ထာဝရချီးမွမ်းခြင်းကို ယေဟောဝါရှင်ခံထိုက်တော်မူသည်

“ကိုယ်တော်ကိုနေ့တိုင်းအစဉ်ကောင်းချီးပေးပါမည်။ နာမတော်ကို ကမ္ဘာအဆက်ဆက်ချီးမွမ်းပါမည်။”—ဆာလံ ၁၄၅:၂။

၁။ ယေဟောဝါကိုချီးမွမ်းရန် ဒါဝိဒ်၌အကြောင်းကောင်းများစွာ အဘယ်ကြောင့်ရှိသနည်း။

ဘု ရားသခင်ကိုချီးမွမ်းရန် ယေဟောဝါ၏သစ္စာရှိကျေးကျွန်ဒါဝိဒ်၌ အကြောင်းကောင်းများစွာရှိသည်။ ရှေးဣသရေလလူမျိုး၏ နာမည်ကျော်ကြားသောဤမင်းကြီးသည် ယေဟောဝါ၏ကြီးမြတ်တော်မူခြင်းနှင့်ကိုယ်တော်၏ကောင်းမြတ်ခြင်းအကြောင်း သိရှိတော်မူ၍ ကိုယ်တော်၏မင်းရိုက်ရာသည် ထာဝစဉ်တည်တော်မူကြောင်းအသိအမှတ်ပြုပါသည်။ သက်ရှိအပေါင်းတို့၏ဆန္ဒကိုရောင့်ရဲစေပြီး သစ္စာရှိကျေးကျွန်များအားကရုဏာပြတော်မူသဖြင့် အမြင့်မြတ်ဆုံးဘုရားသခင်ကို ချီးမွမ်းထိုက်သည်။

၂။ (က) ဆာလံ ၁၄၅ ကိုမည်သို့စီစဉ်ထားသနည်း။ (ခ) အဘယ်မေးခွန်းများကို ကျွန်ုပ်တို့သုံးသပ်မည်နည်း။

^၂ ဆာလံ ၁၄၅ တွင်ဘုရားသခင်အား ဒါဝိဒ်ဤသို့ချီးမွမ်းထောမနာပြုထားသည်။ ဤပဟေဠိဆန်သောဆာလံကျမ်း၏အခန်းငယ်တစ်ခုစီ၏ပထမစာလုံးသည် အက္ခရာတစ်ခု (နန်း ) မှအပဟေဗြဲအက္ခရာစဉ်အတိုင်းစတင်သည်။ ပဟေဠိအစီအစဉ်အားဖြင့် မှတ်မိရန်လွယ်ကူစေမည်။ ဆာလံ ၁၄၅ ပါ “ကိုယ်တော်ကိုနေ့တိုင်းအစဉ် ကောင်းချီးပေးပါမည်။ နာမတော်ကို ကမ္ဘာအဆက်ဆက်ချီးမွမ်းပါမည်” ဟူသောစကားအားဖြင့် ယေဟောဝါကိုထောမနာပြုထားသည်။ (ဆာ၊ ၁၄၅:၂) သို့သော် ဤဆာလံသီချင်းသည် ကျွန်ုပ်တို့အားမည်သို့ဖြစ်စေသနည်း။ ဘုရားသခင်နှင့်ဆက်ဆံရေးအတွက် မည်သို့အကျိုးပြုနိုင်မည်နည်း။ သိရှိနိုင်ရန် အခန်းငယ် ၁ မှ ၁၀ ကိုဦးဆုံးသုံးသပ်ကြည့်ကြစို့။

ယေဟောဝါ၏ကြီးမြတ်တော်မူခြင်းသည် စစ်၍မကုန်နိုင်

၃။ ဒါဝိဒ်နည်းတူ ‘ကျွန်ုပ်၏ရှင်ဘုရင်ဘုရားသခင်’ အားအဘယ်အရာကြွေးမြီတင်နေသနည်း။ အဘယ့်ကြောင့်နည်း။

^၃ ဒါဝိဒ်သည်ဘုရင်တစ်ပါးဖြစ်သော်လည်း မိမိထက်ယေဟောဝါရှင်သည်အချုပ်အခြာအာဏာတော်ရှင်ဖြစ်ကြောင်းကို သူဤသို့အသိအမှတ်ပြုသည်။ “အကျွန်ုပ်၏ရှင်ဘုရင်၊ အကျွန်ုပ်၏ဘုရားသခင်၊ ကိုယ်တော်ကိုချီးမြှောက်ပါမည်။ ကမ္ဘာအဆက်ဆက် နာမတော်ကိုကောင်းချီးပေးပါမည်။” (ဆာလံ ၁၄၅:၁) ထပ်တူကြည်ညိုမြတ်နိုးမှုဖြင့် ယေဟောဝါသက်သေများသည် ဘုရားသခင့်နာမတော်ကိုချီးမြှင့်၍ မြေကြီးတစ်ခွင်လုံးချီးမွမ်းကြ၏။ ဤလုပ်ငန်းတွင်ကျွန်ုပ်တို့ပါဝင်ရာ ကျွန်ုပ်တို့ဘဝစိုပြေလာသည်။ ဒါဝိဒ်နည်းတူ ‘ကျွန်ုပ်တို့၏ရှင်ဘုရင်ဘုရားသခင်’ ယေဟောဝါအားနာခံမှုပြ၍ လက်အောက်ခံရမည်။ ကိုယ်တော်သည် “ထာဝရအရှင်ဘုရားသခင်” ဖြစ်တော်မူ၍ ထိုသို့ပြုခြင်းကိုခံထိုက်ပေသည်။ (ဗျာဒိတ် ၁၅:၃) ထို့ပြင် ၁၉၁၄ ခုနှစ်ကတည်းက ကောင်းကင်ဇိအုန်တောင်အရပ်၌ စိုးစံနေတော်မူသည့် သာ၍ကြီးမြတ်တော်မူသောယေရှုခရစ်သည် ထာဝရဘုရားသခင်ယေဟောဝါအား လက်အောက်ခံရမည့်ပုံသက်သေကောင်းကို ကျွန်ုပ်တို့အတွက်ချမှတ်ထားတော်မူ၏။

