ယေဟောဝါ၏နှုတ်မြွက်စကားတော်သည်အသက်ရှင်၏

ကမ္ဘာဦးကျမ်းမှ ပေါ်လွင်ချက်များ—၂

ကမ္ဘာဦးကျမ်းတွင် ပထမလူသားအာဒံကို ဖန်ဆင်းချိန်မှ ယာကုပ်၏သား ယောသပ် သေဆုံးချိန်အထိ လူ့သမိုင်း နှစ်ပေါင်း ၂,၃၆၉ ကာလကို ခြုံငုံဖော်ပြထား၏။ ဤမဂ္ဂဇင်း၏ရှေ့စာစောင်တွင် ဖန်ဆင်းခြင်းမှ ဘေဘယ်လ်ရဲတိုက် တည်ဆောက်ခြင်းပါဝင်သော ပထမအခန်းကြီး ၁၀ ခုအပြင် အခန်းကြီး ၁၁ ခုမြောက်၏ အခန်းငယ် ၉ အထိ ဆွေးနွေးတင်ပြထားသည်။a ဤဆောင်းပါးတွင်မူ အာဗြဟံ၊ ဣဇာက်၊ ယာကုပ်၊ ယောသပ်တို့နှင့် ဘုရားသခင်ဆက်ဆံရေးနှင့်ဆက်စပ်သည့် ကမ္ဘာဦးကျမ်း၏ကျန်အပိုင်းများမှ ပေါ်လွင်ချက်များကို သုံးသပ်တင်ပြထားသည်။

အာဗြဟံ ဘုရားသခင်၏မိတ်ဆွေဖြစ်လာ

(ကမ္ဘာဦး ၁၁:၁၀–၂၃:၂၀)

ရေလွှမ်းမိုးပြီးနောက် နှစ်ပေါင်း ၃၅၀ ခန့်တွင် ဘုရားသခင် အလွန်ရင်းနှီးချစ်ခင်သူတစ်ဦးသည် နောဧ၏သား ရှေမ၏မျိုးဆက်မှ မွေးဖွားလာသည်။ သူ၏အမည်ကား အာဗြံဖြစ်ပြီး နောက်ပိုင်းတွင် အာဗြဟံဟူ၍ အမည်ပြောင်းလိုက်သည်။ ဘုရားသခင်၏အမိန့်တော်အရ အာဗြံသည် ခါလဒဲပြည်သားတို့နေသော ဥရမြို့မှထွက်၍ အာဗြံနှင့် သူ၏သားစဉ်မြေးဆက်များကို ပေးမည်ဟု ယေဟောဝါကတိပြုခဲ့သည့်ပြည်တွင် တဲထိုး၍နေလေ၏။ အာဗြဟံ၏ယုံကြည်ခြင်းနှင့် နာခံမှုတို့ကြောင့် “ဘုရားသခင်၏အဆွေ” ဟူ၍ အခေါ်ခံရသည်။—ယာကုပ် ၂:၂၃။

ယေဟောဝါသည် လောတနှင့် သူ၏သမီးများကို ကယ်တင်ခဲ့သော်လည်း သောဒုံနှင့် ၎င်းအနီးအနားရှိ မြို့များမှ ဆိုးသွမ်းသူများကို အရေးယူခဲ့၏။ အာဗြဟံ၏သား ဣဇာက်မွေးဖွားလာချိန်တွင် ဘုရားသခင်၏ကတိတော်တစ်ခု ပြည့်စုံလာ၏။ နှစ်အတန်ကြာလေသော် ယေဟောဝါသည် ဤသားကို ယဇ်ပူဇော်ရာအဖြစ် ပူဇော်ခိုင်းချိန်တွင် အာဗြဟံ၏ယုံကြည်ခြင်း စမ်းသပ်ခံခဲ့ရ၏။ အာဗြဟံသည် နာခံရန် အသင့်ရှိသော်လည်း ကောင်းကင်တမန်တစ်ပါးက ဟန့်တားလိုက်၏။ အာဗြဟံသည် ယုံကြည်ခြင်းရှိသူတစ်ဦးဖြစ်ကြောင်း ယုံမှားဖွယ်မရှိချေ၊ ယင်းကြောင့် သူ၏မျိုးနွယ်အားဖြင့် လူမျိုးအပေါင်း ကောင်းချီးခံစားရလိမ့်မည်ဟု အာမခံချက်ရခဲ့သည်။ ချစ်မြတ်နိုးရသောဇနီး စာရာသေဆုံးသွားသောအခါ အာဗြဟံအလွန်ဝမ်းနည်းကြေကွဲခဲ့သည်။

