ယေဟောဝါ—“စစ်သူရဲဖြစ်တော်မူ၏”

အီဂျစ်စစ်တပ်၏ လက်ရွေးစင်တပ်သည် ဖျက်ဆီးခံခဲ့ရသည်။ ပင်လယ်နီတစ်လျှောက်တွင် မြင်းလှည်းစီးသူရဲနှင့် မြင်းစီးသူရဲများသည် လှိုင်းဒဏ်ကြောင့်မြှောက်ပစ်ခံရကာ စစ်ပစ္စည်းများသည် ကမ်းခြေတွင် ရှုပ်ပွလျက်ရှိသည်။ မောရှေဦးဆောင်သော ဣသရေလများသည် အောင်ပွဲခံသီချင်းသီဆိုလျက် ရွှင်မြူးစွာကခုန်ခဲ့ကြသည်။ “ [ယေဟောဝါ] သည်ဘုန်းပွင့်လျက် အောင်ပွဲခံတော်မူသည်ဖြစ်၍ ကိုယ်တော်အားသီချင်းဆိုပါအံ့။ မြင်းနှင့်မြင်းစီးသူရဲကို ပင်လယ်ထဲသို့ လှဲချတော်မူပြီ။ [ယေဟောဝါ] သည်စစ်သူရဲဖြစ်တော်မူ၏။ [ယေဟောဝါ] တည်းဟူသော နာမတော်ရှိတော်မူ၏။”—ထွက်မြောက်ရာ ၁၅:၁၊ ၃။

ပင်လယ်နီတွင် ယေဟောဝါ၏အောင်ပွဲသည် စစ်မှုတွင်အမှန်ပင် ကိုယ်တော်၏ကြီးမြတ်မှုကို ဖော်ပြခြင်းဖြစ်လေသည်။ ဣသရေလများသည် အီဂျစ်မှတပ်အစဉ်အတိုင်း ထွက်လာခဲ့သည်။ သို့သော်တိုက်ခိုက်စွမ်းရည် အနည်းငယ်သာရှိလေသည်။ ညဘက်တွင်မီးတိုင်ဖြစ်လာသော မိုးတိမ်တိုင်အားဖြင့် ယေဟောဝါသည်သူတို့အား ရာမသက်မြို့မှ ဧသံမြို့ “တောအနား” သို့ခေါ်ဆောင်သွားခဲ့သည်။ (ထွက်မြောက်ရာ ၁၂:၃၇။ ၁၃:၁၈၊ ၂၀-၂၂) သို့နှင့်ယေဟောဝါကမောရှေအား “ဣသရေလအမျိုးသားတို့သည်လည်၍၊ ပိဟဟိရုတ်မြို့နား၊ မိဂဒေါလမြို့နှင့် ပင်လယ်စပ်ကြား၊ ဗာလဇေဖုန်မြို့ရှေ့မှာ တပ်ချစေခြင်းငှာမှာလိုက်လော့။ . . . ဖါရောဘုရင်က ‘ဣသရေလအမျိုးသားတို့သည် ကျဉ်းကျုပ်ရာသို့ ရောက်ကြပြီ၊ တောလမ်းပိတ်လျက်ရှိ၏’ ဟုဆိုလိမ့်မည်။ . . . သူသည်ဣသရေလတို့ကို လိုက်လိမ့်မည်” ဟုမိန့်ဆို၏။ (ထွက်မြောက်ရာ ၁၄:၁-၄) နာခံမှုရှိစွာဖြင့်၊ ဣသရေလများသည် ပြန်လှည့်၍ ပိဟဟိရုတ်မြို့သို့ လျှောက်သွားခဲ့ကြသည်။ ဖါရော၏ထောက်လှမ်းရေးသမားများသည် ရှုပ်ထွေးပုံရနေခြင်းကို သတင်းပို့ခဲ့ရာ ကြိုတင်ဟောထားသည့်အတိုင်း ဖါရောသည်နောက်မှလိုက်ရန်အတွက် သူ၏တပ်ကိုစုရုံးခဲ့သည်။—ထွက်မြောက်ရာ ၁၄:၅-၉။

