ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင်မှာပါတဲ့ အညွှန်းများ
စက်တင်ဘာ ၅-၁၁
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၉–၁၀
“ဉာဏ်ပညာကြီးမားတဲ့ ယေဟောဝါကို ချီးမွမ်းပါ”
ကြွယ်ဝစွာဆုချခံခဲ့ရသည့် လည်ပတ်မှု
မိဖုရားသည် ရှောလမုန်ကို တွေ့ဆုံသည့်အခါ “နက်နဲခက်ခဲသော ပြဿနာ [“မေးခွန်းများ၊” ကဘ]” နှင့် စုံစမ်းလေတော့သည်။ (၃ ဓမ္မရာဇဝင် ၁၀:၁) ဤတွင်အသုံးပြုထားသော ဟေဗြဲစကားလုံးကို “စကားထာများ” ဟု ပြန်ဆိုနိုင်သည်။ သို့ရာတွင် ဤသို့ဆိုသဖြင့် ထိုမိဖုရားသည် ရှောလမုန်နှင့် အပျော်တမ်း စကားထာဖွဲ့သည်ဟု မဆိုလိုပါ။ စိတ်ဝင်စားဖွယ်မှာ ဆာလံ ၄၉:၄ တွင် ၎င်းဟေဗြဲစကားလုံးကို အပြစ်၊ သေခြင်းနှင့် ရွေးနုတ်ခြင်းတို့နှင့်ပတ်သက်သော လေးနက်သည့် မေးခွန်းများကို ဖော်ပြရာ၌ အသုံးပြုထားသည်။ သို့ဖြစ်၍ ရှေဘပြည်၏ မိဖုရားသည် ရှောလမုန်၏ ဉာဏ်ပညာကို စမ်းရန် နက်နဲသော အကြောင်းအရာများကို သူနှင့် ဆွေးနွေးနေခြင်း ဖြစ်နိုင်သည်။ သူသည် “မိမိအလိုဆန္ဒရှိသမျှကို ဆွေးနွေးမေးမြန်းလေ၏” ဟု သမ္မာကျမ်းစာက ဖော်ပြထားသည်။ ရှောလမုန်ကလည်း “သူမေးမြန်းသော ပြဿနာရှိသမျှတို့ကို . . . ဖြေလေ၏။ နားမလည်၍ မဖြေနိုင်သောအရာ တစ်စုံတစ်ခုမျှမရှိ။”—၃ ဓမ္မရာဇဝင် ၁၀:၂ခ၊ ၃။
အတိုင်းထက်အလွန် ရက်ရောကြသောအခါ
မိဖုရားသည် ကြားရ၊ မြင်ရသော အရာများကို အံ့အားသင့်ကာ နှိမ့်ချစွာဖြင့် ဤသို့ပြန်ပြောခဲ့သည်– “ရှေ့တော်၌အစဉ်နေ၍ ပညာတော်ကိုကြားရသော . . . ကိုယ်တော်၏ ကျွန်တို့သည် မင်္ဂလာရှိကြပါ၏။” (၃ ဓမ္မရာဇဝင် ၁၀:၄-၈) ရှောလမုန်၏ ကျွန်များသည် ချမ်းသာကြွယ်ဝကြသည် မှန်သော်လည်း ယင်းကြောင့် ပျော်ရွှင်နေရခြင်းဖြစ်သည်ဟု သူမပြောခဲ့ချေ။ ၎င်းအစား၊ ရှောလမုန်၏ ကျွန်များသည် ရှောလမုန်၏ ဘုရားပေးဉာဏ်ပညာကို အစဉ်နားထောင်နိုင်သောကြောင့် ကောင်းချီးရရှိခဲ့ခြင်းဖြစ်သည်။ ဖန်ဆင်းရှင်နှင့် သားတော်ယေရှုခရစ်တို့ထံမှ ဉာဏ်ပညာကိုရရှိကြသော ယခုခေတ် ယေဟောဝါ၏ လူတို့အတွက် ရှေဘမိဖုရားသည် ပုံသက်သေကောင်းလှသည်တကား!
ကြွယ်ဝစွာဆုချခံခဲ့ရသည့် လည်ပတ်မှု
ရှေဘမိဖုရားသည် ရှောလမုန်၏ ဉာဏ်ပညာနှင့် သူ၏နိုင်ငံတော် ကောင်းစားမှုတို့ကို အလွန်စွဲမှတ်သွားရာ “မိန်းမောတွေဝေလျက်ရှိ” သည်။ (၃ ဓမ္မရာဇဝင် ၁၀:၄၊ ၅) ဤစကားစုကို အချို့က မိဖုရားသည် “အသက်ရှူမှားမတတ်” ဖြစ်ကျန်ခဲ့သည်ဟု ယူဆကြသည်။ ပညာရှင်တစ်ဦးက မိဖုရား မေ့မျောသွားသည်ဟုပင် ဖော်ပြထားသည်တကား! မည်သို့ပင်ဖြစ်စေ၊ မိဖုရားသည် သူကြားရမြင်ရသည့် အရာများကို အလွန်အံ့အားသင့်ခဲ့သည်။ ရှောလမုန်၏ ဉာဏ်ပညာကို ကြားရကြသည့် သူ၏ကျေးကျွန်များသည် မင်္ဂလာရှိကြောင်း သူမြွက်ဆိုကာ ရှောလမုန်ကို နန်းတင်ပေးသော ယေဟောဝါအား ချီးမွမ်းထောမနာပြုခဲ့သည်။ ထို့နောက် မင်းကြီးအား အဖိုးတန်လက်ဆောင်များ ပေးခဲ့ရာ ရွှေတစ်မျိုးတည်းက မျက်မှောက်ခေတ် တန်ဖိုးနှင့်ဆိုလျှင် ဒေါ်လာသန်း ၄၀ ခန့်ရှိသည်။ ရှောလမုန်လည်း လက်ဆောင်များ ပေးခဲ့ပြီး မိဖုရား၏ “အလိုဆန္ဒ ပြည့်စုံစေခြင်းငှာ၊ သူတောင်းသမျှ” ကိုပေးလေ၏။—၃ ဓမ္မရာဇဝင် ၁၀:၆-၁၃။
ဘုရားရေးရာ ရတနာ
သင်သိပါသလော
ဘုရင်ရှောလမုန်သည် ရွှေမည်မျှပိုင်ဆိုင်သနည်း။
တုရုဘုရင် ဟိရံနှင့် ရှေဘမိဖုရားသည် ရှောလမုန်ထံ ရွှေလေးတန်စီ ဆက်သခဲ့ပြီး ရှောလမုန်၏ သင်္ဘောများသည် သူ့ထံသို့ ဩဖိရမြို့မှ ရွှေတစ်ဆယ့်ငါးတန် ဆောင်ခဲ့ကြောင်း ကျမ်းစာက ဖော်ပြသည်။ “ရှောလမုန်ထံသို့ တစ်နှစ်တစ်နှစ်လျှင် ရောက်သောရွှေအချိန်ကား အခွက်ခြောက်ရာခြောက်ဆယ့်ခြောက်ပိဿာ” သို့မဟုတ် ၂၅ တန်ကျော်ဖြစ်သည်ဟု မှတ်တမ်းကဆိုသည်။ (၃ ဓမ္မရာဇဝင် ၉:၁၄၊ ၂၈; ၁၀:၁၀၊ ၁၄) ယင်းသို့ဖြစ်နိုင်ပါသလော။ ထိုအချိန်များအတွင်း နန်းတော်တွင်ရှိသော ရွှေပမာဏ မည်မျှများပြားသနည်း။
စစ်မှန်သည်ဟု ကျမ်းပညာရှင်များ ယူဆသော ရှေးခေတ် ကျောက်စာတစ်ခုတွင် အီဂျစ်ဘုရင် တတိယမြောက် ဖာရော ထူးမို့စ် (ဘီစီ နှစ်ထောင်) သည် ရွှေ ၁၃.၅ တန်ခန့်ကို ကာနက်မြို့ရှိ အမွန်ရာဗိမာန်၌ ဆက်သကြောင်း ဖော်ပြထားသည်။ ဘီစီရှစ်ရာစုအတွင်း အဆီးရီးယားဘုရင် တတိယမြောက် တိဂလတ်ပိလေသာသည် တုရုမြို့မှ ရွှေ ၄ တန်ကျော်ကို ဆက်ကြေးရပြီး ဒုတိယမြောက် သာဂုန်သည် အလားတူ ရွှေပမာဏကို ဗာဗုလုန် နတ်ဘုရားများထံ ဆက်သခဲ့သည်။ မက်စီဒိုးနီးယားဘုရင် ဒုတိယမြောက်ဖိလစ် (ဘီစီ ၃၅၉-၃၃၆) သည် သရေးစ်ဒေသရှိ ပန်ဂျာအမ် မိုင်းတွင်းများမှ နှစ်စဉ် ရွှေတန်ချိန် ၂၈ တန်ကျော် ရရှိသည်။
ဖိလစ်၏သား မဟာအလက်ဇန္ဒား (ဘီစီ ၃၃၆-၃၂၃) သည် ပါးရှားနိုင်ငံ၊ စူးစားမြို့ကို သိမ်းပိုက်စဉ် ထိုမြို့မှ ရွှေတန်ချိန်ပေါင်း ၁,၁၈၀ ခန့်နှင့် ပါးရှားတစ်နိုင်ငံလုံးမှ တန်ပေါင်း ၇,၀၀၀ နီးပါးကို သိမ်းယူခဲ့သည်။ ထို့ကြောင့် ထိုမှတ်တမ်းများနှင့်ယှဉ်လျှင် ဘုရင်ရှောလမုန်၏ ရွှေပိုင်ဆိုင်မှုနှင့်ပတ်သက်၍ ကျမ်းစာဖော်ပြချက်မှာ အကျယ်ချဲ့ထားခြင်း မဟုတ်ပေ။
