ယေဟောဝါ—စစ်မှန်သော တရားမျှတမှုနှင့်ဖြောင့်မတ်မှု၏အရင်းအမြစ်

“ထိုကျောက်တော်၏အမှုတော်သည်စုံလင်ပေ၏။ စီရင်တော်မူသမျှတို့သည် တရားနှင့်ညီ၏။ သစ္စာစောင့်၍ ဖြောင့်မတ်မှန်ကန်သော ဘုရားဖြစ်တော်မူ၏။”—တရားဟောရာ ၃၂:၄၊ ကဘ။

၁။ ကျွန်ုပ်တို့သည် ပင်ကိုသဘောအရ တရားမျှတမှုကို အဘယ်ကြောင့်လိုလားကြရသနည်း။

လူတိုင်းသည် ဗီဇအားဖြင့်အချစ်ခံလိုကြသကဲ့သို့ ကျွန်ုပ်တို့အားလုံးသည် တရားသဖြင့်ဆက်ဆံခံလိုကြသည်။ အမေရိကန်နိုင်ငံ့ခေါင်းဆောင် သောမတ်စ်ဂျက်ဖာဆင်ရေးခဲ့သကဲ့သို့ “[တရားမျှတမှု] သည် ပင်ကိုဗီဇဖြစ်ရာ . . . ထိတွေ့ခံစားခြင်း၊ မြင်ခြင်း သို့မဟုတ် ကြားခြင်းစသည့်အာရုံများကဲ့သို့ပင် ကျွန်ုပ်တို့ကိုယ်အင်္ဂါဖွဲ့စည်းမှုအစိတ်အပိုင်းတစ်ခုဖြစ်၏။” ယေဟောဝါသည် မိမိပုံသဏ္ဌာန်နှင့်အညီ ကျွန်ုပ်တို့ကိုဖန်ဆင်းထားသောကြောင့် ယင်းသည် အံ့ဩစရာမဟုတ်ချေ။ (ကမ္ဘာဦး ၁:၂၆) မှန်၏၊ ကိုယ်တော်သည် မိမိ၏ဥပဓိရုပ်ကို ရောင်ပြန်ဟပ်နိုင်သော အရည်အသွေးများဖြင့် ကျွန်ုပ်တို့ကိုဖန်ဆင်းထား၏။ ယင်းအရည်အသွေးများအနက်တစ်ခုမှာ တရားမျှတမှုဖြစ်သည်။ ယင်းကြောင့် ကျွန်ုပ်တို့သည် ပင်ကိုသဘောအရ တရားမျှတမှုကိုလိုလားရခြင်း၊ စစ်မှန်သော တရားမျှတမှုနှင့်ဖြောင့်မတ်ခြင်းတို့ရှိသည့် ကမ္ဘာတစ်ခုတွင်နေထိုင်လိုရခြင်းဖြစ်သည်။

၂။ တရားမျှတမှုသည် ယေဟောဝါအတွက် မည်မျှအရေးကြီးပြီး၊ ကျွန်ုပ်တို့သည် ဘုရားသခင့်တရားမျှတမှုအဓိပ္ပာယ်ကိုနားလည်ရန် အဘယ်ကြောင့်လိုသနည်း။

^၂ ယေဟောဝါနှင့်ပတ်သက်၍ သမ္မာကျမ်းစာက “စီရင်တော်မူသမျှတို့သည် တရားနှင့်ညီ” ကြောင်းယုံကြည်စိတ်ချစေသည်။ (တရားဟောရာ ၃၂:၄) သို့သော် မတရားမှုပြည့်နေသည့်လောကတွင် ဘုရားသခင့်တရားမျှတမှု၏အဓိပ္ပာယ်ကို နားလည်ရန်မလွယ်ကူပေ။ သို့ရာတွင် ဘုရားသခင့်နှုတ်တော်ထွက်စာမျက်နှာများမှတစ်ဆင့် ဘုရားသခင်သည် မည်သို့တရားသဖြင့်စီရင်ကြောင်း ပိုင်းခြားသိမြင်နိုင်ရုံမက ဘုရားသခင်၏အံ့ဖွယ်နည်းလမ်းများကိုပင် ပိုမိုလေးမြတ်လာနိုင်သည်။ (ရောမ ၁၁:၃၃) ကျွန်ုပ်တို့၏တရားမျှတသည့်သဘောထားသည် လူ့အယူအဆများ၏လွှမ်းမိုးမှုကို အမှန်ခံရနိုင်သောကြောင့် သမ္မာကျမ်းစာအဓိပ္ပာယ်ဖွင့်ဆိုချက်အရ တရားမျှတမှုကိုနားလည်ရန် အရေးကြီး၏။ လူ့ရှုထောင့်မှကြည့်လျှင် တရားမျှတမှုသည် ဥပဒေပြဋ္ဌာန်းချက်ကိုဘက်မလိုက်ဘဲကျင့်သုံးခြင်းဟုသာ တွေးကြပေမည်။ သို့မဟုတ် ဒဿနပညာရှင်ဖရန်စစ်ဘေကွန် ရေးသားခဲ့သကဲ့သို့ “တရားမျှတမှုဟူသည် လူတိုင်းအား သူတို့ထိုက်သင့်ရာကိုပေးခြင်းဖြစ်၏။” သို့ရာတွင် ယေဟောဝါ၏တရားမျှတမှုမှာမူ ထို့ထက်မကပါဝင်သည်။

