တရားမျှတခြင်းသည် ဘုရားနည်းလမ်းတော်ခပ်သိမ်းတွင် မှတ်သားပါဝင်

“ဘုရားသခင်သည် မူလအမြစ်ဖြစ်၍ အမှုတော်သည်စုံလင်ပေ၏။ စီရင်တော်မူသမျှတို့သည် တရားနှင့်ညီလျက်၊ သစ္စာစောင့်သောဘုရား၊ အပြစ်ကင်းလွတ်၍ ဟုတ်မှန်ဖြောင့်မတ်သောဘုရားဖြစ်တော်မူ၏။”—တရားဟောရာ ၃၂:၄။

၁။ မောရှေသည် သူမသေဆုံးမီ ဣသရေလသားများအတွက် သူ၏သီချင်း၌ ယေဟောဝါ၏ မည်သည့်အရည်အချင်းများကို ပေါ်လွင်စေခဲ့၍ အဘယ်ကြောင့်ထိုသို့သူပြောဆိုနိုင်ခဲ့သနည်း။

ယေဟောဝါ အချုပ်အခြာတရားသူကြီး၊ ပညတ်ပေးရှင်ဘုရင်သည် “ဖြောင့်မတ်ခြင်းနှင့်တရားမျှတခြင်းကို ချစ်တော်မူ၏။” (ဆာလံ ၃၃:၅၊ ဟေရှာယ ၃၃:၂၂) ပညတ်တော် အာမခံ၊ ပရောဖက်တစ်ဦးဖြစ်သူ “ယေဟောဝါ မျက်နှာချင်းဆိုင်သိသော” မောရှေသည် ယေဟောဝါ၏တရားမျှတသော လမ်းတော်များနှင့် အတွင်းကျကျအကျွမ်းတဝင်ဖြစ်ခဲ့သည်။ (တရားဟောရာ ၃၄:၁၀၊ ယောဟန် ၁:၁၇) မောရှေမသေဆုံးမီလေးတွင် ထူးကဲသောအရည်အချင်းဖြစ်သည့် ယေဟောဝါ၏တရားမျှတခြင်းကို သူပေါ်လွင်စေခဲ့သည်။ဣသရေလအစုအဝေးအားလုံး နားထောင်နေစဉ် ဤသီချင်း၏စာသားများကို သူဟစ်ဆိုခဲ့သည်။ “အိုကောင်းကင်နားထောင်လော့။ ငါပြောမည်။ အိုမြေကြီး ငါမြွက်သောစကားကိုကြားလော့. . . ငါသည်ထာဝရဘုရား၏ နာမတော်ကို ဖော်ပြသည်ဖြစ်၍ ငါတို့ဘုရားသခင်၏ ဘုန်းအာနုဘော်တော်ကို ချီးမွမ်းကြလော့။ ဘုရားသခင်သည် မူလအမြစ်ဖြစ်၍ အမှုတော်သည်စုံလင်ပေ၏။ စီရင်တော်မူသမျှတို့သည် တရားနှင့်ညီလျက် သစ္စာစောင့်သောဘုရား၊ အပြစ်ကင်းလွတ်၍ ဟုတ်မှန်ဖြောင့်မတ်သောဘုရားဖြစ်တော်မူ၏။”—တရားဟောရာ ၃၂:၁၊ ၃၊ ၄။

၂။ ဘုရား၏လုပ်ရပ်ခပ်သိမ်းတွင် တရားမျှတခြင်းမည်သို့အစဉ်ပါဝင်ပြီး ယင်းသည်အဘယ်ကြောင့်အရေးကြီးသနည်း။

^၂ တရားမျှတခြင်းသည် ယေဟောဝါ၏လုပ်ငန်းတော်အားလုံးတွင် မှတ်သားပါဝင်ပြီး ကိုယ်တော်၏ဉာဏ်ပညာ၊ မေတ္တာ၊ တန်ခိုးတော်နှင့်အညီ အစဉ်လုပ်ဆောင်သည်။ ယောဘ ၃၇:၂၃ တွင်ဘုရား၏ကျေးကျွန် ဧလိဟုကယောဘကို ဤသို့သတိပြုစေသည်။ “အနန္တတန်ခိုးရှင်ကို ငါတို့သည်စစ်၍ မကုန်နိုင်ကြ။ အစွမ်းသတ္တိအားဖြင့်လည်းကောင်း၊ တရားစီရင်ခြင်းနှင့် ဖြောင့်မတ်ခြင်းအားဖြင့်လည်းကောင်း ထူးဆန်းတော်မူ၏။ အဘယ်သူကိုမျှညှဉ်းဆဲတော်မမူ။” ဘုရင်ဒါဝိတ်ကလည်း “ထာဝရဘုရားသည် တရားကိုနှစ်သက်တော်မူ၏။ မိမိသန့်ရှင်းသူတို့ကိုလည်း စွန့်တော်မမူ။” ဟုရေးခဲ့၏။ (ဆာလံ ၃၇:၂၈) အားရဖွယ်နှစ်သိမ့်မှုပါတကား။ ဘုရား၏ နည်းလမ်းတော်အားလုံးတွင် ကိုယ်တော်သည် မိမိအပေါ်သစ္စာစောင့်သူများအား ခဏလေးပင် ဘယ်တော့မျှ စွန့်ပစ်မည်မဟုတ်။ ယင်းကိုဘုရား၏ တရားမျှတခြင်းက အာမခံသည်။

