ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
စက်တင်ဘာ ၆–၁၂
ကျမ်းစာထဲက အဖိုးတန်ဘဏ္ဍာများ | တရားဟောရာ ၃၃–၃၄
“ယေဟောဝါရဲ့ ‘ထာဝရလက်ရုံး’ မှာ ခိုလှုံပါ”
it-2 ၅၁
ယေရှုရုန်
အစ္စရေးရဲ့ ဂုဏ်ပုဒ်။ ဂရိ စက်ပ်တွားဂျင့်ကျမ်း မှာ “ယေရှုရုန်” ကို “ချစ်ရသူ” လို့ ပြန်ဆိုထားတယ်။ ဒါက ချစ်စနိုးခေါ်တဲ့ အသုံးအနှုန်း ဖြစ်တယ်။ “ယေရှုရုန်” ဆိုတဲ့ ဂုဏ်ပုဒ်က အစ္စရေးတွေဟာ ယေဟောဝါနဲ့ ပဋိညာဉ် ဖွဲ့ထားတဲ့ လူမျိုး ဖြစ်တယ်ဆိုတာကို သတိရစေသင့်တယ်။ ဒါကြောင့် ရိုးဖြောင့်သူဖြစ်ဖို့ တာဝန် ရှိတယ်။ (တရ ၃၃:၅၊ ၂၆။ ရှာ ၄၄:၂) တရားဟောရာ ၃၂:၁၅ မှာကျတော့ ယေရှုရုန်လို့ခေါ်တာက ရွဲ့ပြီး ခေါ်တာ။ အစ္စရေးတွေဟာ နာမည်နဲ့ ညီအောင် အသက်ရှင်မယ့်အစား ခေါင်းမာမာနဲ့ ဖန်ဆင်းရှင်၊ ကယ်တင်ရှင်ကို စွန့်ပြီး မထီလေးစား လုပ်ခဲ့တယ်။
ထရပ်ဖို့ အကူအညီ
ယေဟောဝါမှာ အစွမ်းတန်ခိုး ရှိတဲ့အပြင် မိမိလူမျိုး အကျိုးအတွက် အစွမ်းတန်ခိုး အသုံးပြုချင်တဲ့ ဆန္ဒလည်း ရှိကြောင်း ယေဇကျေလခေတ် မတိုင်ခင် ရာစုနှစ်များစွာက ပရောဖက် မောရှေ ဖော်ပြခဲ့တာကို သတိရနိုင်ပါတယ်။ “ဘုရားသခင်ဟာ ရှေးကတည်းက ခိုလှုံရာပဲ။ ထာဝရ လက်ရုံးတော်က မင်းကို ထောက်မပေးတယ်” ဆိုပြီး မောရှေ ရေးသားခဲ့တယ်။ (တရား. ၃၃:၂၇) မှန်ပါတယ်၊ စိတ်သောကရောက်ချိန်တွေမှာ ယေဟောဝါဘုရားကို အားကိုးမယ်ဆိုရင် မေတ္တာပါတဲ့ လက်ရုံးတော်နဲ့ ကျွန်တော်တို့ကို ထောက်မပေးမယ်၊ ညင်သာစွာ ထူမပေးမယ်၊ ထရပ်နိုင်ဖို့ ကူညီပေးမယ်ဆိုတာ စိတ်ချနိုင်ပါတယ်။—ယေဇ. ၃၇:၁၀။
အသက်ပြေးပွဲကို ခံနိုင်ရည်ရှိစွာ ပြေးကြစို့
၁၆ အာဗြဟံလိုပဲ မောရှေလည်း အသက်ရှင်ချိန်မှာ ဘုရားသခင့် ကတိတော် ပြည့်စုံတာကို မတွေ့ခဲ့ရဘူး။ အစ္စရေးလူမျိုး ကတိထားရာပြည်ကို မဝင်ခင်လေးမှာ ဘုရားသခင်က မောရှေကို ဒီလိုပြောခဲ့တယ်– ‘အစ္စရေးအမျိုးသားတို့အား ငါ ပေးသော ပြည်ကို သင်သည် ကိုယ်မျက်စိနှင့် မြင်ရသော်လည်း ထိုပြည်သို့ မဝင်စားရ။’ အကြောင်းကတော့ အစောပိုင်းတုန်းက မောရှေနဲ့ အာရုန်ဟာ လူတွေရဲ့ ပုန်ကန်မှုကြောင့် ဒေါသထွက်ပြီး ‘အစ္စရေး အမျိုးသားတို့ရှေ့မှာ ဘုရားသခင်ကို မရိုမသေပြု၍ ပြစ်မှား’ ခဲ့ကြလို့ပဲ။ (တရား. ၃၂:၅၁၊ ၅၂) ဒီအတွက်ကြောင့် မောရှေ မကျေမနပ် ဖြစ်ပြီး နာကြည်းခဲ့သလား။ မဖြစ်ခဲ့ဘူး။ ဒီအချက်ကို အစ္စရေးလူတွေကို ပြောတဲ့ ဒီစကားတွေအရ သိရတယ်– ‘အို အစ္စရေးအမျိုး၊ သင်သည် မင်္ဂလာရှိ၏။ ယေဟောဝါ ကယ်တင်တော်မူသော အမျိုး၊ သင်နှင့် အဘယ်သူ တူသနည်း။ ထိုဘုရားသခင်သည် သင့်ကို ကွယ်ကာသော ဒိုင်းလွှား၊ သင့်ကို ချီးမြှောက်သော ဓားလက်နက် ဖြစ်တော်မူ၏။’—တရား. ၃၃:၂၉။
ဘုရားရေးရာ ရတနာ
it-2 ၄၃၉ ပိုဒ်. ၃
မောရှေ
မောရှေ သေဆုံးတဲ့အချိန်မှာ အသက် ၁၂၀ ရှိပြီ။ သူ့ရဲ့ အစွမ်းခွန်အားနဲ့ပတ်သက်ပြီး ကျမ်းစာက ဒီလိုဆိုတယ်– “မျက်စိ မမှုန်သေးဘူး။ ခွန်အားလည်း မလျော့သေးဘူး။” သူ့သင်္ချိုင်းဂူ ဘယ်မှာ ရှိမှန်း ယေဟောဝါ မဖော်ပြခဲ့ဘူး။ (တရ ၃၄:၅-၇) အဲဒါက သူ့ရဲ့ သင်္ချိုင်းဂူကို အစ္စရေးတွေ ဗိမာန်ဆောက်ပြီး ဓာတ်တော်၊ မွေတော်အဖြစ် ဝတ်ပြုကိုးကွယ်မှာ စိုးလို့ ဖြစ်ပုံရတယ်။ မောရှေရဲ့ အလောင်းကို မာရ်နတ် အဲဒီလို အသုံးပြုချင်မှန်း ထင်ရှားတယ်။ ယေရှုခရစ်ရဲ့ ညီ ခရစ်ယာန်တပည့် ယုဒ ဒီလို ရေးခဲ့တယ်– “ကောင်းကင်တမန်မင်း မိက္ခေလကတော့ မောရှေရဲ့ အလောင်းနဲ့ပတ်သက်ပြီး မာရ်နတ်နဲ့ ငြင်းခုံတဲ့အခါ ရင့်သီးတဲ့ စကားနဲ့ မစီရင်ဝံ့ဘဲ ‘မင်းကို ယေဟောဝါ ဘုရား ဆုံးမပါစေ’ လို့ပဲ ပြောခဲ့တယ်။” (ယု ၉) အစ္စရေးတွေကို ယောရှု ဦးဆောင်ပြီး ခါနန်ပြည်ထဲ မဝင်ခင် မောရှေအတွက် ရက်ပေါင်း ၃၀ ငိုကြွေးကြတယ်။—တရ ၃၄:၈။
စက်တင်ဘာ ၁၃-၁၉
ကျမ်းစာထဲက အဖိုးတန်ဘဏ္ဍာများ | ယောရှု ၁–၂
“ဘဝလမ်းခရီး အောင်မြင်နိုင်ပုံ”
သတ္တိရှိပါ—ယေဟောဝါ သင်နဲ့အတူရှိ
၇ ဘုရားသခင့် အလိုတော်ကို ရဲစွမ်းသတ္တိရှိရှိ လုပ်ဆောင်ဖို့အတွက် ကိုယ်တော့်စကားတော် သမ္မာကျမ်းစာကို လေ့လာပြီး လက်တွေ့ကျင့်သုံးဖို့ လိုတယ်။ အဲဒါက မောရှေရဲ့ နေရာကို ယောရှု ဆက်ခံချိန်မှာ ယေဟောဝါ ပြောခဲ့တဲ့အချက် ဖြစ်တယ်– “သတ္တိသာရှိပါ။ အစွမ်းကုန် ခိုင်ခံ့မြဲမြံပါ။ သင့်ကို ငါ့ကျွန်မောရှေ မှာကြားတဲ့ ပညတ်အားလုံးအတိုင်း ဂရုတစိုက် လိုက်နာပါ။ . . . ဒီပညတ်ကျမ်းကို သင့်နှုတ်ကနေ မကွာစေရဘူး။ အဲဒီမှာ ရေးထားသမျှအတိုင်း ဂရုတစိုက် လိုက်နာနိုင်ဖို့ အဲဒါကို နေ့ညမပြတ် တီးတိုးဖတ်ရမယ်။ ဒါဆိုရင် သင့်ဘဝလမ်းခရီးမှာ အောင်မြင်ပြီး ပညာရှိရှိ လုပ်ဆောင်နိုင်လိမ့်မယ်။” (ယောရှု ၁:၇၊ ၈၊ ကဘ) ယောရှုဟာ အဲဒီအကြံပေးချက်အတိုင်း လိုက်နာခဲ့လို့ အောင်မြင်ခဲ့တယ်။ ကျွန်ုပ်တို့လည်း ယောရှုလို လုပ်ဆောင်မယ်ဆိုရင် ဘုရားသခင့် အမှုတော်ဆောင်ရာမှာ ရဲစွမ်းသတ္တိ ပိုရှိလာပြီး အောင်မြင်ပါလိမ့်မယ်။