ယေဟောဝါ၏တရားမျှတမှုသည် နှစ်ထောင်းအားရစေ

၃။ တရားမျှတမှုနှင့်ဖြောင့်မတ်ခြင်းတို့အတွက် သမ္မာကျမ်းစာတွင် အသုံးပြုထားသော မူရင်းဘာသာစကားလုံးများကို သုံးသပ်ခြင်းဖြင့် အဘယ်အရာကိုသိရှိနိုင်သနည်း။

^၃ သမ္မာကျမ်းစာ၌ မူရင်းစကားလုံးများကို မည်သို့သုံးထားကြောင်းသုံးသပ်ခြင်းဖြင့် ဘုရားသခင့်တရားမျှတမှုနယ်ပယ်ကို ပို၍သဘောပေါက်နားလည်နိုင်သည်။a သမ္မာကျမ်းစာတွင် တရားမျှတမှုနှင့်ဖြောင့်မတ်ခြင်းတို့ကို သိသာထင်ရှားစွာ ခွဲခြားဖော်ပြမထားခြင်းမှာ စိတ်ဝင်စားစရာပင်။ အမှန်ဆိုလျှင် အာမုတ် ၅:၂၄ တွင် မိမိ၏လူတို့ကို ယေဟောဝါ အားပေးတိုက်တွန်းခဲ့စဉ် ဟေဗြဲစကားလုံးများကို တစ်ခါတစ်ရံ ဤသို့ယှဉ်တွဲအသုံးပြုကြောင်းတွေ့ရှိရသည်– “တရားသဖြင့်စီရင်ခြင်းကို ရေကဲ့သို့လည်းကောင်း၊ ဖြောင့်မတ်ခြင်းကို မပြတ်စီးသောမြစ်ရေကဲ့သို့လည်းကောင်း စီးစေကြလော့။” ထို့အပြင် ‘တရားမျှတမှုနှင့်ဖြောင့်မတ်ခြင်း’ ဟူသောဝေါဟာရကို လေးနက်စေရန်အကြိမ်ကြိမ်တွဲအသုံးပြုတတ်ကြောင်းတွေ့ရသည်။—ဆာလံ ၃၃:၅; ဟေရှာယ ၃၃:၅; ယေရမိ ၃၃:၁၅; ယေဇကျေလ ၁၈:၂၁; ၄၅:၉။

၄။ တရားမျှတမှုကိုကျင့်သုံးခြင်းက အဘယ်အဓိပ္ပာယ်ရှိသနည်း၊ တရားမျှတမှု၏ အဆုံးစွန်စံနှုန်းကားအဘယ်နည်း။

^၄ ဤဟေဗြဲနှင့်ဂရိစကားလုံးများသည် အဘယ်အဓိပ္ပာယ်ကိုဖော်ပြသနည်း။ ကျမ်းစာဆိုင်ရာအဓိပ္ပာယ်ဖွင့်ဆိုချက်အတိုင်း တရားမျှတမှုကိုတင်ပြခြင်းသည် ဖြောင့်မှန်ပြီး ဘက်မလိုက်ခြင်းကိုဆိုလိုသည်။ ယေဟောဝါသည် အကျင့်ဆိုင်ရာဥပဒေများနှင့်မူများ သို့မဟုတ် ဖြောင့်မှန်ပြီး ဘက်မလိုက်မှုကိုပြဋ္ဌာန်းသူဖြစ်သောကြောင့် ကိစ္စရပ်များကိုယေဟောဝါဆောင်ရွက်ပုံသည် အပြီးသတ်တရားမျှတမှုစံနှုန်းဖြစ်၏။ ဖြောင့်မတ်ခြင်း (စဲဒဟက်) ဟုအဓိပ္ပာယ်ရသော ဟေဗြဲစကားလုံးသည် “ကျင့်ဝတ်ဆိုင်ရာသီလစံနှုန်းကိုရည်ညွှန်းပြီး ဓမ္မဟောင်းကျမ်းပါထိုစံနှုန်းသည် ဘုရားသခင်၏ပင်ကိုသဘောနှင့်လိုအင်ဖြစ်၏” ဟုဓမ္မပညာရပ်ဆိုင်ရာ ဓမ္မဟောင်းကျမ်း၏စကားလုံးစာအုပ်ကရှင်းပြထားသည်။ ထို့ကြောင့် ဘုရားသခင်သည် မိမိ၏မူများကိုကျင့်သုံးပုံနှင့် အထူးသဖြင့် မစုံလင်သောလူသားများနှင့်ဆက်ဆံပုံတို့က စစ်မှန်သော တရားမျှတမှုနှင့်ဖြောင့်မတ်ခြင်းကို ထင်ရှားစွာဖော်ပြသည်။

