ထိုးထွင်းသိမြင်မှုနှင့် သွေးဆောင်နိုင်စွမ်းဖြင့်သွန်သင်ပါလေ

“ပညာရှိသောသူ၏စိတ်နှလုံးသည် နှုတ်ကိုသွန်သင် [“မိမိ၏နှုတ်တွင် ထိုးထွင်းသိမြင်မှုကို မြင်သာစေ၊” ကဘ] ၍၊ သူ၏နှုတ်ခမ်း၌သွေးဆောင်ခြင်းစကားကို ထပ်လောင်းတတ်၏။”—သု. ၁၆:၂၃၊ သမ္မာ။

၁။ ဘုရားသခင့်နှုတ်မြွက်စကားတော်ကိုသွန်သင်ခြင်းတွင် အဘယ်ကြောင့် သတင်းအချက်အလက်များကိုပေးခြင်းထက်မက ပါဝင်သနည်း။

ဘုရားသခင့်နှုတ်မြွက်စကားတော်သွန်သင်သူများအနေနှင့် ကျွန်ုပ်တို့၏ပန်းတိုင်သည် သင်သား၏စိတ်ကိုသာမက နှလုံးကိုပါ ဉာဏ်အလင်းပေးဖို့ဖြစ်သည်။ (ဧဖက် ၁:၁၉) ထို့ကြောင့် သွန်သင်ခြင်းဆိုရာ၌ သတင်းအချက်အလက်များပေးခြင်းထက်မကပါဝင်၏။ နယပုံပြင် ၁၆:၂၃ [သမ္မာ] ကဤသို့ဆိုသည်– “ပညာရှိသောစိတ်နှလုံးသည် နှုတ်ကိုသွန်သင် [“မိမိ၏နှုတ်တွင် ထိုးထွင်းသိမြင်မှုကိုမြင်သာစေ၊” ကဘ] ၍ သူ၏နှုတ်ခမ်း၌ သွေးဆောင်ခြင်းစကားကိုထပ်လောင်းတတ်၏။”

၂။ (က) သွေးဆောင်ခြင်းဟူသည် အဘယ်နည်း။ (ခ) ခရစ်ယာန်အားလုံးသည် သွေးဆောင်နိုင်စွမ်းရှိသော သွန်သင်သူများ မည်သို့ဖြစ်နိုင်သနည်း။

^၂ တမန်တော်ပေါလုသည် သူ၏သွန်သင်ခြင်းလုပ်ငန်းတွင် ဤမူကို အသေအချာအသုံးချခဲ့သည်။ သူသည် ကောရိန္သုမြို့တွင်ရှိနေချိန်၌ “ဥပုသ်နေ့မပြတ် တရားဇရပ်၌ ဆွေးနွေးဟောပြော၍၊ ယုဒလူနှင့်ဟေလသလူတို့ကို ဖြားယောင်းသွေးဆောင်လေ၏။” (တမန်တော် ၁၈:၄) တတ်ကျွမ်းသူတစ်ဦးအဆိုအရ ဤတွင် “သွေးဆောင်” ဟုပြန်ဆိုထားသော ဂရိစကားလုံးသည် “ဆင်ခြင်မှု သို့မဟုတ် ကျင့်ဝတ်ဆိုင်ရာသုံးသပ်မှုများ၏သြဇာလွှမ်းမိုးမှုဖြင့် စိတ်သဘောထားပြောင်းလဲစေခြင်း” ဟူ၍အဓိပ္ပာယ်ရှိသည်။ ပေါလုသည် ယုံကြည်စိတ်ချနိုင်သောအကြောင်းပြချက်များဖြင့် လူတို့၏တွေးခေါ်ပုံကိုပြောင်းလဲဖို့ လှုံ့ဆော်ပေးနိုင်ခဲ့သည်။ သူ၏သွေးဆောင်မှုစွမ်းရည်သည် ထက်မြက်လှရာ ရန်သူများက သူ့ကိုစိုးရွံ့ခဲ့ကြသည်။ (တမန်တော် ၁၉:၂၄-၂၇) သို့သော် ပေါလု၏သွန်သင်ခြင်းသည် လူ့စွမ်းရည်ပြပွဲတစ်ခုမဟုတ်ခဲ့ပါ။ ကောရိန္သုမြို့သားများကို သူဤသို့ဆိုခဲ့သည်– “သင်တို့၏ယုံကြည်ခြင်းသည် လူပညာအားဖြင့်မတည်၊ ဘုရားသခင်၏တန်ခိုးတော်အားဖြင့်တည်စေခြင်းငှာ၊ ငါ့စကား၊ ငါ့ [တရားတော်] သည် လူပညာနှင့်ယှဉ်သောဖြားယောင်းသောစကားနှင့်တကွ ရှိသည်မဟုတ်။ ဝိညာဉ်တော်၏နိမိတ်လက္ခဏာတန်ခိုးတော်နှင့်တကွရှိ၏။” (၁ ကောရိန္သု ၂:၄၊ ၅) ခရစ်ယာန်အားလုံးသည် ယေဟောဝါဘုရားသခင်၏ဝိညာဉ်တော်အကူအညီကို ရရှိကြသောကြောင့် သွေးဆောင်နိုင်စွမ်းရှိသောသွန်သင်သူများဖြစ်လာနိုင်ကြပေမည်။ သို့သော် မည်သို့နည်း။ ထိရောက်သောသွန်သင်နည်းတချို့ကို သုံးသပ်ကြည့်ကြစို့။