သတ္တိရှိပါ—ယေဟောဝါ သင်နဲ့အတူရှိ
၂၀ ဒီဆိုးညစ်တဲ့ လောကမှာ ဘုရားသခင်ရဲ့ အလိုတော်အတိုင်း ဆက်လုပ်ဆောင်ဖို့ဆိုတာ မလွယ်ကူပါဘူး။ ဒါပေမဲ့ ကျွန်ုပ်တို့က တစ်ယောက်တည်း မဟုတ်ဘူး။ ဘုရားသခင် ကျွန်ုပ်တို့နဲ့ အတူရှိတယ်။ အသင်းတော်ရဲ့ ဦးခေါင်း ဖြစ်တဲ့ ဘုရားသခင့် သားတော် ယေရှုလည်း ကျွန်ုပ်တို့ကို ကူညီပေးနေပါတယ်။ ကမ္ဘာတစ်ဝန်းမှာ ယေဟောဝါသက်သေ ၇,၀၀၀,၀၀၀ ကျော်လည်း ရှိသေးတယ်။ ကျွန်ုပ်တို့အားလုံး ယုံကြည်ခြင်း ဆက်တင်ပြပြီး သတင်းကောင်း ဆက်ဟောပြောကြစို့။ အဲဒီလိုလုပ်ဆောင်ဖို့ ၂၀၁၃ ခုနှစ် နှစ်ချုပ်ကျမ်းချက်က ကျွန်ုပ်တို့ကို ကူညီပေးပါလိမ့်မယ်– ‘သတ္တိရှိပြီး ခိုင်ခံ့မြဲမြံပါ။ သင့်ဘုရားသခင် ယေဟောဝါက သင်နဲ့အတူ ရှိတယ်။’—ယောရှု ၁:၉၊ ကဘ။
ဘုရားရေးရာ ရတနာ
ယောရှုကျမ်းမှ ပေါ်လွင်ချက်များ
၂:၄၊ ၅—သူလျှိုများကို ရှာဖွေနေသော ဘုရင်၏ စစ်သည်များအား ရာခပ် အဘယ်ကြောင့် လှည့်စားခဲ့သနည်း။ ရာခပ်သည် ယေဟောဝါအား ယုံကြည်လာသောကြောင့် သူ၏ အသက်ကို စွန့်၍ သူလျှိုများကို ကာကွယ်ပေးခဲ့သည်။ ထို့ကြောင့် ဘုရားသခင်၏ လူမျိုးတော်ကို အန္တရာယ်ပြုရန် ကြိုးစားနေကြသူများအား သူလျှိုများ ရှိသောနေရာကို ပြောပြရမည့်တာဝန် သူ၌ မရှိပါ။ (မဿဲ ၇:၆; ၂၁:၂၃-၂၇: ယောဟန် ၇:၃-၁၀) အမှန်ဆိုရလျှင် ရာခပ်သည် မင်းအရာရှိများကို လမ်းလွှဲပေးလိုက်ခြင်း အပါအဝင် “အကျင့်အားဖြင့် ဖြောင့်မတ်ရာသို့ ရောက်” ခဲ့သည်။—ယာကုပ် ၂:၂၄-၂၆။
စက်တင်ဘာ ၂၀–၂၆
ကျမ်းစာထဲက အဖိုးတန်ဘဏ္ဍာများ | ယောရှု ၃–၅
“ယုံကြည်ခြင်းလုပ်ရပ်တွေကို ယေဟောဝါ ကောင်းချီးပေး”
it-2 ၁၀၅
ဂျော်ဒန်
များသောအားဖြင့် ဂါလိလဲအိုင် အောက်ဘက်ရှိ ဂျော်ဒန်မြစ်ကို ဆိုလိုတယ်။ အနက် ၃ ပေကနေ ၁၀ ရှိပြီး အကျယ် ပေ ၉၀၊ ၁၀၀ ခန့် ရှိတယ်။ ဒါပေမဲ့ နွေဦးမှာဆိုရင် ဂျော်ဒန်မြစ်က မြစ်ရေလျှံတဲ့အတွက် ပိုကျယ်ပြီး ပိုနက်သွားတယ်။ (ယရ ၃:၁၅) ရေကြီးတဲ့အချိန်မှာ အစ္စရေးလူမျိုး ဖြတ်ဖို့ သိပ်မလွယ်ဘူး၊ အန္တရာယ်ရှိတယ်။ အထူးသဖြင့် ယေရိခေါမြို့နားမှာ ပိုအန္တရာယ်ရှိတယ်။ ရေစီးသန်လို့ ရေကူးသူတွေ ရေစီးထဲ မျှောပါသွားတဲ့အချိန်တွေ ရှိခဲ့တယ်။ ဒါပေမဲ့ ယေဟောဝါက အံ့ဖွယ်နည်းနဲ့ လုပ်လိုက်တာ တာရိုးနဲ့ ပိတ်လိုက်သလို ရေတွေ တန့်သွားတယ်။ အစ္စရေးတွေက ခြောက်သွေ့တဲ့ မြစ်ကြမ်းပြင်ပေါ် ဖြတ်လျှောက်သွားကြတယ်။ (ယရ ၃:၁၄-၁၇) ရာစုနှစ်တွေ ကြာပြီး နောက်ပိုင်းမှာလည်း ဧလိယနဲ့ ဧလိရှဲ အတူ ဖြတ်ကူးတဲ့အခါ၊ ဧလိရှဲတစ်ယောက်တည်း ဖြတ်ကူးတဲ့အခါ အဲဒီလို အံ့ဖွယ်အမှုမျိုး ဖြစ်ခဲ့တယ်။—၂ဘု ၂:၇၊ ၈၊ ၁၃၊ ၁၄။
ယေဟောဝါရဲ့ သတိပေးချက်တွေက သင့်စိတ်နှလုံးကို ရွှင်လန်းစေ
၁၇ ယေဟောဝါအပေါ် ကျွန်ုပ်တို့ရဲ့ ယုံကြည်ကိုးစားမှုကို တည်ဆောက်ရာမှာ ကျွန်ုပ်တို့ရဲ့ ယုံကြည်ခြင်း လုပ်ရပ်တွေက ဘယ်လိုနည်းနဲ့ အထောက်အကူပြုသလဲ။ အစ္စရေးလူတွေ ကတိထားရာပြည်ထဲ ဝင်တဲ့အချိန်ကို ပြန်စဉ်းစားကြည့်ပါ။ ယေဟောဝါက ယဇ်ပုရောဟိတ်တွေကို ပဋိညာဉ်သေတ္တာ ထမ်းပြီး ယော်ဒန်မြစ်ကို ဖြတ်ကူးဖို့ မိန့်မှာထားတယ်။ ဒါပေမဲ့ သူတို့တွေ ယောဒန်မြစ် ကမ်းစပ်နား ရောက်တဲ့အခါမှာ နွေဦးမိုးကြောင့် ရေက နက်ပြီး ရေစီး အရမ်း သန်နေတာကို တွေ့ရတယ်။ အစ္စရေးလူတွေ ဘာလုပ်ကြမလဲ။ မြစ်ကမ်းနားမှာ စခန်းချပြီး ရေကျသွားတဲ့အထိ သီတင်းပတ်ပေါင်းများစွာ စောင့်နေမလား။ သူတို့ အဲဒီလို မလုပ်ခဲ့ကြဘူး။ သူတို့ ယေဟောဝါကို အပြည့်အဝ ယုံကြည်ကိုးစားပြီး ကိုယ်တော် ညွှန်ကြားတဲ့အတိုင်း လုပ်ခဲ့ကြတယ်။ ဘာအကျိုး ရခဲ့ကြသလဲ။ ကျမ်းစာမှာ ဒီလိုဖော်ပြထားတယ်– ‘ယဇ်ပုရောဟိတ် ခြေဖဝါးတို့သည် ယော်ဒန်မြစ်ရေကို နင်းသော ခဏချင်းတွင် မြစ်ညာရေသည် ပြတ်၍ လူများအပေါင်းတို့သည် ယော်ဒန်မြစ်တစ်ဖက်သို့ မရောက်မီတိုင်အောင် ယဇ်ပုရောဟိတ်တို့သည် မြစ်အလယ်တွင် မြေပေါ်၌ မြဲမြံစွာ နင်းကြ၏။’ (ယောရှု ၃:၁၂-၁၇) အရှိန်ပြင်းပြင်း စီးဆင်းနေတဲ့ရေတွေ ရပ်တန့်သွားတာကို အစ္စရေးလူတွေ မြင်လိုက်ရတဲ့အခါ ဘယ်လောက် ဝမ်းသာမလဲဆိုတာ စဉ်းစားကြည့်ပါ။ ယေဟောဝါအပေါ် ထားရှိတဲ့ သူတို့ရဲ့ ယုံကြည်ခြင်းက ပိုခိုင်ခံ့လာတယ်၊ အကြောင်းကတော့ သူတို့က ကိုယ်တော့် ညွှန်ကြားချက်ကို ယုံကြည်စိတ်ချစွာ လိုက်လျှောက်ခဲ့လို့ပဲ။
ယေဟောဝါရဲ့ သတိပေးချက်တွေက သင့်စိတ်နှလုံးကို ရွှင်လန်းစေ