ထောင်ချောက်—ဣသရေလအတွက်လော၊ ဖါရောအတွက်လော

တစ်ဖက်တစ်ချက်တွင် တောင်များဝိုင်းပတ်လျက်၊ ရှေ့တွင်ပင်လယ်ကာဆီးနေကာ ဣသရေလများသည် ပိတ်မိခံနေရသည့်အလားဖြစ်၍ သူတို့သည်ဘုရားရှင်ထံ အကူအညီပေးရန် တောင်းဆိုခဲ့ကြသည်။ လူများကိုအားပေးလျက်မောရှေက “မစိုးရိမ်ကြနှင့်။ ငြိမ်ဝပ်စွာ ရပ်နေကြ။ [ယေဟောဝါ] သည်ယနေ့ပြတော်မူသော ကယ်တင်ခြင်းကို ကြည့်ရှုကြလော့။ သင်တို့သည်ယနေ့မြင်သော အဲဂုတ္တုလူတို့ကို နောက်တစ်ဖန်အလျှင်းမမြင်ရကြ။ သင်တို့ဘက်၌ [ယေဟောဝါ] သည်စစ်တိုက်တော်မူလိမ့်မည်။ သင်တို့သည်ငြိမ်ဝပ်စွာ နေရကြမည်” ဟုဆိုသည်။ (ထွက်မြောက်ရာ ၁၄:၁၀-၁၄) ယင်းကတိတော်နှင့်အညီ “မိုးတိမ်တိုင်သည် သူတို့ရှေ့ကရွှေ့၍ နောက်၌ရပ်နေလေ၏။ ထိုသို့အဲဂုတ္တုတပ်နှင့် ဣသရေလတပ်စပ်ကြားသို့ရောက်လျှင် . . . တစ်ညဉ့်လုံးတပ်တစ်ဦးနှင့်တစ်ဦးမချဉ်းနိုင်” ခဲ့ချေ။—ထွက်မြောက်ရာ ၁၄:၁၅-၂၀။

ယေဟောဝါညွှန်ကြားခဲ့သည့်အတိုင်း၊ မောရှေသည် သူ၏လှံတံကို ပင်လယ်အပေါ်၌မြှောက်ခဲ့ရာ ဣသရေလများ လွတ်မြောက်ရန်အတွက်ရေသည် “ကွဲပြတ်” လေသည်။ သို့နှင့်အံ့ဖွယ်တန်ခိုးဖြစ်ပေါ်ခဲ့လေသည်။ (ထွက်မြောက်ရာ ၁၄:၁၆၊ ၂၁) အားကြီးသောအရှေ့လေသည် ပင်လယ်နီရေကိုခွဲကာ လူမျိုးတစ်ခုလုံးဖြစ်သော သုံးသန်းသောသူများ စစ်တပ်အစဉ်အတိုင်း၊ ဖြတ်သွားနိုင်ရန် ကျယ်ဝန်းသောလမ်းကြောင်းကို ဖြစ်ပေါ်စေခဲ့သည်။ ဣသရေလများ၏ တစ်ဖက်တစ်ချက်တွင် “ပုံ့ပုံ့ကြွ” နေသောရေသည် ဧရာမနံရံကြီးနှစ်ခုသဖွယ် ထောင်လျက်ရှိခဲ့သည်။—ထွက်မြောက်ရာ ၁၅:၈။

ဣသရေလများသည် မီးတိုင်အလင်းရောင်အကူအညီနှင့် လေအားဖြင့်ခြောက်သွေ့နေသော ပင်လယ်မျက်နှာပြင်ပေါ်မှ လွတ်မြောက်သွားခဲ့သည်။ နံနက်တိုင်သော်၊ ဣသရေလများထဲမှ နောက်ဆုံးသူသည် တစ်ဖက်ကမ်းသို့ ရောက်ရှိသွားခဲ့သည်။ “အဲဂုတ္တုလူများ၊ ဖါရောဘုရင်၌ပါသောမြင်းရထား၊ မြင်းစီးသူရဲအပေါင်းတို့သည် ပင်လယ်အလယ်သို့ လိုက်ဝင်ကြ၏။” နောက်မှလိုက်သူများသည် ထောင်ချောက်ထဲသို့ တိုးဝင်ခဲ့ချေပြီတကား။—ထွက်မြောက်ရာ ၁၄:၂၃။

