ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
မေ ၄-၁၀
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၃၆-၃၇
“ယောသပ်ဟာ မနာလိုမှုရဲ့သားကောင် ဖြစ်ခဲ့”
(ကမ္ဘာဦး ၃၇:၃၊ ၄) အစ္စရေးက အသက်ကြီးမှရတဲ့ သားယောသပ်ကို တခြားသားတွေထက် ပိုချစ်တယ်။ ဒါကြောင့် သူ့အတွက် လှပတဲ့ဝတ်ရုံရှည်ကို ချုပ်ပေးတယ်။ ၄ အဖေက သားအားလုံးထက် ယောသပ်ကို ပိုချစ်မှန်း အစ်ကိုတွေ သိတဲ့အခါ သူ့ကို မုန်းလာပြီး စကားကောင်းကောင်း မပြောနိုင်ကြတော့ဘူး။
“ကျွန်ုပ်မြင်ရသော အိပ်မက်ကို နားထောင်ကြပါလော့”
ကျမ်းစာက ခုလိုဆိုတယ်– “အဘသည် မိမိသားအပေါင်းတို့တွင် ယောသပ်ကို သာ၍ချစ်ကြောင်းကို အစ်ကိုတို့သည် သိမြင်သောအခါ သူ့ကိုမုန်း၍ မေတ္တာစကားကို သူ့အား မပြောနိုင်ကြ။” (ကမ္ဘာဦး ၃၇:၄) ယောသပ်ရဲ့ အစ်ကိုတွေ မနာလိုဝန်တိုဖြစ်လာတာကို နားလည်ပေးနိုင်ပါတယ်။ ဒါပေမဲ့ အဲဒီစိတ်ဓာတ်ကို မဖျောက်ဘဲ အငြိုးသိုထားခဲ့တာက တကယ့်ကို ပညာမဲ့ရာရောက်ပါတယ်။ (သုတ္တံ ၁၄:၃၀; ၂၇:၄) သင်ဟာ ကိုယ်လိုချင်တဲ့ ဂရုစိုက်မှု ဒါမှမဟုတ် ချီးမွမ်းမှုကို တခြားသူတစ်ယောက် ရသွားတဲ့အခါ မနာလိုဝန်တိုစိတ်တွေ ဖြစ်ပေါ်လာဖူးသလား။ ဒါဆိုရင် ယောသပ်ရဲ့ အစ်ကိုတွေကို သတိရလိုက်ပါ။ မနာလိုဝန်တိုမှုတွေကြောင့် ကြီးလေးတဲ့အပြစ်တွေကို သူတို့ ပြုလုပ်မိပြီး နောက်ပိုင်းမှာ အကြီးအကျယ် နောင်တရခဲ့ကြတယ်။ သူတို့ရဲ့အဖြစ်က “ဝမ်းမြောက်သောသူတို့နှင့်အတူ ဝမ်းမြောက်” တာဟာ ပညာရှိရာရောက်တယ်လို့ ကျွန်ုပ်တို့ကို သတိပေးလိုက်တာပဲ။—ရောမ ၁၂:၁၅။
အစ်ကိုတွေ ရန်ငြိုးသိုထားတာကို ယောသပ် ရိပ်မိမှာ သေချာတယ်။ ဒါကြောင့် အစ်ကိုတွေဆီသွားတဲ့အခါ သူ့ရဲ့လှပတဲ့ဝတ်ရုံကို ချွတ်ထားခဲ့သလား။ ချွတ်ထားချင်တဲ့စိတ် ရှိကောင်းရှိနိုင်တယ်။ ဒါပေမဲ့ ယာကုပ်က အရေးပေးပြီး ချစ်တယ်ဆိုတဲ့ အထိမ်းအမှတ်အနေနဲ့ ယောသပ်ကို ဝတ်စေချင်တယ် မဟုတ်လား။ ယောသပ်ကလည်း အဖေရဲ့ ယုံကြည်စိတ်ချမှုနဲ့အညီ နေချင်တယ်။ ဒါကြောင့် ဒီဝတ်ရုံကို ယောသပ် အမြဲဝတ်ထားတာ။ သူ့ရဲ့စံနမူနာကနေ ကျွန်ုပ်တို့ သင်ယူစရာရှိပါတယ်။ ကျွန်ုပ်တို့ရဲ့ ကောင်းကင်ဖခင် ယေဟောဝါဘုရားက မျက်နှာလိုက်မှုမရှိပေမဲ့ တစ်ခါတလေ သူ့ကို ဝတ်ပြုကိုးကွယ်သူတွေထဲက တချို့ကို ရွေးချယ်ပြီး အထူးအရေးပေး ဆက်ဆံတာတွေ ရှိပါတယ်။ အကျင့်ပျက်တဲ့ ဒီလောကကြီးကနေ သီးခြားနေဖို့လည်း ဝတ်ပြုကိုးကွယ်သူအားလုံးကို တောင်းဆိုထားပါတယ်။ ယောသပ်ရဲ့ လှပတဲ့ဝတ်ရုံလိုပဲ ခရစ်ယာန်စစ်တွေရဲ့ အကျင့်အကြံတွေဟာ သူတို့ပတ်ဝန်းကျင်မှာရှိသူတွေနဲ့ လုံးဝမတူဘူးဆိုတာ သိသာပေါ်လွင်စေတယ်။ တစ်ခါတလေ သူတို့အမူအကျင့်ကြောင့် မနာလိုမုန်းတီးခံရတာတွေလည်း ရှိတယ်။ (၁ ပေတရု ၄:၄) အဲဒီအခါ ယေဟောဝါဘုရားကို ကိုးကွယ်သူတစ်ယောက်ဟာ ဘုရားကြိုက်တဲ့ အမူအကျင့်တွေကို ဆက်မကျင့်ဘဲ နေသင့်သလား။ လှပတဲ့ ဝတ်ရုံကို ယောသပ်မဝှက်ထားခဲ့သလို ကျွန်ုပ်တို့လည်း ဘုရားရဲ့ကျေးကျွန်ဖြစ်တယ်ဆိုတာကို မဝှက်ထားသင့်ပါဘူး။—လုကာ ၁၁:၃၃။
(ကမ္ဘာဦး ၃၇:၅-၉) နောက်ပိုင်းမှာ ယောသပ်က သူမက်တဲ့အိပ်မက်အကြောင်း အစ်ကိုတွေကို ပြောပြတော့ ပိုလို့တောင် မုန်းကြတယ်။ ၆ သူက “နားထောင်ကြပါဦး။ ကျွန်တော့်အိပ်မက်အကြောင်း ပြောပြမလို့ပါ။ ၇ ကျွန်တော်တို့ လယ်ထဲမှာ ကောက်လှိုင်းတွေစည်းနေတုန်း ကျွန်တော့်ကောက်လှိုင်းဟာ မတ်မတ်ထောင်လာတယ်။ အစ်ကိုတို့ရဲ့ ကောက်လှိုင်းတွေက ကျွန်တော့်ကောက်လှိုင်းကို ဝိုင်းပြီး ဦးညွှတ်ကြတယ်” လို့ပြောတော့၊ ၈ အစ်ကိုတွေက “မင်းကိုယ်မင်း ဘုရင်မှတ်ပြီး ငါတို့ကို ခြယ်လှယ်မလို့လား” လို့ပြောတယ်။ သူ့အိပ်မက်နဲ့ စကားတွေကြောင့် သူ့ကို ပိုပြီးမုန်းလာကြတယ်။ ၉ အဲဒီနောက် ယောသပ် အိပ်မက်မက်ပြန်တယ်။ “ကျွန်တော် အိပ်မက်ထပ်မက်တယ်။ ဒီတစ်ခါတော့ နေ၊ လနဲ့ ကြယ် ၁၁ လုံးက ကျွန်တော့်ကို ဦးညွှတ်နေကြတယ်” လို့ အစ်ကိုတွေကို ပြောပြတယ်။
(ကမ္ဘာဦး ၃၇:၁၁) အစ်ကိုတွေက သူ့ကို မနာလိုဖြစ်ပေမဲ့ အဖေကတော့ အဲဒီအကြောင်းကို စိတ်ထဲမှတ်ထားတယ်။
“ကျွန်ုပ်မြင်ရသော အိပ်မက်ကို နားထောင်ကြပါလော့”
အဲဒီအိပ်မက်တွေဟာ ယေဟောဝါဘုရားဆီက လာတာဖြစ်ပြီး ကြိုဟောချက်တွေဖြစ်တယ်။ ဘုရားက အိပ်မက်ထဲမှာပါတဲ့ အချက်တွေကို တခြားသူတွေကို ပြန်ပြောပြစေချင်တယ်။ ကြိုဟောတဲ့သူတွေဟာ ခေါင်းမာတဲ့လူမျိုးကို ကိုယ်တော်ရဲ့ သတင်းစကားနဲ့ တရားစီရင်ချက်တွေကို ပြောပြသလို ယောသပ်လည်း သူ့အိပ်မက်အကြောင်း ပြောပြရမှာဖြစ်တယ်။