၁၈ ယနေ့အချိန်မှာတော့ ယေဟောဝါဟာ မိမိရဲ့ ကျေးကျွန်တွေအတွက် အဲဒီလို အံ့ဩစရာတွေ မလုပ်တော့ဘူး။ ဒါပေမဲ့ ကျွန်ုပ်တို့က ယုံကြည်ခြင်း တင်ပြပြီး ကိုယ်တော့် ညွှန်ကြားချက်တွေကို လိုက်နာတဲ့အခါ ကိုယ်တော် ကောင်းချီးပေးတယ်။ ကမ္ဘာတစ်ဝန်းမှာ နိုင်ငံတော် သတင်းဟောပြောဖို့ ဘုရားသခင့် စွမ်းအားတော်က ကျွန်ုပ်တို့ လိုအပ်တဲ့ ရဲစွမ်းသတ္တိ ပေးတယ်။ ယေဟောဝါရဲ့ အဓိက သက်သေ ဖြစ်တဲ့ ယေရှုခရစ်က ဒီအရေးကြီးတဲ့ အလုပ်မှာ မိမိရဲ့ တပည့်တွေကို ကူညီထောက်မမယ်လို့ ကတိပေးခဲ့တယ်။ ယေရှု သူတို့ကို ဒီလိုပြောခဲ့တယ်– “ထို့ကြောင့် သွား၍ လူမျိုးတကာမှ လူတို့ကို ငါ့တပည့် ဖြစ်စေ . . . ကြလော့။ ငါသည်လည်း ဤလောကစနစ် နိဂုံးပိုင်းတိုင်အောင် သင်တို့နှင့်အတူ အစဉ်မပြတ် ရှိသည်။” (မ. ၂၈:၁၉၊ ၂၀) တခြားသူတွေနဲ့ စကားပြောရမှာကို ရှက်ကြောက်ခဲ့ကြတဲ့ သက်သေခံများစွာက အမှုဆောင်လုပ်ငန်းမှာ သူစိမ်းတွေနဲ့ စကားပြောဖို့ သန့်ရှင်းသော စွမ်းအားတော်က သူတို့ကို ရဲစွမ်းသတ္တိ ပေးတယ်လို့ ပြောကြတယ်။—ဆာလံ ၁၁၉:၄၆; ၂ ကောရိန္သု ၄:၇ တို့ကိုဖတ်ပါ။
ဘုရားရေးရာ ရတနာ
ယောရှုကျမ်းမှ ပေါ်လွင်ချက်များ
၅:၁၄၊ ၁၅—‘ယေဟောဝါ၏ ဗိုလ်ခြေကို အုပ်စိုးသော ဗိုလ်မှူး’ ကား မည်သူနည်း။ ကတိထားရာပြည်ကို စတင် သိမ်းပိုက်စဉ်က ယောရှုအား လာရောက် ကူညီပေးသူ ဗိုလ်မှူးမှာ လူသားဘဝ မတိုင်မီက ‘နှုတ်မြွက်စကားတော်’ ဖြစ်သူ ယေရှုခရစ်ပင် ဖြစ်နိုင်၏။ (ယောဟန် ၁:၁; ဒံယေလ ၁၀:၁၃) ယနေ့ ဝိညာဉ်ရေး တိုက်ပွဲတွင် ဘုရားသခင်၏ လူမျိုးတော်နှင့်အတူ ဘုန်းရှိသော ယေရှုခရစ် ရှိနေသည်ဟူသော အာမခံချက် ရရှိခြင်းသည် တကယ်ကို အားရှိစရာပင်!
စက်တင်ဘာ ၂၇–အောက်တိုဘာ ၃
ကျမ်းစာထဲက အဖိုးတန်ဘဏ္ဍာများ | ယောရှု ၆–၇
“တန်ဖိုးမရှိတဲ့အရာတွေကို မကြည့်ပါနဲ့”
အကျိုးမရှိသည့်အရာမှ သင်တို့၏မျက်စိကိုလွှဲပါ
၅ ရာစုနှစ်ပေါင်းများစွာ ကြာပြီးနောက်တွင် အစ္စရေးအမျိုးသား အာခန်၏ မျက်စိက ယေရိခေါမြို့ကို သိမ်းပိုက်စဉ် ပစ္စည်းများကို ခိုးယူရန် သူ့ကို သွေးဆောင်ခဲ့သည်။ ယေဟောဝါ၏ ဘဏ္ဍာတိုက်ထဲသို့ သွင်းရမည့် သတ်မှတ်ထားသော အရာများမှအပ ထိုမြို့အတွင်းရှိ ပစ္စည်းများကို ဖျက်ဆီးပစ်သင့်သည်ဟု ဘုရားသခင် မိန့်မှာခဲ့ပြီး ဖြစ်သည်။ မြို့အတွင်းမှ ပစ္စည်းအချို့ကို ‘တပ်မက်၍ တစ်စုံတစ်ခုကို ယူမိ’ နိုင်သောကြောင့် “ကျိန်အပ်သော အရာကို သတိနှင့် ရှောင်ကြ” ရန် အစ္စရေးလူတို့အား ဘုရားသခင် သတိပေးခဲ့သည်။ အာခန်၏ မနာခံမှုကြောင့် အစ္စရေးလူတို့သည် အာဣမြို့ကို တိုက်ခိုက်ရာတွင် ရှုံးနိမ့်ခဲ့ပြီး အချို့မှာ သေဆုံးခဲ့သည်။ အာခန်သည် ဖော်ထုတ်မခံရမချင်း ခိုးမှုကို ဝန်မခံခဲ့ချေ။ အာခန် ဤသို့ပြောခဲ့သည်– “ကျွန်တော် မြင်သဖြင့် တပ်မက်၍ သိမ်းယူမိပါပြီ။” သူ၏ မျက်စိတပ်မက်မှုသည် “သူ၌ရှိသမျှတို့” နှင့် သူ့ကို ပျက်စီးစေခဲ့သည်။ (ယောရှု ၆:၁၈၊ ၁၉; ၇:၁-၂၆) အာခန်၏ စိတ်နှလုံးသည် တားမြစ်ထားသော အရာကို တောင့်တခဲ့သည်။
မကောင်းမှုပြုခြင်းကို အဘယ့်ကြောင့် တိုင်ကြားရမည်နည်း
မှားယွင်းမှုကို အကြောင်းကြားရသည့် အကြောင်းတစ်ခုမှာ အသင်းတော် သန့်ရှင်းမှုကို ထိန်းသိမ်းစောင့်ရှောက်ရန် ဖြစ်သည်။ ယေဟောဝါသည် သန့်ရှင်း၊ မြင့်မြတ်သော ဘုရားသခင် ဖြစ်တော်မူ၏။ မိမိအား ဝတ်ပြုကိုးကွယ်သူများ အားလုံး အကျင့်အကြံနှင့် ဝိညာဉ်ရေးအရ သန့်ရှင်းမှု ရှိကြရန် ကိုယ်တော် တောင်းဆိုတော်မူ၏။ ကိုယ်တော်၏ မှုတ်သွင်းခံ နှုတ်ကပါဌ်တော်က ဤသို့ သတိပေး ဆုံးမသည်– “အထက်က သင်တို့သည် မှောင်မိုက်ထဲမှာ ကျင့်သော တပ်မက်ခြင်း တရားကို ယခု မလိုက်မကျင့်ဘဲ၊ နားထောင်တတ်သော သူငယ်ကဲ့သို့ ဖြစ်၍၊ သင်တို့ကို ခေါ်တော်မူသောသူသည် သန့်ရှင်းတော်မူသည်နည်းတူ၊ ကျင့်ကြံပြုမူသမျှတို့၌ သန့်ရှင်းခြင်း ရှိကြလော့။ အကြောင်းမူကား၊ ငါသည် သန့်ရှင်းတော်မူသောကြောင့်၊ သင်တို့သည်လည်း သန့်ရှင်းခြင်း ရှိကြလော့ဟု ကျမ်းစာ လာသတည်း။” (၁ ပေတရု ၁:၁၄-၁၆) မသန့်ရှင်းမှု သို့မဟုတ် မှားယွင်းသည့် လုပ်ရပ်ကို ကျင့်ကြံသူများကို ပဲ့ပြင်တည့်မတ်ခြင်း သို့မဟုတ် ဖယ်ရှားခြင်း မပြုပါက အသင်းတော် တစ်ခုလုံး ညစ်ညမ်းမှု ဖြစ်စေကာ ယေဟောဝါ၏ မျက်နှာသာတော်ကို ဆုံးရှုံးနိုင်သည်။—ယောရှု အခန်းကြီး ၇ နှိုင်းယှဉ်။
အကျိုးမရှိသည့်အရာမှ သင်တို့၏ မျက်စိကို လွှဲပါ
