ခွဲခြားမှုမှာ အဘယ် တိရစ္ဆာန်ကို စားနိုင်၊ မစားနိုင်အပေါ် မူမတည်ဘဲ ဝတ်ပြုရေးတွင် ပူဇော်ရာယဇ်အဖြစ် အသုံးပြုခြင်းအပေါ် မူတည်ခဲ့ကြောင်း ထင်ရှားသည်။ ရေလွှမ်းမိုးဘေး မတိုင်မီက တိရစ္ဆာန်အသားကို လူတို့ မစားခဲ့ပါ။ စားသုံးဖို့ “စင်ကြယ်၊” “မစင်ကြယ်” သည်ကို မောရှေပညတ် ပေါ်ထွက်လာချိန်၌သာ သတ်မှတ်ခဲ့၍ ထိုပညတ် အပယ်ခံရချိန်၌ ၎င်းကန့်သတ်ချက်များ အဆုံးတိုင်ခဲ့သည်။ (တမန်တော် ၁၀:၉-၁၆; ဧဖက် ၂:၁၅) ယေဟောဝါအား ဝတ်ပြုကိုးကွယ်ရာ၌ အဘယ် တိရစ္ဆာန်ကို ပူဇော်ဖို့ သင့်လျော်ကြောင်း နောဧ သိရှိထားပုံရသည်။ အကြောင်းမှာ သင်္ဘောပေါ်မှ ဆင်းသည်နှင့် သူသည် “ထာဝရဘုရားအဖို့ ယဇ်ပလ္လင်ကို တည်ပြီးမှ စင်ကြယ်သောသား၊ စင်ကြယ်သော ငှက်အမျိုးမျိုးထဲက ယူ၍ ယဇ်ပလ္လင်ပေါ်မှာ မီးရှို့သောယဇ်ကို ပူဇော်လေ၏။”—ကမ္ဘာဦး ၈:၂၀။
(ကမ္ဘာဦး ၇:၁၁) နောဧ အသက် ၆၀၀ ပြည့်တဲ့နှစ်၊ ဒုတိယလ၊ ၁၇ ရက်နေ့မှာ ကောင်းကင်မှာရှိတဲ့ ရေထုကြီး ဒလဟော ရွာချပြီး ကောင်းကင်ရေတံခါးတွေ ပွင့်ထွက်သွားတယ်။
ကမ္ဘာဦးကျမ်းမှ ပေါ်လွင်ချက်များ—၁
၇:၁၁—ကမ္ဘာချီရေလွှမ်းမိုးစေသော ရေများသည် အဘယ်မှ လာသနည်း။ ဒုတိယ ဖန်ဆင်းရာကာလ၊ သို့မဟုတ် “နေ့” အတွင်း၊ ကမ္ဘာ့လေထု “မိုးမျက်နှာကြက်” ဖြစ်ပေါ်လာသောအခါ “မိုးမျက်နှာကြက်အောက်၌” ရှိသော ရေနှင့် “မိုးမျက်နှာကြက်အပေါ်၌” ရှိသော ရေများ တည်ရှိလာသည်။ (ကမ္ဘာဦး ၁:၆၊ ၇) “အောက်၌” ရှိသော ရေများမှာ မြေကြီးပေါ်၌ ရှိထားနှင့်ပြီး ဖြစ်သည်။ “အပေါ်၌” ရှိသော ရေများမှာ မြေမျက်နှာပြင်အထက်တွင် ဆိုင်းနေသော ရေငွေ့ထုကြီး ဖြစ်ပြီး “ကြီးစွာသော နက်နဲရာ ရေပေါက်ရေတွင်းတို့” ဖြစ်လာသည်။ အဆိုပါ ရေများသည် နောဧခေတ်တွင် မြေပေါ် ရွာသွန်းခဲ့သည်။
ကျမ်းစာဖတ်ရှုခြင်း
ဇန်နဝါရီ ၂၇–ဖေဖော်ဝါရီ ၂
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၉-၁၁
‘ကမ္ဘာပေါ်က လူတွေဟာ ဘာသာစကား တစ်မျိုးတည်း ပြောကြတယ်’
