ဖြောင့်မတ်ခြင်းကိုကြဲ၍ ဘုရားသခင်၏ချစ်ခင်ကြင်နာခြင်းကို ရိတ်သိမ်းလော့

“အကျွမ်းမဝင်သောသူ၏ အမှု၌ အာမခံသောသူသည် အလွန်နာလိမ့်မည်။ လက်ဝါးချင်းရိုက်သောအမှုကို မုန်းသောသူမူကား စိုးရိမ်စရာမရှိ။” (သု. ၁၁:၁၅) တိုတုတ်ပြီး အဓိပ္ပာယ်ပါသော ဤဆိုရိုးစကားသည် တာဝန်သိသိလုပ်ဆောင်ခြင်းကို အားပေးနေသည်မှာ အထင်အရှားပင်! စိတ်မချရသော ငွေချေးသူအတွက် ပူးတွဲလက်မှတ်ထိုးပေးခြင်းသည် ပြဿနာကို လက်ယပ်ခေါ်ရာကျ၏။ ရှေးဣသရေလနိုင်ငံတွင် သဘောတူညီမှု အမှတ်အသားဖြစ်သည့် လက်ဝါးချင်းရိုက်ခြင်းအမှုကို ရှောင်လျှင် ငွေကြေးထောင်ချောက်မှ လွတ်ကင်းလိမ့်မည်။

ဤတွင်အသုံးပြုထားသောမူမှာ “လူသည် မျိုးစေ့ကြဲသည်အတိုင်း အသီးအနှံကို ရိတ်ရလိမ့်မည်” ဖြစ်ကြောင်း ထင်ရှားပါသည်။ (ဂလာတိ ၆:၇) ပရောဖက်ဟောရှေက “ကိုယ်အဖို့ ဖြောင့်မတ်ခြင်းမျိုးစေ့ကိုကြဲ၍ [“ချစ်ခင်ကြင်နာခြင်း၊” ကဘ] အသီးအနှံကို ရိတ်ကြလော့” ဟုဖော်ပြခဲ့၏။ (ဟောရှေ ၁၀:၁၂) မှန်ပါသည်၊ ဘုရားသခင့်နည်းလမ်းတော်အတိုင်း အရာရာကိုပြု၍ ဖြောင့်မတ်ခြင်းကို စိုက်ပျိုးလျှင် ကိုယ်တော်၏ချစ်ခင်ကြင်နာခြင်းကို ရိတ်သိမ်းရလိမ့်မည်။ ဣသရေလရှင်ဘုရင် ရှောလမုန်က ဤမူကို ထပ်ခါတလဲလဲအသုံးပြု၍ ဖြောင့်မတ်သောအပြုအမူ၊ ရိုးသားသောအပြောအဆိုနှင့် လျောက်ပတ်သော စိတ်ထားရှိကြရန် အားပေးတိုက်တွန်းခဲ့သည်။ ထိုမင်းကြီး၏ဉာဏ်ပညာစကားတော်ကို အသေအချာဆန်းစစ်ခြင်းသည် ဖြောင့်မတ်ခြင်းမျိုးစေ့ကြဲရန် အမှန်ပင်အားပေးမှုဖြစ်သည်။—သု. ၁၁:၁၅-၃၁။

“နှစ်သက်ဖွယ်” ကိုကြဲ၍ “ဂုဏ်အသရေ” ကိုရိတ်သိမ်း

ပညာရှိဘုရင်က “နှစ်သက်ဖွယ်သောမိန်းမသည် ဂုဏ်အသရေကိုလည်းကောင်း၊ ခွန်အားကြီးသောယောက်ျားသည် စည်းစိမ်ကိုလည်းကောင်း ရတတ်၏” ဟုဆိုသည်။ (သု. ၁၁:၁၆) ဤအခန်းငယ်က နှစ်သက်ဖွယ်မိန်းမ၊ ‘သိမ်မွေ့သူ’ ရတတ်သည့် တာရှည်ခံဂုဏ်အသရေနှင့် ခွန်အားကြီးသော နိုင်ထက်စီးနင်းပြုသူ ရတတ်သည့် ယာယီစည်းစိမ်တို့ကို ခွဲခြားဖော်ပြသည်။

