မာရိ (ယေရှု၏ မိခင်)

အဓိပ္ပာယ်သတ်မှတ်ချက်– ယေရှုကိုမွေးဖွားစေရန် ဘုရားသခင်ရွေးချယ်တော်မူသော အထူးမျက်နှာသာရ အမျိုးသမီးဖြစ်ပေသည်။ ကျမ်းစာ၌ အခြားမာရိငါးဦးရှိသေးသည်။ ယခုမာရိမှာ ယုဒအနွယ်၊ ဒါဝိဒ်အမျိုး၊ ဧလိ၏သမီးဖြစ်သည်။ သူ့အကြောင်း ကျမ်းစာက ပထမဆုံးအကြိမ်ဆိုသောအခါ သူသည် ယောသပ်နှင့်စေ့စပ်ထားလေပြီ။ ယောသပ်လည်း ယုဒအနွယ်၊ ဒါဝိဒ်အမျိုးဖြစ်သည်။

မာရိနှင့်ပတ်သက်သော ကျမ်းစာမှတ်တမ်းမှ ဘာသင်ခန်းစာများ ရနိုင်သနည်း

(၁) စေတမန်မှတစ်ဆင့် ဘုရားသခင်မိန့်ဆိုသောစကားကို ကြားကြားချင်း ထိတ်လန့်ချင်ထိတ်လန့်မိမည်၊ သို့မဟုတ် မဖြစ်နိုင်ဟုထင်ချင်ထင်မည်။ သို့တစေ၊ နားထောင်ရန်အသင့်ရှိဖို့လိုသည်ဟူသော သင်ခန်းစာတစ်ရပ်။​—လု. ၁:၂၆-၃၇။

(၂) ဘုရားသခင့်အလိုတော်ဖြစ်မှန်းသိလျှင် ကိုယ်တော်ကိုအကြွင်းမဲ့အားထားလျက် သတ္တိရှိရှိလုပ်ဆောင်ရန်။ (လုကာ ၁:၃၈ ရှု။ တရားဟောရာ ၂၂:၂၃၊ ၂၄ ဆိုသည့်အတိုင်း ဂျူးမိန်းကလေးတစ်ဦး လက်မထပ်မီ ကိုယ်ဝန်ရလျှင် ကြီးလေးသောအပြစ်ဒဏ်သင့်နိုင်သည်။)

(၃) လူတစ်ယောက် အဘယ်ဘဝမှာပဲရှိရှိ၊ သူ့ကိုသုံးလိုလျှင်သုံးရန် ဘုရားသခင်ဝန်မလေးပါ။​—လုကာ ၂:၂၂-၂၄ ကို ဝတ်ပြုရာ ၁၂:၁-၈ နှင့်နှိုင်းယှဉ်။

(၄) ဝိညာဏရေးရာကို ဦးထိပ်ထားခြင်း။ (လုကာ ၂:၄၁; တမန်တော် ၁:၁၄ ရှု။ ဂျူးဇနီးများ မိမိတို့လင်နှင့်အတူ နှစ်စဉ်ပသခါပွဲကျင်းပရာ ယေရုရှလင်မြို့သို့ တစ်မျှော်တစ်ခေါ် ခရီးသွားရန်မလိုသော်လည်း၊ မာရိထိုသို့ပြု၏။)

(၅) သီလစင်ကြယ်မှုကိုလေးမြတ်ခြင်း။​—လု. ၁:၃၄။

(၆) သားသမီးတို့အား ဘုရားသခင့်နှုတ်ကပါဌ်တော်ကို လုံ့လဖြင့်ပို့ချခြင်း။ (ယေရှုသက်တော် ၁၂ နှစ်အရွယ်တွင်ပြုသောအမှုကိုထောက်၍ ဤအချက်ကိုသိနိုင်သည်။ လုကာ ၂:၄၂၊ ၄၆-၄၉ ရှု။)

မာရိသည် ယေရှုကိုမွေးဖွားစဉ် တကယ်ပင် အပျိုစင်လော

လု. ၁:၂၆-၃၁ (သမ) က မာရိအမည်ရှိ “အပျိုကညာ” ထံ ကောင်းကင်တမန်ဂါဗြေလသွား၍ “သင်သည် သန္ဓေယူ၍ သားယောက်ျားကိုဖွားမြင်သဖြင့် ယေရှုဟုမှည့်ရမည်” ဟူသောသတင်း ကြားပြောခဲ့ကြောင်း တင်ပြထားသည်။ အခန်းငယ် ၃၄ ၌ မာရိက “ထိုအတိုင်း မည်သို့ဖြစ်နိုင်ပါအံ့နည်း။ ကျွန်မသည် ယောက်ျားနှင့်မဆက်ဆံပါ [“ကျွန်မသည် သတို့သမီးကညာ၊” သက] ဟု လျှောက်ဆို” လေသည်။ မဿဲ ၁:၂၂-၂၅ က ဤသို့ထပ်၍ဆို၏– “ထိုအကြောင်းအရာမူကား၊ ထာဝရဘုရားသည် ပရောဖက်အားဖြင့် ထားတော်မူသောဗျာဒိတ်တော် ပြည့်စုံမည်အကြောင်းတည်း။ ဗျာဒိတ်တော်အချက်ဟူမူကား ကြည့်ရှုလော့။ သတို့သမီးကညာသည် ပဋိသန္ဓေစွဲယူ၍ သားယောက်ျားကို ဖွားမြင်လတ္တံ့။ ထိုသားကို ဧမာနွေလအမည်ဖြင့်မှည့်ရကြလတ္တံ့ဟု လာသတည်း။ ဧမာနွေလအနက်ကား၊ ငါတို့နှင့်အတူ ရှိတော်မူသောဘုရားသခင်ဟု ဆိုလိုသတည်း။ ယောသပ်သည် အိပ်ပျော်ရာမှနိုးလျှင် ထာဝရဘုရား၏ကောင်းကင်တမန်မှာထားသည်အတိုင်းပြု၍ မိမိခင်ပွန်းကို ထိန်းသိမ်းလေ၏။ သို့သော်လည်း သားဦးကိုမဖွားမီတိုင်အောင် သံဝါသမပြုဘဲနေ၏။ ထိုသားကိုလည်း ယေရှုဟူသောအမည်ဖြင့်မှည့်လေ၏။”

