“သမ္မာတရားဖြစ်သောနှုတ်ကပါဌ်တော်ကို မှန်ကန်စွာကိုင်တွယ်”

ဘုရားသခင်၏နှုတ်ကပါဌ်တော်သည် အောင်မြင်သော ဘဝအသက်တာအတွက် အရေးပါသည့်ကျင့်စဉ်မူများစုဆောင်းထားရာ ရတနာသိုက်ဖြစ်သည်။ ၎င်းသည် သွန်သင်ရန်၊ ဆုံးမရန်၊ ပြုပြင်ရန် ဓမ္မအမှုဆောင်တစ်ဦးကို အကူအညီပေးသည်။ (၂ တိမောသေ ၃:၁၆၊ ၁၇) သို့ရာတွင် ဘုရားသခင်ပေးသနားတော်မူသော ဤမြင့်မြတ်လှသည့်လမ်းပြမှုမှ အကျိုးအပြည့်အဝခံစားရရန် တိမောသေအား တမန်တော်ပေါလုပေးခဲ့သည့် ဩဝါဒစကားကို ကျွန်ုပ်တို့လိုက်နာကြရမည်– “သင်မူကား ဝန်ခံတော်မူသောသူ၊ ရှက်ကြောက်စရာအကြောင်း မရှိဘဲ သမ္မာတရားဖြစ်သောနှုတ်ကပါဌ်တော်ကို မှန်ကန်စွာ ကိုင်တွယ်သော အမှုဆောင်ဖြစ်လျက် ဘုရားသခင့်မျက်နှာသာရသူအဖြစ် မိမိကိုယ်ကို ဆက်သခြင်းငှာ ကြိုးစားအားထုတ်လော့။”—၂ တိမောသေ ၂:၁၅၊ ကဘ။

ဘုရားသခင့်နှုတ်ကပါဌ်တော်ကို အာဟာရရှိသောနို့၊ ကြေခဲသောအစာ၊ လန်းဆန်း၍ သန့်ရှင်းစေသောရေ၊ ကြည့်မှန်နှင့် ထက်သောသန်လျက်စသည်တို့နှင့် နှိုင်းယှဉ်ထားသည်။ ဤဝေါဟာရများသည် အဘယ်အရာကိုဆိုလိုကြောင်း သိနားလည်ထားခြင်းက ဓမ္မအမှုဆောင်တစ်ဦးအား သမ္မာကျမ်းစာကို ကျွမ်းကျင်လိမ္မာစွာ အသုံးပြုစေသည်။

ဘုရားသခင့်နှုတ်ကပါဌ်တော်ဆိုင်ရာနို့ကို ထုတ်ပေးခြင်း

နို့ရည်သည် မွေးကင်းစကလေးများလိုအပ်သည့်အစာဖြစ်သည်။ သူငယ်ကြီးပြင်းလာလေ ကြေခဲသောအစာကို တဖြည်းဖြည်း စကျွေးပေးရသော်လည်း အစကနဦးတွင် နို့ကိုသာ သူသုံးဆောင်နိုင်သည်။ ဘုရားသခင့်နှုတ်ကပါဌ်တော်ကို မသိကျွမ်းသူများသည် ကိစ္စအဝဝတွင် နို့စို့သူငယ်များနှင့်တူသည်။ တစ်ဦးတစ်ယောက်သည် ဘုရားသခင့်နှုတ်ကပါဌ်တော်ကို စိတ်ဝင်စားခါစလူသစ်ဖြစ်စေ၊ ယင်းနှင့် အတန်ကြာ အကျွမ်းဝင်နေသူဖြစ်စေ ဤသူသည် သမ္မာကျမ်းစာ၏ အခြေခံတရားမျှသာ သိရှိမည်ဆိုလျှင် ဝိညာဏသူငယ်ဖြစ်၍ ကြေလွယ်သောအစာ—ဝိညာဏ “နို့” ကိုသာသုံးဆောင်နိုင်မည်။ သူသည် ဘုရားသခင့်နှုတ်ကပါဌ်တော်၏ နက်နဲရာများဖြစ်သည့် “ကြေခဲသောအစာ” ကိုမသုံးဆောင်နိုင်သေးချေ။—ဟေဗြဲ ၅:၁၂။