စက်တင်ဘာ ၁၂-၁၈
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၁၁–၁၂
“အိမ်ထောင်ဖက်ကို ပညာရှိရှိ ရွေးချယ်ပါ”
‘ယေဟောဝါဘုရားဘက် ဘယ်သူ ရပ်တည်မလဲ’
၇ ဘုရင်ရှောလမုန်ရဲ့ ဖြစ်ရပ်ကနေ များစွာသင်ယူနိုင်တယ်။ ငယ်ရွယ်စဉ်မှာ ယေဟောဝါရဲ့ လမ်းညွှန်မှုကို သူရှာဖွေခဲ့တယ်။ ဒါကြောင့် ဘုရားသခင်က သူ့ကို ဉာဏ်ပညာပေးပြီး ဂျေရုဆလင်မှာ ခမ်းနားတဲ့ ဗိမာန်တော် တည်ဆောက်ခွင့်ပေးတယ်။ ဒါပေမဲ့ ရှောလမုန်ဟာ ယေဟောဝါနဲ့ ရင်းနှီးတဲ့ ဆက်ဆံရေး ဆုံးရှုံးခဲ့တယ်။ (၁ ဘု. ၃:၁၂။ ၁၁:၁၊ ၂) ဘုရင်တွေ “စိတ်နှလုံး လမ်းမလွဲရလေအောင် မိဖုရားအများကြီး မထား” ဖို့ ပညတ်တရားမှာ တိတိကျကျ တားမြစ်ထားတယ်။ (တရား. ၁၇:၁၇) ရှောလမုန် မနာခံဘဲ မိဖုရား ၇၀၀၊ မောင်းမ ၃၀၀ သိမ်းယူခဲ့တယ်။ (၁ ဘု. ၁၁:၃) မိဖုရားအများစုက အစ္စရေးလူမျိုး မဟုတ်ဘူး။ မှားယွင်းတဲ့ဘုရားတွေ ကိုးကွယ်ကြတယ်။ ဒါကြောင့် တိုင်းတစ်ပါး မိန်းမတွေကို မယူနဲ့ဆိုတဲ့ ဘုရားသခင့်ပညတ်ကိုလည်း သူ မနာခံခဲ့ဘူး။—တရား. ၇:၃၊ ၄။
စိတ်နှလုံးကို ဘယ်လို ကာကွယ်စောင့်ရှောက်နိုင်သလဲ
၆ စာတန်က ကျွန်တော်တို့ကို သူ့လို ဖြစ်စေချင်တယ်။ ယေဟောဝါရဲ့ စံနှုန်းတွေကို လျစ်လျူရှုပြီး တစ်ကိုယ်ကောင်းဆန်တဲ့သူ ဖြစ်စေချင်တယ်။ ဒါပေမဲ့ အတင်း ဖိအားပေးလို့တော့ မရဘူး။ ဒါကြောင့် တခြားနည်းတွေနဲ့ ကြိုးစားတယ်။ ဥပမာ၊ စာတန်က မိမိကြောင့် ပျက်စီးနေတဲ့သူတွေကို ကျွန်တော်တို့ ပတ်လည်မှာ ရှိနေစေတယ်။ (၁ ယော. ၅:၁၉) မကောင်းတဲ့ အပေါင်းအသင်းက အတွေးအခေါ်နဲ့ လုပ်ရပ်ကို “ပျက်စီးစေ” မှန်း သိလျက်နဲ့ ကျွန်တော်တို့ ပေါင်းသင်းမှာပဲလို့ စာတန် မျှော်လင့်တယ်။ (၁ ကော. ၁၅:၃၃) ဘုရင် ရှောလမုန်ကို အဲဒီနည်းနဲ့ စာတန် အောင်မြင်ခဲ့တယ်။ ရှောလမုန်ရဲ့ အယူမှား မိန်းမတွေက ယေဟောဝါဆီကနေ “စိတ်ယိုင်သွားအောင် လုပ်” ခဲ့ကြတယ်။—၁ ဘု. ၁၁:၃။
‘ယေဟောဝါဘုရားဘက် ဘယ်သူ ရပ်တည်မလဲ’
၉ အမှားလုပ်တာကို ယေဟောဝါ ဘယ်တော့မှ လျစ်လျူမရှုပါဘူး။ “ရှောလမုန်က အိပ်မက်မှာ နှစ်ကြိမ်ရောက်လာတဲ့အရှင် . . . ယေဟောဝါဆီကနေ စိတ်ယိုင်သွားတဲ့အတွက် သူ့ကို ယေဟောဝါ အကြီးအကျယ် အမျက်ထွက်တယ်။ တခြားဘုရားတွေနောက် မလိုက်ဖို့ ယေဟောဝါ သတိပေးခဲ့ပေမဲ့ သူ မနာခံဘူး” လို့ ကျမ်းစာမှာ ပြောထားတယ်။ ရလဒ်အနေနဲ့ ဘုရားသခင့် မျက်နှာသာနဲ့ ထောက်မမှုကို ဆုံးရှုံးခဲ့ရတယ်။ ရှောလမုန်ရဲ့ နောက်ပိုင်းမင်းဆက်တွေ လက်ထက်မှာ အစ္စရေးနိုင်ငံ ပြိုကွဲခဲ့ပြီး ဘေးဆိုးများစွာ ကြုံခဲ့ရတယ်။—၁ ဘု. ၁၁:၉-၁၃။
ဘုရားရေးရာ ရတနာ
ဘုရားသခင့် မျက်နှာသာ ရနိုင်ခဲ့သူ
ပုန်ကန်မှုကို နှိမ်နင်းဖို့ စစ်တပ်ကို ရောဗောင် စုရုံးလိုက်တယ်။ ဒါပေမဲ့ “မင်းတို့ရဲ့ညီအစ်ကို အစ္စရေးတွေကို သွားမတိုက်ခိုက်ကြနဲ့။ ကိုယ့်အိမ်ကိုယ် ပြန်ကြ။ ဒီလိုဖြစ်လာအောင်လုပ်တာ ငါပဲ” လို့ ပရောဖက် ရှေမာယကတစ်ဆင့် ယေဟောဝါ ပြောတယ်။—၁ ဘု. ၁၂:၂၁-၂၄။
လုံးဝ မတိုက်ခိုက်ရတော့ဘူးလား။ ရောဗောင် ဘယ်လောက် စိတ်ဒုက္ခရောက်မလဲဆိုတာ မြင်ယောင်ကြည့်ပါ။ “ဆူးချွန်တွေပါတဲ့ ကျာပွတ်နဲ့” ဒဏ်ပေးမယ်လို့ ပြောခဲ့တဲ့ ဘုရင်က ပုန်ကန်မှုကို ငြိမ်ခံနေရင် လူတွေ ဘယ်လို ထင်မလဲ။ (၂ ရာဇဝင်ချုပ် ၁၃:၇ နဲ့နှိုင်းယှဉ်ပါ။) ဘာပဲဖြစ်ဖြစ် ဘုရင်နဲ့ စစ်တပ်က “ယေဟောဝါရဲ့ စကားကို နာခံပြီး ယေဟောဝါ ပြောတဲ့အတိုင်း အိမ်ပြန်သွားကြတယ်။”
ဘာသင်ခန်းစာ ရသလဲ။ လှောင်ပြောင်ခံရရင်တောင် ဘုရားသခင်ကို နာခံတာ ပညာရှိတယ်။ နာခံမှုက ဘုရားသခင့်မျက်နှာသာနဲ့ ကောင်းချီး ရစေတယ်။—တရား. ၂၈:၂။
ရောဗောင် ဘာအကျိုး ရခဲ့သလဲ။ တည်ထောင်ခါစ နိုင်ငံသစ်ကို တိုက်မယ့် အစီအစဉ် ဖျက်ပြီး မိမိပိုင်နက် ယုဒနဲ့ ဗင်ယာမိန်နယ်မြေထဲမှာ မြို့တွေ တည်ဆောက်တယ်။ “မြို့တွေ ပိုခိုင်ခံ့အောင် အကြီးအကျယ် လုပ်ဆောင်တယ်။” (၂ ရာ. ၁၁:၅-၁၂) ယေဟောဝါရဲ့ ပညတ်တွေကို အတော်ကြာကြာ လိုက်နာခဲ့တယ်။ ယေရောဗောင်လက်အောက်က အစ္စရေး ဆယ်နွယ်နိုင်ငံဟာ ရုပ်တုကိုးကွယ်ကြပေမဲ့ လူများစွာကတော့ စစ်မှန်တဲ့ ဝတ်ပြုရေးဘက် ရပ်တည်ဖို့ ဂျေရုဆလင်ကို လာခြင်းအားဖြင့် “ရောဗောင်မင်းကို ထောက်ခံအားပေးကြတယ်။” (၂ ရာ. ၁၁:၁၆၊ ၁၇) ရောဗောင်ရဲ့ နာခံမှုကြောင့် နိုင်ငံ ခိုင်မာတောင့်တင်းလာတယ်။
စက်တင်ဘာ ၁၉-၂၅
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၁၃–၁၄
“ဘာကြောင့် ရောင့်ရဲပြီး ကျိုးနွံသင့်သလဲ”
ပြည့်ဝသောနှလုံးဖြင့် တည်ကြည်မှုကို ထိန်းသိမ်းပါ