ကျမ်းစာမေးခွန်းများ အဖြေ–

၁၂:၁-၃—အာဗြဟံ၏ပဋိညာဉ်သည် မည်သည့်အချိန်တွင် စတင်အကျိုးသက်ရောက်၍ မည်မျှကြာရှည်သနည်း။ “[အာဗြံ] အားဖြင့်လည်း လူမျိုးအပေါင်းတို့သည် ကောင်းချီးမင်္ဂလာကို ခံရကြလိမ့်မည်” ဟူ၍ အာဗြံနှင့် ယေဟောဝါဖွဲ့ခဲ့သော ပဋိညာဉ်သည် ဥဖရတ်မြစ်ကို ဖြတ်ကူး၍ ခါနာန်ပြည်ထဲဝင်ချိန်တွင် စတင်အတည်ပြုခဲ့ပုံရှိ၏။ ထိုအချိန်သည် အီဂျစ်ပြည်မှ ဣသရေလလူမျိုးကို မကယ်နုတ်မီ နှစ်ပေါင်း ၄၃၀ ကဖြစ်သည့် ဘီ.စီး.အီး. ၁၉၄၃၊ နိသန်လ ၁၄ ရက်ကဖြစ်မည်။ (ထွက်မြောက်ရာ ၁၂:၂၊ ၆၊ ၇၊ ၄၀၊ ၄၁) အာဗြဟံ၏ပဋိညာဉ်သည် “ထာဝရပဋိညာဉ်” ဖြစ်၏။ ကမ္ဘာမြေမှ မိသားစုများ ကောင်းချီးမခံစားရမီ၊ ဘုရားသခင်၏ရန်သူအားလုံး ဖျက်ဆီးမခံရမချင်း ယင်းပဋိညာဉ် အတည်ဖြစ်နေရမည်။—ကမ္ဘာဦး ၁၇:၇; ၁ ကောရိန္သု ၁၅:၂၃-၂၆။

၁၅:၁၃—အာဗြံ၏သားစဉ်မြေးဆက်များ ခံရမည့် ကြိုဟောထားသော အနှစ် ၄၀၀ ဆင်းရဲရာကာလသည် အဘယ်အချိန်တွင် ပြည့်စုံခဲ့သနည်း။ အဆိုပါဆင်းရဲရာကာလသည် အာဗြဟံ၏သားဣဇာက် နို့ဖြတ်သည့် ၅ နှစ်ခန့်အရွယ်တွင် သူ၏ဖတူမိကွဲအစ်ကို ၁၉ နှစ်သား ဣရှမေလက သူ့ကို “ဆဲရေး” သည့်အချိန် ဘီ.စီ.အီး. ၁၉၁၃ ခုနှစ်တွင် စတင်ခဲ့သည်။ (ကမ္ဘာဦး ၂၁:၈-၁၄; ဂလာတိ ၄:၂၉) အီဂျစ်ကျွန်သပေါက်ဘဝမှ ဣသရေလလူတို့ လွတ်မြောက်ခဲ့သည့် ဘီ.စီ.အီး. ၁၅၁၃ ခုနှစ်တွင် အဆုံးတိုင်ခဲ့သည်။