၄။ ‘ဘုရားသခင်၏နာမတော်ကို’ မည်သို့ ‘ကောင်းချီးပေး’ နိုင်မည်နည်း။

^၄ ‘ဘုရားသခင်၏နာမတော်ကိုကောင်းချီးပေးမည်’ ဟုဒါဝိဒ်ဆိုသည်။ လူသားမျှဖြစ်သူတစ်ဦးသည် ယင်းသို့အဘယ်နည်းဖြင့်ပြုနိုင်မည်နည်း။ တစ်ဦးဦးကိုချီးမြှောက်သည်ဟုဆိုရာ၌ ထိုသူကိုချီးမွမ်းပြောဆိုခြင်းပါဝင်၏။ ဘုရားသခင့်နာမတော်ကိုချီးမြှောက်သူသည် ကိုယ်တော်နှင့်ကိုယ်တော့်နာမတော်ယေဟောဝါကိုချစ်မြတ်နိုးသည်။ ဘုရားနှင့်ပတ်သက်၍ ညည်းညူခြင်း၊ ကိုယ်တော်ကိုအပြစ်ဆိုခြင်း၊ ကိုယ်တော်၏ကောင်းမြတ်ခြင်းကို သံသယဝင်ခြင်း ဘယ်သောအခါမျှရှိမည်မဟုတ်ချေ။ ထိုသဘောထားရှိ၍ ယေဟောဝါထံမိမိကိုယ်ကိုဆက်ကပ်အပ်နှံပြီး၊ နှစ်ခြင်းယူပြီးသော ကိုယ်တော်၏သက်သေများဖြစ်မှသာလျှင် ဒါဝိဒ်နည်းတူ ‘ဘုရားသခင်၏နာမတော်ကို ထာဝစဉ်ကောင်းချီးပေးမည်’ ဟုကျွန်ုပ်တို့ဆိုနိုင်ပါလိမ့်မည်။ ဘုရားသခင့်မေတ္တာတော်ခံစားရသူများဆက်ဖြစ်နေကြမည်ဆိုလျှင် ထာဝရအသက်ဆုကျေးဇူးကိုရရှိပြီး ယေဟောဝါအားထာဝစဉ်ကောင်းချီးပေးနိုင်ကြပါမည်။—ယုဒ ၂၀၊ ၂၁။

၅။ ယေဟောဝါကို “နေ့တိုင်းအစဉ်” ကောင်းချီးပေးလိုစိတ်သည် ကျွန်ုပ်တို့အားမည်သို့ဖြစ်စေသင့်သနည်း။

^၅ ကျွန်ုပ်တို့၏အသက်ပေးပိုင်ရှင်ကို အမှန်တကယ်ချစ်မြတ်နိုးပါက ဒါဝိဒ်နည်းတူ “ကိုယ်တော်ကိုနေ့တိုင်းအစဉ်ကောင်းချီးပေးပါမည်။ နာမတော်ကို ကမ္ဘာအဆက်ဆက်ချီးမွမ်းပါမည်” ဟုဆိုကြမည်။ (ဆာလံ ၁၄၅:၂) ဘုရားသခင်ကိုမချီးမွမ်းဘဲနေသည့်တစ်နေ့တာသည် မည်မျှအချည်းနှီးသက်သက်ဖြစ်မည်တကား။ ကျွန်ုပ်တို့၏ကောင်းကင်ခမည်းတော်ကိုမချီးမွမ်း၊ ဆုမတောင်းပဲနေသည်တိုင်အောင် အလုပ်များလွန်းခြင်း၊ စည်းစိမ်ဥစ္စာအတွက်စိုးရိမ်ပူပန်ခြင်း မများလွန်းပါစေနှင့်။ စံပြဆုပတ္ထနာတွင် “အသက်မွေးလောက်သောအစာကို အကျွန်ုပ်တို့အားနေ့ရက်အစဉ်အတိုင်းပေးသနားတော်မူပါ” ဟုဆိုစဉ် နေ့စဉ်ဆုတောင်းသင့်ကြောင်းယေရှုတင်ပြသည်။ (လုကာ ၁၁:၃) ခရစ်ယာန်ဓမ္မအမှုတွင်ပါဝင်စဉ် အချိန်ပြည့်လုပ်ငန်းတော်ထမ်းဆောင်သူအများသည် ဘုရားသခင်ကိုနေ့စဉ်ချီးမွမ်းကြသည်။ သို့သော်ကျွန်ုပ်တို့အခြေအနေမည်သို့ရှိစေကာမူ ဘုရားသခင်ကိုနေ့စဉ်ချီးမွမ်းရန် ကျွန်ုပ်တို့နှလုံးကလှုံ့ဆော်သင့်သည်။ စဉ်းစားကြည့်ပါလေ။ ထာဝရအသက်ရရန်မျှော်လင့်သူဆက်ကပ်အပ်နှံသက်သေခံများအနေနှင့် နာမတော်ကိုထာဝစဉ်ချီးမွမ်းရန် ကြီးမြတ်သောအလားအလာရှိကြသည်။—ယောဟန် ၁၇:၃။

၆။ ယေဟောဝါသည် အဘယ်ကြောင့် “အလွန်ချီးမွမ်းဖွယ်ဖြစ်တော်မူ” သနည်း။

^၆ တစ်နေ့လုံးဘုရားသခင်ကိုချီးမွမ်းနေရန်အကြောင်းရှိကြောင်း ဒါဝိဒ်ဤသို့ဆက်တင်ပြ၏။ “ထာဝရဘုရား [ယေဟောဝါ၊ ကဘ]သည်ကြီးမြတ်၍ အလွန်ချီးမွမ်းဖွယ်ဖြစ်တော်မူ၏။ ကြီးမြတ်တော်မူခြင်းကိုစစ်၍မကုန်နိုင်။ (ဆာလံ ၁၄၅:၃) ယေဟောဝါသည်ကြီးမြတ်တော်မူလွန်းသဖြင့် ပြိုင်ဘက်ကင်းတော်မူ၏။ ဗာဗုလုန်ဘုရင်နေဗုခဒ်နေဇာ ဤသို့ဝန်ခံရသည်။ ဘုရားသခင်၏ “လက်တော်ကို အဘယ်သူမျှမဆီးတားနိုင်။ ‘အဘယ်သို့ပြုသနည်း’ ဟုကိုယ်တော်ကိုဆိုနိုင်သောသူမရှိ။” (ဒံယေလေ ၄:၃၄၊ ၃၅) ယေဟောဝါသည် “ဘုရားတကာတို့ထက်ကြောက်ရွံ့ဖွယ်ဖြစ်တော်မူ၏။” (ဆာလံ ၉၆:၄) ယင်းကြောင့် “အလွန်ချီးမွမ်းဖွယ်” ဖြစ်ရခြင်းမှာအဆန်းမဟုတ်။ ယေဟောဝါကိုထောမနာပြုရာတွင် ချီးမွမ်းခန်းဖွင့်လွန်းသည်ဟုဆိုဖွယ်မရှိ။ ကိုယ်တော်သည် အကန့်အသတ်မရှိထာဝစဉ်ချီးမွမ်းခံထိုက်တော်မူသည်။

