ယေဟောဝါအားတုပ—တရားမျှတမှုနှင့် ဖြောင့်မတ်ခြင်းကိုကျင့်သုံးကြ

“ငါသည် မြေကြီးပေါ်မှာ ချစ်သနားခြင်း၊ တရားသဖြင့်စီရင်ခြင်း၊ ဖြောင့်မတ်ခြင်းကိုပြုသောထာဝရဘုရား [“ယေဟောဝါ၊” ကဘ] ဖြစ်၏။ . . . ငါသည် ထိုအရာတို့၌မွေ့လျော်သည်။”—ယေရမိ ၉:၂၄။

၁။ အဘယ်ထူးကဲလှသောအလားအလာကို ယေဟောဝါကမ်းလှမ်းခဲ့သနည်း။

ယေဟောဝါအား လူတိုင်းသိကျွမ်းရမည့်အချိန်ရောက်လာမည်ဟု ကိုယ်တော်ကတိပေးခဲ့သည်။ မိမိ၏ပရောဖက်ဟေရှာယမှတစ်ဆင့် ကိုယ်တော်ဤသို့ဆိုခဲ့၏– “ငါ၏သန့်ရှင်းသောတောင်တစ်ပြင်လုံး၌ အချင်းချင်းညှဉ်းဆဲခြင်း၊ ဖျက်ဆီးခြင်းကိုမပြုရကြ။ အကြောင်းမူကား၊ ပင်လယ်ရေသည် မိမိနေရာကိုလွှမ်းမိုးသကဲ့သို့၊ မြေကြီးသည် ထာဝရဘုရားကိုသိကျွမ်းခြင်းပညာနှင့်ပြည့်စုံလိမ့်မည်။” (ဟေရှာယ ၁၁:၉) ထူးကဲလှသောအလားအလာပါတကား!

၂။ ယေဟောဝါအားသိကျွမ်းခြင်းတွင် အဘယ်အရာပါဝင်သနည်း။ အဘယ်ကြောင့်နည်း။

^၂ သို့သော် ယေဟောဝါအားသိကျွမ်းခြင်းကား အဘယ်နည်း။ အဘယ်အရာသည် တန်ဖိုးအရှိဆုံးဖြစ်ကြောင်း ယေရမိကို ယေဟောဝါဖော်ပြပေးခဲ့သည်– “ငါသည် မြေကြီးပေါ်မှာ ချစ်သနားခြင်း၊ တရားသဖြင့်စီရင်ခြင်း၊ ဖြောင့်မတ်ခြင်းကိုပြုသော ထာဝရဘုရားဖြစ်ကြောင်းတည်းဟူသော၊ ငါ့သဘောကိုနားလည်ခြင်း၌ . . . မွေ့လျော်သည်ဟု ထာဝရဘုရားမိန့်တော်မူ၏။” (ယေရမိ ၉:၂၄) ထိုကြောင့် ယေဟောဝါအားသိကျွမ်းသည်ဆိုရာ၌ ကိုယ်တော်ကျင့်သုံးသော တရားမျှတမှုနှင့်ဖြောင့်မတ်ခြင်းနည်းလမ်းကို သိကျွမ်းခြင်းပါဝင်၏။ သို့နှင့် ထိုအရည်အချင်းများကို ကျွန်ုပ်တို့ကျင့်သုံးကြမည်ဆိုလျှင် ကျွန်ုပ်တို့ကို ကိုယ်တော်အားရတော်မူမည်။ မည်သို့ကျင့်သုံးနိုင်မည်နည်း။ ယေဟောဝါ၏နှုတ်တော်ထွက်သမ္မာကျမ်းစာတွင် နှစ်များတစ်လျှောက် မစုံလင်သောလူသားများနှင့် ကိုယ်တော်ဆက်ဆံခဲ့သည့်မှတ်တမ်းကို ထိန်းသိမ်းထားတော်မူခဲ့သည်။ ယင်းကိုလေ့လာခြင်းဖြင့် ယေဟောဝါ၏ တရားမျှတမှုနှင့်ဖြောင့်မတ်ခြင်းနည်းလမ်းကို ကျွန်ုပ်တို့သိကျွမ်းလာနိုင်ပြီး ကိုယ်တော်အားတုပနိုင်ပေမည်။—ရောမ ၁၅:၄။

တရားမျှတသော်လည်း ထောက်ထားစာနာ၏

၃၊ ၄။ သောဒုံမြို့နှင့်ဂေါမောရမြို့ကိုဖျက်ဆီးရာတွင် ယေဟောဝါသည် အဘယ်ကြောင့်တရားခဲ့သနည်း။

^၃ သောဒုံမြို့နှင့်ဂေါမောရမြို့အပေါ် ဘုရားသခင်၏တရားစီရင်ချက်သည် ယေဟောဝါ၏တရားမျှတမှုအသွင်အမျိုးမျိုးကိုဖော်ပြသည့် အကောင်းဆုံးပုံသက်သေဖြစ်၏။ ယေဟောဝါသည် လိုအပ်သည့်အပြစ်ဒဏ်ကို စီရင်သည်သာမက ထိုက်တန်သူများကိုကယ်တင်ရန်လည်း စီစဉ်ပေးခဲ့သည်။ ထိုမြို့များကိုဖျက်ဆီးခြင်းသည် အမှန်ပင်တရားခဲ့ပါသလော။ သောဒုံမြို့၏ဆိုးသွမ်းမှုအတိုင်းအတာကို အကန့်အသတ်သာသိခဲ့ပုံရှိသူအာဗြဟံသည် အစတွင် တရားသည်ဟုမယူမှတ်ခဲ့ပါ။ ဖြောင့်မတ်သူဆယ်ယောက်သာ တွေ့နိုင်မည်ဆိုလျှင် ထိုမြို့ကိုမဖျက်ဆီးဘဲနေမည်ဟု အာဗြဟံကိုယေဟောဝါစိတ်ချစေခဲ့၏။ ယေဟောဝါ၏တရားမျှတမှုသည် ဘယ်တော့မျှအလျင်စလို သို့မဟုတ် ကရုဏာကင်းမဲ့ခြင်း မရှိသည်မှာရှင်းနေ၏။—ကမ္ဘာဦး ၁၈:၂၀-၃၂။