ပေါလုက “သင်တို့သည် ခဲဖွယ်စားဖွယ်ကို မကြေနိုင်သောကြောင့် ငါမကျွေးရ၊ နို့ကိုသာတိုက်ရ၏” ဟုတည်ခါစ ကောရိန္သုအသင်းတော်ထံ စာရေးချိန်တွင် ထိုသို့သောအခြေအနေမျိုး၌ရှိသည်။ (၁ ကောရိန္သု ၃:၂) ကောရိန္သုအသင်းသားများသည် “ဘုရားသခင်၏ဗျာဒိတ်တော်၌ ရှေ့ဦးစွာသင်ရသော တရားနုတို့ကို” ဦးဆုံးသင်ယူရန် လိုအပ်နေသည်။ (ဟေဗြဲ ၅:၁၂) သူတို့၏ကြီးထွားလာသည့်အဆင့်တွင် “ဘုရားသခင်၏နက်နဲသောအရာ” များကို ကျေညက်နိုင်ဦးမည်မဟုတ်ပါ။—၁ ကောရိန္သု ၂:၁၀။

ပေါလုနည်းတူ ယနေ့ ခရစ်ယာန်ဓမ္မအမှုဆောင်များသည် ဝိညာဏကလေးသူငယ်များကို ဂရုစိုက်ပြီး အခြေခံ ခရစ်ယာန်အယူဝါဒတွင် အုတ်မြစ်ခိုင်မြဲစေခြင်းဖြင့် “နို့” ကိုတိုက်ကျွေးကြသည်။ ဤနည်းဖြင့် ထိုသို့သောလူသစ်များ သို့မဟုတ် မရင့်ကျက်သူများကို “နှုတ်ကပါဌ်တရားတော်၏နို့စစ် . . . ကိုအလွန်လိုချင်သောစိတ်ရှိ” လာစေရန် အားပေးတိုက်တွန်းကြသည်။ (၁ ပေတရု ၂:၂) လူသစ်များကို အထူးဂရုစိုက်ရန်လိုကြောင်း တမန်တော်ပေါလုသိမြင်သဖြင့် ဤကဲ့သို့ရေးသားခဲ့ခြင်းဖြစ်သည်– “နို့ကိုသာသုံးဆောင်သောသူမည်သည်ကား၊ သူငယ်ဖြစ်သောကြောင့် ဖြောင့်မတ်ခြင်းတရား၌ လေ့လာခြင်းမရှိ။” (ဟေဗြဲ ၅:၁၃) ဘုရားသခင်၏အမှုတော်ဆောင်များသည် ဘုရားသခင့်နှုတ်ကပါဌ်တော်၏နို့စစ်ကို အိမ်တွင်းကျမ်းစာသင်အံမှုများနှင့် အသင်းတော်တွင်ကား လူသစ်များဖြစ်စေ၊ အတွေ့အကြုံနည်းသူများဖြစ်စေ တိုက်ကျွေးရာတွင် စိတ်ရှည်မှု၊ စာနာမှု၊ နားလည်မှု၊ နူးညံ့သိမ်မွေ့မှုရှိဖို့လိုသည်။