၎င်းသည်ယုတ္တိတန်၏လော။ မာရိ၏သားအိမ်တွင်း၌ ဥဆဲလ်တစ်လုံးသန္ဓေအောင်စေရန် သဘာဝထက်လွန်ကဲသောနည်းဖြင့် ပြုလုပ်ခြင်းမှာ လူ့မျိုးပွားအင်္ဂါဖန်တီးသောဖန်ဆင်းရှင်အဖို့ မဖြစ်နိုင်သည့်အရာလုံးဝမဟုတ်။ မိမိ၏ကောင်းကင်သားဦး၏အသက်စွမ်းအင်နှင့် ပင်ကိုစရိုက်ပုံစံကို မာရိ၏သားအိမ်အတွင်းသို့ အံ့ဖွယ်နည်းဖြင့်ပြောင်းရွှေ့တော်မူ၏။ ကိုယ်တော့်တက်ကြွလှုပ်ရှားသောစွမ်းအား သန့်ရှင်းသောဝိညာဉ်တော်သည် မာရိဝမ်းထဲမှသူငယ်တော်၏ကြီးထွားခြင်းကို ကာကွယ်ထိန်းသိမ်းသဖြင့် စုံလင်သောလူသားအဖြစ်မွေးဖွားစေတော်မူသည်။​—လု. ၁:၃၅; ယော. ၁၇:၅။

မာရိသည် ထာဝရအပျိုစင်လော

မ. ၁၃:၅၃-၅၆– “ထိုဥပမာစကားများကို အကုန်အစင်မိန့်မြွက်တော်မူပြီးလျှင် ထိုအရပ်မှကြွသွားတော်မူ၏။ ထိုနောက်မှ မိမိမြို့သို့ရောက်တော်မူ၍ တရားဇရပ်၌ ဆုံးမသြဝါဒပေးလေ၏။ မြို့သားတို့သည် မိန်းမောတွေဝေခြင်းရှိကြသဖြင့်၊ ဤသူသည် ဤပညာကိုလည်းကောင်း၊ ဤတန်ခိုးကိုလည်းကောင်း အဘယ်မှာရသနည်း။ သူသည် လက်သမားသားမဟုတ်လော။ သူ့အမိကား မာရိအမည်ရှိသည်မဟုတ်လော။ သူညီ [ဂရိ၊ a·del·phoi΄ အဒဲလ်ဖွိုင်း] ကား၊ ယာကုပ်၊ ယောသေ၊ ရှိမုန်၊ ယုဒဟုဆိုကြသည်မဟုတ်လော။ သူ့နှမများ [ဂရိ၊ a·del·phai΄ အဒဲလ်ဖိုင်း] တို့သည်လည်း၊ ငါတို့နှင့်အနီးအပါးနေကြသည်မဟုတ်လော . . . ဟုပြောဆို [ကြသည်။]” (ဤကျမ်းချက်ကိုထောက်လျှင် ယေရှုသည် မာရိ၏တစ်ဦးတည်းသောသားဖြစ်သည်ဟုဆိုမည်လော။ သို့မဟုတ် မာရိ၌ အခြားသားသမီးများရှိသည်ဟုဆိုမည်လော။)