၅။ အဘယ်အရည်အချင်းများသည် ဘုရားသခင့်တရားမျှတမှုနှင့်နီးစပ်သနည်း။

^၅ ဘုရားရေးရာတရားမျှတမှုသည် မကြမ်းတမ်း၊ မတင်းကျပ်ဘဲ နှစ်ထောင်းအားရစေကြောင်း ကျမ်းစာကရှင်းလင်းစွာဖော်ပြ၏။ ဒါဝိဒ် ဤသို့ဖွဲ့ဆိုခဲ့သည်– “ထာဝရဘုရား [“ယေဟောဝါ၊” ကဘ] သည် တရားကိုနှစ်သက်တော်မူ၏။ မိမိ၏သန့်ရှင်းသူတို့ကိုလည်း စွန့်တော်မမူ။” (ဆာလံ ၃၇:၂၈) ဘုရားသခင်၏တရားမျှတမှုက မိမိ၏ကျွန်များအပေါ် သစ္စာရှိပြီးထောက်ထားစာနာမှုပြရန် ကိုယ်တော်အားလှုံ့ဆော်ပေးသည်။ ဘုရားသခင့်တရားမျှတမှုသည် ကျွန်ုပ်တို့၏လိုအပ်ရာများကို အကင်းပါးပါးနှင့်သိရှိပြီး ကျွန်ုပ်တို့၏မစုံလင်မှုများကို ထည့်တွက်စဉ်းစားပေး၏။ (ဆာလံ ၁၀၃:၁၄) ယင်းက ဆိုးသွမ်းမှုများကို ဘုရားသခင်ခွင့်ပြုသည်ဟုမဆိုလိုပါ၊ အကြောင်းမှာ ထိုသို့ပြုခြင်းဖြင့် မတရားမှုကိုအားပေးရာရောက်သောကြောင့်ဖြစ်သည်။ (၁ ဓမ္မရာဇဝင် ၃:၁၂၊ ၁၃; ဒေသနာ ၈:၁၁) ယေဟောဝါသည် “သနားတတ်သောသဘော၊ ကျေးဇူးပြုတတ်သောသဘော၊ အမျက်ထွက်နှေးသောသဘော၊ ကရုဏာနှင့်သစ္စာကြွယ်ဝသောသဘောရှိတော်မူသော” အရှင်ဖြစ်ကြောင်း မောရှေကို ကိုယ်တော်ရှင်းပြခဲ့သည်။ မှားယွင်းခြင်းနှင့် တရားတော်ကိုလွန်ကျူးခြင်းတို့ကိုဖြေလွှတ်သော်လည်း ပြစ်ဒဏ်စီရင်ခံထိုက်သူတို့ကို လွတ်ကင်းစေမည်မဟုတ်ချေ။—ထွက်မြောက်ရာ ၃၄:၆၊ ၇။

၆။ ယေဟောဝါသည် မိမိ၏မြေကြီးဆိုင်ရာသားသမီးများနှင့် မည်သို့ဆက်ဆံတော်မူသနည်း။

^၆ ယေဟောဝါတရားမျှတမှုတင်ပြပုံကိုဆင်ခြင်သောအခါ ကိုယ်တော်အားပြစ်မှားသူများကို ပြစ်ဒဏ်ချမှတ်ရန်သာစဉ်းစားတတ်သည့် ခက်ထန်သောတရားသူကြီးတစ်ဦးအဖြစ် ကျွန်ုပ်တို့မယူမှတ်သင့်ပေ။ ယင်းအစား ကိုယ်တော်သည် မိမိ၏သားသမီးများအပေါ် တတ်နိုင်သမျှအကောင်းဆုံးနည်းဖြင့် အမြဲဆက်ဆံသည့် မေတ္တာရှိသော်လည်း ခိုင်မာပြတ်သားသောဖခင်တစ်ဦးဖြစ်သည်ဟု ရှုမြင်သင့်၏။ “အိုထာဝရဘုရား [“ယေဟောဝါ၊” ကဘ] ကိုယ်တော်သည် အကျွန်ုပ်တို့အဘဖြစ်တော်မူ၏” ဟုပရောဖက်ဟေရှာယဆိုခဲ့သည်။ (ဟေရှာယ ၆၄:၈) တရားပြီးဖြောင့်မတ်သည့်ဖခင်တစ်ဦးအနေဖြင့် ယေဟောဝါသည် မှန်သည့်ဘက် ခိုင်မာစွာရပ်တည်မှုနှင့် ခက်ခဲသောအခြေအနေများ သို့မဟုတ် အသွေးအသားအားနည်းမှုများကြောင့် အကူအညီ သို့မဟုတ် ခွင့်လွှတ်မှုလိုနေသော မြေကြီးသားသမီးများကို ထောက်ထားညှာတာမှုတင်ပြရာတွင် မျှတမှုရှိတော်မူ၏။—ဆာလံ ၁၀၃:၆၊ ၁၀၊ ၁၃။

တရားမျှတမှုကို ရှင်းလင်းခြင်း

၇။ (က) ဟေရှာယ၏ပရောဖက်ပြုချက်မှ ဘုရားသခင့်တရားမျှတမှုအကြောင်း အဘယ်အရာသိရှိရသနည်း။ (ခ) တရားမျှတမှုအကြောင်း လူမျိုးများကိုသွန်သင်ရာ၌ ယေရှုသည် အဘယ်ကဏ္ဍမှပါဝင်ခဲ့သနည်း။