၁၆:၂—စာရဲသည် မိမိ၏ကျွန်မ ဟာဂရကို အာဗြံ၏ဇနီးအဖြစ် ပေးဆက်ခြင်းသည် လျောက်ပတ်သလော။ ထိုခေတ်အခါ၏ ဓလေ့ထုံးစံအရ မြုံနေသောဇနီးသည် ခင်ပွန်း၏အမွေဆက်ခံမည့်သူရှိစေရန် မယားငယ်ပေးဆက်ဖို့ တာဝန်ရှိသည်နှင့်အညီ စာရဲပေးဆက်ခဲ့ခြင်းဖြစ်သည်။ မယားပြိုင်ယူသော အလေ့အထသည် ကာဣန၏ဆွေစဉ်မျိုးဆက်တွင် ဦးဆုံးပေါ်ပေါက်လာသည်။ နောက်ဆုံး၌ ထိုသို့ပြုခြင်းသည် ဓလေ့ထုံးစံတစ်ခုဖြစ်လာရာ ယေဟောဝါအား ဝတ်ပြုကိုးကွယ်သူအချို့ပင် ထိုအကျင့်ရှိလာကြသည်။ (ကမ္ဘာဦး ၄:၁၇-၁၉; ၁၆:၁-၃; ၂၉:၂၁-၂၈) သို့ရာတွင် ယေဟောဝါသည် ကိုယ်တော်၏ တစ်လင်တစ်မယားယူ မူလစံနှုန်းကို တစ်ခါမျှ စွန့်လွှတ်တော်မမူခဲ့ချေ။ (ကမ္ဘာဦး ၂:၂၁၊ ၂၂) “များပြားစွာမွေးဖွားလျက် မြေကြီးကို ပြည့်စေကြလော့” ဟူ၍ ထပ်မံအမိန့်ပေးခံရသော နောဧနှင့် သူ၏သားများသည် တစ်လင်တစ်မယားသာ ပေါင်းဖက်သူများဖြစ်ကြသည်။ (ကမ္ဘာဦး ၇:၇; ၉:၁; ၂ ပေတရု ၂:၅) ထို့ပြင် ယေရှုခရစ်သည် အဆိုပါတစ်လင်တစ်မယားစံနှုန်းကို ပြန်လည်ထောက်ခံခဲ့သည်။—မဿဲ ၁၉:၄-၈; ၁ တိမောသေ ၃:၂၊ ၁၂။

၁၉:၈—လောတသည် သောဒုံမြို့သားများကို မိမိ၏သမီးများ ပေးဆက်ခြင်းသည် မမှားသလော။ အရှေ့တိုင်းဥပဒေအရ မိမိအိမ်ရှိ ဧည့်သည်များကို ကာကွယ်ပေးရန် အိမ်ရှင်၏တာဝန်ဖြစ်ပြီး လိုအပ်လာလျှင် မိမိအသက်ကိုပင် ပေးရ၏။ လောတသည် ထိုသို့ပြုရန် အသင့်ရှိခဲ့သည်။ သူသည် သတ္တိရှိရှိ လူအုပ်နှင့်ထွက်တွေ့ပြီး တံခါးကိုပိတ်ကာ တစ်ဦးတည်း ရင်ဆိုင်ခဲ့၏။ သမီးများကို လောတပေးအပ်ချိန်တွင် မိမိ၏ဧည့်သည်များသည် ဘုရားသခင်ထံတော်မှ တမန်များဖြစ်ကြောင်း သိနေပုံရှိပြီး အီဂျစ်ပြည်တွင် မိမိ၏အဒေါ် စာရာကို ဘုရားသခင် ကာကွယ်ပေးခဲ့သကဲ့သို့ သမီးများကိုလည်း ကာကွယ်ပေးမည်ဟု သူဆင်ခြင်ခဲ့ပေမည်။ (ကမ္ဘာဦး ၁၂:၁၇-၂၀) သူထင်သည့်အတိုင်းပင် လောတနှင့် သူ၏သမီးများသည် ဘေးကင်းလုံခြုံခဲ့ကြသည်။

၁၉:၃၀-၃၈—လောတ အရက်မူးပြီး သမီးနှစ်ဦး၏သားတို့ ဖခင်ဖြစ်လာခြင်းကို ယေဟောဝါ အရေးမယူခွင့်လွှတ်ခဲ့သလော။ ယေဟောဝါသည် သွေးချင်းစပ်ယှက်မှုကိုလည်းကောင်း၊ အရက်မူးခြင်းကိုလည်းကောင်း ခွင့်မလွှတ်ချေ။ (ဝတ်ပြုရာ ၁၈:၆၊ ၇၊ ၂၉; ၁ ကောရိန္သု ၆:၉၊ ၁၀) သောဒုံမြို့သားများ၏ “မတရားသောအမှုများ” ကိုလောတအမှန်ပင်ရွံမုန်းခဲ့သည်။ (၂ ပေတရု ၂:၆-၈) သမီးများက လောတကို အရက်မူးအောင်တိုက်သည့်အချက်ကပင် လောတအရက်မမူးလျှင် သူတို့နှင့်လိင်ဆက်ဆံမည်မဟုတ်ကြောင်း ဖော်ပြ၏။ တိုင်းတစ်ပါးတွင် မိမိတို့ရောက်ရှိနေကြရာ လောတ၏အမျိုး ဆက်တည်တံ့ရေးအတွက် ဤနည်းတစ်နည်းသာရှိတော့သည်ဟု သူ၏သမီးများက ယူမှတ်ခဲ့ကြသည်။ (မောဘမှဆင်းသက်သည့်) မောဘအမျိုးသားများနှင့် (ဗေနမ္မိမှဆင်းသက်သည့်) အမ္မုန်အမျိုးသားများသည် အာဗြဟံ၏သားစဉ်မြေးဆက် ဣသရေလအမျိုးသားများနှင့် အမျိုးတော်စပ်ပုံကို ဖော်ပြရန် ထိုအကြောင်းကို သမ္မာကျမ်းစာတွင် မှတ်တမ်းတင်ထားစေခြင်းဖြစ်သည်။