၈ မျက်စိတပ်မက်မှုနှင့် သွေးသားတပ်မက်မှုတို့သည် ခရစ်ယာန်စစ်များကိုလည်း ထိခိုက်နိုင်သည်။ ထို့ကြောင့် ဘုရားသခင့် တရားစကားတော်က ကျွန်ုပ်တို့ ကြည့်ရှုရာများ၊ တပ်မက်ရာများနှင့်ပတ်သက်၍ မိမိကိုယ်ကို ဆုံးမရန် အားပေးထားသည်။ (၁ ကော. ၉:၂၅၊ ၂၇; ၁ ယောဟန် ၂:၁၅-၁၇ ကိုဖတ်ပါ။) ဖြောင့်မတ်သူ ယောဘသည် ကြည့်ရှုရာများနှင့် လိုအင်ဆန္ဒများအကြား အလွန် ဆက်စပ်မှု ရှိကြောင်းကို အသိအမှတ်ပြုခဲ့သည်။ သူ ဤသို့ပြောခဲ့၏– “ငါသည် အပျိုကိုမျှ မကြည့်မရှုမည်အကြောင်း ကိုယ်မျက်စိနှင့် ပဋိညာဉ် ဝန်ခံခြင်းကို ပြုပြီ။” (ယောဘ ၃၁:၁) ယောဘသည် အမျိုးသမီးတစ်ဦးကို အကျင့်ပျက်သောနည်းဖြင့် ကိုင်တွယ်ဖို့ ငြင်းဆိုရုံသာမက ထိုကဲ့သို့သော အတွေးမျိုးကို သူ၏ စိတ်တွင် သိုထားရန်ပင် ခွင့်မပြုခဲ့ချေ။ “မိန်းမတစ်ဦးကို ဆက်ကြည့်နေ၍ တပ်မက်သောစိတ် ပေါ်လာလျှင် စိတ်နှလုံးထဲ၌ ထိုမိန်းမနှင့် ဖောက်ပြန်ပြီ” ဟု ယေရှု မိန့်တော်မူရာတွင် စိတ်နှလုံးသည် အကျင့်ပျက် အတွေးအခေါ်များနှင့် ကင်းစင်၍ သန့်ရှင်းရမည်ဖြစ်ကြောင်း အလေးပေး ဖော်ပြနေခြင်း ဖြစ်သည်။—မ. ၅:၂၈။
ဘုရားရေးရာ ရတနာ
စာရှုသူများထံမှ မေးခွန်းလွှာ
ရှေးခေတ်တုန်းက ရန်သူတွေဟာ မြို့တစ်မြို့ကို တိုက်ခိုက်ဖို့ ဦးဆုံး ဝိုင်းရံပိတ်ဆို့ကြတယ်။ ဝိုင်းရံပိတ်ဆို့ထားချိန်မှာ မြို့သားတွေဟာ မြို့ထဲမှာ သိုလှောင်ထားတဲ့ အစားအစာတွေကိုသာ စားရတဲ့အတွက် ဝိုင်းရံပိတ်ဆို့ချိန် ကြာမြင့်မယ်ဆိုရင် အစားအစာတွေလည်း ကုန်သလောက် ဖြစ်သွားမှာပဲ။ နောက်ဆုံး၊ မြို့ကို ရန်သူတွေ သိမ်းပိုက်တဲ့အခါ လက်ကျန် အစားအစာတွေ အပါအဝင် ရှိသမျှကို သိမ်းယူကြတယ်။ ဒါကြောင့် ဝိုင်းရံပိတ်ဆို့ပြီးမှ တိုက်ခိုက်ခံခဲ့ရတဲ့ ပါလက်စတိုင်း မြို့တွေရဲ့ အပျက်အယွင်းတွေကို ရှာဖွေတွေ့ရှိတဲ့အခါ လက်ကျန် အစားအစာတွေကို လုံးဝ မတွေ့ရသလောက်ပဲ။ ဒါပေမဲ့ ယေရိခေါမြို့ရဲ့ အပျက်အယွင်းတွေကတော့ ထူးခြားတယ်။ ဂျာနယ်တစ်စောင် (Biblical Archaeology Review) က အခုလို ပြောတယ်– “မြို့အပျက်အယွင်းတွေထဲမှာ အများဆုံး တွေ့ရတာကတော့ မြေထည်ပစ္စည်းတွေနဲ့ ကောက်နှံတွေပဲ။ . . . ဒီလောက်များတဲ့ ကောက်နှံတွေကို တွေ့ရတာ တော်တော် ထူးခြားတယ်။”
ယေရိခေါမြို့ထဲက ဘယ်အစားအစာကိုမှ မသိမ်းယူဖို့ အစ္စရေးတွေကို ယေဟောဝါ မိန့်မှာထားတဲ့အတွက် ဘာကိုမှ သူတို့ မသိမ်းယူကြဘူးလို့ ကျမ်းစာ ပြောတယ်။ (ယောရှု ၆:၁၇၊ ၁၈) အဲဒီအပြင် ကောက်ရိတ်ပြီးခါစအချိန်၊ မြို့ထဲမှာ ကောက်နှံ အလျှံပယ် ရှိချိန် ဖြစ်တဲ့ နွေဦးမှာ ယေရိခေါမြို့ကို အစ္စရေးတွေ တိုက်ခိုက်ခဲ့တယ်လို့လည်း ကျမ်းစာ ပြောတယ်။ (ယောရှု ၃:၁၅-၁၇; ၅:၁၀) ဒါကြောင့် ယေရိခေါမြို့ထဲမှာ ကောက်နှံ အမြောက်အမြား ကျန်နေတယ်ဆိုတဲ့ အချက်က ကျမ်းစာ ပြောတဲ့အတိုင်း မြို့ကို ဝိုင်းရံပိတ်ဆို့ချိန် တိုတောင်းခဲ့တယ် ဆိုတာကို အတည်ပြု ထောက်ခံတယ်။
အောက်တိုဘာ ၄–၁၀
ကျမ်းစာထဲက အဖိုးတန်ဘဏ္ဍာများ | ယောရှု ၈–၉
“ဂိဗောင်လူမျိုးဆီကနေ သင်ယူစရာများ”
it-1 ၉၃၀-၉၃၁
ဂိဗောင်
ယောရှုနဲ့ ဆက်ဆံရေး။ ယောရှုလက်ထက်တုန်းက ဂိဗောင်မြို့မှာ ဟိဝိလူမျိုးတွေ နေထိုင်တယ်။ ဟိဝိလူမျိုးတွေဟာ ဖျက်ဆီးခံရမယ့် ခါနန်လူမျိုး ခုနစ်မျိုးမှာ ပါတယ်။ (တရ ၇:၁၊ ၂။ ယရ ၉:၃-၇) ဂိဗောင်မြို့သားတွေကို အာမောရိလို့လည်း ခေါ်တယ်။ ခါနန်လူမျိုး အားလုံးကို ခြုံပြီး အာမောရိလို့လည်း ခေါ်တယ်။ (၂ရှ ၂၁:၂။ က ၁၀:၁၅-၁၈။ ၁၅:၁၆ တို့နဲ့နှိုင်းယှဉ်ပါ။) ဂိဗောင်လူမျိုးတွေဟာ တခြားခါနန်လူမျိုးတွေနဲ့ မတူဘူး။ သူတို့မှာ စစ်တပ်အင်အား ရှိတယ်၊ မြို့ကြီးတယ် ဆိုပေမဲ့ အစ္စရေးတွေဘက်မှာ ယေဟောဝါ တိုက်ခိုက်ပေးနေလို့ သူတို့ နိုင်မှာ မဟုတ်ဘူးဆိုတာ နားလည်တယ်။ ဒါကြောင့် ယေရိခေါမြို့နဲ့ အာအိမြို့ ပျက်စီးပြီးနောက်မှာ ဟိဝိမြို့တွေ ဖြစ်တဲ့ ခေဖိရာ၊ ဗေရုတ်၊ ကိရယတ် ယာရိမ်မြို့တွေကို ကိုယ်စားပြုပြီး ဂိဗောင်မြို့သားတွေဟာ (ယရ ၉:၁၇) ဂိလဂါလမြို့ကို ရောက်လာပြီး ယောရှုနဲ့ မဟာမိတ် ဖွဲ့ခဲ့ကြတယ်။ ဂိဗောင်မြို့သား သံတမန်တွေက ဟောင်းနွမ်းတဲ့ ဖိနပ်တွေကို စီးလာပြီး စုတ်ပြဲနေတဲ့အဝတ်တွေ ဝတ်၊ အစာရေစာတွေကို ဟောင်းနွမ်းတဲ့ အိတ်တွေ၊ ပေါက်ပြဲလို့ ဖာထားတဲ့ သားရေဘူးတွေထဲ ထည့်ပြီး အစ္စရေးလူတွေ သိမ်းပိုက်ရမယ့် မြို့တွေက မဟုတ်ဘဲ ရပ်ဝေးကနေ လာသလို ဟန်ဆောင်ခဲ့ကြတယ်။ အီဂျစ်နဲ့ အာမောရိဘုရင် ရှိဟုန်နဲ့ ဩဂတ်ကို ယေဟောဝါ ဘယ်လို ဒဏ်ခတ်ခဲ့တယ် ဆိုတာကို သူတို့ သိတယ်။ ဒါပေမဲ့ ယေရိခေါနဲ့ အာအိမြို့အကြောင်းကို ဘာမှ ထည့်မပြောဘူး။ “ရပ်ဝေး” က လာလို့ ဒီသတင်းတွေ မကြားခဲ့သလို ဟန်ဆောင်ခဲ့ကြတယ်။ အစ္စရေး ခေါင်းဆောင်တွေက အထောက်အထားတွေကို စစ်ဆေး၊ အသက်ချမ်းသာပေးမယ်လို့ ကတိပေးပြီး မဟာမိတ် ဖွဲ့လိုက်တယ်။—ယရ ၉:၃-၁၅။
“ကိုယ်ဉာဏ်ကို အမှီမပြုနှင့်”
