ယေဟောဝါအားကြောက်ရွံ့ခြင်းမှ ရွှင်လန်းမှုကိုတွေ့ရန်သင်ယူခြင်း
“အချင်းသူငယ်တို့၊ လာကြလော့။ ငါ့စကားကိုနားထောင်ကြလော့။ ထာဝရဘုရားကိုကြောက်ရွံ့ခြင်းတရားကို သင်တို့အားငါသွန်သင်မည်။”—ဆာလံ ၃၄:၁၁။
၁ ဘုရားသခင်၏နိုင်ငံတော်အားဖြင့် ကြောက်ရွံ့ခြင်း မည်သို့ပယ်ရှားခံရမည်နည်း။ သို့သော် ယင်းသည် ကြောက်ရွံ့ခြင်းအားလုံးကို ဆိုလိုသလော။
မည်သည့်နေရာတွင်မဆို လူတို့သည် ကြောက်ရွံ့ခြင်း—ရာဇဝတ်မှုနှင့် အကြမ်းဖက်မှုကိုကြောက်ရွံ့ခြင်း၊ အလုပ်လက်မဲ့ဖြစ်မှုကို ကြောက်ရွံ့ခြင်း၊ အသည်းအသန်ဖျားနာမှုကို ကြောက်ရွံ့ခြင်းတို့မှ လွတ်မြောက်ရန် တောင့်တကြသည်။ ဘုရားသခင့်နိုင်ငံတော်အောက်တွင် ထိုလွတ်လပ်မှု အကောင်အထည်ပေါ်လာသောတစ်နေ့ မည်မျှဂုဏ်ကျက်သရေရှိလိုက်မည်ဖြစ်ခြင်း! (ဟေရှာယ ၃၃:၂၄; ၆၅:၂၁-၂၃; မိက္ခာ ၄:၄) သို့သော် ထိုအချိန်တွင် ကြောက်ရွံ့ခြင်းအားလုံး ပယ်ရှားခံရမည်မဟုတ်သကဲ့သို့ ယခုကျွန်ုပ်တို့၏အသက်တာတွင် ကြောက်ရွံ့ခြင်းမှန်သမျှကိုလည်း ဘေးဖယ်ပစ်ရန်မကြိုးစားသင့်ပါ။ ကောင်းသောကြောက်ရွံ့ခြင်းနှင့် မကောင်းသောကြောက်ရွံ့ခြင်း ဟူ၍ရှိသည်။
၂။ (က) မည်သည့်ကြောက်ရွံ့ခြင်းမျိုးသည် ဆိုးသနည်း၊ မည်သည့်ကြောက်ရွံ့ခြင်းမျိုးမူကား နှစ်လို့ဖွယ်ဖြစ်သနည်း။ (ခ) ဘုရားရေးရာကြောက်ရွံ့ခြင်းကား အဘယ်နည်း။ ကိုးကားထားသောကျမ်းချက်များက ယင်းကိုမည်သို့ဖော်ပြသနည်း။
၂ ကြောက်ရွံ့ခြင်းသည် လူတစ်ဦးအတွက် စိတ်ပိုင်းဆိုင်ရာအဆိပ်အတောက်ဖြစ်နိုင်ပြီး စဉ်းစားဆင်ခြင်နိုင်စွမ်းကို ထုံထိုင်းစေနိုင်သည်။ ယင်းသည် ရဲရင့်ခြင်းကို တိုက်စားနိုင်ပြီး မျှော်လင့်ခြင်းကို ဖျက်ဆီးနိုင်သည်။ ရန်သူတစ်ဦး၏ ကာယရေးအရခြိမ်းခြောက်မှုကို ခံစားနေရသူတစ်ဦးသည် ယင်းသို့သောကြောက်ရွံ့ခြင်းကို ကြုံတွေ့ရနိုင်သည်။ (ယေရမိ ၅၁:၃၀) ဩဇာကြီးမားသူတစ်စု၏ မျက်နှာသာရရေးကို ရေးကြီးခွင့်ကျယ်လုပ်သူအတွက် ထိုသို့သောကြောက်ရွံ့ခြင်းကို ခံစားရနိုင်သည်။ (သု. ၂၉:၂၅) သို့သော် အကျိုးဖြစ်ထွန်းသောကြောက်ရွံ့ခြင်း၊ တစ်စုံတစ်ခုကို အရမ်းကာရောပြုမူခြင်း၊ မိမိကိုယ်ကိုထိခိုက်နစ်နာစေခြင်းတို့မှ ဟန့်တားပေးသော ကြောက်ရွံ့ခြင်းမျိုးလည်း ရှိသေးသည်။ ဘုရားရေးရာကြောက်ရွံ့ခြင်းတွင် ထိုထက်မကပင်ပါဝင်သည်။ ယင်းတွင် ယေဟောဝါအားကြောက်ရွံ့ရိုသေခြင်း၊ ကိုယ်တော်အား အလွန့်အလွန်ကြည်ညိုလေးစားခြင်းအပြင် ကိုယ်တော့်စိတ်တော်ငြိုငြင်အောင်ပြုခြင်းကို ကြောက်ရွံ့ခြင်းတို့ ပါဝင်သည်။ (ဆာလံ ၈၉:၇) ဘုရားသခင့်စိတ်တော်ငြိုငြင်အောင် ပြုခြင်းကို ကြောက်ရွံ့ခြင်းသည် ကိုယ်တော့်ချစ်ခင်ကြင်နာမှုနှင့် ကောင်းမြတ်ခြင်းတို့ကို လေးမြတ်ခြင်းမှ ဆင်းသက်လာသည်။ (ဆာလံ ၅:၇; ဟောရှေ ၃:၅) ယေဟောဝါသည် တရားသူကြီးချုပ်နှင့် အနန္တတန်ခိုးရှင်ဖြစ်တော်မူပြီး မိမိအားနာခံရန် ငြင်းဆန်သူများအား သေခြင်းအထိ ပြစ်ဒဏ်စီရင်နိုင်သော တန်ခိုးတော်ရှင်ဖြစ်ကြောင်းကို အသိအမှတ်ပြုခြင်းလည်းပါဝင်သည်။—ရောမ ၁၄:၁၀-၁၂။
၃။ ယေဟောဝါအားကြောက်ရွံ့ခြင်းက အချို့ဗာဗုလုန်နတ်ဘုရားများကို ကြောက်ရွံ့ခြင်းနှင့် မည်သို့ခြားနားသနည်း။