ကောင်းစွာနားထောင်သူဖြစ်ပါ

၃။ အခြားသူများကိုသွန်သင်သောအခါ ထိုးထွင်းသိမြင်မှုအဘယ်ကြောင့်လိုသနည်း။ ကျွန်ုပ်တို့သည် ကျမ်းစာသင်သား၏နှလုံးကို မည်သို့ထိမိနိုင်သနည်း။

^၃ ပထမသွန်သင်နည်းမှာ စကားမပြောရဘဲနားထောင်ရသည်။ နယပုံပြင် ၁၆:၂၃ တွင်ဖော်ပြထားသကဲ့သို့ သွေးဆောင်တတ်ရန် ကျွန်ုပ်တို့၌ ထိုးထွင်းသိမြင်မှုရှိရမည်။ ယေရှုသည် မိမိသွန်သင်ပေးသူများနှင့်ပတ်သက်၍ အမှန်ပင်ထိုးထွင်းသိမြင်ခဲ့သည်။ ယောဟန် ၂:၂၅ ကဤသို့ဆိုသည်– ကိုယ်တော်သည် “လူတို့အထဲ၌ရှိသမျှကို သိတော်မူ” ၏။ သို့သော် ကျွန်ုပ်တို့သွန်သင်ပေးသူတို့၏နှလုံးထဲရှိသည့်အရာကို မည်သို့သိနိုင်မည်နည်း။ တစ်နည်းမှာ ကောင်းစွာနားထောင်သူဖြစ်ခြင်းအားဖြင့်ဖြစ်သည်။ ယာကုပ် ၁:၁၉ ကဤသို့ဆိုသည်– “ခပ်သိမ်းသောသူတို့သည် နားကြားခြင်းငှာလျင်မြန်ကြစေ၊ စကားပြောခြင်းငှာ . . . နှေးကြစေ။” လူတိုင်းသည် မိမိတို့၏သဘောထားများကို လွယ်လွယ်နှင့်ထုတ်ပြောမည်မဟုတ်သည်မှာ မှန်ပါသည်။ ကျမ်းစာသင်သားများသည် သူတို့ကို ကျွန်ုပ်တို့အမှန်တကယ်စိတ်ဝင်စားကြောင်း ယုံကြည်စိတ်ချလာကြသည်နှင့်အမျှ သူတို့အမှန်ခံစားနေရသည်များကို ထုတ်ပြောလိုစိတ်ပိုရှိလာပေမည်။ ကြင်နာမှုရှိကာ ပိုင်းခြားသိမြင်နိုင်စွမ်းရှိသောမေးခွန်းများသည် နှလုံးကိုထိမိစေရန် ကျွန်ုပ်တို့ကိုမကြာခဏထောက်ကူတတ်ပြီး ထိုသို့သောခံစားချက်များကို “ခပ်ယူ” တတ်သည်။—သု. ၂၀:၅။

၄။ ခရစ်ယာန်အကြီးအကဲများသည် အဘယ်ကြောင့် ကောင်းစွာနားထောင်သူများဖြစ်ရမည်နည်း။

^၄ ခရစ်ယာန်အကြီးအကဲများသည် ကောင်းစွာနားထောင်သူများဖြစ်ဖို့ အထူးအရေးကြီး၏။ သို့မှသာ “လူအသီးအသီးတို့အား အဘယ်သို့ပြန်ပြောရမည်ကို [သူတို့] သိနိုင်” မည်။ (ကောလောသဲ ၄:၆) နယပုံပြင် ၁၈:၁၃ ကဤသို့သတိပေးထားသည်– “အကျိုးအကြောင်းကိုမစစ်မီ၊ အမှုစီရင်သောသူသည် မိုက်သောအပြစ်၊ အရှက်ကွဲရသောအပြစ်ရှိ၏။” တစ်ခါက ရည်ရွယ်ချက်ကောင်းရှိသောညီအစ်ကိုနှစ်ဦးသည် ညီအစ်မတစ်ဦးအား လောကနှင့်ပတ်သက်၍ သွန်သင်ချက်ပေးခဲ့သည်၊ အကြောင်းမှာ အစည်းအဝေးတချို့ကို မတက်၍ဖြစ်သည်။ သူမတက်ရောက်ရသည့်အကြောင်းကို သူတို့မမေးစမ်းခဲ့ကြ၍ အလွန်စိတ်ထိခိုက်ခဲ့သည်။ သူသည် မကြာမီက ခွဲစိတ်ကုသမှုခံရာမှ နာလန်ပြန်ထလာနေဆဲဖြစ်ခဲ့သည်။ ထို့ကြောင့် သွန်သင်ချက်မပေးမီ နားထောင်ဖို့မည်မျှအရေးကြီးလှသည်တကား!