ဂုဏ်အသရေရှိစေသည့် နှစ်လိုဖွယ်အရည်အသွေးကို မည်သို့ရနိုင်မည်နည်း။ ရှောလမုန်က ဤသို့ဆုံးမသည်– “ပညာရတနာ [“လက်တွေ့ကျဉာဏ်ပညာ၊” ကဘ] နှင့် [ကောင်းသော]သတိ [“စဉ်းစားဆင်ခြင်နိုင်စွမ်း၊” ကဘ] ကို . . . အစဉ်စောင့်ရှောက်လော့။ သို့ပြုလျှင် ထိုရတနာတို့သည် . . . သင်၏လည်ပင်း၌ ဂုဏ်အသရေဖြစ်လိမ့်မည်။” (သု. ၃:၂၁၊ ၂၂) ‘ရှင်ဘုရင်၏နှုတ်တော်သည် ကျေးဇူး [“နှစ်သက်ဖွယ်၊” ကဘ] နှင့်ပြည့်စုံပါ၏’ ဟုလည်း ဆာလံဆရာက ဆိုသည်။ (ဆာလံ ၄၅:၁၊ ၂) မှန်ပါ၏၊ လက်တွေ့ကျဉာဏ်ပညာ၊ စဉ်းစားဆင်ခြင်နိုင်စွမ်းနှင့် လျှာကိုလျောက်ပတ်စွာ အသုံးပြုခြင်းတို့သည် လူတစ်ဦး၏တန်ဖိုးနှင့် နှစ်သက်ဖွယ်အရည်အသွေးကို တိုးမြှင့်ပေးသည်။ ပညာသတိရှိသောအမျိုးသမီး၌ ထိုအရည်အချင်းများ အမှန်ပင်ရှိ၏။ မိုက်မဲသောနာဗလ၏ဇနီး အဘိဂဲလသည် ထိုကဲ့သို့သောအမျိုးသမီးတစ်ဦးဖြစ်၏။ သူသည် “ဉာဏ်ကောင်း၍ အဆင်းလည်းလှ” ၏၊ ဘုရင်ဒါဝိဒ်က သူ၏ ‘ပိုင်းခြားသိမြင်သောဉာဏ်’ ကိုချီးမွမ်းခဲ့သည်။—၁ ဓမ္မရာဇဝင် ၂၅:၃၊ ၃၃၊ သမ္မာ။

နှစ်သက်ဖွယ်အရည်အသွေးစစ်ရှိသော ဘုရားတရားကြည်ညိုသည့် အမျိုးသမီးသည် ဂုဏ်အသရေရှိမည်မှာ သေချာသည်။ သူသည် နာမည်ကောင်းရလိမ့်မည်။ သူသည် အိမ်ထောင်ရှိလျှင် သူ၏ခင်ပွန်းက သူ့ကို ဂုဏ်တင်လိမ့်မည်။ သူ့ကြောင့် မိသားစုတစ်စုလုံးပင် ဂုဏ်အသရေရှိလိမ့်မည်။ သူ၏ဂုဏ်အသရေသည် တဒင်္ဂအတွက်သာမဟုတ်ချေ။ “ကောင်းသောအသရေကို များစွာသောဥစ္စာထက် သာ၍ရွေးစရာကောင်း၏။ သူတစ်ပါးစုံမက်ခြင်းကျေးဇူးသည် ရွှေငွေထက် သာ၍ကောင်း၏။” (သု. ၂၂:၁) ဘုရားသခင်ရှေ့မှောက်တွင် ရရှိထားသော နာမည်ကောင်းသည် ထာဝစဉ်တန်ဖိုးရှိ၏။