ကက်သလစ်စွယ်စုံကျမ်းသစ် (၁၉၆၇၊ အတွဲ ၉၊ စ. ၃၃၇) က မဿဲ ၁၃:၅၅၊ ၅၆ ပါ a·del·phoi΄ (အဒဲလ်ဖွိုင်း) နှင့် a·del·phai΄ (အဒဲလ်ဖိုင်း) ဆိုသောဂရိစကားများနှင့်ပတ်သက်၍ ၎င်းတို့သည် “ခရစ်ဝင်ကျမ်းရေးသူခေတ်၊ ဂရိစကားပြောလောကတွင် ညီအစ်ကိုမောင်နှမရင်းချာ ဟူ၍အဓိပ္ပာယ်ရှိသဖြင့် သူ့ခရစ်ဝင်ကျမ်းကိုဖတ်သော ဂရိစာရှုသူများက ထိုသို့ပင် ယူမှတ်ကြမည်” ဖြစ်ကြောင်း ဝန်ခံ၏။ “စတုတ္ထရာစုအဆုံး (၃၈၀ ခုခန့်) ရောက်သော် ဟဲလ်ဗစ်ဒစ်ယပ်စ် က ယခုပျောက်ဆုံးပြီဖြစ်သော စာအုပ်တစ်အုပ်၌ ဤအချက်ကို အလေးအနက်ထုတ်ဖော်တင်ကြသည်။ ဦးတည်ချက်မှာ၊ မာရိသည် ယေရှုအပြင် အခြားကလေးများရှိသဖြင့် သားသမီးများသောမိခင်များအဖို့ စံပြဖြစ်ကြောင်း ဂုဏ်ပြုလို၍ဖြစ်သည်။ စိန့်ဂျရုမ်းက မာရိသည် ထာဝရအပျိုစင်ဖြစ်သည်ဟူသော [ကက်သလစ်] အသင်းရှေးရိုးယုံကြည်ချက်၏လှုံ့ဆော်မှုကြောင့် ဟဲလ်ဗစ်ဒစ်ယပ်စ်ကိုဆန့်ကျင်၍ [အေ.ဒီ. ၃၈၃ တွင်] ဝေစာတစ်စောင်ရေးကာ ရှင်းလင်းချက်တစ်ရပ်တီထွင်လိုက်သည်။ . . . ၎င်းရှင်းလင်းချက်သည် ယခုတိုင် ကက်သလစ်ပညာရှင်များဘောင်တွင် ခေတ်စားဆဲပင်။”

မာ. ၃:၃၁-၃၅– “ထိုအခါ မယ်တော်နှင့်ညီတော်တို့သည် လာ၍ ပြင်မှာရပ်နေလျက်၊ တစ်စုံတစ်ယောက်သောသူကို ကိုယ်တော်ထံသို့စေလွှတ်၍ ခေါ်ကြ၏။ ခြံရံလျက်ထိုင်သောသူများတို့က မယ်တော်နှင့်ညီတော်တို့သည် ကိုယ်တော်ကိုရှာလျက် ပြင်မှာရှိကြပါ၏ဟု လျှောက်လျှင် ကိုယ်တော်က ငါ့အမိ၊ ငါ့ညီကား အဘယ်သူနည်းဟု မေးတော်မူ၍ ခြံရံလျက်ထိုင်သောသူတို့ကို ပတ်လည်ကြည့်ရှု၍ ဤသူတို့သည် ငါ့အမိ၊ ငါ့ညီပေတည်း။ ဘုရားသခင်၏အလိုတော်ကိုဆောင်သောသူသည် ငါ့ညီ၊ ငါ့နှမ၊ ငါ့အမိဖြစ်သတည်းဟု မိန့်တော်မူ၏။” (ဤတွင် ယေရှု၏ညီရင်းနှင့် ကိုယ်တော့်ဝိညာဏညီ တပည့်တော်တို့စပ်ကြား ထင်ရှားသောခြားနားချက်ရှိသည်ကို တွေ့နိုင်သည်။ ယေရှုမယ်တော်သည် အခြားသူတစ်ယောက်ဖြစ်သည်ဟု မည်သူမျှမဆိုပါ။ သို့ဖြစ်၍ ညီတော်ရင်းတို့သည် ညီတော်ရင်းမဟုတ်၊ ဝမ်းကွဲဖြစ်ဟန်တူသည်ဟုဆိုလျှင် ရှေ့နောက်ညီပါ့မည်လော။ ညီ မဟုတ်၊ ဆွေမျိုးဖြစ်လျှင် လုကာ ၂၁:၁၆ မှာကဲ့သို့ အခြားဂရိစကား [syg·genon စစ်ဂနွန် ] ကိုသုံး၏။)

မာရိသည် ဘုရားသခင့်မယ်တော်လော

သင်သည် အံ့ဖွယ်နည်းဖြင့်သားဖွားမည်ဟု မာရိအား ပြောကြားသောကောင်းကင်တမန်က မာရိ၏သားသည် ဘုရားသခင်ဖြစ်မည်ဟုမဆိုချေ။ သူဤသို့ဆို၏– “သင်သည် ပဋိသန္ဓေစွဲယူ၍ သားယောက်ျားကိုဖွားမြင်လိမ့်မည်။ ထိုသားကို ယေရှုအမည်ဖြင့် မှည့်ရမည်။ ထိုသားသည်ကား၊ ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား၏သားတော် ဟု ခေါ်ဝေါ်သမုတ်ခြင်းကို ခံရလိမ့်မည်။ . . . ထိုသန့်ရှင်းသောသားသည်လည်း ဘုရားသခင်၏သားတော်ဟု ခေါ်ဝေါ်သမုတ်ခြင်းကို ခံရလိမ့်မည်။”​—လု. ၁:၃၁-၃၅။ ဖြည့်စွက်စာလုံးစောင်း။