၄ ထို့နောက် ယေရောဗောင်က မှန်သောဘုရားသခင်၏လူအား “ငါနှင့်အတူလိုက်၍ အားဖြည့်လော့။ လက်ဆောင်ပေးမည်” ဟုဖိတ်ခေါ်သည်။ (၃ ရာ. ၁၃:၇) ယခု ပရောဖက် အဘယ်အရာပြုမည်နည်း။ ဘုရင်အား ပြစ်တင်ရှုတ်ချသည့် သတင်းစကားကို ထုတ်ဆင့်ပြီးနောက် ဘုရင်၏ ဧည့်ဝတ်ပြုမှုကို လက်ခံသင့်သလော။ (ဆာ. ၁၁၉:၁၁၃) သို့မဟုတ် ဘုရင်သည် နောင်တရသည့်ပုံဖြစ်သည့်တိုင် ဘုရင်၏ ဖိတ်ခေါ်ချက်ကို ငြင်းပယ်သင့်သလော။ ယေရောဗောင်သည် ချမ်းသာကြွယ်ဝသူဖြစ်ပြီး မိမိမိတ်ဆွေများအပေါ် အလွန်ရက်ရောနိုင်သည်။ ဘုရားသခင့် ပရောဖက်၏ စိတ်တွင် ရုပ်ပစ္စည်းတပ်မက်မှု လျှို့ဝှက်စွာ ကိန်းအောင်းနေမည်ဆိုလျှင် ဘုရင်၏ ကမ်းလှမ်းမှုသည် သူ့အဖို့ အလွန်ကြီးမားသော သွေးဆောင်မှု ဖြစ်ပေမည်။ သို့သော် ယေဟောဝါက ပရောဖက်အား “မုန့်ကိုမစားနှင့်။ ရေကိုမသောက်နှင့်။ လာသောလမ်းဖြင့် မပြန်နှင့်” ဟုမြစ်တားထားသည်။ ထို့ကြောင့် ပရောဖက်က ရှင်းလင်းပြတ်သားစွာ ဤသို့ပြန်ဖြေ၏– “နန်းတော်တစ်ဝက်ကိုပေးသော်လည်း သင်နှင့်အတူ ငါမလိုက်။ ဤအရပ်၌ မုန့်ကိုမစား၊ ရေကိုလည်းမသောက်။” ယင်းနောက် ပရောဖက်သည် အခြားလမ်းဖြင့် ဗေသလမှ ထွက်သွားသည်။ (၃ ရာ. ၁၃:၈-၁၀) ပရောဖက်၏ဆုံးဖြတ်ချက်က အကြွင်းမဲ့ တည်ကြည်မှုနှင့်ပတ်သက်၍ ကျွန်ုပ်တို့အား အဘယ်သင်ခန်းစာ သင်ပေးသနည်း။—ရော. ၁၅:၄။
ပြည့်ဝသောနှလုံးဖြင့် တည်ကြည်မှုကို ထိန်းသိမ်းပါ
၁၅ ယုဒပြည်မှလာသော ပရောဖက်၏အမှားမှ ကျွန်ုပ်တို့ တခြားအဘယ်အရာ သင်ယူနိုင်သနည်း။ နယပုံပြင် ၃:၅ ကဤသို့ဆို၏– ‘ယေဟောဝါကို စိတ်နှလုံးအကြွင်းမဲ့ ကိုးစားလော့။ ကိုယ်ဉာဏ်ကို အမှီမပြုနှင့်။’ ယုဒပြည်မှလာသော ပရောဖက်သည် ယခင်ကအတိုင်း ယေဟောဝါအား ဆက်၍ ယုံကြည်ကိုးစားမည့်အစား ဤအဖြစ်တွင်မူ သူသည် မိမိ၏ ဝေဖန်ပိုင်းခြားနိုင်စွမ်းကို ကိုးစားခဲ့သည်။ သူ၏အမှားက သူ၏အသက်နှင့် ဘုရားသခင်ရှေ့ သူ၏နာမည်ကောင်းကိုပါ ဆုံးရှုံးစေခဲ့သည်။ ယေဟောဝါ၏ အမှုတော်ကို ထမ်းဆောင်ရာတွင် ကျိုးနွံခြင်း၊ တည်ကြည်ခြင်းရှိရန် အရေးကြီးမှုကို အလေးပေးဖော်ပြသည်။
ပြည့်ဝသောနှလုံးဖြင့် တည်ကြည်မှုကို ထိန်းသိမ်းပါ
၁၀ ယုဒပြည်မှပရောဖက်သည် သက်ကြီးပရောဖက်၏ လှည့်စားမှုကို တွေ့မြင်ဖို့ ကောင်းသည်။ မိမိကိုယ်ကို ဤသို့မေးနိုင်သည်– ‘ယေဟောဝါဟာ ငါ့အတွက် ညွှန်ကြားချက်အသစ်ပေးဖို့ ကောင်းကင်တမန်တစ်ပါးကို တခြားတစ်ယောက်ဆီ ဘာကြောင့်စေလွှတ်မှာလဲ။’ ပရောဖက်သည် ညွှန်ကြားချက်ကို ရှင်းရှင်းလင်းလင်း သိမြင်ရန် ယေဟောဝါထံ တောင်းလျှောက်နိုင်သည်၊ သို့သော် သူထိုသို့ပြုလုပ်ခဲ့သည်ဟု သမ္မာကျမ်းစာတွင် မဖော်ပြထားပါ။ ယင်းအစား “ဘုရားသခင်၏လူသည် ပရောဖက်နှင့်အတူ ပြန်လာ၍ သူ၏အိမ်မှာ မုန့်ကိုစား၏။ ရေကိုလည်း သောက်၏။” ယင်းကို ယေဟောဝါ မနှစ်သက်ခဲ့ပါ။ နောက်ဆုံး လှည့်စားခံရသည့် ပရောဖက် ယုဒပြည်သို့ ပြန်သည့်အခါ ခြင်္သေ့နှင့်တွေ့ပြီး ခြင်္သေ့ကိုက်သတ်ခံခဲ့ရသည်။ သူ၏ပရောဖက်တာဝန်သည် ဝမ်းနည်းစရာနှင့် နိဂုံးချုပ်ခဲ့သည်။—၃ ရာ. ၁၃:၁၉-၂၅။
ဘုရားရေးရာ ရတနာ
ကိုယ်တော်သည် လူတို့၏ကောင်းကွက်ကို ရှာတော်မူ
အရေးကြီးဆုံးအချက်မှာ ၃ ဓမ္မရာဇဝင် ၁၄:၁၃ ပါစကားများသည် ယေဟောဝါဘုရားသခင်အကြောင်း၊ ကျွန်ုပ်တို့တွင် ကိုယ်တော်ရှာဖွေနေသောအရာနှင့်ပတ်သက်၍ နှစ်လို့ဖွယ်ကောင်းသော အရာတစ်ခုအကြောင်း ကျွန်ုပ်တို့အား သင်ပေးနေခြင်းဖြစ်သည်။ အဘိယတွင် ကောင်းသောအရာတစ်ခုခု ရှိခဲ့ကြောင်း သတိရပါ။ ယေဟောဝါဘုရားသခင်သည် အဘိယ၏နှလုံးထဲတွင် ကောင်းကွက်ကို တွေ့သည်အထိ မရမက ရှာဖွေခဲ့သည်မှာ ထင်ရှား၏။ အဘိယ၏ မိသားစုနှင့် နှိုင်းယှဉ်လျှင် သူသည် “ကျောက်စရစ်ပုံထဲမှ” ပုလဲလုံးလေးတစ်လုံးနှင့် တူ၏ဟု ကျမ်းပညာရှင်တစ်ဦးက ရေးသားခဲ့သည်။ ယေဟောဝါဘုရားသခင်သည် ဆိုးသွမ်းသော မိသားစုထဲမှဖြစ်သော အဘိယ၏ ကောင်းကွက်ကို တန်ဖိုးထားကာ ဆုချသည့်အနေနှင့် သနားကြင်နာမှု အထိုက်အလျောက် ပေးခဲ့သည်။
စက်တင်ဘာ ၂၆–အောက်တိုဘာ ၂
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၁၅–၁၆
“အာသက သတ္တိရှိရှိ လုပ်ဆောင်ခဲ့၊ သင်ကော”
“သင်တို့ကျင့်သည်အတိုင်း အကျိုးကိုခံရကြမည်”
အစ္စရေးနဲ့ ယုဒဆိုပြီး အစ္စရေးနိုင်ငံ နှစ်ခြမ်းကွဲပြီးတဲ့နောက် အနှစ် ၂၀ အတွင်းမှာ ယုဒနိုင်ငံက အယူမှားဝတ်ပြုရေးတွေနဲ့ ပြည့်နှက်နေခဲ့တယ်။ အာသ ဘုရင်ဖြစ်လာတဲ့ ဘီစီ ၉၇၇ မှာဆိုရင် နန်းတော်မှာတောင် ခါနာန်လူမျိုးတွေရဲ့ မျိုးပွားနတ်ဘုရားတွေကို ဝတ်ပြုကြတဲ့ မင်းမှုထမ်းတွေရှိခဲ့တယ်။ ဒါပေမဲ့ အာသအုပ်စိုးချိန်အကြောင်း ဘုရားသခင့်စွမ်းအားတော် တိုက်တွန်းမှုနဲ့ ရေးသားထားတဲ့ မှတ်တမ်းမှာ အာသဟာ ‘မိမိဘုရားသခင် ယေဟောဝါရှေ့တော်၌ ကောင်းသောအမှု၊ ဖြောင့်မတ်သောအမှုတို့ကိုပြု’ ခဲ့တယ်လို့ ဖော်ပြထားတယ်။ အာသက ‘တစ်ပါးအမျိုးသား ဘုရားသခင်၏ ယဇ်ပလ္လင်တို့ကိုလည်းကောင်း၊ မြင့်သောအရပ်တို့ကိုလည်းကောင်း ပယ်ရှား၏။ ရုပ်တုဆင်းတုတို့ကို ဖြိုဖျက်၍ အာရှရပင်တို့ကို ခုတ်လှဲ၏။’ (၆ ရာ. ၁၄:၂၊ ၃) အယူမှားဝတ်ပြုရေးရဲ့ ကဏ္ဍတစ်ခုဖြစ်တဲ့ ဝတ်ပြုရာအိမ်တော်မှာ ယောက်ျားချင်း မေထုန်ပြုကြတဲ့ ပြည့်တန်ဆာယောက်ျားတွေကို ယုဒနိုင်ငံကနေ ဖယ်ရှားခဲ့တယ်။ ဒါပေမဲ့ အာသက အယူမှားဝတ်ပြုရေးကို ဖယ်ရှားပစ်ရုံထက်မက လုပ်ဆောင်ခဲ့တယ်။ တိုင်းသူပြည်သားတွေကို ‘ဘိုးဘေးတို့၏ ဘုရားသခင် ယေဟောဝါကိုရှာ’ ဖို့နဲ့ “ပညတ်တရားကို စောင့်ရှောက်” ဖို့လည်း တိုက်တွန်းခဲ့တယ်။—၃ ရာ. ၁၅:၁၂၊ ၁၃။ ၆ ရာ. ၁၄:၄။