ကျွန်ုပ်တို့အတွက် သင်ခန်းစားများ–

၁၃:၈၊ ၉။ သဘောထားကွဲလွဲမှုများကို အာဗြဟံဖြေရှင်းခဲ့ပုံသည် အလွန်ကောင်းသောပုံနမူနာဖြစ်သည်တကား! အမြတ်ထုတ်ရန်၊ ကိုယ့်အကြိုက်ရွေးရန်၊ သို့မဟုတ် မာနကြီးသည့်အတွက် ဆက်ဆံရေးအသင့်အတင့်ရှိခြင်းကို ဘယ်တော့မျှ မစွန့်လွှတ်သင့်ချေ။

၁၅:၅၊ ၆။ အာဗြဟံသည် အသက်ကြီးလာ၍ သားမရသေးသည့်အခါ ယင်းကိစ္စကို သူ၏ဘုရားသခင်အား တင်ပြခဲ့သည်။ ယေဟောဝါကလည်း သူ့ကို စိတ်ချစေခဲ့သည်။ ရလဒ်ကားအဘယ်နည်း။ အာဗြဟံသည် ‘ယေဟောဝါကို ယုံကြည်’ လေ၏။ ကျွန်ုပ်တို့လည်း ယေဟောဝါအား ရင်ဖွင့်ဆုတောင်းမည်၊ သမ္မာကျမ်းစာပါ ကိုယ်တော်၏အာမခံချက်များကို လက်ခံမည်၊ နာခံမည်ဆိုလျှင် ကျွန်ုပ်တို့၏ယုံကြည်ခြင်းသည် ခိုင်ခံ့လာပါလိမ့်မည်။

၁၅:၁၆။ ယေဟောဝါသည် အာမောရိလူမျိုးတို့ (သို့မဟုတ်၊ ခါနာန်လူမျိုးတို့) ကိုလူမျိုးလေးဆက်လွန်သည့်အထိ တရားမစီရင်ဘဲနေခဲ့သည်။ အဘယ်ကြောင့်နည်း။ အကြောင်းမှာ ကိုယ်တော်သည် စိတ်ရှည်တော်မူသော ဘုရားသခင်ဖြစ်၏။ တိုး၍ကောင်းလာစရာအကြောင်း မရှိနိုင်တော့သည့်အထိ ကိုယ်တော်စောင့်မျှော်ခဲ့သည်။ ယေဟောဝါနည်းတူ ကျွန်ုပ်တို့လည်း စိတ်ရှည်ဖို့လို၏။

၁၈:၂၃-၃၃။ ယေဟောဝါသည် လူတို့ကို မစဉ်းစားမဆင်ခြင်ဘဲ မဖျက်ဆီးပါ။ ဖြောင့်မတ်သူများကို ကိုယ်တော် ကာကွယ်ပေး၏။

၁၉:၁၆။ လောတသည် “ဖင့်နွှဲ” နေသောအခါ ကောင်းကင်တမန်များက သူနှင့် သူ၏မိသားစုကို သောဒုံမြို့ပြင်သို့ ဆွဲထုတ်ခေါ်သွားခဲ့ကြရသည်။ ဤဆိုးညစ်သောလောက၏ဆုံးခန်းကို စောင့်မျှော်နေကြစဉ် ကျွန်ုပ်တို့၏အရေးတကြီးသဘောထားကို မပျောက်လွင့်သွားစေခြင်းသည် ပညာရှိရာရောက်သည်။

၁၉:၂၆။ လောကတွင် ကျွန်ုပ်တို့ ချန်ရစ်ခဲ့သောအရာများကြောင့် အာရုံပျံ့လွင့်နေမည်၊ ၎င်းတို့ကို တမ်းတနေမည်ဆိုလျှင် တကယ်ပင်မိုက်မဲရာကျ၏!