^၄ ကောင်းကင်တမန်နှစ်ပါး၏စစ်ဆေးချက်က သောဒုံမြို့၏အကျင့်ပျက်ပြားမှုကို အထင်အရှားသက်သေထူခဲ့သည်။ မြို့သား “ယောက်ျားအကြီးအငယ်” တို့သည် လောတ၏အိမ်တွင် အမျိုးသားနှစ်ယောက်လာရောက်တည်းကြောင်းသိရှိကြသောအခါ အဖွဲ့လိုက်လိင်တူမေထုန်ပြုရန် ရည်ရွယ်ချက်ဖြင့် သူ၏အိမ်ကိုဖျက်ဆီးရန်ကြိုးစားခဲ့ကြသည်။ သူတို့၏အကျင့်ယိုယွင်းမှုသည် အမှန်ပင်ယုတ်ညံ့လှ၏! ထိုမြို့အပေါ် ယေဟောဝါ၏တရားစီရင်ချက်သည် ဖြောင့်မတ်မှန်ကန်ကြောင်း ယုံမှားဖွယ်မရှိချေ။—ကမ္ဘာဦး ၁၉:၁-၅၊ ၂၄၊ ၂၅။

၅။ ဘုရားသခင်သည် သောဒုံမြို့မှ လောတနှင့်သူ၏မိသားစုကို မည်သို့ကယ်တင်ခဲ့သနည်း။

^၅ သတိပေးသည့်သာဓကတစ်ခုအဖြစ် သောဒုံမြို့နှင့်ဂေါမောရမြို့၏ပျက်စီးခြင်းကို ကိုးကားဖော်ပြပြီးနောက် တမန်တော်ပေတရု ဤသို့ရေးသားခဲ့သည်– “ဘုရား [သခင်] ရေးရာဆက်ကပ်အပ်နှံထားသူတို့ကို စုံစမ်းခြင်းအထဲက မည်သို့ကယ်နုတ်ရမည်ကို ယေဟောဝါသိတော်မူ၏။” (၂ ပေတရု ၂:၆-၉၊ ကဘ) ဖြောင့်မတ်သောလောတနှင့် သူ၏မိသားစုသည် ဘုရားတရားမဲ့သည့်သောဒုံမြို့သားတို့နှင့်အတူ ဖျက်ဆီးခံခဲ့ကြရမည်ဆိုလျှင် တရားလိမ့်မည်မဟုတ်ပေ။ ထို့ကြောင့် ယေဟောဝါ၏ကောင်းကင်တမန်တို့သည် ချဉ်းကပ်လာနေသည့်ဖျက်ဆီးခြင်းဘေးအကြောင်းကို လောတအားသတိပေးခဲ့ရခြင်းဖြစ်သည်။ လောတသည် ဖင့်နွှဲသောအခါ “ထာဝရဘုရား [“ယေဟောဝါ၊” ကဘ] သနားတော်မူသောကြောင့်” ကောင်းကင်တမန်တို့သည် သူ၊ သူ၏ဇနီးနှင့်သမီးများကိုလက်ဆွဲ၍ မြို့ပြင်သို့ထုတ်ဆောင်ခဲ့ကြ၏။ (ကမ္ဘာဦး ၁၉:၁၂-၁၆) ယေဟောဝါသည် ရောက်ရှိလာတော့မည့် ဤဆိုးယုတ်သောစနစ်ကိုဖျက်ဆီးခြင်း၌ ဖြောင့်မတ်သူများအတွက် အလားတူစိုးရိမ်မှုပြမည်ဖြစ်ကြောင်း ကျွန်ုပ်တို့စိတ်ချနိုင်သည်။

၆။ ရောက်ရှိလာတော့မည့် ဤဆိုးယုတ်သောစနစ်ကိုဖျက်ဆီးခြင်းနှင့်ပတ်သက်၍ အဘယ်ကြောင့်လွန်စွာမစိုးရိမ်သင့်သနည်း။

^၆ ဤစနစ်၏အဆုံးသည် “ဒဏ်စီရင်” ချိန်ဖြစ်လိမ့်မည်ဖြစ်သော်လည်း ကျွန်ုပ်တို့သည်လွန်စွာစိုးရိမ်နေစရာအကြောင်းမရှိချေ။ (လုကာ ၂၁:၂၂) အာမဂေဒုန်၌ ဘုရားသခင့်တရားစီရင်ချက်သည် “တညီတညွတ်တည်းဖြောင့်မတ်” ကြောင်းထင်ရှားလိမ့်မည်။ (ဆာလံ ၁၉:၉) အာဗြဟံသိရှိခဲ့သကဲ့သို့ ကျွန်ုပ်တို့၏တရားမျှတမှုထက် များစွာမြင့်မြတ်သော ယေဟောဝါ၏တရားမျှတမှုကို ကျွန်ုပ်တို့လူသားများသည် လုံးလုံးလျားလျားကိုးစားနိုင်ပါသည်။ အာဗြဟံက “မြေကြီးလုံးကိုစီရင်တော်မူသောသခင်သည် တရားသဖြင့်ပြုတော်မူမည်မဟုတ်လော” ဟုမေးခဲ့သည်။ (ကမ္ဘာဦး ၁၈:၂၅; ယောဘ ၃၄:၁၀ နှိုင်းယှဉ်။) သို့မဟုတ် ဟေရှာယလျောက်ပတ်စွာမေးခဲ့သည့်အတိုင်း “[ယေဟောဝါ] အား တရားလမ်းကိုပြသောသူ . . . ကား အဘယ်သူနည်း။”—ဟေရှာယ ၄၀:၁၄။