အဘယ်ကြောင့်တရားမျှတခြင်းကင်းမဲ့နေ

၃။ ယနေ့လူသားတို့တွင်ဘာကင်းမဲ့နေပြီး ယင်းသည်လူနှင့်ဘုရား၏ဆက်ဆံရေးကို မည်သို့ထိခိုက်စေသနည်း။

^၃ ယေဟောဝါသည် တရားမျှတသောဘုရား၊ တရားမျှတခြင်းကို ချစ်ကာ “မြေကြီးစွန်းတိုင်အောင်ဖန်ဆင်းရှင်” ဖြစ်လျက်နှင့် အဘယ်ကြောင့် ယနေ့လူသားများတွင် ဤမျှလောက် တရားမျှတခြင်း ကင်းမဲ့နေသနည်း။ (ဟေရှာယ ၄၀:၂၈) တရားဟောရာ ၃၂:၅ တွင်မောရှေအဖြေပေးသည်။ “သူတို့သည် ယိုယွင်းကြပြီ။ ဘုရားသခင်၏သားမဟုတ်။ အညစ်အကြေးကပ်ကြ၏။ သဘောကောက်၍ ဖောက်ပြန်သောအမျိုးဖြစ်ကြ၏။” လူ့ယိုယွင်းသောလုပ်ရပ်များသည် ဖန်ဆင်းရှင်နှင့် ကွာခြားလွန်းလှ၍ ကောင်းကင်သည်မြေကြီးထက်သာ၍ မြင့်သကဲ့သို့ ဘုရား၏အကြံတော်သည် လူ့ထက်မြင့်ကြောင်း ဖေါ်ပြထားသည်။—ဟေရှာယ ၅၅:၈၊ ၉။

၄။ လူသားသည်မည်သည့်လမ်းကိုရွေးချယ်ခဲ့ပြီး ယင်းကသူ့ကို မည်သည့်နေရာသို့ရောက်စေသနည်း။

^၄ လူကိုဖန်ဆင်းရှင်သည် ကိုယ်တော်မှသီးခြားလုပ်ဆောင်ရန် မပြုလုပ်ထားကြောင်း ဘယ်တော့မှမမေ့ပါနှင့်။ ယေရမိသည် အခြေအနေကို မှန်ကန်စွာပင် ကျွန်ုပ်တို့အတွက် သတ်မှတ်ပေးထားသည်။ သူက “အိုထာဝရဘုရား လူသည်မိမိသွားရာလမ်းကို အစိုးမရ။ သွားစဉ်အခါ မိမိခြေရာတို့ကို မစီရင်တတ်သည်ကို အကျွန်ုပ်သိပါ၏။” ဟုဆိုခဲ့သည်။ (ယေရမိ ၁၀:၂၃) လူသည် ဘုရား၏တရားမျှတသော လမ်းတော်နှင့်အုပ်ချုပ်မှုကို ငြင်းပယ်ခြင်းဖြင့် သူ့အား လုံးဝကွာခြားပြီး အလွန်တန်ခိုးရှိသော မျက်မြင်မရအင်အားစု စာတန်မာန်နတ်နှင့် သူ၏အပေါင်းအပါနတ်ဆိုးများအောက် ရောက်စေသည်။ တမန်တော်ယောဟန်က အလေးအနက်ဖေါ်ပြသည်။ “လောကီသားအပေါင်းတို့သည် မာန်နတ်၏လက်၌ ရှိကြသည်ကိုလည်းကောင်း ငါတို့သိကြ၏။” ဤနတ်ဆိုးအင်အားစုသည် လူ့ဘောင်တွင် တရားမျှတမှုကို စွဲကိုင်ရန် စိုးစဉ်းမျှပင် စိတ်မဝင်စားချေ။—၁ ယောဟန် ၅:၁၉။

၅။ ယနေ့ကမ္ဘာတွင် တရားမျှတခြင်းကင်းမဲ့မှုဥပမာကိုတင်ပြပါ။

^၅ ဤစနစ်၏ နောက်ဆုံးပိုင်းတွင် တရားမျှတမှုကင်းမဲ့ခြင်း၏ ဥပမာကို ၁၉၈၄ တွင်ယူအက်စ်ရှေ့နေချုပ်ကြီး ဝီလျံဖရန့်စမစ်က ပေါ်လွင်စေခဲ့သည်။ ၁၉၇၇ မှ ၁၉၈၃ အတွင်း အမေရိကန်ပြည်နယ် ၁၂ ခုရှိထောင်များကို လေ့လာခြင်းအပေါ် စမစ် ကမှတ်ချက်ချသည်။ “အဆိုးဆုံးပြစ်မှု ကျူးလွန်သူများ—လူသတ်မှု၊ မုဒိမ်း၊ မူးယစ်ဆေးဝါးရောင်းဝယ်သူများ—ကိုကြီးလေးစွာ အပြစ်ချမှတ်သင့်သည်ဟု လူထုကယူဆသည်။ ရုံးစာတွဲများကိုလေ့လာခြင်းဖြင့် . . . အရေထူနေသော ရာဇဝတ်ကောင်များ ပြစ်မှုအသစ်ကျူးလွန်ရန် လမ်းပေါ်သို့ပြန်သွားရန် မည်မျှလွယ်ကူကြောင်းပြသနေသည်။ ဝါရှင်တန်ဥပဒေအခြေခံမှ ပေါလ်ကမ်မီနာ က “တရားရေးစနစ်ဟာလျော့ရဲလွန်းတယ်” ဟုဆိုခြင်းမှာမဆန်းချေ။