ယာကုပ်တွင် သား ၁၂ ယောက်ရှိ

(ကမ္ဘာဦး ၂၄:၁–၃၆:၄၃)

အာဗြဟံသည် ယေဟောဝါကိုယုံကြည်သူ ရေဗက္ကနှင့် ဣဇာက်ကိုလက်ထပ်ပေးဖို့ စီစဉ်ခဲ့သည်။ အမြွှာညီအစ်ကို ဧသောနှင့်ယာကုပ်ကို သူမွေးဖွားခဲ့၏။ ဧသောသည် သူ၏သားဦးအရာကို တန်ဖိုးမထားဘဲ ယာကုပ်အား ရောင်းစားလိုက်ရာ နောက်ပိုင်းတွင် ဖခင်၏ကောင်းချီး ယာကုပ်ရရှိခဲ့၏။ ယာကုပ်သည် ပါဒနာရံပြည်သို့ ထွက်ပြေးသွားပြီး ထိုတွင် လေအာနှင့် ရာခေလတို့ကို အိမ်ထောင်ပြုလိုက်ရာ သူတို့ဖခင်၏သိုးအုပ်များကို အနှစ် ၂၀ ထိန်းကျောင်းပေးပြီး ထိုပြည်မှ မိသားစုလိုက်ထွက်ခွာသွားခဲ့သည်။ ယာကုပ်တွင် လေအာ၊ ရာခေလနှင့် သူတို့၏ကျွန်မနှစ်ဦးတို့မှမွေးသော သား ၁၂ ယောက်နှင့် သမီးများလည်းရှိ၏။ ယာကုပ်သည် ကောင်းကင်တမန်တစ်ပါးနှင့် နပန်းလုံးပြီး ကောင်းချီးရယူကာ သူ၏အမည်ကို ဣသရေလဟူ၍ ပြောင်းလိုက်သည်။

ကျမ်းစာမေးခွန်းများ အဖြေ–

၂၈:၁၂၊ ၁၃—“လှေကား” နှင့်ပတ်သက်သော ယာကုပ်အိပ်မက်၏အဓိပ္ပာယ်ကား အဘယ်နည်း။ ကျောက်တုံးများဖြင့်ပြုလုပ်ထားပုံရသော ဤ “လှေကား” သည်ကမ္ဘာမြေနှင့် ကောင်းကင်အကြား ဆက်သွယ်မှုရှိကြောင်း ထင်ရှားစေသည်။ ဘုရားသခင်၏ကောင်းကင်တမန်များသည် ထိုလှေကားနှင့် တက်လိုက်၊ ဆင်းလိုက်ပြုလုပ်ခြင်းက သူတို့သည် ယေဟောဝါနှင့် ကိုယ်တော်၏မျက်နှာသာရရှိသော လူသားများစပ်ကြား အရေးပါသောနည်းဖြင့် ဆောင်ရွက်ပေးကြောင်း ဖော်ပြ၏။—ယောဟန် ၁:၅၁။

၃၀:၁၄၊ ၁၅—ရာခေလသည် အနုဆေးသီးတချို့အတွက် ကိုယ်ဝန်ရရှိမည့်အခွင့်အရေးနှင့် အဘယ်ကြောင့်လဲလှယ်ခဲ့သနည်း။ ရှေးအချိန်က အနုဆေးသီးကို အိပ်ဆေးအဖြစ်၊ အကြောဆွဲရောဂါကို ကာကွယ်ဖို့၊ သို့မဟုတ် သက်သာစေဖို့ အသုံးပြုလေ့ရှိသည်။ ထို့ပြင် ဤအသီးသည် လိင်စိတ်နိုးကြွနိုင်စွမ်းရှိစေသည်၊ မျိုးဥအောင်စေသည်၊ သို့မဟုတ် ပဋိသန္ဓေစွဲကပ်စေသည်ဟုလည်း ယူမှတ်ကြ၏။ (ရှောလမုန်သီချင်း ၇:၁၃) ရာခေလ၏ရည်ရွယ်ချက်ကို သမ္မာကျမ်းစာက မဖော်ပြသော်လည်း ထိုအသီးများသည် သူ့ကို ကိုယ်ဝန်ရရှိစေနိုင်ပြီး အမြုံမဟု ကဲ့ရဲ့ပြစ်တင်ခံရတော့မည်မဟုတ်ဟု သူယူဆခဲ့ပေမည်။ သို့သော် နှစ်အနည်းငယ်ကြာပြီးနောက် ယေဟောဝါသည် သူ့ကို “သားဖွားသောအခွင့်” ပေးခဲ့သည်။—ကမ္ဘာဦး ၃၀:၂၂-၂၄။