၁၄ အတွေ့အကြုံ ရှိတဲ့ အကြီးအကဲတွေ အပါအဝင် ကျွန်ုပ်တို့ အားလုံးက မစုံလင်ကြတဲ့အတွက် ဆုံးဖြတ်ချက် ချတဲ့အခါတွေမှာ ယေဟောဝါရဲ့ လမ်းညွှန်မှုကို မပျက်မကွက် ရှာဖို့ လိုတယ်။ ဉာဏ်များတဲ့ ဂိဗောင်မြို့သားတွေက ရပ်ဝေးက လာတဲ့သူတွေလို ပရိယာယ်ဆင်ပြီး ချဉ်းကပ်လာတဲ့အခါ မောရှေကို ဆက်ခံသူ ယောရှုနဲ့ အစ္စရေးအမျိုးသား အသက်ကြီးသူတွေရဲ့ တုံ့ပြန်ပုံကို သုံးသပ်ကြည့်ပါ။ ယောရှုနဲ့ တခြားသူတွေက ယေဟောဝါကို မမေးမြန်းဘဲ ဂိဗောင်မြို့သားတွေနဲ့ ငြိမ်းချမ်းရေး ယူလိုက်တယ်။ သူတို့ရဲ့ သဘောတူညီမှုကို ယေဟောဝါ လက်ခံခဲ့ပေမဲ့ ဘုရားသခင့် လမ်းညွှန်မှု မရှာခဲ့တဲ့ သူတို့အကြောင်းကို ကျွန်ုပ်တို့အကျိုးအတွက် ကျမ်းစာမှာ မှတ်တမ်းတင်စေခဲ့တယ်။—ယောရှု ၉:၃-၆၊ ၁၄၊ ၁၅။
‘ထိုပြည်တွင် လျှောက်သွားလော့’
၁၄ ထိုကိုယ်စားလှယ်များက ဤသို့ ပြောဆိုခဲ့ကြသည်– “ကိုယ်တော်၏ ဘုရားသခင် ထာဝရဘုရား၏ နာမတော်ကြောင့် ကိုယ်တော်ကျွန်တို့သည် အလွန် ဝေးသော ပြည်က လာပါပြီ။” (ယောရှု ၉:၃-၉) သူတို့၏ အဝတ်အစားနှင့် စားနပ်ရိက္ခာများက ဝေးလံသော အရပ်မှ ရောက်လာပုံ ပေါက်သော်လည်း အမှန်မှာ ဂိဗောင်မြို့သည် ဂိလဂါလမြို့မှ မိုင် ၂၀ ခန့်သာ ဝေးပါသည်။ ယောရှုနှင့် သူ၏ အကဲအမှူးများသည် ဂိဗောင်မြို့နှင့်ရော ဂိဗောင်မြို့ အနီးအနားမြို့များနှင့်ပါ မဟာမိတ်ဖွဲ့လိုက်သည်အထိ သူတို့ကို လက်ခံယုံကြည်ခဲ့ကြသည်။ ဂိဗောင်မြို့သားများသည် ဖျက်ဆီးစီရင်မခံရရုံသက်သက် ပရိယာယ်ဆင်ခဲ့ကြခြင်းလော။ ထိုသို့မဟုတ်ဘဲ ဣသရေလ ဘုရားသခင်၏ မျက်နှာသာ ရလိုသည့် ဆန္ဒကို သူတို့ တင်ပြခဲ့ကြသည်။ ထိုအခါ ဂိဗောင်မြို့သားတို့သည် “ထာဝရဘုရား ရွေးကောက်တော်မူသော အရပ်၌ တည်သော ယဇ်ပလ္လင်တော်အဖို့နှင့် ပရိသတ်တော်အဖို့ . . . ထင်းခုတ်၍ ရေခပ်” သူများ ဖြစ်လာခွင့်ကို ပေးရန် ယေဟောဝါ နှစ်သက်လက်ခံခဲ့သည်။ (ယောရှု ၉:၁၁-၂၇) ဂိဗောင်မြို့သားတို့သည် ယေဟောဝါ၏ လုပ်ငန်းတော်တွင် နိမ့်ကျသည့် တာဝန်များကို ထမ်းဆောင်လိုစိတ် ဆက်ပြခဲ့ကြသည်။ ဗာဗုလုန်မှ ပြန်လာပြီး ပြန်လည်တည်ဆောက်ထားသော ဗိမာန်တော်တွင် အမှုထမ်းသူ ဘုရားသခင်၏ ကျွန်တို့တွင် သူတို့မှအချို့ ပါဝင်မည် ဖြစ်သည်။ (ဧဇရ ၂:၁၊ ၂၊ ၄၃-၅၄; ၈:၂၀) ကျွန်ုပ်တို့သည် ဘုရားသခင်နှင့် မိတ်သဟာယ ဆက်ဖွဲ့ရန် ကြိုးစားပြီး ကိုယ်တော့် လုပ်ငန်းတော်တွင် နိမ့်ကျသည့် အလုပ်တာဝန်များကိုပင် စေတနာစိတ်နှင့် လုပ်ကိုင်ခြင်းအားဖြင့် သူတို့၏ သဘောထားကို တုပနိုင်ကြသည်။
ဘုရားရေးရာ ရတနာ
it-1 ၁၀၃၀
သစ်တိုင်မှာ ဆွဲထား
အစ္စရေးတွေကို ယေဟောဝါ ပေးတဲ့ ပညတ်အရ ရာဇဝတ်သားတချို့ကို သတ်ပြီး သစ်တိုင်မှာ ဆွဲထားရတယ်။ သတိပေးချက်အနေနဲ့ “ဘုရားသခင်ရဲ့ ကျိန်ခြင်းကို ခံရသူ” ကို လူမြင်ကွင်းမှာ အဲဒီလို ထားရတယ်။ အလောင်းကို သစ်တိုင်ပေါ်မှာ တစ်ညလုံး မထားရဘူး။ အဲဒီနေ့မှာပဲ သင်္ဂြိုဟ်ရမယ်။ အဲဒီလိုထားရင် ယေဟောဝါဘုရား အမွေပေးတဲ့ ပြည်ကို ညစ်ညူးစေလို့ပဲ။ (တရ ၂၁:၂၂၊ ၂၃) အစ္စရေးလူမျိုး မဟုတ်တဲ့သူကို ကွပ်မျက်တဲ့အခါမှာလည်း ဒီပညတ်အတိုင်း လိုက်ကြတယ်။—ယရ ၈:၂၉။ ၁၀:၂၆၊ ၂၇။
ဟောပြောချက်
it-1 ၅၂၀
ပဋိညာဉ်
လူနှစ်ဦး ဒါမှမဟုတ် အဲဒီထက် ပိုတဲ့လူတွေ အလုပ်တစ်ခုကို လုပ်ဖို့၊ မလုပ်ဖို့ သဘောတူညီထားတာ၊ စာချုပ်ချုပ်ထားတာ ဖြစ်တယ်။ ဘီရစ် ဆိုတဲ့ ဟီဘရူး စကားလုံးရဲ့ ဇာစ်မြစ်ကို မသိရပေမဲ့ ဟီဘရူး ကျမ်းစောင်တွေမှာ အကြိမ် ၂၈၀၊ မောရှေ ရေးတဲ့ ကျမ်းငါးစောင်မှာ အကြိမ် ၈၀ တွေ့ရတယ်။ အဲဒီစကားလုံးရဲ့ အဓိပ္ပာယ် “ပဋိညာဉ်” ဟာ အခုခေတ် ဝေါဟာရ “စာချုပ်” နဲ့ အဓိပ္ပာယ်တူတယ် ဆိုတာကို ကျူနီဖောင်း ကျောက်စာတွေကနေ သိရတယ်။ အဲဒီကျောက်စာတွေကို ၁၉၇၂ ခုနှစ်ကတုန်းက ဟာမတ်မြို့ အရှေ့တောင်ဘက်မှာရှိတဲ့ အစ္စရေးမြို့ မဟုတ်တဲ့ ရှေးဟောင်း ကတနာမြို့မှာ တွေ့ခဲ့တယ်။ ရှာဖွေတွေ့ရှိတဲ့ ကျောက်စာ ၁၅ ချပ်ထဲက နှစ်ချပ်မှာ ပါတာတွေက ရိုးရိုးရှင်းရှင်းတွေပဲ။ အချပ် A မှာ နာမည်စာရင်းတွေ ပါတယ်။ . . . အချပ် B မှာ ဝေစုစာရင်းတွေ ပါတယ်။ . . . အချပ် A မှာ ပါတဲ့ စာရင်းထဲက လူတွေက . . . တစ်ယောက်ယောက်အတွက် အလုပ်လုပ်မယ်၊ တာဝန်တချို့ကို လုပ်ဆောင်မယ်ဆိုပြီး သဘောတူညီချက် လုပ်ထားတာ ဖြစ်တယ်။ အချပ် B မှာပါတဲ့ စာရင်းကိုလည်း အချပ် A စာရင်း ရေးတဲ့သူကပဲ ရေးတယ်။ အချပ် B မှာ ပါတဲ့ စာရင်းက အလုပ်လုပ်တဲ့သူတွေ ရမယ့် ဝေစု ဖြစ်တယ်။ . . . ဘီရစ်၊ ‘ပဋိညာဉ်’ ဟာ ဂျူးဘာသာတရားမှာ အလွန် အရေးပါတယ်။ အဲဒီကျောက်စာတွေက ဘီရစ်၊ ‘ပဋိညာဉ်’ စကားလုံးကို ကျမ်းစာ မဟုတ်တဲ့ တခြားနေရာမှာ ပထမဆုံးအကြိမ် တွေ့ရတာ ဖြစ်တယ်။ အချိန်ကတော့ ဘီစီ ၁၄ ရာစု အစောပိုင်းလောက်က ဖြစ်တယ်။