၆။ (က) ယုဒနယ်သည်သိမ်းသွားမခံရမီ စာရိတ္တအခြေအနေမည်သို့ရှိသနည်း။(ခ) ဟဗက္ကုတ်သည်မည်သည့်မေးခွန်းများထုတ်ခဲ့ပြီး ယင်းတို့သည်ယနေ့တွင်လည်းသက်ဆိုင်ပါသလော။

^၆ ခသမ ၆၀၇ ဗာဗုလုန်စစ်တပ်အောက်မရောက်မီ ယုဒနိုင်ငံတစ်လျှောက်လုံးတွင် တရားမျှတခြင်းသည် လျော့ရဲခဲ့သည်။ ထိုကြောင့်ပင် ဘုရား၏ပရောဖက်ဟဗက္ကုတ်က ဝိညာဉ်တော်ရလျက်ဆိုခဲ့သည်။ “တရားလျော့ပါ၏။ တရားသဖြင့်စီရင်ဆုံးဖြတ်ခြင်းမရှိပါ။ မတရားသောသူတို့သည် ဖြောင့်မတ်သောသူတို့ကို ဝိုင်းသောကြောင့် မတရားသဖြင့် စီရင်ဆုံးဖြတ်ကြပါ၏။” (ဟဗက္ကုတ် ၁:၄) ဤသို့သော အဓမ္မအခြေအနေကြောင့် ပရောဖက်သည် ယေဟောဝါအားမေးခွန်းမေးခဲ့သည်။ “သစ္စာပျက်သောသူကို အဘယ်ကြောင့်ကြည့်ရှု၍ နေတော်မူသနည်း။ အဓမ္မလူသည် မိမိထက်ဖြောင့်မတ်သောသူကို ကိုက်စားသောအခါ အဘယ်ကြောင့်တိတ်ဆိတ်စွာနေသနည်း။” (ဟဗက္ကုတ် ၁:၁၃) ယနေ့လူ့လုပ်ရပ်အားလုံးတွင် မတရားမှုရင်ဆိုင်ရသော လူများကလည်းမေးပေမည်။ တရားမျှတသောဘုရားသည် မြေကြီးပေါ်တွင် ပြုလုပ်နေသောမတရားမှုကို အဘယ်ကြောင့်ဆက်ကြည့်နေရသနည်း။ အဘယ်ကြောင့် “မတရားသဖြင့်စီရင်ရန်” ကိုယ်တော်ခွင့်ပြုရသနည်း။ အဘယ်ကြောင့်ကိုယ်တော်သည် “တိတ်ဆိတ်စွာနေရသနည်း။” အရေးကြီးသောမေးခွန်းများဖြစ်ပြီး ဘုရား၏အဖိုးထိုက်နှုတ်ကပတ်တော် သမ္မာကျမ်းစာသာလျှင် ဟုတ်မှန်၍ ကျေနပ်ဖွယ် အဖြေများပေးလေသည်။

မတရားမှုကို အဘယ်ကြောင့်ဘုရားခွင့်ပြု

၇။ (က) လူအားဘုရားပေးသော ပရဒိသုအဘယ်ကြောင့်ပျောက်ဆုံးသွားသနည်း။ (ခ) ဧဒင်တွင်မည်သည့်ကစ္စရပ်ပေါ်ပေါက်လာပြီး ဘုရား၏တရားမျှတခြင်းက ယင်းကိုမည်သို့တောင်းဆိုသနည်း။

^၇ မောရှေသက်သေခံခဲ့သည့်အတိုင်း ဘုရားလုပ်ငန်းတော်များသည် စုံလင်၏။ ဧဒင်ပရဒိသုတွင် ဘုရားထားခဲ့သော စုံလင်သောဇနီးမောင်နှံလည်း ထိုနည်းအတိုင်းပင်။ (ကမ္ဘာဦး ၁:၂၆၊ ၂၇။ ၂:၇) လူသားတို့၏ ကျန်းမာပျော်ရွှင်ရေးအတွက် အစီအစဉ်တစ်ခုလုံးသည် စုံလင်ခဲ့သည်။ ဘုရားမှတ်တမ်းက ဤသို့ဆို၏။ “ဘုရားသခင်သည် မိမိဖန်ဆင်းသမျှသော အရာတို့ကိုကြည့်ရှုလျှင် အလွန်ကောင်းသည်ကို မြင်တော်မူ၏။” (ကမ္ဘာဦး ၁:၃၁) သို့သော်ဧဒင်ဆိုင်ရာ ငြိမ်သက်မှုသည် မတာရှည်ခဲ့။ ပုန်ကန်သူ နံဝိညာဉ်၏လွှမ်းမိုးမှုအောက်၌ ဧဝနှင့်သူမ၏ခင်ပွန်းအာဒံသည် သူတို့အပေါ် ကိုယ်တော်၏အုပ်ချုပ်မှုနှင့်စပ်လျဉ်း၍ ထိပ်တိုက်ရင်ဆိုင်ခဲ့ရသည်။ သူတို့အပေါ် ဘုရား၏ အမိန့်ထုတ်ပိုင်ခွင့်နှင့်ပတ်သက်၍ ယခုစောဒကတက်လာသည်။ (ကမ္ဘာဦး ၃:၁-၆) ဘုရား၏အုပ်ချုပ်ပုံ တရားမျှတခြင်းကို စိန်ခေါ်ချက်က အရေးကြီးသော သီလကိစ္စရပ်ကို ပေါ်ပေါက်စေသည်။ သစ္စာရှိယောဘ၏ ရာဇဝင်မှတ်တမ်းက ဘုရားဖန်ဆင်းထားသူအားလုံး၏ တည်ကြည်မှုကိုလည်း မေးခွန်းထုတ်ရန် ပေါ်လာကြောင်းတင်ပြသည်။ တရားမျှတခြင်းက ဤစကြဝဠာ အရေးပါကိစ္စရပ် ဖြေရှင်းရန် အချိန်ပေးဖို့တောင်းဆိုခဲ့သည်။—ယောဘ ၁:၆-၁၁။ ၂:၁-၅။ လုကာ ၂၂:၃၁ ကိုလည်းကြည့်ပါ။