ဟေဗြဲ ၂:၁၄၊ ၁၇– “ထိုသူငယ်တို့သည် အသွေးအသားနှင့်ဆက်ဆံကြသောကြောင့် ခရစ်တော်သည် . . . ထိုသူငယ်တို့၏နည်းတူ အသွေးအသားကို ဆောင်ယူတော်မူ၏။ . . . ခရစ်တော်သည် . . . မိမိညီအစ်ကိုတို့နှင့် လုံးလုံးတူရသောအကြောင်းရှိ၏။” (ယေရှုသည် ဘုရားတစ်ပိုင်း၊ လူတစ်ပိုင်း ဖြစ်လျှင် “မိမိညီအစ်ကိုတို့နှင့် လုံးလုံးတူ” ပါ့မည်လော။)

ကက်သလစ်စွယ်စုံကျမ်းသစ် က ဤသို့ဆို၏– “မာရိသည် တကယ်ပင် ယေရှု၏မယ်တော်ဖြစ်သည်၊ ယေရှုလည်း တကယ်ပင် ဘုရားသခင်ဖြစ်သည်ဆိုသောအချက်နှစ်ချက်နှင့်ပြည့်စုံလျှင် မာရိသည် ဘုရားသခင့်မယ်တော် စင်စစ်ဖြစ်၏။” (၁၉၆၇၊ အတွဲ ၁၀၊ စ. ၂၁) ကျမ်းစာက မာရိသည် ယေရှု၏မိခင်ဖြစ်သည်ဟုဆို၏။ သို့သော် ယေရှုသည် ဘုရားသခင်လော။ ကျမ်းစာရေးပြီး၍ များစွာကြာမြင့်ပြီဖြစ်သော စတုတ္ထရာစု၌ ကက်သလစ်အသင်းက မိမိ၏သုံးပါးပေါင်းတစ်ဆူအယူဆိုင်ရာအဆိုကို တိကျစွာပုံဖော်လေသည်။ (ကက်သလစ်စွယ်စုံကျမ်းသစ်၊ ၁၉၆၇၊ အတွဲ ၁၄၊ စ. ၂၉၅; “သုံးပါးပေါင်းတစ်ဆူ” ခေါင်းစဉ်အောက် စာမျက်နှာ ၃၅၀ ကိုရှု။) ထိုအချိန် ကက်သလစ်အသင်း၏ နိုင်စင်းအယူဝါဒပြဋ္ဌာန်းချက်၌ ယေရှုခရစ်သည် “ဘုရားသခင်ပင်” ဖြစ်သည်ဟုဆိုထားသည်။ ထို့နောက် စီ.အီး. ၄၃၁၊ ဧဖက်ညီလာခံ၌ ကက်သလစ်အသင်းက မာရိကို The·o·toʹkos (သီအိုတိုးကို့စ်) ဖြစ်သည်ဟု ကြေညာလိုက်သည်။ အဓိပ္ပာယ်မှာ “ဘုရားသခင်ကိုမွေးဖွားသူ၊” သို့မဟုတ်၊ “ဘုရားသခင့်မယ်တော်” တည်း။ သို့ရာတွင်၊ ထိုအခေါ်အဝေါ်ဖြစ်စေ၊ ထိုသဘောဖြစ်စေ မည်သည့်ကျမ်းစာဘာသာပြန်၌မျှ မတွေ့ရ။ (“ယေရှုခရစ်” ခေါင်းစဉ်အောက် စာမျက်နှာ ၂၃၇-၂၄၁ ကိုရှု။)

မာရိကိုယ်တိုင် အမိဝမ်းတွင်း ပဋိသန္ဓေယူစဉ် မူလအပြစ်မပါ ခြောက်ပြစ်ကင်းသလော

ကက်သလစ်စွယ်စုံကျမ်းသစ် (၁၉၆၇၊ အတွဲ ၇၊ စစ. ၃၇၈-၃၈၁) က ထိုအယူ၏ဇာစ်မြစ်နှင့်ပတ်သက်၍ ဤသို့ဝန်ခံ၏– “. . . ကျမ်းစာ၌ ခြောက်ပြစ်ကင်း သန္ဓေယူတော်မူခြင်းအယူကို အတိအလင်း မသွန်သင်ပါ။ . . . အသင်းတော်၏ ရှေးအာဏာပိုင်ဘာသာရေး စာရေးဆရာများက မာရိကို သန့်ရှင်းသော်လည်း ခြောက်ပြစ်မကင်းသူအဖြစ် ယူမှတ်ကြ၏။ . . . အထက်ပါအယူ မည်သည့်အချိန်၌ ယုံကြည်ချက်တစ်ရပ်ဖြစ်လာသည်ကို အတိအကျမပြောနိုင်။ သို့သော် ၈ သို့မဟုတ် ၉ ရာစုရောက်သော် ၎င်းကို အများတကာ ခံယူလာကြသည်။ . . . [၁၈၅၄ တွင်၊ ပုပ်ရဟန်း လေးယောက်မြောက် ပိုင်းယပ်စ်က ယင်း တရားသေအယူဝါဒကို အနက်ဖွင့်သည်။] ‘ထိုဖွင့်ဆိုချက်အရ၊ အမြတ်ဆုံးသော အပျိုစင်မာရိသည် သန္ဓေယူလျှင်ယူချင်း မူလအပြစ်၏စွန်းထင်းမှုရှိသမျှနှင့် ကင်းစင်၏။’” ယင်းယုံကြည်ချက်ကို ဒုတိယအကြိမ်ဗက်တီကင်ညီလာခံ (၁၉၆၂-၁၉၆၅) က အတည်ပြုလိုက်သည်။​—ဒုတိယအကြိမ်ဗက်တီကင်ညီလာခံမှတ်တမ်းများ၊ (နယူးယောက်၊ ၁၉၆၆)၊ ယေရှုအသင်းသား၊ အမ်. ဒဗ္ဗလျူ. အဘော့တ်၊ တည်းဖြတ်သည်၊ စ. ၈၈။