၃ ဘုရားရေးရာကြောက်ရွံ့ခြင်းသည် ကယောင်ချောက်ချားမဖြစ်စေဘဲ အကျိုးဖြစ်ထွန်းစေသည်။ ယင်းသည် လူတစ်ဦးအား အမှားပြုခြင်းအားဖြင့် အလျော့မပေးဘဲ အမှန်ဘက်တွင် မားမားမတ်မတ်ရပ်တည်ရန် လှုံ့ဆော်ပေးသည်။ ယင်းသည် ကြောက်ရွံ့မှုကိုလှုံ့ဆော်ပြီး အာဃာတကြီးသည့်ဘုရားအဖြစ် ဖော်ပြခံရသော ရှေးဂရိဘုရား ဖောဘော့စ်ကို ကြောက်ရွံ့ခြင်းမျိုးနှင့်မတူ။ လူသေအလောင်းများ၊ မြွေများနှင့် ဦးခေါင်းခွံများကို အဆင်တန်ဆာအဖြစ်ဆင်မြန်းသော၊ တစ်ခါတစ်ရံ သွေးဆာသူအဖြစ် ပုံဖော်ခံရလေ့ရှိသော ဟိန္ဒူဘုရားမ ကာလီကို ကြောက်ရွံ့ခြင်းမျိုးလည်းမဟုတ်။ ဘုရားရေးရာကြောက်ရွံ့ခြင်းသည် ဆွဲဆောင်မှုရှိသည်; မဖဲရှောင်စေပါ။ ယင်းသည် မေတ္တာနှင့် လေးမြတ်ခြင်းတို့ဖြင့် ယှက်နွယ်နေသည်။ သို့အားဖြင့် ဘုရားရေးရာကြောက်ရွံ့ခြင်းသည် ကျွန်ုပ်တို့ကို ယေဟောဝါထံတော်သို့ သွေးဆောင်သည်။—တရားဟောရာ ၁၀:၁၂၊ ၁၃; ဆာလံ ၂:၁၁။
ယင်းသည် လူအချို့တွင်ရှိပြီး လူအချို့တွင်မရှိရသည့်အကြောင်း
၄။ တမန်တော်ပေါလုဖော်ပြချက်အရ လူသားသည် မည်သည့်အခြေအနေသို့ သက်ဆင်းလာသနည်း။ ယင်းသည် မည်သည့်အတွက်ကြောင့် ဖြစ်ရသနည်း။
၄ လူသားတစ်ရပ်လုံးအနေနှင့် ဘုရားရေးရာကြောက်ရွံ့ခြင်းဂုဏ်သတ္တိ၏ လှုံ့ဆော်မှုမခံရကြပေ။ လူသားသည် မူလစုံလင်ခြင်းနှင့် မည်မျှအလှမ်းကွာဝေးသွားကြောင်းကို ရောမ ၃:၉-၁၈ တွင် တမန်တော်ပေါလုဖော်ပြထားသည်။ လူအားလုံးတို့သည် အပြစ်တရားအောက်တွင်ရှိကြောင်း ဖော်ပြပြီးနောက် ဆာလံကျမ်းကိုကိုးကား၍ ဤသို့ပြောခဲ့သည်– “ကောင်းသောအကျင့်ကိုကျင့်သောသူ တစ်ယောက်မျှမရှိ။” (ဆာလံ ၁၄:၁ ရှု။) ထို့နောက် လူသားသည် ဘုရားသခင်အားရှာဖွေခြင်းကို ပေါ့ပေါ့တန်တန်သဘောထားခြင်း၊ အကြင်နာကင်းမဲ့ခြင်း၊ သူတို့၏လှည့်စားတတ်သည့်စကားများ၊ ကျိန်ဆဲခြင်း၊ အသွေးသွန်းခြင်းတို့ကဲ့သို့သော အကြောင်းများကိုကိုးကား၍ အသေးစိတ်အချက်အလက်များကို တင်ပြသွားသည်။ ယင်းသည် ယနေ့လောကအခြေအနေနှင့် တထေရာတည်းဖြစ်နေပါသည်တကား! လူအများစုတို့သည် ဘုရားသခင်နှင့် ကိုယ်တော့်ရည်ရွယ်တော်မူချက်များကို စိတ်မဝင်စားကြချေ။ ကြင်နာသည့်အသွင်အပြင်ကိုလည်း အကျိုးတစ်စုံတစ်ခုရမည့်အခါများတွင်သာ ဖော်ပြလေ့ရှိကြသည်။ လိမ်လည်ခြင်းနှင့် ရုန့်ရင်းကြမ်းတမ်းသောစကားများသည် အဆန်းမဟုတ်တော့ပေ။ သွေးသွန်းမှုကို သတင်းကြေညာချက်အဖြစ်သာ မဟုတ်တော့ဘဲ အပန်းဖြေမှုများတွင် တင်ဆက်ကြသည်။ ဤကဲ့သို့သောအခြေအနေ၏ အကြောင်းရင်းကား အဘယ်နည်း။ ကျွန်ုပ်တို့အားလုံးသည် အပြစ်သားအာဒံမှ ဆင်းသက်လာသူများ ဖြစ်ကြသည်တော့မှန်ပါသည်။ သို့သော် လူတို့သည် တမန်တော်ပေါလုဖော်ပြသည့်အရာများကို မိမိတို့၏ဘဝလမ်းစဉ်အဖြစ် ခံယူလိုက်ပါက ထိုထက်မက အခြားအရာတစ်ခုပါဝင်လာသည်။ ယင်းသည် အဘယ်အရာဖြစ်ကြောင်း အခန်းငယ် ၁၈ က ဤသို့ရှင်းလင်းဖော်ပြသည်– “ဘုရားသခင်ကို ကြောက်ရွံ့ရသောအကြောင်းသည် သူတို့မျက်စိ၌မထင်။”—ဆာလံ ၃၆:၁ ရှု။
၅။ အချို့လူများတွင် ဘုရားရေးရာကြောက်ရွံ့ခြင်းရှိသော်လည်း အချို့လူများတွင် အဘယ်ကြောင့်မရှိသနည်း။
၅ လူအချို့တို့တွင် ဘုရားရေးရာကြောက်ရွံ့ခြင်းရှိသော်လည်း အချို့သူတို့တွင်အဘယ်ကြောင့်မရှိသနည်း။ ရှင်းရှင်းပြောရလျှင် အချို့တို့သည် ယင်းကိုပြုစုပျိုးထောင်ပြီး အချို့ကမူ ယင်းသို့မပြုကြသောကြောင့်ဖြစ်သည်။ ကျွန်ုပ်တို့တွင် မည်သူတစ်ဦးတစ်ယောက်မျှ ယင်းနှင့်အတူ မွေးဖွားလာကြခြင်းမဟုတ်သော်လည်း ယင်းအတွက် စွမ်းရည်ရှိကြသည်။ ဘုရားရေးရာကြောက်ရွံ့ခြင်းသည် ကျွန်ုပ်တို့သင်ယူရမည့်အရာဖြစ်သည်။ ထို့နောက် ကျွန်ုပ်တို့၏အသက်တာတွင် အရှိန်အဟုန်ကြီးမားသည့် လှုံဆော်အားဖြစ်စေရန် ယင်းကို ပြုစုပျိုးထောင်ဖို့ လိုအပ်သည်။