ယောသပ်က အစ်ကိုတွေကို လိမ္မာပါးနပ်စွာနဲ့ “ကျွန်ုပ်မြင်ရသော အိပ်မက်ကို နားထောင်ကြပါလော့” ဆိုပြီး ပြောပြလိုက်တယ်။ အစ်ကိုတွေက အိပ်မက်ရဲ့အဓိပ္ပာယ်ကို နားလည်ကြတယ်။ ဒါကြောင့် ဒီအိပ်မက်ကို သူတို့မကြိုက်ကြဘူး။ အဲဒီအခါ သူတို့က ယောသပ်ကို “သင်သည် ငါတို့၌ မင်းပြုရလိမ့်မည်လော၊ ငါတို့ကို အစိုးရလိမ့်မည်လော” ဆိုပြီး ပြန်ပြောတယ်။ အစ်ကိုတွေက ယောသပ်ရဲ့ “အိပ်မက်နှင့် သူ၏စကားအကြောင်းကြောင့် သာ၍မုန်းကြ၏” လို့ ကျမ်းမှတ်တမ်းက ဆက်ဖော်ပြတယ်။ အစ်ကိုတွေနဲ့ အဖေကို ဒုတိယအိပ်မက်အကြောင်း ယောသပ်ပြောပြတဲ့အခါမှာ အစ်ကိုတွေက ပိုလို့တောင်မုန်းတီးလာကြတယ်။ “အဘက၊ သင်မြင်သောအိပ်မက်သည် အဘယ်သို့နည်း။ ငါနှင့်သင်၏အမိ၊ သင်၏အစ်ကိုတို့သည် သင့်ထံသို့ စင်စစ်လာ၍ ဦးညွှတ်ချရမည်လောဟူ၍ သူ့ကိုဆုံးမလေ၏” လို့ကျမ်းစာက ဆက်ပြောတယ်။ ဒါပေမဲ့ ယာကုပ်က အဲဒီအကြောင်းကို မေ့မထားဘဲ စဉ်းစားဆင်ခြင်နေတယ်။ ယေဟောဝါဘုရားက ယောသပ်နဲ့ ဆက်သွယ်နေတာများ ဖြစ်နိုင်မလား။—ကမ္ဘာဦး ၃၇:၆၊ ၈၊ ၁၀၊ ၁၁။
လူအများမကြိုက်တဲ့ ကြိုဟောချက်တွေကို ပြောပြလို့ ညှဉ်းပန်းနှိပ်စက်ခံခဲ့ရတဲ့ သူတွေထဲမှာ ယောသပ်က ပထမဆုံးလူမဟုတ်သလို နောက်ဆုံးလူလည်း မဟုတ်ပါဘူး။ အဲဒီလို သတင်းတရားပြောပြသူတွေထဲမှာ ယေရှုဟာ အကြီးမြတ်ဆုံးလူသားပါ။ “သူတို့သည် ငါ့ကိုညှဉ်းဆဲလျှင် သင်တို့ကိုလည်း ညှဉ်းဆဲကြလိမ့်မည်” လို့ နောက်လိုက်တွေကို ယေရှု ပြောခဲ့တယ်။ (ယောဟန် ၁၅:၂၀) လူကြီးလူငယ်မရွေး ခရစ်ယာန်အားလုံးဟာ လူငယ်လေးယောသပ်ရဲ့ ယုံကြည်ခြင်းနဲ့ ရဲစွမ်းသတ္တိကနေ သင်ယူစရာတွေ အများကြီး ရှိပါတယ်။
(ကမ္ဘာဦး ၃၇:၂၃၊ ၂၄) အစ်ကိုတွေက ယောသပ်လည်း ရောက်လာရော သူ့ဝတ်ရုံရှည်ကို ဆွဲချွတ်ကြတယ်။ ၂၄ သူ့ကိုဖမ်းချုပ်ပြီး ရေတွင်းထဲ ပစ်ချလိုက်တယ်။ တွင်းက ရေခန်းနေတယ်။
(ကမ္ဘာဦး ၃၇:၂၈) ဒါကြောင့် မိဒျန်ကုန်သည်တွေ ဖြတ်သွားတဲ့အခါ ယောသပ်ကို ရေတွင်းထဲက ဆွဲတင်ပြီး အိရှမေလလူမျိုးတွေဆီ ငွေစ ၂၀ နဲ့ ရောင်းလိုက်တယ်။ သူတို့က ယောသပ်ကို အီဂျစ်ပြည် ခေါ်သွားကြတယ်။
ရှာဖွေလေ့လာ ဘုရားရေးရာရတနာ
(ကမ္ဘာဦး ၃၆:၁) ဧဒုံလို့ခေါ်တဲ့ ဧသောရဲ့ သမိုင်းမှတ်တမ်း။
it-1 ၆၇၈
ဧဒုံ
(ဧဒုံ) [အနီရောင်]၊ ဧဒုံလူမျိုး
ဧဒုံဆိုတာ ယာကုပ်ရဲ့ အမြွှာညီအစ်ကို ဧသောရဲ့ နာမည်နောက်တစ်မျိုးဖြစ်တယ်။ (က ၃၆:၁) ဧသောဟာ ပဲဟင်းနီနီရဖို့ မိမိရဲ့ သားဦးအခွင့်အရေးကို ရောင်းလိုက်လို့ အဲဒီနာမည် ရခဲ့တာ။ (က ၂၅:၃၀-၃၄) တိုက်တိုက်ဆိုင်ဆိုင် ဧသောကို မွေးတုန်းကလည်း တစ်ကိုယ်လုံး နီနေတယ်။ (က ၂၅:၂၅) နောက်ပိုင်း ဧသောနဲ့ သူသားမြေးတွေ နေထိုင်ခဲ့တဲ့ နယ်မြေတွေကလည်း အနီရောင် ဖြစ်တယ်။
(ကမ္ဘာဦး ၃၇:၂၉-၃၂) ရုဗင်က ရေတွင်းဆီ ပြန်လာတဲ့အခါ တွင်းထဲမှာ ယောသပ်ကို မတွေ့တော့ အဝတ်ကို ဆွဲဆုတ်လိုက်တယ်။ ၃၀ တခြားညီတွေဆီ သွားပြီး “ညီလေး မရှိတော့ဘူး။ ဒုက္ခပဲ၊ ငါဘာလုပ်ရမလဲ” လို့ပြောတယ်။ ၃၁ သူတို့က ဆိတ်တစ်ကောင်သတ်ပြီး ယောသပ်ရဲ့ဝတ်ရုံကို သွေးထဲနှစ်လိုက်တယ်။ ၃၂ ပြီးတော့ အဖေ့ဆီ ပို့ပြီး “ဒီဝတ်ရုံကို တွေ့လို့ပါ။ အဖေ့သားရဲ့ဝတ်ရုံ ဟုတ်မဟုတ် စစ်ဆေးကြည့်ပါဦး” လို့ပြောခိုင်းတယ်။
it-1 ၅၆၁-၅၆၂
အုပ်ထိန်းမှု
သိုးအုပ် ဒါမှမဟုတ် တိရစ္ဆာန်အုပ်ကို ထိန်းတဲ့ သိုးထိန်းတစ်ယောက် ဒါမှမဟုတ် တိရစ္ဆာန် ထိန်းကျောင်းသူတစ်ယောက်ဟာ အဲဒီတိရစ္ဆာန်တွေကို အုပ်ထိန်းခွင့် တရားဝင်ရထားသူ ဖြစ်တယ်။ တိရစ္ဆာန်တွေကို ကျွေးမွေးမယ်၊ အခိုးမခံရအောင် ကာကွယ်မယ်၊ အခိုးခံရသည်ရှိသော် အစားလျော်ပေးမယ်လို့ ထိန်းကျောင်းသူက ပိုင်ရှင်ကို အာမခံချက်ပေးရတယ်။ ဒါပေမဲ့ အလုံးစုံ တာဝန်ယူရမှာတော့ မဟုတ်ဘူး။ သားရဲတိရစ္ဆာန်တွေရဲ့ တိုက်ခိုက်မှုလိုမျိုး သာမန်လူတွေ မထိန်းချုပ်နိုင်တဲ့ ကိစ္စမျိုးမှာတော့ ထိန်းကျောင်းသူက တာဝန်ယူစရာ မလိုဘူး။ ဒါပေမဲ့ တာဝန်ကင်းလွတ်ဖို့ ပိုင်ရှင်ကို တိရစ္ဆာန်အသေကောင်လိုမျိုး အထောက်အထား ပြရတယ်။ အထောက်အထားကို စစ်ဆေးပြီးတဲ့အခါ ထိန်းကျောင်းသူမှာ အပြစ်မရှိကြောင်း ပိုင်ရှင်က ဆုံးဖြတ်ပေးရတယ်။