၅။ ညီအစ်ကိုချင်း၏ အငြင်းပွားမှုများကို အကြီးအကဲများ မည်သို့ကိုင်တွယ်နိုင်သနည်း။

^၅ အကြီးအကဲများအတွက်၊ သွန်သင်ခြင်းဟူသည် အခြားသူများကို သွင်သင်ချက်ပေးခြင်း ပါဝင်လေ့ရှိသည်။ ဤတွင်လည်း ကောင်းစွာနားထောင်သူဖြစ်ဖို့အရေးကြီး၏။ နားထောင်ခြင်းသည် ခရစ်ယာန်ချင်းစပ်ကြားတွင် အငြင်းပွားမှုများဖြစ်ပေါ်သောအခါ အထူးသဖြင့်လိုအပ်သည်။ နားထောင်ပြီးနောက်မှသာ အကြီးအကဲများသည် “မျက်နှာမငဲ့ဘဲစီရင်ဆုံးဖြတ်တော်မူသောအရှင်” ကိုတုပနိုင်သည်။ (၁ ပေတရု ၁:၁၇၊ သမ) ထိုသို့သောအခြေအနေများတွင် စိတ်လှုပ်ရှားမှုပြင်းထန်တတ်ရာ အကြီးအကဲတစ်ဦးသည် နယပုံပြင် ၁၈:၁၇ ပါအကြံပြုချက်ကို စိတ်စွဲမှတ်သင့်သည်– “ကိုယ်အမှုကိုအဦးစောင့်၍ပြောသောသူသည် ဖြောင့်မတ်ရာသို့ရောက်သော်လည်း၊ အိမ်နီးချင်းလာ၍စစ်ကြောတတ်၏။” ထိရောက်သောသွန်သင်သူတစ်ဦးသည် နှစ်ဖက်စလုံးကိုနားထောင်ပါလိမ့်မည်။ ဆုတောင်းခြင်းဖြင့် အခြေအနေအေးအေးဆေးဆေးဖြစ်ဖို့ သူကူညီပေးသည်။ (ယာကုပ် ၃:၁၈) စိတ်လှုပ်ရှားမှုပြင်းထန်လာပါက နှစ်ဦးနှစ်ဖက်အငြင်းပွားစေမည့်အစား ညီအစ်ကိုတစ်ဦးစီအား သူတို့၏ကိစ္စနှင့်ပတ်သက်၍ မိမိအား တိုက်ရိုက်ပြောပြဖို့ အကြံပြုပေမည်။ အကြီးအကဲသည် သင့်တော်သောမေးခွန်းများဖြင့် သုံးသပ်နေသည့်ကိစ္စများကို ရှင်းလင်းစေနိုင်ပေမည်။ ကိစ္စအများစုတွင် မလိုတမာစိတ်မဟုတ်ဘဲ ဆက်သွယ်ရေးမကောင်းခြင်းသည် အငြင်းပွားမှုများဖြစ်ရသည့်အကြောင်းဖြစ်သည်။ သို့သော် ကျမ်းစာမူများကိုချိုးဖျက်ခဲ့မည်ဆိုလျှင် မေတ္တာပါသောသွန်သင်သူသည် နှစ်ဖက်စလုံးကိုကြားနာပြီးနောက် ထိုးထွင်းသိမြင်မှုဖြင့် ယခုသွန်သင်နိုင်သည်။

ရိုးရှင်းခြင်း၏တန်ဖိုး

၆။ ရိုးရိုးရှင်းရှင်းသွန်သင်ပေးရာတွင် ပေါလုနှင့်ယေရှုတို့သည် အဘယ်ပုံသက်သေထားခဲ့ကြသနည်း။

^၆ ရိုးရှင်းခြင်းသည် အဖိုးတန်သောသွန်သင်နည်းနောက်တစ်ခုဖြစ်သည်။ မှန်ပါသည်၊ ကျွန်ုပ်တို့သည် ကျမ်းစာသင်သားများကို “သန့်ရှင်းသူအပေါင်းတို့၏နည်းတူ၊” အမှန်တရား၏ “အနံအလျားအနက်အမြင့်တို့ကိုပိုင်းခြား၍သိ” စေလိုကြသည်။ (ဧဖက် ၃:၁၈) စိတ်ဝင်စားဖွယ်ကောင်းပြီး ခက်ခဲတတ်သောကျမ်းစာအယူဝါဒဆိုင်ရာကဏ္ဍများရှိသည်။ (ရောမ ၁၁:၃၃) သို့သော် ဂရိလူများကို ပေါလုဟောပြောသောအခါ ‘နှက်တိုင်မှာအသေခံတော်မူသောခရစ်တော်’ ၏ရိုးရှင်းသောသတင်းတရားအပေါ် အာရုံစူးစိုက်ခဲ့သည်။ (၁ ကောရိန္သု ၂:၁၊ ၂) အလားတူ ယေရှုသည် ရှင်းလင်းစွာနှစ်သက်စဖွယ်ဟောပြောခဲ့သည်။ ကိုယ်တော်သည် တောင်ပေါ်တရားတော်တွင် ရိုးရိုးဝေါဟာရများကိုအသုံးပြုခဲ့သည်။ သို့တိုင် အလေးနက်ဆုံးအမှန်တရားတချို့ပါဝင်ခဲ့သည်။—မဿဲ၊ အခန်းကြီး ၅-၇။

၇။ ကျွန်ုပ်တို့သည် ကျမ်းစာသင်အံမှုများကျင်းပနေချိန်တွင် မည်သို့ရိုးရိုးလေး သွန်သင်ပေးနိုင်သနည်း။

^၇ ကျွန်ုပ်တို့သည်လည်း ကျမ်းစာသင်အံမှုများကျင်းပသောအခါ ရိုးရိုးလေးပင် သွန်သင်ပေးနိုင်သည်။ မည်သို့နည်း။ “သာ၍အရေးကြီးသောအရာများ” အပေါ်အာရုံစိုက်ခြင်းအားဖြင့်ဖြစ်သည်။ (ဖိလိပ္ပိ ၁:၁၀၊ ကဘ) လေးနက်သောအကြောင်းအရာများကို သုံးသပ်သောအခါ ရိုးရိုးရှင်းရှင်းစကားဖြင့် ပြောပြဖို့ကြိုးစားသင့်သည်။ စာအုပ်တွင်ကိုးကားထားသော ကျမ်းချက်တိုင်းကို ဖတ်ရှုဆွေးနွေးမည့်အစား အဓိကကျမ်းချက်များကိုအာရုံစိုက်သင့်သည်။ ဤတွင် ကျွန်ုပ်တို့ဘက်မှ ကောင်းစွာပြင်ဆင်ဖို့လိုသည်။ ကျွန်ုပ်တို့သည် အသေးစိတ်အချက်အလက်များဖြင့် သင်သားအားစိတ်ရှုပ်မသွားစေဖို့၊ အရေးမပါလှသောအချက်အလက်များဖြင့် လမ်းကြောင်းပြောင်းသွားစေရန် မိမိတို့ကိုယ်ကိုခွင့်မပြုဖို့လိုသည်။ သင်သားသည် သင်ခန်းစာနှင့် တိုက်ရိုက်မဆက်နွှယ်သော မေးခွန်းတစ်ခုကိုမေးမည်ဆိုလျှင် ယင်းမေးခွန်းကို သင်ခန်းစာပြီးနောက်ဆွေးနွေးမည်ဖြစ်ကြောင်း လိမ္မာပါးနပ်စွာအကြံပြုနိုင်သည်။