လူသားများကိုကယ်တင်ရန် ဖြောင့်မတ်သည့်လုပ်ရပ်

၇။ ဘုရားသခင့်တရားမျှတမှုနှင့် ကိုယ်တော့်ကရုဏာသည် အဘယ်ဆက်စပ်မှုရှိသနည်း။

^၇ ဘုရားသခင်၏တရားမျှတမှုသည် ပြစ်မှားသူများကိုစီရင်ရာ၌သာ ထင်ရှားသည်မဟုတ်။ ယေဟောဝါသည် မိမိကိုယ်ကို “ဖြောင့်မတ်သောဘုရား၊ ကယ်တင်သောဘုရား” ဟူ၍ဖော်ပြတော်မူ၏။ (ဟေရှာယ ၄၅:၂၁) ဘုရားသခင်၏ဖြောင့်မတ်ခြင်း သို့မဟုတ် တရားမျှတမှုနှင့် အပြစ်၏အကျိုးဆက်များမှ လူသားများကိုကယ်တင်လိုသည့်ဆန္ဒသည် ဆက်စပ်မှုရှိကြောင်းထင်ရှားသည်။ ဤကျမ်းချက်ကို ကောက်ချက်ချရာတွင် ၁၉၈၂ ခုနှစ်ထုတ်၊ အပြည်ပြည်ဆိုင်ရာစံတော်တင်ကျမ်းစာစွယ်စုံကျမ်းက ဤသို့ဆိုသည်။ “ဘုရားသခင်၏တရားမျှတမှုသည် ကိုယ်တော့်ကရုဏာကိုဖော်ပြရန်နှင့် ကိုယ်တော့်ကယ်တင်ခြင်းကိုပြီးမြောက်စေရန် လက်တွေ့ကျကျပြုလုပ်ဆောင်ရွက်၏။” ဘုရားသခင်၏တရားမျှတမှုတွင် ကရုဏာနှောရန်လိုအပ်ခြင်းမဟုတ်ဘဲ ကရုဏာသည် ဘုရားသခင့်တရားမျှတမှု၏ပြယုဂ်တစ်ခုဖြစ်သည်။ လူသားများ၏ကယ်တင်ခြင်းအတွက် ဘုရားသခင်၏ရွေးနုတ်ဖိုးအစီအစဉ်သည် ဘုရားသခင့်တရားမျှတမှုကို ထူးခြားစွာဖော်ပြသည်။

၈၊ ၉။ (က) “တစ်ယောက်သောသူ၏ဖြောင့်မတ်ခြင်း” ဟူသောဖော်ပြချက်တွင် အဘယ်အရာပါဝင်သနည်း။ အဘယ်ကြောင့်နည်း။ (ခ) ယေဟောဝါသည် ကျွန်ုပ်တို့ထံမှအဘယ်အရာ ပြန်တောင်းဆိုတော်မူသနည်း။

^၈ ယေဟောဝါ၏စံနှုန်းများသည် ခြွင်းချက်မဲ့ဖြစ်ကာ ကိုယ်တော်တိုင်ပင် ယင်းတို့ကိုလိုက်နာသောကြောင့် ရွေးနုတ်ဖိုး—ဘုရားသခင်၏တစ်ပါးတည်းသောသားတော် ယေရှုခရစ်၏အဖိုးတန်လှသောအသက်—ကိုယ်နှိုက်သည် တန်ဖိုးမြင့်မားရခြင်းဖြစ်သည်။ (မဿဲ ၂၀:၂၈) စုံလင်သောအသက်ဖြစ်သည့် အာဒံ၏အသက်ဆုံးရှုံးခဲ့သောကြောင့် အာဒံ၏မျိုးဆက်ကို ရွေးနုတ်ရန်စုံလင်သောအသက်လိုခဲ့သည်။ (ရောမ ၅:၁၉-၂၁) တမန်တော်ပေါလုက ရွေးနုတ်ဖိုးပေးခြင်းအပါအဝင် ယေရှု၏သစ္စာတည်ကြည်သောလမ်းစဉ်ကို “တစ်ယောက်သောသူ၏ဖြောင့်မတ်ခြင်း” ဟုဖော်ပြခဲ့သည်။ (ရောမ ၅:၁၈၊ အောက်ခြေမှတ်ချက်) အဘယ်ကြောင့်နည်း။ အကြောင်းမှာ ယေဟောဝါဘက်မှကြည့်ရှုလျှင် လူသားများကိုရွေးနုတ်ခြင်းသည် ကိုယ်တော့်အတွက် များစွာအနစ်နာခံရမည့်အမှုဖြစ်ဦးတော့ ဖြောင့်မှန်ပြီးတရားသောအမှုဖြစ်သည်။ အာဒံ၏မျိုးဆက်သည် ဘုရားသခင်မချိုးပစ်လိုသော ‘နင်းနယ်လျက်ရှိကျူပင်’ ကဲ့သို့လည်းကောင်း၊ ကိုယ်တော်မငြိမ်းသတ်လိုသည့် “မီးခိုးများသောမီးစာ” ကဲ့သို့လည်းကောင်းဖြစ်ခဲ့ကြသည်။ (မဿဲ ၁၂:၂၀) အာဒံ၏မျိုးဆက်မှ သစ္စာရှိအမျိုးသား၊ အမျိုးသမီးများပေါ်ထွက်လာမည်ဟု ဘုရားသခင်ယုံကြည်စိတ်ချတော်မူ၏။—မဿဲ ၂၅:၃၄ နှိုင်းယှဉ်။