“အဲဂုတ္တုတပ်ကို [ယေဟောဝါ] ကြည့်ရှု၍နှောင့်ယှက်တော်မူ၏။ သူတို့ရထား အသွားခက်စေခြင်းငှာ ရထားဘီးများကို ချို့တဲ့စေတော်မူ၏။” ယခုမောရှေသည် ပင်လယ်အပေါ် သူ၏လက်ကို ဆန့်တန်းခဲ့ရာ ပင်လယ်သည် “ပြန်လာ” ခဲ့လေသည်။ ရေနံရံတို့သည် ပြိုလဲခဲ့ရာ အီဂျစ်သားများကို လွှမ်းမိုးစပြုလေသည်။ သူတို့ပြေးရန် ကြိုးပမ်းခဲ့သည်။ သို့သော် “ [ယေဟောဝါ] သည်သူတို့ကို ပင်လယ်အလယ်၌ လှဲတော်မူ၏။” တစ်ဦးမျှ မလွတ်မြောက်ခဲ့ကြချေ။ ရွှင်မြူးလျက်၊ ဣသရေလများသည် သူတို့၏အောင်ပွဲခံသီချင်းကို ယေဟောဝါထံ သီဆိုခဲ့ကြသည်။—ထွက်မြောက်ရာ ၁၄:၂၄–၁၅:၃။ ဆာလံ ၁၀၆:၁၁။

ယေဟောဝါသည် ယောရှုအတွက်တိုက်ခိုက်

ယေဟောဝါသည် “စစ်သူရဲ” ဖြစ်ကြောင်း ပြသခဲ့လေသည်။ တစ်ခုမှာ အာဣမြို့မှတိုက်ပွဲဖြစ်လေသည်။ မြို့ကိုဦးဆုံးတိုက်ရာတွင် ရှုံးနိမ့်ခဲ့သည်။ အကြောင်းမှာ၊ အာခန်၏ကြီးလေးသော မှားယွင်းမှုကြောင့်ဖြစ်လေသည်။ ယင်းကိစ္စကိုရှင်းလင်းပြီးနောက် ယေဟောဝါသည် ယောရှုအား တိုက်ပွဲအမိန့်များ ထုတ်ပြန်ခဲ့သည်။ ယောရှု ၇:၁၊ ၄၊ ၅၊ ၁၁-၂၆။ ၈:၁၊ ၂။

ယေဟောဝါ၏ညွှန်ကြားချက်ကို လိုက်နာလျက် ညပိုင်းတွင်ယောရှုသည် မြို့၏အနောက်ဘက်အစွန်တွင် တပ်ပုန်းထားလေသည်။ သူ၏ပင်မတပ်ကိုမူ အာဣမြို့အပြင်လေးတွင်ရှိ မြောက်ဘက်တောင်ကြားသို့ ရွှေ့ပြောင်းကာ ရင်ဆိုင်တိုက်ခိုက်ရန် အသင့်ထွက်လာသည်။ အာဣရှိသူများသည် သွေးဆောင်ခံခဲ့ရသည်။ ယခင်တိုက်ခိုက်ခဲ့စဉ် သူတို့၏အောင်မြင်မှုဖြင့် စိတ်တက်ကြွလျက် ရှိနေဆဲဖြစ်သောကြောင့် သူတို့သည် ဣသရေလများကိုမြို့တွင်းမှ တစ်ရှိန်ထိုးထွက်လိုက်ခဲ့ကြသည်။ နောက်ဆုတ်သယောင်ဟန်ဆောင်လျက် ဣသရေလများသည် “တောလမ်း” ဖြင့်ပြေးရာရန်သူများကို အာဣမြို့မှ ကွာမှန်းမသိဘဲ ခွာစေခဲ့ကြသည်။—ယောရှု ၈:၃-၁၇။

