ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင်မှာပါတဲ့ အညွှန်းများ
မေ ၁-၇
ကျမ်းစာထဲက အဖိုးတန်ဘဏ္ဍာများ | ယေရမိ ၃၂-၃၄
“အစ္စရေးတွေ ပြည်တော်ပြန်ရမယ်ဆိုတဲ့ နိမိတ်တစ်ခု”
(ယေရမိ ၃၂:၆-၉) ယေရမိ ပြောတယ်– “ယေဟောဝါဘုရားက၊ ၇ ‘မင်းရဲ့ဘထွေး ရှလုံရဲ့သား ဟာနမေလ ရောက်လာပြီး “မင်းဟာ ပြန်ဝယ်ယူခွင့်ရှိသူဆိုတော့ အာနသုတ်မြို့မှာရှိတဲ့ ငါ့ရဲ့လယ်ကို ဝယ်လိုက်ပါ” လို့ပြောလိမ့်မယ်’ ဆိုပြီး ကျွန်တော့်ကို ပြောတယ်။” ၈ ယေဟောဝါ ပြောတဲ့အတိုင်း ဘထွေးရဲ့သား ဟာနမေလက ကျွန်တော်ရှိတဲ့ အစောင့်ရင်ပြင်ကို ရောက်လာပြီး “ဗင်ယာမိန်နယ်မြေ၊ အာနသုတ်မြို့မှာရှိတဲ့ ငါ့ရဲ့လယ်ကို ဝယ်လိုက်ပါလား။ မင်းဟာ ပိုင်ဆိုင်ခွင့်ရှိသူ၊ ပြန်ဝယ်ယူခွင့်ရှိသူဆိုတော့ မင်းပဲ ဝယ်လိုက်ပါ” လို့ပြောတယ်။ ယေဟောဝါ ပြောတဲ့အတိုင်း ဖြစ်လာမှန်း ကျွန်တော် သိလိုက်တယ်။ ၉ ဒါကြောင့် ကျွန်တော်က အာနသုတ်မြို့မှာရှိတဲ့ လယ်ကို ဘထွေးရဲ့သား ဟာနမေလဆီကနေ ဝယ်ပြီး ခုနစ်ရှယ်ကယ်နဲ့ ငွေစဆယ်စ ချိန်ပေးလိုက်တယ်။
(ယေရမိ ၃၂:၁၅) ဘာလို့လဲဆိုတော့ ဒီပြည်မှာ အိမ်တွေ၊ လယ်တွေ၊ စပျစ်ခြံတွေကို ရောင်းဝယ်ကြဦးမှာ’ ဆိုပြီး အစ္စရေးတို့ရဲ့ဘုရား၊ ဗိုလ်ခြေတို့ရဲ့အရှင် ယေဟောဝါ ပြောတယ်။”
it-1-E ၁၀၅ အပိုဒ် ၂
အာနသုတ်မြို့
ယေရမိဟာ အာနသုတ်မြို့သားဖြစ်ပေမဲ့ မြို့သားတွေအလယ်မှာ ‘မျက်နှာသာမရတဲ့ ပရောဖက်’ ဖြစ်ပြီး ယေဟောဝါရဲ့ အမှန်တရားသတင်း ဟောတဲ့အတွက် မြို့သားတွေက သူ့ကိုသတ်ချင်ကြတယ်။ (ယေ. ၁:၁။ ၁၁:၂၁-၂၃။ ၂၉:၂၇) ဒါကြောင့် ယေဟောဝါက အဲဒီမြို့နဲ့ပတ်သက်တဲ့ ဘေးဆိုးအကြောင်း ကြိုဟောခဲ့ပြီး ဗာဗုလုန်တွေ ပြည်တော်ကို တိုက်ခိုက်ချိန်မှာ ပြည့်စုံခဲ့တယ်။ (ယေ. ၁၁:၂၁-၂၃) ဂျေရုဆလင်မြို့ မပျက်စီးခင် ယေရမိဟာ သူဝယ်ခွင့်ရှိတဲ့ အာနသုတ်မြို့က လယ်ကွက်ကို သူ့ဝမ်းကွဲဆီက စာချုပ်နဲ့ ဝယ်ယူခဲ့တာက ပြည်နှင်ခံရမှာဖြစ်ပေမဲ့ ပြည်တော်ပြန်လာရမယ်ဆိုတဲ့ နိမိတ်ဖြစ်တယ်။ (ယေ. ၃၂:၇-၉) ဇေရုဗဗေလနဲ့အတူ ပြည်တော်ပြန်လာတဲ့ ပထမအုပ်စုထဲမှာ အာနသုတ်မြို့သား ၁၂၈ ယောက်ပါပြီး ပြန်တည်ဆောက်တဲ့ မြို့တွေထဲမှာ အာနသုတ်မြို့လည်းပါတဲ့အတွက် ယေရမိရဲ့ ပရောဖက်ပြုချက် ပြည့်စုံခဲ့တယ်။—ဧဇ. ၂:၂၃။ နေ. ၇:၂၇။ ၁၁:၃၂။
(ယေရမိ ၃၂:၁၀-၁၂) သက်သေတွေရှေ့မှာ စာချုပ်ချုပ်၊ တံဆိပ်ခတ်ပြီး ပိတ်လိုက်တယ်။ ငွေကိုလည်း ချိန်ခွင်နဲ့ ချိန်ပေးတယ်။ ၁၁ အဲဒီနောက် ပညတ်ချက်အတိုင်း၊ တရားဥပဒေ တောင်းဆိုချက်အတိုင်း တံဆိပ်ခတ်ထားတဲ့ အရောင်းအဝယ်စာချုပ်နဲ့ တံဆိပ်ခတ်ထားတဲ့ စာချုပ်ကို ကျွန်တော် ယူတယ်။ ပြီးတော့ ဘထွေးရဲ့သား ဟာနမေလရှေ့၊ စာချုပ်မှာ လက်မှတ်ထိုးတဲ့ သက်သေတွေရှေ့၊ အစောင့်ရင်ပြင်မှာ ထိုင်နေတဲ့ ဂျူးတွေရှေ့မှာ အဲဒီစာချုပ်ကို မာရှိယရဲ့မြေး၊ နေရိယရဲ့သား ဗာရုတ်ကို ပေးလိုက်တယ်။
ယေရမိကျမ်းမှ ပေါ်လွင်ချက်များ
၃၂:၁၀-၁၅—လုပ်ငန်းကိစ္စတစ်ခုအတွက် စာချုပ်နှစ်စုံထားခြင်းက အဘယ်ကြောင့်နည်း။ ဖွင့်ထားသောစာချုပ်သည် လုပ်ငန်းကိစ္စ ဆွေးနွေးရာတွင် ဖတ်ရှုနိုင်ရန်ဖြစ်သည်။ ချိပ်ပိတ်စာချုပ်မူ ဖွင့်ထားသောစာချုပ်မှန်ကန်ကြောင်း သက်သေအဖြစ် သိမ်းဆည်းထားရန်ဖြစ်၏။ ဆွေမျိုးလည်းဖြစ်၊ ယုံကြည်သူချင်းလည်းဖြစ်သူနှင့် လုပ်ငန်းကိစ္စဆောင်ရွက်ရာတွင် ယေရမိသည် တရားရေးလုပ်ထုံးများအတိုင်း လိုက်နာခြင်းဖြင့် ကျွန်ုပ်တို့အတွက် ပုံသက်သေချမှတ်ခဲ့၏။
(ယေရမိ ၃၃:၇၊ ၈) ယုဒသုံ့ပန်းတွေ၊ အစ္စရေးသုံ့ပန်းတွေကို ပြန်ခေါ်လာမယ်။ သူတို့ကို နဂိုလို ပြန်ဖြစ်စေမယ်။ ၈ သူတို့လုပ်ခဲ့တဲ့ အပြစ်တွေကို သန့်စင်ပေးမယ်။ ငါ့အပေါ် ကျူးလွန်ခဲ့တဲ့ အမှားတွေ၊ အပြစ်တွေကို ခွင့်လွှတ်မယ်။
“ငါ့ကိုသိကျွမ်းတဲ့အတွက် သူဒီလိုလုပ်တာမဟုတ်လား”
၂၂ လူတစ်ယောက်ရဲ့ မဆင်မခြင်ပြောလိုက်တဲ့စကားနဲ့ လုပ်ရပ်ကြောင့် ဒေါသဖြစ်မိတဲ့အခါ ယေဟောဝါကို သင်အတုယူမလား။ ရှေးခေတ်ဂျူးတွေနဲ့ပတ်သက်ပြီး ဘုရားသခင်က သူခွင့်လွှတ်လိုက်တဲ့သူတွေရဲ့အပြစ်ကို “ဖြေရှင်း” ပေးမယ်၊ တစ်နည်းအားဖြင့် သန့်စင်ပေးမယ်လို့ပြောတယ်။ (ယေရမိ ၃၃:၈ ကိုဖတ်ပါ။) ကိုယ်တော်က နောင်တရသူတွေရဲ့အမှားတွေကို မေ့ပစ်လိုက်ပြီး အမှုတော်မှာ အသစ်ကနေပြန်ထမ်းဆောင်ခွင့်ပေးခြင်းအားဖြင့် အဲဒီလိုသန့်စင်ပေးတယ်။ ဘုရားသခင့်ခွင့်လွှတ်မှုခံရတယ်ဆိုတာ အမွေရထားတဲ့အပြစ်တွေသန့်စင်ခံရပြီး ခြောက်ပြစ်ကင်းသွားပြီဆိုတဲ့အဓိပ္ပာယ်တော့မဟုတ်ဘူး။ ဒါပေမဲ့ လူတွေရဲ့အပြစ်ကိုသန့်စင်ပေးမယ်ဆိုတဲ့ ဘုရားသခင့်စကားကနေ ကျွန်တော်တို့ သင်ခန်းစာယူနိုင်တယ်။ ကျွန်တော်တို့က ကိုယ့်အပေါ် တခြားသူတွေလုပ်တဲ့အမှားကို မေ့ပစ်ဖို့ကြိုးစားနိုင်တယ်။ အဲဒီလိုလုပ်တာက အဲဒီလူနဲ့ပတ်သက်တဲ့ ကျွန်တော်တို့ရဲ့အမြင်ကို သန့်စင်ပစ်လိုက်တာနဲ့တူတယ်။ ဘယ်လိုနည်းနဲ့တူသလဲ။
၂၃ သင်က စက်ဘီးတစ်စီး လက်ဆောင်ရတယ်ဆိုပါစို့။ အဲဒီစက်ဘီး သံချေးတက်လာတဲ့အတွက် သင် ချက်ချင်းလွှင့်ပစ်လိုက်မလား။ လွှင့်ပစ်မှာမဟုတ်ဘူး။ သံချေးတွေကိုတိုက်ချွတ်ပြီး ဆေးတောင် ပြန်မှုတ်ရင်မှုတ်ပါလိမ့်မယ်။ အဲဒီစက်ဘီးကို မပျက်စီးသွားအောင်၊ ရေရှည်သုံးနိုင်အောင် သင်ဂရုစိုက်မှာဖြစ်တယ်။ အဲဒီလိုပဲ၊ သင့်ကိုစိတ်အနှောင့်အယှက်ဖြစ်စေတဲ့ ညီအစ်ကို ဒါမှမဟုတ် ညီအစ်မအပေါ် သင့်ရဲ့နာကြည်းစိတ်နဲ့ဒေါသကို ဖယ်ရှားပစ်ဖို့ ကြိုးစားနိုင်တယ်။ နာကျင်စေတဲ့စကားတွေ၊ လုပ်ရပ်တွေကို တနုံ့နုံ့တွေးမနေပါနဲ့။ အဲဒါတွေကို သင်မေ့ပစ်နိုင်တာနဲ့အမျှ သင်ခွင့်လွှတ်လိုက်တဲ့သူရဲ့ပုံရိပ်၊ သူနဲ့ပတ်သက်တဲ့အမှတ်ရစရာတွေကို သန့်စင်နိုင်ပါလိမ့်မယ်။ သူ့အပေါ်မကောင်းမြင်စိတ်တွေ သန့်စင်သွားတဲ့အခါ သူနဲ့သင့်ကြားက ဆုံးရှုံးသွားပုံရတဲ့ရင်းနှီးမှုတွေ ပြန်ရလာပါလိမ့်မယ်။
ရှာဖွေလေ့လာ ဘုရားရေးရာရတနာ
(ယေရမိ ၃၃:၁၅) အဲဒီနေ့ရောက်ရင်၊ အဲဒီအချိန်ရောက်ရင် ငါက ဒါဝိဒ်အတွက် ဖြောင့်မတ်တဲ့ အတက် ပေါက်စေမယ်။ သူက ပြည်မှာ တရားမျှတစွာ၊ ဖြောင့်မတ်စွာ စီရင်လိမ့်မယ်။
ပဋိညာဉ်တရားသစ်ကနေ သင် အကျိုးကျေးဇူးရရှိနိုင်
၁၀ ယေရမိက ရောက်လာမယ့်မေရှိယကို ဒါဝိဒ်ရဲ့ “အညွန့်” လို့ခေါ်ခဲ့တယ်။ (ယေ. ၃၃:၁၅) အဲဒီလိုခေါ်တာက သင့်တော်ပါတယ်။ ပရောဖက်အနေနဲ့ ယေရမိအမှုထမ်းဆောင်နေချိန်မှာပဲ ဒါဝိဒ်ရဲ့မင်းဆက် ပြတ်တောက်သွားတယ်။ တစ်နည်းအားဖြင့် အပင်ခုတ်လှဲခံရသလို ဖြစ်သွားတယ်။ ဒါပေမဲ့ အငုတ်လေးတော့ ကျန်ခဲ့တယ်။ အချိန်တန်တဲ့အခါ ယေရှုက ဘုရင်ဒါဝိဒ်ရဲ့မျိုးရိုးကနေ မွေးဖွားလာတယ်။ ယေရှုကို “ယေဟောဝါ ဇေဒကနု [“ယေဟောဝါက ငါတို့ရဲ့ဖြောင့်မတ်ခြင်း၊” ကဘ]” လို့ခေါ်ဆိုနိုင်တယ်။ အဲဒါက ဘုရားသခင်ဟာ အဲဒီအရည်အသွေးကို သိပ်အလေးအနက်ထားတယ်ဆိုတာ ဖော်ပြတယ်။ (ယေရမိ ၂၃:၅၊ ၆ ကိုဖတ်ပါ။) ယေဟောဝါက သူ့ရဲ့တစ်ဦးတည်းသောသားကို မြေကြီးပေါ်မှာ ဆင်းရဲဒုက္ခခံပြီး အသေခံဖို့ ခွင့်ပြုခဲ့တယ်။ ဒီနည်းနဲ့ ယေဟောဝါက သူ့ရဲ့တရားမျှတမှုစံနှုန်းနဲ့အညီ ဒါဝိဒ်ရဲ့ “အညွန့်” ပေးဆက်ခဲ့တဲ့ ရွေးဖိုးပူဇော်သကာရဲ့ တန်ဖိုးကိုအခြေခံပြီး အပြစ်တွေကို ခွင့်လွှတ်နိုင်တယ်။ ဒါက လူတချို့ကို “ဖြောင့်မတ်” တယ်လို့ကြေညာဖို့၊ ပဋိညာဉ်တရားသစ်ရဲ့အဖွဲ့ဝင်တွေအဖြစ် သန့်ရှင်းသောစွမ်းအားတော်နဲ့ ဘိသိက်ပေးဖို့ လမ်းဖွင့်ပေးခဲ့တယ်။ ပဋိညာဉ်တရားသစ်မှာ တိုက်ရိုက်မပါဝင်တဲ့ သူတွေလည်း အဲဒီကနေ အကျိုးခံစားနိုင်ပြီး အကျိုးခံစားနေကြတယ်။ အဲဒီအချက်က ဖြောင့်မတ်မှုကို ဘုရားသခင် အလေးအနက် ထားတယ်ဆိုတဲ့ နောက်အထောက်အထား တစ်ခုဖြစ်တယ်။ အဲဒီအကြောင်းကို ဆက်သုံးသပ်သွားပါမယ်။—ရော. ၅:၁၈။