နိုင်ထက်စီးနင်းပြုသူ ‘ရက်စက်ကြမ်းကြုတ်သောယောက်ျား’ ၏အခြေအနေမှာမူ ထိုသို့မဟုတ်ပေ။ (သု. ၁၁:၁၆၊ အပြည်ပြည်ဆိုင်ရာဘာသာပြန်ကျမ်းအသစ်) နိုင်ထက်စီးနင်းပြုသူကို ဆိုးသွမ်းသူ၊ ယေဟောဝါအားဝတ်ပြုသူများကို ဆန့်ကျင်သူတို့နှင့် တစ်တန်းတစ်စားတည်းထားသည်။ (ယောဘ ၆:၂၃; ၂၇:၁၃) ဤသို့သောသူသည် “ဘုရားသခင်၏မျက်နှာတော်ကို မထောက်” ပါ။ (ဆာလံ ၅၄:၃) ကိုယ်ကျိုးအတွက် ရိုးသားသူကိုဖိနှိပ်၍ အခွင့်အရေးယူသူသည် “ငွေကို မြေမှုန့်ကဲ့သို့ပုံ” ပေလိမ့်မည်။ (ယောဘ ၂၇:၁၆) သို့သော် တစ်ချိန်ချိန်တွင် သူလှဲကျ၍ ပြန်ထနိုင်တော့မည်မဟုတ်၊ သူ၏မျက်စိ မဖွင့်နိုင်တော့သည့်နေ့သည် သူ၏သေနေ့ဖြစ်မည်။ (ယောဘ ၂၇:၁၉) ထိုအခါ သူ၏ပစ္စည်းဥစ္စာရှိသမျှနှင့် ပြီးမြောက်အောင်မြင်မှုတို့သည် အချည်းနှီးဖြစ်သွားလိမ့်မည်။—လုကာ ၁၂:၁၆-၂၁။

နယပုံပြင် ၁၁:၁၆ က အမှန်တကယ်အရေးပါလှသည့် သင်ခန်းစာပေးသည်တကား! ဣသရေလရှင်ဘုရင်သည် နှစ်သက်ဖွယ်ရာနှင့် နိုင်ထက်စီးနင်းပြုခြင်း အသီးသီးတို့က အဘယ်အရာရိတ်သိမ်းရမည်ကို အတိုချုပ်ဖော်ပြပေးခြင်းဖြင့် ဖြောင့်မတ်ခြင်းမျိုးစေ့ကြဲရန် တိုက်တွန်းပါသည်။

“သနားတတ်” ခြင်းသည် အကျိုးကျေးဇူးများကို ဖြစ်ပေါ်စေ

ရှောလမုန်က “သနား [“ချစ်ခင်ကြင်နာ၊” ကဘ] တတ်သောသူသည် မိမိကိုယ်၌ ကျေးဇူးပြုတတ်၏။ ကြမ်းကြုတ်သောသူမူကား မိမိကိုယ်ကိုပင် နှောင့်ယှက်တတ်၏” ဟုပြောဆိုကာ လူတို့နှင့်ဆက်ဆံရေးတွင် နောက်ထပ်သင်ခန်းစာတစ်ခုကို သင်ပေးသည်။ (သု. ၁၁:၁၇) “နယပုံပြင်ကျမ်း၏ လိုရင်းအချက်မှာ သူတစ်ပါးအပေါ် ပြုမူဆက်ဆံရေး ကောင်းသည်ဖြစ်စေ၊ ဆိုးသည်ဖြစ်စေ မရည်ရွယ်သော သို့မဟုတ် မမျှော်လင့်သော အကျိုးဆက်များရရှိစေသည်” ဟု ပညာရှင်တစ်ဦးက ဆို၏။ လီဆာအမည်ရှိ အမျိုးသမီးငယ်တစ်ဦးကို သုံးသပ်ကြည့်ပါ။a သူသည် စိတ်ရင်းကောင်းသူဖြစ်သော်လည်း ချိန်းဆိုမှုများတွင် အစဉ်နောက်ကျလေ့ရှိသည်။ ဟောပြောခြင်းလုပ်ငန်းအတွက် ဘုရားသခင့်နိုင်ငံတော်ကြွေးကြော်သူများနှင့် တွေ့ဆုံဖို့ စီစဉ်ထားလျှင် မိနစ် ၃၀ သို့မဟုတ် ထိုထက်မက နောက်ကျလေ့ရှိသည်။ ဤသို့နောက်ကျခြင်းသည် လီဆာအတွက် အကျိုးမရှိပါ။ အခြားသူများက သူတို့၏တန်ဖိုးရှိအချိန် အချည်းနှီးကုန်သွားသည်ကို သည်းမခံနိုင်တော့၍ သူနှင့်နောက်ထပ် ချိန်းချက်ခြင်း မပြုလုပ်တော့လျှင် သူတို့ကို အပြစ်ဆိုနိုင်မည်လော။