ဘုရားသခင့်နှုတ်ကပါဌ်တော်၏ ကြေခဲသောအစာကို ကိုင်တွယ်ခြင်း

ကယ်တင်ခြင်းရရန် တိုးတက်ကြီးထွားဖို့အတွက် ခရစ်ယာန်တစ်ဦးသည် “နို့” ထက်မကသုံးဆောင်ရန်လိုသည်။ သမ္မာကျမ်းစာ၏ အဓိကသမ္မာတရားများကို ရှင်းလင်းပြတ်သားစွာ နားလည်ပြီး လက်ခံနာယူနေပြီဆိုလျှင် ‘စုံလင်သောအရွယ်ရှိသူများ သုံးဆောင်ရာ ကြေခဲသောအစာအာဟာရကို’ ဆက်ခံယူရန် အသင့်ရှိလေပြီ။ (ဟေဗြဲ ၅:၁၄) ယင်းကို သူမည်သို့ပြုလုပ်နိုင်မည်နည်း။ အခြေခံအနေနှင့် ကိုယ်ပိုင်လေ့လာမှုကိုမှန်မှန်လုပ်ခြင်း၊ ခရစ်ယာန်အစည်းအဝေးများကို မှန်မှန်တက်ခြင်းအားဖြင့်ဖြစ်သည်။ ဤကဲ့သို့သော အကျင့်ကောင်းများသည် ခရစ်ယာန်တစ်ဦးအား ဝိညာဏခွန်အားရှိသော ရင့်ကျက်သူတစ်ဦးဖြစ်စေပြီး ဓမ္မအမှုတွင် ထိရောက်မှုရှိစေပါမည်။ (၂ ပေတရု ၁:၈) အသိပညာအပြင် ယေဟောဝါ၏အလိုတော်ကိုဆောင်ခြင်းသည် ဝိညာဉ်အစာအဝင်ဖြစ်ကြောင်းကိုလည်း ကျွန်ုပ်တို့မမေ့သင့်ပါ။—ယောဟန် ၄:၃၄။

ယနေ့ ဘုရားသခင်၏ကျေးကျွန်များကို အခန့်သင့်အစာကျွေးမွေးရန်နှင့် “ဘုရားသခင်၏ ထူးဆန်းသောပညာတော်ကို” သဘောပေါက်ရန် အကူအညီပေးဖို့အတွက် “သစ္စာနှင့်သတိပညာရှိသောကျွန်” ကိုခန့်အပ်ထားသည်။ ယေဟောဝါသည် ကိုယ်တော်၏ဝိညာဉ်တော်အားဖြင့် ဤသစ္စာရှိကျွန်မှတစ်ဆင့် နက်နဲသော ကျမ်းဆိုင်ရာသမ္မာတရားကို ဖော်ပြတော်မူသည်။ ၎င်းသည်လည်း “အချိန်တန်လျှင်အစားအသောက်” ကိုသစ္စာရှိရှိ ထုတ်ဝေပေး၏။ (မဿဲ ၂၄:၄၅-၄၇၊ သမ; ဧဖက် ၃:၁၀၊ ၁၁; ဗျာဒိတ် ၁:၁၊ ၂ နှိုင်းယှဉ်။) ခရစ်ယာန်တစ်ဦးစီသည် ဤသို့သော ပုံနှိပ်ထုတ်ဝေပြင်ဆင်ပေးချက်များကို အပြည့်အဝအသုံးပြုရကြမည်ဖြစ်သည်။—ဗျာဒိတ် ၁:၃။

သမ္မာကျမ်းစာတွင် ရင့်ကျက်သောခရစ်ယာန်များပင် နားလည်ရန် “ခက်ခဲသောအရာအချို့” ရှိ၏။ (၂ ပေတရု ၃:၁၆) များစွာဖတ်ရှုလေ့လာ၊ ဆင်ခြင်သုံးသပ်ဖို့လိုသော နက်နဲသည့်ပြောဆိုချက်များ၊ ပရောဖက်ပြုချက်များနှင့် ပုံဥပမာများရှိသည်။ သို့ဖြစ်သောကြောင့် ကိုယ်ပိုင်လေ့လာမှုပြုလုပ်ရာတွင် ဘုရားသခင့်နှုတ်ကပါဌ်တော်ကို တူးဖော်လေ့လာဖို့လိုသည်။ (သု. ၁:၅၊ ၆; ၂:၁-၅) အထူးသဖြင့် အကြီးအကဲများသည် အသင်းတော်ကိုသွန်သင်ပေးသည့်အခါ ဤသို့ပြုလုပ်ရန် တာဝန်ရှိသည်။ အသင်းတော်စာအုပ်ကြီးသင်တန်း သို့မဟုတ် ကင်းမျှော်စင်သင်တန်းကို ကိုင်တွယ်ရာတွင်ဖြစ်စေ၊ လူထုဟောပြောချက်များပေးရာတွင်ဖြစ်စေ သို့မဟုတ် အခြားမည်သည့်သွန်သင်ပေးမှုကိုမဆို ပြုသည်ဖြစ်စေ အကြီးအကဲများသည် မိမိတို့ဟောပြောသောအကြောင်းအရာကို စေ့ငသေချာစွာ သိကျွမ်းသင့်သည်။ အသင်းတော်အား ကြေခဲသောဝိညာဉ်အစာကို ကျွေးမွေးစဉ် သူတို့၏ “သွန်သင်မှုနည်းပညာ” ကိုဂရုပြုရန် အသင့်ရှိသင့်သည်။—၂ တိမောသေ ၄:၂၊ ကဘ။