ခရစ်ယာန် ဂရိကျမ်းစောင်တွေရဲ့ ဘာသာပြန်ကျမ်းတချို့မှာ ဒိုင်အာတီကာ ဆိုတဲ့ စကားလုံးကို “ပဋိညာဉ်၊” “သေတမ်းစာ၊” “သက်သေအထောက်အထား’ လို့ ပြန်ဆိုတယ်။ ဒါပေမဲ့ မက်ကလင်းတောက်နဲ့ စထရောင်း စွယ်စုံကျမ်း (၁၈၉၁) ထဲက “ပဋိညာဉ်” ခေါင်းစဉ်အောက်မှာ ဒီလိုဆိုထားတယ်– “‘ပဋိညာဉ်’ ဆိုတဲ့ စကားလုံးအပြင် တခြားစကားလုံး မလိုအပ်ဘူး။” စပ်တွားဂျင့်ကျမ်းက ဘီရစ်ကို (သေတမ်းစာ၊ သက်သေအထောက်အထားလို့ ဘယ်တော့မှ မပြန်ဆိုဘဲ) ဓမ္မဟောင်းကျမ်းမှာ ‘ပဋိညာဉ်’ လို့ပဲ တစ်သမတ်တည်း ပြန်တဲ့အတွက် ဓမ္မသစ်ကျမ်းကို ရေးတဲ့သူတွေက အဲဒီစကားလုံးကို အသုံးပြုထားတာ ကြည့်ခြင်းအားဖြင့် ဓမ္မဟောင်းကျမ်းမှာ ပါတဲ့ အယူအဆကို စာရှုသူတွေကို သိစေချင်မှန်း ထင်ရှားတယ်။ (၂က ၃:၁၄။ ဗ ၁၁:၁၉) ဂရိကျမ်းစောင်တွေမှာ ပါတဲ့ အဲဒီစကားလုံးကို အင်္ဂလိပ် ဂျိမ်းဘုရင် ဘာသာပြန်ကျမ်းမှာ တစ်ခါတလေ ‘ပဋိညာဉ်၊’ တစ်ခါတလေ ‘သက်သေအထောက်အထား’ လို့ ဘာသာပြန်တယ်။—ဟီ ၇:၂၂။ ၈:၈-၁၃။ ၉:၁၅။
it-1 ၅၂၅ ပိုဒ်. ၁
တခြား ပဋိညာဉ် အမျိုးမျိုး။ (က) ယောရှုနဲ့ အစ္စရေး ခေါင်းဆောင်တွေက ဂိဗောင်မြို့သားတွေကို အသက်ရှင်ခွင့် ပေးလိုက်တဲ့ ပဋိညာဉ်။ ကျိန်စာသင့်နေတဲ့ ခါနန်လူမျိုးတွေကို ဖျက်ဆီးရမှာ ဖြစ်ပေမဲ့ ဂိဗောင်လူမျိုးတွေနဲ့ ဖွဲ့ထားတဲ့ ပဋိညာဉ်ကို ထောက်ထားပြီး အသက်ရှင်ခွင့် ပေးလိုက်တယ်။ ကျိန်စာသင့်နေသူတွေအဖြစ် အစ္စရေးလူတွေအတွက် ထင်းခွေ၊ ရေခပ်ရတဲ့ အလုပ်ကို လုပ်ပေးရတယ်။ (ယရ ၉:၁၅၊ ၁၆၊ ၂၃-၂၇) (ခ) ယောရှုနဲ့ အစ္စရေးတွေ ယေဟောဝါကို ဝတ်ပြုဖို့ ဖွဲ့တဲ့ ပဋိညာဉ်။ (ယရ ၂၄:၂၅၊ ၂၆) (ဂ) အမ္မုန်လူမျိုးတွေကို အနိုင်ရမယ်ဆိုရင် ခေါင်းဆောင်လုပ်ခွင့် ပေးမယ်လို့ ဂိလဒ်ပြည်ရဲ့ အကြီးအကဲတွေနဲ့ ယေဖသ မိဇပါမြို့မှာ ဖွဲ့တဲ့ ပဋိညာဉ်။ (သူ ၁၁:၈-၁၁) (ဃ) ယောနသန်နဲ့ ဒါဝိဒ် ဖွဲ့တဲ့ ပဋိညာဉ်။ (၁ရှ ၁၈:၃။ ၂၃:၁၈) (င) ပုရောဟိတ် ယောယဒနဲ့ ခေရိကိုယ်ရံတော်၊ နန်းတော်စောင့်တွေရဲ့ တပ်မှူးတွေ ဖွဲ့တဲ့ ပဋိညာဉ်။ (၂ဘု ၁၁:၄။ ၂ရာ ၂၃:၁-၃) (စ) တိုင်းတစ်ပါးသား အမျိုးသမီးတွေကို စွန့်ပစ်မယ်လို့ အစ္စရေးတွေ ယေဟောဝါနဲ့ ဖွဲ့တဲ့ ပဋိညာဉ်။ (ဧဇ ၁၀:၃) (ဆ) ယေဟောဝါက မိမိရဲ့ ကျွန်ကို သုံးပြီး လူတွေနဲ့ ဖွဲ့တဲ့ ပဋိညာဉ်။ (ရှာ ၄၂:၆။ ၄၉:၈) (ဇ) ဒါဝိဒ်နဲ့ အစ္စရေး အကြီးအကဲတွေ ဟေဗြုန်မြို့မှာ ဖွဲ့တဲ့ ပဋိညာဉ်။ (၁ရာ ၁၁:၃) (ဈ) အာသ စိုးစံချိန်မှာ ယေဟောဝါကို စိတ်စွမ်းရှိသမျှ၊ ကိုယ်စွမ်းရှိသမျှနဲ့ ရှာဖွေမယ်လို့ လူတွေ ဖွဲ့တဲ့ ပဋိညာဉ်။ (၂ရာ ၁၅:၁၂) (ည) ယောရှိမင်းက ကျမ်းလိပ်ထဲက ပဋိညာဉ်စကားအတိုင်း လုပ်ဆောင်မယ်လို့ ပြုတဲ့ ပဋိညာဉ်။ (၂ ရာ ၃၄:၃၁) (ဋ) ဂျေရုဆလင်မြို့ရဲ့ အုပ်စိုးရှင်၊ “ကြွားဝါသူတို့” က လုံခြုံပြီ၊ ဘေးကင်းပြီလို့ ထင်ပြီး “သေမင်းနဲ့ မဟာမိတ်ဖွဲ့” တဲ့ ပဋိညာဉ်။—ရှာ ၂၈:၁၄၊ ၁၅၊ ၁၈။
အောက်တိုဘာ ၁၁-၁၇
ကျမ်းစာထဲက အဖိုးတန်ဘဏ္ဍာများ | ယောရှု ၁၀–၁၁
“အစ္စရေးတွေအတွက် ယေဟောဝါ တိုက်ခိုက်”
it-1 ၅၀
အဒေါနိဇေဒက်
ကတိထားရာပြည်ကို အစ္စရေးတွေ သိမ်းပိုက်နေချိန်မှာ ဂျေရုဆလင်မြို့ရဲ့ ဘုရင် ဖြစ်တယ်။ အဒေါနိဇေဒက်က ဂျော်ဒန်မြစ်အနောက်ဘက်ခြမ်းက တခြားဘုရင်တွေနဲ့ မဟာမိတ်ဖွဲ့ပြီး ယောရှုကို တားဆီးဖို့ ကြိုးစားတယ်။ (ယရ ၉:၁-၃) ဒါပေမဲ့ ဂိဗောင်မြို့က ဟိဝိလူတွေကတော့ ယောရှုနဲ့ မဟာမိတ်ဖွဲ့တယ်။ အဲဒါကို တုံ့ပြန်တဲ့အနေနဲ့ အဒေါနိဇေဒက်က အာမေရိ ဘုရင်လေးပါးနဲ့ ပူးပေါင်းတယ်။ ဂိဗောင်မြို့သားတွေကို တိုက်ခိုက်ဖို့ ချီတက်ပြီး တပ်ချခဲ့တယ်။ ယောရှုက ဂိဗောင်မြို့သားတွေကို ထူးခြားတဲ့နည်းနဲ့ ကယ်တင်ခဲ့လို့ တပ်ပေါင်းစုက ကစဉ်းကလျား ထွက်ပြေးကြရတယ်။ ဘုရင်ငါးပါးက မက်ကဒါလိုဏ်ဂူမှာ ပိတ်ပိသွားကြတယ်။ ယောရှုကိုယ်တိုင် အဒေါနိဇေဒက်နဲ့ တခြားဘုရင်လေးပါးကို မိမိရဲ့ စစ်တပ်ရှေ့မှာ ကွပ်မျက်ပြီး သစ်တိုင်မှာ ချိတ်ဆွဲထားလိုက်တယ်။ နောက်ဆုံး သူတို့ရဲ့ အလောင်းတွေကို လိုဏ်ဂူထဲ ပစ်ထည့်လိုက်လို့ အဲဒီလိုဏ်ဂူက သူတို့ရဲ့ သင်္ချိုင်း ဖြစ်သွားတယ်။—ယရ ၁၀:၁-၂၇။
it-1 ၁၀၂၀
မိုးသီး
ယေဟောဝါ အသုံးပြုခဲ့။ ယေဟောဝါဟာ တစ်ခါတလေ မိမိရဲ့ နှုတ်ထွက်စကား ပြည့်စုံဖို့၊ မိမိရဲ့ တန်ခိုးတော်ကို ပြဖို့ မိုးသီးကို အသုံးပြုတယ်။ (ဆ ၁၄၈:၁၊ ၈။ ရှာ ၃၀:၃၀) ပထမဆုံးအချိန်က ရှေးအီဂျစ်နိုင်ငံမှာ ကျရောက်ခဲ့တဲ့ ခုနစ်ခုမြောက် ကပ်ဘေး ဖြစ်တယ်။ မိုးသီးကြောင့် သီးနှံတွေ၊ သစ်ပင်တွေ ပျက်စီးကုန်တယ်။ လယ်ထဲမှာ ရှိတဲ့ လူတွေ၊ တိရစ္ဆာန်တွေ သေကုန်တယ်။ ဂေါရှင်အရပ်မှာ နေတဲ့ အစ္စရေးတွေကိုတော့ မထိခိုက်ဘူး။ (ထွ ၉:၁၈-၂၆။ ဆ ၇၈:၄၇၊ ၄၈။ ၁၀၅:၃၂၊ ၃၃) နောက်ပိုင်း ကတိထားရာပြည်မှာ ယောရှု ဦးဆောင်ပြီး ဂိဗောင်လူတွေကို သွားကယ်တဲ့အချိန်မှာ အာမေရိ ဘုရင်ငါးပါးကို တိုက်ခိုက်ဖို့ ယေဟောဝါက မိုးသီးတွေကို ရွာကျစေတယ်။ အစ္စရေးတွေရဲ့ ဓားချက်ကြောင့် သေတာထက် မိုးသီးကြောင့် သေတာ ပိုများတယ်။—ယရ ၁၀:၃-၇၊ ၁၁။