နှစ်လို့ဖွယ်ဖိတ်ခေါ်ချက်
၆။ ဆာလံ ၃၄:၁၁ တွင်မှတ်တမ်းတင်ထားသော ဖိတ်ခေါ်ချက်ကို ကျွန်ုပ်တို့အား မည်သူကမ်းလှမ်းသနည်း။ ဘုရားရေးရာကြောက်ရွံ့ခြင်းကို သင်ယူရမည်ဖြစ်ကြောင်း ယင်းကျမ်းချက်က မည်သို့ဖော်ပြသနည်း။
၆ ယေဟောဝါအားကြောက်ရွံ့ခြင်းကို သင်ယူရန် နှစ်လို့ဖွယ်ဖိတ်ခေါ်ချက်ကို ဆာလံ ၃၄ တွင် ကျွန်ုပ်တို့အားကမ်းလှမ်းထားသည်။ ယင်းသည် ဒါဝိဒ်၏ဆာလံဖြစ်သည်။ ဒါဝိဒ်သည် မည်သူ့ကို ရှေ့ပြေးပုံဆောင်သနည်း။ သခင်ယေရှုခရစ်ကိုဖြစ်သည်။ ယေရှုခရစ်နှင့်သက်ဆိုင်ကြောင်း ယောဟန်က ထူးခြားတိကျစွာဖော်ပြသည့် ပရောဖက်ပြုချက်တစ်ခုကို ဤဆာလံ၏ အခန်းကြီး ၂၀ တွင် မှတ်တမ်းတင်ထားသည်။ (ယောဟန် ၁၉:၃၆) ကျွန်ုပ်တို့အချိန်တွင် အခန်းငယ် ၁၁ ပါ ဖိတ်ခေါ်ချက်မျိုးကို ကမ်းလှမ်းသူမှာ ယေရှုသာလျှင်ဖြစ်သည်– “အချင်းသူငယ်တို့၊ လာကြလော့။ ငါ့စကားကို နားထောင်ကြလော့။ ထာဝရဘုရားကို ကြောက်ရွံ့ခြင်းတရားကို သင်တို့အားငါသွန်သင်မည်။” ဘုရားရေးရာကြောက်ရွံ့ခြင်းသည် သင်ယူနိုင်သောအရာတစ်ခုဖြစ်ပြီး ယေရှုခရစ်သည် ကျွန်ုပ်တို့အားသင်ပေးရန် အထူးအရည်အချင်းပြည့်ဝသူဖြစ်ကြောင်း ယင်းက ရှင်းလင်းစွာဖော်ပြသည်။ အဘယ်ကြောင့်နည်း။
၇။ ဘုရားရေးရာကြောက်ရွံ့ခြင်းကို အဘယ်ကြောင့် ယေရှုထံမှ အထူးသဖြင့်သင်ယူရမည်နည်း။
၇ ယေရှုခရစ်သည် ဘုရားရေးရာကြောက်ရွံ့ခြင်း၏ အရေးကြီးမှုကို သိတော်မူသည်။ ကိုယ်တော်နှင့်ပတ်သက်၍ ဟေဗြဲ ၅:၇ [သမ္မာ] က ဤသို့ဆိုထားသည်– “ထိုခရစ်တော်သည် လူ့ဇာတိအဖြစ်၌နေစဉ်ကာလ သေခြင်းမှကယ်လွှတ်နိုင်တော်မူသောအရှင်ကို ကြီးစွာသောကြွေးကြော်ခြင်း၊ မျက်ရည်ကျခြင်းနှင့် ဆုတောင်းပတ္ထနာပြုသဖြင့် ဘုရားသခင်ကို ကြောက်ရွံ့ခြင်းသဘောကြောင့် နားညောင်းတော်မူခြင်းကိုခံရ [သည်။]” ထိုသို့သောဘုရားရေးရာကြောက်ရွံ့ခြင်းသည် နှက်တိုင်ပေါ်တွင် အသေခံရမည့်အဖြစ်ကို မရင်ဆိုင်ရမီကတည်းကပင် ထင်ရှားသည့် ယေရှုခရစ်၏ အရည်အချင်းတစ်ခုဖြစ်သည်။ နယပုံပြင်ကျမ်းအခန်းကြီး ၈ တွင် ဘုရားသခင်၏သားတော်ကို ဉာဏ်ပညာ၏ပြယုဂ်အဖြစ် ဖော်ပြထားသည်။ နယပုံပြင် ၉:၁၀ တွင် ကျွန်ုပ်တို့အား ဤသို့ပြောထားသည်– “ထာဝရဘုရား [ယေဟောဝါ၊ ကဘ] ကို ကြောက်ရွံ့သောသဘောသည် ပညာ၏မူလအမြစ်ဖြစ်၏။” ထို့ကြောင့် ဘုရားရေးရာကြောက်ရွံ့ခြင်းသည် ဘုရားသခင်၏သားတော်အတွက် မြေကြီးပေါ်သို့မကြွလာမီ ကြာမြင့်စွာကတည်းက ကိုယ်တော့်ပင်ကိုစရိုက်လက္ခဏာ၏ အခြေခံအစိတ်အပိုင်းတစ်ခုဖြစ်လာခဲ့သည်။
၈။ ဟေရှာယ ၁၁:၂၊ ၃ တွင်ယေဟောဝါအားကြောက်ရွံ့ခြင်းနှင့်ပတ်သက်၍ မည်သည့်အရာကို ကျွန်ုပ်တို့သင်ယူရရှိသနည်း။
၈ ထို့အပြင် ယေရှု၏ မေရှိယဘုရင်အဖြစ်နှင့်ပတ်သက်၍ ဟေရှာယ ၁၁:၂၊ ၃ တွင် ဤသို့ဖော်ပြထားသည်– “ထာဝရဘုရား၏ဝိညာဉ်တော်တည်းဟူသော ဉာဏ်ပညာကိုပေးသောဝိညာဉ်၊ ကြံစည်တတ်စွမ်းနိုင်သောသတ္တိကို ပေးသောဝိညာဉ်၊ ထာဝရဘုရားကို သိ၍ ကြောက်ရွံ့သောသဘောကို ပေးသောဝိညာဉ်တော်သည် ထိုသူအပေါ်မှာ ကျိန်းဝပ်တော်မူလိမ့်မည်။ ထိုသူသည် ထာဝရဘုရားကို ကြောက်ရွံ့ခြင်း၌ မွေ့လျော်သည်။” မည်မျှတင့်တယ်လှပသည့် ဖော်ကျူးချက်ပါတကား! ဘုရားသခင်ကိုကြောက်ရွံ့ခြင်းသည် မနှစ်မြို့စရာ မည်သည့်အကြောင်းမျှမရှိပါ။ ယင်းသည် အကျိုးကျေးဇူးဖြစ်ထွန်းပြီး အပြုသဘောသက်ရောက်စေသည်။ ယင်းသည် ဘုရင်အဖြစ် ခရစ်တော်အုပ်ချုပ်သောအခါ ကိုယ်တော့်သြဇာသက်ရောက်ရာနေရာအနှံ့တွင် ပျံ့နှံ့ရောက်ရှိမည့်အရာဖြစ်သည်။ ယခုအခါ ကိုယ်တော်အုပ်ချုပ်နေပြီး မိမိ၏လက်အောက်ခံများအဖြစ် စုသိမ်းခံရသူအားလုံးကို ယေဟောဝါအားကြောက်ရွံ့ခြင်းဖြင့် ညွှန်ကြားချက်များပေးနေသည်။ မည်သို့အားဖြင့်နည်း။