အမှားမခံသူ၊ မြင့်မားလွန်းသော စံနှုန်းများချမှတ်တတ်သူသည်လည်း မိမိကိုယ်ကို ရက်စက်ရာကျသည်။ လက်လှမ်းမမီနိုင်သော ပန်းတိုင်များထားပြီး မရမကကြိုးစားနေခြင်းဖြင့် သူသည် စိတ်ပျက်မောပန်းရုံသာရှိပေမည်။ အခြားတစ်ဖက်တွင်မူ၊ လက်တွေ့ကျပြီး အကျိုးသင့်အကြောင်းသင့်ရှိသော ပန်းတိုင်များကို ချမှတ်မည်ဆိုလျှင် ကျွန်ုပ်တို့အတွက် အကျိုးရှိနိုင်သည်။ ကျွန်ုပ်တို့သည် အခြားသူများလောက် ဉာဏ်ထက်မြက်မည်မဟုတ်ပေ။ သို့မဟုတ် ဖျားနာခြင်း၊ အသက်အရွယ်ကြီးရင့်ခြင်းကြောင့် အဟန့်အတားများရှိပေမည်။ ကျွန်ုပ်တို့၏ဝိညာဉ်ရေးတိုးတက်မှုကို အားမရဖြစ်နေမည့်အစား မိမိ၏အကန့်အသတ်ရှိမှုများကို အသိအမှတ်ပြုပြီး အကျိုးသင့်အကြောင်းသင့်သဘောနှင့် အမြဲပြုမူဆောင်ရွက်ကြပါစို့။ ကျွန်ုပ်တို့အတတ်နိုင်ဆုံး “ကြိုးစားအားထုတ်” သောအခါ ပျော်ရွှင်မှုရရှိကြ၏။—၂ တိမောသေ ၂:၁၅; ဖိလိပ္ပိ ၄:၅။

ပညာရှိဘုရင်က “မတရားသောသူ ပြုသောအမှုသည် အမြဲမတည်တတ်။ ဖြောင့်မတ်ခြင်းတရားမျိုးစေ့ကို ကြဲသောသူမူကား မြဲမြံသောအကျိုးကို ခံရလိမ့်မည်။ ဖြောင့်မတ်ခြင်းတရားသည် အသက်ရှင်ခြင်းနှင့်ဆိုင်သကဲ့သို့ [မကောင်းမှု]ကို လိုက်ရှာသောသူသည်လည်း မိမိသေခြင်းတိုင်အောင် လိုက်ရှာတတ်၏။ သဘောကောက်သောသူတို့ကို ထာဝရဘုရားသည် စက်ဆုပ်ရွံရှာတော်မူ၏။ ဖြောင့်သောလမ်းသို့ လိုက်သောသူတို့ကိုကား နှစ်သက်တော်မူ၏။ လူဆိုးတို့သည် အသင်းဖွဲ့သော်လည်း အပြစ်ဒဏ်နှင့်မလွတ်ရကြ။ ဖြောင့်မတ်သောသူတို့၏ အမျိုးအနွယ်မူကား လွတ်ရ၏” ဟုဆိုပြီး ဖြောင့်မတ်သူသည် အကျိုးကျေးဇူးရရှိ၍ ကြမ်းကြုတ်သူမူကား အကျိုးယုတ်စေကြောင်း ထပ်၍အသေးစိတ် ဆွေးနွေးဖော်ပြသည်။—သု. ၁၁:၁၈-၂၁။

အဆိုပါအခန်းငယ်များသည် ဖြောင့်မတ်ခြင်းမျိုးစေ့ကြဲ၍ ၎င်း၏အကျိုးကျေးဇူးကို ရိတ်သိမ်းပါဟူသော အခြေခံအချက်ကို နည်းအမျိုးမျိုးဖြင့် အလေးအနက်ဖော်ပြ၏။ မတရားသောသူသည် အချောင်ရရန် လှည့်စားမည် သို့မဟုတ် လောင်းကစားမည်ဖြစ်သည်။ ဤငွေများသည် မတရားသည့်နည်းဖြင့် ရရှိထားသောကြောင့် သူသည် စိတ်ပျက်ရပေမည်။ ရိုးသားစွာ တစ်နေကုန်အလုပ်လုပ်သူသည် တရားသောနည်းဖြင့် အခငွေရရှိသောကြောင့် စိတ်ချမ်းမြေ့၏။ ဘုရားသခင်၏မျက်နှာသာရရှိသော အပြစ်မဲ့သူသည် အသက်ရရန် မျှော်လင့်နိုင်သည်။ သို့သော် မတရားသောသူသည် မည်သို့ဖြစ်မည်နည်း။ မတရားသောသူသည် ဖောက်ပြန်ရန် “အသင်းဖွဲ့သော်လည်း” အပြစ်ဒဏ်မှ လွတ်မြောက်မည်မဟုတ်ချေ။ (သု. ၂:၂၁၊ ၂၂) ဖြောင့်မတ်ခြင်းမျိုးစေ့ကြဲရန် တိုက်တွန်းချက်ကောင်းတစ်ခုပါတကား!