၈။ (က) ယခုလူသည် မည်သို့သောယိုယွင်းသည့်အခြေအနေသို့ရောက်သွားသနည်း။ (ခ) မောရှေသီချင်းတွင် မည်သည့်မျှော်လင့်ချက်တွေ့ရသနည်း။

^၈ ဘုရားရှင်၏ တရားမျှတသောနည်းလမ်းကို ဘေးဖယ်ခြင်းကြောင့် ဖြစ်ပေါ်လာသော လူသားတို့၏ ယိုယွင်းသောအခြေအနေကို ပေါလုက ရောမ ၈:၂၂ တွင်ခြုံ၍ ပြောထားလေသည်။ “ဤလောကတစ်နိုင်ငံလုံးသည် ယခုတိုင်အောင်တညီတညွတ်တည်း ညည်းတွား၍ ဆင်းရဲခြင်းဝေဒနာကို ခံရသည်ဟု ငါတို့သိကြ၏။” ဟူသည့်အတိုင်းပင်။ (ဒေသနာ ၈:၉) ကိုယ်တော်သည် ထိုသို့သောတရားမျှတခြင်း အတုကို အကန့်အသတ်မရှိ ဆက်သွားရန် ခွင့်မပြုသည့်အတွက် အနန္တတန်ခိုးရှင်ဘုရားသခင်အားကျေးဇူးတင်ပါသည်။ယင်းနှင့်ပတ်သက်၍ တရားဟောရာ ၃၂:၄၀၊ ၄၁ တွင်မောရှေက သူ၏သီချင်းတွင် ဆက်ဖေါ်ပြထားသည်ကို သတိပြုပါ။ “ငါသည်အစဉ်အမြဲအသက်ရှင်ပေ၏။ ငါ [ယေဟောဝါ] သည်ပြောင်လက်သောထားကိုသွေး၍ တရားစီရင်စပြုလျက် ငါ့ရန်သူတို့၌ အပြစ်တရားကိုစီရင်မည်။ ငါ့ကိုမုန်းသောသူတို့ ခံထိုက်သော အပြစ်အလျောက်ငါဆပ်ပေးမည်။”

၉။ လူသားပုန်ကန်သောအခါ ယေဟောဝါလက်တော်မည်သို့ “တရားစီရင်” ခဲ့ပုံကိုရှင်းပြပါ။

^၉ ယေဟောဝါ၏လက်တော်သည် ဧဒင်၌ “တရားစီရင်” ခဲ့သည်။ မဆိုင်းမတွပင် ဘုရားသည် ယောက်ျားအား မိမိပညတ်ကို သိလျက်နှင့် နာမခံသောကြောင့် တရားမျှတစွာ သေဒဏ်ချမှတ်ခဲ့သည်။ ကိုယ်တော်က အာဒံအား “သင်သည်မြေမှုန့်ဖြစ်၍ မြေမှုန့်သို့ ပြန်ရမည်။” ဟုမိန့်တော်မူခဲ့သည်။ (ကမ္ဘာဦး ၃:၁၉) နှစ်ရာစုများစွာကြာသော် တမန်တော်ပေါလုက အာဒံ၏အပြစ်လမ်းစဉ်ကြောင့် လူသားအနွယ်တစ်ခုလုံး အတိဒုက္ခရောက်ရသည်ကိုခြုံ၍ ဤသို့ရေးခဲ့သည်။ “အပြစ်တရားသည်တစ်ယောက်သောသူအားဖြင့် ဤလောကသို့ဝင်၍ အပြစ်တရားအားဖြင့် သေခြင်းတရားဝင်သည်နှင့်အညီ လူအပေါင်းတို့သည်အပြစ်ရှိသောကြောင့် သေခြင်းသို့ရောက်ရကြ၏။”—ရောမ ၅:၁၂။

၁၀။ အာဒံ၏ပုန်ကန်မှုမှစ၍ မည်သည့်မျိုးနွယ်နှစ်ခုပေါ်ပေါက်ခဲ့ပြီးယေဟောဝါမည်သို့တုန့်ပြန်ခဲ့သနည်း။