မေးခွန်းများကို ထိထိရောက်ရောက်အသုံးပြုခြင်း

၈။ ယေရှုသည် မေးခွန်းများကိုထိရောက်စွာ မည်သို့အသုံးပြုခဲ့သနည်း။

^၈ အသုံးဝင်သောသွန်သင်နည်းနောက်တစ်နည်းမှာ ထိရောက်သောမေးခွန်းများမေးခြင်းဖြစ်သည်။ ယေရှုခရစ်သည် သွန်သင်ရာတွင် မေးခွန်းများကို တွင်ကျယ်စွာအသုံးပြုခဲ့သည်။ ဥပမာ၊ ယေရှုက ပေတရုကို ဤသို့မေးခဲ့သည်– “‘အချင်းရှိမုန်၊ သင်သည် အဘယ်သို့ထင်သနည်း။ လော [က] ရှင်ဘုရင်တို့သည် အဘယ်သူမှာအခွန်ကိုခံကြသနည်း။ မိမိသားမှာခံကြသလော။ သူတစ်ပါးမှာခံကြသလော’ ဟုမေးတော်မူလျှင်၊ ပေတရုက၊ ‘သူတစ်ပါးမှာခံကြပါသည်’ ဟုလျှောက်သော်၊ ယေရှုကလည်း၊ ‘သို့ဖြစ်လျှင် သားမူကား လွတ်ရ၏။’” (မဿဲ ၁၇:၂၄-၂၆) ယေရှုသည် ဗိမာန်တော်တွင်ဝတ်ပြုခံရသူ၏ တစ်ဦးတည်းသောသားအနေနှင့် စင်စစ်အားဖြင့် ဗိမာန်တော်အခွန်ကိုပေးဆောင်ဖို့ တာဝန်မရှိချေ။ သို့သော် ယေရှုသည် ထိရောက်သောမေးခွန်းကိုအသုံးပြုကာ ဤအမှန်တရားကိုဖော်ပြခဲ့သည်။ သို့နှင့် ယေရှုသည် ပေတရုတွင်ရှိထားနှင့်သော အကြောင်းအရာကိုအခြေခံကာ လျော်ကန်သောကောက်ချက်တစ်ခုကိုချနိုင်စေရန် ထောက်ကူပေးခဲ့သည်။

၉။ ကျွန်ုပ်တို့သည် ကျမ်းစာသင်နေစဉ် မေးခွန်းများကို မည်သို့အသုံးပြုရမည်နည်း။

^၉ ကျွန်ုပ်တို့သည် ကျမ်းစာသင်နေစဉ် မေးခွန်းများကိုကောင်းစွာအသုံးပြုနိုင်သည်။ သင်သား၏အဖြေသည် မှားနေမည်ဆိုလျှင် အဖြေမှန်ကို အလွယ်တကူပြောပြလိုမည်ဖြစ်သော်လည်း ယင်းကို အမှန်တကယ် မှတ်မိပါမည်လော။ များသောအားဖြင့် သင်သားကိုမေးခွန်းများမေးခြင်းအားဖြင့် အဖြေမှန်ရရှိစေခြင်းသည် အကောင်းဆုံးဖြစ်၏။ သာဓကအနေဖြင့် ဘုရားသခင့်နာမတော်ကို အဘယ်ကြောင့်အသုံးပြုသင့်ကြောင်း သူနားလည်ရခက်နေမည်ဆိုလျှင် ‘ခင်ဗျားနာမည်ဟာ ခင်ဗျားအတွက်အရေးကြီးသလား။ . . . ဘာကြောင့်လဲ။ . . . တစ်ယောက်ယောက်က ခင်ဗျားနာမည်ကိုမသုံးချင်ဘူးဆိုရင် ဘယ်လိုခံစားရမလဲ။ . . . ဘုရားသခင်လည်း နာမတော်ကိုအသုံးပြုဖို့ ကျွန်တော်တို့ကိုတောင်းဆိုတာဟာ ကျိုးကြောင်းမညီညွတ်ပေဘူးလား’ ဟုမေးမြန်းနိုင်ပေသည်။

၁၀။ အကြီးအကဲများသည် စိတ်ပိုင်းဆိုင်ရာအနာတရဖြစ်သူတို့ကိုကူညီသောအခါ မေးခွန်းများကိုမည်သို့အသုံးပြုမည်ဖြစ်သနည်း။