ယေဟောဝါကို စုံလင်တဲ့စိတ်နှလုံးနဲ့ ဝတ်ပြုပါ
၇ ဘုရားသခင်ကို အကြွင်းမဲ့ ဆည်းကပ်နေမနေ သိဖို့ ကျွန်တော်တို့ယောက်တိုင်း ကိုယ့်စိတ်နှလုံးကို ဆန်းစစ်နိုင်တယ်။ ‘ယေဟောဝါရဲ့ နှစ်သက်မှု ရဖို့၊ စစ်မှန်တဲ့ ဝတ်ပြုရေးကို ကာကွယ်ဖို့၊ မကောင်းတဲ့ဩဇာကနေ ဘုရားလူမျိုးကို ကာကွယ်ဖို့ ငါစိတ်ပိုင်းဖြတ်ထားသလား’ လို့ ကိုယ့်ကိုယ်ကိုယ် မေးပါ။ “မိဖုရား” မာခါကို ရင်ဆိုင်ဖို့ အာသ ဘယ်လောက် သတ္တိမွေးခဲ့ရမလဲဆိုတာ စဉ်းစားကြည့်ပါ။ မာခါလို လူစားမျိုးကို သင် သိချင်မှသိမယ်။ ဒါပေမဲ့ အာသရဲ့ စိတ်ထက်သန်မှုကို တုပနိုင်တဲ့ အခြေအနေတွေ ရှိနိုင်ပါတယ်။ ဥပမာ၊ မိသားစုဝင်၊ ရင်းနှီးတဲ့ မိတ်ဆွေတစ်ယောက်ယောက် အပြစ်လုပ်ပြီး နောင်တမယူလို့ နှင်ထုတ်ခံရတော့မယ်ဆိုရင် ဘယ်လို လုပ်မလဲ။ သူနဲ့ ပြတ်ပြတ်သားသား အဆက်အသွယ် ဖြတ်လိုက်မလား။ ဘာလုပ်ဖို့ သင့်စိတ်နှလုံး လှုံ့ဆော်ပေးမလဲ။
it-1 ၁၈၄-၁၈၅
အာသ
အာသဟာ ဉာဏ်ပညာ၊ ထိုးထွင်းဉာဏ် မရှိချိန်တွေ ရှိခဲ့ပေမဲ့ အယူဖောက်ပြန်မှုနဲ့ ကင်းတဲ့အတွက် သူ့ရဲ့ အရည်အသွေးကောင်းက အမှားတွေထက် ပိုအလေးစီးခဲ့ပုံ ရတယ်။ ဒါကြောင့် သူ့ကို သစ္စာရှိတဲ့ ယုဒဘုရင်တစ်ဦးအဖြစ် ယူမှတ်ကြတယ်။ (၂ရ ၁၅:၁၇) အာသဘုရင် အုပ်ချုပ်ချိန် ၄၁ နှစ်အတွင်းမှာ အစ္စရေးဘုရင်တွေ ရှစ်ဦးဖြစ်တဲ့ ယေရောဗောင်၊ နာဒပ်၊ ဗာရှာ၊ ဧလာ၊ ဇိမရိ၊ ဩမရိ၊ တိဗနိ (အစ္စရေး တစ်စိတ်တစ်ပိုင်းကို ဩမရိနဲ့ ပြိုင်ဘက်အုပ်ချုပ်ခဲ့သူ)၊ အာဟပ်တို့ အုပ်ချုပ်ခဲ့တယ်။ (၁ဘု ၁၅:၉၊ ၂၅၊ ၃၃။ ၁၆:၈၊ ၁၅၊ ၁၆၊ ၂၁၊ ၂၃၊ ၂၉) အာသမင်း ကွယ်လွန်သွားပြီးနောက် သားတော် ယောရှဖတ် ဘုရင်ဖြစ်လာတယ်။—၁ဘု ၁၅:၂၄။
ဘုရားရေးရာ ရတနာ
ဘုရားသခင်သည် သင့်အတွက်ပုဂ္ဂိုလ်စင်စစ်ဖြစ်သလော
ဥပမာ၊ ယေရိခေါမြို့ကို ပြန်လည်တည်ဆောက်ခြင်းအတွက် ခံရမည့် အပြစ်ဒဏ်နှင့်ပတ်သက်သော ပရောဖက်ပြုချက်ကို ဖတ်ပြီး ယင်း၏ပြည့်စုံချက်ကို သုံးသပ်ပါ။ ယောရှု ၆:၂၆ ကဤသို့ဖော်ပြသည်– “ထိုအခါ ယောရှုက ‘အကြင်သူသည် ထ၍ ယေရိခေါမြို့ကို တည်ပြန်၏၊ ထိုသူသည် ထာဝရဘုရားရှေ့တော်၌ ကျိန်အပ်သောသူ ဖြစ်ပါစေ။ သူသည် သားဦးလက်ထက်၌ မြို့ရိုးအမြစ်ကိုတည်၍ သားထွေးလက်ထက်၌ မြို့တံခါးတို့ကို ထောင်ပါစေ’ ဟု ကျိန်ဆိုလေ၏။” နှစ်ပေါင်း ၅၀၀ ခန့်ကြာပြီးနောက် ၎င်းသည် ပြည့်စုံလာခဲ့ကြောင်း ၃ ဓမ္မရာဇဝင် ၁၆:၃၄ တွင်ကျွန်ုပ်တို့ ဤသို့ဖတ်ရသည်– “အာဟပ်လက်ထက်၌ ဗေသလမြို့သား ဟိဧလသည် ယေရိခေါမြို့ကို တည်၏။ ထာဝရဘုရားသည် နုန်၏သား ယောရှုအားဖြင့် မိန့်တော်မူသည်နှင့်အညီ၊ သားဦး အဘိရံလက်ထက်၌ မြို့ရိုးအမြစ်ကို တည်၍၊ သားထွေး စေဂုပ်လက်ထက်၌ မြို့တံခါးတို့ကို ထောင်၏။” ပုဂ္ဂိုလ်စင်စစ်ဖြစ်သော ဘုရားသခင်တစ်ပါးတည်းသာ ထိုသို့သော ပရောဖက်ပြုချက်များကို မှုတ်သွင်းနိုင်ပြီး ယင်းတို့ပြည့်စုံလာစေရန် စီမံပေးနိုင်သည်။
အောက်တိုဘာ ၃-၉
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၁၇–၁၈
“အယူအဆနှစ်ခုကြားမှာ ဘယ်လောက်ကြာကြာ ချီတုံချတုံ ဖြစ်နေကြမှာလဲ”
သက်ဝင်ယုံကြည်ပါ၊ ပညာရှိစွာ ဆုံးဖြတ်ပါ
၆ ရှေးအစ္စရေးလူမျိုးတွေ ကတိထားရာပြည်မှာ အခြေချပြီးတာနဲ့ ယေဟောဝါကို ဝတ်ပြုမလား၊ တခြားဘုရား(တွေ)ကို ဝတ်ပြုမလားဆိုတဲ့ အရေးကြီးဆုံးဖြတ်ချက် ချခဲ့ရတယ်။ (ယောရှု ၂၄:၁၅ ကိုဖတ်ပါ။) လွယ်ကူတဲ့ ဆုံးဖြတ်ချက်လို့ ထင်ရပေမဲ့ သေရေးရှင်ရေးဖြစ်တယ်။ တရားသူကြီးတွေခေတ်မှာလည်း အစ္စရေးတွေ ပညာမဲ့စွာ ဆုံးဖြတ်ခဲ့ကြတယ်။ ယေဟောဝါကို ကျောခိုင်းပြီး မှားယွင်းတဲ့ဘုရားတွေကို ကိုးကွယ်ခဲ့ကြတယ်။ (သူကြီး. ၂:၃၊ ၁၁-၂၃) ဆုံးဖြတ်ဖို့ လိုအပ်ခဲ့တဲ့ သမိုင်းဖြစ်ရပ်တစ်ခုကိုလည်း စဉ်းစားကြည့်ပါ။ ယေဟောဝါကို ဝတ်ပြုမလား၊ မှားယွင်းတဲ့ဘုရား ဗာလကို ဝတ်ပြုမလားဆိုပြီး ပရောဖက် ဧလိယ ရှင်းရှင်းမေးခဲ့တယ်။ (၃ ရာ. ၁၈:၂၁၊ ကဘ) မပြတ်မသားဖြစ်နေလို့ အစ္စရေးတွေကို ဧလိယ အပြစ်တင်ခဲ့တယ်။ ယေဟောဝါကို ဝတ်ပြုတာ အမြဲ ပညာရှိပြီး အကျိုးပြုတဲ့အတွက် ဆုံးဖြတ်ရလွယ်တယ်လို့ ထင်ရနိုင်တယ်။ ဆင်ခြင်တုံတရားရှိတဲ့သူ ဘယ်သူမှ ဗာလဘက် ပါမှာ မဟုတ်ဘူး။ ဒါပေမဲ့ အစ္စရေးတွေဟာ ‘အယူအဆနှစ်ခုကြားမှာ ချီတုံချတုံ ဖြစ်နေကြ’ တယ်။ ယေဟောဝါကို ဝတ်ပြုဖို့ လူတွေကို ဧလိယ တိုက်တွန်းခဲ့တာ ပညာရှိပါတယ်။
စစ်မှန်တဲ့ ဝတ်ပြုရေးဘက် သူ ရပ်တည်ခဲ့