ကျွန်ုပ်တို့အတွက် သင်ခန်းစာများ–

၂၅:၂၃။ ယေဟောဝါသည် သန္ဓေသား၏မျိုးရိုးဗီဇကို သိရှိနိုင်စွမ်းရှိ၍ ကိုယ်တော်၏ရည်ရွယ်ချက်များနှင့်စပ်လျဉ်း၍ အသုံးပြုလိုသူကို တင်ကြိုသိမြင်ရွေးချယ်နိုင်စွမ်းရှိ၏။ သို့တိုင် ကိုယ်တော်သည် တစ်ဦးချင်းစီ၏ နောက်ဆုံးကြမ္မာကို ကြိုတင်မစီရင်ချေ။—ဟောရှေ ၁၂:၃; ရောမ ၉:၁၀-၁၂။

၂၅:၃၂၊ ၃၃; ၃၂:၂၄-၂၉။ သားဦးအရာကို ယာကုပ်ရရှိလိုခြင်းနှင့် ကောင်းချီးရရန် ကောင်းကင်တမန်တစ်ပါးနှင့် တစ်ညလုံး နပန်းလုံးခြင်းတို့က သူသည် မြင့်မြတ်သောအရာများကို အမှန်တကယ် တန်ဖိုးထားလေးမြတ်ကြောင်း ဖော်ပြသည်။ ယေဟောဝါသည် မြင့်မြတ်သောအရာများဖြစ်သည့် ကိုယ်တော်နှင့် ကျွန်ုပ်တို့၏ဆက်ဆံရေး၊ ကိုယ်တော်၏အဖွဲ့အစည်း၊ ရွေးနုတ်ဖိုး၊ သမ္မာကျမ်းစာ၊ ဘုရားသခင့်နိုင်ငံတော်မျှော်လင့်ချက် အစရှိသည်တို့ကို ကျွန်ုပ်တို့အား အပ်နှင်းပေးထားသည်။ ၎င်းတို့ကို ယာကုပ်ကဲ့သို့ တန်ဖိုးထားလေးမြတ်ကြပါစို့။

၃၄:၁၊ ၃၀။ ဒိနသည် ယေဟောဝါအားမချစ်သူများနှင့် မိတ်ဖွဲ့ခြင်းကြောင့် ယာကုပ် “ညှဉ်းဆဲ” ခံခဲ့ရသည်။ ကျွန်ုပ်တို့၏အပေါင်းအသင်းများကို ပညာရှိရှိရွေးချယ်ရမည်။

အီဂျစ်ပြည်တွင် ယောသပ်ကို ယေဟောဝါကောင်းချီးပေး

(ကမ္ဘာဦး ၃၇:၁–၅၀:၂၆)

ယာကုပ်၏သားများသည် မနာလိုဝန်တိုစိတ်ကြောင့် သူတို့၏ညီ ယောသပ်ကို ကျွန်အဖြစ် ရောင်းလိုက်သည်။ အီဂျစ်ပြည်တွင် ယောသပ်သည် ဘုရားသခင်၏ကိုယ်ကျင့်တရားစံနှုန်းများကို တည်ကြည်စွာ၊ သတ္တိရှိစွာ စွဲကိုင်ထားသောကြောင့် ထောင်ချခံခဲ့ရသည်။ အတန်ကြာသော် ခုနစ်နှစ်အစာရေစာပေါများပြီး နောက်ခုနစ်နှစ်တွင် အစာခေါင်းပါးမည်ဟု ကြိုဟောထားသော ဖာရော၏အိပ်မက်ကို အဓိပ္ပာယ်ဖွင့်ပြရန် ထောင်မှလွှတ်ပေးခံရသည်။ ထိုအခါ ယောသပ်သည် အီဂျစ်ပြည်၏ရိက္ခာဝန်ဖြစ်လာလေသည်။ အစာခေါင်းပါးခြင်းကြောင့် အစာရေစာရှာဖွေရန် အီဂျစ်ပြည်သို့ သူ၏အစ်ကိုများ ရောက်ရှိလာ၏။ မိသားစု ပြန်ပေါင်းစည်းပြီး မြေသြဇာကောင်းမွန်သော ဂေါရှင်ပြည်တွင် အခြေချနေထိုင်ခဲ့ကြသည်။ ယာကုပ် သေခါနီးတွင် သားများကို ကောင်းချီးပေးကာ လာမည့်ရာစုနှစ်များတွင် ကောင်းချီးများစွာ ခံစားရဦးမည့် မျှော်လင့်ချက်ရှိစေသော ပရောဖက်ပြုချက်ကို ဖော်ပြ၏။ ယာကုပ်၏ရုပ်ကလာပ်ကို ခါနာန်ပြည်သို့ သယ်ဆောင်သင်္ဂြိုဟ်လေသည်။ ယောသပ်သည် အသက် ၁၁၀ တွင်ကွယ်လွန်သွားသောအခါ နောက်ဆုံးတွင် သူ၏ရုပ်ကလာပ်ကို ဆေးနှင့်ပြုပြင်ထားပြီး အတန်ကြာလေသော် ကတိထားရာပြည်သို့ သယ်ဆောင်သွားကြသည်။—ထွက်မြောက်ရာ ၁၃:၁၉။