အဲဒီမူက အပ်နှံထားတဲ့ ဘယ်ပိုင်ဆိုင်ရာနဲ့မဆို သက်ဆိုင်တယ်။ ဥပမာ၊ မိသားစုမှာတောင် အစ်ကိုအကြီးဆုံးကို ညီငယ်၊ ညီမတွေကို တရားဝင် အုပ်ထိန်းခွင့်ရှိသူအဖြစ် သတ်မှတ်တယ်။ ဒါကြောင့် ကမ္ဘာဦး ၃၇:၁၈-၃၀ မှာပါတဲ့အတိုင်း တခြားညီအစ်ကိုတွေက ယောသပ်ကို သတ်ဖို့ တိုင်ပင်တဲ့အခါ အကြီးဆုံးသားဖြစ်တဲ့ ရုဗင်က ယောသပ်အတွက် စိတ်ပူတာကို နားလည်နိုင်ပါတယ်။ ရုဗင်က “‘သူ့ကို မသတ်ပါနဲ့ကွာ။ သွေးထွက်သံယိုဖြစ်အောင် မလုပ်ကြပါနဲ့။ . . . အနာတရဖြစ်အောင် မလုပ်ကြပါနဲ့’ လို့ပြောတယ်။ ရုဗင်က ယောသပ်ကို သူတို့လက်ထဲကနေ ကယ်ပြီး အဖေ့ဆီ ပြန်ပို့ပေးဖို့ အကြံရှိတယ်။” ယောသပ်ကို မတွေ့တော့တဲ့အခါ ရုဗင်ဟာ အလွန်အမင်း စိုးရိမ်ပြီး “အဝတ်ကို ဆွဲဆုတ်လိုက်တယ်။” ပြီးတော့ “ညီလေး မရှိတော့ဘူး။ ဒုက္ခပဲ၊ ငါဘာလုပ်ရမလဲ” လို့ ပြောတယ်။ ယောသပ်ပျောက်သွားတာ မိမိမှာ တာဝန်ရှိတယ်ဆိုတာ ရုဗင်သိတယ်။ တာဝန်ကနေ လွတ်ကင်းဖို့အတွက် ယောသပ်ကို သားရဲတစ်ကောင် ကိုက်သတ်သွားတယ်ဆိုတဲ့ သက်သေအတုကို ညီအစ်ကိုတွေ ဖန်တီးလိုက်တယ်။ အဲဒါကြောင့် ယောသပ်ရဲ့ ဝတ်ရုံကို ဆိတ်အသွေးထဲ နှစ်လိုက်တယ်။ အဲဒီနောက် ဖခင်လည်းဖြစ်၊ မိသားစုမှာ တရားသူကြီးလည်းဖြစ်တဲ့ ယာကုပ်ဆီ သက်သေကို တင်သွင်းကြတယ်။ အထောက်အထားအဖြစ်ပြတဲ့ သွေးနှစ်ထားတဲ့ ယောသပ်ရဲ့ ဝတ်ရုံကိုကြည့်ပြီး ယောသပ် အသတ်ခံရတယ်လို့ ယာကုပ် ကောက်ချက်ချတယ်။ ရုဗင်ကို အပြစ်ကင်းလွတ်ခွင့် ပေးလိုက်တယ်။—က ၃၇:၃၁-၃၃။
ကျမ်းစာဖတ်ရှုခြင်း
မေ ၁၁-၁၇
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၃၈-၃၉
“ယောသပ်ကို ယေဟောဝါ ဘယ်တော့မှ မစွန့်ပစ်”
(ကမ္ဘာဦး ၃၉:၁) အိရှမေလလူမျိုးတွေက ယောသပ်ကို အီဂျစ်ပြည် ခေါ်သွားကြတယ်။ အဲဒီမှာ ဖာရောမင်းရဲ့ နန်းတွင်းအရာရှိ၊ အီဂျစ်လူမျိုး ကိုယ်ရံတော်မှူး ပေါတိဖာက ယောသပ်ကို ဝယ်လိုက်တယ်။
“အပြစ်ကြီးသော ဤအမှုကို” ဘယ်လိုလုပ် ကျူးလွန်နိုင်မှာလဲ
ဣရှမေလလူတို့သည် ယောသပ်ကိုဆောင်သွား၍ အဲဂုတ္တုပြည်သို့ ရောက်သောအခါ၊ အဲဂုတ္တုအမျိုးသား ဖာရောဘုရင်၏အမတ်ဖြစ်သော ကိုယ်ရံတော်မှူး ပေါတိဖာထံမှာ ရောင်းကြ၏။” (ကမ္ဘာဦး ၃၉:၁) ဒုတိယအကြိမ် ရောင်းစားခံလိုက်ရတဲ့ ယောသပ်လေးခမျာ ဘယ်လောက်အထိ ရှက်ရွံ့သိမ်ငယ်နေမလဲဆိုတာ မြင်ယောင်ကြည့်နိုင်ပါတယ်။ သူ့ကို ကုန်ပစ္စည်းတစ်ခုလိုပဲ သဘောထားနေကြပါလား။ အီဂျစ်နန်းတွင်းအရာရှိဖြစ်သူ သခင်ရဲ့အနောက်ကနေ ကုပ်ကုပ်လေးလိုက်သွားနေတဲ့ ယောသပ်ကို မြင်ယောင်ကြည့်နိုင်ပါတယ်။ ဈေးဆိုင်တွေနဲ့ လူစည်ကားနေတဲ့ မြို့လမ်းတွေကနေ ဖြတ်ပြီး နန်းတွင်းအရာရှိရဲ့ အိမ်ကို ဦးတည်သွားနေကြတယ်။
အခု ယောသပ်ရောက်နေတဲ့ အိမ်အသစ်က သူ့မိသားစုအိမ်နဲ့ တခြားစီပါပဲလား။ နေရာအတည်တကျမနေဘဲ ရောက်တဲ့အရပ်မှာ ရွက်ဖျင်တဲထိုးပြီး သိုးအုပ်ကြီးကို ထိန်းကျောင်းခဲ့ရတဲ့ မိသားစုထဲမှာ သူကြီးပြင်းလာတာပါ။ ပေါတိဖာလိုမျိုး ချမ်းသာကြွယ်ဝတဲ့ အီဂျစ်လူတွေရဲ့ အိမ်တွေကတော့ အရောင်တောက်တောက် ဆေးသုတ်ထားပြီး ကြီးကျယ်ခမ်းနားလွန်းတယ်။ တံတိုင်းကာရံထားတဲ့ ခြံထဲမှာ အရိပ်ရတဲ့ အပင်တွေအပြင် ကျူပင်၊ ကြာပင်၊ တခြားအပင်တွေပေါက်နေတဲ့ ရေကန်တွေနဲ့ စိမ်းလန်းစိုပြည်နေတာကို ရှေးခေတ်အီဂျစ်လူတွေ ကြိုက်ကြတယ်လို့ ရှေးဟောင်းသုတေသီတွေက ဖော်ပြတယ်။ ပန်းခြံအတွင်း ဆောက်ထားတဲ့ တချို့အိမ်တွေမှာ လေညင်းခံဖို့ လေသာဆောင်တွေ၊ လေဝင်လေထွက်ကောင်းဖို့ ပြတင်းပေါက် အမြင့်ကြီးတွေ ရှိတဲ့အပြင် အခန်းတွေလည်း အများကြီး ရှိတယ်။ အဲဒီအခန်းတွေထဲမှာ ထမင်းစားခန်းကြီးတစ်ခန်းနဲ့ အစေခံကျွန်တွေနေဖို့ အခန်းတွေလည်း ပါတယ်။
(ကမ္ဘာဦး ၃၉:၁၂-၁၄) အဲဒီအခါ သခင်မက ယောသပ်ရဲ့အဝတ်ကို ဆွဲပြီး “ဒို့နဲ့အတူ အိပ်ပါ” လို့ပြောတော့ ယောသပ်က အဝတ်ကို ထားခဲ့ပြီး ထွက်ပြေးသွားတယ်။ ၁၃ အဲဒီလို အဝတ်ကို ထားခဲ့ပြီး ထွက်ပြေးသွားတာနဲ့၊ ၁၄ သခင်မက အိမ်သားယောက်ျားတွေကို အော်ခေါ်ပြီး “ကြည့်စမ်း၊ ငါ့ယောက်ျားခေါ်လာတဲ့ ဒီဟီဘရူးလူက ငါတို့ကို လူတွေကဲ့ရဲ့စရာဖြစ်အောင် လုပ်တယ်။ ငါနဲ့အတူ အိပ်ဖို့ ဝင်လာလို့ ငါအသံကုန်အော်လိုက်တာ။
(ကမ္ဘာဦး ၃၉:၂၀) ဒါကြောင့် ယောသပ်ကို ထောင်ချလိုက်တယ်။ ဘုရင့်အကျဉ်းသားတွေကို ချုပ်ထားတဲ့ အဲဒီထောင်မှာ သူဆက်နေရတယ်။
“အပြစ်ကြီးသော ဤအမှုကို” ဘယ်လိုလုပ် ကျူးလွန်နိုင်မှာလဲ
အဲဒီခေတ်က အီဂျစ်အကျဉ်းထောင်တွေဟာ ဘယ်လိုပုံစံရှိတယ်ဆိုတာ ကျွန်ုပ်တို့ မသိပါဘူး။ ဒါပေမဲ့ ထောင်ခန်းတွေနဲ့ မြေအောက်ခန်းတွေပါတဲ့ ခံတပ်ကြီးလို အဆောက်အအုံတွေရဲ့ အပျက်အယွင်းတွေကို ရှေးဟောင်းသုတေသီတွေ တွေ့ရှိခဲ့ပါတယ်။ ယောသပ်ကလည်း အကျဉ်းထောင်ကို မူရင်းဟေဗြဲဘာသာစကားနဲ့ တွင်းလို့ ဖော်ပြခဲ့တယ်။ မှောင်မဲပြီး လွတ်လမ်းမရှိတဲ့နေရာလို့ အဓိပ္ပာယ်ရတယ်။ (ကမ္ဘာဦး ၄၀:၁၅) ထောင်ထဲမှာ ယောသပ် ညှဉ်းပန်းနှိပ်စက်မှုတွေ ခံခဲ့ရတဲ့အကြောင်း ဆာလံကျမ်းမှာ ဒီလိုဖော်ပြထားပါတယ်– “ယောသပ်သည် ခြေကျင်းအခတ်ခံရ၏။ သူ၏လည်တွင်လည်း သံလည်ပတ် အတပ်ခံရ၏။” (ဆာလံ ၁၀၅:၁၈၊ ၁၉၊ ခမ) အီဂျစ်လူတွေဟာ အကျဉ်းသားတွေရဲ့ လက်တံတောင်ဆစ်ကို နောက်ပြန်ကြိုးတုပ်တတ်ကြတယ်။ အကျဉ်းသားတချို့ရဲ့ လည်ပင်းမှာ သံလည်ပတ်စွပ်ထားတယ်။ မတရားညှဉ်းဆဲခံရတဲ့အတွက် ယောသပ်ခမျာ ဘယ်လောက်ထိ နာကျင်လိုက်မလဲ။ တကယ်တော့ အဲဒီလို အပြစ်ဒဏ်ခံရလောက်တဲ့အထိ ယောသပ် ဘာမှမလုပ်ခဲ့ပါဘူး။