၁၅ ဧလိယရဲ့စကားကို တုံ့ပြန်တဲ့အနေနဲ့ ဗာလပုရောဟိတ်တွေဟာ ပိုပြီးတောင် သွေးရူးသွေးတန်း ဖြစ်လာကြပြီး “အသံကုန် အော်ခေါ်ကြတယ်။ သူတို့ရဲ့ ထုံးစံအတိုင်း ကိုယ့်အသားကို ဓားမြှောင်တွေ၊ လှံတွေနဲ့ မွှန်းပြီး တစ်ကိုယ်လုံး သွေးသံရဲရဲ ဖြစ်နေကြတယ်။” ဒါပေမဲ့ ဘာမှ မထူးခြားဘူး။ “ပြန်ထူးတဲ့သူ၊ အရေးလုပ်တဲ့သူလည်း မရှိဘူး။” (၁ ဘု. ၁၈:၂၈၊ ၂၉) ဗာလဘုရားဆိုတာ ရှိမှမရှိတာ။ လူတွေကို ယေဟောဝါဆီကနေ ဝေးကွာသွားစေဖို့ စာတန် ဖန်တီးထားတာ။ ယေဟောဝါဘုရားကို မဟုတ်ဘဲ တခြားသခင် တစ်ပါးပါးကို ရွေးချယ်မယ်ဆိုရင် စိတ်ပျက်စရာ၊ အရှက်ရစရာပဲ ဖြစ်ပါလိမ့်မယ်။—ဆာလံ ၂၅:၃။ ၁၁၅:၄-၈ ကိုဖတ်ပါ။
စစ်မှန်တဲ့ ဝတ်ပြုရေးဘက် သူ ရပ်တည်ခဲ့
၁၈ ဧလိယ ဆုမတောင်းခင်မှာ လူအုပ်က ယေဟောဝါဘုရားလည်း ဗာလလို အလိမ်အညာပဲလားလို့ တွေးကောင်းတွေးနေမိမှာပဲ။ ဒါပေမဲ့ ဧလိယ ဆုတောင်းပြီးတာနဲ့ ချက်ချင်းပဲ အဖြေပေါ်လာပါတယ်။ “အဲဒီအခါ ယေဟောဝါဆီကနေ မီးကျလာပြီး မီးရှို့ရာအလှူနဲ့ ထင်းတွေ၊ ကျောက်တွေ၊ မြေမှုန့်တွေကို လောင်ကျွမ်းသွားတယ်။ မြောင်းထဲက ရေတွေပါ ခန်းသွားတယ်” လို့မှတ်တမ်းက ဖော်ပြတယ်။ (၁ ဘု. ၁၈:၃၈) တကယ့်ကို မှတ်သားစရာ အဖြေပါပဲ။ ဒီအခါ လူတွေ ဘယ်လို တုံ့ပြန်ကြသလဲ။
ဘုရားရေးရာ ရတနာ
သူသည် စောင့်ကြည့်၍ စောင့်မျှော်ခဲ့
ဧလိယ ခေတ်တွင် မည်မျှကြာကြာ မိုးခေါင်ခဲ့ သနည်း
ယေဟောဝါ၏ ပရောဖက် ဧလိယက နှစ်ရှည်လများ မိုးခေါင်မှုသည် မကြာမီ အဆုံးတိုင်တော့မည်ဟု ဘုရင်အာဟပ်အား ကြေညာခဲ့သည်။ မိုးခေါင်မည်ဟု ဧလိယကြေညာခဲ့ချိန်မှ ရေတွက်လျှင် “သုံးနှစ်စေ့သောအခါ” ထိုသို့ဖြစ်ပျက်ခဲ့သည်။ (၃ ဓမ္မရာဇဝင် ၁၈:၁) ယေဟောဝါ မိုးရွာစေမည်ဟု ဧလိယ ပြောဆိုပြီး မကြာမီတွင် ကိုယ်တော်သည် မိုးရွာစေခဲ့၏။ သုံးနှစ်စေ့သောအခါ မိုးခေါင်မှု အဆုံးတိုင်ခဲ့သောကြောင့် မိုးခေါင်ချိန်မှာ သုံးနှစ်ထက်မပိုဟူ၍ အချို့သူတို့ ကောက်ချက်ချကြပေမည်။ သို့သော် “သုံးနှစ်နှင့် ခြောက်လပတ်လုံး” မိုးခေါင်ခဲ့သည်ဟု ယေရှုနှင့် ယာကုပ်တို့က ဆိုသည်။ (လုကာ ၄:၂၅; ယာကုပ် ၅:၁၇) ကျမ်းစာသည် ရှေ့နောက်မညီဖြစ်နေသလော။
လုံးဝမဟုတ်ပါ။ ရှေးဣသရေလနိုင်ငံတွင် နွေရာသီသည် အတော်အတန်ကြာရှည်၍ ခြောက်လအထိ ကြာတတ်၏။ ဧလိယသည် အာဟပ်ထံရောက်လာပြီး မိုးခေါင်မည်ဟုကြေညာချိန်မှာ ပုံမှန်ထက်ကြာရှည်ပြီး ချစ်ချစ်တောက် ပူပြင်းနေသော နွေရာသီတွင်ဖြစ်သည်။ အမှန်အားဖြင့် မိုးခေါင်နေသည်မှာ လွန်ခဲ့သော ခြောက်လနီးပါးကပင် ဖြစ်၏။ ဧလိယသည် မိုးခေါင်မည်ဟု ကြေညာခဲ့ချိန်မှ “သုံးနှစ်စေ့သောအခါ” မိုးပြန်ရွာမည်ဟု ကြေညာပြန်သည်။ ထိုအချိန်တွင် မိုးခေါင်နေသည်မှာ သုံးနှစ်နှင့် ခြောက်လနီးပါး ရှိနေပြီဖြစ်၏။ ကရမေလတောင်၌ စမ်းသပ်မှုကြီးကို လူအားလုံး တွေ့မြင်ရချိန်တွင် “သုံးနှစ်နှင့် ခြောက်လ” တိတိပြည့်ခဲ့ပြီ။
အာဟပ်ထံ ဧလိယ ဦးဆုံးအကြိမ် သွားရောက်ချိန်ကို စဉ်းစားကြည့်ပါ။ ဗာလကို နွေရာသီအကုန်တွင် မိုးရွာစေမည့်နတ်ဘုရား၊ “မိုးတိမ်စီးသူ” အဖြစ် လူတို့ ယုံကြည်ကြသည်။ နွေရာသီသည် သာမန်ထက် ကြာရှည်နေလျှင် လူတို့က ‘ဗာလ ဘယ်မှာလဲ။ ဘယ်အချိန်မှာ မိုးရွာစေမှာလဲ’ ဟုမေးတတ်ကြသည်။ မိမိအခွင့်မရှိဘဲ မိုးမရွာ နှင်းမကျရဟူသော ဧလိယ၏ ကြေညာချက်ကြောင့် ဗာလဝတ်ပြုသူများ စိတ်အနှောင့်အယှက်ဖြစ်ခဲ့ကြ၏။—၃ ဓမ္မရာဇဝင် ၁၇:၁။
အောက်တိုဘာ ၁၀-၁၆
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၁၉–၂၀
“နှစ်သိမ့်မှုရဖို့ ယေဟောဝါကို မျှော်ကိုးပါ”
စိတ်ဖိစီးချိန်မှာ ယေဟောဝါကို အားကိုးပါ
၅ ၁ ဘုရင်များ ၁၉:၁-၄ ကိုဖတ်ပါ။ မိဖုရား ယေဇဗေလက သတ်မယ်လို့ ခြိမ်းခြောက်တဲ့အခါ ဧလိယ ကြောက်လန့်ပြီး ဗေရရှေဘမြို့ကို ထွက်ပြေးတယ်။ စိတ်ဓာတ်ကျလွန်းလို့ “သေပါရစေလို့ ဆုတောင်း” တယ်။ ဧလိယ ဘာကြောင့် အဲဒီလို ခံစားရတာလဲ။ သူဟာ “ကျွန်တော်တို့လိုပဲ ခံစားချက်ရှိတဲ့လူ၊” မစုံလင်တဲ့လူ ဖြစ်လို့ပဲ။ (ယာ. ၅:၁၇) စိတ်ဖိစီးပြီး မောပန်းလွန်းလို့လည်း ဖြစ်နိုင်တယ်။ စစ်မှန်တဲ့ ဝတ်ပြုရေးကို မြှင့်တင်ပေးတဲ့ မိမိရဲ့ လုပ်ဆောင်မှုတွေ အရာမထင်ဘူး၊ အစ္စရေးတွေရဲ့ အခြေအနေ မတိုးတက်လာဘူး၊ ယေဟောဝါကို ဝတ်ပြုသူဆိုလို့ မိမိတစ်ယောက်တည်းပဲ ကျန်တယ်လို့ ထင်နေပုံရတယ်။ (၁ ဘု. ၁၈:၃၊ ၄၊ ၁၃။ ၁၉:၁၀၊ ၁၄) ဒီသစ္စာရှိ ပရောဖက်ရဲ့ ခံစားချက်ကို ကျွန်တော်တို့ အံ့ဩမိနိုင်တယ်။ ဒါပေမဲ့ ယေဟောဝါကတော့ ဧလိယရဲ့ ခံစားချက်ကို နားလည်ပေးတယ်။
ဘုရားသခင်ဆီကနေ သူ နှစ်သိမ့်မှု ရခဲ့