ကျမ်းစာကိုယ်၌ ဤသို့ဆို၏– “အပြစ်တရားသည် တစ်ယောက်သောသူ [အာဒံ] အားဖြင့် ဤလောကသို့ဝင်၍၊ အပြစ်တရားအားဖြင့် သေခြင်းတရားဝင်သည်နှင့်အညီ လူအပေါင်း [“လူတိုင်း၊” JB] တို့သည် အပြစ်ရှိသောကြောင့် သေခြင်းသို့ရောက်ရကြ၏။” (ရော. ၅:၁၂။ ဖြည့်စွက်စာလုံးစောင်း) မာရိအပါအဝင်လော။ ကျမ်းစာက မာရိသည် ယေရှုကိုဖွားမြင်၍ အရက် ၄၀ အကြာတွင် မောရှေပညတ်တောင်းဆိုချက်နှင့်အညီ မစင်ကြယ်မှုကိုသုတ်သင်ရန် ဗိမာန်တော်၌ အပြစ်ဖြေရာယဇ်ကိုပူဇော်ခဲ့သည်ဟု တင်ပြ၏။ သူလည်း အာဒံမှ အပြစ်နှင့်မစုံလင်မှုကို အမွေရခဲ့၏။​—လု. ၂:၂၂-၂၄; ဝတ်. ၁၂:၁-၈။

မာရိသည် သွေးသားခန္ဓာနှင့်တကွ ကောင်းကင်သို့တက်ခဲ့သလော

အဆိုပါ တရားသေအယူဝါဒကို ကက်သလစ်အသင်း၏တရားဝင်ယုံကြည်ချက်တစ်ရပ်အဖြစ်၊ ပုပ်ရဟန်း ဆယ့်နှစ်ယောက်မြောက် ပိုင်းယပ်စ်က ၁၉၅၀ ခုနှစ်၌ ကြေညာခဲ့ရာ ယင်းကြေညာချက်နှင့်ပတ်သက်၍ ကက်သလစ်စွယ်စုံကျမ်းသစ် (၁၉၆၇၊ အတွဲ ၁၊ စ. ၉၇၂) က ဤသို့ဆို၏– “[မာရိသေလျှင်သေချင်း ခန္ဓာနှင့်တကွ ကောင်းကင်သို့ချီဆောင်ခံရသည်ဟူသော] ယူဆချက်နှင့်စပ်လျဉ်းသည့် တိကျပြတ်သားသော ရည်ညွှန်းချက်ကို ကျမ်းစာ၌မတွေ့ရပါ။ သို့ပါလျက်နှင့်၊ ပုပ်ရဟန်းက ၎င်းအမှန်တရား၏အခိုင်မာဆုံး အခြေအမြစ်မှာ ကျမ်းစာပင်ဖြစ်သည် ဟူသောပြဋ္ဌာန်းချက်ကို အတင်းအကျပ် ထုတ်ပြန်လိုက်သည်။”

ကျမ်းစာကိုယ်၌ ဤသို့ဆို၏– “လူအသွေးအသားသည် ဘုရားသခင်၏နိုင်ငံတော်ကို အမွေမခံနိုင်။ ပုပ်တတ်သောအရာသည် မပုပ်နိုင်သောအဖြစ်ကို အမွေမခံနိုင်။” (၁ ကော. ၁၅:၅၀) ယေရှုက ဘုရားသခင်သည် “ဝိညာဉ်” ဖြစ်တော်မူ၏ဟုဆို၏။ ယေရှုထမြောက်စဉ် ဝိညာဉ်ဖြစ်ပြန်၏။ “အသက်ရှင်စေတတ်သောဝိညာဉ်” ဖြစ်တော်မူ၏။ ကောင်းကင်တမန်များသည် ဝိညာဉ်များဖြစ်ကြ၏။ (ယော. ၄:၂၄; ၁ ကော. ၁၅:၄၅; ဟေဗြဲ ၁:၁၃၊ ၁၄) မည်သူမည်ဝါသည် လူ့ခန္ဓာနှင့်တကွ ကောင်းကင်ဘဝကို ရယူခဲ့သည်ဟုဆိုနိုင်ရန် ကျမ်းစာ အထောက်အထား အဘယ်မှာရှိသနည်း။ လူ့ခန္ဓာသည် ကမ္ဘာ့ပတ်ဝန်းကျင်အခြေအနေမျိုးအောက်မှာသာ အသက်ရှင်နိုင်သည်။ (“ရှင်ပြန်ထမြောက်ခြင်း” ခေါင်းစဉ်အောက် စာမျက်နှာ ၂၇၁-၂၇၄ ကိုရှု။)