(ယေရမိ ၃၃:၂၃၊ ၂၄) ယေဟောဝါက ယေရမိကို ပြောတယ်– ၂၄ “‘ယေဟောဝါက ရွေးချယ်ထားတဲ့ အမျိုးနှစ်မျိုးကို ငြင်းပယ်လိမ့်မယ်’ လို့ သူတို့ပြောနေတာကို မင်းသတိမထားမိဘူးလား။ သူတို့က ငါ့လူတွေကို မလေးမစား ဆက်ဆံနေတဲ့အပြင် လူမျိုးတစ်မျိုးလို့တောင် မသတ်မှတ်ကြဘူး။
ယေရမိကျမ်းမှ ပေါ်လွင်ချက်များ
၃၃:၂၃၊ ၂၄—ဤတွင်ဖော်ပြထားသော “လူမျိုးနှစ်မျိုး” ကား အဘယ်နည်း။ တစ်မျိုးမှာ ဘုရင်ဒါဝိဒ်မင်းဆက်၏ တော်ဝင်မိသားစုဖြစ်ပြီး နောက်တစ်မျိုးမှာ အာရုန်မှဆင်းသက်သော ယဇ်ပုရောဟိတ်မိသားစုဖြစ်သည်။ ယေရုရှလင်မြို့နှင့် ဝတ်ပြုရာအိမ်တော်ကို ဖျက်ဆီးခြင်းဖြင့် ထိုလူမျိုးနှစ်မျိုးကို ယေဟောဝါ ငြင်းပယ်လိုက်သည်။ ကမ္ဘာပေါ်တွင် ယေဟောဝါကိုကိုယ်စားပြုသောနိုင်ငံ မရှိတော့ပေ၊ ထိုသို့သောဝတ်ပြုရေးကိုလည်း မတည်ထောင်တော့ပါ။
ကျမ်းစာဖတ်ရှုခြင်း
(ယေရမိ ၃၂:၁–၁၂) နေဗုခဒ်နေဇာနန်းစံ ၁၈ နှစ်၊ ယုဒဘုရင် ဇေဒကိနန်းစံ ၁၀ နှစ်မှာ ယေရမိဆီ ယေဟောဝါရဲ့ စကားတော် ရောက်လာတယ်။ ၂ အဲဒီအချိန်မှာ ဂျေရုဆလင်ကို ဗာဗုလုန်တပ်တွေ ဝိုင်းထားတယ်။ ပရောဖက်ယေရမိကတော့ ယုဒဘုရင်ရဲ့ နန်းတော်ထဲက အစောင့်ရင်ပြင်မှာ အချုပ်ကျနေရတယ်။ ၃ ယုဒဘုရင်ဇေဒကိက ယေရမိကို “‘ယေဟောဝါ ပြောတယ်– “ဒီမြို့ကို ဗာဗုလုန်ဘုရင်လက်ထဲ ငါအပ်မယ်။ မြို့ကို သူသိမ်းပိုက်လိမ့်မယ်။ ၄ ယုဒဘုရင်ဇေဒကိက ခါလဒဲလူတွေလက်ကနေ လွတ်မှာ မဟုတ်ဘူး။ ဗာဗုလုန်ဘုရင်လက်ထဲ ကျိန်းသေ ရောက်သွားလိမ့်မယ်။ သူနဲ့ မျက်နှာချင်းဆိုင် တွေ့ဆုံပြီး စကားပြောရလိမ့်မယ်” ဆိုပြီး မင်း ဘာလို့ ပရောဖက်ပြုရတာလဲ။’ ၅ ‘သူက ဇေဒကိကို ဗာဗုလုန်ကို ခေါ်သွားလိမ့်မယ်။ ဇေဒကိဟာ ငါဒဏ်ပေးမယ့်အချိန်အထိ အဲဒီမှာ ဆက်နေရလိမ့်မယ်။ ခါလဒဲလူတွေကို တိုက်ရင်လည်း မင်းတို့ အောင်မြင်မှာ မဟုတ်ဘူး။ ဒါဟာ ယေဟောဝါပြောတဲ့ စကားပဲ’ ဆိုပြီး မင်း ဘာလို့ ပရောဖက်ပြုရတာလဲ” လို့ပြောပြီး ယေရမိကို ချုပ်ထားလိုက်တာ။ ၆ ယေရမိ ပြောတယ်– “ယေဟောဝါဘုရားက၊ ၇ ‘မင်းရဲ့ဘထွေး ရှလုံရဲ့သား ဟာနမေလ ရောက်လာပြီး “မင်းဟာ ပြန်ဝယ်ယူခွင့်ရှိသူဆိုတော့ အာနသုတ်မြို့မှာရှိတဲ့ ငါ့ရဲ့လယ်ကို ဝယ်လိုက်ပါ” လို့ပြောလိမ့်မယ်’ ဆိုပြီး ကျွန်တော့်ကို ပြောတယ်။” ၈ ယေဟောဝါ ပြောတဲ့အတိုင်း ဘထွေးရဲ့သား ဟာနမေလက ကျွန်တော်ရှိတဲ့ အစောင့်ရင်ပြင်ကို ရောက်လာပြီး “ဗင်ယာမိန်နယ်မြေ၊ အာနသုတ်မြို့မှာရှိတဲ့ ငါ့ရဲ့လယ်ကို ဝယ်လိုက်ပါလား။ မင်းဟာ ပိုင်ဆိုင်ခွင့်ရှိသူ၊ ပြန်ဝယ်ယူခွင့်ရှိသူဆိုတော့ မင်းပဲ ဝယ်လိုက်ပါ” လို့ပြောတယ်။ ယေဟောဝါ ပြောတဲ့အတိုင်း ဖြစ်လာမှန်း ကျွန်တော် သိလိုက်တယ်။ ၉ ဒါကြောင့် ကျွန်တော်က အာနသုတ်မြို့မှာရှိတဲ့ လယ်ကို ဘထွေးရဲ့သား ဟာနမေလဆီကနေ ဝယ်ပြီး ခုနစ်ရှယ်ကယ်နဲ့ ငွေစဆယ်စ ချိန်ပေးလိုက်တယ်။ ၁၀ သက်သေတွေရှေ့မှာ စာချုပ်ချုပ်၊ တံဆိပ်ခတ်ပြီး ပိတ်လိုက်တယ်။ ငွေကိုလည်း ချိန်ခွင်နဲ့ ချိန်ပေးတယ်။ ၁၁ အဲဒီနောက် ပညတ်ချက်အတိုင်း၊ တရားဥပဒေ တောင်းဆိုချက်အတိုင်း တံဆိပ်ခတ်ထားတဲ့ အရောင်းအဝယ်စာချုပ်နဲ့ တံဆိပ်ခတ်ထားတဲ့ စာချုပ်ကို ကျွန်တော် ယူတယ်။ ၁၂ ပြီးတော့ ဘထွေးရဲ့သား ဟာနမေလရှေ့၊ စာချုပ်မှာ လက်မှတ်ထိုးတဲ့ သက်သေတွေရှေ့၊ အစောင့်ရင်ပြင်မှာ ထိုင်နေတဲ့ ဂျူးတွေရှေ့မှာ အဲဒီစာချုပ်ကို မာရှိယရဲ့မြေး၊ နေရိယရဲ့သား ဗာရုတ်ကို ပေးလိုက်တယ်။
မေ ၈-၁၄
ကျမ်းစာထဲက အဖိုးတန်ဘဏ္ဍာများ | ယေရမိ ၃၅-၃၈
“ဧဗဒမေလက်—သတ္တိရှိပြီး သနားကြင်နာမှုရှိသူ”
(ယေရမိ ၃၈:၄-၆) အဲဒီအခါ မင်းညီမင်းသားတွေက ဘုရင်ကို “အရှင်မင်းကြီး၊ ဒီလူကို ကွပ်မျက်လိုက်ပါ။ သူက ဒီမြို့မှာ ကျန်ကြွင်းတဲ့ စစ်သည်တွေ၊ လူတွေကို စိတ်ဓာတ်ကျအောင် ပြောနေတယ်။ လူတွေ ငြိမ်းငြိမ်းချမ်းချမ်း နေရမှာကို မလိုလားဘဲ ဘေးဆိုးကြုံရမှာကိုပဲ လိုလားနေတယ်” ဆိုပြီး လျှောက်တင်တယ်။ ၅ ဘုရင်ဇေဒကိက “သူဟာ မင်းတို့ လက်ထဲမှာ ရှိတာပဲ။ မင်းတို့အလိုကို ဆန့်ကျင်ပြီး ငါဘာလုပ်နိုင်လို့လဲ” လို့ပြန်ပြောတယ်။ ၆ ဒီတော့ သူတို့က ယေရမိကို ခေါ်သွားပြီး အစောင့်ရင်ပြင်မှာရှိတဲ့ သားတော် မာလခိယရဲ့ ရေလှောင်ကန်ထဲ ကြိုးနဲ့ လျှောချလိုက်တယ်။ အဲဒီရေလှောင်ကန်ထဲမှာ ရေမရှိဘဲ ရွှံ့နွံတွေပဲ ရှိတယ်။ ဒါကြောင့် ယေရမိက ရွှံ့နွံထဲမှာ နစ်နေတော့တယ်။
it-2-E ၁၂၂၈ အပိုဒ် ၃
ဇေဒကိ
ဇေဒကိကို စိတ်ပျော့ညံ့တဲ့ ဘုရင်အဖြစ် ဖော်ပြထားတယ်၊ အကြောင်းကတော့ မင်းညီမင်းသားတွေက ယေရမိကို သတ်ဖို့ တောင်းဆိုတဲ့အခါ ဇေဒကိက “သူဟာ မင်းတို့ လက်ထဲမှာ ရှိတာပဲ။ မင်းတို့အလိုကို ဆန့်ကျင်ပြီး ငါဘာလုပ်နိုင်လို့လဲ” လို့ပြန်ပြောတယ်။ ဒါပေမဲ့ နောက်ပိုင်း ဧဗဒမေလက်က ယေရမိကို ကယ်ဖို့ လျှောက်တင်တဲ့အခါမှာလည်း လူ ၃၀ ခေါ်သွားပြီး သွားကယ်ဖို့ ဧဗဒမေလက်ကို ညွှန်ကြားပြန်တယ်။ နောက်ပိုင်းမှာ ဇေဒကိဟာ ယေရမိနဲ့ သီးသန့်တွေ့ဆုံခဲ့တယ်။ ပရောဖက်ကို သတ်မယ်လို့လည်းမပြော၊ သတ်ချင်တဲ့သူတွေ လက်ကနေ ကယ်မယ်လို့လည်း ကတိမပေးခဲ့ဘူး။ ဇေဒကိဟာ ခါလဒဲလူတွေဆီ သွားခိုလှုံတဲ့ ဂျူးတွေကို ကြောက်တဲ့အတွက် ဗာဗုလုန်ဆီမှာ အညံ့ခံပါလို့ပြောတဲ့ ဘုရားဆီကလာတဲ့ ယေရမိရဲ့ စကားကို နားမထောင်ခဲ့ဘူး။ သူတို့ သီးသန့်ဆွေးနွေးတဲ့ အကြောင်းတွေကို သံသယကြီးတဲ့ မင်းညီမင်းသားတွေကို မပြောပြဖို့ ယေရမိကို တောင်းဆိုခြင်းအားဖြင့် သူ့ရဲ့ကြောက်စိတ်ကို ဖော်ပြခဲ့တယ်။—ယေ. ၃၈:၁-၂၈။
(ယေရမိ ၃၈:၇-၁၀) ယေရမိကို ရေလှောင်ကန်ထဲ ပစ်ချလိုက်တဲ့အကြောင်း နန်းတော်ထဲက အီသီယိုးပီးယားလူမျိုး မိန်းမစိုး ဧဗဒမေလက် ကြားသွားတယ်။ ဗင်ယာမိန်တံခါးမှာ ဘုရင်ထိုင်နေတုန်း၊ ၈ နန်းတော်ကနေ ဧဗဒမေလက် ထွက်လာပြီး၊ ၉ “အရှင်မင်းကြီး၊ ပရောဖက်ယေရမိအပေါ် ဒီလူတွေရဲ့လုပ်ပုံဟာ တော်တော်ဆိုးတယ်။ သူတို့က ယေရမိကို ရေလှောင်ကန်ထဲ ပစ်ချလိုက်ပြီ။ အဲဒီမှာ သူ ငတ်ပြီးသေသွားလိမ့်မယ်။ မြို့ထဲမှာလည်း စားစရာ လုံးဝမကျန်တော့ဘူး” လို့လျှောက်တင်တယ်။ ၁၀ ဒါနဲ့ ဘုရင်က “ဒီမှာရှိတဲ့ လူ ၃၀ ကို ခေါ်သွားပြီး ပရောဖက်ယေရမိကို ရေလှောင်ကန်ထဲကနေ ဆွဲတင်လိုက်။ မဟုတ်ရင် သူ သေသွားလိမ့်မယ်” လို့ အီသီယိုးပီးယားလူမျိုး ဧဗဒမေလက်ကို အမိန့်ပေးတယ်။