ကျမ်းစာမေးခွန်းများ အဖြေ–

၄၃:၃၂—အီဂျစ်လူတို့သည် ဟေဗြဲလူတို့နှင့်အတူ အစာစားခြင်းကို အဘယ်ကြောင့် ရွံရှာကြသနည်း။ ဘာသာရေးစိတ်စွန်းကွက်မှုနှင့် လူမျိုးရေးမာနကြောင့်သာ ဖြစ်ပေမည်။ အီဂျစ်လူတို့သည် သိုးထိန်းများကိုလည်း ရွံရှာကြ၏။ (ကမ္ဘာဦး ၄၆:၃၄) အဘယ်ကြောင့်နည်း။ သိုးထိန်းများသည် အီဂျစ်၏အဆင့်အတန်းခွဲခြားမှုစနစ်တွင် အလွန်အဆင့်နိမ့်သူများဖြစ်ပေမည်။ သို့မဟုတ် ထွန်ယက်စိုက်ပျိုးနိုင်သောမြေ မများလှသောကြောင့် သိုးအုပ်များအတွက် စားကျက်ရှာဖွေသူများကို အီဂျစ်လူတို့က အထင်သေးခြင်းလည်း ဖြစ်နိုင်၏။

၄၄:၅—ယောသပ်သည် နိမိတ်ဖတ်ရန် ဖလားတစ်လုံးကို အမှန်ပင်အသုံးပြုခဲ့သလော။ ငွေဖလားနှင့် ယင်းနှင့်ပတ်သက်၍ ပြောဆိုခဲ့ရာသည် ဉာဏ်ဆင်မှုတစ်ခုဖြစ်ကြောင်း ထင်ရှား၏။ ယောသပ်သည် ယေဟောဝါအား သစ္စာရှိစွာဝတ်ပြုကိုးကွယ်သူတစ်ဦးဖြစ်သည်။ ဗင်ယာမိန်သည် ထိုခွက်ကို မခိုးသကဲ့သို့ ယောသပ်သည်လည်း နိမိတ်ဖတ်ရန် ယင်းကို အသုံးမပြုခဲ့ချေ။

၄၉:၁၀—“ရာဇလှံတံတော်” နှင့် “လက်ကိုင်တောင်ဝှေးတော်” တို့၏အဓိပ္ပာယ်ကား အဘယ်နည်း။ ရာဇလှံတံတော်ဟူသည် ရာဇအာဏာရှိသည့်အနေနှင့် ရှင်ဘုရင်ကိုင်ဆောင်သော တုတ်တံတိုဖြစ်၏။ လက်ကိုင်တောင်ဝှေးတော်မှာမူ တုတ်တံရှည်ဖြစ်၍ အမိန့်ပေးရန် သူ၌အာဏာရှိခြင်းကိုဆိုလိုသည်။ ယင်းတို့ကို ယာကုပ်ဖော်ပြရခြင်းမှာ ရှိလောမလာမီတိုင်အောင် တန်ခိုးအာဏာသည် ယုဒမျိုးနွယ်မှ မပျောက်မပျက်ရဟု ဆိုလိုနေကြောင်း ထင်ရှားသည်။ အဆိုပါယုဒ၏သားစဉ်မြေးဆက်မှာ ယေရှုခရစ်ဖြစ်၏၊ ယေဟောဝါသည် သူ့ကို ကောင်းကင်အုပ်ချုပ်မှုအာဏာ ပေးအပ်ထား၏။ ခရစ်တော်သည် ရာဇအာဏာဖြင့် အမိန့်ပေးပိုင်ခွင့်ရှိ၏။—ဆာလံ ၂:၈၊ ၉; ဟေရှာယ ၅၅:၄; ဒံယေလ ၇:၁၃၊ ၁၄။