လန်းဆန်းမှုပေးပြီး သန့်ရှင်းစေသောရေ

ရေတွင်းအနီးရှိ ရှမာရိအမျိုးသမီးအတွက် “ထာဝရအသက်ရှင်ခြင်းအလိုငှာ ထွက်သောစမ်းရေဖြစ်လိမ့်” မည့်ရေကို ယေရှုတိုက်မည်ဟူ၍ ကိုယ်တော်မိန့်တော်မူခဲ့သည်။ (ယောဟန် ၄:၁၃၊ ၁၄; ၁၇:၃) ဤအသက်ပေးသောရေတွင် ဘုရားသခင်၏သိုးသငယ်မှတစ်ဆင့် အသက်ရစေသော ဘုရားသခင့်ပြင်ဆင်ချက်အားလုံးပါဝင်သည်။ ဤပြင်ဆင်ချက်များအကြောင်းကို သမ္မာကျမ်းစာတွင်ရှင်းပြထားသည်။ ထို “ရေ” ကိုဆာငတ်သူများအနေနှင့် “အဖိုးကိုမပေးဘဲ အသက်ရေကိုယူ” ရန် ဝိညာဉ်တော်နှင့် ခရစ်တော်၏မင်္ဂလာဆောင်သတို့သမီး၏ ဖိတ်ခေါ်ချက်ကို ကျွန်ုပ်တို့လက်ခံကြသည်။ (ဗျာဒိတ် ၂၂:၁၇) ဤရေကို သောက်သုံးခြင်းအားဖြင့် ထာဝရအသက်ရနိုင်သည်။

ထို့ပြင် သမ္မာကျမ်းစာသည် ခရစ်ယာန်စစ်များလိုက်လျှောက်ရမည့် စာရိတ္တနှင့် ဝိညာဏစံနှုန်းများကို ချမှတ်ပေးသည်။ ဤမြင့်မြတ်သောစံနှုန်းများကို ကျွန်ုပ်တို့လိုက်လျှောက်ကျင့်သုံးသည်နှင့်အမျှ ယေဟောဝါ၏နှုတ်ကပါဌ်တော်အားဖြင့် သန့်ရှင်းစင်ကြယ်လာပြီး ယေဟောဝါဘုရားသခင် ရွံမုန်းသောအကျင့်များအားလုံးမှ “ဆေးကြောသန့်ရှင်း” ခြင်းခံရကြသည်။ (၁ ကောရိန္သု ၆:၉-၁၁) ယင်းကြောင့် မှုတ်သွင်းခံနှုတ်ကပါဌ်တော်ရှိ သမ္မာတရားကို ‘ဆေးကြောရေ’ ဟူ၍ခေါ်ဆိုထားခြင်းဖြစ်သည်။ (ဧဖက် ၅:၂၆) ဘုရားသခင့်သမ္မာတရား၏ ဆေးကြောသန့်စင်ပေးမှုကို ဤနည်းအတိုင်းမခံယူလျှင် ကျွန်ုပ်တို့၏ဝတ်ပြုမှုကို ကိုယ်တော်လက်ခံတော်မူမည်မဟုတ်ပါ။