ဘုရားသခင်သည် မိမိအား ဝတ်ပြုသူတွေကို ဆုချသောအရှင်ဖြစ်
ဧဗဒမေလက်က ဘယ်သူလဲ။ သူက ယုဒဘုရင် ဇေဒကိရဲ့ နန်းတွင်းအရာရှိတစ်ယောက် ဖြစ်ပုံရပါတယ်။ ယေရမိရဲ့ တစ်ခေတ်တည်းသားလည်းဖြစ်တယ်။ ယေရမိဆိုတာက သစ္စာမဲ့တဲ့ ယုဒလူတွေကို ဘုရားသခင် မကြာခင် ဖျက်ဆီးတော့မယ်ဆိုပြီး သတိပေးဖို့ တာဝန်ရထားတဲ့သူပါ။ ဧဗဒမေလက်ဟာ ဘုရားတရားမဲ့တဲ့ မင်းညီမင်းသားတွေအလယ်မှာ နေထိုင်ရပေမဲ့ ဘုရားသခင်ကို ကြောက်ရွံ့ရိုသေတဲ့သူဖြစ်ပြီး ယေရမိကိုလည်း အရမ်းလေးစားတဲ့သူဖြစ်တယ်။ နိုင်ငံတော်ကို အကြည်အညိုပျက်အောင် လုပ်တယ်ဆိုပြီး ဆိုးသွမ်းတဲ့ မင်းညီမင်းသားတွေက ယေရမိကို မဟုတ်မမှန်စွပ်စွဲတယ်၊ ပြီးတော့ သူ့ကိုသေစေဖို့ ရေမရှိတဲ့ တွင်းတစ်ခုထဲ ပစ်ချလိုက်ကြတယ်။ အဲဒီအခါ ဧဗဒမေလက်ရဲ့ အရည်အသွေးကောင်းတွေ စမ်းသပ်ခံခဲ့ရတယ်။ (ယေရမိ ၃၈:၄-၆) ဧဗဒမေလက် ဘာလုပ်ရမလဲ။
ဧဗဒမေလက်ဟာ ဆိုးသွမ်းတဲ့ မင်းညီမင်းသားတွေ ရန်ရှာမှာကို စိုးရိမ်မနေဘဲ သတ္တိရှိရှိနဲ့ ပြတ်ပြတ်သားသား လုပ်ဆောင်ခဲ့တယ်။ လူအများရှိနေတဲ့အချိန်မှာပဲ ဘုရင်ဇေဒကိရှေ့မှောက် အခစားဝင်ပြီး ယေရမိအပေါ် မတရားပြုမူဆက်ဆံနေတာကို ဆန့်ကျင်ပြောဆိုခဲ့တယ်။ မတရားပြုကျင့်တဲ့သူတွေကို လက်ညှိုးထိုးပြီး ဘုရင်ကို သူဒီလိုပြောခဲ့ဖွယ်ရှိတယ်– ‘ဤလူတို့သည် ယေရမိကို ဆိုးသွမ်းစွာ ပြုကြပါပြီ။’ (ယေရမိ ၃၈:၉၊ သမ္မာ) ဧဗဒမေလက်ရဲ့ စကားကို ဘုရင်လက်ခံလိုက်တယ်။ ပြီးတော့ လူအယောက် ၃၀ ကိုခေါ်ပြီး ယေရမိကို သွားကယ်ပါလို့ အမိန့်ပေးလိုက်တယ်။
(ယေရမိ ၃၈:၁၁-၁၃) ဧဗဒမေလက်လည်း လူတွေကို ခေါ်သွားပြီး နန်းတော်ထဲက ဘဏ္ဍာတိုက်အောက်ကို ဆင်းသွားတယ်။ အဲဒီထဲက အဝတ်စုတ်တွေကို ယူပြီး ရေလှောင်ကန်ထဲမှာရှိတဲ့ ယေရမိဆီ ကြိုးနဲ့ လျှောချပေးတယ်။ ၁၂ အဲဒီနောက် ဧဗဒမေလက်က “အသားမပွန်းအောင် အဝတ်စုတ်တွေကို ချိုင်းအောက်မှာ ခုလိုက်” လို့ပြောတယ်။ ယေရမိလည်း ပြောတဲ့အတိုင်း လုပ်တယ်။ ၁၃ အဲဒီနောက် ယေရမိကို ရေလှောင်ကန်ထဲကနေ ကြိုးနဲ့ဆွဲတင်ကြတယ်။ ဒီလိုနဲ့ ယေရမိဟာ အစောင့်ရင်ပြင်မှာ ဆက်နေရတယ်။
ဘုရားသခင်သည် မိမိအား ဝတ်ပြုသူတွေကို ဆုချသောအရှင်ဖြစ်
ဧဗဒမေလက်ဟာ နောက်ထပ်အရည်အသွေးတစ်ခုကိုလည်း တင်ပြခဲ့ပါသေးတယ်။ အဲဒါကတော့ သနားကြင်နာမှုပါ။ သူဟာ “ဟောင်းနွမ်းသော အဝတ်စုတ်များကို ယူပြီးမှ ယေရမိရှိရာ မြေတွင်း၌ ကြိုးနှင့်လျှောချလေ၏။” ဟောင်းနွမ်းတဲ့ အဝတ်စုတ်တွေကို ဘာကြောင့် သူယူသွားတာလဲ။ ယေရမိကို မြေတွင်းကနေ ဆွဲတင်တဲ့အခါ သူ့ရဲ့ချိုင်းအောက်မှာ အနာတရမဖြစ်အောင်လို့ပါ။—ယေရမိ ၃၈:၁၁-၁၃။
ရှာဖွေလေ့လာ ဘုရားရေးရာရတနာ
(ယေရမိ ၃၅:၁၉) အစ္စရေးတို့ရဲ့ဘုရား၊ ဗိုလ်ခြေတို့ရဲ့အရှင် ယေဟောဝါ ပြောမယ်– “ရေခပ်ရဲ့သား ယောနဒပ်ရဲ့ သားမြေးတွေထဲမှာ ငါ့ရှေ့မှာ အမှုဆောင်မယ့်သူ အမြဲရှိနေလိမ့်မယ်။”
it-2-E ၇၅၉
ရေခပ်လူမျိုး
သူတို့တင်ပြခဲ့တဲ့ နာခံမှုကို ယေဟောဝါ သဘောကျခဲ့တယ်။ သူတို့က လူသားဖခင်ရဲ့စကားကို နာခံကြပေမဲ့ ယုဒလူမျိုးကတော့ ဖန်ဆင်းရှင်စကားကို မနာခံကြဘူး။ (ယေ. ၃၅:၁၂-၁၆) ရေခပ်လူမျိုးကို ယေဟောဝါ ဒီလိုကတိပေးခဲ့တယ်– “ရေခပ်ရဲ့သား ယောနဒပ်ရဲ့ သားမြေးတွေထဲမှာ ငါ့ရှေ့မှာ အမှုဆောင်မယ့်သူ အမြဲရှိနေလိမ့်မယ်။”—ယေ. ၃၅:၁၉။
(ယေရမိ ၃၇:၂၁) ဒါကြောင့် ဘုရင်ဇေဒကိက ယေရမိကို အစောင့်ရင်ပြင်မှာ ချုပ်ထားဖို့ အမိန့်ပေးလိုက်တယ်။ မြို့ထဲမှာ မုန့်မကုန်မချင်း မုန့်သည်တန်းကနေ မုန့်တစ်လုံးကို သူစားဖို့ နေ့တိုင်းပေးတယ်။ ဒီလိုနဲ့ ယေရမိက အစောင့်ရင်ပြင်မှာ ဆက်နေရတယ်။
ဘုရားသခင်နှင့် ဆက်၍လျှောက်လှမ်းနေလော့
၁၆ ယေဟောဝါသည် မေတ္တာပါစွာဖြင့် ကျွန်ုပ်တို့ကို မေရှိယနိုင်ငံတော်အောက် ခံစားရမည့် သက်သာမှုအကြောင်း အသိပေးထားတော်မူသည်။ (ဆာလံ ၇၂:၁-၄၊ ၁၆; ဟေရှာယ ၂၅:၇၊ ၈) ကိုယ်တော်သည် ကျွန်ုပ်တို့ ဦးစားထားသင့်ရာကို မည်သို့ဦးစားထားရန် အကြံပေးခြင်းအားဖြင့် ဘဝ၏ဖိစီးမှုများကို ယခုပင် ကိုင်တွယ်ဖြေရှင်းနိုင်ဖို့ ကျွန်ုပ်တို့ကိုအကူအညီပေးတော်မူ၏။ (မဿဲ ၄:၄; ၆:၂၅-၃၄) ယေဟောဝါသည် အတိတ်ကာလက ကိုယ်တော်၏ကျေးကျွန်များကို ကူညီပေးခဲ့ပုံမှတ်တမ်းအားဖြင့် ကျွန်ုပ်တို့ကို စိတ်ချစေတော်မူသည်။ (ယေရမိ ၃၇:၂၁; ယာကုပ် ၅:၁၁) ကျွန်ုပ်တို့အပေါ် မည်သည့်ဘေးဆိုးပင် ကျရောက်ပါစေ ကိုယ်တော့်အပေါ် သစ္စာတည်ကြည်သော ကျေးကျွန်များကို ကိုယ်တော်သည် အမြဲချစ်ခြင်းမေတ္တာ ရှိတော်မူကြောင်း ကျွန်ုပ်တို့အား စိတ်ချစေခြင်းအားဖြင့် ခွန်အားရှိစေတော်မူသည်။ (ရောမ ၈:၃၅-၃၉) ယေဟောဝါအား ယုံကြည်ကိုးစားသူတို့ကို ကိုယ်တော်က ဤသို့ကြေညာတော်မူသည်– “ငါသည် သင့်ကိုမစွန့်၊ သင့်ကိုအလျှင်းပစ်၍မထား။”—ဟေဗြဲ ၁၃:၅။
၁၇ ၎င်းကိုသိထားခြင်းအားဖြင့် ခွန်အားရရှိကြသည့် စစ်မှန်သောခရစ်ယာန်များသည် လောကလမ်းစဉ်များသို့ ပြန်လည်လိုက်ပါသွားမည့်အစား ဘုရားသခင်နှင့်အတူ သွားလာကြသည်။ နိုင်ငံများစွာရှိ ဆင်းရဲသူတို့၏ ယေဘုယျ လောကအတွေးအခေါ်တစ်ခုမှာ သာ၍ကြွယ်ဝသူတို့ထံမှ ခိုးယူပြီး မိသားစုကိုလုပ်ကျွေးခြင်းသည် ခိုးသည့်သဘော မသက်ရောက်ပါဟူ၍ဖြစ်၏။ သို့သော် ယုံကြည်သည်အတိုင်း ကျင့်ဆောင်ပြုမူသူတို့သည် ထိုရှုမြင်ပုံကို ငြင်းပယ်ကြသည်။ သူတို့သည် အရာခပ်သိမ်းတို့ထက် ဘုရားသခင်နှစ်သက်သည့်အရာမှန်ကို တန်ဖိုးထားကြပြီး မိမိတို့၏ ဖြောင့်မှန်သော အမူအကျင့်များကြောင့် ကိုယ်တော်ထံမှ ဆုကျေးဇူးရရှိရန် မျှော်လင့်ကြ၏။ (သု. ၃၀:၈၊ ၉; ၁ ကောရိန္သု ၁၀:၁၃; ဟေဗြဲ ၁၃:၁၈) အိန္ဒိယမှ မုဆိုးမတစ်ဦးသည် အလုပ်လုပ်လိုစိတ်နှင့်အတူ ကြံရ ည်ဖန်ရ ည်ရှိခြင်းအားဖြင့် ရင်ဆိုင်ရသမျှကို ကိုင်တွယ်ဖြေရှင်းနိုင်ရန် အကူအညီရရှိခဲ့သည်။ သူမ၏ဘဝအဖြစ်ဆိုးကြောင့် စိတ်ပျက်နေမည့်အစား ဘဝတွင် ဘုရားသခင့်နိုင်ငံတော်နှင့်ဖြောင့်မတ်ခြင်းကို ရှေ့ဦးထားမည်ဆိုလျှင် မိမိနှင့် မိမိ၏သားအတွက် လိုအပ်ရာများရရှိဖို့ မိမိ၏ကြိုးစားမှုများကို ယေဟောဝါကောင်းချီးပေးတော်မူမည်ဖြစ်ကြောင်း သူမသိထားပါသည်။ (မဿဲ ၆:၃၃၊ ၃၄) ကမ္ဘာပေါ်ရှိ ထောင်နှင့်ချီသောသူတို့သည် ဆင်းရဲမှုကိုရင်ဆိုင်ရငြား ယေဟောဝါသည် သူတို့၏ခိုလှုံရာရဲတိုက်ဖြစ်ကြောင်း တင်ပြနေကြသည်။ (ဆာလံ ၉၁:၂) သင်သည်လည်း ဤသို့ပင်ဖြစ်သလော။
အချိန်အခါကောင်းရောက်တော့မည်
နောက်ပိုင်းတွင် ဗာဗုလုန်ရှင်ဘုရင်က အယူဖောက်ပြန်သောယေရုရှလင်ကို ဝိုင်းရံပိတ်ဆို့ထားသောအခါ လူများသည် “မုန့်ကိုချိန်လျက် စိုးရိမ်သောစိတ်နှင့်စား” ခဲ့ရကြသည်။ (ယေဇကျေလ ၄:၁၆) အခြေအနေသည် အမျိုးသမီးတချို့ မိမိတို့ရင်သွေးလေးများ၏ အသားကိုစားခဲ့ကြသည်အထိ ဆိုးရွားလာခဲ့သည်။ (ယေရမိမြည်တမ်းစကား ၂:၂၀) သို့သော် ပရောဖက်ယေရမိသည် မိမိ၏ဟောပြောခြင်းကြောင့် အချုပ်အနှောင် ခံနေရလျက်ပင် ယေဟောဝါရှင်သည် “မြို့တွင် မုန့်မကုန်မီတိုင်အောင် မုန့်သည်တန်းမှ မုန့်တစ်လုံး [ယေရမိ] ကိုနေ့တိုင်းအစဉ်ပေး” ရန် အသေအချာ စီစဉ်ပေးခဲ့သည်။—ယေရမိ ၃၇:၂၁။