မာရိကို ကြားဖျန်အဖြစ်ထား၍ သူ့ထံဆုတောင်းသင့်သလော

ယေရှုခရစ်က “သင်တို့ဆုတောင်းရမည်မှာ၊ ကောင်းကင်ဘုံ၌ရှိတော်မူသော ကျွန်ုပ်တို့အဘ၊ . . . ” ဟူ၍လည်းကောင်း၊ “ငါသည် လမ်းခရီးဖြစ်၏။ သမ္မာတရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုလျှင် အဘယ်သူမျှ ခမည်းတော်ထံသို့မရောက်ရ။ . . . သင်တို့သည် ငါ၏နာမကိုအမှီပြု၍ တစ်စုံတစ်ခုသောဆုကိုတောင်းလျှင် တောင်းသည်အတိုင်း ငါပြုမည်” ဟူ၍လည်းကောင်း မိန့်တော်မူသည်။​—မ. ၆:၉; ယော. ၁၄:၆၊ ၁၄; ဖြည့်စွက်စာလုံးစောင်း။

ယေရှုခရစ်မှတစ်ဆင့် ခမည်းတော်ထံဆုတောင်းခြင်းသည် မိန်းမသားဘဝ၌ကျင်လည်ခဲ့သူတစ်ဦးမှတစ်ဆင့် ဆုတောင်းသလောက် ခမည်းတော်၏နားလည်မှုနှင့်ကြင်နာသနားမှုကို ရစေနိုင်မည်လော။ ခမည်းတော်နှင့်ပတ်သက်၍ ကျမ်းစာဤသို့ဆို၏– “အဘသည်သားတို့ကို သနားစုံမက်သည်နည်းတူ၊ ထာဝရဘုရားသည် ကြောက်ရွံ့သောသူတို့ကို သနားစုံမက်တော်မူ၏။” “ချစ်သနားခြင်းမေတ္တာကရုဏာနှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့်ကြွယ်ဝတော်မူထသော . . . ဘုရားသခင်” ဖြစ်တော်မူ၏။ (ဆာ. ၁၀၃:၁၃၊ ၁၄; ထွ. ၃၄:၆၊ ၇) ခရစ်တော်နှင့်စပ်လျဉ်း၍ ဤသို့ရေးထားသည်– “ငါတို့၏ယဇ်ပုရောဟိတ်မင်းသည် ငါတို့၏အားနည်းချက်များအတွက် မကြင်နာနိုင်သူမဟုတ်။ ငါတို့နည်းတူ စုံစမ်းသွေးဆောင်ခြင်းအမျိုးမျိုးကိုခံခဲ့ရသူဖြစ်တော်မူ၏။ သို့ရာတွင် ကိုယ်တော်သည် အပြစ်ဒုစရိုက်နှင့် ကင်းလွတ်တော်မူ၏။ သို့ဖြစ်၍ ငါတို့သည် ရဲရင့်သောစိတ်နှင့် ကျေးဇူးပလ္လင်တော်သို့ တိုးဝင်ချဉ်းကပ်ကြစို့။ သို့ပြုလျှင် ငါတို့လိုအပ်ချိန်၌ ကရုဏာတော်နှင့်ကျေးဇူးတော်ကို ခံစားကြရလိမ့်မည်။”​—ဟေဗြဲ ၄:၁၅၊ ၁၆၊ သက။

မာရိ၏ရုပ်တုများကိုကိုးကွယ်ခြင်းသည် ကျမ်းစာ၏ခရစ်ယာန်အယူဝါဒနှင့် ညီညွတ်သလော

ဒုတိယအကြိမ်ဗက်တီကင်ညီလာခံ (၁၉၆၂-၁၉၆၅) က ထိုသို့ပြုရန် ဧကန်အားပေး၏။ “အသန့်ရှင်းဆုံးသောဤညီလာခံက . . . ဝတ်နည်း၊ အထူးသဖြင့်၊ အမြတ်ဆုံးသောအပျိုစင်ဆိုင်ရာဝတ်ပြုမှုအခမ်းအနားကို ရက်ရက်ရောရော အားပေးချီးမြှင့်ကြပါရန် အသင်းတော်သားအားလုံးအား ဆုံးမတိုက်တွန်းပါ၏။ ရာစုနှစ်များတစ်လျှောက် အသင်းတော်၏သွန်သင်ခြင်းအာဏာပိုင် ထောက်ခံသည့်အတိုင်း အပျိုစင်ကိုဆည်းကပ်ကိုးကွယ်သော ကျင့်ထုံးနှင့် ဝတ်ပြုနည်းများကို အမြတ်တနိုးထားကြရန်လည်းကောင်း၊ ခရစ်တော်၊ အမြတ်ဆုံးသောအပျိုစင်နှင့် သန့်ရှင်းသူတို့၏ရုပ်ပွားဆင်းတုများကိုးကွယ်ခြင်းဆိုင်ရာ ယခင်ထုတ်ပြန်ချက်များကို ဘာသာရေးအရ လိုက်နာစောင့်ထိန်းကြရန်လည်းကောင်း အမိန့်ပေးသည်။”​—ဒုတိယအကြိမ်ဗက်တီကင်ညီလာခံမှတ်တမ်းများ၊ စစ. ၉၄၊ ၉၅။