^၇ ယေဟောဝါ၏တရားမျှတသော စာနာထောက်ထားသည့်သဘောသည် မေရှိယကြွလာချိန်တွင် ပေါ်လွင်ထင်ရှားခဲ့သည်။ ပရောဖက်ဟေရှာယကြိုဟောခဲ့သကဲ့သို့ ယေရှုသည် ဘုရားသခင့်တရားမျှတမှုကိုသွန်သင်ကာ ယင်းနှင့်အညီနေထိုင်ခဲ့သည်။ ရှင်းနေသည်မှာ ဘုရားသခင့်တရားမျှတမှု၌ နွမ်းလျပင်ပန်းနေသူတို့ကို ညှာတာစွာဆက်ဆံခြင်းပါဝင်၏။ သို့ဖြင့် သူတို့သည် နာလန်မထူနိုင်သည့်တိုင် ဖြစ်သွားကြမည်မဟုတ်ချေ။ ယေဟောဝါ၏ “ကျွန်” ယေရှုသည် ဘုရားသခင်၏တရားမျှတမှုဆိုင်ရာ ဤအမြင်ကို ‘လူအမျိုးမျိုးတို့အားရှင်းလင်း’ ရန်ကမ္ဘာပေါ်သို့ကြွလာတော်မူ၏။ အဓိကအနေနှင့် ဘုရားသခင့်တရားမျှတမှုသည် အဘယ်အရာကိုဆိုလိုကြောင်း သက်ရှိပုံသက်သေကိုပြခြင်းဖြင့် တင်ပြခဲ့သည်။ ဘုရင်ဒါဝိဒ်၏ ‘ဖြောင့်မတ်သောအညွန့်’ ဖြစ်သူ ယေရှုသည် ‘တရားသဖြင့် ဖြောင့်မတ်စွာ ချက်ချင်းစီရင်’ ရန်စိတ်အားထက်သန်တော်မူခဲ့သည်။—ဟေရှာယ ၁၆:၅; ၄၂:၁-၄; မဿဲ ၁၂:၁၈-၂၁; ယေရမိ ၃၃:၁၄၊ ၁၅။

၈။ စစ်မှန်သော တရားမျှတမှုနှင့်ဖြောင့်မတ်ခြင်းသည် ပထမရာစု၌ အဘယ်ကြောင့်မထင်မရှားဖြစ်လာခဲ့ရသနည်း။

^၈ ယေဟောဝါ၏တရားမျှတမှုသဘောကို ထိုသို့ရှင်းလင်းရန် အထူးသဖြင့် ပထမရာစု၌လိုအပ်ခဲ့သည်။ ဂျူးအကြီးအကဲများနှင့် ဘာသာရေးခေါင်းဆောင်များ—ကျမ်းတတ်များ၊ ဖာရိရှဲများနှင့် အခြားသူများ—သည် တရားမျှတမှုနှင့် ဖြောင့်မတ်ခြင်းဆိုင်ရာ လွဲမှားသောအမြင်ကို ဖော်ပြပြီး နမူနာပြခဲ့ကြသည်။ ရလဒ်အနေဖြင့် ကျမ်းတတ်များနှင့် ဖာရိရှဲများ၏တောင်းဆိုချက်ကိုလိုက်နာရန် မဖြစ်နိုင်ဟုတွေ့ရှိခဲ့ကြသည့် သာမန်လူတို့သည် ဘုရားသခင့်ဖြောင့်မတ်ခြင်းကို လက်လှမ်းမမီနိုင်ဟုယူမှတ်ခဲ့ကြပေမည်။ (မဿဲ ၂၃:၄; လုကာ ၁၁:၄၆) အမှန်မှာ ထိုသို့မဟုတ်ကြောင်း ယေရှုပြခဲ့သည်။ ကိုယ်တော်သည် မိမိ၏တပည့်တော်များကို ဤသာမန်လူတို့ထဲမှရွေးချယ်ခဲ့ပြီး ဘုရားသခင်၏ဖြောင့်မတ်သောစံနှုန်းများကို သင်ကြားပေးခဲ့သည်။—မဿဲ ၉:၃၆; ၁၁:၂၈-၃၀။

၉၊ ၁၀။ (က) ကျမ်းတတ်များနှင့်ဖာရိရှဲများသည် သူတို့၏ဖြောင့်မတ်ခြင်းကိုတင်ပြရန် မည်သို့ရှာကြံခဲ့ကြသနည်း။ (ခ) ကျမ်းတတ်များနှင့် ဖာရိရှဲများ၏ဓလေ့များသည် အချည်းနှီးဖြစ်ကြောင်းကို ယေရှုမည်သို့နှင့်အဘယ်ကြောင့်ဖော်ပြခဲ့သနည်း။

^၉ အခြားတစ်ဖက်တွင်မူ ဖာရိရှဲများသည် လူရှေ့သူရှေ့ဆုတောင်းခြင်း သို့မဟုတ် အလှူငွေထည့်ခြင်းဖြင့် သူတို့၏ “ဖြောင့်မတ်ခြင်း” ကိုဖော်ပြရန်အခွင့်အရေးများရှာခဲ့ကြသည်။ (မဿဲ ၆:၁-၆) သူတို့ကိုယ်တိုင်ပြဋ္ဌာန်းထားသော မရေတွက်နိုင်သည့် ဥပဒေစည်းမျဉ်းများကို လိုက်လျှောက်ခြင်းဖြင့် သူတို့၏ဖြောင့်မတ်ခြင်းကိုတင်ပြရန်လည်း ကြိုးစားခဲ့ကြသည်။ ဤသို့ကြိုးစားပြုလုပ်ကြသည့်အတွက် “တရားသဖြင့်စီရင်ခြင်း၊ ဘုရားသခင်ကိုချစ်ခြင်းအမှုကိုကား လှပ်၍ထား” စေကြသည်။ (လုကာ ၁၁:၄၂) အပြင်ပန်းအားဖြင့် သူတို့သည် ဖြောင့်မတ်ဟန်ရှိကြသော်လည်း အတွင်း၌ကား မဖြောင့်မတ်ခြင်း သို့မဟုတ် ‘မတရားသဖြင့်ကျင့်ခြင်းနှင့်ပြည့်လျက်’ ရှိခဲ့ကြသည်။ (မဿဲ ၂၃:၂၈) ရိုးရိုးဆိုရလျှင် သူတို့သည် ဘုရားသခင်၏ဖြောင့်မတ်ခြင်းကိုမသိသလောက်ပင်ဖြစ်ကြသည်။