၉။ ယေရှုခရစ်သည် ယေဟောဝါအားကြောက်ရွံ့ခြင်းကို ကျွန်ုပ်တို့အား မည်သို့သွန်သင်ပေးနေသနည်း။ ယင်းနှင့်ပတ်သက်၍ မည်သည့်အရာကို ကျွန်ုပ်တို့အားသင်ယူစေလိုသနည်း။
၉ ဘုရားရေးရာကြောက်ရွံ့ခြင်းသည် မည်သည့်အရာဖြစ်ကြောင်းနှင့် ယင်းသည် အဘယ်ကြောင့် အလွန်အကျိုးပေးကြောင်းတို့ကို ကျွန်ုပ်တို့ရှင်းလင်းစွာနားလည်ရန် ယေရှုခရစ်သည် ခန့်အပ်ခံရသော အသင်းတော်၏ဦးစီးအဖြစ်နှင့် မေရှိယဘုရင်အဖြစ် အသင်းတော်အစည်းအဝေးများ၊ တိုက်နယ်စည်းဝေးနှင့် ခရိုင်စည်းဝေးများအားဖြင့် အကူအညီပေးသည်။ သို့အားဖြင့် ကိုယ်တော်နည်းတူ ယေဟောဝါအားကြောက်ရွံ့ခြင်းတွင် ရွှင်လန်းမှုကိုရှာယူတတ်ရန်အလို့ငှာ ယင်းအပေါ် ကျွန်ုပ်တို့၏လေးမြတ်မှု တိုးပွားစေရန် ကိုယ်တော်ကြိုးစားသည်။
အသင်ကြိုးစားအားထုတ်မည်လော
၁၀။ ခရစ်ယာန်အစည်းအဝေးများကို တက်ရောက်သောအခါ ယေဟောဝါအားကြောက်ရွံ့ခြင်းကို နားလည်ရန် မည်သည့်အရာကို ကျွန်ုပ်တို့လုပ်ရမည်နည်း။
၁၀ ကျွန်ုပ်တို့ ကျမ်းစာဖတ်ခြင်းနှင့် ဘုရားသခင့်နိုင်ငံတော်ခန်းမတွင် အစည်းအဝေးများတက်ခြင်းသက်သက်က ကျွန်ုပ်တို့၌ ဘုရားရေးရာကြောက်ရွံ့ခြင်းရှိမည်ဟု အာမမခံပါ။ ယေဟောဝါအားကြောက်ရွံ့ခြင်းကို အမှန်တကယ်နားလည်လိုလျှင် ကျွန်ုပ်တို့လုပ်ရန်လိုအပ်သည့်အရာကို သတိပြုပါ။ နယပုံပြင် ၂:၁-၅ က ဤသို့ဆိုသည်– “ငါ့သား၊ သင်သည် ပညာစကားကိုနားထောင်၍ စေတနာစိတ်နှင့် ဉာဏ်ကိုရှာဖွေသည်တိုင်အောင် ငါ့စကားကိုနားခံ၍ ငါ့ပညတ်တို့ကို ကိုယ်အထဲသို့သွင်းမိလျှင်လည်းကောင်း၊ သိပ္ပံအတတ်ကိုခေါ်၍ ဉာဏ်နောက်သို့ အသံကိုလွှင့်လျှင်လည်းကောင်း၊ ငွေကိုရှာတတ်သကဲ့သို့ ပညာကိုရှာ၍ ဝှက်ထားသောဘဏ္ဍာကို စူးစမ်းတတ်သကဲ့သို့ ဉာဏ်ကိုစူးစမ်းလျှင်လည်းကောင်း၊ ထာဝရဘုရားကိုကြောက်သောသဘော၌ ကျင်လည်၍ ဘုရားသခင်ကိုသိသောဉာဏ်နှင့် ပြည့်စုံလိမ့်မည်။” ထို့ကြောင့် အစည်းအဝေးများကို တက်သောအခါတွင် ကျွန်ုပ်တို့သည် ဟောပြောသည့်အရာများကို ဂရုစိုက်ရန်၊ အဓိကအချက်များကို အာရုံစိုက်ပြီး ပြန်လည်သတိရနိုင်ဖို့ ကြိုးစားအားထုတ်ရန်၊ ယေဟောဝါနှင့်ပတ်သက်၍ ကျွန်ုပ်တို့၏ယူမှတ်ပုံသည် ကြားနာရသည့်သွန်သက်ချက်များအပေါ် ကျွန်ုပ်တို့၏သဘောထားကို မည်သို့သြဇာသက်ရောက်သင့်ကြောင်း လေးလေးနက်နက်စဉ်းစားရန်—မှန်ပါသည်၊ ကျွန်ုပ်တို့၏နှလုံးကိုဖွင့်ထားရန် လိုသည်။ သို့ပြုလျှင် ယေဟောဝါအားကြောက်ရွံ့ခြင်းကို ကျွန်ုပ်တို့နားလည်မည်။
၁၁။ ဘုရားရေးရာကြောက်ရွံ့ခြင်းကို ကျွန်ုပ်တို့ပြုစုပျိုးထောင်ရန် မည်သည့်အရာကို စိတ်အားထက်သန်စွာနှင့် ထပ်ခါတလဲပြုလုပ်သင့်သနည်း။