ကျမ်းစာအဖြေအတွက် စာမျက်နှာ ၂၆၆-၂၇၀ ပါ “ရုပ်တု” ကိုရှု။

ပထမရာစုခရစ်ယာန်အသင်းတော်တွင် မာရိကို အထူးဂုဏ်ပြုသလော

တမန်တော်ပေတရုသည် မိမိ၏မှုတ်သွင်းခံသြဝါဒစာစောင်များ၌ သူမအကြောင်း လုံးဝမရေးသားပါ။ တမန်တော်ပေါလုက မိမိ၏မှုတ်သွင်းခံသြဝါဒစာစောင်များ၌ သူမ၏အမည်ကို မသုံးဘဲ “မိန်းမ” ဟုသာ ညွှန်းဆိုသည်။​—ဂလ. ၄:၅။

ယေရှုကိုယ်တော်တိုင် မိမိ၏မိခင်အကြောင်း မိန့်ဆိုစဉ် အဘယ်ပုံသက်သေထားခဲ့သနည်း

ယော. ၂:၃၊ ၄– “စပျစ်ရည်ကုန်သောအခါ၊ ယေရှု၏မယ်တော်က၊ စပျစ်ရည်မရှိဟု ကြားပြော၏။ ယေရှုကလည်း၊ အချင်းမိန်းမ၊ သင်သည် ငါနှင့်အဘယ်သို့ဆိုင်သနည်း။ ငါ့အချိန်မရောက်သေးဟု မိန့်တော်မူ၏။” (ယေရှုငယ်စဉ်အခါ၊ မိခင်နှင့်မွေးစားဖခင်တို့ကို နာခံခဲ့၏။ သို့သော် ယခုကြီးပြင်းပြီဖြစ်၍ မာရိ၏ညွှန်ကြားချက်ကိုကြင်နာစွာ၊ မြဲမြံစွာ ပယ်တော်မူ၏။ မာရိလည်း ပဲ့ပြင်မှုကို နှိမ့်ချစွာလက်ခံလိုက်ပေသည်။)

လု. ၁၁:၂၇၊ သက– “သခင်ယေရှုသည် ဤသို့မိန့်တော်မူပြီးသောအခါ၊ လူပရိသတ်ထဲကအမျိုးသမီးတစ်ယောက်သည် “အရှင့်ကိုမွေး၍ နို့တိုက်ရသောအမျိုးသမီးသည် မင်္ဂလာရှိပါ၏” ဟု လျှောက်၏။ သို့ရာတွင် ကိုယ်တော်က “ထာဝရဘုရား၏နှုတ်ကပါဌ်တော်ကိုကြား၍ လိုက်နာသူသည် မင်္ဂလာရှိ၏ဟုဆိုလျှင် ပို၍သင့်မြတ်လိမ့်မည်” ဟူ၍မိန့်တော်မူ၏။” (မာရိအား အထူးဂုဏ်ပြုသင့်ပါက ယေရှုအဖို့ ထိုအခိုက်အခါသည် ထိုသို့ပြုရန် အခွင့်ကောင်းဖြစ်ပေလိမ့်မည်။ သို့သော် ယေရှုထိုသို့မပြုပါ။)

မာရိကိုဆည်းကပ်ကိုးကွယ်ခြင်း၏သမိုင်းအစကား အဘယ်နည်း

ကက်သလစ်ဘုန်းကြီး အင်ဒရူးဂရိစလီက ဤသို့ဆို၏– “မာရိသည် အနောက်ကမ္ဘာ့သမိုင်းတွင် တန်ခိုးအကြီးမားဆုံးဘာသာရေးအထိမ်းအမှတ်တစ်ရပ်ဖြစ်သည်။ . . . မာရိအထိမ်းအမှတ်သည် ခရစ်ယာန်ဘာသာကို မယ်တော်ဘုရားများနှင့်ဆိုင်သော ရှေးဘာသာတရားများနှင့် တိုက်ရိုက်ဆက်စပ်စေသည်။”​—ပုပ်ရဟန်းများ တင်မြှောက်ခြင်း ၁၉၇၈ (ယူ.အက်စ်.အေ.၊ ၁၉၇၉)၊ စ. ၂၂၇။