^၁၀ ထိုအကြောင်းကြောင့် ယေရှုက မိမိ၏နောက်တော်လိုက်များကို ဤသို့သတိပေးခဲ့သည်– “သင်တို့၏ဖြောင့်မတ်ခြင်းသည် ကျမ်းတတ်ဆရာနှင့်ဖာရိရှဲတို့ဖြောင့်မတ်ခြင်းထက် မသာလျှင်၊ ကောင်းကင်နိုင်ငံတော်သို့ အလျှင်းမဝင်ရ။” (မဿဲ ၅:၂၀၊ သမ) ယေရှုပြသခဲ့သော ဘုရားသခင့်တရားမျှတမှုနှင့် ကျမ်းတတ်များ၊ ဖာရိရှဲများ၏ကိုယ့်ကိုယ်ကိုဖြောင့်မတ်သည်ဟူသော သဘောထားသေးမှုတို့စပ်ကြား အလွန်ကွာခြားခြင်းက သူတို့ကြား၌ မကြာခဏငြင်းခုံမှုဖြစ်စေခဲ့သည်။

ဘုရားသခင့်တရားမျှတမှုတစ်ဖက် လွဲမှားသောတရားမျှတမှု

၁၁။ (က) ဥပုသ်နေ့တွင်ကုသခြင်းနှင့်ပတ်သက်၍ ဖာရိရှဲများသည် ယေရှုကိုအဘယ်ကြောင့် မေးမြန်းခဲ့ကြသနည်း။ (ခ) ယေရှု၏အဖြေက အဘယ်အရာကို ဖော်ပြခဲ့သနည်း။

^၁၁ စီ.အီး. ၃၁ နွေဦးရာသီ၌ ဂါလိလဲနယ်တွင် ယေရှုဓမ္မအမှုဆောင်ချိန်ကာလအတွင်း တရားဇရပ်တစ်ခုတွင် လက်တစ်ဖက်သေနေသူတစ်ဦးကို ကိုယ်တော်တွေ့ဆုံခဲ့သည်။ ထိုနေ့သည် ဥပုသ်နေ့ဖြစ်သောကြောင့် ဖာရိရှဲများက ယေရှုကိုဤသို့မေးခဲ့ကြသည်– “ဥပုသ်နေ့၌ ရောဂါကိုငြိမ်းစေအပ်သလော။” ဤမရှိဆင်းရဲသူ၏ဝေဒနာအတွက် စစ်မှန်သောပူပန်မှုပြကြမည့်အစား ယေရှုကိုအပြစ်တင်လိုကြကြောင်း သူတို့၏မေးခွန်းက ဖော်ပြသည်။ ယေရှုသည် သူတို့၏အကဲမဆတ်သည့်နှလုံးများကြောင့် ဝမ်းနည်းခဲ့သည်မှာ အံ့ဩစရာမဟုတ်ချေ! သို့နှင့် ကိုယ်တော်သည် အလားတူမေးခွန်းတစ်ခုကို ဖာရိရှဲများအားမေးခဲ့သည်– “ဥပုသ်နေ့၌ကျေးဇူးပြုအပ်သလော။” သူတို့ဆိတ်ဆိတ်နေကြသောအခါ ယေရှုက ဥပုသ်နေ့၌တွင်းထဲကျသွားသည့်သိုးကို မဆွဲတင်ဘဲနေကြမည်လောဟု မေးပြီး မိမိ၏မေးခွန်းကိုကိုယ်တိုင်ဖြေဆိုခဲ့သည်။b “လူသည် သိုးထက်အလွန်မြတ်ပေ၏!” ယေရှုသည် ဆင်ခြင်တုံတရားနှင့်ညီစွာချေပခဲ့၏။ “ထို့ကြောင့် ဥပုသ်နေ့၌ကျေးဇူးပြုအပ်သည်” ဟုနိဂုံးချုပ်ခဲ့သည်။ ဘုရားသခင့်တရားမျှတမှုကို လူ့ထုံးတမ်းစဉ်လာဖြင့် ဘယ်တော့မျှချည်နှောင်မခံသင့်ပေ။ ထိုသို့ရှင်းလင်းစွာထောက်ပြပြီးနောက် ယေရှုသည် ထိုသူ၏လက်ကိုကုသပေးခဲ့သည်။—မဿဲ ၁၂:၉-၁၃; မာကု ၃:၁-၅။

၁၂၊ ၁၃။ (က) ယေရှုသည် ကျမ်းတတ်များ၊ ဖာရိရှဲများနှင့်မတူဘဲ အပြစ်သားများကိုကူညီရန်လိုကြောင်း မည်သို့ပြသခဲ့သနည်း။ (ခ) ဘုရားသခင့်တရားမျှတမှုနှင့် ကိုယ့်ကိုယ်ကိုဖြောင့်မတ်ကြောင်းတင်ပြခြင်း၏ခြားနားမှုကားအဘယ်နည်း။