၁၁ အရေးကြီးသော အခြားအကြောင်းတစ်ခုဖြစ်သည့် ဆုတောင်းခြင်းကို ဆာလံ ၈၆:၁၁ က အာရုံစိုက်စေသည်။ “အိုထာဝရဘုရား၊ ကိုယ်တော်၏လမ်းကို အကျွန်ုပ်အား ပြညွှန်တော်မူပါ။ ကိုယ်တော်၏သမ္မာတရားလမ်းသို့ လိုက်သွားပါမည်။ နာမတော်ကို ကြောက်ရွံ့ရမည်အကြောင်း အကျွန်ုပ်၏နှလုံးကို စေ့စပ်စေတော်မူပါ” ဟု ဆာလံဆရာဆုတောင်းခဲ့သည်။ ထိုဆုတောင်းချက်ကို ယေဟောဝါသဘောကျတော်မူသည်။ အကြောင်းမှာ ယင်းကို သမ္မာကျမ်းစာတွင် မှတ်တမ်းတင်ထားသည်။ ကျွန်ုပ်တို့လည်း ဘုရားရေးရာကြောက်ရွံ့ခြင်းကို ပြုစုပျိုးထောင်ရန် ယေဟောဝါ၏အကူအညီကို တောင်းလျှောက်ခြင်းလိုအပ်ပြီး စိတ်အားထက်သန်စွာ ထပ်ခါတလဲဆုတောင်းခြင်းအားဖြင့် ကျွန်ုပ်တို့အကျိုးကျေးဇူးခံစားကြရမည်။—လုကာ ၁၈:၁-၈။
သင့်နှလုံးအကျုံးဝင်
၁၂။ အဘယ်ကြောင့် နှလုံးကို အထူးဂရုစိုက်ရမည်နည်း။ သို့ပြုရာတွင် မည်သည့်အရာပါဝင်သနည်း။
၁၂ ဆာလံ ၈၆:၁၁ တွင် ကျွန်ုပ်တို့သတိပြုသင့်သော အခြားအချက်များရှိသေးသည်။ ဆာလံဆရာသည် ဘုရားသခင်အားကြောက်ရွံ့ခြင်းကို အသိဉာဏ်သက်သက်ဖြင့်သာ နားလည်ရန် တောင်းလျှောက်နေခြင်းမဟုတ်ပါ။ သူ၏နှလုံးကို ဖော်ပြသည်။ ဘုရားရေးရာကြောက်ရွံ့ခြင်းကို ပြုစုပျိုးထောင်ရာတွင် အထူးဂရုစိုက်မှုလိုအပ်သော ပုံဆောင်နှလုံး အကျုံးဝင်ပတ်သက်သည်။ အကြောင်းမှာ ယင်းသည် ကျွန်ုပ်တို့၏အသက်တာရှိ လုပ်ဆောင်မှုအားလုံးအားဖြင့် ထင်ရှားသော ကျွန်ုပ်တို့၏အတွင်းလူဖြစ်ပြီး ကျွန်ုပ်တို့၏ အတွေးအခေါ်များ၊ သဘောထားများ၊ အလိုဆန္ဒများ၊ လှုံ့ဆော်မှုများနှင့် ပန်းတိုင်များ ပါဝင်သည်။
၁၃။ (က) လူတစ်ဦး၏နှလုံးသည် ကွဲပြားကြောင်း မည်သည့်အရာက ဖော်ပြနိုင်သနည်း။ (ခ) ဘုရားရေးရာကြောက်ရွံ့ခြင်းကို ကျွန်ုပ်တို့ပြုစုပျိုးထောင်နေစဉ် မည်သည့်ပန်းတိုင်ကို အားထုတ်ရမည်နည်း။
၁၃ လူတစ်ဦး၏နှလုံးသည် ကွဲပြားနိုင်ကြောင်း သမ္မာကျမ်းစာက ကျွန်ုပ်တို့ကိုသတိပေးသည်။ ယင်းသည် လှည့်စားတတ်သည်။ (ဆာလံ ၁၂:၂; ယေရမိ ၁၇:၉) ယင်းသည် ကျွန်ုပ်တို့အား အကျိုးရှိသည့်လုပ်ရပ်များ—အသင်းတော်အစည်းအဝေးများတက်ခြင်းနှင့် လယ်ကွင်းဓမ္မအမှုဆောင်ခြင်း—တွင် ပါဝင်ရန် လှုံ့ဆော်နိုင်သော်လည်း လောကအသက်တာလမ်းစဉ်၏ အသွင်အပြင်အချို့ကိုလည်း နှစ်သက်နိုင်သည်။ ဘုရားသခင့်နိုင်ငံတော်အကျိုးစီးပွား တိုးတက်အောင်လုပ်ဆောင်မှုတွင် အမှန်တကယ်စိုးလ်အကြွင်းမဲ့ဖြစ်ခြင်းမှ ကျွန်ုပ်တို့ကို ဟန့်တားနိုင်သည်။ မည်သို့ဆိုစေ အခြားသူများစွာလုပ်နေသလောက် ကျွန်ုပ်တို့လည်းလုပ်နေပါသည်ဟု ယူမှတ်ရန် လှည့်စားတတ်သောနှလုံးက ကျွန်ုပ်တို့အား ကြိုးစားသွေးဆောင်ပေမည်။ ကျောင်းတွင်ဖြစ်စေ၊ အိမ်တွင်ဖြစ်စေ၊ လုပ်ငန်းကိုင်ငန်းတွင်ဖြစ်စေ နှလုံးသည် လူကိုကြောက်ခြင်း၏ ဩဇာလွှမ်းမိုးမှုခံရနိုင်သည်။ ရလဒ်အနေနှင့် ယင်းသို့သောအသိုင်းအဝိုင်းများတွင် ကျွန်ုပ်တို့သည် မိမိတို့ကိုယ်ကို ယေဟောဝါသက်သေများဖြစ်ကြောင်း ဖော်ပြရမည်ကို ဝန်လေးနေပြီး ခရစ်ယာန်များအတွက် မသင့်တော်သောအရာများကိုပင် လုပ်မိနိုင်သည်။ နောက်ပိုင်းတွင် ကျွန်ုပ်တို့၏သြတ္တပ္ပစိတ်က ကိုယ့်ကိုယ်ကို ဒုက္ခပေးတော့သည်။ ယင်းသည် ကျွန်ုပ်တို့ဖြစ်လိုသော လူပုဂ္ဂိုလ်အမျိုးအစားမဟုတ်ပါ။ ထို့ကြောင့် ဆာလံဆရာနှင့်အတူ ကျွန်ုပ်တို့ဤသို့ဆုတောင်းကြသည်– “နာမတော်ကို ကြောက်ရွံ့မည်အကြောင်း အကျွန်ုပ်၏နှလုံးကို စေ့စပ်စေတော်မူပါ။” ကျွန်ုပ်တို့သည် “ဘုရားသခင်ကိုကြောက်ရွံ့၍ ပညတ်တော်တို့ကိုစောင့်ရှောက်” ကြောင်း မိမိအသက်တာရှိ လုပ်ဆောင်မှုအားလုံးအားဖြင့် ထင်ရှားသော အတွင်းလူတစ်ခုလုံးဖြင့် သက်သေထူလိုကြသည်။—ဒေသနာ ၁၂:၁၃။