မာရိသည်ဘုရားသခင့်မယ်တော်ဖြစ်သည်ဟူသောအယူကို အတည်ပြုသည့်ဒေသသည် စိတ်ဝင်စားဖွယ်ဖြစ်၏။ “ဧဖက်ညီလာခံသည် ၄၃၁ ခုနှစ်၊ သီအိုတိုးကို့စ်မြို့ရှိ ဘုရားကျောင်းဆောင်ကြီး၌ ကျင်းပသည်။ ထိုမြို့သည် နတ်ဘုရားမ အာတေမိ၊ သို့မဟုတ်၊ ရောမလူတို့အခေါ်၊ ဒိုင်ယာနာကိုဆည်းကပ်ကိုးကွယ်ခြင်း၌ အထူးကျော်ကြားသည့်ပြင်၊ ထိုနေရာ၌ ထိုဘုရားမ၏ရုပ်တု ကောင်းကင်မှ ထိုမဟာဗိမာန်၏အရိပ်အောက် ကျရောက်သည်ဟူ၏။ ထိုဗိမာန်ကို ဘီ.စီ. ၃၃၀ မှစ၍ နတ်ဘုရားမ မဂ်နာမေးတာထံဆက်ကပ်ထားသည်။ ဆိုရိုးစကားအရ၊ ထိုဗိမာန်၌ မာရိယာယီတည်းခိုခဲ့သည်ဆို၏။ သို့ဖြစ်ရကား၊ ထိုမြို့၌ “ဘုရားသခင်ကိုမွေးဖွားသူ” ဟူသောဘွဲ့ကို အတည်ပြုရန် ပျက်ကွက်ဖို့အကြောင်းနည်းလှ၏။”​—မယ်တော်ဘုရားမ ကိုးကွယ်မှု (နယူးယောက်၊ ၁၉၅၉)၊ အီး.အို.ဂျိမ်းစ်၊ စ. ၂၀၇။

တစ်စုံတစ်ယောက်က ဤသို့ပြောလျှင်​—

‘အပျိုစင်မာရိကို ခင်ဗျားတို့ယုံကြည်သလား’

ဤသို့ ပြန်ပြောနိုင်သည်– ‘ကျမ်းစာက ယေရှုခရစ်ရဲ့မိခင်ဟာ အပျိုဖြစ်တယ်လို့ ရှင်းရှင်းလင်းလင်းပြောထားပါတယ်။ ဒါကို ကျွန်တော်တို့ ယုံကြည်တယ်။ ဘုရားသခင်ဟာ ယေရှုရဲ့ခမည်းတော်ဖြစ်တယ်။ ကောင်းကင်တမန်က မာရိကိုပြောသလို၊ ဖွားမြင်တဲ့သူငယ်ဟာ ဘုရားသခင်ရဲ့သားတော်အမှန်ဖြစ်တယ်။ (လု. ၁:၃၅)’ ထို့နောက် ဤသို့ထပ်၍ဆိုနိုင်သည်– ‘ယေရှု အပျိုကညာကမွေးလာဖို့ ဘာကြောင့်ဒီလောက်တောင်အရေးကြီးသလဲဆိုတာကို မိတ်ဆွေစဉ်းစားဖူးသလား။ . . . ဒီလိုမွေးဖွားလို့သာ ကျွန်တော်တို့ အပြစ်နဲ့သေခြင်းကလွတ်မြောက်နိုင်ဖို့လိုအပ်တဲ့ယဇ်ကို ပူဇော်နိုင်ပါတယ်။​—၁ တိ. ၂:၅၊ ၆; ယောဟန် ၃:၁၆ ကိုပါတင်ပြနိုင်သည်။’

သို့မဟုတ် ဤသို့ပြောနိုင်သည်– ‘ကျွန်တော်တို့ ယုံကြည်ပါတယ်။ သူနဲ့ပတ်သက်ပြီး ကျမ်းစာမှာပြောသမျှကို ကျွန်တော်တို့ယုံတယ်။ ကျမ်းစာက မာရိ ယေရှုကိုမွေးတဲ့အခါ အပျိုဖြစ်တယ်ဆိုပြီး အတိအကျဆိုပါတယ်။ ဒိပြင် မာရိနဲ့ပတ်သက်ပြီး စိတ်ချမ်းမြေ့စရာကောင်းတဲ့ တခြားအကြောင်းတွေ၊ သူ့ဆီက ကျွန်တော်တို့ရယူနိုင်တဲ့သင်ခန်းစာတွေကိုလဲ ကျမ်းစာထဲမှာ ကျွန်တော်ဖတ်ရတယ်။ (စာမျက်နှာ ၂၁၀ ပါ အကြောင်းများကိုသုံးပါ။)

‘ခင်ဗျားတို့ အပျိုစင်မာရိကို မယုံကြည်ကြဘူး’

ဤသို့ ပြန်ပြောနိုင်သည်– ‘အပျိုတစ်ယောက်က ဘုရားသခင်ရဲ့သားတော်ကို ဖွားမြင်တယ်ဆိုတဲ့အချက်ကို တချို့လူတွေ မယုံကြည်ကြမှန်း ကျွန်တော်သတိပြုမိပါတယ်။ ကျွန်တော်တို့အနေနဲ့တော့၊ ဒါကိုတကယ် ယုံတယ်။ (ကျွန်ုပ်တို့၏စာအုပ်တစ်အုပ်အုပ်ကိုဖွင့်ပြီး ယင်းအကြောင်းကိုဆွေးနွေးသောအပိုင်းကို အိမ်ရှင်အား တင်ပြပါ။)’ ထို့နောက် ဤသို့ထပ်၍ဆိုနိုင်သည်– ‘ကယ်တင်ခြင်းရဖို့ ဒါကိုယုံကြည်ရတဲ့အပြင်၊ နောက်ထပ်ဘာလိုသေးသလဲ။ . . . ခမည်းတော်ဆီ ယေရှုဆုတောင်းတဲ့အခါ ဘယ်လိုပြောသလဲဆိုတာကို တစ်ဆိတ်လောက်သတိပြုပါ။ (ယော. ၁၇:၃)’