^၉ မေတ္တာနှင့်တရားမျှတမှုကို အမြင့်မြတ်ဆုံးနည်းဖြင့်ပြသော ဤလုပ်ရပ်ကို ကျွန်ုပ်တို့မည်သို့တုံ့ပြန်သင့်သနည်း။ ကျွန်ုပ်တို့ထံမှ ယေဟောဝါတောင်းဆိုထားရာများအနက်တစ်ခုမှာ “တရားသဖြင့်ပြုခြင်း” ဖြစ်သည်။ (မိက္ခာ ၆:၈) ကျွန်ုပ်တို့မည်သို့ပြုနိုင်မည်နည်း။

တရားမျှတမှုကိုရှာကာ ဖြောင့်မတ်မှုကိုမီအောင်လိုက်

၁၀။ (က) တရားမျှတမှုကို ကျွန်ုပ်တို့ကျင့်သုံးသည့် နည်းတစ်နည်းကားအဘယ်နည်း။ (ခ) ဘုရားသခင်၏ဖြောင့်မတ်ခြင်းကို ကျွန်ုပ်တို့မည်သို့ ရှေးဦးရှာနိုင်သနည်း။

^၁၀ ဦးဆုံး၊ ဘုရားသခင့်ကျင့်ဝတ်စံနှုန်းများနှင့်အညီ ကျွန်ုပ်တို့ကျင့်ကြံနေထိုင်ကြရမည်။ ဘုရားသခင့်စံနှုန်းများသည် တရားပြီးဖြောင့်မှန်သောကြောင့် ယင်းနှင့်အညီ ကျွန်ုပ်တို့နေထိုင်သောအခါ တရားမျှတမှုကိုကျင့်သုံးနေကြသည်။ ယင်းသည် မိမိ၏လူမျိုးတော်ထံမှ ယေဟောဝါမျှော်လင့်ရာဖြစ်၏။ “ကောင်းသောအကျင့်ကိုကျင့်အံ့သောငှာသင်ကြလော့။ တရားသဖြင့်ပြုခြင်းငှာ ရှာကြံကြလော့” ဟုဣသရေလလူမျိုးကို ယေဟောဝါမိန့်တော်မူ၏။ (ဟေရှာယ ၁:၁၇) ယေရှုသည် တောင်ပေါ်ဒေသနာ၌ မိမိ၏ပရိသတ်များအား ‘ဘုရားသခင့် နိုင်ငံတော်နှင့်ဖြောင့်မတ်ခြင်းကို ရှေးဦးရှာကြ’ ရန်သွန်သင်သောအခါ အလားတူပဲ့ပြင်ပေးခဲ့သည်။ (မဿဲ ၆:၃၃) ‘ဖြောင့်မတ်ခြင်းကို မီအောင်လိုက်’ ရန်တိမောသေကို ပေါလုတိုက်တွန်းခဲ့သည်။ (၁ တိမောသေ ၆:၁၁) ကျွန်ုပ်တို့သည် ကျင့်ကြံပြုမူပုံဆိုင်ရာ ဘုရားသခင့်စံနှုန်းများနှင့်အညီနေထိုင်ကာ ဥပဓိရုပ်သစ်ကိုဝတ်ဆင်ကြသောအခါ စစ်မှန်သော တရားမျှတမှုနှင့် ဖြောင့်မတ်ခြင်းကို မီအောင်လိုက်နေကြသည်။ (ဧဖက် ၄:၂၃၊ ၂၄) တစ်နည်းအားဖြင့် ကျွန်ုပ်တို့သည် ဘုရားသခင့်နည်းလမ်းအတိုင်းပြုမူခြင်းအားဖြင့် တရားမျှတမှုကိုရှာကြသည်။

၁၁။ အပြစ်၏အုပ်စိုးမှုကို ကျွန်ုပ်တို့ အဘယ်ကြောင့်နှင့် မည်သို့တိုက်လှန်သင့်သနည်း။

^၁၁ ကျွန်ုပ်တို့သိထားကြသကဲ့သို့ မစုံလင်သောလူသားများအတွက် တရားပြီးဖြောင့်မှန်စွာပြုမူရန် အစဉ်အမြဲမလွယ်ကူပေ။ (ရောမ ၇:၁၄-၂၀) ဘုရားသခင့်ရည်ရွယ်ချက် ပြီးမြောက်အောင်မြင်စေရန် ကိုယ်တော့်အတွက်အသုံးတည့်မည့် ‘ဖြောင့်မတ်ခြင်းလက်နက်များ’ အဖြစ် သူတို့ကိုယ်ကိုဆက်ကပ်အပ်နှံနိုင်ရန် အပြစ်၏အုပ်စိုးမှုကိုတိုက်လှန်ကြဖို့ ရောမခရစ်ယာန်များအား ပေါလုတိုက်တွန်းခဲ့သည်။ (ရောမ ၆:၁၂-၁၄) အလားတူ ဘုရားသခင့်နှုတ်တော်ထွက်စကားကို မှန်မှန်လေ့လာလိုက်လျှောက်ခြင်းအားဖြင့် ကျွန်ုပ်တို့သည် “စိတ်ပိုင်းဆိုင်ရာထိန်းကျောင်းခြင်း” ကိုရယူနိုင်ပြီး ‘ဖြောင့်မတ်ခြင်းဖြင့် ပဲ့ပြင်’ ခံရပေမည်။—ဧဖက် ၆:၄၊ ကဘ; ၂ တိမောသေ ၃:၁၆၊ ၁၇။