^၁၀ လူပုန်ကန်ပြီးနောက် ဘုရားကဆက်၍ မိန့်ဆိုသေးသည်။ “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည်ရန်ငြိုးဖွဲ့စေမည်။ သူသည်သင်၏ ခေါင်းကိုကြိတ်လိမ့်မည်။ သင်သည်သူ၏ ဖနောင့်ကို ကြိတ်လိမ့်မည်။” (ကမ္ဘာဦး ၃:၁၅၊ ၁၇-၁၉) ဤမျိုးနွယ်နှစ်ခု ဖြစ်ပေါ်နေသည်မှာ နှစ်ပေါင်း ၆၀၀၀ ကြာပြီဖြစ်ပြီး သူတို့နှစ်ဦးကြား “ရန်ငြိုး” အစဉ်ရှိခဲ့သည်။ သို့သော်မြေကြီးပေါ်ရှိ ပြောင်းလဲနေသော မြင်ကွင်းများကြားတွင် ယေဟောဝါ၏တရားမျှတသော နည်းလမ်းများသည် မပြောင်းလဲခဲ့ချေ။ မိမိ၏ပရောဖက်မာလခိအားဖြင့် ကိုယ်တော်မိန့်ဆိုခဲ့သည်။ “ငါသည်ထာဝရဘုရားဖြစ်၏။ ပြောင်းလဲခြင်းမရှိ။” (မာလခိ ၃:၆) ယင်းက မစုံလင်သော၊ ပုန်ကန်သောလူသားများနှင့် ဆက်ဆံရာတွင် ဘုရား၏နည်းလမ်းတော်သည် အစဉ်တရားမျှတကြောင်း စိတ်ချစေသည်။ ကိုယ်တော်သည်တစ်ခါမျှ မိမိ၏ကြီးမြင့်သော၊ ဖြောင့်မတ်သော ကျင့်စဉ်များမှ သွေဖယ်မသွားဘဲ တစ်ချိန်တည်းတွင် မိမိ၏ကောင်းမြတ်လှသော အရည်အချင်းဖြစ်သည့် ဉာဏ်ပညာ၊ မေတ္တာ၊ တန်ခိုးတို့နှင့် ညီညွတ်စေသည်။

လူကိုကယ်ရန်ဘုရားရောက်လာ

၁၁၊ ၁၂။ ဆာလံ ၄၉ ကလူ၏အခြေအနေနှင့်ပတ်သက်၍ မည်သို့ဖေါ်ပြသနည်း။

^၁၁ ကြီးမားသော ရေသူရဲတစ်ကောင်၏ လက်ချောင်းများကဲ့သို့ စာတန်၏ဆိုးယုတ်သော လွှမ်းမိုးမှုသည် လူသားမျိုးနွယ်တစ်ခုလုံးကို လှမ်း၍ပိုက်ဖက်ထားသည်။ လူသားများကို သူတို့ ကျရောက်နေသော သေဒဏ်မှသာမကဘဲ မစုံလင်သော လူသားအုပ်ချုပ်ရေး၏ မတရားသောစနစ်များမှလည်း ကယ်နှုတ်ရန် အလွန်အမင်းလိုအပ်နေပေပြီတကား။

^၁၂ လူ့အပေါ်သေဒဏ်ချမှတ်ချိန်မှစ၍ လူသား၏ ထိတ်လန့်ဖွယ်အခြေအနေကို အောက်ဖေါ်ပြပါ ကောရသားများ၏ ဆာလံ၌ ကောင်းစွာဖေါ်ပြထားသည်။ “လူများအပေါင်းတို့ ကြားကြလော့။ ခပ်သိမ်းသော လောကသား၊ အယုတ်အမြတ်၊ ကြွယ်ဝသောသူ၊ ဆင်းရဲသောသူတို့၊ တညီတညွတ်တည်း နားထောင်ကြလော့။ မိမိညီအစ်ကိုကိုအဘယ်သူမျှ အလျှင်းမရွေးနိုင်။ ရွေးရန်အဖိုးကို ဘုရားသခင်၌ မပေးနိုင်။ (သူတို့အသက်ဝိညာဉ်၏ရွေးရန် အဖိုးကြီးလှပေ၏။ သို့ဖြစ်၍ အစဉ်ရှုံးလျက်နေရမည်။) ရွေးလျှင်အစဉ်အမြဲ အသက်ရှင်ရာ၏။ ပုပ်စပ်ခြင်းသို့မရောက်ရာ။ (ဆာလံ ၄၉:၁၊ ၂၊ ၇-၉) ဤအရာခပ်သိမ်းသည် ဘုရား၏ဖေါ်ပြပါ တရားမျှတခြင်းကြောင့် ဖြစ်ပေါ်လာခြင်းဖြစ်သည်။

၁၃၊ ၁၄။ (က) မည်သူသာလူကိုကယ်နိုင်ပြီး၊ ဘုရားရွေးချယ်သူသည်အဘယ်ကြောင့်သင့်လျော်သနည်း။ (ခ) ယေရှုသည် မည်သို့ဘုရားကတိတော်အားလုံး၏ “ဟုတ်မှန်” ရာဖြစ်လာသနည်း။