ကောင်းသောသတိရှိသူအတွက် အလှစစ်အလှမှန်

“[ကောင်းသော]သတိမရှိ၊ အဆင်းလှသောမိန်းမသည် ဝက်မနှာခေါင်းဖျား၌ တပ်သော ရွှေတန်ဆာနှင့်တူ၏” ဟုရှောလမုန်ဆက်ပြောသည်။ (သု. ၁၁:၂၂) ကျမ်းစာခေတ်တွင် နှာဆွဲများသည် လူကြိုက်များသော အလှတန်ဆာဖြစ်၏။ နှာခေါင်းဘေးမှ သို့မဟုတ် နှာခေါင်းပေါက်အလယ်မှ တပ်ထားသော ရွှေနှာဆွဲသည် အမျိုးသမီးကိုယ်ပေါ်တွင် အလွယ်တကူတွေ့မြင်နိုင်သော အလှတန်ဆာတစ်ခုဖြစ်၏။ ဤမျှအလွန်လှပသော အဆင်တန်ဆာကို ဝက်မနှာခေါင်းဖျား၌ တပ်ထားခြင်းသည် လုံးဝမအပ်စပ်လိုက်လေခြင်း! “[ကောင်းသော]သတိမရှိ” သောအပြင်ပန်းလှပသူတစ်ဦးလည်း အတူတူပင်ဖြစ်၏။ အဆင်တန်ဆာသည် ထိုကဲ့သို့သော အမျိုးသမီးနှင့်ဖြစ်စေ၊ အမျိုးသားနှင့်ဖြစ်စေ မသင့်တော်ပေ။ မအပ်စပ်သည့်အပြင် နှစ်သက်ဖွယ်မကောင်းပေ။

အခြားသူများက ကျွန်ုပ်တို့ကို မည်သို့ကြည့်မြင်ပုံအပေါ် စိုးရိမ်ပူပန်ခြင်းကား သဘာဝပင်ဖြစ်၏။ သို့ရာတွင် ကျွန်ုပ်တို့၏မျက်နှာ သို့မဟုတ် ကိုယ်လုံးကိုယ်ပေါက်အတွက် အဘယ်ကြောင့် စိုးရိမ်လွန်ရမည်နည်း၊ အဘယ်ကြောင့် မကျေမနပ်ဖြစ်ကြရမည်နည်း။ ကျွန်ုပ်တို့၏ရုပ်အသွင်အပြင်အများကို ထိန်းချုပ်ပြုပြင်၍မရပါ။ ရုပ်ရူပကာသည် အဓိကမကျပေ။ ကျွန်ုပ်တို့ နှစ်သက်သဘောကျသူ အများစုသည် သာမန်ရုပ်ရည်သာ ရှိသူများမဟုတ်ပေလော။ ပျော်ရွှင်မှုအတွက် ကိုယ်ကာယလှပမှုသည် အဓိကမဟုတ်ချေ။ အမှန်တကယ်တန်ဖိုးရှိသည်မှာ တာရှည်ခံဘုရားသခင့်အရည်အသွေးများဖြစ်သည့် အတွင်းအလှဖြစ်၏။ သို့ဖြစ်၍ ကျွန်ုပ်တို့သည် ကောင်းသောသတိရှိပြီး ထိုသို့သောအရည်အသွေးများကို မွေးမြူကြပါစို့လေ။

“စွန့်ကြဲတတ်သောသူသည် ကြွယ်ဝလိမ့်မည်”

ရှောလမုန်ဘုရင်က “ဖြောင့်မတ်သောသူသည် မြတ်သောအရာကိုသာ တောင့်တတတ်၏။ မတရားသောသူ မျှော်လင့်သောအရာမူကား ဒေါသအမျက်နှင့်ဆိုင်သတည်း” ဟုဆိုသည်။ ထိုသို့ မည်သို့ဖြစ်နိုင်ကြောင်း ဥပမာပေး၍ ဤသို့ထပ်ဆင့်ဆို၏– “စွန့်ကြဲသော်လည်း ဥစ္စာတိုးပွားတတ်သောသူရှိ၏။ အထောက်မတန်စုသိမ်း၍ ဆင်းရဲခြင်းသို့ ရောက်တတ်သောသူလည်းရှိ၏။”—သု. ၁၁:၂၃၊ ၂၄။