မုန့်အထောက်အပံ့ ပြတ်တောက်သွားသောအခါ ယေဟောဝါရှင်သည် ယေရမိကို မေ့လျော့ခဲ့ပါသလော။ မမေ့ခဲ့ကြောင်းထင်ရှားသည်၊ အကြောင်းမှာ မြို့သည် ဗာဗုလုန်လူမျိုးများ၏လက်တွင်း သက်ဆင်းခဲ့သည့်အခါတွင် ယေရမိသည် ‘စားစရိတ်နှင့် လက်ဆောင်ကိုပေး၍ စေလွှတ်ခြင်း’ ခံခဲ့ရသောကြောင့်ဖြစ်သည်။—ယေရမိ ၄၀:၅၊ ၆; ဆာလံ ၃၇:၂၅ ကိုလည်းရှု။
ကျမ်းစာဖတ်ရှုခြင်း
(ယေရမိ ၃၆:၂၇–၃၇:၂) ယေရမိ နှုတ်တိုက်ချပေးတဲ့အတိုင်း ဗာရုတ်ရေးထားတဲ့ စာလိပ်ကို မင်းကြီး မီးရှို့ပြီးတဲ့နောက်မှာ ယေဟောဝါက ယေရမိကို ထပ်ပြောတယ်– ၂၈ “စာလိပ်နောက်တစ်လိပ် ယူပြီး ယုဒဘုရင်ယောယကိမ် မီးရှို့လိုက်တဲ့ စာလိပ်မှာပါတဲ့အတိုင်း အကုန်ပြန်ချရေးပါ။ ၂၉ ယုဒဘုရင် ယောယကိမ်ကိုလည်း ပြောလိုက်။ ‘ယေဟောဝါ ပြောတာက– “မင်းက စာလိပ်ကို မီးရှို့ပစ်တယ်။ ‘“ဒီပြည်ကို ဗာဗုလုန်ဘုရင် ကျိန်းသေ လာဖျက်ဆီးလိမ့်မယ်။ လူသူတိရစ္ဆာန်ပါမကျန် ပပျောက်စေမယ်” ဆိုပြီး ဘာလို့ရေးထားတာလဲ’ လို့လည်း ပြောတယ်။ ၃၀ ဒါကြောင့် ယုဒဘုရင် ယောယကိမ်နဲ့ပတ်သက်ပြီး ယေဟောဝါ ပြောမယ်– ‘သူ့ဆီမှာ ဒါဝိဒ်ရဲ့ရာဇပလ္လင်ပေါ် နန်းထိုင်မယ့်သူတစ်ယောက်မှ ရှိမှာမဟုတ်ဘူး။ သူ့အလောင်းကို နေ့အချိန်မှာ နေပူထဲ၊ ညအချိန်မှာ နှင်းတောထဲ ပစ်ထားလိမ့်မယ်။ ၃၁ သူနဲ့ သူ့သားမြေးတွေ၊ အမှုထမ်းတွေကို သူတို့အမှားတွေအတွက် ငါဒဏ်ခတ်မယ်။ ငါ့စကားကို နားမထောင်တဲ့အတွက် သူတို့အပေါ်၊ ဂျေရုဆလင်မြို့သူမြို့သားတွေအပေါ်၊ ယုဒလူတွေအပေါ် ငါပြောခဲ့တဲ့ ဘေးဆိုးတွေကို ကျရောက်စေမယ်။’”’” ၃၂ ဒါနဲ့ ယေရမိလည်း စာလိပ်နောက်တစ်လိပ် ယူပြီး နေရိယရဲ့သား အတွင်းရေးမှူး ဗာရုတ်ကို ပေးတယ်။ ဗာရုတ်က ယုဒဘုရင် ယောယကိမ် မီးရှို့လိုက်တဲ့ စာလိပ်မှာပါတဲ့အတိုင်း၊ ယေရမိ နှုတ်တိုက်ချပေးတဲ့အတိုင်း ပြန်ရေးတယ်။ အချက်အလက် အတော်များများကိုလည်း ထပ်ဖြည့်လိုက်တယ်။
၃၇ ဗာဗုလုန်ဘုရင် နေဗုခဒ်နေဇာက ယောရှိရဲ့သား ဇေဒကိကို နန်းတင်တယ်။ ဒါကြောင့် ဇေဒကိဟာ ယောယကိမ်ရဲ့သား ခေါနိနေရာကို ဆက်ခံပြီး ယုဒပြည်မှာ နန်းထိုင်တယ်။ ၂ သူနဲ့ မင်းမှုထမ်းတွေရော ပြည်သူပြည်သားတွေပါ ပရောဖက် ယေရမိကတစ်ဆင့် ယေဟောဝါပြောတဲ့ စကားတွေကို နားမထောင်ကြဘူး။
မေ ၁၅-၂၁
ကျမ်းစာထဲက အဖိုးတန်ဘဏ္ဍာများ | ယေရမိ ၃၉-၄၃
“ယေဟောဝါက လူတိုင်းကို သူတို့ရဲ့ လုပ်ရပ်နဲ့အညီ အကျိုးအပြစ်ရစေ”
(ယေရမိ ၃၉:၄-၇) ယုဒဘုရင်ဇေဒကိနဲ့ စစ်သည်တွေက သူတို့ကို မြင်တဲ့အခါ ညဘက်မှာ ဘုရင့်ဥယျာဉ်လမ်းနားမှာရှိတဲ့ မြို့ရိုးနှစ်ခုကြား တံခါးကနေ မြို့ပြင်ကိုထွက်ပြီး အရာဗာချိုင့်ဝှမ်းလမ်းအတိုင်း ဆက်ပြေးကြတယ်။ ၅ ဒါပေမဲ့ ခါလဒဲစစ်တပ်က လိုက်လာပြီး ယေရိခေါကန္တာရလွင်ပြင်မှာ ဇေဒကိကို ဖမ်းမိသွားတယ်။ ဇေဒကိကို ဟာမတ်နယ်မြေ၊ ရိဗလမြို့မှာရှိတဲ့ ဗာဗုလုန်ဘုရင် နေဗုခဒ်နေဇာဆီ ဖမ်းခေါ်လာတယ်။ အဲဒီမှာ ဇေဒကိကို စီရင်ချက်ချတယ်။ ၆ ရိဗလမြို့မှာ ဗာဗုလုန်ဘုရင်က ဇေဒကိရှေ့မှာတင် သူ့သားတွေကို ကွပ်မျက်လိုက်တယ်။ ယုဒမှူးမတ်တွေကိုလည်း ကွပ်မျက်လိုက်တယ်။ ၇ ဇေဒကိရဲ့မျက်စိကို ဖောက်ပြီးနောက် ကြေးနီခြေကျဉ်းခတ်ပြီး ဗာဗုလုန်ကို ခေါ်သွားတယ်။
it-2-E ၁၂၂၈ အပိုဒ် ၄
ဇေဒကိ
ဂျေရုဆလင်မြို့ ပျက်စီး။ နောက်ဆုံး (ဘီစီ ၆၀၇) ‘ဇေဒကိနန်းစံ ၁၁ နှစ် . . . လေးလပိုင်း၊ ကိုးရက်နေ့ရောက်တော့’ ဂျေရုဆလင်မြို့ရိုး ထိုးဖောက်ခံလိုက်ရတယ်။ ဇေဒကိနဲ့ စစ်သည်တွေက ညဘက်မှာ ထွက်ပြေးကြတယ်။ ယေရိခေါကန္တာရလွင်ပြင်မှာ ဇေဒကိကို ဖမ်းမိသွားပြီး ရိဗလမြို့မှာရှိတဲ့ ဗာဗုလုန်ဘုရင်ဆီ ခေါ်သွားတယ်။ ဇေဒကိရှေ့မှာပဲ သူ့သားတွေကို ကွပ်မျက်လိုက်တယ်။ အဲဒီအချိန်မှာ ဇေဒကိဟာ အသက် ၃၂ နှစ်ပဲရှိသေးတဲ့အတွက် သူ့သားတွေဟာ အသက်ငယ်ငယ်ပဲ ရှိကြမှာဖြစ်တယ်။ သားတွေ အသတ်ခံရတာ မြင်ရပြီးနောက် ဇေဒကိရဲ့မျက်စိကို ဖောက်ပစ်လိုက်ကြပြီး ကြေးနီခြေကျဉ်းခတ်ကာ ဗာဗုလုန်ကို ခေါ်သွားတယ်။ သေတဲ့အထိ အကျဉ်းချထားလိုက်တယ်။—၂ ဘု. ၂၅:၂-၇။ ယေ. ၃၉:၂-၇။ ၄၄:၃၀။ ၅၂:၆-၁၁။ ယေ ၂၄:၈-၁၀ နဲ့နှိုင်းယှဉ်ပါ။ ယေဇ. ၁၂:၁၁-၁၆။ ၂၁:၂၅-၂၇။
(ယေရမိ ၃၉:၁၅-၁၈) အစောင့်ရင်ပြင်မှာ အချုပ်ခံနေရတုန်း ယေရမိကို ယေဟောဝါ ပြောတယ်– ၁၆ “အီသီယိုးပီးယားလူမျိုး ဧဗဒမေလက်ကို မင်းပြောရမှာက ‘“ဒီမြို့ကို ကောင်းမှုမပြုဘဲ ဘေးဆိုးကျရောက်စေမယ်လို့ ငါပြောခဲ့တဲ့အတိုင်း ဖြစ်လာအောင် ငါလုပ်မယ်။ အဲဒီအချိန်ကျရင် အဲဒီအတိုင်း ဖြစ်လာတာကို မင်းမြင်ရလိမ့်မယ်” လို့ အစ္စရေးတို့ရဲ့ဘုရား၊ ဗိုလ်ခြေတို့ရဲ့အရှင် ယေဟောဝါ ပြောတယ်။’ ၁၇ “‘ဒါပေမဲ့ အဲဒီနေ့မှာ မင်းကို ငါကယ်တင်မယ်။ မင်းကြောက်နေတဲ့ လူတွေလက်ထဲ ရောက်သွားမှာ မဟုတ်ဘူး’ လို့ ယေဟောဝါ ပြောတယ်။ ၁၈ “‘မင်းကို ငါကျိန်းသေ လွတ်မြောက်စေမယ်။ မင်းက ဓားဘေးနဲ့ ကျဆုံးရမှာ မဟုတ်ဘူး။ ငါ့ကို ယုံကြည်ကိုးစားတဲ့အတွက် မင်းရဲ့အသက်ကို တိုက်ရာပါဥစ္စာလို ရလိမ့်မယ်’ လို့ ယေဟောဝါ ပြောတယ်။”
ဘုရားသခင်သည် မိမိအား ဝတ်ပြုသူတွေကို ဆုချသောအရှင်ဖြစ်
ဧဗဒမေလက်ရဲ့လုပ်ရပ်ကို ယေဟောဝါ တွေ့ မြင်ပါတယ်။ အဲဒီလုပ်ရပ်ကို ဘုရားသခင် တန်ဖိုးထားပါသလား။ ယုဒနိုင်ငံ ပျက်စီးတော့မယ်ဆိုတဲ့ သတင်းကို ယေရမိကနေတစ်ဆင့် ဧဗဒမေလက်ကို ဘုရားသခင် အသိပေးခဲ့တယ်။ အဲဒီနောက် ဖျက်ဆီးခြင်းဘေးမှာ ဧဗဒမေလက် ကယ်တင်ခံရမယ်ဆိုတာကို သူယုံကြည်စိတ်ချအောင် ကတိငါးခု ပေးခဲ့တယ်။ ယေဟောဝါက ဒီလိုမိန့်ဆိုခဲ့တယ်– “သင့်ကို ငါကယ်နုတ်မည်။ သင် ကြောက်သောသူတို့လက်သို့ သင် မရောက်ရ။ ငါသည် သင့်ကို စင်စစ် ကယ်နုတ်မည်။ သင်သည် ဓားဖြင့်မဆုံးရ။ လက်ရဥစ္စာကဲ့သို့ ကိုယ်အသက်ကို ရလိမ့်မည်။” ယေဟောဝါက ဧဗဒမေလက်ကို ကယ်တင်မယ်လို့ ဘာကြောင့် ကတိပေးခဲ့တာလဲ။ “အကြောင်းမူကား သင်သည် ငါ့ကို ကိုးစားသောကြောင့်တည်း” ဆိုပြီး ယေဟောဝါပြောခဲ့ပါတယ်။ (ယေရမိ ၃၉:၁၆-၁၈) ဧဗဒမေလက်ဟာ ယေရမိအတွက် စိုးရိမ်ပူပန်ပေးတဲ့အပြင် ဘုရားသခင်ကို ယုံကြည်ကိုးစားတယ်ဆိုတာ ဘုရားသခင် သိထားတယ်။