^၁၀ အကြီးအကဲများသည်လည်း သိုးတော်စုကိုထိန်းကျောင်းသောအခါ မေးခွန်းများကိုကောင်းစွာအသုံးပြုနိုင်သည်။ စာတန့်လောကကြောင့် စိတ်ပိုင်းဆိုင်ရာအနာတရဖြစ်ပြီး မစင်ကြယ်၊ နှစ်မြို့မခံရဟု ခံစားနေရသူများ အသင်းတော်တွင်ရှိပေမည်။ ထိုကဲ့သို့သောလူတစ်ယောက်နှင့် အကြီးအကဲတစ်ဦးသည် ဤသို့ဆင်ခြင်သုံးသပ်နိုင်ပေသည်– ‘ခင်ဗျားကိုခင်ဗျား မစင်ကြယ်ဘူးလို့ ခံစားရပေမဲ့ ခင်ဗျားကို ယေဟောဝါက ဘယ်လိုသဘောထားသလဲ။ ကျွန်တော်တို့ရဲ့မေတ္တာပြည့်ဝတဲ့ ကောင်းကင်ခမည်းတော်က ခင်ဗျားအတွက် သားတော်ကို ရွေးနုတ်ဖိုးအဖြစ် အသေခံစေခဲ့တယ်ဆိုရင် ဘုရားသခင်က ခင်ဗျားကိုချစ်တယ်ဆိုတဲ့ အဓိပ္ပာယ်မသက်ရောက်ပေဘူးလား။’—ယောဟန် ၃:၁၆။

၁၁။ အဘယ်ရည်ရွယ်ချက်ကို အဖြေမလိုသောမေးခွန်းများက ဖြစ်မြောက်စေသနည်း။ ယင်းတို့ကို လူထုဟောပြောချက်တွင် မည်သို့အသုံးပြုနိုင်သနည်း။

^၁၁ အဖြေမလိုသောမေးခွန်းများသည် အသုံးဝင်သည့်သွန်သင်နည်းနောက်တစ်မျိုးဖြစ်သည်။ မေးခွန်းအမေးခံရသူများသည် ဖြေစရာမလိုသော်လည်း တွေးတောဆင်ခြင်ဖို့ အထောက်အကူပြုခံရ၏။ ရှေးပရောဖက်များသည် လူတို့အား အလေးအနက်တွေးတောစေလို၍ ထိုသို့သောမေးခွန်းများကို မေးလေ့ရှိခဲ့ကြသည်။ (ယေရမိ ၁၈:၁၄၊ ၁၅) ယေရှုသည် အဖြေမလိုသောမေးခွန်းများကို ထိရောက်စွာအသုံးပြုခဲ့သည်။ (မဿဲ ၁၁:၇-၁၁) အဆိုပါမေးခွန်းများသည် လူထုဟောပြောချက်ပေးခြင်းတွင် အထူးသဖြင့် ထိရောက်တတ်၏။ ယေဟောဝါစိတ်တော်နှင့်တွေ့ဖို့ စိုးလ်အပြည့်ဖြစ်ရမည်ဟု ပရိသတ်ကိုဟောရုံဟောမည့်အစား ‘ကျွန်တော်တို့ဟာ စိုးလ်အကြွင်းမဲ့အမှုမဆောင်ရင် ယေဟောဝါစိတ်တော်နဲ့တွေ့ပါ့မလား’ ဟုမေးလျှင် ပိုထိရောက်ပေမည်။

၁၂။ သဘောထားမေးခွန်းများမေးခြင်း၏ တန်ဖိုးကားအဘယ်နည်း။

^၁၂ သင်ယူထားသည့်အရာကို သင်သားတစ်ဦး အမှန်တကယ်ယုံကြည်မှုရှိမရှိပိုင်းဖြတ်နိုင်ရန် သဘောထားမေးခွန်းများသည် အသုံးဝင်သည်။ (မဿဲ ၁၆:၁၃-၁၆) မတရားမေထုန်သည် မှားကြောင်းကို သင်သားက ကောင်းစွာဖြေဆိုနိုင်ပေမည်။ သို့သော် ဘုရားသခင့်အကျင့်စံနှုန်းနဲ့ပတ်သက်လို့ ခင်ဗျားကိုယ်တိုင်ကော ဘယ်လိုယူဆသလဲ၊ သိပ်တင်းကျပ်လွန်းတယ်လို့ ထင်သလား၊ ဘုရားသခင့်စံနှုန်းတွေကိုလိုက်တာမလိုက်တာဟာ တကယ်အရေးကြီးတယ်လို့ပြောမလား အစရှိသည့်မေးခွန်းများကို မေးနိုင်ပေသည်။

နှလုံးထိမိသောပုံဥပမာများ

၁၃၊ ၁၄။ (က) တစ်စုံတစ်ရာကို ပုံဥပမာပြခြင်းသည် အဘယ်အဓိပ္ပာယ်ရှိသနည်း။ (ခ) ပုံဥပမာကောင်းများသည် အဘယ်ကြောင့်ထိရောက်သနည်း။

^၁၃ ပရိသတ်နှင့် ကျမ်းစာသင်သားများ၏နှလုံးကိုထိမိနိုင်သည့် နောက်တစ်နည်းမှာ ထိရောက်သောပုံဥပမာများအားဖြင့်ဖြစ်သည်။ “ပုံဥပမာ” ဟုပြန်ဆိုထားသော ဂရိစကားလုံးသည် စာသားအတိုင်း “ဘေးတွင်ထားသည် သို့မဟုတ် အတူထားသည်” ဟုအဓိပ္ပာယ်ရှိသည်။ သင်ပုံဥပမာပြသောအခါ ဆင်တူသောအရာ၏ ‘ဘေးတွင်ထား’ ၍ရှင်းပြ၏။ ဥပမာ၊ ယေရှုက ဤသို့မေးခဲ့သည်– “ဘုရားသခင်၏နိုင်ငံတော်ကိုအဘယ်သို့ပုံပြရအံ့နည်း။ အဘယ်ဥပမာနှင့်ခိုင်းနှိုင်းရအံ့နည်း။” ဖြေဆိုရာတွင် ယေရှုသည် အများသိဖြစ်သော မုန်ညင်းစေ့ကိုဖော်ပြခဲ့သည်။—မာကု ၄:၃၀-၃၂။