၁၃ တောထဲက ချုံပင်အောက်မှာ ထိုင်ချပြီး သေဖို့ ဆုတောင်းနေတဲ့ ဧလိယကို ကောင်းကင်ကနေ ယေဟောဝါဘုရား မြင်တဲ့အခါ ဘယ်လို ခံစားရမလဲ။ ခန့်မှန်းကြည့်နေစရာ မလိုပါဘူး။ ဧလိယ အိပ်ပျော်သွားပြီးနောက် ယေဟောဝါဘုရားက သူ့ဆီကို ကောင်းကင်တမန်တစ်ပါး စေလွှတ်လိုက်တယ်။ ကောင်းကင်တမန်က ဧလိယကို ညင်ညင်သာသာ လှုပ်နှိုးပြီး “ထပြီး စားလိုက်ပါဦး” လို့ပြောတယ်။ ဧလိယလည်း ထပြီး ကောင်းကင်တမန် ပြင်ဆင်ပေးထားတဲ့ မုန့် ပူပူနွေးနွေးကို စားပြီး ရေသောက်လိုက်တယ်။ ကောင်းကင်တမန်ကို ဧလိယ ကျေးဇူးတင်စကားတောင် ပြောခဲ့ရဲ့လား။ ဧလိယ စားသောက်ပြီး ပြန်အိပ်ပျော်သွားတယ်လို့ပဲ ကျမ်းစာမှာ ပြောထားတယ်။ စကားမပြောနိုင်လောက်အောင် သူ စိတ်ပျက်အားလျော့ နေတာလား။ ဘာပဲဖြစ်ဖြစ် ကောင်းကင်တမန်က သူ့ကို ဒုတိယအကြိမ် လှုပ်နှိုးလိုက်တယ်။ အဲဒီအချိန်က အရုဏ်တက်ချိန် ဖြစ်နိုင်ပါတယ်။ ဒီတစ်ကြိမ်လည်း “ခင်ဗျားသွားမယ့် ခရီးဟာ သိပ်ဝေးတယ်။ ထပြီး စားလိုက်ပါဦး” လို့ ဧလိယကို ပြောတယ်။—၁ ဘု. ၁၉:၅-၇။
ဘုရားသခင်ဆီကနေ သူ နှစ်သိမ့်မှု ရခဲ့
၂၁ အဲဒီသဘာဝစွမ်းအားတွေထဲမှာ ယေဟောဝါဘုရား မရှိဘူးလို့ မှတ်တမ်းက ဆိုတယ်။ လူတွေက ဗာလကို “မိုးတိမ်စီးသူ” ဒါမှမဟုတ် မိုးရွာစေတဲ့အရှင်အဖြစ် ကိုးကွယ်ကြပေမဲ့ ယေဟောဝါဘုရားကတော့ ဗာလလို ဒဏ္ဍာရီထဲက သဘာဝနတ်ဘုရား မဟုတ်မှန်း ဧလိယ သိထားတယ်။ ယေဟောဝါဘုရားဟာ သဘာဝတရားမှာ တွေ့ရတဲ့ အံ့မခန်းဖွယ် စွမ်းအားတွေကို ဖြစ်ပေါ်စေတဲ့ အရှင်ပါ။ ဖန်ဆင်းခြင်း လက်ရာအားလုံးတွေထက် တကယ့်ကို ကြီးမြတ်တဲ့အရှင်လည်း ဖြစ်တယ်။ မြင်နေရတဲ့ ကောင်းကင်ကတောင် ဘုရား စံမြန်းနိုင်လောက်အောင် မကျယ်ဝန်းဘူး။ (၁ ဘု. ၈:၂၇) ဒီအမှန်တရားတွေက ဧလိယကို ဘယ်လို ထောက်ကူပေးခဲ့သလဲ။ ဧလိယ ကြောက်စိတ်ဝင်ခဲ့တယ်ဆိုတာ သတိရပါ။ ဒါပေမဲ့ သူ့ဘက်မှာ အတိုင်းအဆမဲ့ တန်ခိုးရှင် ယေဟောဝါဘုရား ရှိနေမှတော့ အာဟပ်နဲ့ ယေဇဗေလကို သူ ကြောက်နေစရာအကြောင်း ဘာမှ မရှိဘူး။—ဆာလံ ၁၁၈:၆ ကိုဖတ်ပါ။
ဘုရားသခင်ဆီကနေ သူ နှစ်သိမ့်မှု ရခဲ့
၂၂ မီးငြိမ်းသွားပြီးတဲ့နောက် ပတ်ဝန်းကျင်က တိတ်ဆိတ်ငြိမ်သက်သွားတယ်။ အဲဒီအခါ “ညင်သာတဲ့ စကားသံ” တစ်ခု ဧလိယ ကြားလိုက်တယ်။ အဲဒီအသံက သူ့ခံစားချက်တွေကို ပြန်ပြောပြခိုင်းလို့ ဒုတိယအကြိမ် ရင်ဖွင့်လိုက်တယ်။ အဲဒီနောက် သူ တော်တော်လေး စိတ်သက်သာရာ ရသွားမှာပဲ။ အဲဒီအပြင် “ညင်သာတဲ့ စကားသံ” ပိုင်ရှင် ဆက်ပြောတဲ့ စကားကြောင့် ဧလိယ ပိုလို့တောင် နှစ်သိမ့်မှုရခဲ့မှာ သေချာတယ်။ ဧလိယဟာ အသုံးမကျတဲ့သူ မဟုတ်ကြောင်း ယေဟောဝါဘုရား သူ့ကို စိတ်ချစေတယ်။ ဘယ်လိုနည်းနဲ့လဲ။ အစ္စရေးပြည်ကနေ ဗာလ ဝတ်ပြုရေးကို ဖယ်ရှားဖို့ ရည်ရွယ်ထားတဲ့အကြောင်း ဧလိယကို ဘုရားသခင် ပြောပြတယ်။ ဘုရားသခင်ရဲ့ ရည်ရွယ်ချက်အတိုင်း ဧလိယ ဆက်လုပ်နေလို့ သူ့လုပ်ဆောင်မှုတွေဟာ အချည်းနှီး မဖြစ်ခဲ့ပါဘူး။ အဲဒီအပြင် ယေဟောဝါဘုရားက ဧလိယကို တိကျတဲ့ လမ်းညွှန်ချက်တွေပေးပြီး အလုပ်ပြန်လုပ်ခိုင်းတဲ့အတွက် အဲဒီရည်ရွယ်ချက် အောင်မြင်ရေးမှာ ဧလိယ ပါဝင်ပတ်သက်နေတုန်းပဲ။—၁ ဘု. ၁၉:၁၂-၁၇။
ဘုရားရေးရာ ရတနာ
ကိုယ်ကျိုးစွန့်ခြင်းနှင့် သစ္စာစောင့်သိခြင်း ပုံသက်သေတစ်ရပ်
ယနေ့တွင် ယေဟောဝါ၏ကျေးကျွန်များစွာတို့သည် ထပ်တူကိုယ်ကျိုးစွန့်စိတ်ဓာတ်ကို တင်ပြကြသည်။ အချို့တို့သည် ဝေးလံသည့်ဒေသများ၌ သတင်းကောင်းဟောရန် သို့မဟုတ် ဗေသလမိသားစုဝင်များအဖြစ် အမှုထမ်းရန် သူတို့၏ “လယ်များ” နှင့် အသက်မွေးဝမ်းကျောင်း လုပ်ငန်းများကို စွန့်လွှတ်ခဲ့ကြသည်။ အခြားသူများမှာမူ အသင်းမ၏ ဆောက်လုပ်ရေး စီမံကိန်းများတွင် ပါဝင်ရန် နိုင်ငံရပ်ခြားသို့ ခရီးထွက်ခဲ့ကြသည်။ များစွာတို့သည် နိမ့်ကျသည်ဟု ယူမှတ်မည့် အလုပ်များကို လက်ခံခဲ့ကြသည်။ သို့တိုင် ယေဟောဝါအတွက် လုပ်ဆောင်နေသူ အားလုံးသည် အရေးမပါသည့် လုပ်ငန်းတော်ကို ဆောင်ရွက်နေကြခြင်း မဟုတ်ပါ။ ယေဟောဝါသည် မိမိအတွက် လိုလိုလားလား အမှုဆောင်သူများကို လေးမြတ်တန်ဖိုးထားပြီး သူတို့၏ ကိုယ်ကျိုးစွန့်စိတ်ဓာတ်ကို ကောင်းချီးပေးတော်မူမည်။—မာကု ၁၀:၂၉၊ ၃၀။
အောက်တိုဘာ ၁၇-၂၃
ကျမ်းစာထဲက အဖိုးတန်ဘဏ္ဍာများ | ၁ ဘုရင်များ ၂၁–၂၂
“ယေဟောဝါ အခွင့်အာဏာ အသုံးပြုပုံကို တုပပါ”
it-2 ၂၁
ဗိုလ်ခြေတို့ရဲ့ အရှင် ယေဟောဝါ
ယောရှု ယေရိခေါမြို့နားမှာ ရှိနေတုန်း တွေ့ခဲ့ရတဲ့ ကောင်းကင်တမန်ကို အစ္စရေးဘက်ကလား၊ ရန်သူ့ဘက်ကလားလို့ မေးတဲ့အခါ “ခင်ဗျားထင်သလို မဟုတ်ဘူး။ ယေဟောဝါရဲ့ ဗိုလ်ချုပ်အနေနဲ့ ကျုပ်ရောက်လာတာ” လို့ သူပြန်ဖြေတယ်။ (ယရ ၅:၁၃-၁၅) ပရောဖက် မိက္ခာယက ဘုရင်အာဟပ်နဲ့ ယောရှဖတ်ကို ဒီလို ပြောခဲ့တယ်–“ရာဇပလ္လင်ပေါ်မှာ ယေဟောဝါ စံမြန်းနေတာ၊ လက်ယာဘက်၊ လက်ဝဲဘက်မှာ ကောင်းကင်ဗိုလ်ခြေတွေ ရပ်ပြီး ခစားနေကြတာကို ကျွန်တော်မြင်တယ်။” (၁ဘု ၂၂:၁၉-၂၁) ဒါကြောင့် “ဗိုလ်ခြေတို့ရဲ့အရှင် ယေဟောဝါ” လို့ခေါ်တာ သင့်လျော်ပါတယ်။ ခေရုဗိမ်၊ သရပ်၊ ကောင်းကင်တမန် ဆိုပြီး အမျိုးအစား ခွဲထားရုံလောက်ပဲ မဟုတ်ဘူး။ (ရှာ ၆:၂၊ ၃။ က ၃:၂၄။ ဗ ၅:၁၁) “ကောင်းကင်တမန် ၁၂ တပ်” လို့ ယေရှုခရစ် ပြောခဲ့သလို စနစ်တကျဖွဲ့စည်းထားတဲ့ တပ်မဟာတွေ ရှိနေတဲ့အတွက် ဖြစ်တယ်။ (မ ၂၆:၅၃) ယေဟောဝါကို အကူအညီတောင်းချိန်မှာ ဟေဇကိက “ဗိုလ်ခြေတို့ရဲ့အရှင် ယေဟောဝါ၊ အစ္စရေးတို့ရဲ့ ဘုရားသခင်၊ ခေရုဗိမ်တွေပေါ် နန်းထိုင်တဲ့အရှင်” လို့ ခေါ်ခဲ့တယ်။ ပဋိညာဉ်သေတ္တာနဲ့ ယေဟောဝါရဲ့ ကောင်းကင်ပလ္လင်ကို ပုံဆောင်တဲ့ ပဋိညာဉ်သေတ္တာအဖုံးပေါ်မှာ ရှိတဲ့ ခေရုဗိမ် အရုပ်တွေကို ရည်ညွှန်းပြီး ခေါ်ခဲ့တာ ဖြစ်နိုင်တယ်။ (ရှာ ၃၇:၁၆။ ၁ရှ ၄:၄။ ၂ရှ ၆:၂ တို့နဲ့ နှိုင်းယှဉ်ပါ။) ဧလိရှဲရဲ့ ထိတ်လန့်နေတဲ့ ကျွန်က တောင်တန်းတွေပေါ်မှာ “မြင်းတွေ၊ စစ်မြင်းရထားတွေပါတဲ့ စစ်တပ်ကြီး” ကို စိတ်အာရုံမှာ မြင်တဲ့အခါ အားရှိသွားတယ်။—၂ဘု ၆:၁၅-၁၇။