(ယေရမိ ၄၀:၁-၆) ကိုယ်ရံတော်တပ်မှူး နေဗုဇာရဒန်က ယေရမိကို ရာမမြို့ကနေ လွှတ်ပေးလိုက်ပြီးနောက် ယေရမိဆီ ယေဟောဝါရဲ့ စကားတော် ရောက်လာတယ်။ ဗာဗုလုန်ဆီ ပြည်နှင်ခံရတဲ့ ဂျေရုဆလင်မြို့သား၊ ယုဒပြည်သားတွေနဲ့အတူ ယေရမိကို လက်ထိတ်ခတ်ပြီး ရာမမြို့ကို ခေါ်ခဲ့တာပါ။ ၂ ကိုယ်ရံတော်တပ်မှူးက ယေရမိကိုခေါ်ပြီး “ဒီနေရာမှာ ဒီဘေးဆိုး ကျရောက်စေမယ်လို့ မင်းရဲ့ဘုရား ယေဟောဝါ ကြိုဟောခဲ့တယ်။ ၃ မင်းတို့တစ်တွေ ယေဟောဝါရဲ့ စကားကို နာမခံဘဲ ပြစ်မှားကြတဲ့အတွက် ယေဟောဝါက ပြောထားတဲ့အတိုင်း လုပ်ခဲ့တယ်။ ဒါကြောင့် မင်းတို့ ဒီလိုအဖြစ်မျိုး ကြုံရတာ။ ၄ မင်းရဲ့လက်ထိတ်ကို ဒီနေ့ ငါချွတ်ပေးမယ်။ ဗာဗုလုန်ကို ငါနဲ့အတူ လိုက်ချင်ရင် လိုက်ခဲ့ပါ။ ငါကြည့်ရှုစောင့်ရှောက်ပေးမယ်။ မလိုက်ချင်ရင်လည်း မလိုက်နဲ့။ တစ်ပြည်လုံးမှာ မင်းကြိုက်တဲ့နေရာကို သွားပါ” လို့ပြောတယ်။ ၅ ယေရမိ မဆုံးဖြတ်ရသေးခင်မှာ နေဗုဇာရဒန်က “ရှာဖန်ရဲ့မြေး၊ အဟိကံရဲ့သား ဂေဒလိဆီ မင်း ပြန်လိုက်ပါ။ ယုဒမြို့တွေကို ကြီးကြပ်ဖို့ သူ့ကို ဗာဗုလုန်ဘုရင် ခန့်အပ်ထားတာ။ သူနဲ့အတူ၊ ပြည်သူပြည်သားတွေနဲ့အတူ နေထိုင်ပါ။ ဒါမှမဟုတ် မင်း ကြိုက်တဲ့နေရာကို သွားပါ” လို့ ပြောတယ်။ ပြီးတော့ ကိုယ်ရံတော်တပ်မှူးက သူ့ကို စားနပ်ရိက္ခာနဲ့ လက်ဆောင်တွေပေးပြီး လွှတ်လိုက်တယ်။ ၆ ဒါနဲ့ ယေရမိက မိဇပါမြို့မှာရှိတဲ့ အဟိကံရဲ့သား ဂေဒလိဆီ သွားပြီး သူနဲ့အတူ၊ ပြည်မှာ ကျန်ရစ်သူတွေနဲ့အတူ နေထိုင်တယ်။
it-2-E ၄၈၂
နေဗုဇာရဒန်
နေဗုဇာရဒန်ဟာ နေဗုခဒ်နေဇာ အမိန့်နဲ့ ယေရမိကို လွှတ်ပေးပြီး သွားချင်တဲ့ နေရာကို ရွေးပါ၊ ကြည့်ရှုစောင့်ရှောက်မယ်လို့ ကြင်နာစွာပြောတဲ့အပြင် အထောက်အပံ့ တချို့ကို ပေးခဲ့တယ်။ နေဗုဇာရဒန်ဟာ ဗာဗုလုန်ဘုရင်ရဲ့ ပြောရေးဆိုခွင့်ရှိသူဖြစ်ပြီး ပြည်တော်မှာ ကျန်ကြွင်းသူတွေကို အုပ်ချုပ်ဖို့ ဂေဒလိကို ခန့်အပ်ခဲ့တယ်။ (၂ ဘု. ၂၅:၂၂။ ယေ. ၃၉:၁၁-၁၄။ ၄၀:၁-၇။ ၄၁:၁၀) ငါးနှစ်လောက်အကြာဖြစ်တဲ့ ဘီစီ ၆၀၂ မှာ အနီးအနားနယ်မြေတွေကို ထွက်ပြေးသွားဖွယ်ရှိတဲ့ ဂျူးတွေကို နေဗုဇာရဒန် ဖမ်းခေါ်သွားတယ်။—ယေ. ၅၂:၃၀။
ရှာဖွေလေ့လာ ဘုရားရေးရာရတနာ
(ယေရမိ ၄၂:၁-၃) အဲဒီနောက် ကာရာရဲ့သား ယောဟနန်၊ ဟောရှာယရဲ့သား ယေဇနိ၊ ဗိုလ်ချုပ်တွေနဲ့ လူကြီးလူငယ် အားလုံးရောက်လာပြီး၊ ၂ ပရောဖက်ယေရမိကို “ကျွန်တော်တို့ တောင်းဆိုတာကို နားထောင်ပါ။ ကျွန်တော်တို့နဲ့ ဒီကျန်ကြွင်းသူတွေအတွက် ယေဟောဝါဘုရားဆီ ဆုတောင်းပေးပါ။ ခင်ဗျားမြင်တဲ့အတိုင်း လူနည်းစုပဲ ကျန်တော့တယ်။ ၃ ကျွန်တော်တို့ လျှောက်သင့်တဲ့လမ်းစဉ်၊ လုပ်သင့်တဲ့အရာကို ယေဟောဝါဘုရား ပြောပြပါစေ” လို့တောင်းဆိုကြတယ်။
(ယေရမိ ၄၃:၂) ဟောရှာယရဲ့သား အာဇရိ၊ ကာရာရဲ့သား ယောဟနန်နဲ့ ရောင့်တက်သူတွေက “ခင်ဗျား လိမ်ပြောနေတာ။ ယေဟောဝါဘုရားက ခင်ဗျားကို စေလွှတ်ပြီး ‘အီဂျစ်ပြည်မှာ သွားမနေကြနဲ့’ လို့ပြောခိုင်းမှာ မဟုတ်ဘူး။
(ယေရမိ ၄၃:၄) ကာရာရဲ့သား ယောဟနန်၊ ဗိုလ်ချုပ်တွေနဲ့ လူတွေက ယုဒပြည်မှာ ဆက်နေထိုင်ကြဆိုတဲ့ ယေဟောဝါရဲ့ စကားကို မနာခံကြဘူး။
‘ယေဟောဝါ အဘယ်မှာရှိသနည်း’ ဟု သင်မေးမြန်းသလော
၁၀ ယေရုရှလင်မြို့ဖျက်ဆီးခံရကာ ဗာဗုလုန်တပ်သည် ဂျူးသုံ့ပန်းတို့ကို ဖမ်းဆီးခေါ်ဆောင်သွားပြီးနောက် ယောဟနန်သည် ယုဒပြည်တွင် ကျန်ရစ်သူဂျူးလူနည်းစုကို အဲဂုတ္တုပြည်သို့ ခေါ်သွားရန်စီစဉ်ခဲ့သည်။ သူတို့အစီအစဉ်များပြုလုပ်ပြီးဖြစ်သည်၊ သို့သော် မထွက်ခွာမီတွင် သူတို့အတွက်ဆုတောင်းပေးရန်နှင့် ယေဟောဝါထံတော်မှ ညွှန်ကြားချက်တောင်းခံပေးရန် ယေရမိကို သူတို့တောင်းဆိုခဲ့၏။ သို့သော် သူတို့လိုချင်သော အဖြေမရသောအခါ သူတို့စီစဉ်ထားသည့်အတိုင်း ဇွတ်တရွတ် ဆက်လုပ်ဆောင်သွားခဲ့ကြသည်။ (ယေရမိ ၄၁:၁၆–၄၃:၇) သင်သည် ယေဟောဝါအား ရှာသည့်အခါ ကိုယ်တော်ကို သင်ရှာတွေ့နိုင်ရန် ဤဖြစ်ရပ်များတွင် သင့်အတွက်အကျိုးရှိမည့် သင်ခန်းစာများ တွေ့ပါသလော။
(ယေရမိ ၄၃:၆၊ ၇) ယောက်ျား၊ မိန်းမ၊ ကလေးတွေနဲ့ ဘုရင့်သမီးတော်တွေအပြင် ရှာဖန်ရဲ့မြေး အဟိကံရဲ့သား ဂေဒလိဆီမှာ ကိုယ်ရံတော်တပ်မှူး နေဗုဇာရဒန် ချန်ထားခဲ့သူအားလုံးကို ခေါ်သွားတယ်။ ပရောဖက် ယေရမိနဲ့ နေရိယရဲ့သား ဗာရုတ်ကိုလည်း ခေါ်သွားတယ်။ ၇ သူတို့က ယေဟောဝါရဲ့စကားကို မနာခံဘဲ အီဂျစ်ပြည်ကို သွားတယ်။ တာပနက်မြို့အထိ ရောက်လာကြတယ်။
it-1-E ၄၆၃ အပိုဒ် ၄
သက္ကရာဇ်စဉ်
ဂျေရုဆလင်မြို့ကို နောက်ဆုံးဝိုင်းရံချိန်က ဇေဒကိနန်းစံ ကိုးနှစ် (ဘီစီ ၆၀၉) ဖြစ်ပြီး နန်းစံ ၁၁ နှစ် (ဘီစီ ၆၀၇) မှာ ကျရှုံးသွားတယ်။ အဲဒီနှစ်ဟာ နေဗုခဒ်နေဇာ နန်းစံ ၁၉ နှစ် (နန်းတက်တဲ့နှစ် ဘီစီ ၆၂၅ ကနေ ရေတွက်) ဖြစ်တယ်။ (၂ ဘု. ၂၅:၁-၈) အဲဒီနှစ် ငါးလပိုင်း (အာ့ဘ်လဖြစ်ပြီး ဇူလိုင်လလယ်ကနေ ဩဂုတ်လလယ်အထိနဲ့ ကိုက်ညီ) မှာ မြို့ကိုမီးရှို့၊ မြို့ရိုးတွေကို ဖြိုချပြီး မြို့သားအများစုကို သုံ့ပန်းတွေအဖြစ် ခေါ်သွားတယ်။ “ဆင်းရဲမွဲတေသူတချို့ကိုတော့” ချန်ထားခဲ့တယ်။ နေဗုခဒ်နေဇာ ခန့်ထားတဲ့ ဂေဒလိ အသတ်ခံရတဲ့အချိန်အထိ သူတို့နေထိုင်ကြပေမဲ့ နောက်ပိုင်း ကြောက်တဲ့အတွက် အီဂျစ်ပြည်ကို ထွက်ပြေးသွားကြလို့ ယုဒပြည်ဟာ လူသူကင်းမဲ့သွားတယ်။ (၂ ဘု. ၂၅:၉-၁၂၊ ၂၂-၂၆) အဲဒါက ခုနစ်လပိုင်းဖြစ်တဲ့ ဧသနိမ်လ (ဒါမှမဟုတ် တိရှလိလ၊ စက်တင်ဘာလလယ်ကနေ အောက်တိုဘာလလယ်အထိနဲ့ ကိုက်ညီ) မှာဖြစ်တယ်။ ဒါကြောင့် အနှစ် ၇၀ လူသူကင်းမဲ့တဲ့အချိန်ကို ဘီစီ ၆၀၇၊ အောက်တိုဘာ ၁ ရက်ကနေ စရေတွက်ရမှာဖြစ်ပြီး ဘီစီ ၅၃၇ မှာ ပြည့်သွားတယ်။ ပထမအသုတ် ပြည်တော်ပြန်ဂျူးတွေဟာ ဘီစီ ၅၃၇၊ ခုနစ်လပိုင်းမှာ ယုဒပြည်ကို ရောက်လာကြတဲ့အတွက် ပြည်တော်မှာ လူသူကင်းမဲ့တဲ့အချိန် အနှစ် ၇၀ တင်းတင်း ပြည့်သွားတယ်။—၂ ရာ. ၃၆:၂၁-၂၃။ ဧဇ ၃:၁။
ကျမ်းစာဖတ်ရှုခြင်း
(ယေရမိ ၄၀:၁၁–၄၁:၃) ဗာဗုလုန်ဘုရင်က ကျန်ကြွင်းသူတွေကို ယုဒပြည်မှာ နေထိုင်ခွင့်ပြုပြီး သူတို့ကို ကြီးကြပ်ဖို့ ရှာဖန်ရဲ့မြေး၊ အဟိကံရဲ့သား ဂေဒလိကို ခန့်ထားမှန်း မောဘပြည်၊ အမ္မုန်ပြည်၊ ဧဒုံပြည်နဲ့ တခြားပြည်တွေမှာ ရောက်နေတဲ့ဂျူးတွေ ကြားသွားတယ်။ ၁၂ ဒါကြောင့် ဂျူးတွေက ရောက်ရာအရပ်ကနေ ပြန်လာပြီး ယုဒပြည်၊ မိဇပါမြို့မှာရှိတဲ့ ဂေဒလိဆီ ရောက်လာကြတယ်။ ပြီးတော့ စပျစ်ဝိုင်နဲ့ နွေသီးနှံတွေကို အများကြီး စုဆောင်းကြတယ်။ ၁၃ ကာရာရဲ့သား ယောဟနန်နဲ့ တောထဲရောက်နေတဲ့ ဗိုလ်ချုပ်တွေဟာ မိဇပါမြို့မှာရှိတဲ့ ဂေဒလိဆီ ရောက်လာပြီး၊ ၁၄ “အမ္မုန်ဘုရင် ဗာလိတ်က ခင်ဗျားကိုသတ်ဖို့ နာသနိရဲ့သား အိရှမေလကို လွှတ်လိုက်တာ မသိဘူးလား” လို့ ပြောကြတယ်။ ဒါပေမဲ့ အဟိကံရဲ့သား ဂေဒလိက သူတို့ပြောတာကို မယုံဘူး။ ၁၅ ကာရာရဲ့သား ယောဟနန်က “နာသနိရဲ့သား အိရှမေလကို အခုပဲ သွားသတ်ချင်တယ်။ ဘယ်သူမှ မသိစေရဘူး။ သူသာ ခင်ဗျားကို သတ်လိုက်ရင် ခင်ဗျားဆီ လာပူးပေါင်းတဲ့ ယုဒလူတွေ တကွဲတပြား ဖြစ်ကုန်မယ်။ ယုဒပြည်မှာ ကျန်ရစ်ခဲ့သူတွေလည်း သေဆုံးကုန်မယ်” လို့ မိဇပါမြို့မှာ ဂေဒလိကို တိုးတိုးတိတ်တိတ် ပြောတယ်။ ၁၆ ဒါပေမဲ့ အဟိကံရဲ့သား ဂေဒလိက “အဲဒီလို မလုပ်ပါနဲ့။ အိရှမေလအကြောင်း မဟုတ်မမှန် ပြောနေကြတာပါ” လို့ ကာရာရဲ့သား ယောဟနန်ကို ပြန်ပြောတယ်။
၄၁ ခုနစ်လပိုင်းရောက်တော့ ဧလိရှမာရဲ့မြေး၊ နာသနိရဲ့သား မင်းမျိုးမင်းနွယ် အရာရှိ အိရှမေလက လူဆယ်ယောက်ကို ခေါ်ပြီး မိဇပါမြို့မှာရှိတဲ့ အဟိကံရဲ့သား ဂေဒလိဆီ ရောက်လာတယ်။ မိဇပါမြို့မှာ အတူစားသောက်နေတုန်း၊ ၂ နာသနိရဲ့သား အိရှမေလနဲ့ လူဆယ်ယောက်က ရှာဖန်ရဲ့မြေး၊ အဟိကံရဲ့သား ဂေဒလိကို ဓားနဲ့လုပ်ကြံတယ်။ ဒီလိုနဲ့ ပြည်ကိုကြီးကြပ်ဖို့ ဗာဗုလုန်ဘုရင် ခန့်အပ်ထားသူကို သတ်ပစ်တယ်။ ၃ အိရှမေလက မိဇပါမြို့မှာ ဂေဒလိနဲ့အတူရှိတဲ့ ဂျူးတွေနဲ့ ခါလဒဲစစ်သည်တွေကို သတ်ပစ်တယ်။