၁၂။ ကျွန်ုပ်တို့ကို ယေဟောဝါဆက်ဆံစေလိုသည့်အတိုင်း အခြားသူများကို ကျွန်ုပ်တို့ဆက်ဆံမည်ဆိုလျှင် အဘယ်အရာကိုရှောင်သင့်သနည်း။

^၁၂ ဒုတိယအချက်မှာ ကျွန်ုပ်တို့ကို ယေဟောဝါဆက်ဆံစေလိုသည့်အတိုင်း အခြားသူများကို ကျွန်ုပ်တို့ဆက်ဆံသောအခါ တရားမျှတမှုကိုကျွန်ုပ်တို့ကျင့်သုံးကြသည်။ ကျွန်ုပ်တို့သည် စံနှုန်းနှစ်ခုထားကာ မိမိကိုယ်ကိုသက်ညှာပြီး အခြားသူများကိုမူကား တင်းကျပ်ရန်လွယ်ကူ၏။ ကိုယ်ကိုယ်တိုင်၏အားနည်းချက်များကို အလွယ်တကူဆင်ခြေပေးတတ်ကြပြီး နှိုင်းယှဉ်ကြည့်က အသေးအဖွဲဖြစ်သည့် အခြားသူများ၏အပြစ်များကိုမူ မြန်မြန်ဆန်ဆန်ဝေဖန်တတ်ကြသည်။ ယေရှုက ဤသို့တဲ့တိုးမေးခဲ့သည်– “ကိုယ်မျက်စိ၌ရှိသောတံကျင်ကို မအောက်မေ့ဘဲ ညီအစ်ကိုမျက်စိ၌ရှိသော ငြောင့်ငယ်ကို အဘယ်ကြောင့်ကြည့်ရှုသနည်း။” (မဿဲ ၇:၁-၃) ယေဟောဝါသည် ကျွန်ုပ်တို့၏အမှားများကို နှိုက်နှိုက်ချွတ်ချွတ် စစ်ဆေးမည်ဆိုလျှင် ကျွန်ုပ်တို့တစ်ဦးတစ်ယောက်မျှရပ်တည်နိုင်မည်မဟုတ်ကြောင်း ဘယ်တော့မျှမမေ့သင့်ချေ။ (ဆာလံ ၁၃၀:၃၊ ၄) ယေဟောဝါ၏တရားမျှတမှုသည် ကျွန်ုပ်တို့ညီအစ်ကိုများ၏အားနည်းချက်များကို အမှတ်မထားလျှင် သူတို့ကိုအပြစ်စီရင်မည့် ကျွန်ုပ်တို့ကား အဘယ်သူနည်း။—ရောမ ၁၄:၄၊ ၁၀။

၁၃။ ဖြောင့်မတ်သူတစ်ဦးသည် ဘုရားသခင့်နိုင်ငံတော်သတင်းကောင်းဟောပြောရန် တာဝန်ရှိသည်ဟု အဘယ်ကြောင့်ခံစားရသနည်း။

^၁၃ တတိယ၊ ကျွန်ုပ်တို့သည် ဟောပြောခြင်းလုပ်ငန်း၌ ဇွဲရှိရှိပါဝင်သောအခါ ဘုရားသခင်ရေးရာတရားမျှတမှုကို ကျင့်သုံးကြသည်။ “ကျေးဇူးကိုခံသင့်သောသူတို့အား ကျေးဇူးပြုရသောအခွင့်ရှိလျှင် မပြုဘဲမနေနှင့်” ဟုကျွန်ုပ်တို့ကို ယေဟောဝါသွန်သင်သည်။ (သု. ၃:၂၇) ဘုရားသခင်က ကျွန်ုပ်တို့အားရက်ရောစွာပေးကမ်းသည့် အသက်ပေးအသိပညာကို မိမိအတွက်သာသိမ်းထားခြင်းသည် ဖြောင့်မှန်မည်မဟုတ်ပေ။ ကျွန်ုပ်တို့၏သတင်းတရားကို လူများစွာငြင်းပယ်ကြမည်မှာ မှန်ပါသည်၊ သို့သော် သူတို့အပေါ် ဘုရားသခင်ကရုဏာဆက်ပြသ၍ သူတို့ “နောင်တရစေ” ရန်အခွင့်အရေးကို လိုလိုလားလားဆက်ပေးနေသင့်သည်။ (၂ ပေတရု ၃:၉) ထို့ပြင် ယေရှုကဲ့သို့ပင် တစ်စုံတစ်ယောက်သောသူကို တရားမျှတမှုနှင့်ဖြောင့်မတ်ခြင်းသို့ ပြန်လှည့်လာစေရန် ကူညီပေးနိုင်သောအခါ ဝမ်းမြောက်ကြသည်။ (လုကာ ၁၅:၇) ယခုအချိန်သည် “ဖြောင့်မတ်ခြင်းမျိုးစေ့ကိုကြဲ” ရန်ကျွန်ုပ်တို့အတွက် နှစ်သက်ဖွယ်အချိန်ဖြစ်၏။—ဟောရှေ ၁၀:၁၂။

‘တရားသဖြင့်စီရင်ကြသော မင်းသားမှူးမတ်များ’