^၁၄ ဘုရားသခင့်ပရောဖက်များသည် ထိရောက်သောပုံဥပမာများစွာကို အသုံးပြုခဲ့ကြသည်။ ဣသရေလလူများကိုအပြစ်ပေးရာတွင် ဘုရားသခင့်အသုံးတော်ခံများဖြစ်ခဲ့ကြသည့် အာရှုရိလူတို့သည် အကြောင်းမဲ့ရက်စက်ခဲ့ကြသောအခါ ဟေရှာယက ဤပုံဥပမာဖြင့် သူတို့၏ရောင့်တက်မှုကိုဖော်ထုတ်ခဲ့သည်– “ပုဆိန်သည် ခုတ်သောသူကိုစော်ကားရမည်လော။ လွှသည် တိုက်သောသူကိုရန်ပြု၍ထောင်လွှားရမည်လော။” (ဟေရှာယ ၁၀:၁၅) အခြားသူများကိုသွန်သင်သောအခါ ယေရှုသည်လည်း ပုံဥပမာများကို တွင်ကျယ်စွာအသုံးပြုခဲ့သည်။ “ဥပမာကင်း၍ ဟောပြောတော်မမူ” ဟုဖော်ပြထားသည်။ (မာကု ၄:၃၄) ကောင်းသောပုံဥပမာများသည် စိတ်နှလုံးကိုဆွဲဆောင်သောကြောင့် ထိရောက်မှုရှိ၏။ ပရိသတ်အကျွမ်းတဝင်ရှိထားနှင့်ပြီးသော အကြောင်းအရာနှင့် နှိုင်းယှဉ်ပြခြင်းအားဖြင့် အကြောင်းအရာအသစ်တစ်ခုကို အလွယ်တကူလက်ခံစေသည်။

၁၅၊ ၁၆။ ပုံဥပမာများကို အဘယ်အရာကအထိရောက်ဆုံးဖြစ်စေသနည်း။ ဥပမာပေးပါ။

^၁၅ နှလုံးကိုအမှန်တကယ်ထိမိသော ပုံဥပမာများကို မည်သို့အသုံးပြုနိုင်သနည်း။ ဦးဆုံးမှာ ပုံဥပမာသည် ရှင်းပြနေသောအကြောင်းအရာနှင့် အကျိုးအကြောင်းဆီလျော်မှုရှိရမည်။ နှိုင်းယှဉ်ချက်သည် အမှန်တကယ်ဆီလျော်မှုမရှိပါက ပုံဥပမာသည် ပရိသတ်ကိုဉာဏ်အလင်းပေးမည့်အစား စိတ်ရှုပ်ထွေးစေပါလိမ့်မည်။ ဟောပြောသူတစ်ဦးသည် သဘောရိုးဖြင့် ဘိသိက်ခံအကြွင်းအကျန်ကို သစ္စာရှိသောချစ်စနိုးခွေးတစ်ကောင်နှင့်နှိုင်းယှဉ်ပြီး ယေရှုခရစ်အား သူတို့လက်အောက်ခံခြင်းကို တင်ပြဖို့ကြိုးစားခဲ့ဖူးသည်။ သို့သော် ထိုသို့နှိမ်၍နှိုင်းယှဉ်ခြင်းသည် အမှန်သင့်တော်ပါသလော။ သမ္မာကျမ်းစာက ပို၍နှစ်သက်ဖွယ်ကောင်းပြီး ဂုဏ်ရှိသောနည်းဖြင့် ထပ်တူသဘောထားမျိုးကိုဖော်ပြထားသည်။ ယေရှု၏ဘိသိက်ခံနောက်တော်လိုက် ၁၄၄,၀၀၀ ကို “မိမိခင်ပွန်းဖို့ တန်ဆာဆင်သော မင်္ဂလာဆောင်သတို့သမီး” နှင့်နှိုင်းယှဉ်ထားသည်။—ဗျာဒိတ် ၂၁:၂။

^၁၆ ပုံဥပမာများသည် လူတို့၏အသက်တာနှင့်ပတ်သက်သောအခါ အထိရောက်ဆုံးဖြစ်သည်။ ဘုရင်ဒါဝိဒ်သည် ငယ်စဉ်က သိုးထိန်းဖြစ်ခဲ့၍ သိုးကလေးများကိုချစ်သောကြောင့် နာသန်၏ သတ်ဖြတ်ခံရသောသိုးပုံဥပမာသည် သူ၏နှလုံးကိုထိမိခဲ့သည်။ (၁ ဓမ္မရာဇဝင် ၁၆:၁၁-၁၃; ၂ ဓမ္မရာဇဝင် ၁၂:၁-၇) ဤပုံဥပမာသည် နွားတစ်ကောင်အကြောင်းဖြစ်ခဲ့မည်ဆိုလျှင် ဤမျှထိရောက်ခဲ့မည်မဟုတ်ချေ။ အလားတူပင် သိပ္ပံဆိုင်ရာအကြောင်းခြင်းရာ သို့မဟုတ် တိမ်မြုပ်နေသောသမိုင်းဖြစ်ရပ်များနှင့်ပတ်သက်သောပုံဥပမာများသည် ကျွန်ုပ်တို့၏ပရိသတ်အတွက် အဓိပ္ပာယ်ရှိလှမည်မဟုတ်ပေ။ ယေရှုသည် မိမိ၏ပုံဥပမာများကို နေ့စဉ်အဖြစ်အပျက်များမှယူ၍ ဖော်ပြခဲ့သည်။ ကိုယ်တော်သည် ဆီမီး၊ ကောင်းကင်ငှက်များ၊ လယ်ပြင်မှနှင်းပန်းများအစရှိသည့် သာမန်အရာများအကြောင်းပြောဆိုခဲ့သည်။ (မဿဲ ၅:၁၅၊ ၁၆; ၆:၂၆၊ ၂၈) ယေရှု၏ပရိသတ်သည် ထိုသို့သောအရာများကို အလွယ်တကူသဘောပေါက်နိုင်ခဲ့ကြသည်။