မေ ၂၂-၂၈
ကျမ်းစာထဲက အဖိုးတန်ဘဏ္ဍာများ | ယေရမိ ၄၄-၄၈
“ကြီးမြတ်တဲ့အရာတွေကို ဆက်မရှာပါနဲ့တော့”
(ယေရမိ ၄၅:၂၊ ၃) “ဗာရုတ်၊ ခင်ဗျားနဲ့ပတ်သက်ပြီး အစ္စရေးတို့ရဲ့ဘုရား ယေဟောဝါ ပြောတယ်– ၃ ‘ခင်ဗျားက “ငါ့အဖြစ် ဆိုးလိုက်တာ။ ငါ့ဝေဒနာပေါ်မှာ ဝမ်းနည်းပူဆွေးမှုကို ယေဟောဝါဘုရား ထပ်ဆင့်လိုက်ပြီ။ ငါ့မှာ ညည်းတွားရလွန်းလို့ ပင်ပန်းလှပြီ။ နားခိုတဲ့နေရာကို ရှာမတွေ့ပါလား” လို့ပြောတယ်။’
‘ကြီးစွာသောအရာတို့ကို ကိုယ်အဖို့ မရှာနှင့်’
၄ ဗာရုတ် အာရုံစိုက်ခဲ့တဲ့အရာဟာ ထင်ပေါ်ကျော်ကြားမှုနဲ့ ဂုဏ်သိက္ခာ ဖြစ်နိုင်တယ်။ ဗာရုတ်က ယေရမိရဲ့စာရေးအဖြစ် လုပ်ဆောင်ခဲ့ပေမဲ့ ယေရမိ တစ်ယောက်တည်းရဲ့ စာရေးလောက်ပဲ မဟုတ်နိုင်ဘူး။ ယေရမိ ၃၆:၃၂ မှာ ဗာရုတ်ကို “စာရေး [“အတွင်းဝန်၊” ကဘ]” လို့ခေါ်ထားတယ်။ ရှေးဟောင်းသုတေသန အထောက်အထားတွေကလည်း သူဟာ နန်းတွင်းအရာရှိ ဖြစ်နိုင်တယ်ဆိုပြီး ဖော်ပြတယ်။ ယုဒ မင်းညီမင်းသားတစ်ယောက်ဖြစ်တဲ့ ဧလိရှမာကိုလည်း “စာရေးတော် [“အတွင်းဝန်၊” ကဘ]” လို့ခေါ်ထားတယ်။ ဒါကြောင့် ဗာရုတ်ဟာ ဧလိရှမာရဲ့ လုပ်ဖော်ဆောင်ဖက်တစ်ဦးအနေနဲ့ “နန်းတော်” ထဲက “စာရေးတော်[အတွင်းဝန်]အခန်း” ကို ဝင်ထွက်သွားလာနိုင်တယ်ဆိုတာ သိနိုင်တယ်။ (ယေ. ၃၆:၁၁၊ ၁၂၊ ၁၄) ဗာရုတ်ဟာ နန်းတွင်းက ပညာတတ်အရာရှိဖြစ်ရမယ်။ သူနဲ့ညီအစ်ကိုတော်တဲ့ စရာယက ဘုရင်ဇေဒကိရဲ့ အိမ်တော်ဝန်ဖြစ်ပြီး ဘုရင်က ဗာဗုလုန်မြို့ကို အရေးကြီးကိစ္စနဲ့သွားတဲ့အခါ စရာယလည်း လိုက်သွားခဲ့တယ်။ (ယေရမိ ၅၁:၅၉ ကိုဖတ်ပါ။) အိမ်တော်ဝန်အနေနဲ့ စရာယဟာ ဘုရင်ခရီးသွားတဲ့အခါ ဘုရင့်အတွက် ရိက္ခာနဲ့နေရာထိုင်ခင်းကို တာဝန်ယူကြီးကြပ်ပေးရပုံရှိတယ်။ တကယ့်ရာထူးကြီးပါပဲ။
၅ ရာထူးရာခံကြီးသူတစ်ယောက်အတွက် ယုဒပြည် တရားစီရင်ခံရမယ့် သတင်းစကားတွေကို တစ်ခုပြီးတစ်ခု မှတ်တမ်းတင်နေရတာက စိတ်ပျက်စရာဖြစ်မှာပဲ။ ဘုရားသခင့်ပရောဖက်ကို ကူညီပေးရတာက ဗာရုတ်ရဲ့ရာထူးနဲ့ အလုပ်အတွက် အန္တရာယ်ရှိနိုင်တယ်။ ယေရမိ ၄၅:၃၊ ၄ မှာဖတ်ရတဲ့အတိုင်း ယေဟောဝါက သူတည်ဆောက်တဲ့အရာကို ဖြိုဖျက်မယ်ဆိုရင် ဖြစ်လာမယ့် အကျိုးဆက်တွေကို စဉ်းစားကြည့်ပါ။ ဗာရုတ်စိတ်ထဲမှာရှိတဲ့ ‘ကြီးစွာသောအရာတွေ’ ဟာ နန်းတော်မှာ ရာထူးတိုးဖို့ပဲဖြစ်ဖြစ်၊ ပစ္စည်းဥစ္စာ ပိုင်ဆိုင်ဖို့ပဲဖြစ်ဖြစ် အလကား ဖြစ်သွားပါလိမ့်မယ်။ ဒါကြောင့် ဗာရုတ်ဟာ ပျက်စီးတော့မယ့် ဂျူးအစီအစဉ်စနစ်မှာ ရာထူးတိုးဖို့ ရှာကြံနေတယ်ဆိုရင် သူ့ကို ဘုရားသခင်တားသင့်ပါတယ်။
၆ ဗာရုတ်ရှာဖွေနေတဲ့ ‘ကြီးစွာသောအရာတွေ’ ထဲမှာ ချမ်းသာကြွယ်ဝမှုလည်း ပါဝင်နိုင်တယ်။ ယုဒပြည် ပတ်လည်မှာရှိတဲ့လူမျိုးတွေက စည်းစိမ်ဥစ္စာတွေကို အကြီးအကျယ် အားကိုးကြတယ်။ မောဘလူတွေဟာ သူတို့ ‘ဆည်းပူးတဲ့ဘဏ္ဍာဥစ္စာ’ ကို ယုံကြည်ကိုးစားကြတယ်။ အမ္မုန်လူတွေလည်း အဲဒီလိုပဲ။ ဗာဗုလုန်မြို့က ‘စည်းစိမ်ကြီးတဲ့မြို့’ ဖြစ်တယ်လို့ ဖော်ပြဖို့ ယေရမိကို ယေဟောဝါပြောခဲ့တယ်။ (ယေ. ၄၈:၁၊ ၇; ၄၉:၁၊ ၄; ၅၁:၁၊ ၁၃) တကယ်တော့ ဘုရားသခင်က အဲဒီလူမျိုးတွေကို ပြစ်တင်ရှုတ်ချခဲ့တယ်။
(ယေရမိ ၄၅:၄၊ ၅က) “ဗာရုတ်ကို ပြောလိုက်ပါ။ ‘ယေဟောဝါက “ငါတည်ဆောက်ခဲ့တဲ့အရာကို ဖြိုချမယ်။ ငါစိုက်ပျိုးခဲ့တဲ့အရာကို နုတ်ပစ်မယ်။ တစ်ပြည်လုံးကို အဲဒီလိုလုပ်မယ်။ ၅ မင်းက ကြီးမြတ်တဲ့အရာတွေကို ရှာနေတယ်။ အဲဒါတွေကို ဆက်မရှာပါနဲ့တော့” လို့ ပြောတယ်။’
‘ကြီးစွာသောအရာတို့ကို ကိုယ်အဖို့ မရှာနှင့်’
၂ ဗာရုတ်က “ငါသည် အမင်္ဂလာရှိ၏။ ထာဝရဘုရားသည် ငါဝမ်းနည်းစရာအကြောင်း တစ်ပါးအပေါ်မှာတစ်ပါးကို ထပ်ဆင့်တော်မူသောကြောင့် ငါသည် . . . ညည်းတွား၍ စိတ်ပျက်ပါပြီ” လို့ညည်းညူခဲ့တယ်။ သင်လည်း စိတ်ပျက်တဲ့အခါ ပါးစပ်ကဖြစ်ဖြစ်၊ စိတ်ထဲကဖြစ်ဖြစ် ညည်းညူမိပါလိမ့်မယ်။ ဗာရုတ် ဘယ်လိုပဲ ညည်းညူပါစေ ယေဟောဝါ နားထောင်နေတယ်။ စိတ်နှလုံးကို စစ်ဆေးတဲ့အရှင် ဘုရားသခင်က ဗာရုတ် ဘာကြောင့် စိတ်ပျက်နေတယ်ဆိုတာ သိမြင်တဲ့အတွက် သူ့ကို ယေရမိကတစ်ဆင့် ကြင်နာစွာ တည့်မတ်ပေးခဲ့တယ်။ (ယေရမိ ၄၅:၁-၅ ကိုဖတ်ပါ။) ဗာရုတ် ဘာကြောင့် ဒီလောက် စိတ်ပျက်နေရတာလဲဆိုပြီး သင်စဉ်းစားမိပါလိမ့်မယ်။ သူရရှိတဲ့ တာဝန်ကြောင့်လား ဒါမှမဟုတ် တာဝန်ထမ်းဆောင်ချိန်မှာ ကြုံရတဲ့ အခြေအနေကြောင့်လား။ မဟုတ်ပါဘူး။ သူ့စိတ်နှလုံးကြောင့်ပါပဲ။ ဗာရုတ်က ‘ကြီးစွာသောအရာတို့ကို ရှာ’ နေတယ်။ ကြီးစွာသောအရာတွေဆိုတာ ဘာတွေလဲ။ သူက ယေဟောဝါရဲ့ အကြံဉာဏ်နဲ့ ညွှန်ကြားချက်ကို လက်ခံတဲ့အတွက် ဘုရားသခင်ရဲ့ဘယ်အာမခံချက်ကို ရရှိခဲ့သလဲ။ သူ့အတွေ့အကြုံကနေ ကျွန်တော်တို့ ဘာသင်ခန်းစာယူနိုင်သလဲ။
(ယေရမိ ၄၅:၅ခ) “‘လူအားလုံးအပေါ် ငါဘေးဆိုး ကျရောက်စေတော့မယ်။ ဒါပေမဲ့ မင်း ဘယ်သွားသွား မင်းအသက်ကို တိုက်ရာပါဥစ္စာလို ငါပေးမယ်’ လို့ ယေဟောဝါ ပြောတယ်။”
ပစ္စည်းဥစ္စာတွေကိုမဟုတ်ဘဲ နိုင်ငံတော်ကို ဦးစားထားပါ
၆ ပရောဖက်ယေရမိရဲ့ အတွင်းရေးမှူး ဗာရုတ်အကြောင်း စဉ်းစားကြည့်ပါ။ “ကြီးစွာသောအရာတို့ကို” ဗာရုတ် ရှာတဲ့အတွက် ယေဟောဝါ သတိပေးခဲ့တယ်။ ဂျေရုဆလင်မြို့ကို မကြာခင် ဖျက်ဆီးတော့မှာဖြစ်ပြီး ဗာရုတ်ရဲ့ အသက်ကိုပဲ ချမ်းသာပေးမယ်လို့ ကတိပေးခဲ့တယ်။ (ယေ. ၄၅:၁-၅) ဒီထက်ပိုပြီး ဗာရုတ် မမျှော်လင့်သင့်ဘူး။ လူတွေပိုင်ဆိုင်တဲ့ ပစ္စည်းဥစ္စာတွေကို ယေဟောဝါ ကယ်မှာမဟုတ်ဘူး။ (ယေ. ၂၀:၅) ဒီနေ့လည်း စာတန့်စနစ်အဆုံးပိုင်းမှာ ကျွန်တော်တို့ အသက်ရှင်နေတယ်။ အခုအချိန်ဟာ ကိုယ့်အတွက် ပစ္စည်းဥစ္စာတွေ ရှာဖွေစုဆောင်းရမယ့်အချိန် မဟုတ်ဘူး။ ကိုယ်တန်ဖိုးထားတဲ့ပစ္စည်းတွေကို ကြီးစွာသောဒုက္ခပြီးနောက်မှာလည်း ဆက်ပိုင်ဆိုင်နေဦးမယ်လို့ မမျှော်လင့်သင့်ဘူး။—သု. ၁၁:၄; မ. ၂၄:၂၁၊ ၂၂; လု. ၁၂:၁၅။
ရှာဖွေလေ့လာ ဘုရားရေးရာရတနာ
(ယေရမိ ၄၈:၁၃) အစ္စရေးအမျိုးက သူတို့ယုံကြည်အားထားတဲ့ ဗေသလကြောင့် အရှက်ကွဲရသလို မောဘလူတွေကလည်း ခေမုရှကြောင့် အရှက်ကွဲရကြလိမ့်မယ်။
it-1-E ၄၃၀
ခေမုရှ
ပရောဖက် ယေရမိက မောဘပြည် ဘေးဆိုးကြုံမယ့်အကြောင်း ကြိုဟောချက်ထဲမှာ မောဘပြည်ရဲ့ အဓိကဘုရား ခေမုရှအပါအဝင် သူ့ရဲ့ပုရောဟိတ်တွေ၊ မင်းသားမှူးမတ်တွေ ပြည်နှင်ခံရမယ့်အကြောင်း ဖော်ပြထားတယ်။ အစ္စရေး ဆယ်နွယ်နိုင်ငံဟာ နွားရုပ်ကိုးကွယ်မှုရဲ့ ဗဟိုဖြစ်တဲ့ ဗေသလကြောင့် အရှက်ကွဲရသလို မောဘလူမျိုးဟာလည်း လုပ်ဆောင်နိုင်စွမ်းမရှိတဲ့ သူတို့ရဲ့ဘုရားကြောင့် အရှက်ကွဲမှာဖြစ်တယ်။—ယေ. ၄၈:၇၊ ၁၃၊ ၄၆။
(ယေရမိ ၄၈:၄၂) “‘မောဘဟာ ယေဟောဝါထက် ကိုယ့်ကိုယ်ကိုယ် ချီးမြှောက်တဲ့အတွက် အမျိုးပြုတ်သွားအောင် ပယ်ရှင်းခံရမယ်။