(ကမ္ဘာဦး ၁၁:၁-၄) အဲဒီအချိန်တုန်းက ကမ္ဘာပေါ်မှာရှိတဲ့ လူတွေဟာ ဘာသာစကား တစ်မျိုးတည်း၊ စကားအသုံးအနှုန်း တစ်မျိုးတည်း ပြောကြတယ်။ ၂ အရှေ့အရပ်ကို လူတွေ ခရီးသွားတဲ့အခါ ရှိနာပြည်မှာ ချိုင့်ဝှမ်းလွင်ပြင်တစ်ခုကို တွေ့ပြီး အဲဒီမှာ အခြေချနေထိုင်တယ်။ ၃ သူတို့က “အုတ်တွေ ဖုတ်ကြစို့” လို့ ပြောတယ်။ ကျောက်အစား အုတ်၊ အင်္ဂတေအစား ကတ္တရာစေးကို သုံးကြတယ်။ ၄ ပြီးတော့ “မြို့တစ်မြို့ တည်ကြစို့။ မိုးထိအောင် မြင့်တဲ့ ရဲတိုက်ကို ဆောက်ပြီး နာမည်ကျော်အောင် လုပ်ကြစို့။ ဒီလိုမှမလုပ်ရင် ငါတို့ ကမ္ဘာမြေအနှံ့ ကွဲလွင့်ကုန်မယ်” လို့ ပြောကြတယ်။
it-1 ၂၃၉
မဟာဗာဗုလုန်
ရှေးခေတ် ဗာဗုလုန်ရဲ့ စရိုက်လက္ခဏာများ။ ရှိနာလွင်ပြင်မှာ ဗာဗုလုန်မြို့ကို တည်တာနဲ့ ဘေဘယ်ရဲတိုက် ဆောက်ဖို့ ကြိုးစားတာက တစ်ချိန်တည်းမှာ ဖြစ်ပျက်ခဲ့တယ်။ (က ၁၁:၂-၉) ရဲတိုက်နဲ့ မြို့ကို ဆောက်လုပ်တာက ဘုရားနာမည်ကို ချီးမြှောက်ဖို့ မဟုတ်ဘဲ ဆောက်လုပ်သူတွေ မိမိတို့ “နာမည်ကျော်အောင် လုပ်” ဖို့ ဖြစ်တယ်။ ဇိဂရက်မျှော်စင်ရဲတိုက်တွေကို ရှေးခေတ်ဗာဗုလုန် အပျက်အယွင်းတွေမှာပဲ တူးဖော်တွေ့ရှိတာ မဟုတ်ဘဲ မက်ဆိုပိုတေးမီးယားအနှံ့မှာ တွေ့ရတယ်။ အဲဒါတွေက ဘယ်လို ပုံစံမျိုးပဲ ဖြစ်ပါစေ အခြေခံအားဖြင့် မူလရဲတိုက်လိုပဲ ဝတ်ပြုရေးနဲ့ သက်ဆိုင်ပုံရတယ်။ ဗိမာန်ဆောက်လုပ်ခြင်းကို ရပ်စဲသွားအောင် ယေဟောဝါဘုရား ပြတ်ပြတ်သားသား လုပ်ဆောင်ခြင်းက မှားယွင်းတဲ့ ဘာသာတစ်ခုရဲ့ အစကို ပြစ်တင်ရှုတ်ချကြောင်း ထင်ရှားတယ်။ မြို့ကို “ရှုပ်ထွေးခြင်း” လို့ အဓိပ္ပာယ်ရှိတဲ့ ဘေဘလ် ဆိုပြီး ဟီဘရူးနာမည် ပေးထားပေမဲ့ ဆူမေးရီးယန်းနာမည် (ကာဒင်ဂျီရာ) နဲ့ အကေးဒီးယန်း နာမည် (ဘာဘီလု) နှစ်ခုစလုံးက “ဘုရားရဲ့ တံခါး” ဆိုတဲ့ အဓိပ္ပာယ် ရှိတယ်။ အဲဒီမြို့မှာ ဆက်နေထိုင်သူတွေဟာ ရှုတ်ချတဲ့ သဘောပါတဲ့ မြို့ရဲ့ နာမည်ကို ပြောင်းလိုက်ကြတယ်။ ဒါပေမဲ့ နာမည်အသစ်ကလည်း ဘာသာရေးနဲ့ ဆက်နွှယ်မှု ရှိနေဆဲပဲဆိုတာ ဖော်ပြတယ်။
it-2 ၂၀၂ ပိုဒ်. ၂
ဘာသာစကား