၇။ ဘုရားသခင်၏ “ကြီးမြတ်တော်မူခြင်းကိုစစ်၍မကုန်နိုင်” ကြောင်းအဘယ်သက်သေရှိသနည်း။

^၇ ယေဟောဝါ၏ “ကြီးမြတ်တော်မူခြင်းသည် စစ်၍မကုန်နိုင်” ပါ။ ခန္ဓာတော်မည်မျှကြီးမားစေကာမူ ကိုယ်တော်၏အရည်အချင်းတို့က ကိုယ်တော်အားကြီးမြတ်စေတော်မူသည်။ မှန်၏။ ကိုယ်တော်ဖန်ဆင်းထားတော်မူရာများသည် ကျွန်ုပ်တို့နားမလည်နိုင်သည်ထိ အံ့ချီးဖွယ်ဖြစ်ပေသည်။ ကျွန်ုပ်တို့ကိုယ်တိုင်ပင် “ထူးဆန်းသောလက္ခဏာ” ဖြင့်ဖန်ဆင်းခံရပေပြီ။ (ဆာလံ ၁၃၉:၁၄။ ယောဘ ၉:၁၀။ ၃၇:၅) ထို့ပြင်ယေဟောဝါဘုရားသခင်သည် အလွန်မြင့်မြတ်စွာကျင့်ကြံတော်မူသည်။ ကတိတော်များအတိုင်း သစ္စာရှိရှိပြုတော်မူ၍ ရည်ရွယ်တော်မူချက်တို့ကိုလည်း ချစ်ခြင်းမေတ္တာတော်ဖြင့်ဖော်ပြပေးသည်။ သို့ဖြစ်လျက်ပင် ဘုရားသခင်အကြောင်း ကျွန်ုပ်တို့အကုန်အစင်သိနိုင်မည်မဟုတ်ပါ။ ကိုယ်တော်အကြောင်း၊ ကိုယ်တော်၏ဖန်ဆင်းခြင်း၊ ကိုယ်တော်၏ရည်ရွယ်တော်မူချက်များကို ထာဝစဉ်တိုး၍သိနားလည်သွားနိုင်မည်။—ရောမ ၁၁:၃၃-၃၆။

ယေဟောဝါ၏လုပ်ငန်းတော်များကိုချီးမွမ်းပါ

၈။ (က) ယေဟောဝါ၏အမှုတော်များကို “လူမျိုးအဆက်ဆက်” မည်သို့ချီးမွမ်းသနည်း။ (ခ) ယေဟောဝါ၏အမှုတော်နှင့်စီရင်တော်မူချက်များအကြောင်း သားသမီးများကိုသွန်သင်ပေးမည်ဆိုလျှင် ကိုယ်တော်အားဝတ်ပြုခြင်းကို သူတို့မည်သို့သဘောထားကြမည်နည်း။ (ဂ) ရွှင်လန်းသော “လူမျိုးဆက်” အနေနှင့်ဘိသိက်ခံအကြွင်းအကျန်သည် အဘယ်အမှုပြုခဲ့ပြီနည်း။

^၈ စိစစ်၍မကုန်နိုင်သောကြီးမြတ်တော်မူသည့်ဘုရားသခင်အကြောင်း ချီးမွမ်းစရာများစွာရှိသဖြင့် ဒါဝိဒ်က “အမှုတော်တို့ကိုလူမျိုးအဆက်ဆက်တို့သည်ချီးမွမ်း၍ တန်ခိုးတော်များကိုဟောပြောကြပါလိမ့်မည်” ဟုပြောဆိုရန်လှုံ့ဆော်ခံခဲ့ရသည်။ (ဆာလံ ၁၄၅:၄) သူ့နောက်တွင်ရှိလူမျိုးဆက်တို့လည်း ယေဟောဝါ၏အမှုတော်များကိုချီးမွမ်းထောမနာပြုကာ တန်ခိုးကြီးလုပ်ရပ်တော်တို့ကိုရေတွက်ကြလေပြီ။ ဤအကြောင်းအရာများကို ကျွန်ုပ်တို့၏အိမ်တွင်းကျမ်းစာသင်အံမှုများအားပြောပြရန် အခွင့်ထူးလှပါသည်တကား။ ဥပမာ၊ အရာခပ်သိမ်းကိုဘုရားသခင်ဖန်ဆင်းကြောင်း ကျွန်ုပ်တို့ပြောပြနိုင်သည်။ (ကမ္ဘာဦး ၁:၁–၂:၂၅။ ဗျာဒိတ် ၄:၁၁) အီဂျစ်ပြည်တွင်ကျွန်ခံရသည့်အဖြစ်မှ ဣသရေလလူမျိုးကိုရွေးနှုတ်တော်မူချိန်က ကိုယ်တော်၏စီရင်တော်မူချက်များအကြောင်း၊ ခါနာန်ပြည်ရှိရန်သူတို့ကိုချေမှုန်းပစ်ရန် ကိုယ်တော်၏ကူညီမစမှုများအကြောင်း၊ ရှေးပါးရှားနိုင်ငံတွင် လူမျိုးတုံးရမည့်အဖြစ်မှ အသက်ကယ်တင်ခံခဲ့ရခြင်းနှင့်အခြားအကြောင်းများစွာကို ပြောပြနိုင်ပါသည်။ (ထွက်မြောက်ရာ ၁၃:၈-၁၀။ တရားသူကြီး၊ ၄:၁၅။ ဧသတာ ၉:၁၅-၁၇) ယေဟောဝါ၏လုပ်ရပ်များနှင့်စီရင်တော်မူချက်များအကြောင်း သားသမီးများအားပြောပြချင်စိတ်ပြင်းပြသည်မဟုတ်လော။ ဤသို့သွန်သင်ပေးပြီး ဘုရားသခင့်အမှုတော်ကို ကျွန်ုပ်တို့ဝမ်းသာအားရထမ်းဆောင်နေသည်ကို သူတို့မြင်ရလျှင် ကိုယ်တော့်ဝတ်ပြုရေးကိုရွှင်လန်းစရာအဖြစ်သူတို့သဘောထားကာ ‘ယေဟောဝါကြောင့် ရွှင်လန်းမှုသည် သူတို့အဖို့ခံတပ်’ ဖြစ်ပေလိမ့်မည်။ (နေဟမိ ၈:၁၀။ ဆာလံ ၇၈:၁-၄) ဘိသိက်ခံအကြွင်းအကျန်သည် မြေကြီးပရဒိသုတွင်နေထိုင်မည့်လူမျိုးဆက်အဝင်ဖြစ်သော “လူအုပ်ကြီး” အားဘုရားသခင်၏လုပ်ရပ်များကိုချီးမွမ်းပြောဆိုရန် ထိုရွှင်လန်းသောယေဟောဝါသက်သေ “လူမျိုးဆက်” တစ်ဆက်အဖြစ်ဖွဲ့စည်းထားသည်။—ဗျာဒိတ် ၇:၉။