စိတ်ဝင်စားစရာကား “သမ္မာတရားဖြစ်သောနှုတ်ကပါဌ်တော်ကို မှန်ကန်စွာကိုင်တွယ်သော” အကြီးအကဲများအားလည်း ရေနှင့်နှိုင်းယှဉ်ထားသည်။ သူတို့သည် “သွေ့ခြောက်သောမြေ၌စီးသော ချောင်းရေကဲ့သို့” ဖြစ်သည်ဟု ဟေရှာယပြောသည်။ (ဟေရှာယ ၃၂:၁၊ ၂) မေတ္တာရှိအကြီးအကဲများသည် ဝိညာဏသိုးထိန်းများအဖြစ် ညီအစ်ကိုများထံလည်ပတ်ပြီး ခွန်အားပြည့်ဝစေသည့် ဝိညာဉ်ရေးရာများကိုပြောဆို၍ အားပေးတည်ဆောက်နှစ်သိမ့်ပေးရန် ဘုရားသခင်၏ လန်းဆန်းစေသော နှုတ်ကပါဌ်တော်ကို အသုံးပြုသည့်အခါ ဖော်ပြပါအတိုင်းဖြစ်ကြသည်။—မဿဲ ၁၁:၂၈၊ ၂၉ နှိုင်းယှဉ်။a

အသင်းတော်သားများသည် အကြီးအကဲများ လည်ပတ်မှုကို စောင့်မျှော်တတ်ကြသည်။ “အကြီးအကဲများဟာ ဘယ်လောက်နှစ်သိမ့်မှုပေးတတ်တယ်ဆိုတာကို ကျွန်မသိတယ်။ ဒီအစီအစဉ်ကို ယေဟောဝါစီစဉ်ပေးထားတဲ့အတွက် သိပ်ကျေးဇူးတင်တာပဲ” ဟုဘောန်နီကပြောပြသည်။ ကြင်ဖော်မဲ့မိခင်ဖြစ်သူ လင်ဒါက ဤသို့ရေးသားသည်– “အကြီးအကဲများဟာ ကျမ်းချက်တွေကို ဖတ်ပြပြီး ရင်ဆိုင်နိုင်ဖို့ ကျွန်မကိုအားပေးတယ်။ ဂရုစိုက်နားထောင်ပြီး စာနာမှုလည်းပြကြတယ်။” မိုက်ကယ်လ်က ဤသို့ပြောသည်– “ကျွန်တော်ဟာ ဂရုစိုက်ကြည့်ရှုတဲ့အဖွဲ့အစည်းအဝင်တစ်ယောက်ဖြစ်တယ်လို့ ခံစားမိတယ်။” “အကြီးအကဲတွေရဲ့လည်ပတ်မှုတွေက ကျွန်မအရမ်းစိတ်ဓာတ်ကျတဲ့အချိန်တွေကို အောင်မြင်ကျော်လွှားနိုင်စေတယ်” ဟုအခြားတစ်ဦးကပြောသည်။ ဝိညာဏမြှင့်တင်မှုပေးသည့် အကြီးအကဲတစ်ဦး၏လည်ပတ်မှုသည် လန်းဆန်းစေသော ရေအေးတစ်ခွက်နှင့်တူသည်။ ကျမ်းစာမူများသည် သူတို့၏အခြေအနေနှင့် မည်သို့သက်ဆိုင်ကြောင်းကို သဘောပေါက်ရန် မေတ္တာရှိအကြီးအကဲများကူညီပေးသည့်အခါ သိုးကဲ့သို့သောသူများသည် နှစ်သိမ့်မှုရရှိကြသည်။—ရောမ ၁:၁၁၊ ၁၂; ယာကုပ် ၅:၁၄။