ယောသပ်ခံရတဲ့ ဆင်းရဲဒုက္ခဟာ ခဏပဲလည်း မဟုတ်ပါဘူး။ သူဟာ ‘ထောင်ထဲမှာ ဆက်နေရ’ တယ်လို့ ကျမ်းစာမှာ ဖော်ပြထားတယ်။ ဆိုးဝါးလွန်းတဲ့ အကျဉ်းထောင်ထဲမှာ နှစ်ပေါင်းများစွာ နေခဲ့ရတယ်။ ထောင်ထဲကနေ လွတ်မယ်မလွတ်ဘူးဆိုတာကို သူမသိဘူး။ ထောင်ထဲမှာ စိတ်ရောကိုယ်ပါ ဆင်းရဲခဲ့ရတဲ့ နေ့ရက်တွေဟာ အပတ်ပေါင်းများစွာ၊ လပေါင်းများစွာ ကြာလာတယ်။ အဲဒီအခါ ဝမ်းနည်းကြေကွဲပြီး စိတ်ပျက်လက်ပျက်နဲ့ ဘဝကို အရှုံးမပေးဘဲ သူဘယ်လိုတောင့်ခံခဲ့သလဲ။
ထာဝရဘုရားသည် သူနှင့်အတူရှိ၍ မေတ္တာကျေးဇူးပြု” တယ်လို့ ကျမ်းစာမှာ ဖော်ပြထားတယ်။ (ကမ္ဘာဦး ၃၉:၂၁၊ သမ္မာ) ဒါကြောင့် ယေဟောဝါဘုရားကို ဝတ်ပြုကိုးကွယ်သူတွေဆီ ကိုယ်တော့်ရဲ့မေတ္တာ မရောက်အောင် ထောင်တံတိုင်းတွေ၊ လက်ထိတ်တွေ၊ မှောင်မည်းနေတဲ့ အခန်းကျဉ်းလေးတွေက မတားဆီးနိုင်ပါဘူး။ (ရောမ ၈:၃၈၊ ၃၉) ယောသပ်ဟာ ခံစားနေရတဲ့ စိတ်ဆင်းရဲ၊ ကိုယ်ဆင်းရဲမှုကို “နှစ်သိမ့်ခြင်းရှိသမျှတို့၏ ဘုရားသခင်” ဆီ ရင်ဖွင့်ဆုတောင်းပြီးတဲ့နောက် စိတ်ငြိမ်သက်မှု ရရှိသွားတဲ့ပုံကို မြင်ယောင်ကြည့်ပါ။ (၂ ကောရိန္သု ၁:၃၊ ၄; ဖိလိပ္ပိ ၄:၆၊ ၇) ယောသပ်အတွက် ယေဟောဝါဘုရား နောက်ထပ် ဘာလုပ်ပေးခဲ့သလဲ။ “ထောင်မှူး” ဆီကနေ ယောသပ် “မျက်နှာသာရ” အောင်လုပ်ပေးခဲ့တယ်လို့ ကျမ်းစာမှာ ဖတ်ရတယ်။
(ကမ္ဘာဦး ၃၉:၂၁-၂၃) ဒါပေမဲ့ ယေဟောဝါက ယောသပ်နဲ့အတူ အမြဲရှိပြီး သူ့ကို ခိုင်မြဲတဲ့မေတ္တာပြတယ်။ ထောင်မှူးရှေ့မှာလည်း မျက်နှာသာရစေတယ်။ ၂၂ ဒါကြောင့် ထောင်မှူးက ထောင်ထဲမှာရှိတဲ့ အကျဉ်းသားအားလုံးကို ကြီးကြပ်ဖို့ သူ့ကို တာဝန်လွှဲအပ်လိုက်တယ်။ အကျဉ်းသားတွေရဲ့အလုပ်ကို သူ စီစဉ်ညွှန်ကြားပေးရတယ်။ ၂၃ ယေဟောဝါဟာ ယောသပ်နဲ့အတူရှိတယ်။ သူလုပ်သမျှကို ယေဟောဝါ အောင်မြင်ခွင့်ပေးတဲ့အတွက် သူ့လက်ထဲ အပ်ထားတဲ့ကိစ္စတွေကို ထောင်မှူး လုံးဝလှည့်ကြည့်စရာ မလိုဘူး။
“အပြစ်ကြီးသော ဤအမှုကို” ဘယ်လိုလုပ် ကျူးလွန်နိုင်မှာလဲ
“ထာဝရဘုရားသည် သူနှင့်အတူရှိ၍ မေတ္တာကျေးဇူးပြု” တယ်လို့ ကျမ်းစာမှာ ဖော်ပြထားတယ်။ (ကမ္ဘာဦး ၃၉:၂၁၊ သမ္မာ) ဒါကြောင့် ယေဟောဝါဘုရားကို ဝတ်ပြုကိုးကွယ်သူတွေဆီ ကိုယ်တော့်ရဲ့မေတ္တာ မရောက်အောင် ထောင်တံတိုင်းတွေ၊ လက်ထိတ်တွေ၊ မှောင်မည်းနေတဲ့ အခန်းကျဉ်းလေးတွေက မတားဆီးနိုင်ပါဘူး။ (ရောမ ၈:၃၈၊ ၃၉) ယောသပ်ဟာ ခံစားနေရတဲ့ စိတ်ဆင်းရဲ၊ ကိုယ်ဆင်းရဲမှုကို “နှစ်သိမ့်ခြင်းရှိသမျှတို့၏ ဘုရားသခင်” ဆီ ရင်ဖွင့်ဆုတောင်းပြီးတဲ့နောက် စိတ်ငြိမ်သက်မှု ရရှိသွားတဲ့ပုံကို မြင်ယောင်ကြည့်ပါ။ (၂ ကောရိန္သု ၁:၃၊ ၄; ဖိလိပ္ပိ ၄:၆၊ ၇) ယောသပ်အတွက် ယေဟောဝါဘုရား နောက်ထပ် ဘာလုပ်ပေးခဲ့သလဲ။ “ထောင်မှူး” ဆီကနေ ယောသပ် “မျက်နှာသာရ” အောင်လုပ်ပေးခဲ့တယ်လို့ ကျမ်းစာမှာ ဖတ်ရတယ်။
ရှာဖွေလေ့လာ ဘုရားရေးရာရတနာ
(ကမ္ဘာဦး ၃၈:၉၊ ၁၀) ဒါပေမဲ့ ဩနန်က မရီးနဲ့ရမယ့်ကလေးကို ကိုယ့်မျိုးဆက်အဖြစ် သတ်မှတ်လို့မရမှန်းသိတော့ အစ်ကို့အတွက် သားသမီး မထွန်းကားနိုင်အောင် မရီးနဲ့ပေါင်းသင်းတဲ့အခါတိုင်း သုက်ရည်ကို စွန့်ပစ်တယ်။ ၁၀ သူ့လုပ်ရပ်ဟာ ယေဟောဝါရှေ့မှာ ဆိုးတဲ့အတွက် သူ့ကိုလည်း ဘုရားသခင် အဆုံးစီရင်လိုက်တယ်။
it-2 ၅၅၅
ဩနန်
(ဩနန်) [“မျိုးပွားနိုင်စွမ်း၊ ကြီးမားလှတဲ့စွမ်းအင်” ဆိုတဲ့ အဓိပ္ပာယ်ရင်းမြစ်မှ ဆင်းသက်လာ]
ခါနန်လူမျိုး ရှုအရဲ့သမီးနဲ့ရတဲ့ ယုဒရဲ့ ဒုတိယသား ဖြစ်တယ်။ (က ၃၈:၂-၄။ ၁ရ ၂:၃) ဩနန်ရဲ့အစ်ကိုဖြစ်တဲ့ ဧရကို ယေဟောဝါ မနှစ်သက်လို့ အဆုံးစီရင်လိုက်တယ်။ ဧရမှာ သားသမီး မရှိဘူး။ မရီးကို မတ်ယူရမယ်ဆိုတဲ့ ထုံးစံအတိုင်း ဧရရဲ့ဇနီး မုဆိုးမ တာမာကိုယူဖို့ ဩနန်ကို ယုဒက ပြောတယ်။ ဩနန် သားမွေးမယ်ဆိုရင် ဩနန်ရဲ့မျိုးဆက်အဖြစ် သတ်မှတ်ခံရမှာ မဟုတ်ဘူး။ ဩနန်ရဲ့ သားဦးအမွေကို ဧရရဲ့အမွေအဖြစ် သတ်မှတ်မှာဖြစ်တယ်။ အကယ်၍ ဆက်ခံမယ့်သူ မရှိရင် အမွေတွေကို ဩနန်ရမယ်။ ဩနန်ဟာ တာမာနဲ့ ဆက်ဆံတဲ့အခါ “သုက်ရည်ကို စွန့်ပစ်တယ်။” “မရီးနဲ့ ပေါင်းသင်းတဲ့အခါတိုင်း” သုက်ရည်ကို စွန့်ပစ်တယ်လို့ ကျမ်းစာမှာ ပြောထားတဲ့အတွက် ဩနန်ဟာ တစ်ကိုယ်ရေ အာသာဖြေတာ မဟုတ်ဘူး။ ဩနန်ဟာ “သုက်ရည်ကို စွန့်ပစ်တယ်” လို့ပြောတဲ့အခါ တာမာရဲ့ မျိုးပွားအင်္ဂါထဲကို မိမိရဲ့ သုက်ရည်မဝင်အောင် တမင်တကာပြုလုပ်မှန်း ထင်ရှားတယ်။ တစ်ကိုယ်ရေ အာသာဖြေလို့ မဟုတ်ဘဲ ဖခင်ရဲ့စကားကို နားမထောင်ခဲ့တဲ့အတွက်၊ လောဘကြီးတဲ့အတွက်၊ ဘုရားရဲ့ အိမ်ထောင်အစီအစဉ်ကို ဆန့်ကျင်တဲ့ အပြစ်အတွက် သားသမီးမရှိတဲ့ ဩနန်ကိုလည်း ယေဟောဝါ အဆုံးစီရင်လိုက်တယ်။—က ၃၈:၆-၁၀။ ၄၆:၁၂။ တလ ၂၆:၁၉။