၉။ ဘုရားသခင်၏အမှုနှင့်ကြီးမားသောစီရင်ချက်များကို သုံးသပ်ကြည့်ရာတွင် အဘယ်အရာကိုစိတ်ချနိုင်သနည်း။

^၉ ဘုရားသခင်၏စီရင်တော်မူရာ၊ တန်ခိုးကြီးလုပ်ရပ်များကို ပြန်သုံးသပ်ကြည့်သည့်အခါ ယေဟောဝါသည် “မဟာနာမတော်ကိုထောက်၍ မိမိလူတို့ကိုစွန့်တော်မမူ” ကြောင်းသာ၍စိတ်ချနိုင်ပါသည်။ (၁ ဓမ္မရာဇဝင် ၁၂:၂၂။ ဆာလံ ၉၄:၁၄) စုံစမ်းခြင်း၊ အခက်အခဲများနှင့်ညှဉ်းပန်းနှိပ်စက်ခြင်းကိုကြုံရသည့်အခါ “ဘုရားသခင်ထံတော်မှငြိမ်သက်ခြင်း” သည် ကျွန်ုပ်တို့စိတ်နှလုံးကိုစောင့်မသဖြင့် တည်ငြိမ်စိတ်ချနေနိုင်ပါမည်။ (ဖိလိပ္ပိ ၄:၆၊ ၇) ယင်းကြောင့် ကျွန်ုပ်တို့၏မေတ္တာရှင်၊ ကာကွယ်စောင့်မတော်မူသော ကောင်းကင်ခမည်းတော်အကြောင်း သူတစ်ပါးအားပြောပြခြင်းသည် အလွန်လျောက်ပတ်ပေသည်။

၁၀။ ယေဟောဝါ၏ “အံ့ဖွယ်သောအမှုတော်” များ၌အဘယ်အရာများပါဝင်သနည်း။ ယင်းတို့ကိုဆင်ခြင်ခြင်းမှ အဘယ်အကျိုးကျေးဇူးရရှိသနည်း။

^၁၀ ယေဟောဝါ၏ဘုန်းအာဏာနှင့်လုပ်ရပ်များကို အချိန်ယူဆင်ခြင်သုံးသပ်သင့်ကြောင်းဒါဝိဒ်ဤသို့ထပ်ဆင့်ဆိုသည်။ “အကျွန်ုပ်သည်လည်း ဘုန်းတန်ခိုးအာနုဘော်တော်ကိုလည်းကောင်း၊ အံ့ဖွယ်သောအမှုတော်တို့ကိုလည်းကောင်းမြွက်ဆိုပါမည်။ (ဆာလံ ၁၄၅:၅) ဘုရားသခင့်ဂုဏ်ကျက်သရေတော်သည် ကြောက်မက်ဖွယ်ဖြစ်၍ ပြိုင်ဘက်ကင်းတော်မူ၏။ (ယောဘ ၃၇:၂၂။ ဆာလံ ၁၄၈:၁၃) ဤသို့အားဖြင့် ယေဟောဝါ၏ဂုဏ်ကျက်သရေဘုန်းထင်ရှားရေးကို ဒါဝိဒ်သည် မိမိ၏အရေးကိစ္စဖြစ်စေခဲ့သည်။ ဆာလံဆရာသည် ဘုရားသခင်၏ “အံ့ဖွယ်သောအမှုတော်တို့” ကိုလည်းထင်ရှားစေသည်။ ထိုအမှုများတွင် ရေလွှမ်းမိုးဘေးဖြစ်စဉ်ကကဲ့သို့ အပြစ်သားများကိုတရားစီရင်ခြင်းနှင့် ဘုရားတရားကြည်ညိုသူတို့ကိုကယ်တင်ခြင်းကိစ္စလည်းပါဝင်၏။ (ကမ္ဘာဦး ၇:၂၀-၂၄။ ၂ ပေတရု ၂:၉) ဤကိစ္စများကိုဆင်ခြင်သုံးသပ်ခြင်းက ယေဟောဝါနှင့်ကျွန်ုပ်တို့၏ဆက်ဆံရေးကို ခိုင်ခံ့မြဲမြံစေပြီး ကိုယ်တော်၏ဂုဏ်ကျက်သရေနှင့်အံ့ဖွယ်အမှုများအကြောင်း သူတစ်ပါးအားပြောဆိုရန်ခွန်အားပေးသည်။ တောအရပ်၌ အရက် ၄၀ ရှိစဉ်ပွင့်လှစ်သောကောင်းကင်မှ ကိုယ်တော်သိရှိသည့်အရာများကို ဆင်ခြင်သုံးသပ်ခြင်းကြောင့် သွေးဆောင်ခြင်းကိုခံရပ်ရန်ခွန်အားရှိတော်မူခဲ့သည်။ (မဿဲ ၃:၁၃–၄:၁၁) ထိုနောက်ယေဟောဝါ၏ဂုဏ်ကျက်သရေနှင့်အံ့ချီးဖွယ်လုပ်ရပ်များအကြောင်း သူတစ်ပါးအားဟောပြောသွန်သင်ပေးတော်မူသည်။

၁၁။ (က) ယေရိခေါမြို့သားတို့သည် အဘယ်ကြောင့်ထိတ်လန့်နေကြသနည်း။ (ခ) ယေဟောဝါသက်သေများသည် အဘယ်သဘောထားမျိုးဖြင့် ဘုရားသခင်၏ “ကြောက်မက်ဖွယ်သောအမှုတော်” နှင့်ကိုယ်တော်၏ “ကြီးမြတ်တော်မူခြင်း” အကြောင်းပြောဆိုနေကြသနည်း။