ကျွန်ုပ်တို့အတွက် သင်ခန်းစာများ–

၃၈:၂၆။ ယုဒသည် မုဆိုးမဖြစ်သူ သူ၏ချွေးမတာမာအပေါ် ပြုမူဆက်ဆံပုံမှာ မှားယွင်းခဲ့သည်။ သို့သော် တာမာ ကိုယ်ဝန်ရခြင်းသည် မိမိကြောင့်ဖြစ်ကြောင်း ယုဒ သိရှိလာသောအခါ မိမိ၏အမှားကို နှိမ့်ချစွာ ဝန်ခံခဲ့သည်။ ကျွန်ုပ်တို့သည်လည်း မိမိတို့အမှားကို ချက်ချင်းဝန်ခံသင့်၏။

၃၉:၉။ ပေါတိဖာဇနီးကို ယောသပ်တုံ့ပြန်ပုံက ကိုယ်ကျင့်တရားနှင့်ပတ်သက်၍ သူ၏စဉ်းစားတွေးခေါ်မှုသည် ဘုရားသခင်နှင့်တစ်ထပ်တည်းဖြစ်ကြောင်း၊ သူ၏အသိစိတ်သည် ဘုရားသခင်၏မူများအတိုင်းဖြစ်ကြောင်း ဖော်ပြသည်။ အမှန်တရားနှင့်ပတ်သက်၍ တိကျမှန်ကန်သောအသိပညာ တိုးများလာသောအခါ ထိုနည်းအတိုင်းဖြစ်လာရန် ကြိုးစားသင့်သည်မဟုတ်ပေလော။

၄၁:၁၄-၁၆၊ ၃၉၊ ၄၀။ ယေဟောဝါသည် မိမိအား ကြောက်ရွံ့သူများ၏အခြေအနေကို ပြောင်းပြန်ဖြစ်စေနိုင်သည်။ ဆင်းရဲခက်ခဲမှုများကို ကျွန်ုပ်တို့တွေ့ကြုံရသောအခါ ယေဟောဝါအား ယုံကြည်ကိုးစားပြီး ဆက်သစ္စာရှိသွားခြင်းသည် ပညာရှိရာရောက်၏။

သူတို့ တည်ကြည်ခဲ့ကြ

အာဗြဟံ၊ ဣဇာက်၊ ယာကုပ်နှင့် ယောသပ်တို့သည် တည်ကြည်သော ဘုရားသခင်အားကြောက်ရွံ့သူများ ဖြစ်ကြ၏။ ကမ္ဘာဦးကျမ်းတွင်ပါရှိသော သူတို့၏မှတ်တမ်းသည် အမှန်တကယ်ပင် ယုံကြည်ခြင်းခိုင်ခံ့စေပြီး တန်ဖိုးမဖြတ်နိုင်သော သင်ခန်းစာများစွာပေး၏။

သင်သည် သီအိုကရက်တစ်ဓမ္မအမှုကျောင်းအတွက် ပတ်စဉ်ကျမ်းစာဖတ်ရှုခြင်းအစီအစဉ်ကို ပြုလုပ်စဉ် ဤမှတ်တမ်းမှ အကျိုးကျေးဇူးရယူနိုင်ပါသည်။ အထက်ပါအချက်များကို ဆင်ခြင်သုံးသပ်ခြင်းသည် မှတ်တမ်းကို အသက်ဝင်လာစေနိုင်၏။

[အောက်ခြေမှတ်ချက်]

[စာမျက်နှာ ၂၆ ပါ ရုပ်ပုံ]

ယောသပ်ကို ယေဟောဝါကောင်းချီးပေး

[စာမျက်နှာ ၂၆ ပါ ရုပ်ပုံ]

အာဗြဟံသည် ယုံကြည်သူဖြစ်ခဲ့

[စာမျက်နှာ ၂၆ ပါ ရုပ်ပုံ]

ဖြောင့်မတ်သောလောတနှင့် သူ၏သမီးများသည် ကာကွယ်စောင့်ရှောက်ခံရ

[စာမျက်နှာ ၂၉ ပါ ရုပ်ပုံ]

ယာကုပ်သည် မြင့်မြတ်သောအရာများကို တန်ဖိုးထားလေးမြတ်ခဲ့။ အသင်ကော