ကျွန်ုပ်တို့သည် သမ္မာကျမ်းစာအသိပညာကို လုံ့လစိုက်ထုတ်၍ ဖြန့်ဝေပေးကမ်းမည်ဆိုလျှင် ကျမ်းစာ၏ “အနံ၊ အလျား၊ အနက်၊ အမြင့်တို့ကို” ပိုမိုပိုင်းခြားသိမြင်လာမည်မှာ သေချာပါသည်။ (ဧဖက် ၃:၁၈) တစ်ဖက်တွင်မူ၊ ရရှိထားအသိပညာကို အသုံးမပြုသူသည် ထိုအသိပညာ ဆုံးရှုံးသွားနိုင်ဖွယ်ရှိ၏။ မှန်ပါသည်၊ “အနည်းငယ်သောမျိုးစေ့ကို ကြဲသောသူသည် စပါးအနည်းငယ်သာ ရိတ်ရမည်။ များစွာကြဲသောသူသည် များစွာရိတ်ရမည်။”—၂ ကောရိန္သု ၉:၆။

ရှင်ဘုရင်က ဤသို့ဆက်မိန့်ဆိုသည်– “စွန့်ကြဲတတ်သောသူသည် ကြွယ်ဝလိမ့်မည်။ သူတစ်ပါးကို ရေလောင်းသောသူသည် ကိုယ်တိုင်ရေလောင်းခြင်းအကျိုးကို ခံရလိမ့်မည်။” (သု. ၁၁:၂၅) စစ်မှန်သောဝတ်ပြုရေး တိုးတက်စေရန် ကျွန်ုပ်တို့၏ အချိန်နှင့်ပစ္စည်းဥစ္စာကို ရက်ရက်ရောရောအသုံးပြုခြင်းကို ယေဟောဝါအားရနှစ်သက်တော်မူ၏။ (ဟေဗြဲ ၁၃:၁၅၊ ၁၆) ကိုယ်တော်သည် “မိုးကောင်းကင်ပြတင်းပေါက်တို့ကို ဖွင့်၍ ကောင်းချီးမင်္ဂလာကို အကုန်အစင်သွန်းလောင်းမည်” ဖြစ်သည်။ (မာလခိ ၃:၁၀) ကိုယ်တော်၏ မျက်မှောက်ခေတ်ကျေးကျွန်များ ခံစားရသည့် ဝိညာဉ်ရေးကြွယ်ဝမှုကို ပြန်ကြည့်လိုက်ပါ!

“စပါးကို သိုထားသောသူသည် လူများကျိန်ဆဲခြင်းကို ခံရလိမ့်မည်။ ရောင်းချသောသူ၏ခေါင်း၌မူကား ကောင်းချီးမင်္ဂလာရှိလိမ့်မည်” ဟုရှောလမုန်မိန့်ဆိုခဲ့ခြင်းက ဖြောင့်မတ်သောသူနှင့် မတရားသောသူတို့၏ဆန္ဒများ ကွာခြားကြောင်းကိုဖော်ပြသည့် နောက်ထပ်ပုံဥပမာတစ်ခုဖြစ်သည်။ (သု. ၁၁:၂၆) ကုန်ပစ္စည်းတန်ဖိုးကျချိန်တွင် ဝယ်ယူသိမ်းထား၍ ရှားပါးပြီး တန်ဖိုးတက်ချိန်မှ ရောင်းချခြင်းသည် အမြတ်အစွန်းရရှိစေနိုင်သည်။ တော်ရုံအသုံးပြုပြီး သိမ်းထားခြင်းသည် အကျိုးအမြတ်ရရှိမည်ဖြစ်သော်လည်း ကိုယ်ကျိုးအတွက် ထိုသို့ပြုလုပ်သူကို လူအများက အထင်သေးရွံရှာကြ၏။ အခြားတစ်ဖက်တွင်မူ၊ အရေးပေါ်အခြေအနေကို အခွင့်ကောင်းယူ၍ ကြီးစွာသောအမြတ်မထုတ်သူကို လူတို့နှစ်သက်သဘောကျကြ၏။