it-2-E ၄၂၂ အပိုဒ် ၂
မောဘ
မောဘနဲ့ပတ်သက်တဲ့ ပရောဖက်ပြုချက်တွေ အမှန်တကယ် ပြည့်စုံခဲ့တယ်။ လွန်ခဲ့တဲ့ ရာစုနှစ်တွေကတည်းက မောဘလူမျိုးဆိုတာ မရှိတော့ဘူး။ (ယေ. ၄၈:၄၂) မောဘမြို့တွေဖြစ်တဲ့ နေဗော၊ ဟေရှဘုန်၊ အာရော်၊ ဗက်ဂမုလ၊ ဗာလမုန်မြို့တွေဟာ ဒီနေ့အချိန်မှာ အပျက်အယွင်းပုံတွေပဲ ရှိတော့တယ်။ တခြားမြို့ တော်တော်များများဟာ မရှိတော့ဘူး။
ကျမ်းစာဖတ်ရှုခြင်း
(ယေရမိ ၄၇:၁-၇) ဂါဇာမြို့ကို ဖာရော မတိုက်ခိုက်ခင် ဖိလိတိလူမျိုးတွေနဲ့ပတ်သက်တဲ့ ယေဟောဝါရဲ့စကားတော် ပရောဖက်ယေရမိဆီ ရောက်လာတယ်။ ၂ ယေဟောဝါ ပြောတာက-“မြောက်အရပ်ကနေ ရေတွေ စီးလာပြီး တောင်ကျချောင်းကြီး ဖြစ်သွားမယ်။ တိုင်းပြည်နဲ့ တိုင်းပြည်မှာရှိသမျှ၊ မြို့နဲ့ မြို့သားရှိသမျှ ရေလွှမ်းမိုးသွားလိမ့်မယ်။ လူတွေ အော်ဟစ်ကြလိမ့်မယ်။ ပြည်မှာနေထိုင်သူတိုင်း ငိုကြွေးမြည်တမ်းကြလိမ့်မယ်။ ၃ မြင်းထီးခွာသံ၊ စစ်မြင်းရထား တဂျုန်းဂျုန်းမြည်သံ၊ ရထားဘီးသံတွေကြောင့် ဖခင်တွေဟာ လက်ပျော့ခွေပြီး သားတွေကိုတောင် ပြန်လှည့်ကြည့်နိုင်မှာ မဟုတ်ဘူး။ ၄ ဖိလိတိလူတွေကို ဖျက်ဆီးမယ့်နေ့ ရောက်လာတော့မယ်။ တိုင်ရာနဲ့ ဆိုင်ဒုန်မြို့မှာရှိတဲ့ မဟာမိတ် အကြွင်းအကျန်တွေကို ပယ်ရှင်းမယ်။ ကတ္တောရကျွန်းမှာရှိတဲ့ ဖိလိတိလူ အကြွင်းအကျန်တွေကို ယေဟောဝါ ဖျက်ဆီးမယ်။ ၅ ဂါဇာမြို့ ခေါင်းပြောင်သွားလိမ့်မယ်။ အာရှကေလုန်မြို့ နှုတ်ဆိတ်သွားလိမ့်မယ်။ ချိုင့်ဝှမ်းလွင်ပြင်မှာ ကျန်ကြွင်းသူတို့၊ ကိုယ့်အသားကို ဘယ်အချိန်အထိ မွှန်းနေမှာလဲ။ ၆ အို ယေဟောဝါရဲ့ဓား၊ ဘယ်အချိန်အထိ အငြိမ်မနေနိုင်ဘဲ ဖြစ်နေမှာလဲ။ ဓားအိမ်ထဲ ပြန်ဝင်ပါတော့။ အနားယူပြီး တိတ်တိတ်နေပါတော့။ ၇ ယေဟောဝါ အမိန့်ပေးထားမှတော့ ဘယ်လိုလုပ်ပြီး ငြိမ်ငြိမ်နေနိုင်မှာလဲ။ အာရှကေလုန်နဲ့ ပင်လယ်ကမ်းရိုးတန်းကို တိုက်ဖို့ သူ့ကို ငါခန့်ထားတယ်။”
မေ ၂၉–ဇွန် ၄
ကျမ်းစာထဲက အဖိုးတန်ဘဏ္ဍာများ | ယေရမိ ၄၉-၅၀
“စိတ်နှိမ့်ချသူကို ယေဟောဝါ ကောင်းချီးပေး၊ ထောင်လွှားသူကို အပြစ်ပေး”
(ယေရမိ ၅၀:၄-၇) ယေဟောဝါ ပြောမယ်– “အဲဒီနေ့ရက်ကာလရောက်ရင် အစ္စရေးလူတွေနဲ့ ယုဒလူတွေ အတူလာကြလိမ့်မယ်။ ငိုကြွေးရင်းနဲ့ လျှောက်လာပြီး သူတို့ရဲ့ဘုရား ယေဟောဝါကို ရှာကြလိမ့်မယ်။ ၅ ဇိအုန်ဘက် သွားတဲ့လမ်းကို မေးကြမယ်။ အဲဒီဘက်ကို သွားနေရင်း ‘လာကြ။ မေ့လျော့မခံရမယ့် ထာဝရပဋိညာဉ်ကတစ်ဆင့် ယေဟောဝါဘုရားနဲ့ ပူးပေါင်းကြစို့’ လို့ ပြောကြတယ်။ ၆ ငါ့လူတွေဟာ ပျောက်တဲ့သိုးတွေ ဖြစ်နေပြီ။ သိုးထိန်းတွေကြောင့် လမ်းလွဲကုန်ပြီ။ တောင်တန်းတစ်ခုပြီးတစ်ခု လှည့်လည်ပြီး လမ်းပျောက်ကုန်ပြီ။ ကိုယ်နားခိုတဲ့နေရာကို မေ့သွားကြပြီ။ ၇ တွေ့တဲ့သူတွေက သူတို့ကို စားပစ်ကြတယ်။ ရန်သူတွေက ‘ယေဟောဝါကို သူတို့ ပြစ်မှားကြတာကိုး။ ဖြောင့်မတ်ခြင်းတည်ရာ၊ ဘိုးဘေးတွေရဲ့ မျှော်လင့်ရာဖြစ်တဲ့ ယေဟောဝါကို ပြစ်မှားခဲ့တာကိုး။ ဒါကြောင့် ငါတို့ အပြစ်မရှိဘူး’ လို့ ပြောကြတယ်။”
(ယေရမိ ၅၀:၂၉-၃၂) ဗာဗုလုန်ကို တိုက်ဖို့ လေးသမားတွေ၊ လေးသည်တော်တွေကို ဆင့်ခေါ်ကြ။ သူ့ပတ်လည်မှာ စခန်းချပါ။ တစ်ယောက်မှ မလွတ်စေနဲ့။ သူ့လုပ်ရပ်အတိုင်း ပြန်ဆပ်ပေးကြ။ သူလုပ်ခဲ့တဲ့အတိုင်း ပြန်လုပ်ကြ။ သူက အစ္စရေးတို့ရဲ့ သန့်ရှင်းတဲ့အရှင် ယေဟောဝါကို ထောင်လွှားတဲ့စိတ်နဲ့ ပြစ်မှားခဲ့ပြီ။ ၃၀ လူထုရင်ပြင်တွေမှာ လူငယ်တွေ ကျဆုံးသွားလိမ့်မယ်။ အဲဒီနေ့မှာ စစ်သူရဲတွေ သေဆုံးသွားလိမ့်မယ်။” ဒါဟာ ယေဟောဝါပြောတဲ့ စကားပဲ။ ၃၁ အချုပ်အခြာအာဏာပိုင်ရှင်၊ ဗိုလ်ခြေတို့ရဲ့အရှင် ယေဟောဝါက “အို ဖီဆန်တတ်တဲ့သူ၊ မင်းကို ငါတိုက်ခိုက်မယ်။ မင်းကို ဒဏ်ပေးမယ့်နေ့၊ ဒဏ်ပေးမယ့်အချိန် ရောက်လာမယ်။ ၃၂ ဖီဆန်တတ်တဲ့သူ၊ မင်းဟာ တိုက်မိပြီး လဲကျသွားလိမ့်မယ်။ ပြန်ထူမယ့်သူ ရှိမှာမဟုတ်ဘူး။ မင်းရဲ့မြို့တွေကို ငါမီးရှို့မယ်။ မင်းရဲ့ပတ်လည်မှာ ရှိသမျှကို မီးလောင်သွားလိမ့်မယ်” လို့ပြောတယ်။
it-1-E ၅၄
ရန်သူ
ဘုရားသခင့်လူမျိုး သစ္စာမဲ့တဲ့အခါ ဘုရားသခင်က ရန်သူတွေ သူတို့ကို တိုက်ခိုက်သိမ်းပိုက်ဖို့ ခွင့်ပြုခဲ့တယ်။ (ဆာ. ၈၉:၄၂။ မြည်. ၁:၅၊ ၇၊ ၁၀၊ ၁၇။ ၂:၁၇။ ၄:၁၂) ဒါပေမဲ့ ရန်သူတွေက အဲဒီလိုအောင်မြင်တာကို ကိုယ့်ရဲ့အစွမ်းအစကြောင့်လို့ အမွမ်းတင်ကြ၊ သူတို့ရဲ့ဘုရားတွေကို ဂုဏ်တင်ကြပြီး ယေဟောဝါရဲ့လူမျိုးကို ဆက်ဆံပုံအတိုင်း ပြန်တရားစီရင်ခံရမှာ မဟုတ်ဘူးလို့ ယူမှတ်ခဲ့ကြတယ်။ (တရား. ၃၂:၂၇။ ယေ. ၅၀:၇) ဒါကြောင့် ယေဟောဝါက ဒီလိုမာနကြီး၊ ထောင်လွှားတဲ့ ရန်သူတွေကို နှိမ့်ချခဲ့တယ်။ (ဟေရှာ. ၁:၂၄။ ၂၆:၁၁။ ၅၉:၁၈။ နာ. ၁:၂) အဲဒီလိုလုပ်တာကလည်း ကိုယ်တော်ရဲ့ သန့်ရှင်းတဲ့ နာမတော်အတွက် ဖြစ်တယ်။—ဟေရှာ. ၆၄:၂။ ယေဇ. ၃၆:၂၁-၂၄။
(ယေရမိ ၅၀:၃၈၊ ၃၉) သူ့ရဲ့ရေတွေ ပျက်စီးယိုယွင်းပြီး ခန်းခြောက်သွားမယ်။ တိုင်းပြည်မှာ ရုပ်တုတွေ ပြည့်နေတယ်။ ပြည်သားတွေဟာ ကြောက်စရာ စိတ်အာရုံတွေကြောင့် ရူးကြောင်ကြောင် ပြုမူနေကြတယ်။ ၃၉ ဒါကြောင့် သဲကန္တာရတိရစ္ဆာန်တွေနဲ့ အူတတ်တဲ့ တိရစ္ဆာန်တွေ အတူနေထိုင်လိမ့်မယ်။ ငှက်ကုလားအုတ်တွေလည်း အဲဒီမှာ နေလိမ့်မယ်။ လူတွေ နေထိုင်တော့မှာ မဟုတ်ဘူး။ နောင်လာနောက်သားအဆက်ဆက် လူနေထိုင်ရာဖြစ်တော့မှာ မဟုတ်ဘူး။”
“ယေဟောဝါသည် ကြံစည်သောအမှုကို ပြုတော်မူပြီ”
၁၅ အီဂျစ်ကိုအနိုင်ရတဲ့ ဗာဗုလုန်ရဲ့ဇာတ်သိမ်းကိုလည်း ယေရမိ ပရောဖက်ပြုခဲ့တယ်။ ယေရမိက ဗာဗုလုန်ရုတ်တရက်ကျဆုံးသွားမယ်ဆိုတာကို အနှစ်တစ်ရာကြိုပြီး အတိအကျဟောခဲ့တယ်။ ဘယ်လိုနည်းနဲ့ ရုတ်တရက်ကျဆုံးမှာလဲ။ မြို့ကိုကာကွယ်ပေးတဲ့ကျုံးရေတွေ “ခန်းခြောက်” သွားမယ်၊ စစ်သူရဲတွေကလည်း ပြန်တိုက်ခိုက်မှာမဟုတ်ဘူးဆိုပြီး ယေရမိ ကြိုဟောခဲ့တယ်။ (ယေ. ၅၀:၃၈; ၅၁:၃၀) အဲဒီအတိုင်း အတိအကျ ပြည့်စုံခဲ့တယ်။ မီဒီးယားနဲ့ပါးရှားတွေက ယူဖရေးတီးမြစ်ရေကို လွှဲလိုက်တယ်။ မြစ်ကြမ်းပြင်ကို ဖြတ်ပြီး မြို့ထဲဝင်လာတယ်။ ပြီးတော့ ဗာဗုလုန်တွေကို အလစ်မှာ ဝင်တိုက်ခိုက်တယ်။ မြို့က လူသူကင်းမဲ့တဲ့နေရာ ဖြစ်သွားမယ်ဆိုတဲ့ ကြေညာချက်ကလည်း ထူးခြားပါတယ်။ (ယေ. ၅၀:၃၉; ၅၁:၂၆) တစ်ချိန်က အင်အားကြီးဗာဗုလုန်ဟာ ဒီနေ့အထိ လူသူကင်းမဲ့နေတာက ဘုရားသခင့်ပရောဖက်ပြုချက်ရဲ့တိကျမှုကို သက်သေထူနေတယ်။
ဘုရားသခင့်ထံတော်မှ စာအုပ်တစ်အုပ်
၂၀ ဗာဗုလုန်မြို့ လူဆိတ်ညံရာဖြစ်သွားခြင်းကို ဟေရှာယ လုံးဝမြင်မသွားခဲ့ရပါ။ သို့သော် ပရောဖက်ပြုချက်သည် မှန်ကန်ပြီး ဗာဗုလုန်သည် နောက်ဆုံးတွင် “ကျောက်ပုံများ” သာဖြစ်သွားတော့သည်။ (ယေရမိ ၅၁:၃၇၊ ကဘ) ဟေဗြဲကျမ်းဂန်ပညာရှင် ဂျရုမ်း (စီ.အီး. စတုတ္ထရာစုတွင်မွေးဖွားခဲ့) ၏အဆိုအရ သူ့အချိန်တွင် ဗာဗုလုန်သည် “သားရဲမျိုးစုံ” ကျက်စားရာ အမဲလိုက်ကွင်းတစ်ခု ဖြစ်ခဲ့သည်။ ယင်းသည် ယနေ့အချိန်အထိ လူသူဆိတ်ညံရာအရပ်ဖြစ်နေသည်။ ကမ္ဘာလှည့်ခရီးသည်များအတွက် ဆွဲဆောင်မှုတစ်ခုအဖြစ် ဗာဗုလုန်ကို တစ်နည်းနည်းဖြင့် ပြန်ပြုပြင်ခြင်းက ဧည့်သည်များကို ဆွဲဆောင်နိုင်ကောင်းသော်လည်း ဟေရှာယ ကြိုတင်ဟောခဲ့သကဲ့သို့ ဗာဗုလုန်၏ “သားမြေး” တို့မူကား ထာဝစဉ် ပျောက်ကွယ်သွားလေပြီ။—ဟေရှာယ ၁၄:၂၂။