၁၄။ အကြီးအကဲများသည် တရားမျှတမှုကို အဘယ်အခန်းကဏ္ဍမှပါဝင်ဆောင်ရွက်ကြသနည်း။

^၁၄ ကျွန်ုပ်တို့အားလုံးသည် ဖြောင့်မတ်ခြင်းလမ်းတွင် လျှောက်လှမ်းကြရမည်ဖြစ်သော်လည်း ခရစ်ယာန်အသင်းတော်ရှိ အကြီးအကဲများသည် ယင်းနှင့်ပတ်သက်၍ အထူးတာဝန်ကိုရရှိထားကြသည်။ ယေရှု၏အာဏာတော်ကို ‘တရားတော်အတိုင်း ဖြောင့်မတ်စွာစီရင်သောကြောင့် အမြဲတည်၏။’ ယင်းနှင့်အညီ အကြီးအကဲများအတွက်စံနှုန်းသည် ဘုရားသခင့်တရားမျှတမှုဖြစ်သည်။ (ဟေရှာယ ၉:၇) ဟေရှာယ ၃၂:၁ ပါပရောဖက်ပြုဖော်ပြချက်ကို သူတို့စွဲမှတ်ထားကြသည်– “ကြည့်ရှုလော့။ တရားသဖြင့်အုပ်စိုးသောရှင်ဘုရင်တစ်ပါး ပေါ်ထွန်းတော်မူလိမ့်မည်။ မင်းသားမှူးမတ်တို့သည် တရားသဖြင့်စီရင်ကြလိမ့်မည်။” ဝိညာဉ်တော်ခန့်အပ်ခံကြီးကြပ်မှူးများ သို့မဟုတ် ‘ဘုရားသခင့်ဘဏ္ဍာစိုးများ’ အနေဖြင့် အကြီးအကဲများသည် ဘုရားသခင့်နည်းလမ်းအတိုင်း လုပ်ဆောင်သင့်သည်။—တိတု ၁:၇။

၁၅၊ ၁၆။ (က) အကြီးအကဲများသည် ယေရှု၏ပုံဥပမာပါ သစ္စာရှိသိုးထိန်းကို မည်သို့တုပကြသနည်း။ (ခ) အကြီးအကဲများသည် ဝိညာဉ်ရေးပျောက်ဆုံးနေသူများကို မည်သို့သဘောထားကြသနည်း။

^၁၅ ယေဟောဝါ၏တရားမျှတမှုသည် ထောက်ထားစာနာမှုနှင့် ကရုဏာရှိပြီး ကျိုးကြောင်းညီညွတ်ကြောင်း ယေရှုပြခဲ့သည်။ အရေးအကြီးဆုံးမှာ ကိုယ်တော်သည် ပြဿနာရှိသူတို့ကိုကူညီကာ “ပျောက်သောသူတို့ကိုရှာ” တွေ့ရန်ကြိုးစားခဲ့သည်။ (လုကာ ၁၉:၁၀) ပျောက်သောသိုးကိုတွေ့သည့်အထိ မရပ်မနားရှာဖွေခဲ့သော ယေရှု၏ပုံဥပမာရှိသိုးထိန်းကဲ့သို့ အကြီးအကဲများသည် ဝိညာဉ်ရေးအရပျောက်နေသူတို့ကိုရှာဖွေကာ သိုးခြံသို့ပြန်လမ်းညွှန်ပေးရန် ကြိုးပမ်းကြသည်။—မဿဲ ၁၈:၁၂၊ ၁၃။

^၁၆ ကြီးလေးသောအပြစ်ကျူးလွန်မိသူများကို အပြစ်တင်မည့်အစား အကြီးအကဲများသည် ဖြစ်နိုင်မည်ဆိုလျှင် အနာပျောက်ကင်းပြီး နောင်တရစေရန်ကြိုးစားလမ်းညွှန်ပေးကြသည်။ လမ်းလွဲသွားခဲ့သူတစ်ယောက်ယောက်ကို သူတို့ကူညီနိုင်သောအခါ ဝမ်းမြောက်ကြသည်။ သို့သော် အပြစ်ပြုသူတစ်ဦးသည် နောင်တမရလျှင်မူ သူတို့ဝမ်းနည်းကြရ၏။ ထိုအခါ ဘုရားသခင့်ဖြောင့်မတ်သောစံနှုန်းများနှင့်အညီ နောင်တမရသူကိုနှင်ထုတ်ရ၏။ သို့တိုင် အသုံးအဖြုန်းကြီးသူ၏ဖခင်ကဲ့သို့ အမှားပြုနေသူသည် တစ်နေ့နေ့ ‘သတိရလာ’ လိမ့်မည်ဟု သူတို့မျှော်လင့်ကြသည်။ (လုကာ ၁၅:၁၇၊ ၁၈) ထို့ကြောင့် အကြီးအကဲများသည် နှင်ထုတ်ထားသူအချို့ထံလည်ပတ်သွား၍ ယေဟောဝါ၏အဖွဲ့အစည်းသို့ သူတို့မည်သို့ပြန်လှည့်လာနိုင်ကြောင်းသတိပေးရန် အစပြုလုပ်ဆောင်ကြသည်။a

၁၇။ အကြီးအကဲများသည် ပြစ်မှားခြင်းကိစ္စတစ်ရပ်ကို ကိုင်တွယ်သောအခါ အဘယ်ပန်းတိုင်ရှိကြသနည်း။ ထိုပန်းတိုင်ကိုမီရန် အဘယ်အရည်အချင်းက သူတို့ကိုထောက်ကူမည်နည်း။