ယောရှုကျမ်းမှ ပေါ်လွင်ချက်များ
၁၀:၁၃—ဤအံ့ဖွယ်ဖြစ်ရပ် မည်သို့ဖြစ်နိုင်သနည်း။ ကောင်းကင်၊ မြေကြီး၏ ဖန်ဆင်းရှင် ‘ယေဟောဝါ မတတ်နိုင်သောအမှု တစ်စုံတစ်ခု ရှိသလော။’ (ကမ္ဘာဦး ၁၈:၁၄) အကယ်၍ ယေဟောဝါ အလိုတော် ရှိမည်ဆိုလျှင် ကမ္ဘာပေါ်မှ ကြည့်ရှုသူတစ်ဦးအတွက် နေနှင့်လ မရွေ့ရှားတော့သည့်ပုံ ပေါက်စေရန် ကမ္ဘာမြေ ရွေ့ရှားမှုကို ဖန်တီးနိုင်၏။ သို့မဟုတ် ကိုယ်တော်သည် နေနှင့် လတို့ကို ပုံမှန်အတိုင်း ရွေ့ရှားနေစေစဉ် နေနှင့် လမှ ရောင်ခြည်များကို တစ်နည်းနည်းဖြင့် အလင်းယိုင်စေရာ အဆိုပါ အလင်းအိမ်နှစ်ခုမှ အလင်းကို ဆက်လက်ထွန်းလင်းနေစေနိုင်၏။ မည်သို့ပင်ဖြစ်ပါစေ၊ လူ့သမိုင်းတွင် “ထိုသို့သောနေ့ တစ်နေ့မျှ မဖြစ်စဖူး” ချေ။—ယောရှု ၁၀:၁၄။
ဘုရားရေးရာ ရတနာ
စာရှုသူများထံမှ မေးခွန်းလွှာ
အချို့စာစောင်များကို သမ္မာကျမ်းစာတွင် ဖော်ပြခဲ့ခြင်း၊ ယင်းတို့ကို မှီငြမ်းခဲ့ခြင်းကြောင့် ယင်းတို့သည် မှုတ်သွင်းခံခဲ့ရသည်ဟု ကောက်ချက်မချသင့်ပေ။ သို့သော် ယေဟောဝါ ဘုရားသခင်သည် ‘နှုတ်မြွက်စကားတော်’ အဝင် ဖြစ်သည့် ရေးသားချက် အားလုံးကို ထိန်းသိမ်းခဲ့ပြီး ယင်းတို့သည် “ကာလအစဉ်အမြဲတည်” မည်။ (ဟေရှာ. ၄၀:၈) မှန်ပါသည်၊ ကျွန်ုပ်တို့ ရရှိထားသော သမ္မာကျမ်းစာ ၆၆ စောင်တွင် ပါဝင်ရန် ယေဟောဝါ ရွေးချယ်ခဲ့ရာသည် “ကောင်းသောအမှု အမျိုးမျိုးအတွက် အရည်အချင်း ပြည့်ဝပြီး လုံးလုံးလျားလျား အသင့်ဖြစ်” ရန် ကျွန်ုပ်တို့လို အပ်ရာမျှသာ ဖြစ်သည်။—၂ တိ. ၃:၁၆၊ ၁၇။
အောက်တိုဘာ ၁၈–၂၄
ကျမ်းစာထဲက အဖိုးတန်ဘဏ္ဍာများ | ယောရှု ၁၂–၁၄
“ယေဟောဝါနောက် စိတ်နှလုံး အကြွင်းမဲ့ လိုက်ပါ”
ယောရှုကျမ်းမှ ပေါ်လွင်ချက်များ
၁၄:၁၀-၁၃။ ကာလက်သည် အသက် ၈၅ နှစ်ရှိပြီ ဖြစ်သော်လည်း ဟေဗြုန်အရပ်မှ လူတို့ကို မောင်းထုတ်ရန် ခက်ခဲသော တာဝန်ကို တောင်းဆိုခဲ့၏။ ထိုအရပ်တွင် သူမတူသည့် အရပ်အမောင်းရှိ အာနက လူထွားကြီးများ နေထိုင်သည်။ ယေဟောဝါ၏ အကူအညီဖြင့် အတွေ့အကြုံများသော ဤစစ်သားသည် စစ်နိုင်သဖြင့် ဟေဗြုန်သည် ခိုလှုံရာမြို့ ဖြစ်လာလေသည်။ (ယောရှု ၁၅:၁၃-၁၉; ၂၁:၁၁-၁၃) ကျွန်ုပ်တို့သည် ခက်ခဲသော သီအိုကရက်တစ် တာဝန်များကို မငြင်းဆန်သင့်ကြောင်း ကာလက်၏ ပုံနမူနာက အားပေးတိုက်တွန်း၏။
ယုံကြည်ခြင်းနှင့် ဘုရားသခင်ကို ကြောက်ရွံ့ခြင်းတို့ကြောင့် ရဲရင့်ခြင်း
၁၁ ထိုသို့သော ယုံကြည်ခြင်းသည် အသေ မဟုတ်ပေ။ အမှန်တရားကို အသက်တာတွင် ကျင့်သုံးခြင်း၊ ယင်း၏ အကျိုးကျေးဇူးများကို “မြည်းစမ်း” ခြင်း၊ ကျွန်ုပ်တို့၏ ဆုတောင်းချက်များ ဖြေကြားခံရကြောင်း “သိမှတ်” ခြင်းအပြင် အသက်တာတွင် နည်းအမျိုးမျိုးဖြင့် ယေဟောဝါ၏ လမ်းညွှန်မှုကို ခံစားရခြင်းကြောင့် ယုံကြည်ခြင်း တိုးများလာသည်။ (ဆာလံ ၃၄:၈; ၁ ယောဟန် ၅:၁၄၊ ၁၅) ယောရှုနှင့် ကာလက်တို့သည် ဘုရားသခင်၏ ကောင်းမြတ်ခြင်းကို မြည်းစမ်းခဲ့သောကြောင့် ယုံကြည်ခြင်း ခိုင်မာလာကြောင်း ကျွန်ုပ်တို့ စိတ်ချနိုင်ပါသည်။ (ယောရှု ၂၃:၁၄) ဤအချက်များကို သုံးသပ်ကြည့်ပါ– တောထဲတွင်အနှစ် ၄၀ လှည့်လည်ပြီးနောက် ဘုရားသခင်၏ ကတိအတိုင်း သူတို့ အသက်ရှင် ကျန်ရစ်ခဲ့သည်။ (တောလည်ရာ ၁၄:၂၇-၃၀; ၃၂:၁၁၊ ၁၂) ခါနာန်လူမျိုးများကို အနိုင်ယူ တိုက်ခိုက်ခဲ့သည့် ခြောက်နှစ်လုံး သူတို့ တက်တက်ကြွကြွ ပါဝင်ခဲ့ရသည်။ နောက်ဆုံး သက်ရှည်ကျန်းမာစွာ နေထိုင်ခဲ့ရသည့်အပြင် ကိုယ်ပိုင် အမွေမြေများပင် ရရှိခဲ့သည်။ ယေဟောဝါသည် မိမိအား သစ္စာရှိရှိ၊ ရဲစွမ်းသတ္တိရှိရှိ ဝတ်ပြုသူတို့ကို အမှန်ပင် ကြွယ်ဝစွာ ဆုချတော်မူသည်။—ယောရှု ၁၄:၆၊ ၉-၁၄; ၁၉:၄၉၊ ၅၀; ၂၄:၂၉။
ဘုရားရေးရာ ရတနာ
it-1 ၉၀၂-၉၀၃
ဂေဗလမြို့
ယေရှုလက်ထက် အစ္စရေးတွေ သိမ်းပိုက်ရမယ့် နယ်မြေတွေထဲမှာ “ဂေဗလမြို့” လည်း ပါတယ်။ (ယရ ၁၃:၁-၅) ဂေဗလမြို့က အစ္စရေးနိုင်ငံရဲ့ မြောက်ဘက် အတော်ဝေးဝေးမှာ (ဒန်မြို့ရဲ့ မြောက်ဘက် မိုင် ၆၀ အကွာမှာ) တည်ရှိလို့၊ အစ္စရေးတွေရဲ့ လက်အောက် ဘယ်တုန်းကမှ မကျရောက်ခဲ့လို့ အဲဒီအချက်က ရှေ့နောက်မညီဘူးလို့ ဝေဖန်ရေးသမားတွေက ဆိုကြတယ်။ ကျမ်းပညာရှင်တချို့က ဟီဘရူးကျမ်းမှာ ဒီကျမ်းချက် မှားနေတယ်၊ အမှန်တော့ ‘လက်ဘနွန်ရဲ့ ကပ်လျက် နယ်မြေ၊’ ‘ဂေဗလရဲ့ နယ်စပ်အထိ’ လို့ပဲ ဆိုရမယ်လို့ ပြောကြတယ်။ ဒါပေမဲ့ ယောရှု ၁၃:၂-၇ မှာ ပါတဲ့ ယေဟောဝါရဲ့ ကတိမှာ သတ်မှတ်ချက် ပါတယ်ဆိုတာ ထည့်စဉ်းစားသင့်တယ်။ အစ္စရေးတွေရဲ့ မနာခံမှုကြောင့် ဂေဗလမြို့ကို မသိမ်းပိုက်နိုင်ခဲ့တာ ဖြစ်တယ်။—ယရ ၂၃:၁၂၊ ၁၃ နဲ့နှိုင်းယှဉ်ပါ။
အောက်တိုဘာ ၂၅–၃၁