^၁၃ သို့ဖြစ်လျှင် အကူအညီ မည်သည့်နေရာမှ လာနိုင်မည်နည်း။ သေခြင်းဩဇာအောက်မှ လူကိုမည်သူကယ်နိုင်သနည်း။ ဆာလံက အဖြေပေးသည်။ “ငါ့ကိုမူကား ဘုရားသခင် သိမ်းယူသောကြောင့် ငါ၏ဝိညာဉ်ကို မရဏာနိုင်ငံ၏တန်ခိုးမှ ရွေးတော်မူ၏။” (ဆာလံ ၄၉:၁၅) ကိုယ်တော်၏ တရားမျှတခြင်းနှင့်အညီ လုပ်ဆောင်သော ဘုရား၏ကြီးမြတ်လှသော မေတ္တာသာလျှင် လူကို “ရှီးအိုးလ်၏လက်” မှ ကယ်နှုတ်နိုင်သည်။ ကျွန်ုပ်တို့၏မေးခွန်းများကို ညအချိန်တွင် ယေရှုနှင့်သတိရှိသူဖါရိရှဲ နိကောဒင် တို့နှစ်ဦးကြား ပြောဆိုသည့်စကားမှ ဆက်လက်အဖြေပေးသည်။ ယေရှုက သူ့အားဤသို့ပြောခဲ့သည်။ “ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက် ထာဝရအသက်ကို ရစေခြင်းငှာ ဘုရားသခင်သည် မိမိ၌တစ်ပါးတည်းသော သားတော်ကို စွန့်တော်မူသည်တိုင်အောင် လောကီသားတို့ကို ချစ်တော်မူ၏။” (ယောဟန် ၃:၁၆) ဘုရားသားမြေကြီးပေါ်မလာမီ ကိုယ်တော်သည် ခမည်းတော်နှင့်အတူ ကောင်းကင်တွင်နေခဲ့သည်။ ဤလူ့ဘဝမယူမီအချိန်တွင် “လူသားတို့ကိုနှစ်သက်၏” ဟုကိုယ်တော်ကိုဆိုထားသည်။ (သု၊ ၈:၃၁) သို့ဖြစ်လျှင် ယေဟောဝါသည် ဤအထူးနံဝိညာဉ်ပုဂ္ဂိုလ်—မိမိ၏တစ်ဦးတည်းသောသားယေရှုကို—လူသားများအားရွေးနှုတ်ရန် ရွေးချယ်လိုက်ခြင်းသည် မည်မျှသင့်မြတ်လှပါသည်တကား။

^၁၄ ယေရှုနှင့်စပ်လျဉ်း၍ ပေါလုကဆိုသည်။ “ထိုသခင်မှာ ဘုရားသခင်၏ဂတိတော်ရှိသမျှတို့သည် ငါတို့အားဖြင့် ဘုန်းအသရေတော်ကို ထင်းရှားခြင်းအလို့ငှာ ဟုတ်မှန်၏ဟူ၍လည်းကောင်း၊ အာမင်ဟူ၍လည်းကောင်းဖြစ်သတည်း။” (၂ ကောရိန္သု ၁:၂၀) ပရောဖက်ဟေရှာယ မှတ်တမ်းတင်ထားသော ဤပရောဖက်ပြုချက်များမှ တစ်ခုကို မဿဲ ၁၂:၁၈၊ ၂၁ တွင်ညွှန်းထားသည်။ ဤတွင်ယေရှုနှင့်စပ်လျဉ်း၍ ဖတ်ရသည်။ “ငါရွေးချယ်သော ငါ့ကျွန်ရင်း၊ ငါနှစ်သက်မြတ်နိုးသော သူကိုကြည့်ရှုလော့။ ထိုသူ၏အပေါ်၌ ငါ့ဝိညာဉ်ကို ငါတည်စေမည်။ သူသည် လူအမျိုးမျိုးတို့ကို တရားပေးလိမ့်မည်။ သူ၏နာမကိုလည်း လူအမျိုးမျိုးတို့သည် ကိုးစားကြလိမ့်မည်။”—ဟေရှာယ ၄၂:၁-၄ ကိုကြည့်ပါ။

၁၅၊ ၁၆။ ယေရှုသည် မည်သို့အာဒံမျိုးနွယ်၏ “ထာဝရအဘ” ဖြစ်လာသနည်း။

^၁၅ ယေရှုမြေကြီးပေါ် အမှုဆောင်စဉ်က လူသားအားလုံးသည် သူ၏နာမတွင်မျှော်လင့်ခြင်းဖြင့် ဘုရား၏တရားမျှတခြင်းအကျိုးကို ခံစားရမည့် အချိန်ရောက်မည့်အကြောင်း ရှင်းလင်းစွာ ကိုယ်တော်ပြောခဲ့သည်။ “သူတစ်ပါးအစေကို ခံခြင်းငှာလည်းကောင်း၊ မိမိအသက်ကိုစွန့်၍ လူများကိုရွေးခြင်းငှာလည်းကောင်း၊ ကြွလာသည်။” (မဿဲ ၂၀:၂၈) ဣသရေလလူမျိုးကို ပေးခဲ့သော ဘုရား၏စုံလင်သော ပညတ်ကဤသို့ဖေါ်ပြသည်။ ‘အသက်အတွက် အသက်ကိုပေးရမည်။’ (တရားဟောရာ ၁၉:၂၁) သို့နှင့် ယေရှုသည်သေခြင်း၌ မိမိ၏စုံလင်သောအသက်ကို ချမှတ်ကာ ကောင်းကင်သို့ပြန်တက်ရန် ဘုရားတန်ခိုးတော်ဖြင့် ထမြောက်ပြီးနောက် အာဒံ၏အသက်ပိုင်ဆိုင်ခွင့်နှင့် လဲလှယ်ရန် မိမိ၏စုံလင်သောအသက်တန်ဖိုးကို ယေဟောဝါထံဆက်သနိုင်သည့် အခြေအနေတွင်ရှိခဲ့သည်။ ဤသို့ဖြင့် ယေရှုသည် “နောက်ဆုံး [သို့မဟုတ် ဒုတိယ] အာဒံ” ဖြစ်လာပြီး ယခုအာဒံ၏ယုံကြည်သူ သားမြေးအားလုံးတို့အပေါ် “ထာဝရအဘ” အဖြင့် လုပ်ပိုင်ခွင့်ရရှိလေသည်။—၁ ကောရိန္သု ၁၅:၄၅။ ဟေရှာယ ၉:၆။