ဣသရေလရှင်ဘုရင်က “ကောင်းသောအရာကို ကြိုးစား၍ ရှာသောသူသည် ကျေးဇူးကို ခံရလိမ့်မည်။ သူ့အကျိုးကိုဖျက်ခြင်းငှာ ရှာကြံသောသူမူကား ကိုယ်အကျိုးပျက်ခြင်းရှိလိမ့်မည်။ မိမိစည်းစိမ်ကို ကိုးစားသောသူသည် ရှုံးလိမ့်မည်။ ဖြောင့်မတ်သောသူမူကား သစ်ခက်ကဲ့သို့ စိမ်းလန်းလိမ့်မည်” ဟုဆို၍ ကောင်းမှု သို့မဟုတ် ဖြောင့်မတ်မှုကို ပြုလုပ်လိုစိတ်ဆက်ရှိနေရန် ကျွန်ုပ်တို့ကို အားပေးသည်။—သု. ၁၁:၂၇၊ ၂၈။

ဖြောင့်မတ်သောသူသည် စိတ်ဝိညာဉ်ကိုရ

မိုက်မဲသောလုပ်ရပ်မှ ဆိုးကျိုးများ ဖြစ်ပေါ်လာကြောင်းကို ဖော်ပြရန် ရှောလမုန်က ဤသို့ဆိုသည်– “မိမိအိမ်ကို နှောင့်ယှက်သောသူသည် လေကို အမွေခံရလိမ့်မည်။” (သု. ၁၁:၂၉က) အာခန်၏လုပ်ရပ်အမှားက ‘သူ့ကိုယ်သူ ပယ်ရှားခံရစေ’ ၍ သူနှင့်သူ၏မိသားစုပါ ခဲနှင့်ပေါက်သတ်ခံခဲ့ကြရ၏။ (ယောရှု အခန်းကြီး ၇) ယနေ့ ခရစ်ယာန်အိမ်ထောင်ဦးစီးနှင့် သူ၏အိမ်သားများသည် မှားယွင်းမှုတစ်ခုတွင် ပါဝင်ကြရာ ခရစ်ယာန်အသင်းတော်မှ နှင်ထုတ်ခံရပေမည်။ အိမ်ထောင်ဦးစီးသည် ဘုရားသခင်၏ပညတ်များကို ကိုယ်တိုင်မလိုက်လျှောက်ခြင်း၊ မိသားစု၏ ကြီးလေးသောအပြစ်ကို ခွင့်ပြုထားခြင်းကြောင့် သူ၏အိမ်ထောင်သည် ပယ်ရှားခြင်းခံခဲ့ရ၏။ သူနှင့် သူ၏မိသားစုမှ အခြားသူများသည် နောင်တမရသော အပြစ်ပြုသူများအဖြစ် ခရစ်ယာန်အသင်းတော်မှ နှင်ထုတ်ခံရမည်။ (၁ ကောရိန္သု ၅:၁၁-၁၃) သူသည် အဘယ်အရာကို အမွေရမည်နည်း။ မည်မည်ရရမဖော်ပြနိုင်သော လေကိုသာ ရရှိပေမည်။

ဤအခန်းငယ်က ဤသို့ဆက်ဆိုသည်– “မိုက်သောသူသည်လည်း ပညာရှိသောသူထံ၌ ကျွန်ခံရလိမ့်မည်။” (သု. ၁၁:၂၉ခ၊ သမ) မိုက်သောသူသည် လက်တွေ့ကျဉာဏ်ပညာမရှိသောကြောင့် သူ့အား တာဝန်များများလွှဲအပ်၍မရချေ။ ထို့ပြင် သူ၏ကိုယ်ရေးကိုယ်တာကိစ္စများကို ကောင်းစွာမစီမံမခန့်ခွဲတတ်သဖြင့် သူတစ်ပါး၏ကျေးဇူးအောက် ရောက်ရှိသွားပေမည်။ ဤသို့သောပညာမဲ့သူသည် “ပညာရှိသောသူထံ၌ ကျွန်ခံ” ရပေမည်။ သို့ဖြစ်၍ ကျွန်ုပ်တို့ပြုမူသမျှတွင် ကောင်းစွာချင့်ချိန်နိုင်စွမ်းနှင့် လက်တွေ့ကျဉာဏ်ပညာကို အသုံးပြုရန် အရေးကြီးကြောင်း ထင်ရှားပါသည်။