ရေလွှမ်းမိုးပြီးနောက်မှာ လူ့မိသားစု တချို့ဟာ နောဧနဲ့ သားတွေကို ဘုရား ပြောခဲ့တဲ့ အလိုတော်ကို ဆန့်ကျင်ပြီး တစ်နေရာမှာ စုပေါင်းနေဖို့ စီမံကိန်းတစ်ခု လုပ်ဆောင်ခဲ့ကြတယ်လို့ ကမ္ဘာဦးကျမ်းမှာ ဖော်ပြထားတယ်။ (က ၉:၁) အရပ်ရပ် ပျံ့နှံ့သွားပြီး “ကမ္ဘာမြေကို ပြည့်စေ” မယ့်အစား လူ့အဖွဲ့အစည်းကို ဗဟိုကနေ ချုပ်ကိုင်ဖို့၊ မက်ဆိုပိုတေးမီးယားဒေသက ရှိနာလွင်ပြင်လို့ ခေါ်တဲ့နေရာမှာ အခြေချနေထိုင်ဖို့ ဆုံးဖြတ်ခဲ့ကြတယ်။ အဲဒီနေရာဟာ ဘာသာရေး ရဲတိုက်တစ်ခုနဲ့အတူ ဘာသာရေး အချက်အချာနေရာတစ်ခု ဖြစ်လာတာ ထင်ရှားတယ်။—က ၁၁:၂-၄။
(ကမ္ဘာဦး ၁၁:၆-၈) ဒါကြောင့် ယေဟောဝါက “သူတို့တစ်တွေ လူတစ်မျိုးတည်း၊ ဘာသာစကားတစ်မျိုးတည်း ဖြစ်နေလို့ ဒီလိုလုပ်နေကြတာပါလား။ ဒီလိုသာဆိုရင် သူတို့ စိတ်ကူးထားတဲ့အတိုင်း လုပ်နိုင်တော့မှာပဲ။ ၇ ဒီတော့ ငါတို့ ဆင်းသွားပြီး သူတို့ အချင်းချင်း နားမလည်စေဖို့ ဘာသာစကားကို ရှုပ်ထွေးအောင် လုပ်ကြစို့” လို့ ပြောတယ်။ ၈ ယေဟောဝါက သူတို့ကို ကမ္ဘာမြေအနှံ့ ကွဲလွင့်စေတဲ့အတွက် မြို့တည်ဆောက်တဲ့ လုပ်ငန်း ရပ်စဲသွားတယ်။
it-2 ၂၀၂ ပိုဒ်. ၃
ဘာသာစကား
အနန္တတန်ခိုးရှင် ဘုရားသခင်ဟာ သူတို့ရဲ့ ရောင့်တက်တဲ့ အစီအစဉ်ကို ပျက်ပြားစေဖို့ သူတို့ သုံးနေတဲ့ ဘာသာစကားကို ရှုပ်ထွေးစေခြင်းအားဖြင့် လူတွေကို ကွဲပြားစေခဲ့တယ်။ သူတို့ရဲ့ စီမံကိန်းကို ဆက်လုပ်ဆောင်ဖို့ မဖြစ်နိုင်တော့လို့ လူတွေဟာ ကမ္ဘာအနှံ့ ကွဲလွင့်သွားကြတယ်။ ဘာသာစကား ရှုပ်ထွေးသွားလို့ မှားယွင်းတဲ့ ရည်မှန်းချက်၊ ဘုရားကို ပုန်ကန်တဲ့ ရည်မှန်းချက်ကို အကောင်အထည် ဖော်ဖို့ နှောင့်နှေးသွား၊ အတားအဆီး ဖြစ်သွားတယ်။ အကြောင်းကတော့ ရည်မှန်းချက်ကြီးတဲ့ အစီအစဉ်မှာ လူသားတွေရဲ့ ဉာဏစွမ်းရည်၊ ကာယစွမ်းရည်ကို ပေါင်းစပ်အသုံးပြုဖို့ အကန့်အသတ် ဖြစ်သွားတယ်။ ဘုရားဆီက မဟုတ်ဘဲ လူ့အတွေ့အကြုံ၊ လေ့လာမှုကနေ ရတဲ့ အသိပညာတွေ ပေါင်းစည်းဖို့ဆိုတာကလည်း ဘာသာစကား ကွဲပြားသွားတဲ့အတွက် အခက်တွေ့သွားတယ်။ (ဒေ ၇:၂၉၊ တရ ၃၂:၅ တို့နဲ့ နှိုင်းယှဉ်ပါ။) ဘာသာစကား ရှုပ်ထွေးမှုကြောင့် လူ့ဘောင်အဖွဲ့အစည်း ကွဲပြားသွားတဲ့အတွက် လူ့ဘောင်အဖွဲ့အစည်းကို