သင့်လျော်သောအချိန်၌ ယေဟောဝါကယောရှုအား “သင်ကိုင်သောလှံကို အာဣမြို့သို့ရွယ်လော့။ ထိုမြို့ကိုသင့်လက်သို့ ငါအပ်မည်” ဟုမိန့်ဆိုခဲ့သည်။ အချက်ပြလိုက်သည်နှင့် ကင်းပုန်းရှိလူများသည် မြို့ကိုတိုက်ခိုက်၍ ဓားနှင့်သုတ်သင်ကာ မီးရှို့လေသည်။ မီးခိုးများကို မြင်သောအခါ၊ ပြင်ပရှိရန်သူတပ်များသည် လုံးဝစိတ်ပျက်ခဲ့သည်။ ယောရှုသည် သူ၏နောက်ဆုတ်နေခြင်းမှ တိုက်ခိုက်ခြင်းသို့ပြောင်းလိုက်ရာ ရန်သူများကို သူ၏တပ်နှစ်တပ်ကြားတွင် ပိတ်မိနေစေခဲ့သည်။ လူ့အောင်ပွဲလော။ မဟုတ်ပါ။ နောက်ပိုင်းတွင်၊ ယောရှုသည် ဣသရေလများအား ပြောသကဲ့သို့ “ [ယေဟောဝါ] သည်သင်တို့ဘက်၌ စစ်တိုက်တော်မူ” သောကြောင့် ဣသရေလများ အောင်မြင်ခဲ့ခြင်းဖြစ်လေသည်။—ယောရှု ၈:၁၈-၂၇၊ ၂၃:၃။

ကိရှုန်တိုက်ပွဲ

ယေဟောဝါ၏စစ်စွမ်းရည် သာလွန်ပုံကို မေဂိဒ္ဒေါအနီးရှိ ကိရှုန်တောင်ကြားတွင် ထပ်မံတင်ပြခဲ့လေသည်။ ခါနာန်ဘုရင်ယာဘိန်သည် ဣသရေလများကိုအနှစ် ၂၀ ဖိနှိပ်ခဲ့သည်။ သိသရ၏တပ်တွင် သံတံစဉ်ဘီးတပ်ထားသောစစ်ရထား ၉၀၀ ပါဝင်ကာ ထိုအချိန်ကအရှုံးမရှိနိုင်ဟု ထင်မြင်ကြသောတပ်ဖြစ်သည်။—တရားသူကြီး ၄:၁-၃။

သို့ပင်ငြားလည်း၊ ပရောဖက်မ ဒေဗောရအားဖြင့် ယေဟောဝါသည် တရားသူကြီးဗာရက်အား ယာဘိန်၏တပ်များကို စိန်ခေါ်ရန် တာဗော်တောင်ပေါ်တွင် စစ်သူရဲတစ်သောင်းကို စုရုံးစေရန် မိန့်ဆိုခဲ့လေသည်။ သိသရသည်ဟာရောရှက်မြို့မှတာဗော်တောင်နှင့် မေဂိဒ္ဒေါကြားရှိကိရှုန်တောင်ကြားသို့ တစ်ဟုန်တိုးသွားရောက်ခဲ့လေသည်။ ဤမြေညီတွင် စစ်တန်ဆာညံ့ဖျင်းသော ဣသရေလခြေလျင်တပ်သားများသည် သူ၏ရထားဒဏ်ကို ခံနိုင်စရာအကြောင်းမရှိဟု သူအမှန်ပင်စဉ်းစားခဲ့ပေမည်။ သို့သော်သူသည် ကောင်းကင်တပ်ကိုစစ်တိုက်နေကြောင်း မသိမှတ်ခဲ့ချေ။—တရားသူကြီး ၄:၄-၇၊ ၁၂၊ ၁၃။

ယေဟောဝါသည် ဗာရက်အား တပ်စွဲထားသောတာဗော်တောင်မှ တောင်ကြားမြေပြင်သို့ သွားရောက်ရန်မိန့်မှာခဲ့ပြီး၊ သိသရ၏တပ်များတိုက်ခိုက်ရန် သွေးဆောင်မှုဖြစ်စေခဲ့သည်။ သို့နှင့်ယေဟောဝါ တိုက်ခိုက်လေတော့သည်။ ရုတ်တရက်ရေကြီးမှုသည် စစ်မြေပြင်ကိုဗွက်တောဖြစ်စေကာ သိသရ၏တပ်များကို ကစဉ့်ကလျားဖြစ်စေသည်။ ရှုပ်ထွေးနေစဉ် ဣသရေလ၏ခြေလျင်စစ်သားများသည် သူတို့၏ရန်သူများကို လွယ်လင့်တကူပင် အပြတ်ရှုံးနိမ့်စေခဲ့သည်။ “သိသရစစ်သူရဲအပေါင်းတို့သည် တစ်ယောက်မျှမကျန်ကြွင်း ဓားနှင့်သေကြကုန်၏။” ကိရှုန်မြစ်၏လွှမ်းသောရေများသည် ခါနာန်မြင်းလှည်းများကို နွံနစ်စေခဲ့ပြီး၊ အလောင်းအချို့ကိုပင် မျောသွားစေခဲ့ပေမည်။—တရားသူကြီး ၄:၁၄-၁၆။ ၅:၂၀၊ ၂၁။