^၁၂ ဖာရိရှဲများသည် ကာယရေးမသန်စွမ်းသူများကို ဂရုမစိုက်လျှင် ဝိညာဉ်ရေးချွတ်ခြုံကျသူများကို သာ၍ပင်ဂရုစိုက်ကြမည်မဟုတ်ပေ။ ဖြောင့်မတ်ခြင်းနှင့်ပတ်သက်၍ သူတို့၏လွဲမှားသောအမြင်က အခွန်ခံများနှင့် အပြစ်ရှိသူများကို လျစ်လျူရှုပြီး အထင်အမြင်သေးစေသည်။ (ယောဟန် ၇:၄၉) သို့သော် ထိုသူများစွာသည် ယေရှု၏အပြစ်စီရင်လိုသည့်ဆန္ဒထက် ကူညီလိုသည့်သဘောကိုသိရှိကြ၍ ကိုယ်တော်၏သွန်သင်ချက်ကိုလက်သင့်ခံခဲ့ကြသည်။ (မဿဲ ၂၁:၃၁; လုကာ ၁၅:၁) သို့ရာတွင် ဖာရိရှဲများသည် ဝိညာဉ်ရေးဖျားနာမှုကုသပေးရန် ယေရှု၏ကြိုးပမ်းမှုများကို အပုပ်ချခဲ့ကြ၏။ “ဤသူသည် ဆိုးသောသူတို့ကိုလက်ခံ၍ သူတို့နှင့်အတူစားပါသည်တကား” ဟုကဲ့ရဲ့ပြစ်တင်ခဲ့ကြသည်။ (လုကာ ၁၅:၂) သူတို့၏စွပ်စွဲချက်ကိုဖြေဆိုရာ၌ ယေရှုသည် ကျေးလက်ဥပမာတစ်ခုကို ထပ်၍အသုံးပြုခဲ့သည်။ သိုးထိန်းတစ်ဦးသည် ပျောက်နေသောသိုးတစ်ကောင်ကို ပြန်တွေ့သောအခါ ဝမ်းမြောက်သကဲ့သို့ အပြစ်သားတစ်ဦးနောင်တရသောအခါ ကောင်းကင်သားများသည် ဝမ်းမြောက်ကြ၏။ (လုကာ ၁၅:၃-၇) ယေရှုသည် ဇက္ခဲကို သူ၏အပြစ်ရှိသောလမ်းစဉ်ဟောင်းမှနောင်တရရန် ကူညီပေးနိုင်ခဲ့သောအခါ ကိုယ်တော်တိုင်ဝမ်းမြောက်ခဲ့၏။ “လူသားသည်ပျောက်သောသူတို့ကိုရှာ၍ ကယ်တင်အံ့သောငှာ ကြွလာသတည်း” ဟုကိုယ်တော်မိန့်တော်မူခဲ့၏။—လုကာ ၁၉:၈-၁၀။

^၁၃ ဤထိပ်တိုက်အငြင်းပွားမှုများက ကုသကယ်တင်ပေးလိုသော ဘုရားသခင့်တရားမျှတမှုနှင့် လူအနည်းငယ်ကိုချီးမြှောက်ကာ လူအများကိုကား အပြစ်တင်ရှုတ်ချတတ်သည့် ကိုယ့်ကိုယ်ကိုဖြောင့်မတ်သည်ဟုယူဆခြင်းတို့၏ကွာခြားချက်ကို ရှင်းလင်းစွာဖော်ပြသည်။ အချည်းနှီးသောနည်းဥပဒေသများနှင့် လူ့ထုံးတမ်းစဉ်လာတို့သည် ကျမ်းတတ်များနှင့် ဖာရိရှဲများကို စိတ်ကြီးဝင်စေကာ မိမိကိုယ်ကိုအဓိကထားစေခဲ့၏၊ သို့သော် သူတို့သည် “တရားသဖြင့်စီရင်ခြင်း၊ သူတစ်ပါးကိုသနားခြင်း၊ သစ္စာစောင့်ခြင်းတည်းဟူသော ပညတ်တရားတွင် လေးသောအရာတို့ကိုကား လှပ်၍ထားကြ” ၏ဟုယေရှုလျောက်ပတ်စွာဖော်ပြခဲ့သည်။ (မဿဲ ၂၃:၂၃) ကျွန်ုပ်တို့လုပ်ဆောင်သမျှ၌ စစ်မှန်သောတရားမျှတမှုကိုကျင့်သုံးပြီး ကိုယ့်ကိုယ်ကိုဖြောင့်မတ်သည်ဟုထင်ခြင်းကျော့ကွင်းထဲ ကျမသွားရန်လည်း သတိထားကြစို့။

၁၄။ ဘုရားသခင့်တရားမျှတမှုသည် လူတစ်ဦး၏အခြေအနေများကို ထည့်တွက်စဉ်းစားပေးကြောင်း ယေရှု၏အံ့ဖွယ်များမှတစ်ခုက မည်သို့ဖော်ပြသနည်း။