၁၄၊ ၁၅။ (က) ဗာဗုလုန်သုံ့ပန်းအဖြစ်မှ ပြန်လည်လွတ်မြောက်လာမည့်အကြောင်း ယေဟောဝါကြိုပြောရာတွင် မိမိ၏လူများအား မည်သည့်အရာပေးမည်ဟု ကတိပြုတော်မူခဲ့သနည်း။ (ခ) မိမိလူများ၏နှလုံးထဲတွင် ဘုရားရေးရာကြောက်ရွံ့ခြင်းကို အမြစ်စွဲစေရန် မည်သည့်အရာကို ယေဟောဝါပြုတော်မူသနည်း။ (ဂ) ဣသရေလလူမျိုးသည် ယေဟောဝါ၏နည်းလမ်းတော်များမှ အဘယ်ကြောင့်သွေဖည်သွားကြသနည်း။
၁၄ ယင်းသို့ ဘုရားသခင်အားကြောက်ရွံ့သောနှလုံးကို မိမိ၏လူများအား ပေးမည်ဟု ယေဟောဝါကတိပြုတော်မူသည်။ ယေရမိ ၃၂:၃၇-၃၉ တွင် ကျွန်ုပ်တို့ဖတ်ရသည့်အတိုင်း ဣသရေလလူမျိုး ပြန်လည်ထူထောင်ခြင်းအကြောင်းကို ဤသို့ကြိုတင်မိန့်တော်မူသည်– “ငါသည် အမျက်ဟုန်းဟုန်းထွက်၍ အမျက်အရှိန်အားကြီးသည်နှင့် သူတို့ကိုနှင်ထုတ်ရာ တိုင်းပြည်ရှိသမျှတို့မှ တစ်ဖန်စုသိမ်း၍ ဤအရပ်သို့ဆောင်ခဲ့ပြီးလျှင် ငြိမ်ဝပ်စွာနေစေမည်။ သူတို့သည် ငါ၏လူဖြစ်ကြလိမ့်မည်။ ငါသည်လည်း သူတို့၏ဘုရားသခင်ဖြစ်မည်။ ကိုယ်အကျိုးအလို့ငှာလည်းကောင်း၊ နောက်ဖြစ်လတ္တံ့သောသားသမီးတို့၏ အကျိုးအလို့ငှာလည်းကောင်း ငါ့ကိုအစဉ်ကြောက်ရွံ့စေခြင်းငှာ တညီတညွတ်တည်း ကျင့်ကြံနိုင်သောသဘောကို ငါပေးမည်။” အခန်းငယ် ၄၀ တွင် ဘုရားသခင်၏ကတိတော်မှာ အားရှိစရာဖြစ်သည်– “သူတို့သည်လည်း ငါ့ထံမှမထွက်မသွားမည်အကြောင်း ငါ့ကိုကြောက်ရွံ့သောသဘောနှင့် ပြည့်စုံစေမည်။” ယေဟောဝါသည် မိမိ၏ကတိတော်အတိုင်း ဘီ.စီ.အီး. ၅၃၇ ခုနှစ်တွင် သူတို့ကို ယေရုရှလင်မြို့သို့ ပြန်လည်ပို့ဆောင်ခဲ့သည်။ သို့သော် ကတိတော်၏ကျန်အစိတ်အပိုင်း—‘ကိုယ်တော်အား အစဉ်ကြောက်ရွံ့စေခြင်းငှာ တညီတညွတ်တည်းကျင့်ကြံနိုင်သောသဘော’ ကိုပေးမည်ဟူသည့်အချက်ကား မည်သို့နည်း။ ဗာဗုလုန်မှ ထုတ်ဆောင်ခံရပြီးနောက်ပိုင်း ရှေးဣသရေလလူမျိုးသည် စီ.အီး. ၇၀ တွင် သူတို့၏ဗိမာန်တော် ဖျက်ဆီးခံလိုက်ရပြီး တစ်ခါမျှပြန်လည်တည်ဆောက်ခြင်း မခံရတော့သည်အထိ ယေဟောဝါထံမှသွေဖည်သွားရခြင်းကား အဘယ်ကြောင့်နည်း။
၁၅ ယင်းသည် ယေဟောဝါဘက်မှ တစ်စုံတစ်ရာပျက်ကွက်မှုကြောင့်မဟုတ်ပါ။ ယေဟောဝါသည် မိမိလူများ၏နှလုံးထဲသို့ ဘုရားသခင်အားကြောက်ရွံ့ခြင်းကို ထည့်သွင်းပေးရန် အမှန်ပင်အရေးယူလုပ်ဆောင်တော်မူသည်။ သူတို့ကို ဗာဗုလုန်မှကယ်နုတ်ပြီး နေရင်းပြည်တွင် ပြန်လည်နေရာချပေးရာတွင် တင်ပြသောကရုဏာတော်အားဖြင့် မိမိအား အလွန့်အလွန်ကြည်ညိုလေးစားမှုဖြင့် ရှုမြင်ရန် ခိုင်လုံသောအထောက်အထားကို တင်ပြတော်မူသည်။ ဘုရားသခင်သည် ပရောဖက် ဟဂ္ဂဲ၊ ဇာခရိ၊ မာလခိ; သွန်သင်ပေးသူအဖြစ် သူတို့ထံစေလွှတ်သောဧဇရ; မြို့ဝန်မင်းနေဟမိ; နှင့် ဘုရားသခင့်သားတော်ရင်းကိုယ်တိုင်တို့မှ တစ်ဆင့်ပေးသော သတိပေးချက်များ၊ သွန်သင်ချက်များနှင့် ပဲ့ပြင်မှုများအားဖြင့် ယင်းအချက်အားလုံးကို ပို၍ခိုင်မာစေသည်။ တစ်ခါတစ်ရံ လူတို့သည် နားထောင်ကြသည်။ ယေဟောဝါ၏ဗိမာန်တော်ကို ပြန်လည်တည်ဆောက်ရန် ဟဂ္ဂဲနှင့် ဇာခရိတို့က တိုက်တွန်းသောအခါနှင့် တိုင်းတစ်ပါးသားမိန်းမများကိုစွန့်ပစ်သော ဧဇရလက်ထက်အချိန်များတွင် သူတို့ထိုသို့ပြုခဲ့ကြသည်။ (ဧဇရ ၅:၁၊ ၂; ၁၀:၁-၄) သို့သော် သူတို့နားမထောင်သည့်အကြိမ်က သာ၍များသည်။ သူတို့သည် တစ်သမတ်တည်း ဂရုစိုက်သွားခြင်းမရှိကြချေ; သူတို့သည် သွန်သင်မှုကို ခံယူလိုသောသဘော ဆက်၍မရှိခဲ့ကြချေ; သူတို့သည် မိမိတို့၏နှလုံးကို ဖွင့်မထားကြချေ။ ဣသရေလလူမျိုးသည် ဘုရားရေးရာကြောက်ရွံ့ခြင်းကို ပြုစုပျိုးထောင်ခြင်း မရှိခဲ့ကြပေ။ ရလဒ်အနေနှင့် ယင်းသည် သူတို့၏ဘဝတွင် အရှိန်အဟုန်ကြီးမားသည့် လှုံ့ဆော်အားတစ်ခု မဖြစ်ခဲ့ချေ။—မာလခိ ၁:၆; မဿဲ ၁၅:၇၊ ၈။