^၁၆ သို့ဖြင့် ကိုယ်တော်၏သားတော်ယေရှုခရစ် ရွေးနှုတ်ဖိုးပူဇော်သက္ကာဖြစ်သော မိမိ၏မေတ္တာပါသော ပြင်ဆင်ပေးချက်ဖြင့် ဘုရား၏ကယ်တင်ခြင်း နည်းလမ်းတော်ကို ‘တစ်ကျွန်းတစ်နိုင်ငံသားတို့အား တရားကိုပြသ’ နိုင်ခဲ့လေသည်။ ယင်းသည်အမှန်ပင် တရားတော်နှင့်အညီဖြစ်သည်။ ဘုရားသည် ‘ငါတို့၏ဝိညာဉ် (စိုးလ်) ကိုမရဏာနိုင်ငံ (ရှီးအိုးလ်) မှရွေးနှုတ်’ ရန်လမ်းဖွင့်ပေးသည့်အတွက် ကျွန်ုပ်တို့မည်မျှပင် ကျေးဇူးတင်ထိုက်လှပါတကား။

ရွေးနှုတ်ဖိုးကိုဆွဲကိုင်ခြင်း

၁၇၊ ၁၈။ ၁၈၇၀ ပြည့်နှစ်များတွင် စီတီရပ်စယ်လ်သည်မည်သည့်တွဲဖက်လုပ်ဆောင်မှု၌ ပါဝင်ခဲ့ပြီး၊ ၁၈၇၈ တွင် ဘာဘာ ကသူ့အားမည်သို့ အံအားသင့် စေသနည်း။

^၁၇ ပထမရာစု ခရစ်ယာန်များကဲ့သို့ မျက်မှောက်ခေတ် ယေဟောဝါသက်သေများသည် ယေရှုခရစ်၏ ရွေးနှုတ်ဖိုးပူဇော်သက္ကာ သွန်သင်ချက်ကို အစဉ်စွဲကိုင်ထားကြသည်။ စိတ်ဝင်စားဖွယ်ကား၊ ကင်းမျှော်စင်အသင်း၏ ပထမဥက္ကဌ ချားလ်တီရပ်စယ်လ် သည်တစ်ခါက ဘာသာရေးစာစောင် The Herald of the Morning ၏တွဲဘက်အယ်ဒီတာနှင့် ငွေကြေးထောက်မသူဖြစ်ခဲ့သည်။ ယင်းမဂ္ဂဇင်းကို မူလက ယူအက်စ်အေ၊ နယူးယောက်၊ ရိုချက်စတာ မှ Adventist အင်အိပ်ချ်၊ ဘာဘာ ကထုတ်ဝေခဲ့သည်။ ရပ်စယ်လ် သည်အသက် ၂၀ ပြည့်လွန်နှစ်များတွင်ဖြစ်ပြီး ဘာဘာ သည်ပို၍အသက်ကြီးလေသည်။

^၁၈ ဘာဘာသည် ရွေးနှုတ်ဖိုးအယူကို ငြင်းပယ်ထားသောအကြောင်းကို အံ့သြဖွယ်ထုတ်ဝေသည့် ၁၈၇၈ မတိုင်မီအထိ ပူးပေါင်းဆောင်ရွက်မှု ကောင်းခဲ့ပုံရသည်။ ဖြစ်ပျက်ပုံကို ရပ်စယ်လ် ကရှင်းပြသည်။ “မစ္စတာဘာဘာဟာ The Herald စာစောင်အတွက်အပြစ်ဖြေရာ ယုံကြည်ချက်ကို ငြင်းပယ်ထားတဲ့အကြောင်း တစ်ခုကိုရေးသားတယ်။ ခရစ်တော်ရဲ့သေခြင်းဟာ အာဒံနဲ့သူ့ရဲ့မျိုးနွယ်အတွက် ရွေးနှုတ်ဖိုးဖြစ်တယ်ဆိုတာကို ငြင်းပယ်ထားတယ်။ လူသားမိဘတစ်ဦးအနေနဲ့ ကိုယ့်သားရဲ့လွဲမှားပြုမူမှုအတွက် ယင်တစ်ကောင်ရဲ့ကိုယ်မှာ အပ်တစ်ချောင်းထိုးစိုက်ပြီး ဝေဒနာခံသေစေတာကို မျှတတဲ့ဖြေရှင်းချက်လို့ မယူဆသလိုကျွန်ုပ်တို့သခင်ရဲ့သေခြင်းဟာ လူ့အပြစ်ဒဏ်အတွက် ပေးဆပ်ရာ မဖြစ်နိုင်ဘူးလို့ဆိုတယ်။”