“ဖြောင့်မတ်သောသူသီးသော အသီးသည် အသက်ပင်အသီးဖြစ်၏။ သူတစ်ပါးတို့၏ စိတ်ဝိညာဉ်ကိုရသောသူသည်လည်း ပညာရှိဖြစ်၏” ဟုပညာရှိဘုရင်က အာမခံသည်။ (သု. ၁၁:၃၀) မည်သို့ဖြစ်နိုင်မည်နည်း။ ဖြောင့်မတ်သူသည် သူ၏အပြောအဆို၊ အပြုအမူအားဖြင့် အခြားသူများကို ဝိညာဉ်ရေးအာဟာရရရှိစေ၏။ ယေဟောဝါအားဝတ်ပြုရန် သူတို့တိုက်တွန်းခံကြရရာ နောက်ဆုံးတွင် ဘုရားသခင်ပေးသနားမည့် အသက်တာကို ရရှိပေလိမ့်မည်။

‘အပြစ်ထင်ရှားသောသူသည် သာ၍ပင် အပြစ်ဒဏ်ကိုခံရ’

အထက်ပါဆိုရိုးစကားသည် ဖြောင့်မတ်ခြင်းမျိုးစေ့ကြဲရန် ကျွန်ုပ်တို့ကို အားပေးတိုက်တွန်းထားပါသည်! “လူသည် မျိုးစေ့ကြဲသည်အတိုင်း အသီးအနှံကိုရိတ်ရလိမ့်မည်” ဟူသောမူကို ဤနည်းဖြင့် ရှောလမုန်မိန့်ဆိုထား၏– “ဖြောင့်မတ်သောသူသော်လည်း မြေကြီးပေါ်မှာ အပြစ်ဒဏ်ကိုခံရ၏။ မတရားသောသူနှင့် အပြစ်ထင်ရှားသောသူမူကား အဘယ်ဆိုဖွယ်ရာရှိသနည်း။”—သု. ၁၁:၃၁။

ဖြောင့်မတ်သောသူသည် မှန်ကန်ရာကို ကြိုးစားအားထုတ်သော်လည်း တစ်ခါတစ်ရံ အပြစ်ပြုမိတတ်၏။ (ဒေ. ၇:၂၀) သူ၏အမှားများအတွက် ဆုံးမပဲ့ပြင်ခြင်း “ဒဏ်ကိုခံ” ရလိမ့်မည်။ မှားသောလမ်းစဉ်ကို တမင်တကာရွေးချယ်ပြီး ဖြောင့်မတ်ခြင်းလမ်းစဉ်သို့ ပြန်လှည့်လာရန် မကြိုးစားသည့် မတရားသောသူကော အသို့နည်း။ ထိုသူသည် “အပြစ်ဒဏ်” ပြင်းပြင်းထန်ထန် သာ၍ပင် ခံထိုက်ပေသည်မဟုတ်လော။ “ဖြောင့်မတ်သောသူသည် ကယ်တင်ခြင်းသို့ ရောက်နိုင်ခဲသည်မှန်လျှင် ဘုရားသခင်ကို မကိုးကွယ်သောသူ၊ အပြစ်ထင်ရှားသောသူသည် အဘယ်မှာပေါ်လိမ့်မည်နည်း” ဟုတမန်တော်ပေတရုရေးသားခဲ့သည်။ (၁ ပေတရု ၄:၁၈) ထို့ကြောင့် ကျွန်ုပ်တို့အကျိုးအတွက် ဖြောင့်မတ်ခြင်းမျိုးစေ့ကြဲရန် သန္နိဋ္ဌာန်ချကြစို့လေ။

[အောက်ခြေမှတ်ချက်]

[စာမျက်နှာ ၂၈ ပါ ရုပ်ပုံ]

“နှစ်သက်ဖွယ်” အရည်အသွေးက အဘိဂဲလကို “ဂုဏ်အသရေ” ရှိစေခဲ့

[စာမျက်နှာ ၃၀ ပါ ရုပ်ပုံ]

‘မတရားသောသူပြုသော အမှုသည် အမြဲမတည်တတ်၊ ဖြောင့်မတ်သူသည် မြဲမြံသောအကျိုးကိုခံရ’

[စာမျက်နှာ ၃၁ ပါ ရုပ်ပုံ]

‘များစွာကြဲ၍ များစွာရိတ်လော့’