ရှာဖွေလေ့လာ ဘုရားရေးရာရတနာ
(ယေရမိ ၄၉:၁၊ ၂) “အစ္စရေးမှာ သားတွေ မရှိဘူးလား။ အမွေဆက်ခံမယ့်သူ မရှိဘူးလား။ မာလကုံက ဂဒ်နယ်မြေကို ဘာလို့ သိမ်းပိုက်ထားတာလဲ။ သူ့လူတွေက အစ္စရေးရဲ့မြို့တွေမှာ ဘာလို့ နေထိုင်နေတာလဲ။” ၂ “ငါယေဟောဝါ ပြောမယ်– ‘ဒါကြောင့် အမ္မုန်လူတွေရဲ့ ရဗာမြို့ကို စစ်တိုက်ဖို့ အချက်ပေးသံ ထွက်ပေါ်စေမယ့်နေ့တွေ ရောက်တော့မယ်။ အဲဒီမြို့ဟာ လူသူကင်းမဲ့ရာကုန်း ဖြစ်သွားလိမ့်မယ်။ မြို့ငယ်တွေ မီးရှို့ခံရလိမ့်မယ်။’ ‘အစ္စရေးက သူ့ကိုသိမ်းပိုက်ခဲ့သူတွေကို ပြန်သိမ်းပိုက်လိမ့်မယ်’ လို့ယေဟောဝါ ပြောတယ်။
it-1-E ၉၄ အပိုဒ် ၆
အမ္မုန်လူမျိုး
တိဂလတ် ပိလေသာ ၃ နဲ့ သူ့ကိုဆက်ခံသူ တစ်ယောက်က မြောက်ပိုင်းအစ္စရေးပြည်သားတွေကို ဖမ်းခေါ်သွားပြီးနောက်ပိုင်းမှာ (၂ ဘု. ၁၅:၂၉။ ၁၇:၆) အမ္မုန်လူမျိုးတွေဟာ ယေဖသနဲ့ တိုက်ခိုက်တုန်းက မအောင်မြင်ခဲ့တဲ့ ဂဒ်နယ်မြေကို စတင်သိမ်းပိုက်ပုံရတယ်။ (ဆာ. ၈၃:၄-၈ နဲ့နှိုင်းယှဉ်ပါ။) ဒါကြောင့် ယေဟောဝါက ယေရမိကနေတစ်ဆင့် ပရောဖက်ပြုစကားတွေထဲမှာ ဂဒ်နယ်မြေကို အမ္မုန်လူမျိုး သိမ်းပိုက်တဲ့အတွက် အပြစ်တင်ထားပြီး အမ္မုန်ပြည်နဲ့ သူတို့ရဲ့ဘုရား မာလကုံ (မိလကုံ) ပျက်စီးမယ့်အကြောင်း သတိပေးထားတယ်။ (ယေ. ၄၉:၁-၅) ဒါတောင် ယုဒနိုင်ငံ အဆုံးသတ်ခါနီး ယောယကိမ်မင်းလက်ထက်မှာ အမ္မုန်လူမျိုးတွေဟာ ယုဒလူတွေကို နှောင့်ယှက်ဖို့ တိုက်ခိုက်လုယက်တဲ့ အဖွဲ့တွေကို စေလွှတ်ခဲ့တယ်။—၂ ဘု. ၂၄:၂၊ ၃။
(ယေရမိ ၄၉:၁၇၊ ၁၈) “ဧဒုံဟာ ကြောက်လန့်စရာ ဖြစ်သွားမယ်။ ဖြတ်သန်းသွားလာသူတိုင်းက သူခံရတဲ့ကပ်ဘေးကြောင့် ကြောက်အားလန့်အား ကြည့်ပြီး လှောင်ပြောင်ကြလိမ့်မယ်။ ၁၈ သောဒုံ၊ ဂေါမောရနဲ့ အိမ်နီးချင်းမြို့တွေ ဖျက်ဆီးခံလိုက်ရသလို ဧဒုံပြည်လည်း ဖျက်ဆီးခံရလိမ့်မယ်။ လူတစ်ယောက်မှ ကျန်မှာ မဟုတ်ဘူး။ အခြေချနေထိုင်သူ ရှိတော့မှာ မဟုတ်ဘူး။” ဒါဟာ ယေဟောဝါပြောတဲ့ စကားပဲ။
‘ယေဟောဝါသည် ကြံစည်သောအမှုကို ပြုတော်မူပြီ’
၁၈ နောက်ပရောဖက်ပြုချက်တစ်ခုက အေဒီပထမရာစုမှာ ပြည့်စုံခဲ့တယ်။ ဗာဗုလုန်တွေရဲ့တိုက်ခိုက်ကျူးကျော်မှုခံရတဲ့ နိုင်ငံတွေထဲမှာ ဧဒုံပြည်လည်းပါမယ်ဆိုပြီး ယေရမိကတစ်ဆင့် ဘုရားသခင်ကြိုဟောခဲ့တယ်။ (ယေ. ၂၅:၁၅-၁၇၊ ၂၁; ၂၇:၁-၇) ဒါပေမဲ့ အဲဒီလောက်ပဲ ကြိုဟောခဲ့တာမဟုတ်ဘူး။ ဧဒုံပြည်ဟာ သောဒုံနဲ့ဂေါမောရ မြို့လိုဖြစ်သွားလိမ့်မယ်ဆိုပြီး ပြောခဲ့တယ်။ လူသူကင်းမဲ့ပြီး လုံးဝပျောက်ကွယ်သွားမယ် ဆိုတဲ့ အဓိပ္ပာယ်ပဲ။ (ယေ. ၄၉:၇-၁၀၊ ၁၇၊ ၁၈) အဲဒီအတိုင်း ဖြစ်ခဲ့တယ်။ ဒီနေ့ခေတ်မှာ ဧဒုံပြည်နဲ့ ဧဒုံလူမျိုးဆိုတဲ့ နာမည်တွေကို ဘယ်မှာရှာတွေ့နိုင်မယ်လို့ သင်ထင်သလဲ။ ခေတ်သစ်မြေပုံတွေထဲမှာလား။ မဟုတ်ပါဘူး။ အဲဒီနာမည်တွေကို ရှေးဟောင်းစာအုပ်တွေနဲ့ ကျမ်းစာသမိုင်းကြောင်းစာအုပ်တွေ ဒါမှမဟုတ် ရှေးခေတ်မြေပုံတွေထဲမှာပဲ တွေ့နိုင်တယ်။ ဘီစီဒုတိယရာစုနှစ်မှာ ဧဒုံလူမျိုးက ဂျူးဘာသာထဲ သွတ်သွင်းခံခဲ့ရတယ်လို့ ဖလေးဗီးယပ်စ်ဂျိုစီဖတ်စ် မှတ်တမ်းတင်ခဲ့တယ်။ အဲဒီနောက် အေဒီ ၇၀ မှာ ဂျေရုဆလင်ဖျက်ဆီးခံရတဲ့အခါ ဧဒုံလူမျိုးလည်း ကမ္ဘာ့ဇာတ်ခုံပေါ်ကနေ ပျောက်ကွယ်သွားတော့တယ်။
ယေဟောဝါသည် ကိုယ်တော်တိုင်အတွက် တင့်တယ်သောဘွဲ့နာမတစ်ခု ပေးတော်မူ၏
၆ သို့သော်၊ ယေဟောဝါသည် အဘယ်ကြောင့် ဧဒုံတိုက်ပွဲမှ ပြန်လာနေသနည်း။ ဘိုးဘေး,ဧသောအချိန်မှစ၍ အစဉ်မပြတ်ရန်သူဖြစ်သော ဧဒုံလူမျိုးတို့သည် ဘုရားသခင်နှင့် ပဋိညာဉ်ဖွဲ့ထားသောလူမျိုး၏ ရန်သူဟောင်းကြီးဖြစ်သည်။ (ကမ္ဘာဦး ၂၅:၂၄-၃၄; တောလည်ရာ ၂၀:၁၄-၂၁) ယေရုရှလင်မြို့ ဖျက်ဆီးခံရချိန်တွင် ဧဒုံလူမျိုးများက ဗာဗုလုန်စစ်သားများအား အားပေးအားမြှောက်ပြုခဲ့ခြင်းဖြင့် ယုဒလူတို့အပေါ် ဧဒုံလူမျိုး၏ မုန်းတီးခြင်းအတိမ်အနက်သည် အထူးထင်ရှားလာသည်။ (ဆာလံ ၁၃၇:၇) ယေဟောဝါသည် ထိုကဲ့သို့သော ရန်လိုမုန်းတီးမှုကို မိမိကိုယ်တိုင်အား ထိပါးစော်ကားခြင်းအဖြစ် သဘောထားတော်မူသည်။ ထို့ကြောင့် ကိုယ်တော်သည် ဧဒုံအပေါ် မိမိ၏လက်စားချေသည့် ဓားတော်ကို လွှတ်လိုက်ရန် ဆုံးဖြတ်ခဲ့ခြင်းသည် အံ့အားသင့်စရာမဟုတ်ပါ။—ဟေရှာယ ၃၄:၅-၁၅; ယေရမိ ၄၉:၇-၂၂။
ကျမ်းစာဖတ်ရှုခြင်း
(ယေရမိ ၅၀:၁-၁၀) ဗာဗုလုန်နဲ့ပတ်သက်ပြီး၊ ခါလဒဲပြည်နဲ့ပတ်သက်ပြီး ပရောဖက် ယေရမိကတစ်ဆင့် ယေဟောဝါ ပြောတယ်– ၂ “ဒီအကြောင်းကို လူမျိုးတွေအလယ်မှာ ကြေညာကြ။ ကြွေးကြော်ကြ။ အလံစိုက်ထူပြီး ကြွေးကြော်ကြ။ ဘာမှ ထိမ်ချန်မထားနဲ့။ ‘ဗာဗုလုန် သိမ်းပိုက်ခံရပြီ။ ဗေလ အရှက်ကွဲသွားပြီ။ မေရောဒပ် ထိတ်လန့်သွားပြီ။ သူ့ဆင်းတုတွေ အရှက်ကွဲသွားပြီ။ ရွံမုန်းဖွယ်ရုပ်တုတွေ ထိတ်လန့်သွားပြီ’ လို့ပြောကြ။ ၃ သူ့ကိုတိုက်ဖို့ မြောက်အရပ်ကနေ လူမျိုးတစ်မျိုး လာနေတယ်။ သူ့ပြည်ကို ကြောက်လန့်စရာ ဖြစ်စေတယ်။ အဲဒီပြည်မှာ နေထိုင်သူတစ်ယောက်မှ မရှိတော့ဘူး။ လူတွေရော တိရစ္ဆာန်တွေပါ ထွက်ပြေးကုန်ပြီ။ မရှိကြတော့ဘူး။” ၄ ယေဟောဝါ ပြောမယ်– “အဲဒီနေ့ရက်ကာလရောက်ရင် အစ္စရေးလူတွေနဲ့ ယုဒလူတွေ အတူလာကြလိမ့်မယ်။ ငိုကြွေးရင်းနဲ့ လျှောက်လာပြီး သူတို့ရဲ့ဘုရား ယေဟောဝါကို ရှာကြလိမ့်မယ်။ ၅ ဇိအုန်ဘက် သွားတဲ့လမ်းကို မေးကြမယ်။ အဲဒီဘက်ကို သွားနေရင်း ‘လာကြ။ မေ့လျော့မခံရမယ့် ထာဝရပဋိညာဉ်ကတစ်ဆင့် ယေဟောဝါဘုရားနဲ့ ပူးပေါင်းကြစို့’ လို့ ပြောကြတယ်။ ၆ ငါ့လူတွေဟာ ပျောက်တဲ့သိုးတွေ ဖြစ်နေပြီ။ သိုးထိန်းတွေကြောင့် လမ်းလွဲကုန်ပြီ။ တောင်တန်းတစ်ခုပြီးတစ်ခု လှည့်လည်ပြီး လမ်းပျောက်ကုန်ပြီ။ ကိုယ်နားခိုတဲ့နေရာကို မေ့သွားကြပြီ။ ၇ တွေ့တဲ့သူတွေက သူတို့ကို စားပစ်ကြတယ်။ ရန်သူတွေက ‘ယေဟောဝါကို သူတို့ ပြစ်မှားကြတာကိုး။ ဖြောင့်မတ်ခြင်းတည်ရာ၊ ဘိုးဘေးတွေရဲ့ မျှော်လင့်ရာဖြစ်တဲ့ ယေဟောဝါကို ပြစ်မှားခဲ့တာကိုး။ ဒါကြောင့် ငါတို့ အပြစ်မရှိဘူး’ လို့ ပြောကြတယ်။” ၈ “ဗာဗုလုန်ကနေ ထွက်ပြေးကြ။ ခါလဒဲလူတွေရဲ့ပြည်ကနေ ထွက်သွားကြ။ သိုးအုပ်ရှေ့ကနေ ဦးဆုံးထွက်တဲ့သိုးတွေလို ဖြစ်ကြပါ။ ၉ ဗာဗုလုန်ကိုတိုက်ဖို့ လူမျိုးကြီးတွေရဲ့ တပ်ပေါင်းစုကို မြောက်အရပ်မှာရှိတဲ့ ပြည်ကနေ ငါပေါ်ထွန်းစေပြီး ခေါ်လာမယ်။ သူ့ကို စစ်ခင်းကြလိမ့်မယ်။ သူ သိမ်းပိုက်ခံရမယ်။ သူတို့ရဲ့မြားတွေဟာ စစ်သူရဲမြားတွေလိုပဲ။ သားသမီးတွေကို သေဆုံးစေတယ်။ ပစ်မှတ်ကို မထိမှန်ဘဲ မနေဘူး။ ၁၀ ခါလဒဲဟာ တိုက်ရာပါဥစ္စာ ဖြစ်သွားမယ်။ လုယူသူတွေ အကျေနပ်ကြီး ကျေနပ်နေကြမယ်။” ဒါဟာ ယေဟောဝါ ပြောတဲ့စကားပဲ။