၁၇။ (က) ကျွန်ုပ်တို့၏ပုံဥပမာများကို အဘယ်အရာတွင်အခြေပြုနိုင်သနည်း။ (ခ) ကျွန်ုပ်တို့သင်သားများ၏အခြေအနေများကိုလိုက်၍ စာအုပ်စာတမ်းများတွင်ပါသောပုံဥပမာများကို မည်သို့ပြုပြင်အသုံးပြုနိုင်မည်နည်း။

^၁၇ ကျွန်ုပ်တို့၏ခရစ်ယာန်ဓမ္မအမှုတွင် ရိုးရိုးလေးဖြစ်သော်လည်း ထိရောက်သောပုံဥပမာများကိုအသုံးပြုရန် အခွင့်အလမ်းများစွာရှိကြသည်။ မျက်စိရှင်ရှင်ထားပါ။ (တမန်တော် ၁၇:၂၂၊ ၂၃) ပုံဥပမာတစ်ခုသည် နားထောင်သူ၏ကလေးများ၊ အိမ်၊ အလုပ် သို့မဟုတ် ဝါသနာနှင့်ပတ်သက်နိုင်သည်။ သို့မဟုတ် ကျွန်ုပ်တို့လေ့လာသည့်အကြောင်းအရာတွင်ပါသော ပုံဥပမာများကို တိုးသိနားလည်စေရန် သင်သားအကြောင်းသိရှိထားရာကို အသုံးပြုနိုင်ပေသည်။ ဥပမာ၊ ထာဝရအသက်ရစေသောအသိပညာစာအုပ်အခန်း ၈၊ စာပိုဒ် ၁၄ တွင်ပါသည့် ထိရောက်သောပုံဥပမာကိုသုံးသပ်ကြည့်ပါ။ အိမ်နီးချင်း၏သွားပုပ်လေလွင့်သတင်းလွှင့်ခံရသည့် မေတ္တာပြည့်ဝသောမိဘတစ်ဦးနှင့်ပတ်သက်သည့် ပုံဥပမာဖြစ်သည်။ မိမိကိုယ်တိုင်မိဘတစ်ဦးဖြစ်သော ကျမ်းစာသင်သား၏အခြေအနေနှင့် ထိုဥပမာကို မည်သို့ပြုပြင်သုံးနိုင်ကြောင်း အနည်းငယ်ထည့်စဉ်းစားနိုင်သည်။

ကျွမ်းကျင်စွာဖြင့် ကျမ်းစာကိုဖတ်ခြင်း

၁၈။ ကျွန်ုပ်တို့သည် သွက်သွက်လက်လက်စာဖတ်တတ်သူများဖြစ်ဖို့ အဘယ်ကြောင့်ကြိုးစားသင့်သနည်း။

^၁၈ ပေါလုက တိမောသေကို ဤသို့တိုက်တွန်းခဲ့သည်– “ကျမ်းစာကိုဖတ်ခြင်း၊ တိုက်တွန်းသွေးဆောင်ခြင်း၊ ဆုံးမသြဝါဒပေးခြင်းကို ကြိုးစား၍ပြုလော့။” (၁ တိမောသေ ၄:၁၃) သမ္မာကျမ်းစာသည် ကျွန်ုပ်တို့သွန်သင်ချက်၏အခြေခံအုတ်မြစ်ဖြစ်သောကြောင့် ယင်းကိုသွက်သွက်လက်လက်ဖတ်ရှုနိုင်လျှင် အကျိုးရှိသည်။ လေဝိသားများသည် ဘုရားသခင့်လူတို့အား မောရှေပညတ်ကို ဖတ်ပြခွင့်ရရှိခဲ့ကြသည်။ သူတို့သည် ထစ်ထစ်ငေါ့ငေါ့ဖြင့် ဖတ်ခဲ့ကြသလော သို့မဟုတ် ငြီးငွေ့ဖွယ်ဖြစ်အောင်ဖတ်ကြသလော။ ထိုသို့မဖတ်ကြပါ၊ သမ္မာကျမ်းစာက နေဟမိ ၈:၈ တွင်ဤသို့ဆိုသည်– “ဘုရားသခင်၏ပညတ္တိကျမ်းစာကို သေချာစွာဖတ်ရွတ်၍ အနက်ကိုပြန်သဖြင့်၊ လူများနားလည်စေခြင်းငှာပြုကြ၏။”