^၁၁ ဘုရားသခင်၏ဂုဏ်အသရေနှင့်လုပ်ငန်းတော်များအကြောင်းပြောဆိုခြင်းသည် အခြားသူတို့အားလည်း ယင်းအကြောင်းတစ်ဖန်ပြောဆိုရန်တိုက်တွန်းပေးရာရောက်သည်။ ဒါဝိဒ်ဤသို့ဆိုသည်။ “သူတို့သည် ကြောက်မက်ဖွယ်သောအမှုတော်တို့၌ပါသောတန်ခိုးကိုမြွက်ဆို၍ အကျွန်ုပ်သည်လည်းကြီးမြတ်တော်မူခြင်းအကြောင်းကိုကြားပြောပါမည်။” (ဆာလံ၊ ၁၄၅:၆) ပင်လယ်နီအရပ်တွင် ဣသရေလလူမျိုးကိုယေဟောဝါကယ်နှုတ်ပြီး အာမောရိဘုရင်နှစ်ဦးကို အနိုင်ရစေတော်မူသည့်အကြောင်း ယေရိခေါမြို့သားများကြားသောအခါ ထိတ်လန့်ခဲ့သည်ဟုရာခပ်ပြောပြသည်။ ဤ “ကြောက်မက်ဖွယ်သောအမှုတော်တို့” ကိုယေရိခေါမြို့၌ပြောဆိုနေကြမည်အမှန်။ (ယောရှု ၂:၉-၁၁) ကျရောက်လုဆဲဆဲရှိ “ကြီးစွာသောဒုက္ခ” သည်လည်း အမှန်ကြောက်မက်ဖွယ်ဖြစ်ပါလိမ့်မည်။ (မဿဲ ၂၄:၂၁) သို့သော်ဘုရားသခင်နှင့်ဝေးကွာသော ဖြောင့်မတ်သူတို့၏နှလုံးများတွင် ကြောက်မက်ဖွယ်ရာများသည် ထိုက်သင့်လျော်ကန်စွာ “ယေဟောဝါကိုကြောက်ရွံ့” ရိုသေသည့်သဘောရှိစေသည်။ (သု၊ ၁:၇) ဤကဲ့သို့သောလေးစားမှုမျိုးဖြင့် ယေဟောဝါသက်သေများသည် ဘုရားသခင့်တန်ခိုးတော်ထင်ရှားမှုများအကြောင်းပြောဆိုကြသည်။ ဘိသိက်ခံနှင့်သူတို့၏မြေကြီးဆိုင်ရာအပေါင်းအသင်းတို့စပ်ကြား ပြောဆိုနေကျအကြောင်းသည် ကြီးမြတ်တော်မူသောအံ့ချီးဖွယ်အမှုများစီရင်တော်မူရှင်အကြောင်းတည်း။ ညှဉ်းပန်းနှိပ်စက်ခြင်းပင် သူတို့၏နှုတ်ကိုမပိတ်နိုင်။ ယေဟောဝါ၏ “ကြီးမြတ်တော်မူခြင်း” အကြောင်းကို သူတို့မပြောဘဲမနေနိုင်ကြပါ။—တမန်တော် ၄:၁၈-၃၁၊ ၅:၂၉။

ယေဟောဝါ၏ကောင်းမြတ်ခြင်းကြောင့် ကိုယ်တော်ကိုချီးမွမ်းလေ

၁၂။ ယေဟောဝါ၏ကောင်းမြတ်ခြင်းသည် ကျွန်ုပ်တို့အားမည်သို့ပွက်ထ “မြွက်ဆို” စေသနည်း။

^၁၂ ကြီးမြတ်တော်မူသည့်အတွက်သာမက ကိုယ်တော်၏ကောင်းမြတ်ခြင်းနှင့်ဖြောင့်မတ်တော်မူခြင်းအတွက်ပါ ဘုရားသခင်အားချီးမွမ်းသင့်သည်။ ယင်းကြောင့်ဒါဝိဒ်ဤသို့ဆိုသည်။ “သူတို့သည် အလွန်ကောင်းမြတ်တော်မူခြင်းကိုအောက်မေ့ဖို့ရာမြွက်ဆို၍ ဖြောင့်မတ်တော်မူခြင်းအရာကို ရွှင်လန်းစွာသီချင်းဆိုကြပါလိမ့်မည်။” (ဆာလံ ၁၄၅:၇) ယေဟောဝါ၏ကောင်းမြတ်တော်မူခြင်းသည် ကြီးမားလှသဖြင့် ယင်းအကြောင်းကိုအားရရွှင်လန်းစွာပွက်ထ “မြွက်ဆို” စရာအများအပြားရှိသည်။ ဟေဗြဲစကားအရ စမ်းရေမှပန်းထွက်သည့်ရေပမာဖြစ်သည်။ ယင်းကြောင့်ဘုရားသခင်ကိုကျေးဇူးတင်ချီးမွမ်းစကားများ တဖွဖွပြောဆိုကြစို့လေ။ (သု၊ ၁၈:၄) ယေဟောဝါ၏ကောင်းမြတ်ခြင်းကိုဣသရေလလူမျိုးများမေ့လျော့ခဲ့သည့်အတွက် ဝိညာဏဆုံးရှုံးမှုကြီးဖြစ်ခဲ့သည်။ (ဆာလံ ၁၀၆:၁၃-၄၃) ဆက်ကပ်အပ်နှံသက်သေခံများအပေါ် ယေဟောဝါရှင်မည်မျှကောင်းမြတ်တော်မူကြောင်းကိုသိရှိလာ၍ နောင်တရလာစေရန် ကျွန်ုပ်တို့၏နှလုံးများမူ ကျေးဇူးတင်စိတ်ဖြင့်ပြည့်လျှံနေသင့်သည်။—ရောမ ၂:၄။

၁၃။ မြင့်မြတ်သောတရားမျှတမှုနှင့်ဖြောင့်မတ်ခြင်းတရားထင်ရှားချက်တို့သည် ကျွန်ုပ်တို့အားမည်သို့ဖြစ်စေသင့်သနည်း။

^၁၃ ဘုရားသခင့်တရားမျှတမှုနှင့်ဖြောင့်မတ်ခြင်းတရားထင်ရှားရေးသည် ကျွန်ုပ်တို့အားရွှင်လန်းအားရစွာကြွေးကြော်ရန် တိုက်တွန်းမှုဖြစ်ပါလေစေ။ ဤသို့ခံစားရပါက ဘုရားသခင့်နိုင်ငံတော်ကိုသာမက ကိုယ်တော်၏ဖြောင့်မတ်ခြင်းတရားကိုပါ ရှေ့ဦးထားကြပါလိမ့်မည်။ ကျွန်ုပ်တို့၏အကျင့်အကြံအားဖြင့် ယေဟောဝါကိုချီးမွမ်းစရာအမြဲဖြစ်စေလိုမည်။ ထိုအခါ ဘုရားသခင့်လုပ်ငန်းတော်၌ အလုပ်များနေသော နိုင်ငံတော်သတင်းကိုမှန်မှန်ကြွေးကြော်သူများဖြစ်လာကြမည်။ ထိုအခါယေဟောဝါအားချီးမွမ်းခြင်းသည် ဆိတ်ငြိမ်ရာသင်္ချိုင်းတွင်း၌ မြှုပ်နှံထားသည့်အရာကဲ့သို့ ဘယ်သောအခါမျှဖြစ်မည်မဟုတ်ပါ။—မဿဲ ၆:၃၃။ ၁ ကောရိန္သု ၁၅:၅၈။ ဟေဗြဲ ၁၀:၂၃။