ဂေါဂနှင့်သူ၏အုပ်စုအပေါ်အောင်ပွဲ

ဤရှေးဖြစ်ရပ်များသည် လာလတံ့သော ယေဟောဝါ၏အကြီးမားဆုံးအောင်ပွဲကို ပုံတင်ပြခဲ့လေသည်။ ဖြစ်ပေါ်လာတော့မည့်စစ်ပွဲသည် “နောက်ဆုံးအချိန်” (NW) ၌ဖြစ်မည့်အရာဖြစ်သည်။ ယေဇကျေလ၏ပရောဖက်ပြုချက်အရ “ဤလောကကိုအစိုးရသောမင်း” ကိုပုံဆောင်သောဂေါဂစာတန်မာရ်နတ်သည် အပြည်ပြည်ဆိုင်ရာ တိုက်ခိုက်ရေးအင်အားစုကို စုရုံးမည်။ သူသည်ခရစ်ယာန်ဖြစ်သော “ဘုရားသခင်၏ ဣသရေလ” တို့၏ မြှင့်တင်ခံရသော ဝိညာဏအခြေအနေနှင့် တင်စားထားသည့် “ဣသရေလတောင်များ” ကိုတိုက်ခိုက်ရန် သူ၏တပ်များကို ဦးဆောင်ပါလိမ့်မည်။—ယေဇကျေလ ၃၈:၁-၉။ ယောဟန် ၁၂:၃၁။ ဂလာတိ ၆:၁၆။

ဘုရားလူမျိုးအပေါ်၌ မီးကုန်ယမ်းကုန်တိုက်ခိုက်ရန် ဂေါဂအားဘာကဖြစ်စေသနည်း။ သူတို့၏ငြိမ်းချမ်းမှု၊ ဝိညာဉ်ရေးအရကြွယ်ဝသော အခြေအနေကို ပရောဖက်ပြုချက်က ညွှန်ပြသည်။ ဂေါဂကဆိုသည်။ “‘ရွာဇနပုဒ်များသောပြည်၊ မြို့ရိုးမရှိ၊ တံခါးကျင်နှင့်တံခါးမရှိ၊ စိုးရိမ်စရာအကြောင်းအလျှင်းမရှိ၊ ငြိမ်ဝပ်သောပြည်သားတို့ရှိရာသို့ငါချီသွား၍၊ သူတို့ဥစ္စာကို လုယက်သိမ်းယူမည်’ . . . ဥစ္စာများကိုရတတ် . . . သူတို့ကိုလည်းကောင်း တိုက်မည်ဟုကြံစည်လိမ့်မည်။”—ယေဇကျေလ ၃၈:၁၀-၁၂။

ယေဘုယျအားဖြင့်၊ ယေဟောဝါ၏လူမျိုးသည် ရုပ်ပစ္စည်းအရမကြွယ်ဝချေ။ သို့သော်၊ သူတို့သည် မိမိတို့၏ကမ္ဘာချီဟောပြောခြင်းလုပ်ငန်းကြောင့် ကြွယ်ဝစွာသော ဝိညာဏဥစ္စာစည်းစိမ်ကို ဖြစ်ပေါ်စေခဲ့ပါသည်။ “လူအမျိုးအနွယ် ခပ်သိမ်းတို့အထဲမှ . . . လူများအပေါင်း” တို့ကိုစုရုံးခဲ့ပြီး၊ ယခုအရေအတွက် လေးသန်းကျော်ခဲ့ပေပြီ။ (ဗျာဒိတ် ၇:၉၊ ၁၀) အမှန်ပင်၊ ဥစ္စာစည်းစိမ်ပါတကား။ ဤဝိညာဏကြွယ်ဝနေမှုကို အမျက်ချောင်းချောင်းထွက်နေသောစာတန်သည် ဘုရားလူမျိုးတော်ကိုချေမှုန်းရန် ကြိုးပမ်းလေသည်။