ကျမ်းစာထဲက အဖိုးတန်ဘဏ္ဍာများ | ယောရှု ၁၅–၁၇
“သင့်ရဲ့ အဖိုးတန် အမွေအနှစ်ကို ကာကွယ်ထိန်းသိမ်းပါ”
it-1 ၁၀၈၃ ပိုဒ်. ၃
ဟေဗြုန်မြို့
ခါနန်ပြည်တောင်ပိုင်းကို အစ္စရေးတွေ တိုက်ခိုက်သိမ်းပိုက်နေချိန်မှာ ဟေဗြုန်မြို့သားတွေဟာ ဘုရင် (ဟောဟံကို ဆက်ခံသူ ဖြစ်နိုင်) နဲ့အတူ ဖျက်ဆီးခံခဲ့ရတယ်။ (ယရ ၁၀:၃၆၊ ၃၇) ဒါပေမဲ့ ယောရှု ဦးဆောင်တဲ့ အစ္စရေးတွေ ခါနန်ရဲ့ အင်အားကို ဖြိုခွင်းပြီးနောက် မြို့တွေမှာ မြို့စောင့်တပ်တွေ ချက်ချင်း မထားခဲ့ဘူး။ အစ္စရေးတွေ တခြားနေရာမှာ စစ်တိုက်နေချိန်အတွင်း အာနကလူတွေက ဟေဗြုန်မြို့မှာ ပြန်လာအခြေချတယ်။ ဒါကြောင့် နောက်ပိုင်းမှာ ကာလက် (နဲ့ ယုဒအနွယ် စစ်သားတွေ) က အဲဒီမြို့ကို ပြန်ရဖို့ တိုက်ခိုက်ခဲ့ရတယ်။ (ယရ ၁၁:၂၁-၂၃။ ၁၄:၁၂-၁၅။ ၁၅:၁၃၊ ၁၄။ သူ ၁:၁၀) အစကတော့ ဟေဗြုန်မြို့ကို ယုဒအနွယ် ကာလက်ကို ပေးထားတာ။ နောက်တော့ ခိုလှုံရာမြို့အဖြစ် ဆက်ကပ်လိုက်တယ်။ ပုရောဟိတ်တွေ နေတဲ့ မြို့လည်း ဖြစ်လာတယ်။ ဒါပေမဲ့ “ဟေဗြုန်မြို့ရဲ့ လယ်မြေတွေနဲ့ ကျေးရွာတွေကိုတော့” အမွေအဖြစ် ကာလက် ပိုင်တယ်။—ယရ ၁၄:၁၃၊ ၁၄။ ၂၀:၇။ ၂၁:၉-၁၃။
it-1 ၈၄၈
ကျွန်အဖြစ် ခိုင်းစေ
ကျမ်းစာခေတ်တုန်းက သိမ်းပိုက်ခံရတဲ့ နယ်မြေက လူတွေကို “ကျွန်အဖြစ် ခိုင်းစေ” ခဲ့ကြတယ်။ (တရ ၂၀:၁၁။ ယရ ၁၆:၁၀။ ၁၇:၁၃။ ဧသ ၁၀:၁။ ရှာ ၃၁:၈။ မတ ၁:၁) အစ္စရေးတွေ ကျွန်ဘဝတုန်းက မတရားခိုင်းစေတဲ့ အီဂျစ် အလုပ်ကြပ်တွေ လက်အောက်မှာ စားနပ်ရိက္ခာ သိုလှောင်ဖို့ ပိသုံမြို့နဲ့ ရာမသက်မြို့ကို တည်ဆောက်ခဲ့ကြရတယ်။ (ထွ ၁:၁၁-၁၄) နောက်ပိုင်းမှာ အစ္စရေးတွေဟာ ယေဟောဝါ အမိန့်ပေးထားတဲ့အတိုင်း ခါနန်လူမျိုးတွေကို ပြည်ကနေ နှင်ထုတ်ပြီး ဖျက်ဆီးပစ်မယ့်အစား ကျွန်အဖြစ် ခိုင်းစေခဲ့ကြတယ်။ အဲဒါကြောင့် မှားယွင်းတဲ့ ဘုရားတွေကို ဝတ်ပြုကိုးကွယ်ဖို့ သွေးဆောင်ခံခဲ့ကြရတယ်။ (ယရ ၁၆:၁၀။ သူ ၁:၂၈။ ၂:၃၊ ၁၁၊ ၁၂) ခါနန်လူမျိုးကနေ ဆင်းသက်လာတဲ့ အာမောရိ၊ ဟိတ္တိ၊ ဖေရဇိ၊ ဟိဝိ၊ ယေဗုသိလူမျိုးတွေကို ဘုရင် ရှောလမုန်က ကျွန်အဖြစ် စေခိုင်းတယ်။—၁ဘု ၉:၂၀၊ ၂၁။
it-1 ၄၀၂ ပိုဒ်. ၃
ခါနန်ပြည်
အစ္စရေးတွေဟာ ခါနန်လူမျိုးတွေရဲ့ နယ်မြေအားလုံးကို မသိမ်းပိုက်နိုင်ခဲ့ပေမဲ့၊ လက်အောက်မခံတဲ့ ခါနန်လူမျိုး တချို့ ရှိပေမဲ့ “ယေဟောဝါက ဘိုးဘေးတွေကို ပေးမယ်လို့ ကတိပေးခဲ့တဲ့ပြည် တစ်ပြည်လုံး အစ္စရေးတွေကို ပေးတယ်။” “တစ်ပြည်လုံးကို ငြိမ်းချမ်းသာယာစေတယ်။” “အစ္စရေးတွေကို ပေးခဲ့တဲ့ ယေဟောဝါရဲ့ ကောင်းမွန်တဲ့ ကတိအားလုံး မပြည့်စုံဘဲ မနေဘူး။ တစ်ခုမကျန် ပြည့်စုံလာတယ်” လို့ ပြောနိုင်ပါတယ်။ (ယရ ၂၁:၄၂–၂၂:၁) အစ္စရေးတွေရဲ့ ရန်သူတွေဟာ ကြောက်လန့်ကြလို့ ပြန်တိုက်ခိုက်နိုင်စွမ်း မရှိကြဘူး။ ခါနန်လူမျိုးတွေကို တစ်ခါတည်း ဖျက်ဆီးလိုက်ရင် သားရိုင်း တိရစ္ဆာန်တွေ များလာပြီး အန္တရာယ်ပြုမှာ စိုးလို့ ဖြည်းဖြည်းချင်း နှင်ထုတ်ဖို့ အစောပိုင်းကတည်းက ဘုရား မိန့်မှာထားပြီးသား ဖြစ်တယ်။ (ထွ ၂၃:၂၉၊ ၃၀။ တရ ၇:၂၂) ခါနန်လူမျိုးမှာ သံဓားကောက် တပ်ထားတဲ့ စစ်မြင်းရထားတွေ ရှိပေမဲ့ တချို့နေရာကို အစ္စရေးတွေ မသိမ်းပိုက်နိုင်တာက ဘုရားရဲ့ ကတိစကား မပြည့်စုံတာ မဟုတ်ဘူး။ အစ္စရေးတွေရဲ့ ပျက်ကွက်မှုကြောင့် ဖြစ်တယ်။ (ယရ ၁၇:၁၆-၁၈။ သူ ၄:၁၃) အစ္စရေးတွေ စစ်ရှုံးတာဟာ သူတို့ရဲ့ သစ္စာမဲ့မှုကြောင့် ဖြစ်တယ်။—တလ ၁၄:၄၄၊ ၄၅။ ယရ ၇:၁-၁၂။
ဘုရားရေးရာ ရတနာ
သင် သိပါသလား
ရှေးခေတ် အစ္စရေးနိုင်ငံမှာ သစ်တောတွေ ရှိတယ်ဆိုတာ ဘယ်လို သိရသလဲ။
ကတိထားရာပြည်မှာ သစ်တော ဧရိယာတွေ ရှိတယ်။ သစ်ပင်တွေ “ပေါများ” တယ်လို့ ကျမ်းစာက ဆိုတယ်။ (၁ဘု ၁၀:၂၇။ ယရ ၁၇:၁၅၊ ၁၈) အခုအချိန်မှာ အစ္စရေးနိုင်ငံမှာ သစ်ပင်တွေ မရှိတဲ့ နေရာတွေ များနေတဲ့အတွက် ဝေဖန်သူတွေက အဲဒီလိုပြောတာ မှန်ပါ့မလားလို့ ပြောကြတယ်။
စာအုပ်တစ်အုပ် (Life in Biblical Israel) အဆိုအရ ရှေးခေတ် အစ္စရေးနယ်မြေမှာ အခုအချိန်ထက် သစ်တော ပိုများတယ်။ ကုန်းမြင့်ဒေသမှာ ထင်းရှူးပင်တွေ၊ ဝက်သစ်ချပင်တွေ၊ တာပင်တိုင်ဆီ ထုတ်တဲ့ အပင်တွေ သဘာဝအလျောက် ပေါက်နေတယ်။ ရှဖိလာအရပ် ဖြစ်တဲ့ အလယ်ရိုးမတောင်ခြေတွေနဲ့ မြေထဲပင်လယ် ကမ်းရိုးတန်းတစ်လျှောက်မှာ သဖန်းပင်တွေ အမြောက်အမြား ပေါက်ရောက်တယ်။
စာအုပ်တစ်အုပ်မှာ (Plants of the Bible) အစ္စရေးနိုင်ငံ တချို့ဒေသမှာ သစ်ပင်တွေ လုံးလုံးမရှိတော့ဘူးလို့ ဆိုတယ်။ ဘာကြောင့်လဲ။ စာအုပ်က ဒီလို ဆက်ရှင်းပြတယ်– “လူတွေက လယ်ယာတွေ၊ စားကျက်မြေတွေအတွက်နဲ့ သစ်တွေ၊ ထင်းတွေ ရဖို့ သဘာဝပေါက်ပင်တွေကို ခုတ်ထွင်ရှင်းလင်းကြလို့” တောတွေ တဖြည်းဖြည်း ပြုန်းသွားတယ်။