ယေဟောဝါသည်သနားကြင်နာတော်မူ၏

၁၄။ ယေဟောဝါသည် “ကျေးဇူးပြုတတ်သောသဘော၊ သနားစုံမက်တတ်သောသဘော” ရှိတော်မူကြောင်း အဘယ်သာဓကရှိသနည်း။

^၁၄ ချီးမွမ်းထိုက်သောဘုရားသခင်၏ထပ်ဆင့်အရည်အချင်းများကို ဒါဝိဒ်ဤသို့ညွှန်းခဲ့သည်။ “ယေဟောဝါသည် ကျေးဇူးပြုတတ်သောသဘော၊ သနားစုံမက်တတ်သောသဘောနှင့်ပြည့်စုံ၍ ခန္တီတော်နှင့်ကရုဏာတော်သည် အလွန်ကြွယ်ဝပါ၏။” (ဆာလံ ၁၄၅:၈) ဘုရားသခင်သည် လုံးဝဥဿုံကောင်းမြတ်ပြီးရက်ရောတော်မူသဖြင့် ကျေးဇူးပြုတတ်သောသဘောရှိ၏။ (မဿဲ ၁၉:၁၇။ ယာကုပ် ၁:၅) ကိုယ်တော့်အမှုမထမ်းသူတို့ကိုပင် ကောင်းမှုပြုပေးတော်မူသည်။ (တမန်တော် ၁၄:၁၄-၁၇) ကျွန်ုပ်တို့သည် “မြေမှုန့်ဖြစ်ကြောင်းကိုအောက်မေ့တော်မူ” ပြီးသနားကြင်နာသက်ညှာတော်မူ၏။ ကြေကွဲသောနှလုံးကို ကိုယ်တော်မရွံမုန်း၊ ကျွန်ုပ်တို့အပြစ်များနှင့်အညီကြည့်မြင်တတ်သည်မဟုတ်ဘဲ မေတ္တာအရှိဆုံးလူ့ဖခင်တစ်ဦးထက် များစွာသနားကြင်နာတော်မူသည်။ (ဆာလံ ၅၁:၁၇။ ၁၀၃:၁၀-၁၄) ကိုယ်တော်၏သနားကြင်နာမှုအများဆုံးထင်ရှားသည့်လုပ်ရပ်မှာ ဘုရားသခင်နှင့်ကျွန်ုပ်တို့မိတ်သဟာယဖွဲ့နိုင်ပြီး ကိုယ်တော်၏ကရုဏာတော်ကို မြည်းစမ်းနိုင်မည်အကြောင်း ကျွန်ုပ်တို့အတွက်အသေခံစေမည့် ချစ်မြတ်နိုးရာသားတော်ကိုစေလွှတ်တော်မူခြင်းပင်ဖြစ်သည်။—ရောမ ၅:၆-၁၁။

၁၅။ ယေဟောဝါဘုရားသခင်၏ “ခန္တီတော်နှင့်ကရုဏာတော်သည်အလွန်ကြွယ်ဝ” ကြောင်းအဘယ်ကြောင့်ဆိုနိုင်သနည်း။

^၁၅ ကျွန်ုပ်တို့၏ကောင်းကင်ခမည်းတော်သည် အမျက်ထွက်နှေးတော်မူသည်။ သိမ်းကြုံးအမျက်ထွက်တော်မမူ။ ယေဟောဝါ၏ ‘ချစ်သနားခြင်းသဘောလည်းကြီးမားတော်မူ၏။” ဤတွင်ဟေဗြဲစကားလုံးက ချစ်ခြင်းမေတ္တာမှဆက်နွယ်နေသောသနားတတ်ခြင်းကိုဆိုလိုနေပြီး အရာတစ်ခုကိုတွယ်တာခြင်းဖြစ်သည်။ ထိုအရာနှင့်စပ်လျဉ်းသောရည်ရွယ်ချက်မပြည့်စုံမချင်း ထိုသို့တွယ်တာနေ၏။ တစ်နည်းအားဖြင့် “သမာဓိရှိမေတ္တာ” ဟူ၍ပြန်ဆိုနိုင်သည်။ ရွေးနှုတ်ဖိုးအားဖြင့်ကယ်တင်ခြင်း၊ ကယ်ဆယ်ပေးခြင်း၊ ကာကွယ်ပေးခြင်း၊ ဒုက္ခများမှလွတ်မြောက်စေခြင်း၊ အပြစ်ပြုရာမှပြန်လှည့်လာခြင်းအမှုတို့တွင် ဘုရားသခင်၏ချစ်သနားခြင်း သို့မဟုတ် သမာဓိရှိမေတ္တာထင်ရှားတော်မူသည်။ (ဆာလံ ၆:၄။ ၂၅:၇။ ၃၁:၁၆၊ ၂၁။ ၄၀:၁၁။ ၆၁:၇။ ၁၁၉:၈၈၊ ၁၅၉။ ၁၄၃:၁၂။ ယောဟန်၃:၁၆) ‘ကောင်းကင်စစ်ပွဲ’ ပြီးပြီးချင်းအာမဂေဒုန်ကိုယေဟောဝါမဖြစ်စေဘဲ လူများစွာတို့အားကယ်တင်ခြင်းရစေခြင်းသည် ဘုရားသခင့်ချစ်သနားခြင်းသဘောတင်ပြခြင်းပင်ဖြစ်သည်တကား။—ဗျာဒိတ် ၁၂:၇-၁၂။ ၂ ပေတရု ၃:၁၅။

၁၆။ ယေဟောဝါသည် “ခပ်သိမ်းသောသူတို့အားကျေးဇူးပြု” တော်မူကြောင်းမည်သို့ထင်ရှားသနည်း။