၁၉။ ကျမ်းစာဖတ်ရွတ်ခြင်းကို မည်သို့တိုးတက်စေနိုင်သနည်း။

^၁၉ ကျွမ်းကျင်စွာဟောပြောနိုင်သောခရစ်ယာန်အမျိုးသားတချို့သည် စာဖတ်အားနည်းတတ်ကြသည်။ သူတို့ မည်သို့တိုးတက်နိုင်မည်နည်း။ လေ့ကျင့်ခြင်းအားဖြင့်ဖြစ်၏။ မှန်ပါသည်၊ သွက်သွက်လက်လက် မဖတ်တတ်မချင်းအသံကျယ်ကျယ်ဖြင့် ထပ်တလဲလဲဖတ်ခြင်းအားဖြင့်ဖြစ်သည်။ သင့်ဘာသာစကားဖြင့် ကျမ်းစာကက်ဆက်ခွေများရနိုင်မည်ဆိုလျှင် စာဖတ်သူ၏အဓိပ္ပာယ်ပေါ်အောင်ဖတ်ခြင်း၊ အသံ၏ပြောင်းလဲခြင်းနှင့် နာမည်များအပြင် ထူးခြားသောစကားလုံးများကို မည်သို့အသံထွက်ကြောင်းကို သတိပြုနားထောင်လျှင် ပညာရှိရာရောက်၏။ မိမိတို့ဘာသာစကားဖြင့် ကမ္ဘာသစ်ဘာသာပြန်ကျမ်းရှိထားသူတို့သည်လည်း ထိုတွင်ပါသောအသံထွက်ပုံများမှအကျိုးရယူနိုင်သည်။a လေ့ကျင့်ခြင်းဖြင့် မဟေရရှာလလဟာရှဗတ်ကဲ့သို့သောအမည်များကိုပင် အလွယ်တကူဖတ်ရွတ်နိုင်သည်။—ဟေရှာယ ၈:၁။

၂၀။ ‘ကိုယ့်သွန်သင်ခြင်း’ ကိုမည်သို့ ‘သတိပြု’ နိုင်သနည်း။

^၂၀ ယေဟောဝါ၏လူများအနေနှင့် သွန်သင်ပေးသူများအဖြစ် အသုံးတော်ခံခွင့်ရရှိကြခြင်းသည် တကယ့်အခွင့်ထူးပင်! ထို့ကြောင့် ယင်းတာဝန်ကို တစ်ဦးစီအနေနှင့် အလေးအနက်သဘောထားကြစို့လေ။ ‘ကိုယ်ကိုလည်းကောင်း၊ ကိုယ့်သွန်သင်ခြင်းကိုလည်းကောင်း သတိပြု၍အမြဲတည်နေ’ ကြစို့။ (၁ တိမောသေ ၄:၁၆) ကျွန်ုပ်တို့သည် ကောင်းစွာနားထောင်တတ်သူများဖြစ်ခြင်း၊ ရိုးရိုးလေးတင်ပြပြောဆိုခြင်း၊ ထိုးထွင်းသိမြင်စေသောမေးခွန်းများမေးခြင်း၊ ထိရောက်သောပုံဥပမာများအသုံးပြုခြင်းနှင့် ကျမ်းစာကိုသွက်သွက်လက်လက်ဖတ်ခြင်းဖြင့် ကောင်းစွာသွန်သင်သူများဖြစ်နိုင်ကြပါသည်။ ယေဟောဝါ၏အဖွဲ့အစည်းမှတစ်ဆင့် ကိုယ်တော်စီမံပေးထားသောလေ့ကျင့်မှုမှ ကျွန်ုပ်တို့အားလုံးအကျိုးရယူကြပါစို့။ အကြောင်းမှာ ယင်းသို့ပြုခြင်းဖြင့် “လူတတ်၏နှုတ်သတ္တိကို” ရနိုင်သောကြောင့်ဖြစ်သည်။ (ဟေရှာယ ၅၀:၄) ဘရိုရှာများ၊ ကက်ဆက်ခွေများ၊ ဗီဒီယိုခွေများအစရှိသည့် ကျွန်ုပ်တို့၏ဓမ္မအမှုအတွက် စီမံပေးထားသောကိရိယာအားလုံးကို ကောင်းစွာအသုံးပြုခြင်းအားဖြင့် ထိုးထွင်းသိမြင်စွာ သွေးဆောင်ပြောဆိုတတ်ပါလိမ့်မည်။

[အောက်ခြေမှတ်ချက်များ]

သင်မှတ်မိသလော

◻ ကောင်းစွာနားထောင်တတ်သူဖြစ်ခြင်းသည် ကျွန်ုပ်တို့၏သွန်သင်ခြင်းတွင် မည်သို့အကူအညီဖြစ်နိုင်သနည်း။

◻ ရိုးရှင်းစွာသွန်သင်ရာတွင် ပေါလုနှင့်ယေရှုကို ကျွန်ုပ်တို့မည်သို့တုပနိုင်သနည်း။

◻ အခြားသူများကို သွန်သင်သောအခါ အဘယ်မေးခွန်းမျိုးကို ကျွန်ုပ်တို့အသုံးပြုနိုင်သနည်း။

◻ အဘယ်ပုံဥပမာမျိုးသည် အထိရောက်ဆုံးဖြစ်သနည်း။

◻ လူထုရှေ့စာဖတ်ရွတ်သူများအဖြစ် ကျွန်ုပ်တို့၏ကျွမ်းကျင်မှုကို မည်သို့တိုးတက်စေနိုင်သနည်း။

[စာမျက်နှာ ၁၆ ပါ ရုပ်ပုံ]

ကောင်းစွာသွန်သင်သူတစ်ဦးသည် ထိုးထွင်းသိမြင်ရန် နားထောင်တတ်

[စာမျက်နှာ ၁၈ ပါ ရုပ်ပုံ]

ယေရှုသည် မိမိ၏ပုံဥပမာများကို နေ့စဉ်အဖြစ်အပျက်များမှယူ၍ဖော်ပြခဲ့