“ယောက်ျားရဲ့ ဦးခေါင်းဟာ ခရစ်တော်”
၉ နှိမ့်ချမှု။ ယေဟောဝါဟာ စကြဝဠာမှာ ပညာအရှိဆုံး ဖြစ်ပေမဲ့ ကျေးကျွန်တွေရဲ့ သဘောထားကို နားထောင်ပေးတယ်။ (က. ၁၈:၂၃၊ ၂၄၊ ၃၂) အကြံပြုခွင့် ပေးတယ်။ (၁ ဘု. ၂၂:၁၉-၂၂) ကိုယ်တိုင် ပြည့်ဝစုံလင်ပေမဲ့ ကျွန်တော်တို့ဆီက စုံလင်မှုကို မမျှော်လင့်ဘူး။ မိမိကို ဝတ်ပြုနေတဲ့ မစုံလင်သူတွေ အောင်မြင်ဖို့ ကူညီပေးတယ်။ (ဆာ. ၁၁၃:၆၊ ၇) ကျမ်းစာမှာ ယေဟောဝါကို “ကူညီမစရှင်” လို့တောင် ခေါ်ထားတယ်။ (ဆာ. ၂၇:၉။ ဟီ. ၁၃:၆) ယေဟောဝါရဲ့ နှိမ့်ချမှုကြောင့်သာ ကြီးမြတ်တဲ့အလုပ်တွေကို လုပ်ဆောင်နိုင်တာ ဖြစ်ကြောင်း ဘုရင်ဒါဝိဒ် အသိအမှတ်ပြုတယ်။—၂ ရှ. ၂၂:၃၆။
it-2 ၂၄၅
မုသား
အယူအဆအမှားတွေကို ပိုနှစ်သက်တဲ့သူတွေဆီ “မှားယွင်းတဲ့ သွန်သင်ချက်တွေ” ကို ယေဟောဝါဘုရား ရောက်ခွင့်ပေးတဲ့အတွက် သူတို့ဟာ ယေရှုခရစ်ရဲ့ သတင်းကောင်းအစား “မုသာစကားတွေကို ယုံကြည်သွားကြတယ်။” (၂သ ၂:၉-၁၂) အဲဒါကို အစ္စရေးဘုရင် အာဟပ်ရဲ့ အဖြစ်အပျက်မှာ တွေ့ရတယ်။ ရာမုတ်ဂိလဒ်မြို့ကို သွားတိုက်ရင် နိုင်မယ်လို့ ပရောဖက်တွေက လိမ်ပြီး ပြောကြပေမဲ့ ယေဟောဝါရဲ့ ပရောဖက် မိက္ခာယက ဘေးဆိုးကြုံရမယ်လို့ ကြိုဟောတယ်။ မိက္ခာယမြင်တဲ့ စိတ်အာရုံအရ အာဟပ်ရဲ့ ပရောဖက်တွေကို လိမ်လည်ဟောပြောအောင်လုပ်ဖို့ ကောင်းကင်တမန်ကို ယေဟောဝါ ခွင့်ပြုလိုက်တယ်။ အာဟပ်ကိုယ်တိုင် အမှန်ကို မဟုတ်ဘဲ မုသာစကားကို ကြားချင်နေတဲ့အတွက် ကောင်းကင်တမန်က ပရောဖက်တွေကို အဲဒီအတိုင်း ပြောစေခဲ့တာ ဖြစ်တယ်။ ကြိုသတိပေးခံရပေမဲ့ အာဟပ်က လိမ်လည်စကားတွေကို ပိုကြိုက်တဲ့အတွက် အသက်ဆုံးခဲ့ရတယ်။—၁ဘု ၂၂:၁-၃၈။ ၂ရ ၁၈။
ဘုရားရေးရာ ရတနာ
စစ်မှန်တဲ့ နောင်တ ဆိုတာ ဘာလဲ
၄ နောက်ဆုံး၊ ယေဟောဝါရဲ့ စိတ်ရှည်မှု အဆုံးတိုင်သွားတယ်။ အာဟပ်နဲ့ ယေဇဗေလကို ပြစ်ဒဏ် စီရင်မယ့်အကြောင်း၊ တစ်မျိုးလုံး အသတ်ခံရမယ့်အကြောင်း ဧလိယကို သွားပြောခိုင်းတယ်။ ဧလိယရဲ့ စကားကြောင့် အာဟပ် တော်တော် စိတ်ထိခိုက်သွားပြီး ကိုယ့်ကိုယ်ကိုယ် “နှိမ့်ချ” လိုက်တယ်။ မာနကြီးတဲ့ ဘုရင် ဒီလိုလုပ်တာ အံ့ဩစရာပါပဲ။—၁ ဘု. ၂၁:၁၉-၂၉။
၅ ဒီတစ်ကြိမ်မှာ အာဟပ် ကိုယ့်ကိုယ်ကိုယ် နှိမ့်ချလိုက်ပေမဲ့ နောက်ပိုင်း လုပ်ရပ်တွေက တကယ် နောင်တ မရကြောင်း ပြတယ်။ တိုင်းပြည်ကနေ ဗာလ ဝတ်ပြုရေးကို မဖယ်ရှားဘူး။ ယေဟောဝါရဲ့ ဝတ်ပြုရေးကို အားမပေးဘူး။ တကယ် နောင်တ မရဘူးဆိုတာ တခြားလုပ်ရပ်တွေကလည်း ပြတယ်။
၆ နောက်ပိုင်း၊ ဆီးရီးယားကို စစ်တိုက်ချိန်မှာ ပူးပေါင်းဖို့ ယုဒပြည်က မင်းကောင်း ယောရှဖတ်ကို အာဟပ် ဖိတ်ခေါ်တယ်။ စစ်မတိုက်ခင် ယေဟောဝါရဲ့ ပရောဖက်ကို မေးဖို့ ယောရှဖတ် အကြံပေးတယ်။ အစပိုင်းမှာ အာဟပ်က “လူတစ်ယောက်တော့ ကျန်သေးတယ်။ . . . သူကတစ်ဆင့် ယေဟောဝါဘုရားကို မေးမြန်းလို့ ရတယ်။ ဒါပေမဲ့ သူ့ကို ငါသိပ်မုန်းတယ်။ အဲဒီလူက ငါနဲ့ပတ်သက်ပြီး ဘယ်တော့မှ အကောင်း မဟောတတ်ဘူး။ မကောင်းတာတွေကိုပဲ ဟောတတ်တယ်” လို့ ပြောပြီး လက်မခံဘူး။ အဲဒီလူက ပရောဖက် မိက္ခာယပါ။ ဘာပဲဖြစ်ဖြစ် သူ့ကို ခေါ်မေးလိုက်တယ်။ အာဟပ် ထင်သလို သတင်းဆိုးပဲ ကြားရတယ်။ ဒါတောင် နောင်တယူပြီး ယေဟောဝါဆီက ခွင့်လွှတ်မှု တောင်းခံမယ့်အစား ပရောဖက်ကို ထောင်ချလိုက်တယ်။ (၁ ဘု. ၂၂:၇-၉၊ ၂၃၊ ၂၇) ယေဟောဝါရဲ့ ပရောဖက်ကို ထောင်ချလိုက်နိုင်ပေမဲ့ ကြိုဟောချက် မပြည့်စုံအောင်တော့ အာဟပ် မတားဆီးနိုင်ဘူး။ တိုက်ပွဲမှာ အာဟပ် သေဆုံးသွားတယ်။—၁ ဘု. ၂၂:၃၄-၃၈။
အောက်တိုဘာ ၂၄-၃၀
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၁–၂
“လေ့ကျင့်ပေးတဲ့ ပုံနမူနာကောင်း”
အရည်အချင်းပြည့်မီလာအောင် တခြားသူတွေကို အကြီးအကဲတွေ လေ့ကျင့်ပေးပုံ
၁၅ ဧလိရှဲရဲ့မှတ်တမ်းက ဒီနေ့ခေတ်မှာ အတွေ့အကြုံရှိ အကြီးအကဲတွေကို ညီအစ်ကိုတွေ ရိုသေလေးစားဖို့ အရေးကြီးတယ်ဆိုတာကိုလည်း ဖော်ပြတယ်။ ဧလိယနဲ့ ဧလိရှဲဟာ ယေရိခေါမြို့မှာရှိတဲ့ ပရောဖက်တစ်စုနဲ့ တွေ့ပြီးနောက် ယော်ဒန်မြစ်နား ရောက်လာတယ်။ အဲဒီနောက် ‘ဧလိယက ပရောဖက်ဝတ်ရုံကို ချွတ်၊ လိပ်လိုက်ပြီးနောက် ရေကိုရိုက်တဲ့အခါ ရေနှစ်ခြမ်းကွဲသွားတယ်။’ နှစ်ယောက်သား ခြောက်သွေ့တဲ့ ယော်ဒန်မြစ် ကြမ်းပြင်ကိုဖြတ်ပြီး ‘စကားတပြောပြောနဲ့ ဆက်လျှောက်လာ’ တယ်။ ဧလိရှဲဟာ သူ့ဆရာပြောသမျှကို ဂရုတစိုက်နားထောင်ပြီး ဆက်သင်ယူနေတုန်းပဲ။ အားလုံးတတ်သွားပြီလို့ ဘယ်တော့မှ မယူဆခဲ့ဘူး။ အဲဒီနောက် လေပွေအားဖြင့် ဧလိယ ခေါ်ဆောင်ခံရတယ်။ ဧလိရှဲလည်း ယော်ဒန်မြစ်နား ပြန်လျှောက်လာတယ်။ ဧလိယရဲ့ဝတ်ရုံနဲ့ ရေကိုရိုက်ပြီး ‘ဧလိယရဲ့ဘုရား ယေဟောဝါ ဘယ်မှာလဲ’ လို့ပြောတဲ့အခါ ရေနှစ်ခြမ်းကွဲသွားတယ်။—၄ ရာ. ၂:၈-၁၄၊ ကဘ။