^၁၆ ဘုရားသခင်၏ကရုဏာကိုထောက်၍ ကိုယ်တော်၏သဘောထားကြီးမားတော်မူသည်ဟု ဆိုနိုင်ပါသည်။ ဒါဝိဒ်က “ယေဟောဝါသည် ခပ်သိမ်းသောသူတို့အား ကျေးဇူးပြုချင်သောသဘောရှိ၍ ဖန်ဆင်းတော်မူသမျှတို့ကို သနားစုံမက်တော်မူ၏” ဟုဆိုသည်။ (ဆာလံ ၁၄၅:၉) မှန်ပေသည်။ ဣသရေလလူမျိုးအပေါ် ဘုရားသခင်အလွန်ကောင်းခဲ့သည်။ ထိုမျှမက “ကောင်းသောသူ၊ မကောင်းသောသူတို့အပေါ်၌ ကိုယ်တော်၏နေကိုထွက်စေတော်မူ၏။ ဖြောင့်မတ်သောသူ၊ မဖြောင့်မတ်သောသူတို့အပေါ်၌ မိုးကိုရွာစေတော်မူ၏။” (မဿဲ ၅:၄၃-၄၅) ထို့အပြင်ကောင်းချီးဖြစ်စေမည့် “မျိုးနွယ်တော်” လာမည့်အကြောင်း ဧဒင်အရပ်တွင်ယေဟောဝါကတိထားတော်မူခဲ့သည်။ နောင်တွင်အာဗြဟံအားဤသို့ဆိုသည်။ “သင်၏အမျိုးအနွယ်အားဖြင့် လူမျိုးအပေါင်းတို့သည် ကောင်းချီးမင်္ဂလာကိုခံရကြလိမ့်မည်” ဟုအာဗြဟံအားမိန့်တော်မူသည်။ (ကမ္ဘဦး ၃:၁၅။ ၂၂:၁၈) ဘုရားသခင်၏ကောင်းမြတ်တော်မူခြင်းသည် ဤ “နောက်ဆုံးကာလ” တွင်ကြီးမားတော်မူသောကြောင့် မည်သူမဆို ‘အဖိုးအခမပေးဘဲအသက်ရေကိုလာသောက်သုံး’ နိုင်ပါသည်။ (ဒံယေလ ၁၂:၄။ ဗျာဒိတ် ၂၂:၁၇) အသိဉာဏ်ရှိသောသတ္တဝါအပေါင်းတို့အား ယေဟောဝါကောင်းကျိုးပြုလိုတော်မူသည်။ ကိုယ်တော်၏ကောင်းမြတ်ခြင်းသည် ကိုယ်တော်နှင့်ကျွန်ုပ်တို့အားတရင်းတနှီးဖြစ်စေသည်။

၁၇။ ယေဟောဝါ၏ ‘သနားစုံမက်ခြင်းသည် ဖန်ဆင်းတော်မူသမျှတို့’ အပေါ် အဘယ်နည်းဖြင့်ရှိသနည်း။

^၁၇ လူနှင့်တိရစ္ဆာန်အတွက်ပါ ကြွယ်ဝစွာစီမံပေးထားသည့်အတွက် ယေဟောဝါသည် “ဖန်ဆင်းတော်မူသမျှတို့ကို သနားစုံမက်တော်မူ၏။” ကိုယ်တော်သည် “ခပ်သိမ်းသောသတ္တဝါတို့ကိုကျွေးမွေးတော်မူသော” အရှင်ဖြစ်တော်မူ၏။ (ဆာလံ ၁၃၆:၂၅။ ၁၄၇:၉) ဘုရားသခင်သည် စည်းစိမ်ရှိသူကိုချီးမြှင့်ပြီး နိမ့်ကျသူများကိုမူကားစွန့်ပယ်သည်မဟုတ်။ မာနထောင်လွှားသူအားမြှင့်တင်ကာ ဆင်းရဲသူကိုကားရွံရှာသည်မဟုတ်။ လူမိုက်ကိုမြှောက်စားကာ ပညာရှိအားနှိပ်ကွပ်သည်လည်းမဟုတ်ပါ။ အပြစ်သားများသည်ထိုသို့ပြုကြမည်ဖြစ်သော်လည်း ကျွန်ုပ်တို့၏ကရုဏာရှင်ကောင်းကင်ခမည်းတော်သည် ထိုသို့ပြုတော်မမူ။ (ဆာလံ ၁၀၂:၁၇။ ဇေဖနိ ၃:၁၁၊ ၁၂ ဒေသနာ ၁၀:၅-၇) ချစ်မြတ်နိုးရာသားတော်၏ရွေးဖိုးပူဇော်သက္ကာအားဖြင့် ကယ်တင်ခြင်းရရှိစေခြင်းက ဘုရားသခင်၏ကရုဏာ၊ ကောင်းမြတ်ခြင်းနှင့်ချစ်ခင်ကြင်နာမှု မည်မျှကြီးမားကြောင်း ထင်ရှားသည်တကား။—၁ ယောဟန် ၄:၉၊ ၁၀။

သစ္စာတည်ကြည်သူများ ယေဟောဝါကိုကောင်းချီးပေး

၁၈။ (က) ဘုရားသခင်၏အမှုတော်များသည် ကိုယ်တော်အားမည်သို့ ‘ချီးမွမ်းသနည်း’။ (ခ) အဘယ်အချိန်တွင် ယေဟောဝါအားဂုဏ်တင်ချီးမွမ်းချင်စိတ်ပေါ်သင့်သနည်း။