၁၉။ (က) ရပ်စယ်လ်သည် ဘာဘာ၏ရွေးနှုတ်ဖိုးအမြင်ကို မည်သို့တုန့်ပြန်ခဲ့သနည်း။ (ခ) ရပ်စယ်လ်၏ ကင်းမျှော်စင် နှင့်ပတ်သက်သောဆန္ဒ ဖြစ်မြောက်ခဲ့ပါသလော။

^၁၉ ရပ်စယ်လ်သည် ပို၍အသက်ကြီးသူတွဲဘက်ကြောင့် လမ်းလွဲသွားနိုင်သော်လည်း သူမဖြစ်ခဲ့ချေ။ လပေါင်းများစွာပင် စာစောင်ထဲတွင် ဘာဘာ၏ ရွေးနှုတ်ဖိုးကို ငြင်းပယ်ခြင်းနှင့် ရပ်စယ်လ်၏ထောက်ခံမှု အချေတင်ရေးသားချက်များ ဆက်သွားသည်။ နောက်ဆုံးတွင် ရပ်စယ်လ်သည် ဘာဘာနှင့်ဆက်သွယ်နေမှုအားလုံးမှ နှုတ်ထွက်လိုက်ပြီး ထိုစဉ်က ဇိအုန်ကင်းမျှော်စင်နှင့်ခရစ်တော်ရောက်ရှိခြင်းကိုကြေညာခြင်း ဟုခေါ်သည့် ဤမဂ္ဂဇင်းကို စထုတ်ဝေခဲ့သည်။ စီတီရပ်စယ်လ်သည် မဂ္ဂဇင်းသစ်နှင့်စပ်လျဉ်း၍ ခံစားချက်ကို ဤသို့ထုတ်ဖေါ်ခဲ့သည်။ “အစကတည်းမှ ဤမဂ္ဂဇင်းသည် ရွေးနှုတ်ဖိုး၏ အထူးထောက်ခံရာဖြစ်သည်။ ဘုရား၏ကျေးဇူးတော်ဖြင့် အဆုံးအထိ ထိုသို့ဖြစ်သွားရန် ကျွန်ုပ်တို့မျှော်လင့်သည်။” အယ်ဒီတာရပ်စယ်လ်၏ မျှော်လင့်ချက်အတိုင်း ဖြစ်မြောက်ခဲ့ပါသလော။ အမှန်ပင်ဖြစ်ခဲ့သည်။ ရှင်းပြချက်၌ ဤမဂ္ဂဇင်းကိုယ်၌၏ စာမျက်နှာ ၂ တွင်“လူသားတို့ ထာဝရအသက်ရရန် မိမိ၏အသွေးသွန်းလောင်းခြင်းဖြင့် လမ်းဖွင့်ပေးသော စိုးစံလျက်ရှိသည့် ယေရှုခရစ်၌ ယုံကြည်ရန်အားပေးသည်။”

၂၀။ ဖြေဆိုရန်ကျန်နေသေးသော မေးခွန်းများကား အဘယ်နည်း။

^၂၀ ကျွန်ုပ်တို့ဆွေးနွေးခဲ့သလောက်တွင် လူသားမျိုးနွယ်အား အပြစ်နှင့်သေခြင်းမှ ကယ်လွှတ်ရန် ဘုရား၏တရားမျှတခြင်း လိုအပ်ပုံအကြောင်းဖြစ်သည်။ ယင်းကိုမေတ္တာကပြင်ဆင်ပေးခဲ့သည်။ သို့သော် ဤသို့မေးခွန်းများဖြေဆိုရန် ကျန်ပါသေးသည်။ ယေရှုခရစ်၏ရွေးနှုတ်ဖိုး ပူဇော်သက္ကာအကျိုးကျေးဇူးကို မည်သို့ရရှိနိုင်သနည်း။ ယင်းမှသင်မည်သို့ အကျိုးရယူနိုင်၍ မည်မျှစောစောရမည်နည်း။ ဘုရားနည်းလမ်းတော်ခပ်သိမ်းတွင် တရားမျှတခြင်းရှိကြောင်း သင်၏စိတ်ချမှု တိုးပွားစေရန် နောက်ဆက်တွဲအခန်းက အဖြေပေးပါလိမ့်မည်။

သင်မည်သို့ဖြေဆိုမည်နည်း

▫ ဘုရားသည်တရားမျှတခြင်းကို မည်မျှအရေးတကြီးထားသနည်း။

▫ လူသားဘောင်တွင် အဘယ်ကြောင့် ဤမျှလောက်မတရားမှုရှိရသနည်း။

▫ ဘုရားသည်လူသားတို့ သေခြင်းမှလွတ်မြောက်ရန်မည်သို့ပြင်ဆင်ပေးသနည်း။

▫ ကင်းမျှော်စင်သည် ရွေးနှုတ်ဖိုးကို မည်မျှအထိစွဲကိုင်ထောက်ခံခဲ့သနည်း။

[စာမျက်နှာ ၁၉ ပါ ရုပ်ပုံ]

မောရှေသည်သူ၏သီချင်းစကားကိုမောဘလွင်ပြင်တွင်မြွက်ဆိုသည်။

[စာမျက်နှာ ၂၂ ပါ ရုပ်ပုံ]

ဘုရားသည်မိမိ၏တစ်ပါးတည်းသောသားကိုပေးသည့်တိုင်အောင်လောကကိုချစ်တော်မူ၏။