အရည်အချင်းပြည့်မီလာအောင် တခြားသူတွေကို အကြီးအကဲတွေ လေ့ကျင့်ပေးပုံ
၁၆ ဧလိရှဲရဲ့ ဦးဆုံးအံ့ဖွယ်အမှုဟာ ဧလိယရဲ့ နောက်ဆုံးအံ့ဖွယ်အမှုနဲ့ တစ်ထပ်တည်းတူနေတာ သတိပြုမိပါသလား။ ဒီအချက်က ဘာကို သင်ပေးသလဲ။ အခုအချိန်မှာ ကိုယ်က ဆရာဖြစ်သွားပြီဆိုတော့ ဧလိယ လုပ်ခဲ့တာတွေကို ပြောင်းပစ်ရမယ်ဆိုတဲ့ အတွေးမျိုး ဧလိရှဲမှာ မရှိခဲ့ဘူး။ အဲဒီအစား ဧလိယရဲ့ လုပ်ပုံကိုင်ပုံတွေကို အတုခိုးခဲ့တယ်။ ဒီနည်းအားဖြင့် ဧလိယကို ရိုသေလေးစားကြောင်း ဖော်ပြခဲ့တယ်။ ဒီလုပ်ရပ်ကြောင့် တခြားပရောဖက်တွေလည်း ဧလိရှဲကို ယုံကြည်စိတ်ချလာတယ်။ (၄ ရာ. ၂:၁၅) ဧလိရှဲဟာ ပရောဖက်အဖြစ် နှစ်ပေါင်း ၆၀ အမှုဆောင်ခဲ့တယ်။ ဧလိယထက် အံ့ဖွယ်အမှုတွေ ပိုလုပ်ဆောင်နိုင်တဲ့ တန်ခိုးကို ယေဟောဝါ ပေးခဲ့တယ်။ ဒီမှတ်တမ်းကနေ ဒီနေ့ခေတ် လေ့ကျင့်မှုခံယူသူတွေ ဘာသင်ယူနိုင်သလဲ။
ဘုရားရေးရာ ရတနာ
ဓမ္မရာဇဝင်စတုတ္ထစောင်မှ ပေါ်လွင်ချက်များ
၂:၁၁—“ဧလိယသည် လေပွေအားဖြင့်” တက်သွားသော “ကောင်းကင်” ကားအဘယ်နည်း။ ယင်းသည် ဤစကြဝဠာနှင့် အလှမ်းဝေးသောနေရာ မဟုတ်သကဲ့သို့ ဘုရားသခင်နှင့် ကိုယ်တော့် ကောင်းကင်သားများ ကျိန်းဝပ်ရာနေရာလည်း မဟုတ်ပေ။ (တရားဟောရာ ၄:၁၉; ဆာလံ ၁၁:၄; မဿဲ ၆:၉; ၁၈:၁၀) ဧလိယ တက်သွားခဲ့သော “ကောင်းကင်” သည် မိုးကောင်းကင်လေထု ဖြစ်သည်။ (ဆာလံ ၇၈:၂၆; မဿဲ ၆:၂၆) ဧလိယသည် မီးမြင်းနှင့် မီးရထားဖြင့် ကမ္ဘာ့လေထုထဲ ဖြတ်သန်းသွားကာ ကမ္ဘာမြေ၏ အခြားတစ်နေရာသို့ ပြောင်းရွှေ့ခံရပြီး အတန်ကြာ ဆက်အသက်ရှင်ခဲ့သည်။ နှစ်အတန်ကြာသော် ဧလိယသည် ယုဒရှင်ဘုရင် ယဟောရံထံ စာတစ်စောင် ရေးပို့ခဲ့သည်။—၂ ရာဇဝင်ချုပ် ၂၁:၁၊ ၁၂-၁၅။
အောက်တိုဘာ ၃၁–နိုဝင်ဘာ ၆
ကျမ်းစာထဲက အဖိုးတန်ဘဏ္ဍာများ | ၂ ဘုရင်များ ၃–၄
“ခင်ဗျားရဲ့သားကို ပွေ့ချီလိုက်ပါ”
“သူ အသက်ပြန်ရှင်လာမယ်ဆိုတာ ကျွန်မ သိပါတယ်”
၇ ကျမ်းစာမှာပါတဲ့ ဒုတိယ ရှင်ပြန်ထမြောက်ခြင်းကိုတော့ ဧလိယကို ဆက်ခံသူ ပရောဖက် ဧလိရှဲ လုပ်ဆောင်ခဲ့တယ်။ ရှုနင်မြို့က ထင်ပေါ်တဲ့ အစ္စရေး အမျိုးသမီးက ဧလိရှဲကို ထူးထူးခြားခြား ဧည့်ဝတ်ပြုခဲ့တယ်။ သားသမီး မရှိတဲ့ အဲဒီအမျိုးသမီးနဲ့ သက်ကြီးရွယ်အို ခင်ပွန်းကို ဧလိရှဲကတစ်ဆင့် ဘုရားသခင် သားဆု ပေးခဲ့တယ်။ နှစ်အနည်းငယ်ကြာတော့ ကလေး သေဆုံးသွားတယ်။ မိခင်ရဲ့ ကြေကွဲမှုကို မြင်ယောင်ကြည့်ပါ။ ခင်ပွန်းရဲ့ ခွင့်ပြုချက်အရ ၁၉ မိုင် (ကီလိုမီတာ ၃၀) လောက် ခရီးနှင်လာပြီး ကရမေလတောင်မှာ ဧလိရှဲနဲ့ တွေ့ခဲ့တယ်။ သူတို့ထက်အရင် ရှုနင်မြို့ကို သွားနှင့်ဖို့ လက်ထောက် ဂေဟာဇိကို ဧလိရှဲ လွှတ်လိုက်တယ်။ ကလေး အသက်ပြန်ရှင်အောင် ဂေဟာဇိ မလုပ်နိုင်ခဲ့ဘူး။ အဲဒီအချိန်မှာ ကြေကွဲနေတဲ့မိခင်နဲ့ ဧလိရှဲတို့ ရောက်လာကြတယ်။—၂ ဘု. ၄:၈-၃၁။
“သူ အသက်ပြန်ရှင်လာမယ်ဆိုတာ ကျွန်မ သိပါတယ်”
၈ ရှုနင်မြို့အိမ်မှာရှိတဲ့ အလောင်းဘေးမှာ ဧလိရှဲ ဆုတောင်းတယ်။ အံ့ဩစရာပါပဲ။ အသက်မဲ့နေတဲ့ ကလေး အသက် ပြန်ရှင်လာလို့ မိခင် ဝမ်းသာပီတိ ဖြစ်ခဲ့တယ်။ (၂ ဘုရင်များ ၄:၃၂-၃၇ ကိုဖတ်ပါ။) တဲတော်မှာ အမှုဆောင်ဖို့ ရှမွေလကို ခေါ်လာချိန်မှာ “ယေဟောဝါဟာ . . . သင်္ချိုင်းရောက်အောင် ပို့နိုင်တယ်၊ သင်္ချိုင်းကနေ ခေါ်ထုတ်နိုင်တယ်” လို့ ဆုတောင်းခဲ့တဲ့ ဟန္နလို ခံစားခဲ့ရမှာပဲ။ (၁ ရှ. ၂:၆) ရှင်ပြန်ထမြောက်ပေးနိုင်စွမ်း ရှိကြောင်း သက်သေထူဖို့ ရှုနင်မြို့က ကလေးကို ဘုရားသခင် တကယ် အသက်ပြန်ရှင်စေခဲ့တယ်။
ဘုရားရေးရာ ရတနာ
it-2 ၆၉၇ ပိုဒ်. ၂
ပရောဖက်
“ပရောဖက်တစ်စု။” “ပရောဖက်တစ်စု” ဆိုတာ ပရောဖက်ဖြစ်ဖို့ တက်ရတဲ့ သင်တန်းကျောင်းတစ်ခု ဒါမှမဟုတ် ပူးပေါင်းဆောင်ရွက်တဲ့ ပရောဖက် အုပ်စုကို ဖော်ပြပုံရတယ်။ ဗေသလမြို့၊ ယေရိခေါမြို့၊ ဂိလဂါလမြို့တွေမှာ နေတဲ့ ပရောဖက်တစ်စုလို့ ဖော်ပြထားတယ်။ (၂ဘု ၂:၃၊ ၅။ ၄:၃၈။ ၁ရှ ၁၀:၅၊ ၁၀ နဲ့နှိုင်းယှဉ်ပါ။) ရှမွေလက ရာမမြို့က အုပ်စုကို ဦးဆောင်တယ်။ (၁ရှ ၁၉:၁၉၊ ၂၀) ဧလိရှဲလည်း အုပ်စုတစ်စုကို ဦးဆောင်ပုံရတယ်။ (၂ဘု ၄:၃၈။ ၆:၁-၃။ ၁ဘု ၁၈:၁၃ နဲ့နှိုင်းယှဉ်ပါ။) မှတ်တမ်းအရ နေဖို့အိမ်ကို ကိုယ်တိုင် ဆောက်ကြတယ်၊ ပုဆိန်ကို ငှားရတယ်ဆိုတော့ ရိုးရှင်းတဲ့ဘဝနဲ့ နေထိုင်ကြပုံရတယ်။ အတူတူ နေထိုင်၊ စားသောက်ကြပေမဲ့ ပရောဖက်တာဝန် တစ်ယောက်တစ်မျိုးစီ ရကြတယ်။—၁ဘု ၂၀:၃၅-၄၂။ ၂ဘု ၄:၁၊ ၂၊ ၃၉။ ၆:၁-၇။ ၉:၁၊ ၂။