ဘုရားသခင်၏နှုတ်ကပါဌ်တော်ကို ကြည့်မှန်အဖြစ်အသုံးပြု

ကြေခဲသောအစာကို စားသုံးခြင်းသည် အရသာခံဖို့အတွက်သာမဟုတ်ပါ။ သို့အစား လုပ်ကိုင်ဆောင်ရွက်နိုင်ရန် အာဟာရရှိလိုပါသည်။ သူသည် ကလေးသူငယ်တစ်ဦးဖြစ်လျှင် အစာစားခြင်းအားဖြင့် လူကြီးတစ်ဦးဖြစ်လာပါမည်။ ဝိညာဉ်အစာလည်း ထို့အတူပင်ဖြစ်သည်။ ကိုယ်ပိုင်လေ့လာမှုသည် ပျော်ရွှင်စရာဖြစ်စေနိုင်သည်။ သို့သော် ထိုအတွက်သာမဟုတ်ပါ။ ဝိညာဉ်အစာသည် ကျွန်ုပ်တို့ကို ပြုပြင်ပြောင်းလဲစေသင့်သည်။ ယင်းသည် ဝိညာဉ်အသီးများကို သိမြင်စေ၍ ၎င်းကိုသီးပွင့်စေသည်။ “ဖန်ဆင်းတော်မူသောသူ၏ပုံသဏ္ဌာန်နှင့်အညီ မှန်သောပညာအားဖြင့် အသစ်ပြုပြင်သောလူသစ်ကို ယူတင်ဝတ်ဆောင်သောသူဖြစ်” စေရန် ထောက်ကူပေးသည်။ (ကောလောသဲ ၃:၁၀; ဂလာတိ ၅:၂၂-၂၄) ဝိညာဉ်အစာသည် ကျွန်ုပ်တို့အား ရင့်ကျက်လာစေရန်လည်းကူညီပေးသည်။ ကျွန်ုပ်တို့၏ပြဿနာများကိုဖြစ်စေ၊ သူတစ်ပါး၏ပြဿနာများကိုဖြစ်စေ ကိုင်တွယ်ဖြေရှင်းရာတွင် ကျမ်းစာမူများကို ပိုကျွမ်းကျင်စွာ အသုံးပြုနိုင်စေသည်။

သမ္မာကျမ်းစာသည် ကျွန်ုပ်တို့အပေါ် ထိုသို့အကျိုးသက်ရောက်နေကြောင်း မည်သို့ဆိုနိုင်သနည်း။ ကျမ်းစာကို ကြည့်မှန်အဖြစ် ကျွန်ုပ်တို့အသုံးပြုကြသည်။ ယာကုပ်က ဤသို့ဆိုသည်– “နှုတ်ကပါဌ်တရားကို နာရုံမျှသာပြုသောသူမဟုတ်၊ တရားကိုကျင့်သောသူ ဖြစ်ကြလော့။ တရားကိုမကျင့်ဘဲ နာရုံမျှသာပြုသောသူမည်သည်ကား မှန်၌ မိမိပကတိမျက်နှာကိုကြည့်သောသူနှင့်တူ၏။ အကြောင်းမူကား ကိုယ်ကိုကိုယ်ကြည့်ပြီးမှ အခြားသို့သွား၍ မိမိအဆင်းသဏ္ဌာန်ကို ချက်ချင်းမေ့လျော့တတ်၏။ လွှတ်ခြင်းနှင့်စပ်ဆိုင်၍ စုံလင်သောတရား၌ စေ့စေ့ကြည့်ရှု၍ တည်ကြည်သောသူမူကား တရားနာ၍ မေ့လျော့သောသူမဟုတ်၊ အကျင့်ကျင့်သောသူဖြစ်သဖြင့် မိမိကျင့်သောအကျင့်၌ မင်္ဂလာရှိသောသူဖြစ်၏။”—ယာကုပ် ၁:၂၂-၂၅။

ဘုရားသခင်၏နှုတ်ကပါဌ်တော်ကို ကျွန်ုပ်တို့အသေအချာစစ်ဆေးပြီး ကျွန်ုပ်တို့ဖြစ်နေသည့်လူတန်းစားနှင့် နှုတ်ကပါဌ်တော်တွင်ပါသော ဘုရားသခင့်စံနှုန်းအတိုင်း ဖြစ်သင့်သောလူတန်းစားကို နှိုင်းယှဉ်ကြည့်သည့်အခါ “စေ့စေ့ကြည့်ရှု” ကြသည်။ ဤသို့ပြုခြင်းအားဖြင့် ကျွန်ုပ်တို့သည် ‘နှုတ်ကပါဌ်တရားကို နာရုံမျှသာပြုသောသူမဟုတ်၊ ကျင့်သောသူဖြစ်’ လိမ့်မည်။ သမ္မာကျမ်းစာသည် ကျွန်ုပ်တို့ကို ကောင်းစွာအကျိုးပြုပါလိမ့်မည်။