^၁၄ ယေရှုသည် ဖာရိရှဲများ၏တစ်ဖက်သတ်ဆန်သည့် နည်းဥပဒေသများကို လျစ်လျူရှုခဲ့သော်လည်း မောရှေ၏ပညတ်ကိုကားစောင့်ထိန်းခဲ့သည်။ (မဿဲ ၅:၁၇၊ ၁၈) ထိုသို့ပြုရာတွင် ယင်းဖြောင့်မတ်သောပညတ်၏စာသားကို ၎င်း၏မူများထက် အရေးမပေးခဲ့ပေ။ ၁၂ နှစ်လုံးလုံး သွေးသွန်နာစွဲသောမိန်းမတစ်ယောက်က ကိုယ်တော့်ဝတ်လုံကိုတို့၍ ရောဂါပျောက်ကင်းသွားသောအခါ ယေရှုကသူမကို ဤသို့မိန့်တော်မူခဲ့၏– “ငါ့သမီး၊ မစိုးရိမ်နှင့်။ သင်၏ယုံကြည်ခြင်းသည် သင့်အနာကိုငြိမ်းစေပြီ။ ငြိမ်ဝပ်စွာသွားလော့။” (လုကာ ၈:၄၃-၄၈) ဘုရားသခင်၏တရားမျှတမှုသည် သူမ၏အခြေအနေကိုထည့်တွက်ပေးကြောင်း ယေရှု၏စာနာထောက်ထားသောစကားများက အခိုင်အမာတင်ပြသည်။ သူမသည် ဓလေ့ထုံးစံအရ မသန့်ရှင်းသူဖြစ်၍ လူအုပ်ကြားတွင်ရှိနေခြင်းဖြင့် မောရှေ၏ပညတ်ကို ချိုးဖောက်ခဲ့ပြီဖြစ်သော်လည်း သူမ၏ယုံကြည်ခြင်းကို ဆုချထိုက်ပေသည်။—ဝတ်ပြုရာ ၁၅:၂၅-၂၇; ရောမ ၉:၃၀-၃၃ နှိုင်းယှဉ်။

ဖြောင့်မတ်ခြင်းသည် လူတိုင်းအတွက်ဖြစ်

၁၅၊ ၁၆။ (က) ယေရှု၏ ကိုယ်နှင့်စပ်ဆိုင်သူစိတ်ထားရှိသော ရှမာရိအမျိုးသားပုံဥပမာသည် တရားမျှတမှုအကြောင်း ကျွန်ုပ်တို့အားအဘယ်အရာသင်ပေးသနည်း။ (ခ) ကျွန်ုပ်တို့သည် လွန်ကျူးစွာဖြောင့်မတ်ခြင်းကို အဘယ်ကြောင့်ရှောင်သင့်သနည်း။

^၁၅ ယင်း၏စာနာထောက်ထားသောသဘောကို အလေးပေးသည့်အပြင် ဘုရားသခင့်တရားမျှတမှုသည် လူခပ်သိမ်းအတွက်ဖြစ်သည်ဟု တပည့်တော်များအား ယေရှုသွန်သင်ခဲ့သည်။ ကိုယ်တော်သည် ‘လူမျိုးခြားတို့အား တရားတော်ကိုထုတ်ဆင့်ပေးရန်’ ယေဟောဝါအလိုတော်ရှိ၏။ (ဟေရှာယ ၄၂:၁၊ သမ) ကိုယ်နှင့်စပ်ဆိုင်သူစိတ်ထားရှိ ရှမာရိအမျိုးသားနှင့်ပတ်သက်သော ယေရှု၏အကျော်ကြားဆုံးဥပမာများအနက်တစ်ခုက ယင်းအချက်ကိုဖော်ပြသည်။ ဤဥပမာသည် ‘မိမိကိုယ်ကိုဖြောင့်မတ်ကြောင်းပြ’ လိုသောကျမ်းတတ်တစ်ဦး၏မေးခွန်းအတွက် အဖြေဖြစ်သည်။ ဂျူးလူမျိုးများသာ ကိုယ်နှင့်စပ်ဆိုင်သူစိတ်ထားပြရန်ဖြစ်ကြောင်း တင်ပြလို၍ “အဘယ်သူသည် အကျွန်ုပ်နှင့်စပ်ဆိုင်သောသူဖြစ်ပါသနည်း” ဟုသူမေးခဲ့ခြင်းဖြစ်သည်။ ယေရှု၏ဥပမာတွင် ရှမာရိအမျိုးသားသည် အခြားလူမျိုးဖြစ်သော လူစိမ်းတစ်ဦးကိုကူညီရန် သူ၏အချိန်နှင့်ငွေကို လိုလိုလားလားအကုန်ကျခံခြင်းဖြင့် ဘုရားသခင်ရေးရာဖြောင့်မတ်ခြင်းကိုပြသခဲ့သည်။ ယေရှုသည် မိမိအားမေးခွန်းမေးသူကို “ထိုနည်းတူပြုလော့” ဟုအကြံပေးကာ မိမိ၏ပုံဥပမာကိုနိဂုံးချုပ်ခဲ့သည်။ (လုကာ ၁၀:၂၅-၃၇) ကျွန်ုပ်တို့လည်း လူမျိုးရေး သို့မဟုတ် လူမျိုးစု နောက်ခံမည်သို့ပင်ရှိစေကာမူ လူအားလုံးကို ကောင်းမှုပြုမည်ဆိုလျှင် ဘုရားသခင်၏တရားမျှတမှုကို တုပနေရာရောက်ပါလိမ့်မည်။—တမန်တော် ၁၀:၃၄၊ ၃၅။

