ယေရှုကြုံရတဲ့ သွေးဆောင်မှုတွေကနေ သင်ယူနိုင်ရာ

ယောဟန်ဆီမှာ နှစ်ခြင်းခံပြီးတာနဲ့ ဘုရားသခင့်စွမ်းအားတော်က ယေရှုကို ယုဒတောထဲ ခေါ်သွားတယ်။ ယေရှုမှာ စဉ်းစားစရာ အများကြီး ရှိနေမှာပဲ။ သူနှစ်ခြင်းခံချိန်မှာ “ကောင်းကင်ပွင့်လာ” တယ်။ (မဿဲ ၃:၁၆) ဒါကြောင့် ကောင်းကင်မှာ သင်ယူခဲ့တာတွေ၊ လုပ်ဆောင်ခဲ့တာတွေကို ပြန်မှတ်မိလာတယ်။ သူ့မှာ စဉ်းစားစရာတွေ အများကြီးရှိမှာ အမှန်ပဲ။

ယေရှုဟာ ရက် ၄၀ လုံးလုံး တောထဲမှာ နေတယ်။ အဲဒီအချိန်အတွင်း ဘာမှမစားဘူး။ သူဆာလောင်နေတဲ့ အချိန်မှာ စာတန်မာရ်နတ် ရောက်လာပြီး သွေးဆောင်တယ်။ “မင်း ဘုရားသခင်ရဲ့သား မှန်ရင် ဒီကျောက်ခဲတွေကို မုန့်ဖြစ်စေလို့ အမိန့်ပေးလိုက်လေ” ဆိုပြီး ပြောတယ်။ (မဿဲ ၄:၃) ယေရှုက သူ့ဆန္ဒဖြည့်ဆည်းဖို့ အံ့ဖွယ်တန်ခိုးကို အသုံးပြုတာ မှားမှန်း သိထားတာကြောင့် သွေးဆောင်မှုကို တွန်းလှန်ခဲ့တယ်။

မာရ်နတ်က နောက်တစ်နည်းကို သုံးပြီး သွေးဆောင်ပြန်တယ်။ ယေရှုကို ဗိမာန်တော်အမိုးပေါ်ကနေ ခုန်ချလိုက်လို့ ပြောတယ်။ လူတွေ အထင်ကြီးအောင် ဒီလို အစွမ်းပြတဲ့ လုပ်ရပ်မျိုးကို ယေရှုမလုပ်ချင်ဘူး။ ဒါကြောင့် ဘုရားကို အဲဒီလို အကဲစမ်းတာ မှားတယ်လို့ ကျမ်းစာကို ကိုးကားပြီး ပြန်ပြောတယ်။

မာရ်နတ်က တတိယအကြိမ် သွေးဆောင်ပြန်တယ်။ ယေရှုကို “တိုင်းနိုင်ငံတွေနဲ့ ဘုန်းစည်းစိမ် အားလုံးကို ပြပြီးနောက် ‘ငါ့ကို တစ်ကြိမ်ပဲ ရှိခိုးဦးချမယ်ဆိုရင် ဒါတွေအားလုံး မင်းကို ပေးမယ်’” လို့ပြောတယ်။ ဒီတစ်ကြိမ်မှာလည်း ယေရှုက “စာတန်၊ ထွက်သွားစမ်း” ဆိုပြီး ပြတ်ပြတ်သားသား ငြင်းလိုက်တယ်။ (မဿဲ ၄:၈-၁၀) မှားတာလုပ်ဖို့ သွေးဆောင်ခံရတဲ့အခါ ယေရှု အလျှော့မပေးဘူး။ ယေဟောဝါဘုရား တစ်ပါးတည်းကိုပဲ ဝတ်ပြုရမယ်ဆိုတာ သူသိတယ်။ ဒါကြောင့် ဘုရားကို သစ္စာစောင့်သိဖို့ ရွေးချယ်ခဲ့တယ်။

ဒီသွေးဆောင်မှုတွေနဲ့ အဲဒါတွေကို ယေရှုရဲ့ တုံ့ပြန်ပုံကနေ သင်ယူစရာရှိတယ်။ မာရ်နတ်ဆိုတာ မမြင်နိုင်တဲ့ ပုဂ္ဂိုလ်ဖြစ်ပြီး တကယ်ရှိတယ်။ ဒါ့အပြင် မာရ်နတ်က ကမ္ဘာပေါ်မှာရှိတဲ့ တိုင်းနိုင်ငံတွေကို ချုပ်ကိုင်ထားမှန်းလည်း သိရတယ်။ အဲဒီလိုသာ မဟုတ်ဘူးဆိုရင် ခရစ်တော်ကို ဒါတွေကမ်းလှမ်းပြီး သူသွေးဆောင်ပါ့မလား။

ဒါ့အပြင် ယေရှု တစ်ကြိမ်လေးပဲ ရှိခိုးဦးချလိုက်တာနဲ့ ကမ္ဘာပေါ်မှာရှိတဲ့ တိုင်းနိုင်ငံအားလုံးပေးဖို့ အသင့်ပဲလို့ မာရ်နတ်ပြောတယ်။ ကျွန်တော်တို့ကိုလည်း မာရ်နတ် အဲဒီလို သွေးဆောင်နိုင်တယ်။ စည်းစိမ်ချမ်းသာ၊ အာဏာ၊ ရာထူးရဖို့ မက်လောက်စရာ အခွင့်အရေးတွေကို ကမ်းလှမ်းနိုင်တယ်။ ဘယ်လိုသွေးဆောင်မှုတွေပဲ လာလာ ဘုရားကို သစ္စာစောင့်သိနေခြင်းအားဖြင့် ယေရှုရဲ့ပုံသက်သေကို လိုက်လျှောက်တာက ပညာရှိရာရောက်တယ်။ ဒါပေမဲ့ မာရ်နတ်က ယေရှုကို သွေးဆောင်ပြီးနောက် ထွက်သွားပြီး “အခွင့်အခါကောင်းကို စောင့်နေတယ်” ဆိုတာ သတိပြုပါ။ (လုကာ ၄:၁၃) ကျွန်တော်တို့ကိုလည်း သွေးဆောင်ဖို့ အခွင့်အခါကောင်းကို သူစောင့်နေမှာပဲ။ ဒါကြောင့် အမြဲတမ်း သတိဝီရိယ ရှိနေရမယ်။