ဓားအဖြစ် ဘုရားသခင့်နှုတ်ကပါဌ်တော်

နောက်ဆုံး၊ တမန်တော်ပေါလုသည် ဘုရားသခင့်နှုတ်ကပါဌ်တော်ကို ဓားအဖြစ် ကျွန်ုပ်တို့မည်သို့အသုံးပြုနိုင်ကြောင်း သဘောပေါက်စေရန် အကူအညီပေးသည်။ “အထွတ်အမြတ်တို့နှင့်လည်းကောင်း၊ အာဏာစက်တို့နှင့်လည်းကောင်း၊ လောကီမှောင်မိုက်၌ အစိုးတရပြုလုပ်သောမင်းတို့နှင့်လည်းကောင်း၊ မိုးကောင်းကင်၌နေသော နတ်ဆိုးတို့နှင့်လည်းကောင်း ဆိုင်ပြိုင်တိုက်လှန်” ခြင်းအကြောင်း သတိပေးချိန်တွင် “ဘုရားသခင်၏နှုတ်ကပါဌ်တည်းဟူသော ဝိညာဉ်တော်၏ဓားကို . . . ယူ” ရန် တိုက်တွန်းသည်။ (ဧဖက် ၆:၁၂၊ ၁၇) ဘုရားသခင့်နှုတ်ကပါဌ်တော်သည် “ဘုရားသခင်ကိုသိသောပညာကို ဆီးတားသော” မည်သည့်အယူအဆများကိုမဆိုဖယ်ရှားပစ်ရန် မရှိမဖြစ်သောလက်နက်ဖြစ်သည်။—၂ ကောရိန္သု ၁၀:၃-၅။

“ဘုရားသခင်၏နှုတ်ကပါဌ်တရားတော်သည် အသက်ရှင်ခြင်း၊ တန်ခိုးနှင့်ပြုပြင်ခြင်း” အစွမ်းရှိသည်ကို ယုံမှားဖွယ်မရှိပါ။ (ဟေဗြဲ ၄:၁၂) ယေဟောဝါသည် ကိုယ်တော်၏ မှုတ်သွင်းခံနှုတ်ကပါဌ်တော်အားဖြင့် လူသားတို့ကို မိန့်တော်မူသည်။ သူတစ်ပါးကို သွန်သင်ပေးရာတွင်လည်းကောင်း၊ မှောက်မှားသောအယူအဆများကို ဖော်ထုတ်ရာတွင်လည်းကောင်း ယင်းကို ကောင်းစွာအသုံးပြုပါ။ အခြားသူတို့ကို အားပေးတည်ဆောက်ရန်၊ လန်းဆန်းမှုရရှိစေရန်၊ နှစ်သိမ့်ပေးရန်၊ လှုံ့ဆော်တိုက်တွန်းပြီး ဝိညာဉ်ခွန်အားရှိစေရန် ယင်းကိုအသုံးပြုပါလေ။ ‘ကိုယ်တော်နှစ်သက်တော်မူသောအမှုအရာကို’ သင်အစဉ်အမြဲပြုလုပ်ဆောင်ရွက်နိုင်ရန် ယေဟောဝါသည် “အလိုတော်သို့လိုက်မည်အကြောင်း ကောင်းသောအကျင့်အမျိုးမျိုး၌ သင်တို့ကို ပြုပြင်တော်မူပါစေ။”—ဟေဗြဲ ၁၃:၂၁။

[အောက်ခြေမှတ်ချက်များ]

[စာမျက်နှာ ၃၁ ပါ ရုပ်ပုံ]

အကြီးအကဲတို့သည် “သမ္မာတရားဖြစ်သောနှုတ်ကပါဌ်တော်ကို မှန်ကန်စွာကိုင်တွယ်” ကြရန် သူတစ်ပါးကို အားပေးတိုက်တွန်းကြ၏