^၁၈ ဘုရားသခင်သည် အဘက်ဘက်မှချီးမွမ်းထောမနာပြုခံထိုက်သည်။ ဒါဝိဒ်တင်ပြသည်ကားဤသို့။ “အိုထာဝရဘုရား [ယေဟောဝါ၊ ကဘ] ဖန်ဆင်းတော်မူသမျှတို့သည် ဂုဏ်တော်ကိုပြ၍ ကိုယ်တော်၏သန့်ရှင်းသူတို့သည် ကောင်းချီးပေးကြပါ၏။” (ဆာလံ ၁၄၅:၁၀) ကောင်းစွာဆောက်လုပ်ထားသောအိမ်သည် ဗိသုကာဆရာချီးမွမ်းခံရစရာ၊ လှပသောပန်းအိုးသည် ကျွမ်းကျင်သောအိုးသမားဂုဏ်ထင်ရှားရာဖြစ်သကဲ့သို့ ဘုရားသခင်၏ဖန်ဆင်းခြင်းလက်ရာများသည် ကိုယ်တော်၏ “ဂုဏ်တော်ကိုပြ” သည်။ (ဟေဗြဲ ၃:၄။ ဟေရှာယ ၂၉:၁၆။ ၆၄:၈ တို့နှင့်နှိုင်းယှဉ်ပါ။) ယေဟောဝါ၏ဖန်ဆင်းရာတို့သည် အံ့ချီးဖွယ်ကောင်းလှသဖြင့် ကောင်းကင်တမန်များနှင့်လူတို့ မချီးမွမ်းဘဲမနေနိုင်ခဲ့ပါ။ ကမ္ဘာမြေကြီး၏အုတ်မြစ်ကိုကိုယ်တော်ချချိန်တွင် ဘုရားသခင့်ကောင်းကင်သားများ ဩဘာပေးခဲ့သည်။ (ယောဘ ၃၈:၄-၇) “ကောင်းကင်သည် ဘုရားသခင်၏ဘုန်းအသရေတော်ကိုကြားပြော၍ မိုးမျက်နှာကြက်သည် လက်တော်နှင့်လုပ်သောအရာများကိုပြသ၏” ဟုဒါဝိဒ်ပြောသည်။ (ဆာလံ ၁၉:၁-၆) သိမ်းငှက်ပျံသန်းနေခြင်း၊ စိမ်းလန်းသောတောင်ကုန်းပေါ် သမင်ဒရယ်ခုန်လွှားသွားခြင်းတို့ကိုမြင်သည့်အခါ ယေဟောဝါကိုထောမနာပြုကြလိမ့်မည်။ (ယောဘ ၃၉:၂၆။ ရှောလမုန်သီချင်း ၂:၁၇) ရိတ်သိမ်းချိန်၌၊ သို့မဟုတ် မိတ်ဆွေများနှင့်စားသောက်ချိန်၌ ချီးမွမ်းစကားပြောရန်လျောက်ပတ်သည်။ (ဆာလံ ၇၂:၁၆။ သု၊ ၁၅:၁၇) အံ့သြစွာတည်ဆောက်ထားသောကျွန်ုပ်တို့၏ခန္ဓာကိုယ်သည်လည်း ဘုရားသခင်အားကျေးဇူးတော်ချီးမွမ်းစကားပြောဆိုရန် လှုံ့ဆော်ထိုက်သည်။—ဆာလံ ၁၃၉:၁၄-၁၆။

၁၉။ “သမာဓိရှိသူများ” ကားအဘယ်သူများနည်း။ သူတို့အဘယ်အမှုကိုပြုသနည်း။

^၁၉ ယနေ့ယေဟောဝါ၏ဝိညာဉ်တော်ဖြင့်ဘိသိက်ခံ “သမာဓိရှိသူများ” သည် ကိုယ်တော်ကိုချီးမွမ်းကြသည်။ ကိုယ်တော်ကိုထောမနာပြုကာ အလိုတော်သည်ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံဖို့ရန် တွေ့မြင်လိုကြသည်။ (မဿဲ ၆:၉၊ ၁၀) ဘိသိက်ခံများသည် သူတစ်ပါးအားဘုရားသခင်၏အံ့ဖွယ်လက်ရာတော်များအကြောင်းပြောကြားစဉ် လူအုပ်ကြီးသည် အမြဲတိုးများလာနေသည့်အရေအတွက်ဖြင့် လက်ခံနာယူကြောင်းတင်ပြကြသည်။ ဘိသိက်ခံသမာဓိစောင့်သိသူတို့နှင့်အတူ သူတို့သည် နိုင်ငံတော်ကြွေးကြော်သူများအဖြစ် ဇွဲလုံ့လရှိရှိအမှုတော်ထမ်းဆောင်ကြသည်။ ဘုရားသခင့်ဘုန်းထင်ရှားရန် ကျေးဇူးတင်စိတ်က သင့်အားဤလုပ်ငန်းတွင် မှန်မှန်ပါဝင်ဖို့တိုက်တွန်းပေးနေပါသလော။

၂၀။ (က) ယေဟောဝါ၏နာမတော်သည် မည်သို့သင်္ကာယနကင်းရှင်းမည်နည်း။ (ခ) ဆာလံ ၁၄၅ နှင့်ပတ်သက်၍ အဘယ်မေးခွန်းများကိုသုံးသပ်ရန်ကျန်ကြွင်းသေးသနည်း။

^၂၀ ယေဟောဝါသက်သေများအနေနှင့် ဘုရားသခင်ကိုချီးမွမ်းရာတွင် ဒါဝိဒ်နည်းတူပြုနေကြပါသည်။ ကျွန်ုပ်တို့အတွက် ယေဟောဝါ၏သန့်ရှင်းသောနာမတော်ထင်ရှားခြင်းနှင့် ၄င်းကိုချီးမွမ်းထောမနာပြုခြင်းသည် အရေးကြီးလှပေသည်။ နာမတော်မြတ်သည် ဘုရားသခင့်နိုင်ငံတော်အားဖြင့်သင်္ကာယနကင်းစင်မည်ဖြစ်သောကြောင့် ဘုရားသခင့်နိုင်ငံတော်နှင့်ဆိုင်သော သမ္မာကျမ်းစာပါဤသွန်သင်ချက်သည် ကျွန်ုပ်တို့ကြေညာနေသောသတင်းကောင်း၏ ထင်ရှားသောလက္ခဏာတစ်ရပ်ဖြစ်သည်။ ယင်းနှင့်ပတ်သက်၍ ဆာလံ ၁၄၅ ကဝိညာဏဉာဏ်အလင်းကိုပေးနေပါသလော။ ဤဆာလံသီချင်း၏ ကျန်အပိုင်းကိုဆွေးနွေးခြင်းမှ အဘယ်အရာများသိရှိရဦးမည်နည်း။ ယေဟောဝါရှင်သည် ထာဝရချီးမွမ်းခံထိုက်တော်မူကြောင်း အခြားအဘယ်နည်းများဖြင့် ယင်းကတင်ပြပါသနည်း။

သင့်မှတ်ချက်များကားအဘယ်နည်း

▫ ယေဟောဝါ၏နာမတော်ကို ကျွန်ုပ်တို့မည်သို့ချီးမွမ်းနိုင်မည်နည်း။

▫ ချီးမွမ်းထိုက်သော ဘုရားသခင်၏လက်ရာတော်အချို့ကား အဘယ်နည်း။

▫ ယေဟောဝါ၏ကောင်းမြတ်ခြင်းကို ကျေးဇူးတင်ပါက မည်သို့ပြုမူကြမည်နည်း။

▫ ဘုရားသခင်၏ကရုဏာသည် အဘယ်နည်းမျိုးဖြင့်ထင်ရှားနေသနည်း။

[စာမျက်နှာ ၁၄ ပါ ရုပ်ပုံ]

ကောင်းစွာဆောက်လုပ်ထားသော အိမ်တစ်လုံးသည် ဗိသုကာဆရာအတွက်ချီးမွမ်းရာဖြစ်သကဲ့သို့ ယေဟောဝါ၏ဖန်ဆင်းရာများသည် ကိုယ်တော်အားချီးမွမ်းပါ၏