(ကမ္ဘာဦး ၃၈:၁၅-၁၈) တာမာက မျက်နှာကို ပဝါနဲ့ဖုံးထားတော့ ယုဒက ပြည့်တန်ဆာလို့ ထင်သွားတယ်။ ၁၆ ဒါကြောင့် လမ်းဘေးမှာထိုင်နေတဲ့ တာမာကို ချွေးမမှန်းမသိဘဲ အနားသွားပြီး “မင်းနဲ့အိပ်ပါရစေ” လို့ပြောတယ်။ အဲဒီအခါ တာမာက “ကျွန်မနဲ့အိပ်ခွင့်ရရင် ဘာပေးမလဲ” လို့ပြန်မေးတယ်။ ၁၇ ယုဒကလည်း “ဆိတ်ကလေးတစ်ကောင် ပို့ပေးမယ်” လို့ပြောတော့ သူက “ဆိတ်ကလေးကို မပို့ပေးခင် အာမခံပစ္စည်း ထားခဲ့မလား” လို့ပြန်မေးတယ်။ ၁၈ ယုဒက “ဘာအာမခံပစ္စည်း ပေးရမလဲ” လို့မေးတဲ့အခါ “ရှင့်ရဲ့ တံဆိပ်လက်စွပ်၊ လက်စွပ်ကြိုး၊ တောင်ဝှေးကို ပေးပါ” လို့ပြောတယ်။ ယုဒလည်း အဲဒါတွေ ပေးလိုက်ပြီး သူနဲ့အိပ်တော့ သူ့မှာ ကိုယ်ဝန်ရှိလာတယ်။
စာရှုသူများထံမှ မေးခွန်းလွှာ
ယုဒသည် ကတိထားသည့်အတိုင်း သားရှေလနှင့် တာမာကို မပေးစားခဲ့ခြင်းဖြင့် အမှားပြုမိခဲ့သည်။ ထို့ပြင် ဝတ်ပြုရာအိမ်တော်ပြည့်တန်ဆာဟု သူယူမှတ်သော အမျိုးသမီးတစ်ဦးနှင့် လိင်ဆက်ဆံခဲ့သည်။ ယင်းသည် အိမ်ထောင်အစီအစဉ်အတွင်း၌သာ လိင်ဆက်ဆံမှုပြုရန်ဟူသော ဘုရားသခင့်ရည်ရွယ်ချက်နှင့် ဆန့်ကျင်၏။ (ကမ္ဘာဦး ၂:၂၄) သို့သော် အမှန်စင်စစ် ယုဒသည် ပြည့်တန်ဆာတစ်ဦးနှင့် လိင်ဆက်ဆံခဲ့ခြင်း မဟုတ်ပါ။ ယင်းအစား မရီးမတ်ယူစနစ်တွင် မရည်ရွယ်ဘဲ သားရှေလနေရာကို ယူမိသဖြင့် တရားဝင်သား၏ဖခင် ဖြစ်လာလေသည်။
တာမာ၏လုပ်ရပ်မူကား အကျင့်ယိုယွင်းခြင်း မဟုတ်ခဲ့ပါ။ သူ၏သားအမြွှာသည်လည်း မတရားမေထုန်ပြု၍ရသော သားများအဖြစ် သတ်မှတ်ခြင်း မခံခဲ့ရပါ။ ဗက်လင်မြို့သား ဗောဇသည် မရီးမတ်ယူစနစ်ဖြင့် မောဘအမျိုးသမီး ရုသကို သိမ်းယူသောအခါ ဗက်လင်မြို့၏ အသက်ကြီးသူများက တာမာ၏သား ဖာရက်နှင့် ပတ်သက်၍ အကောင်းပြောခဲ့ပြီး ဗောဇကို ဤသို့ဆို၏– “အသက်ပျိုသော ဤမိန်းမတွင် ထာဝရဘုရား ပေးတော်မူလတ္တံ့သော မျိုးစေ့အားဖြင့် သင်၏အမျိုးအနွယ်သည် ယုဒမယား တာမာဖွားမြင်သော ဖာရက်အမျိုးအနွယ်ကဲ့သို့ ဖြစ်ပါစေသော။” (ရုသ ၄:၁၂) ထို့ပြင် ဖာရက်သည် ယေရှုခရစ်၏ ဘိုးဘေးများစာရင်းတွင် တစ်ဦးပါဝင်ခဲ့သည်။—မဿဲ ၁:၁-၃; လုကာ ၃:၂၃-၃၃။
ကျမ်းစာဖတ်ရှုခြင်း
မေ ၁၈-၂၄
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၄၀-၄၁
“ယောသပ်ကို ယေဟောဝါ ကယ်တင်”
(ကမ္ဘာဦး ၄၁:၉-၁၃) အဲဒီအခါ ဖလားတော်ဝန်က ဖာရောမင်းကို “ကျွန်တော် မှားခဲ့တာတွေကို ဒီနေ့ ဝန်ခံပါ့မယ်။ ၁၀ မင်းကြီးက ကျွန်တော်နဲ့ စားတော်ဝန်ကို ဒေါသထွက်ပြီး ကိုယ်ရံတော်မှူးရဲ့ထောင်မှာ အကျဉ်းချခဲ့ပါတယ်။ ၁၁ တစ်ညမှာ ကျွန်တော်တို့က အဓိပ္ပာယ်ကိုယ်စီရှိတဲ့ အိပ်မက်ကို မက်ကြတယ်။ ၁၂ ထောင်ထဲမှာ ကိုယ်ရံတော်မှူးရဲ့ကျွန် ဟီဘရူးလူငယ်တစ်ယောက် ရှိတယ်။ သူ့ကို အိပ်မက်အကြောင်း ပြောပြတော့ အိပ်မက်တစ်ခုစီရဲ့ အဓိပ္ပာယ်ကို ရှင်းပြတယ်။ ၁၃ သူရှင်းပြတဲ့အတိုင်း အတိအကျဖြစ်လာတယ်။ ကျွန်တော်က ရာထူးပြန်ရပြီး စားတော်ဝန်ကတော့ တိုင်မှာ ဆွဲထားခံရပါတယ်” လို့လျှောက်တင်တယ်။
အိပ်မက်အနက်ကို ဘုရားသခင် ရှင်းပြနိုင်
ဖလားတော်ဝန်က ယောသပ်ကို မေ့နေပေမဲ့ ယေဟောဝါဘုရားကတော့ သတိရနေဆဲပါ။ တစ်ညမှာ ဖာရောမင်းကို ထူးခြားတဲ့အိပ်မက် နှစ်ခု ဘုရားသခင် မြင်မက်စေခဲ့တယ်။ ပထမအိပ်မက်မှာ ဝဖြိုးတဲ့ နွားမ ၇ ကောင်က နိုင်းလ်မြစ်ထဲကနေ တက်လာတယ်။ အဲဒီနောက် ပိန်ချုံးပြီးရုပ်ဆိုးတဲ့ နွားမ ၇ ကောင်လည်း မြစ်ထဲက တက်လာတယ်။ ပိန်ချုံးနေတဲ့နွားမတွေက ဝဖြိုးနေတဲ့နွားမတွေကို ဝါးမျိုလိုက်တယ်။ ဒုတိယအိပ်မက်မှာ၊ ကောက်ပင် တစ်ပင်ထဲကနေ အဆန်အောင်တဲ့ ကောက်နှံ ၇ နှံထွက်လာတာကို ဖာရောမင်း တွေ့လိုက်တယ်။ အဲဒီနောက် အရှေ့လေကြောင့် ညှိုးနေပြီး အဆန်မအောင်တဲ့ ကောက်နှံ ၇ နှံထွက်လာတယ်။ အဲဒီကောက်နှံတွေက အဆန်အောင်တဲ့ ကောက်နှံတွေကို ဝါးမျိုပစ်လိုက်တယ်။ မနက်မှာ ဖာရောမင်း နိုးလာတော့ အိပ်မက်ကြောင့် ကယောင်ချောက်ချား ဖြစ်နေပါလေရော။ ဒါကြောင့် အီဂျစ်ပြည်က ပညာရှိတွေနဲ့ မှော်ဆရာတွေကို ခေါ်ပြီး အိပ်မက်အနက်ကို ဖွင့်ပြခိုင်းတယ်။ ဘယ်သူ့မှ မဖွင့်ပြနိုင်ကြဘူး။ (ကမ္ဘာဦး ၄၁:၁-၈) အိပ်မက်အကြောင်း သူတို့ကြားပြီး ကြက်သေ,သေသွားတာလား။ ဒါမှမဟုတ် အိပ်မက်အဓိပ္ပာယ်ကို တစ်ယောက်တစ်ပေါက် ပြောနေကြတာလားဆိုတာ ကျွန်ုပ်တို့ မသိပါဘူး။ ဘာပဲဖြစ်ဖြစ် ဖာရောမင်းကတော့ သူတို့ရဲ့အဖြေကို စိတ်အလိုမကျဘဲ အဓိပ္ပာယ်ကို သိချင်လွန်းလို့ အရူးအမူးဖြစ်နေရှာတယ်။