အန္တရာယ် ကျရောက်စေနိုင်တဲ့၊ ထိခိုက်နစ်နာစေတဲ့ ပန်းတိုင်တွေ အကောင်အထည် ဖော်ရာမှာ နှောင့်နှေးကြန့်ကြာသွားတယ်။ (က ၁၁:၅-၉။ ရှာ ၈:၉၊ ၁၀ နဲ့ နှိုင်းယှဉ်ပါ။) အခုခေတ်မှာ လောကအသိပညာနဲ့ အဲဒါကို လူတွေ တလွဲ သုံးနေတာတွေရဲ့ ဆိုးကျိုးကို စဉ်းစားကြည့်လိုက်တဲ့အခါ ဘေဘလ်ရဲတိုက် ဆောက်တာကို မတားဆီးဘဲ ကြီးထွားဖို့ ခွင့်ပြုလိုက်ရင် ဘာတွေ ဖြစ်လာမလဲဆိုတာ ဘုရား ကြိုမြင်မှန်း သဘောပေါက်စေတယ်။
(ကမ္ဘာဦး ၁၁:၉) ယေဟောဝါက လူတွေရဲ့ ဘာသာစကားကို ရှုပ်ထွေးစေခဲ့တယ်။ ယေဟောဝါက သူတို့ကို ကမ္ဘာမြေအနှံ့ ကွဲလွင့်စေခဲ့တယ်။ ဒါကြောင့် အဲဒီမြို့ဟာ ဘေဘယ်လို့ နာမည်တွင်သွားတယ်။
it-2 ၄၇၂
နိုင်ငံများ
ဆက်သွယ်ရေး အတားအဆီးတွေ၊ ကိုယ်ပိုင် ယဉ်ကျေးမှုကနေ ထွန်းကားလာတဲ့ ဘာသာစကားတွေ၊ အနုပညာတွေ၊ ဓလေ့ထုံးစံတွေ၊ အမူအကျင့်တွေ၊ ဘာသာတရားတွေနဲ့ ခွဲခြားထားတယ်။ နိုင်ငံတိုင်းမှာ ကိုယ်ပိုင်နည်း ကိုယ်ပိုင်ဟန်တွေ ရှိကြတယ်။ (ဝ ၁၈:၃) ဘုရားသခင်နဲ့ ကင်းကွာနေကြတဲ့ လူတွေဟာ ဒဏ္ဍာရီလာ နတ်ဘုရားတွေရဲ့ ရုပ်တုတွေကို ဖန်တီးထုလုပ်ကြတယ်။—တရ ၁၂:၃၀။ ၂ဘု ၁၇:၂၉၊ ၃၃။
ရှာဖွေလေ့လာ ဘုရားရေးရာရတနာ
(ကမ္ဘာဦး ၉:၂၀-၂၂) နောဧက လယ်ယာလုပ်ကိုင်ပြီး စပျစ်ခြံ စိုက်ပျိုးတယ်။ ၂၁ တစ်နေ့၊ သူ စပျစ်ဝိုင် သောက်ပြီး မူးလာတဲ့အခါ တဲထဲမှာ အဝတ်ဗလာ ဖြစ်နေတယ်။ ၂၂ ခါနန်ရဲ့ အဖေ ဟာမက နောဧ အဝတ်ဗလာ ဖြစ်နေတာကို တွေ့သွားပြီး အပြင်မှာရှိတဲ့ အစ်ကိုနှစ်ယောက်ကို ပြောပြတယ်။
(ကမ္ဘာဦး ၉:၂၄၊ ၂၅) နောဧက အမူးပြေပြီး နိုးလာတော့ သားထွေးရဲ့ လုပ်ရပ်ကို သိသွားတယ်။ ၂၅ ဒါနဲ့ နောဧက “ခါနန်ဟာ ကျိန်စာသင့်ပါစေ။ ညီအစ်ကိုတွေဆီမှာ အနိမ့်ကျဆုံးကျွန် ဖြစ်ပါစေ” လို့ ပြောတယ်။
it-1 ၁၀၂၃ ပိုဒ်. ၄
ဟာမ
ခါနန်ဟာ အဖြစ်အပျက်မှာ ကိုယ်တိုင် ပါဝင်ခဲ့ပြီး သူ့အဖေ ဟာမက သူ့ကို ဆုံးမဖို့ ပျက်ကွက်ခဲ့တာ ဖြစ်နိုင်တယ်။ ဒါမှမဟုတ် ဟာမနဲ့ သားဖြစ်သူ ခါနန်ရဲ့ မကောင်းတဲ့ သဘောထားကို ခါနန်ကနေ ဆင်းသက်လာမယ့် ခါနန်လူမျိုးမှာလည်း တွေ့ရမယ်ဆိုတာ နောဧ ကြိုမြင်ပြီး