၁၆။ ယေဟောဝါသည် မည်သူတို့၏နှလုံးထဲတွင် ဘုရားရေးရာကြောက်ရွံ့ခြင်းကို အမြစ်စွဲစေမည်နည်း။
၁၆ သို့သော် မိမိလူများ၏နှလုံးထဲသို့ ဘုရားရေးရာကြောက်ရွံ့ခြင်းကို ထည့်သွင်းပေးမည်ဟူသော ယေဟောဝါ၏ကတိတော်သည် မပျက်ကွက်ခဲ့ပါ။ ကောင်းကင်ဆိုင်ရာမျှော်လင့်ချက် ကမ်းလှမ်းခြင်းခံရသော ခရစ်ယာန်များဖြစ်ကြသည့် ဝိညာဏဣသရေလအားဖြင့် ပဋိညာဉ်သစ်တစ်ခုဖွဲ့တော်မူခဲ့သည်။ (ယေရမိ ၃၁:၃၃; ဂလာတိ ၆:၁၆) ၁၉၁၉ ခုနှစ်တွင် မှောက်မှားသောဘာသာကမ္ဘာ့အင်ပါယာတည်းဟူသော မဟာဗာဗုလုန်၏ အချုပ်အနှောင်မှ ဘုရားသခင်သူတို့ကိုကယ်နုတ်ခဲ့သည်။ ကိုယ်တော်သည် သူတို့၏နှလုံးထဲတွင် ဘုရားရေးရာကြောက်ရွံ့ခြင်းကို ခိုင်မြဲစွာအမြစ်စွဲစေခဲ့သည်။ ယင်းသည် သူတို့အတွက်နှင့် ဘုရားသခင့်နိုင်ငံတော်တွင် မြေကြီးဆိုင်ရာလက်အောက်ခံများအဖြစ် မျှော်လင့်ချက်ရှိသော “လူအုပ်ကြီး” အတွက် ကြွယ်ဝသည့်အကျိုးကျေးဇူးများ ဖြစ်ထွန်းခဲ့သည်။ (ယေရမိ ၃၂:၃၉; ဗျာဒိတ် ၇:၉) သူတို့၏နှလုံးတွင်လည်း ယေဟောဝါအားကြောက်ရွံ့ခြင်း ရှိလာသည်။
ကျွန်ုပ်တို့၏နှလုံးတွင် ဘုရားရေးရာကြောက်ရွံ့ခြင်း အမြစ်စွဲခံရပုံ
၁၇။ ကျွန်ုပ်တို့၏နှလုံးထဲတွင် ဘုရားရေးရာကြောက်ရွံ့ခြင်းကို ယေဟောဝါမည်သို့ အမြစ်စွဲစေသနည်း။
၁၇ ယေဟောဝါသည် ဤဘုရားရေးရာကြောက်ရွံ့ခြင်းကို ကျွန်ုပ်တို့၏နှလုံးထဲတွင် မည်သို့အမြစ်စွဲစေသနည်း။ ကိုယ်တော်၏သန့်ရှင်းသောဝိညာဉ်တော် လုပ်ဆောင်မှုအားဖြင့်ဖြစ်သည်။ သန့်ရှင်းသောဝိညာဉ်တော်အားဖြင့် ဖြစ်ပေါ်လာသော မည်သည့်အရာ ကျွန်ုပ်တို့တွင်ရှိသနည်း။ ဘုရားသခင့်မှုတ်သွင်းခံနှုတ်ကပါဌ်တော်ဖြစ်သည့် သမ္မာကျမ်းစာရှိသည်။ (၂ တိမောသေ ၃:၁၆၊ ၁၇) အတိတ်က ကိုယ်တော်ပြုတော်မူခဲ့သည့်အရာများ၊ ပရောဖက်ပြုနှုတ်ကပါဌ်တော် ပြည့်စုံသည့်အနေဖြင့် ယခုအချိန်တွင် မိမိ၏ကျေးကျွန်များနှင့် ကိုယ်တော်၏ဆက်ဆံမှုများ၊ ဖြစ်လာမည့်အရာများနှင့်ပတ်သက်သော ပရောဖက်ပြုချက်များအားဖြင့် ဘုရားရေးရာကြောက်ရွံ့ခြင်းကို တိုးပွားစေရန်ယေဟောဝါသည် ကျွန်ုပ်တို့ အားလုံးအတွက်ခိုင်လုံသည့်အခြေအမြစ်ကိုပေးသည်။—ယောရှု ၂၄:၂-၁၅; ဟေဗြဲ ၁၀:၃၀၊ ၃၁။
၁၈၊ ၁၉။ ခရိုင်စည်းဝေးများ၊ တိုက်နယ်စည်းဝေးများနှင့် အသင်းတော်အစည်းအဝေးများက ကျွန်ုပ်တို့ ဘုရားရေးရာကြောက်ရွံ့ခြင်းရှိအောင် မည်သို့အကူအညီပေးသနည်း။
၁၈ တရားဟောရာ ၄:၁၀ တွင် တင်ပြထားသည့်အတိုင်း မောရှေအား ယေဟောဝါမိန့်တော်မူသောအချက်မှာ မှတ်သားစရာဖြစ်သည်– “လူများတို့ကို ငါ့ထံမှာစုဝေးစေလော့။ သူတို့သည် မြေကြီးပေါ်မှာ အသက်ရှင်သမျှသောကာလပတ်လုံး ငါ့ကိုကြောက်ရွံ့၍ သားမြေးတို့အားသွန်သင်စေခြင်းငှာ ငါ့စကားကိုကြားစေမည်။” ထိုနည်းတူ ယနေ့လည်း ယေဟောဝါသည် မိမိ၏လူများ မိမိကိုကြောက်ရွံ့ရန် အကူအညီဖြစ်စေမည့် ပြဋ္ဌာန်းချက်များကို အလုံအလောက်ပေးထားတော်မူသည်။ ခရိုင်စည်းဝေးပွဲများ၊ တိုက်နယ်စည်းဝေးပွဲများနှင့် အသင်းတော်အစည်းအဝေးများတွင် ယေဟောဝါ၏ ချစ်ခင်ကြင်နာခြင်းနှင့် ကောင်းမြတ်ခြင်းဆိုင်ရာ သာဓကကို ကျွန်ုပ်တို့ပြန်လည်ရေတွက်ကြသည်။ အသက်ရှင်ခဲ့သမျှတွင် အကြီးမြတ်ဆုံးလူသား စာအုပ်ကို ကျွန်ုပ်တို့လေ့လာခဲ့စဉ်က ယင်းသို့ကျွန်ုပ်တို့ပြုခဲ့ကြသည်။ ထိုလေ့လာမှုက သင်နှင့် ယေဟောဝါအပေါ် သင့်သဘောထားကို မည်သို့အကျိုးသက်ရောက်သနည်း။ မိမိ၏သားတော်တွင် ရောင်ပြန်ဟပ်သော ကျွန်ုပ်တို့ကောင်းကင်ခမည်းတော်၏ ထူးမြတ်သောစရိုက်လက္ခဏာတော်၏ အမျိုးမျိုးသော အသွင်အပြင်များကို သင်တွေ့မြင်သောအခါ ဘုရားသခင်မကြိုက်နှစ်သက်သောအရာကို ဘယ်တော့မျှမပြုရန် သင့်ဆန္ဒကို အားဖြည့်မပေးပေလော။—ကောလောသဲ ၁:၁၅။
၁၉ လွန်ခဲ့သည့်အချိန်များက မိမိ၏လူများကို ယေဟောဝါကယ်တင်ခြင်းအကြောင်း မှတ်တမ်းများကိုလည်း အစည်းအဝေးများတွင် ကျွန်ုပ်တို့လေ့လာရသည်။ (၂ ဓမ္မရာဇဝင် ၇:၂၃) ဗျာဒိတ်ကျမ်း—ယင်း၏မဟာအထွတ်အထိပ်နီးပြီ! ဟူသောစာအုပ်ဖြင့် ဗျာဒိတ်ကျမ်းစာစောင်ကို ကျွန်ုပ်တို့လေ့လာသောအခါ ဤ ၂၀ ရာစုတွင် ပြည့်စုံခဲ့ပြီးသော ပရောဖက်ပြုရူပါရုံများနှင့် စိုးရွံ့ထိတ်လန့်ဖွယ်အဖြစ်အပျက်များကို သိရှိရသည်။ ဘုရားသခင်၏ ထိုလုပ်ရပ်အားလုံးနှင့်ပတ်သက်၍ ဆာလံ ၆၆:၅ က ဤသို့ဖော်ပြသည်– “ဘုရားသခင်စီရင်တော်မူသောအမှုတော်ကို လာ၍ကြည့်ကြလော့။ လူသားတို့တွင် စီရင်တော်မူသောအမှုတို့သည် အံ့သြဖွယ် [စိုးရွံ့ထိတ်လန့်ဖွယ်၊ ကဘ] ဖြစ်ကြ၏။” မှန်ပါသည်၊ လျောက်ပတ်စွာကြည့်မြင်လျှင် ဘုရားသခင်၏ဤလုပ်ရပ်များသည် ယေဟောဝါအားကြောက်ရွံ့ခြင်း၊ အလွန့်အလွန်ကြည်ညိုလေးစားခြင်းတို့ကို ကျွန်ုပ်တို့၏နှလုံးထဲတွင် အမြစ်စွဲစေသည်။ သို့အားဖြင့် ယေဟောဝါသည် မိမိ၏ကတိတော်များကို မည်သို့ပြည့်စုံစေကြောင်း ကျွန်ုပ်တို့သိမြင်နိုင်သည်– “သူတို့သည်လည်း ငါ့ထံမှမထွက်မသွားမည်အကြောင်း ငါ့ကိုကြောက်ရွံ့သောသဘောနှင့် ပြည့်စုံစေမည်။”—ယေရမိ ၃၂:၄၀။
၂၀။ ကျွန်ုပ်တို့၏နှလုံးတွင် ဘုရားရေးရာကြောက်ရွံ့ခြင်း နက်ရှိုင်းစွာအမြစ်စွဲစေရန် ကျွန်ုပ်တို့ဘက်မှ မည်သည့်အရာလိုအပ်သနည်း။
၂၀ မည်သို့ဆိုစေ ဘုရားရေးရာကြောက်ရွံ့ခြင်းသည် ကျွန်ုပ်တို့ဘက်မှ ကြိုးစားအားထုတ်မှုမပါဘဲ ကျွန်ုပ်တို့၏နှလုံးထဲသို့ ရောက်မလာကြောင်းထင်ရှားသည်။ အလိုအလျောက်အကျိုးဖြစ်ထွန်းလာမည်မဟုတ်။ ယေဟောဝါသည် မိမိ၏အပိုင်းကိုလုပ်ဆောင်သည်။ ဘုရားရေးရာကြောက်ရွံ့ခြင်းကို ပြုစုပျိုးထောင်ခြင်းအားဖြင့် ကျွန်ုပ်တို့သည် မိမိ၏အပိုင်းကို လုပ်ဆောင်ရမည်။ (တရားဟောရာ ၅:၂၉) ဇာတိဣသရေလလူမျိုးသည် ယင်းသို့လုပ်ဆောင်ရန် ပျက်ကွက်ခဲ့ကြသည်။ သို့သော် ယေဟောဝါအား ယုံကြည်ကိုးစားကြသောဝိညာဏဣသရေလနှင့် သူတို့၏အပေါင်းအဖော်များသည် ဘုရားသခင်အားကြောက်ရွံ့သူများအပေါ် သက်ရောက်သော အကျိုးကျေးဇူးများကို တွေ့ကြုံခံစားနေကြရပြီးဖြစ်သည်။ ထိုအကျိုးကျေးဇူးအချို့ကို နောက်ဆောင်းပါးတွင် ကျွန်ုပ်တို့သုံးသပ်ကြမည်။
သင်မည်သို့ဖြေဆိုမည်နည်း
◻ ဘုရားရေးရာကြောက်ရွံ့ခြင်းကား အဘယ်နည်း။
◻ ယေဟောဝါအားကြောက်ရွံ့ခြင်းတွင် ရွှင်လန်းမှုရရှိရန် ကျွန်ုပ်တို့မည်သို့သွန်သင်ခံရကြသနည်း။
◻ ဘုရားရေးရာကြောက်ရွံ့ခြင်းရှိရန် ကျွန်ုပ်တို့ဘက်မှ မည်သည့်ကြိုးစားအားထုတ်မှုလိုအပ်သနည်း။
◻ ဘုရားရေးရာကြောက်ရွံ့ခြင်းကို ရယူခြင်းတွင် ကျွန်ုပ်တို့ပုံဆောင်နှလုံး၏ အသွင်အပြင်အားလုံး အဘယ်ကြောင့်ပါဝင်ရသနည်း။
[စာမျက်နှာ ၁၃ ပါ ရုပ်ပုံ]
ယေဟောဝါအားကြောက်ရွံ့ခြင်းကို နားလည်ရန် ဝီရိယရှိရှိလေ့လာမှုလိုအပ်သည်