အဲဒီအခါကျမှ ဖလားတော်ဝန်ဟာ ယောသပ်ကို သတိရသွားတယ်။ ဒါနဲ့ ယောသပ်အကြောင်း သူ မပြောဘဲ မနေနိုင်တော့ဘူး။ လွန်ခဲ့တဲ့ ၂ နှစ်က ထောင်ထဲမှာရှိနေတုန်း သူ့ရဲ့အိပ်မက်နဲ့ စားတော်ဝန်ရဲ့အိပ်မက်ကို အနက်ဖွင့်ပြပေးခဲ့တဲ့ လူငယ်အကြောင်း ဖာရောမင်းကို ပြောပြလိုက်တယ်။ အဲဒီအခါ ဖာရောက ချက်ချင်းပဲ ထောင်ထဲမှာရှိတဲ့ ယောသပ်ကို ခေါ်ခိုင်းလိုက်တယ်။—ကမ္ဘာဦး ၄၁:၉-၁၃။
(ကမ္ဘာဦး ၄၁:၁၆) ယောသပ်က “မင်းကြီးစိတ်တော်နဲ့တွေ့မယ့် အိပ်မက်အဓိပ္ပာယ်ကို ရှင်းပြနိုင်သူဟာ ဘုရားသခင်ပါ။ ကျွန်တော် မဟုတ်ပါဘူး” လို့လျှောက်တင်တယ်။
(ကမ္ဘာဦး ၄၁:၂၉-၃၂) အီဂျစ်တစ်ပြည်လုံးမှာ ခုနစ်နှစ်ပတ်လုံး အစာပေါများကြွယ်ဝပါလိမ့်မယ်။ ၃၀ ခုနစ်နှစ်လွန်ရင်တော့ အငတ်ဘေး ခုနစ်နှစ်ကြုံရမယ်။ အီဂျစ်ပြည်မှာ ပေါများကြွယ်ဝခဲ့ဖူးတာတွေကို လုံးဝမေ့သွားကြမယ်။ အငတ်ဘေးကြောင့် တစ်ပြည်လုံး ပြုတ်ပြုတ်ပြုန်းနေမယ်။ ၃၁ အငတ်ဘေး ပြင်းထန်လွန်းလို့ တိုင်းပြည်မှာ ပေါများကြွယ်ဝခဲ့ဖူးတာကို သတိရကြတော့မှာ မဟုတ်ဘူး။ ၃၂ ဘုရားသခင်က ဒီကိစ္စကို အခိုင်အမာ အတည်ပြုလိုက်ပြီဖြစ်လို့ မင်းကြီးကို အိပ်မက် နှစ်ကြိမ်ပေးရတာပါ။ မကြာခင် ဒီကိစ္စကို ဘုရားသခင် အကောင်အထည်ဖော်ပါလိမ့်မယ်။
အိပ်မက်အနက်ကို ဘုရားသခင် ရှင်းပြနိုင်
စိတ်နှိမ့်ချသူတွေ၊ သစ္စာရှိသူတွေကို ယေဟောဝါဘုရား ချစ်မြတ်နိုးပါတယ်။ ဒါကြောင့် ပညာရှိတွေ၊ မှော်ဆရာတွေ နားမလည်တဲ့ အိပ်မက်အနက်ကို ယောသပ် ဖွင့်ပြနိုင်ဖို့ ယေဟောဝါဘုရား ကူညီပေးတယ်။ ဖာရောမင်း မက်တဲ့အိပ်မက် နှစ်ခုရဲ့အဓိပ္ပာယ်က အတူတူပဲဆိုတာ ယောသပ် ရှင်းပြခဲ့တယ်။ ယေဟောဝါဘုရားက ကိစ္စရပ်တစ်ခုကို အခိုင်အမာအတည်ပြုတဲ့အနေနဲ့ နှစ်ခါပြောတတ်တယ်။ ပြောပြီးပြီဆိုရင်လည်း မြေကြီးလက်ခတ်မလွဲ ပြည့်စုံတယ်။ ဝဖြိုးတဲ့နွားမတွေနဲ့ အဆန်အောင်တဲ့ ကောက်နှံတွေဟာ အီဂျစ်ပြည်မှာ အစားအစာ ၇ နှစ် ပေါကြွယ်ဝတာကို ဆိုလိုတယ်။ ပိန်ချုံးတဲ့နွားမတွေနဲ့ အဆန်မအောင်တဲ့ ကောက်နှံတွေက အငတ်ဘေးကျရောက်မယ့် နောက် ၇ နှစ်ကို ဆိုလိုနေတာ ဖြစ်တယ်။ အငတ်ဘေးကြောင့် တိုင်းပြည်တစ်ပြည်လုံး ဒုက္ခရောက်ရလိမ့်မယ်။—ကမ္ဘာဦး ၄၁:၂၅-၃၂။
(ကမ္ဘာဦး ၄၁:၃၈-၄၀) ဒါကြောင့် ဖာရောက မှူးမတ်တွေကို “သူ့လိုမျိုး ဘုရားသခင့်စွမ်းအားတော် ရရှိထားသူ နောက်တစ်ယောက်ကို ရှာတွေ့နိုင်မှာ မဟုတ်ဘူး” လို့ပြောတယ်။ ၃၉ ယောသပ်ကိုလည်း “ဘုရားသခင်က မင်းကို ဒီကိစ္စတွေအားလုံး အသိပေးပြီဆိုမှတော့ မင်းလောက် သတိပညာရှိသူ၊ အမြော်အမြင်ကြီးသူ မရှိနိုင်ဘူး။ ၄၀ ဒီတော့ မင်းက နန်းတော်အုပ် လုပ်ပါ။ ငါ့လူတွေအားလုံး မင်းကို အကြွင်းမဲ့နာခံရမယ်။ ဘုရင်ဖြစ်တဲ့ ငါကိုယ်တော်မြတ်သာ မင်းထက် ကြီးမြတ်သူဖြစ်မယ်” လို့ပြောတယ်။
အိပ်မက်အနက်ကို ဘုရားသခင် ရှင်းပြနိုင်
ဖာရောမင်းက ကတိအတိုင်း လုပ်ဆောင်တယ်။ ယောသပ်ကို ချည်ချောထည် ဆင်မြန်းပေးတဲ့အပြင် ရွှေလည်ဆွဲ၊ တံဆိပ်လက်စွပ်ကို ဝတ်ဆင်စေတယ်။ မြင်းရထားတော်နဲ့ တိုင်းပြည်အနှံ့လှည့်လည်ပြီး အကြံပြုချက်အတိုင်း လုပ်ဆောင်စေတယ်။ (ကမ္ဘာဦး ၄၁:၄၂-၄၄) ယောသပ်ဟာ အကျဉ်းထောင်ကနေ နန်းတော်ထဲကို နေ့ချင်းညချင်း ရောက်ရှိသွားပါပြီ။ အပယ်ခံအကျဉ်းသားကနေ ချီးမြှောက်ခံရတဲ့ ဒုတိယသြဇာအရှိဆုံး ဘုရင်ခံအဖြစ်ကို ရောက်လို့နေပါပြီ။ ယေဟောဝါဘုရားအပေါ် ယောသပ်ရဲ့ယုံကြည်ခြင်းက သံမဏိလို ခိုင်မာတယ်ဆိုတာ ပေါ်လွင်သွားပြီမဟုတ်လား။ ဘုရားသခင်က နှစ်ရှည်လများ ယောသပ်ခံခဲ့ရတဲ့ မတရားမှုမှန်သမျှကို တွေ့မြင်ခဲ့ပါတယ်။ ကိစ္စရပ်တွေကို အချိန်တန်တဲ့အခါ နည်းမှန်လမ်းကျ ဖြေရှင်းပေးခဲ့ပါတယ်။ ယောသပ်ခံခဲ့ရတဲ့ မတရားမှုတွေကို ဖော်ထုတ်ဖို့၊ အစ္စရေးလူတစ်မျိုးလုံးရဲ့ အနာဂတ်ကို ကာကွယ်ဖို့ ဘုရားသခင် အမြဲစဉ်းစားခဲ့တယ်။ ဒီအကြောင်းတွေကို နောက်ပိုင်းမှာ ဆက်ပြီးဖော်ပြသွားပါမယ်။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄၁:၁၄) ဒါနဲ့ ဖာရောမင်းက ယောသပ်ကို ထောင်ထဲကနေ အမြန်ခေါ်ထုတ်ခိုင်းတယ်။ ယောသပ်လည်း ဆံပင်နဲ့ မုတ်ဆိတ်တွေကို ရိတ်၊ အဝတ်လဲပြီး ဖာရောရှေ့ အခစားဝင်ရတယ်။
သင်သိပါသလား
ဖာရောနဲ့ သွားမတွေ့ခင် ယောသပ် ဘာကြောင့် ဆံပင်နဲ့ မုတ်ဆိတ်ကို ရိတ်ရသလဲ
ကမ္ဘာဦးကျမ်းမှတ်တမ်းအရ ဖာရောဟာ သူ့အတွက် စိတ်အနှောင့်အယှက်ဖြစ်နေတဲ့ အိပ်မက်ကို အနက်ပြန်ပေးဖို့ ဟီဘရူးအကျဉ်းသား ယောသပ်ကို အမြန်ဆုံးခေါ်လာပါလို့ အမိန့်ပေးတယ်။ အဲဒီအချိန်မှာ ယောသပ် ထောင်ကျနေတာလည်း နှစ်အတော်ကြာနေပြီဖြစ်တယ်။ ဖာရောက အရေးတကြီး ဆင့်ခေါ်လိုက်ပေမဲ့ ယောသပ်ဟာ ဘုရင်ရှေ့ခစားဖို့ ဆံပင်နဲ့မုတ်ဆိတ်တွေကို အချိန်ယူရိတ်ခဲ့တယ်။ (ကမ္ဘာဦး ၃၉:၂၀-၂၃; ၄၁:၁၊ ၁၄) အဲဒီလို သိပ်အရေးမပါပုံပေါက်တဲ့ အသေးစိတ်အချက်အလက်တွေအရ ကမ္ဘာဦးကျမ်းရေးသူဟာ အီဂျစ်ဓလေ့ထုံးစံတွေကို အကျွမ်းတဝင်ရှိကြောင်း ဖော်ပြတယ်။