^၁၆ အခြားတစ်ဖက်တွင် ကျမ်းတတ်များနှင့်ဖာရိရှဲများ၏ပုံသက်သေက ကျွန်ုပ်တို့သည် ဘုရားသခင်၏တရားမျှတမှုကိုတင်ပြပါက “လွန်ကျူးစွာမဖြောင့်မတ်” သင့်ကြောင်း သတိပေး၏။ (ဒေသနာ ၇:၁၆) အထင်ကြီးခံရရန် ဖြောင့်မတ်ဟန်ပြခြင်းဖြင့် သို့မဟုတ် လူတို့စီရင်သောပညတ်များကို အရေးတကြီးထားလွန်းခြင်းဖြင့် ဘုရားသခင့်မျက်နှာသာတော်ရမည်မဟုတ်ချေ။—မဿဲ ၆:၁။

၁၇။ ဘုရားသခင်ရေးရာတရားမျှတမှုကိုကျင့်သုံးရန် အဘယ်ကြောင့်အလွန်အရေးကြီးသနည်း။

^၁၇ ယေရှုသည် ဘုရားသခင့်တရားမျှတမှုသဘောကို လူအမျိုးမျိုးတို့အားရှင်းလင်းဖော်ပြသည့်အကြောင်းတစ်ခုမှာ ထိုအရည်အချင်းကို တပည့်တော်အားလုံး ပြသနိုင်ကြရန်ဖြစ်သည်။ ယင်းသည် အဘယ်ကြောင့်အလွန်အရေးကြီးသနည်း။ ကျမ်းစာက “ဘုရားသခင်ကျင့်တော်မူသည်နည်းတူကျင့်ကြ” ရန်ကျွန်ုပ်တို့ကိုတိုက်တွန်းထားပြီး ဘုရားသခင့်နည်းလမ်းတော်အားလုံးတို့သည်လည်း တရားမျှတ၏။ (ဧဖက် ၅:၁) အလားတူပင် ယေဟောဝါ၏တောင်းဆိုချက်များအနက်တစ်ခုမှာ ဘုရားသခင်နှင့်အတူ ကျွန်ုပ်တို့လျှောက်ကြစဉ် “တရားသဖြင့်ကျင့်ရန်” ဖြစ်ကြောင်း မိက္ခာ ၆:၈ ကရှင်းပြသည်။ ထို့အပြင် ယေဟောဝါ၏အမျက်ထွက်ရာနေ့အတွင်း ပုန်းရှောင်ရာကိုတွေ့လိုလျှင် ထိုနေ့မတိုင်မီ “ဖြောင့်မတ်ခြင်းကိုရှာ” ကြရမည်ဖြစ်ကြောင်း ဇေဖနိ ၂:၂၊ ၃ ကကျွန်ုပ်တို့ကိုသတိပေးထားသည်။

၁၈။ နောက်ဆောင်းပါးတွင် အဘယ်မေးခွန်းများကိုဖြေဆိုမည်နည်း။

^၁၈ ထို့ကြောင့် ဤခဲယဉ်းသည့်နောက်ဆုံးနေ့ရက်များသည် တရားမျှတမှုကိုကျင့်သုံးရန် ‘အထူးနှစ်သက်ဖွယ်သောအချိန်’ ဖြစ်သည်။ (၂ ကောရိန္သု ၆:၂) ကျွန်ုပ်တို့သည် ယောဘကဲ့သို့ ‘ဖြောင့်မတ်ခြင်းအဝတ်’ ကိုဝတ်ဆင်ပြီး ‘တရားမျှတမှုဝတ်လုံ’ ကိုဝတ်လျှင် ယေဟောဝါသည် ကျွန်ုပ်တို့ကိုကောင်းချီးပေးပါလိမ့်မည်။ (ယောဘ ၂၉:၁၄) ယေဟောဝါ၏တရားမျှတမှုကို ယုံကြည်အားထားခြင်းသည် အနာဂတ်ကိုယုံကြည်စိတ်ချစွာရှုမျှော်ရန် ကျွန်ုပ်တို့ကိုမည်သို့ကူညီပေးမည်နည်း။ ထို့အပြင် ဖြောင့်မတ်ခြင်းတည်ရာ “မြေကြီးသစ်” ကိုစောင့်မျှော်နေကြစဉ် ဘုရားသခင်ရေးရာတရားမျှတမှုသည် ဝိညာဉ်ရေးအရ ကျွန်ုပ်တို့ကို မည်သို့ကာကွယ်ပေးသနည်း။ (၂ ပေတရု ၃:၁၃) နောက်ဆောင်းပါးက ဤမေးခွန်းများကိုဖြေဆိုပေးပါလိမ့်မည်။

[အောက်ခြေမှတ်ချက်များ]

သင်ရှင်းပြနိုင်သလော

◻ ဘုရားသခင့်တရားမျှတမှု၏အဓိပ္ပာယ်ကားအဘယ်နည်း။

◻ ယေရှုသည် တရားမျှတမှုကို လူမျိုးများအား မည်သို့သင်ပေးခဲ့သနည်း။

◻ ဖာရိရှဲများ၏ဖြောင့်မတ်ခြင်းသည် အဘယ်ကြောင့်လွဲမှားခဲ့သနည်း။

◻ ကျွန်ုပ်တို့သည် တရားမျှတခြင်းကိုကျင့်သုံးရန် အဘယ်ကြောင့်လိုသနည်း။

[စာမျက်နှာ ၈ ပါ ရုပ်ပုံ]

ယေရှုသည် ဘုရားသခင့်တရားမျှတမှုနယ်ပယ်ကို ရှင်းလင်းဖော်ပြခဲ့