ပရောဖက်ပြုခဲ့တာ ဖြစ်နိုင်တယ်။ ရှေမကနေ ဆင်းသက်တဲ့ အစ္စရေးတွေ ခါနန်လူမျိုးကို အနိုင်ရတဲ့အခါ အဲဒီကျိန်စာ တစ်စိတ်တစ်ပိုင်း ပြည့်စုံခဲ့တယ်။ ဖျက်ဆီးမခံရတဲ့သူတွေ (ဥပမာ၊ ဂိဗောင်မြို့သားတွေ [ယရ ၉]) က အစ္စရေးတွေရဲ့ ကျွန် ဖြစ်လာတယ်။ ရာစုနှစ်တွေ ကုန်လွန်ပြီးနောက် ဟာမရဲ့ သား ခါနန်ကနေ ဆင်းသက်လာသူတွေဟာ ယာဖက်ကနေ ဆင်းသက်လာတဲ့ မီဒိုပါးရှား၊ ဂရိ၊ ရောမတို့ရဲ့ လက်အောက်ကို ကျရောက်သွားချိန်မှာလည်း အဲဒီကျိန်စာ ထပ်ပြည့်စုံလာပြန်တယ်။
(ကမ္ဘာဦး ၁၀:၉၊ ၁၀) ယေဟောဝါကို ဆန့်ကျင်တဲ့ ခွန်အားကြီးမုဆိုး ဖြစ်လာတယ်။ ဒါကြောင့် “ယေဟောဝါကို ဆန့်ကျင်တဲ့ ခွန်အားကြီးမုဆိုး နိမ်ရောဒလို လူစားမျိုး” ဆိုတဲ့ ဆိုရိုးစကား ပေါ်လာတယ်။ ၁၀ ရှိနာပြည်မှာရှိတဲ့ ဘေဘယ်၊ ဧရက်၊ အဲကတ်၊ ကာလနေမြို့ဟာ သူဦးဆုံး တည်ထောင်ခဲ့တဲ့ မြို့တွေပဲ။
it-2 ၅၀၃
နိမ်ရောဒ
နိမ်ရောဒ ဦးဆုံး တည်ထောင်ခဲ့တဲ့ မြို့တွေထဲမှာ ရှိနာပြည်က ဘေဘယ်၊ ဧရက်၊ အဲကတ်၊ ကာလနေမြို့တွေ ပါတယ်။ (က ၁၀:၁၀) ဒါကြောင့် နိမ်ရောဒရဲ့ ညွှန်ကြားချက်အရ ဘေဘယ်မြို့နဲ့ ရဲတိုက်ကို တည်ဆောက်ခဲ့တာ ဖြစ်နိုင်တယ်။ အဲဒီကောက်ချက်က ဂျူးထုံးတမ်းစဉ်လာနဲ့လည်း ကိုက်ညီတယ်။ ဂျိုစီဖတ်စ် ဒီလို ရေးခဲ့တယ်– “[နိမ်ရောဒဟာ] လူတွေ ဘုရားကို မကြောက်တော့ဘဲ မိမိရဲ့ တန်ခိုးအာဏာကို အားကိုးလာအောင် ပြုလုပ်ခြင်းအားဖြင့် တဖြည်းဖြည်း နိုင်ထက်စီးနင်း ပြုမူလာတယ်။ ဘုရားက ကမ္ဘာကို နောက်တစ်ခါ ရေလွှမ်းမိုးစေမယ်ဆိုရင် သူ လက်စားချေမယ်လို့ ခြိမ်းခြောက်ခဲ့တယ်။ ဖျက်ဆီးခံခဲ့ရတဲ့ ဘိုးဘေးတွေအတွက် လက်စားချေဖို့ ရေမမြှုပ်နိုင်တဲ့ ရဲတိုက်ကြီးကို ဆောက်လုပ်မှာ ဖြစ်တယ်။ ဘုရားသခင်ကို နာခံတာက ကျွန်ခံနေတာလို့ လူတွေ ယူဆလာပြီး [နိမ်ရောဒ] ရဲ့ အကြံပြုချက်အတိုင်း အားတက်သရော လုပ်ဆောင်ခဲ့ကြတယ်။ ဒီလိုနဲ့ သူတို့ ရဲတိုက်ကြီး ဆောက်ဖို့ စီစဉ်ခဲ့ကြတယ် . . . ထင်ထားတာထက် ပိုမြန်မြန် လုပ်ဆောင်ခဲ့ကြတယ်။”—ဂျူးတို့၏ ရှေးဟောင်းနှောင်းဖြစ်များ၊ ၁၊ ၁၁၄၊ ၁၁၅) (၄၊ ၂၊ ၃)။
ကျမ်းစာဖတ်ရှုခြင်း