ဟီဘရူးလူမျိုးအပါအ၀င် ရှေးခေတ်လူမျိုးအတော်များများမှာ မုတ်ဆိတ်အရှည်ထားတဲ့ ထုံးစံရှိကြတယ်။ ဒါပေမဲ့ “အရှေ့တိုင်းသားတွေထဲမှာ မုတ်ဆိတ်အရှည်မထားတဲ့ တစ်မျိုးတည်းသော လူမျိုးကတော့ ရှေးခေတ် အီဂျစ်လူမျိုးပဲ” လို့ စာစောင်တစ်ခု (McClintock and Strong’s Cyclopedia of Biblical, Theological, and Ecclesiastical Literature) မှာ ဖော်ပြထားတယ်။
မုတ်ဆိတ်ကိုပဲ ရိတ်ရတာလား။ အီဂျစ်လူမျိုးရဲ့ ဓလေ့ထုံးစံတချို့မှာ လူတစ်ဦးဟာ ဖာရောဘုရင်ရှေ့ အခစားဝင်တဲ့အခါ ဝတ်ပြုရာဗိမာန်တော်မှာ သွားဝတ်ပြုသလိုမျိုးလုပ်ဆောင်ဖို့ တောင်းဆိုထားတယ်လို့ ဂျာနယ်တစ်စောင် (Biblical Archaeology Review) မှာ ဖော်ပြထားတယ်။ အဲဒါကြောင့် ယောသပ်က ဖာရောဘုရင်ဆီအခစားမဝင်ခင် ဆံပင်နဲ့ မုတ်ဆိတ်တွေကို ရိတ်ရခြင်းဖြစ်ပါတယ်။
(ကမ္ဘာဦး ၄၁:၃၃) ဒါကြောင့် သတိပညာရှိသူ၊ အမြော်အမြင်ကြီးသူတစ်ယောက်ကို ရှာပြီး အီဂျစ်ပြည်ကို ကြီးကြပ်ခိုင်းပါ။
ဘုရားသခင်၏အမှုတော်ဆောင်များအနေဖြင့် အမူအကျင့်ကောင်းများ တင်ပြခြင်း
၁၄ မိဘတို့သည် အိမ်တွင် လိမ္မာယဉ်ကျေးမှု၏ အခြေခံသဘောတရားများကို သားသမီးများအား သင်ပေးရမည်။ ကမ္ဘာဦး ၂၂:၇ တွင် အာဗြဟံနှင့် သားဖြစ်သူဣဇာက်သည် တစ်ဦးကိုတစ်ဦး ယဉ်ကျေးစွာ ခေါ်ဝေါ်ပြောဆိုကြသည်ကို သုံးသပ်ကြည့်ပါ။ ယောသပ်၏မှတ်တမ်းတွင်လည်း သူသည် မိဘ၏လေ့ကျင့်မှုကို ကောင်းစွာရရှိခဲ့ကြောင်း ထင်ရှားသည်။ သူထောင်ကျနေစဉ် ဘဝတူထောင်သားများကိုပင် ယဉ်ကျေးစွာ ပြောဆိုဆက်ဆံခဲ့သည်။ (က. ၄၀:၈၊ ၁၄၊ ကဘ) ယောသပ်သည် အထက်အရာရှိတစ်ဦးအား မည်သို့ပြောဆိုသင့်သည်ကို ကောင်းစွာသင်ယူခဲ့ကြောင်း ဖာရောအားပြောသော သူ၏စကားများက ဖော်ပြသည်။—က. ၄၁:၁၆၊ ၃၃၊ ၃၄။
ကျမ်းစာဖတ်ရှုခြင်း
မေ ၂၅-၃၁
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၄၂-၄၃
“ယောသပ် ချုပ်တည်းမှုပြခဲ့”
(ကမ္ဘာဦး ၄၂:၅-၇) ခါနန်ပြည်မှာလည်း အငတ်ဘေး ကြုံနေရတဲ့အတွက် အစ္စရေးရဲ့သားတွေဟာ အစားအစာ လာဝယ်သူတွေနဲ့အတူ အီဂျစ်ပြည်ကို ရောက်လာကြတယ်။ ၆ ယောသပ်ဟာ အီဂျစ်ပြည်မှာ အခွင့်အာဏာရှိသူ၊ အရပ်ရပ်ကလာတဲ့လူတွေကို ကောက်နှံရောင်းပေးသူ ဖြစ်တယ်။ ဒါကြောင့် အစ်ကိုတွေက ယောသပ်ဆီလာပြီး ဦးညွှတ်ကြတယ်။ ၇ ယောသပ်က အစ်ကိုတွေကို ချက်ချင်းမှတ်မိပေမဲ့ သူဘယ်သူလဲဆိုတာ အသိမပေးဘူး။ “မင်းတို့ ဘယ်ကလာတာလဲ” ဆိုပြီး ခပ်ထန်ထန်မေးတော့ “အစားအစာဝယ်ဖို့ ခါနန်ပြည်က လာကြတာပါ” လို့ပြန်ဖြေတယ်။
“ဘုရားသခင်ကပဲ အပြစ်ပေးနိုင်”
ယောသပ်ကော ဘယ်လိုနေသလဲ။ အကိုတွေမှန်း ချက်ချင်းမှတ်မိသွားပါလေရော။ ဒါ့အပြင် အကိုတွေ ဦးညွှတ်နေတာကို ကြည့်ပြီး ကလေးဘဝအကြောင်း အတွေးထဲဝင်လာတယ်။ အဲဒီအခါ ယောသပ်ဟာ ကလေးဘဝက ယေဟောဝါဘုရားမြင်မက်စေခဲ့တဲ့ “အိပ်မက်တို့ကို အောက်မေ့” လာတယ်လို့ ကျမ်းစာမှာ ဖော်ပြထားပါတယ်။ အဲဒီအိပ်မက်တွေထဲမှာ အကိုတွေက ယောသပ်ရှေ့မှာ ဦးညွှတ်ကြလိမ့်မယ်လို့ ကြိုပြောထားတယ်။ အခုတော့ သူတို့တကယ်ပဲ ဦးညွှတ်နေကြပါလား။ (ကမ္ဘာဦး ၃၇:၂၊ ၅-၉; ၄၂:၇၊ ၉) ယောသပ် ဘာလုပ်မလဲ။ အကိုတွေကို ပွေ့ဖက်မလား။ ကလဲ့စားချေမလား။
“ဘုရားသခင်ကပဲ အပြစ်ပေးနိုင်”
သင်က ယောသပ်လို အခြေအနေမျိုး တစ်ထပ်တည်း ကြုံချင်မှကြုံရမယ်။ ဒါပေမဲ့ ဒီနေ့ခေတ် မိသားစုအတွင်း ပြဿနာတွေတက်ပြီး စိတ်ဝမ်းကွဲနေကြတာ အဆန်းတော့မဟုတ်ပါဘူး။ အဲဒီလိုအဖြစ်မျိုးကြုံရရင် ခံပြင်းတဲ့စိတ်နဲ့ ဖြစ်ချင်ရာဖြစ်ဆိုပြီး စိတ်ကူးပေါက်ရာ လုပ်မိသွားနိုင်တယ်။ အဲဒီအခါ ယောသပ်ကို တုပပြီး ကိစ္စရပ်တွေကို ယေဟောဝါဘုရား ဘယ်လိုကိုင်တွယ်စေချင်သလဲဆိုတာ သိမြင်ဖို့ကြိုးစားတာက ပညာရှိရာရောက်တယ် မဟုတ်လား။ (သုတ္တံ ၁၄:၁၂) မိသားစုဝင်ချင်းသင့်မြတ်ဖို့ အရေးကြီးတာမှန်ပေမဲ့ ယေဟောဝါဘုရား၊ ယေရှုတို့နဲ့ သင့်မြတ်ဖို့ ပိုအရေးကြီးပါတယ်။—မဿဲ ၁၀:၃၇။
(ကမ္ဘာဦး ၄၂:၁၄-၁၇) ဒါပေမဲ့ ယောသပ်က “ငါပြောပြီးပြီပဲ။ ၁၅ မင်းတို့ဟာ သူလျှိုတွေပါ။ မင်းတို့ပြောတာ မှန်မမှန် ငါစစ်ဆေးမယ်။ အသက်ရှင်နေတဲ့ ဖာရောမင်းကို တိုင်တည်ပြီး ငါပြောမယ်။ ညီအငယ်ဆုံး ဒီကိုမလာမချင်း မင်းတို့ ဒီနေရာကနေ မထွက်သွားရဘူး။ ၁၆ မင်းတို့ထဲက တစ်ယောက်က အဲဒီညီလေးကို သွားခေါ်။ ကျန်တဲ့သူတွေအားလုံး အချုပ်ထဲမှာ နေခဲ့။ ဒါမှ မင်းတို့ပြောတာ မှန်မမှန်သိနိုင်မယ်။ မဟုတ်လို့ကတော့ အသက်ရှင်နေတဲ့ ဖာရောမင်းကို တိုင်တည်ပြီး ငါပြောမယ်၊ မင်းတို့ဟာ သူလျှိုတွေပဲ” လို့ပြောပြီး၊ ၁၇ သူတို့ကို အချုပ်ထဲမှာ သုံးရက် ချုပ်ထားလိုက်တယ်။