^၁၇ အကြီးအကဲများသည် ပြစ်မှားခြင်းကိစ္စရပ်များကိုကိုင်တွယ်သောအခါ ယေဟောဝါ၏တရားမျှတမှုကိုတုပရန် အထူးသဖြင့်လိုသည်။ အပြစ်သားများသည် ယေရှုထံ “ချဉ်းကပ်” ခဲ့ကြသည်။ အကြောင်းမှာ ကိုယ်တော်သည် သူတို့ကိုနားလည်ကာကူညီပေးလိမ့်မည်ဟု သူတို့ယူမှတ်ကြသောကြောင့်ဖြစ်သည်။ (လုကာ ၁၅:၁; မဿဲ ၉:၁၂၊ ၁၃) ယေရှုသည် အပြစ်ပြုခြင်းကို ခွင့်မပြုသည်မှာ မှန်ပါသည်။ ယေရှုနှင့်အတူအစာစားခဲ့သည့်တစ်ချိန်တွင် ငွေညှစ်သူအဖြစ် နာမည်ကြီးသောဇက္ခဲသည် အခြားသူများအပေါ် ကျရောက်စေခဲ့သည့် ဒုက္ခအားလုံးအတွက် နောင်တရပြီး လျော်ပေးရန် လှုံ့ဆော်ခံခဲ့ရသည်။ (လုကာ ၁၉:၈-၁၀) ယနေ့အကြီးအကဲများသည် အမှားပြုသူကို နောင်တရရန်လမ်းညွှန်ပေးဖို့ တရားရေးကိစ္စကြားနာရာတွင် အလားတူပန်းတိုင်ထားရှိကြသည်။ သူတို့သည် ယေရှုကဲ့သို့ချဉ်းကပ်လွယ်သူဖြစ်ကြမည်ဆိုလျှင် အမှားပြုသူများစွာသည် သူတို့၏အကူအညီကို အလွယ်တကူတောင်းခံဝံ့ကြပါလိမ့်မည်။

၁၈။ “လေလုံ၍ . . . ကွယ်ရာအရပ်” ကဲ့သို့ဖြစ်ရန် အကြီးအကဲများကို အဘယ်အရာကထောက်ကူမည်နည်း။

^၁၈ အကြီးအကဲများသည် အကဲဆတ်သောနှလုံးရှိမည်ဆိုလျှင် မကြမ်းတမ်းဘဲ စာနာတတ်သော ဘုရားသခင့်တရားမျှတမှုစံနှုန်းနှင့်အညီစီရင်ရန် အထောက်အကူရပါလိမ့်မည်။ စိတ်ဝင်စားစရာမှာ ဧဇရသည် တရားမျှတမှုကို ဣသရေလလူမျိုးအားသွန်သင်ပေးရန် သူ၏စိတ်ကိုသာမဟုတ်ဘဲ နှလုံးကိုပါပြင်ဆင်ပေးခဲ့သည်။ (ဧဇရ ၇:၁၀) နားလည်မှုရှိသောနှလုံးသည် လျောက်ပတ်သောကျမ်းစာမူများကို လိုက်လျှောက်ရန်နှင့် တစ်ဦးစီ၏အခြေအနေကို ထည့်တွက်စဉ်းစားပေးရန် အကြီးအကဲများကို အထောက်အကူပြုလိမ့်မည်။ သွေးသွန်နာစွဲသောအမျိုးသမီးကို ယေရှုကုသပေးခဲ့စဉ်က ယေဟောဝါ၏တရားမျှတမှုသည် ပညတ်တရား၏အနက်အဓိပ္ပာယ်အပြင် စာသားကိုပါ သဘောပေါက်နားလည်ကြောင်း ကိုယ်တော်ပြခဲ့သည်။ (လုကာ ၈:၄၃-၄၈) ထောက်ထားစာနာမှုရှိရှိ တရားသဖြင့်စီရင်သောအကြီးအကဲများသည် မိမိ၏အားနည်းမှုများ၏ သို့မဟုတ် ကျွန်ုပ်တို့နေထိုင်သည့် ဤစနစ်ဆိုး၏ ထိုးနှက်ရိုက်ပုတ်မှုကိုခံနေရသူများအတွက် “လေလုံ၍ . . . ကွယ်ရာအရပ်” ကဲ့သို့ဖြစ်နိုင်ပေသည်။—ဟေရှာယ ၃၂:၂။

၁၉။ ညီအစ်မတစ်ဦးသည် ဘုရားသခင့်တရားမျှတမှုကိုလက်တွေ့ကျင့်သုံးခြင်းကို မည်သို့တုံ့ပြန်ခဲ့သနည်း။

^၁၉ ကြီးလေးသည့်အပြစ်ကျူးလွန်ခဲ့သော ညီအစ်မတစ်ဦးသည် ဘုရားသခင့်တရားမျှတမှုကို ကိုယ်တိုင်ကိုယ်ကျလေးမြတ်တတ်လာခဲ့သည်။ “ပွင့်ပွင့်လင်းလင်းပြောရရင် အကြီးအကဲတွေဆီကို ကျွန်မမသွားရဲခဲ့ဘူး” ဟုသူမဝန်ခံ၏။ “ဒါပေမဲ့ ကျွန်မကို သူတို့ထောက်ထားစာနာပြီး တလေးတစားနဲ့ဆက်ဆံခဲ့ကြတယ်။ အကြီးအကဲတွေဟာ ခက်ထန်တဲ့တရားသူကြီးတွေမဟုတ်ဘဲ ဖခင်တွေလိုပါပဲ။ ကျွန်မသာ ကျွန်မရဲ့လမ်းစဉ်တွေကိုပြုပြင်မယ်ဆိုရင် ကျွန်မကိုယေဟောဝါငြင်းပယ်မှာမဟုတ်ကြောင်းကို နားလည်စေခဲ့ကြတယ်။ ကိုယ်တော်ဟာ မေတ္တာရှိတဲ့ဖခင်တစ်ဦးလိုပဲ ဘယ်လိုပဲ့ပြင်ပေးခဲ့တယ်ဆိုတာကို ကျွန်မသိခဲ့ရတယ်။ ကျွန်မရဲ့အသနားခံချက်တွေကို ယေဟောဝါနားညောင်းမယ်ဆိုတာကိုစိတ်ချပြီး ကျွန်မနှလုံးဖွင့်နိုင်ခဲ့တယ်။ နောက်ကြောင်းကိုပြန်ကြည့်လိုက်ရင် လွန်ခဲ့တဲ့ခုနစ်နှစ်က အကြီးအကဲများနဲ့တွေ့ဆုံခဲ့တာဟာ ယေဟောဝါဆီကကောင်းချီးပဲလို့ ကျွန်မတကယ်ပြောနိုင်ပါတယ်။ အဲဒီကတည်းက ကိုယ်တော်နဲ့ကျွန်မရဲ့ဆက်ဆံရေးဟာ ပိုခိုင်မြဲလာပါတယ်။”