သို့သော်ဣသရေလ၏ပုံဆောင်ရာမြေပေါ်သို့ ဆိုက်ရောက်သောအခါ ဂေါဂသည်ယေဟောဝါကိုယ်နှိုက်ကို တိုက်လေသည်။ “ငါသည်ဒေါသအရှိန်ထ၍ အမျက်ထွက်လိမ့်မည်” ဟုယေဟောဝါမိန့်ဆိုသည်။ မိမိလူမျိုးအတွက် ကိုယ်တော်ဂလဲ့စား ချေတော်မူမည်။ ဂေါဂ၏တပ်များသည် ရှုပ်ထွေးလျက် ပျောက်ပျက်သွားလေသည်။ “တစ်ယောက်ကိုတစ်ယောက် ဓားနှင့်ခုတ်ကြလိမ့်မည်။” ထိုအခါယေဟောဝါသည် မိမိ၏ဖျက်ဆီးခြင်းတန်ခိုးများဖြစ်သော “ကြီးသောမိုးသီး၊ ကန့်နှင့်ရောသောမီးမိုး” ကိုရွာစေမည်။ ပင်လယ်နီ၊ အာဣမြို့နှင့်ကိရှုန်မှာကဲ့သို့ ယေဟောဝါသည် တစ်ဖန်မိမိလူမျိုးအတွက် တိုက်ခိုက်မည်ဖြစ်ပြီး၊ မိမိ၏နာမကို ထင်ရှားစေမည်။ “ငါသည်ကိုယ်ကိုချီးမြှောက်၍ ရိုသေဖွယ်သောဂုဏ်လက္ခဏာကိုပြလျက် များစွာသောလူမျိုးတို့ရှေ့မှာထင်ရှားသောအခါ ငါသည် [ယေဟောဝါ] ဖြစ်ကြောင်းကိုသူတို့ သိရကြလိမ့်မည်။”—ယေဇကျေလ ၃၈:၁၈-၂၃။

ရှေးအချိန်တွင် ယေဟောဝါ၏စစ်ပွဲများအကြောင်း သမိုင်းဝင်မှတ်တမ်းက “ကြီးစွာသောဒုက္ခ” အတွင်း ဤအနာဂတ်အောင်ပွဲအပေါ် ကျွန်ုပ်တို့လုံးဝယုံကြည်စိတ်ချရန်ဖြစ်ပေါ်စေသည်။ (မဿဲ ၂၄:၂၁၊ ၂၂) အစဉ်ထိန်းချုပ်ထားလျက် ယေဟောဝါသည်မိမိရန်သူများထက် သာလွန်နိုင်ပြီး၊ မိမိလူမျိုး၏ကယ်တင်ခြင်းအတွက် အခြေအနေများကို ကြိုးကိုင်နိုင်သည်။ ဟေရှာယတင်ကြိုဟောထားသကဲ့သို့ အမှန်ပင်ဖြစ်ပါလိမ့်မည်။ “[ယေဟောဝါ] သည်သူရဲကဲ့သို့ထွက်ကြွ၍ စစ်သူရဲကဲ့သို့ ကိုယ်စိတ်ကိုကိုယ်နှိုးဆော်တော်မူလိမ့်မည်။ အော်ဟစ်ကြွေးကြော်၍ ရန်သူတို့တစ်ဖက်၌ အားထုတ်တော်မူလိမ့်မည်။” (ဟေရှာယ ၄၂:၁၃) ကိုယ်တော်၏သက်သေခံများမျက်စိဝယ် ကိုယ်တော်သည်ထာဝစဉ်ပင် ယေဟောဝါ၊ “စစ်သူရဲဖြစ်တော်မူ” ပါသည်တကား။—ထွက်မြောက်ရာ ၁၅:၃။