“ဘုရားသခင်ကပဲ အပြစ်ပေးနိုင်”
အကိုတွေရဲ့ စိတ်ရင်းမှန်ကို ဖော်ထုတ်ဖို့ စမ်းသပ်မှု တစ်ခုပြီးတစ်ခု ယောသပ် စတင်ပါတော့တယ်။ ဦးဆုံး၊ ယောသပ်က စကားပြန်ကနေတစ်ဆင့် ခပ်မာမာပြောဆိုပြီး သူလျှိုတွေလို့ စွပ်စွဲခဲ့တယ်။ စွပ်စွဲချက်ကို ပြန်ချေပနိုင်ဖို့ အကိုတွေက မိသားစုဇာတ်ကြောင်းကို ပြောပြပါလေရော။ အဲဒီထဲမှာ အိမ်မှာ ညီလေးကျန်ရစ်ခဲ့တယ်ဆိုတဲ့ ယောသပ် အသိချင်ဆုံးအကြောင်းလည်း ပါတယ်။ အဲဒီအခါ ခံစားချက်ကို ဘယ်လောက်ထိ ယောသပ် မျိုသိပ်ထားရမလဲဆိုတာ မြင်ယောင်ကြည့်နိုင်တယ်။ ညီလေးက အသက်ရှင်နေတုန်းပဲကိုး။ အခု ဘာဆက်လုပ်ရမလဲဆိုတာ ယောသပ် သိသွားပြီ။ ဒါနဲ့ ‘သင်တို့ပြောသမျှ မှန်မမှန်’ သိရအောင် ညီအငယ်ဆုံးကို တွေ့ချင်တယ်လို့ ပြောလိုက်တယ်။ ဓားစာခံအနေနဲ့ တစ်ယောက်နေရစ်ခဲ့မယ်ဆိုရင် ညီအငယ်ဆုံးကို သွားခေါ်ဖို့ အိမ်ပြန်နိုင်ပြီလို့ ယောသပ် သဘောတူလိုက်တယ်။—ကမ္ဘာဦး ၄၂:၉-၂၀။
(ကမ္ဘာဦး ၄၂:၂၁၊ ၂၂) သူတို့က “ညီလေးကို လုပ်ခဲ့တာတွေကြောင့် ငါတို့ပြန်ခံနေရတာပဲ။ သူစိတ်ထိခိုက်ပြီး သနားပါလို့ တောင်းပန်တာကို ငါတို့မြင်လျက်နဲ့ နားမထောင်ခဲ့ဘူးလေ။ ဒါကြောင့် ငါတို့ အခုလို ဒုက္ခရောက်နေတာ” လို့ အချင်းချင်းပြောကြတယ်။ ၂၂ ရုဗင်ကလည်း “‘ညီလေးကို ဒုက္ခမပေးနဲ့’ လို့ငါပြောခဲ့သားပဲ။ မင်းတို့မှ နားမထောင်တာ။ သူ့ကိုလုပ်ခဲ့လို့ အခု ငါတို့ ပြန်ခံနေရပြီ” လို့ပြောတယ်။
it-2 ၁၀၈ ပိုဒ်. ၄
ယောသပ်
အဖြစ်အပျက်တွေကို သုံးသပ်ပြီးနောက် ယောသပ်ရဲ့ အဖေတူ အမေကွဲ အစ်ကိုတွေဟာ အစောပိုင်းနှစ်တွေတုန်းက ယောသပ်ကို ကျွန်အဖြစ် ရောင်းစားခဲ့တဲ့အတွက် မိမိတို့ကို ဘုရားအပြစ်ပေးတာလို့ ခံစားနေကြရတယ်။ ယောသပ်ကို မမှတ်မိဘဲ ယောသပ်ရှေ့မှာ သူတို့လုပ်ခဲ့တဲ့အပြစ်အကြောင်း ပြောဆိုနေကြတယ်။ သူတို့ပြောတဲ့စကားက နောင်တရနေမှန်း ဖော်ပြလို့ ယောသပ်ဟာ စိတ်မထိန်းနိုင်တော့ဘဲ သူတို့ရှေ့ကနေ ထွက်သွားပြီး ငိုတယ်။ ပြန်လာတဲ့အခါ ရှိမောင်ကို ဖမ်းပြီး အငယ်ဆုံးညီကို ခေါ်လာတဲ့အချိန်အထိ ချုပ်ထားလိုက်တယ်။—က ၄၂:၂၁-၂၄။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄၂:၂၂) ရုဗင်ကလည်း “‘ညီလေးကို ဒုက္ခမပေးနဲ့’ လို့ငါပြောခဲ့သားပဲ။ မင်းတို့မှ နားမထောင်တာ။ သူ့ကိုလုပ်ခဲ့လို့ အခု ငါတို့ ပြန်ခံနေရပြီ” လို့ပြောတယ်။
(ကမ္ဘာဦး ၄၂:၃၇) ရုဗင်က “ဗင်ယာမိန်ကို ပြန်မခေါ်လာနိုင်ခဲ့ရင် ကျွန်တော့်သားနှစ်ယောက်ကို သတ်လိုက်ပါ။ ဗင်ယာမိန်ကိုတော့ ကျွန်တော်နဲ့ ထည့်ပေးလိုက်ပါ။ အဖေ့ဆီ ဆက်ဆက်ပြန်ခေါ်လာပါ့မယ်” ဆိုပြီးပြောတယ်။
it-2 ၇၉၅
ရုဗင်
ယောသပ်ကို မသတ်ဘဲ ရေမရှိတဲ့တွင်းထဲ ပစ်ချဖို့ ညီအစ်ကို ကိုးယောက်ကို ပြောတဲ့အချိန်မှာ ရုဗင်ရဲ့ အရည်အသွေးကောင်းတချို့ကို မြင်တွေ့ရတယ်။ ရုဗင်ဟာ ယောသပ်ဆီ တိတ်တိတ်လေး ပြန်လာပြီး ရေတွင်းထဲကနေ ကယ်ထုတ်ဖို့ အကြံရှိတယ်။ (က ၃၇:၁၈-၃၀) အနှစ် ၂၀ ကျော်ကြာပြီးနောက်၊ အီဂျစ်ပြည်ကို ထောက်လှမ်းဖို့လာတဲ့ သူလျှိုတွေလို့ စွပ်စွဲခံရတာဟာ ယောသပ်ကို မတရားလုပ်ခဲ့လို့ဆိုပြီး ညီအစ်ကိုတွေ ပြောတဲ့အချိန်မှာလည်း ယောသပ်ကို ဒုက္ခပေးတဲ့အထဲမှာ မိမိ မပါဝင်ကြောင်း ရုဗင် ပြောခဲ့တယ်။ (က ၄၂:၉-၁၄၊ ၂၁၊ ၂၂) အီဂျစ်ပြည်ကို ဒုတိယအကြိမ် သွားတဲ့အခါ ဗင်ယာမိန်ကို အစ်ကိုတွေနဲ့အတူ မထည့်နိုင်ဘူးလို့ ယာကုပ်ပြောတဲ့အခါမှာလည်း ရုဗင်က မိမိရဲ့ သားနှစ်ယောက်ကို အာမခံထားပြီး “ဗင်ယာမိန်ကို ပြန်မခေါ်လာနိုင်ခဲ့ရင် ကျွန်တော့်သားနှစ်ယောက်ကို သတ်လိုက်ပါ” လို့ ပြောတယ်။—က ၄၂:၃၇။
(ကမ္ဘာဦး ၄၃:၃၂) ဒါနဲ့ ယောသပ်အတွက်၊ သူ့ညီအစ်ကိုတွေအတွက်၊ သူ့အိမ်က အီဂျစ်လူတွေအတွက် သီးသန့်စီ ပြင်ဆင်ကြတယ်။ အီဂျစ်လူတွေက ဟီဘရူးတွေနဲ့အတူ မစားသောက်ကြဘူး။ အဲဒီလိုအတူစားရတာကို ရွံမုန်းကြတယ်။
ကမ္ဘာဦးကျမ်းမှ ပေါ်လွင်ချက်များ—၂
၄၃:၃၂—အီဂျစ်လူတို့သည် ဟေဗြဲလူတို့နှင့်အတူ အစာစားခြင်းကို အဘယ်ကြောင့် ရွံရှာကြသနည်း။ ဘာသာရေးစိတ်စွန်းကွက်မှုနှင့် လူမျိုးရေးမာနကြောင့်သာ ဖြစ်ပေမည်။ အီဂျစ်လူတို့သည် သိုးထိန်းများကိုလည်း ရွံရှာကြ၏။ (ကမ္ဘာဦး ၄၆:၃၄) အဘယ်ကြောင့်နည်း။ သိုးထိန်းများသည် အီဂျစ်၏ အဆင့်အတန်းခွဲခြားမှုစနစ်တွင် အလွန်အဆင့်နိမ့်သူများ ဖြစ်ပေမည်။ သို့မဟုတ် ထွန်ယက်စိုက်ပျိုးနိုင်သောမြေ မများလှသောကြောင့် သိုးအုပ်များအတွက် စားကျက်ရှာဖွေသူများကို အီဂျစ်လူတို့က အထင်သေးခြင်းလည်း ဖြစ်နိုင်၏။
ကျမ်းစာဖတ်ရှုခြင်း