တရားသဖြင့်ကျင့်၍ ဖြောင့်မှန်ရာကိုလုပ်ဆောင်လေ

၂၀။ တရားမျှတမှုနှင့်ဖြောင့်မတ်ခြင်းကို နားလည်ကျင့်သုံးခြင်း၏အကျိုးကျေးဇူးများကား အဘယ်နည်း။

^၂၀ ဘုရားသခင့်တရားမျှတမှုသည် လူတိုင်းအား သူတို့ထိုက်သင့်ရာကိုပေးခြင်းထက်မကဆိုလိုခြင်းသည် ကျေးဇူးတင်စရာပင်။ ယေဟောဝါ၏တရားမျှတမှုက ယုံကြည်ကြောင်းတင်ပြသူတို့ကို ထာဝရအသက်ပေးရန် ကိုယ်တော်အားလှုံ့ဆော်ပေးခဲ့ပါသည်။ (ဆာလံ ၁၀၃:၁၀; ရောမ ၅:၁၅၊ ၁၈) ဘုရားသခင်သည် ကျွန်ုပ်တို့ကို ဤနည်းဖြင့်ဆက်ဆံရခြင်းမှာ ကိုယ်တော့်တရားမျှတမှုသည် ကျွန်ုပ်တို့၏အခြေအနေကို ထည့်တွက်စဉ်းစားပေးကာ အပြစ်တင်မည့်အစား ကယ်တင်ရန်ရှာကြံသောကြောင့်ဖြစ်သည်။ အမှန်ပင်၊ ယေဟောဝါ၏တရားမျှတမှုနယ်ပယ်ကို ပိုမိုနားလည်လာခြင်းက ကိုယ်တော်နှင့် ပို၍ရင်းနှီးစေပါသည်။ ထို့အပြင် ကိုယ်တော့်ဥပဓိရုပ်၏ ဤအရည်အချင်းကို ကျွန်ုပ်တို့ကြိုးစားတုပစဉ် ကျွန်ုပ်တို့နှင့် အခြားသူတို့၏အသက်တာသည် ကြွယ်ဝစွာကောင်းချီးခံစားကြရပါလိမ့်မည်။ တရားမျှတမှုကိုကျွန်ုပ်တို့မီအောင်လိုက်နေကြောင်း ကောင်းကင်ခမည်းတော်သတိမပြုဘဲနေမည်မဟုတ်ပါ။ ယေဟောဝါ ဤသို့ကတိပေးထားသည်– “တရားကိုစောင့်၍ ဖြောင့်မတ်စွာကျင့်ကြလော့။ ငါ၏ကယ်တင်ခြင်းကျေးဇူးရောက်ချိန်နှင့် ငါ၏ဖြောင့်မတ်ခြင်းတရားထင်ရှားချိန် ရောက်လုနီးပြီ။ ထိုသို့ပြုသောသူ . . . သည် . . . မင်္ဂလာရှိ၏။”—ဟေရှာယ ၅၆:၁၊ ၂။

[အောက်ခြေမှတ်ချက်များ]

သင်မှတ်မိသလော

◻ သောဒုံမြို့နှင့်ဂေါမောရမြို့ပျက်စီးခြင်းက ဘုရားသခင့်တရားမျှတမှုအကြောင်း အဘယ်အရာသွန်သင်ပေးသနည်း။

◻ ရွေးနုတ်ဖိုးသည် ဘုရားသခင့်တရားမျှတမှုနှင့်မေတ္တာ၏ ထူးခြားသောပြယုဂ် အဘယ်ကြောင့်ဖြစ်ရသနည်း။

◻ တရားမျှတမှုကို ကျွန်ုပ်တို့ကျင့်သုံးနိုင်သော နည်းသုံးနည်းကားအဘယ်နည်း။

◻ အကြီးအကဲများသည် အဘယ်ထူးခြားသောနည်းလမ်းဖြင့် ဘုရားသခင့်တရားမျှတမှုကို တုပနိုင်သနည်း။

[စာမျက်နှာ ၁၅ ပါ ရုပ်ပုံ]

ကျွန်ုပ်တို့၏ဟောပြောခြင်းလုပ်ငန်းအားဖြင့် ဘုရားသခင်ရေးရာတရားမျှတမှုကိုတင်ပြကြ၏

[စာမျက်နှာ ၁၆ ပါ ရုပ်ပုံ]

အကြီးအကဲများသည် ဘုရားသခင်ရေးရာတရားမျှတမှုကိုတင်ပြကြသောအခါ ပြဿနာရှိသူများသည် သူတို့၏အကူအညီကို အလွယ်တကူတောင်းခံဝံ့ကြ၏