အနှစ်တစ်ထောင်အတွင်းသို့ကပ်ကျော်ဝင်ရောက်ရန် ဆက်လက်ဖွဲ့စည်းလျက်နေခြင်း

“သူတို့သည်သိုးအုပ်တစ်အုပ် သိုးထိန်းတစ်ပါးတည်းဖြစ်လိမ့်မည်။”—ယောဟန် ၁၀:၁၆။ သမ။

၁။ ထာဝရအသက်ရှင်သော ဘုရားသခင်အဖို့အနှစ်တစ်ထောင်သည် အဘယ်အရာနှင့်တူသနည်း။

ယေဟောဝါသည်လူသားများအတွက် အချိန်ကိုဖန်ဆင်းပေးသည့်အရှင် ဖြစ်တော်မူ၏။ အနိစ္စနှင့်ကင်း၍ ထာဝရတည်ရှိသော ဘုရားရှင်ဖြစ်တော်မူသဖြင့် ကိုယ်တော်အဖို့ အနှစ်တစ်ထောင်ဆိုသည်မှာ လျင်မြန်စွာကုန်လွန်တတ်သည့် တစ်နေ့ကဲ့သို့လည်းကောင်း၊ ညဉ့်ယံတစ်ယံကဲ့သို့လည်းကောင်းဖြစ်သည်။—ဆာလံ ၉၀:၄။ ၂ ပေတရု ၃:၈။

၂။ လူသားအပေါင်းကိုကောင်းချီးပေးရန် အဘယ်အချိန်ကာလကို ယေဟောဝါလျာထားသနည်း။

^၂ ဘုရားရှင်သည် အနှစ်တစ်ထောင်ကြာရှည်သော ပုံဆောင်ရာနေ့တစ်နေ့ကိုသတ်မှတ်၍ ကမ္ဘာပေါ်ရှိလူ့မိသားစုအားလုံးကို ကောင်းချီးပေးတော်မူလတံ့။ (ကမ္ဘာဦး ၁၂:၃။ ၂၂:၁၇၊ ၁၈။ တမန်တော် ၁၇:၃၁) ထိုသူတို့တွင် ယခုသေလျက်ရှိနေသူများနှင့် ရှင်နေသူများအကြုံးဝင်သည်။ ဤအမှုကိုမည်သို့ ဖြစ်မြောက်စေတော်မူမည်နည်း။ ယေရှုခရစ်အုပ်ချုပ်သည့်နိုင်ငံတော်အားဖြင့် ဖြစ်မြောက်စေတော်မူမည်။ ယေရှုကား ကိုယ်တော်၏အထိမ်းအမှတ်ဖြစ်သော မိန်းမ၏ “အမျိုးအနွယ်” ဖြစ်တော်မူ၏။—ကမ္ဘာဦး ၃:၁၅။

၃။ (က) ဘုရားသခင့်မိန်းမအမျိုးအနွယ်၏ဖနောင့် အဘယ်သို့အကြိတ်ခံရသနည်း။ သို့သော်ထိုဒဏ်ရာ အဘယ်သို့ပျောက်ကင်းခဲ့သနည်း။ (ခ) ယေရှုခရစ်အနှစ်တစ်ထောင် စိုးစံရာကာလကုန်ဆုံးချိန်တွင် ပုံဆောင်ရာဖြစ်သောမြွေအား ကိုယ်တော်မည်သို့ပြုတော်မူသနည်း။

^၃ ဘုရားသခင့်မိန်းမ (သို့မဟုတ် ကောင်းကင်အဖွဲ့အစည်းတော်) ၏အမျိုးအနွယ်ယေရှုခရစ်သည် စီအီး ၃၃ ခုတွင် ဘာသာတရားကြောင့်အသေခံရပြီး သုံးရက်သေဆုံးနေခဲ့သည်။ ထိုအချိန်တွင် “အမျိုးအနွယ်” ၏ပုံဆောင်ရာဖနောင့်သည် ကြိတ်ခံလိုက်ရသည်။ သို့သော်တတိယနေ့တွင် ကြီးမြတ်သောအသက်သခင် အနန္တတန်ခိုးရှင်ဘုရားသခင်သည် မိမိ၏သစ္စာစောင့်သိသောသားတော်အား နံဝိညာဉ်လောကတွင် မသေနိုင်သောအသက်တာသို့ ထမြောက်စေခြင်းအားဖြင့် ထိုဒဏ်ရာကို ပျောက်ကင်းစေတော်မူ၏။ (၁ ပေတရု ၃:၁၈) ယေရှုသည် သေခြင်းကင်းပြီဖြစ်သောကြောင့် လူသားတို့အပေါ်အနှစ်တစ်ထောင်စိုးစံနိုင်သည့် အခြေအနေတွင်ရှိသည့်ပြင် ပုံဆောင်ရာမြွေ၏ခေါင်းကို “ကြိတ်” ၍ အနှစ်တစ်ထောင်စိုးစံမှုအပြီး၌ သူ့အားရှင်းရှင်းပယ်ရှား တော်မူမည်။ မူရင်းအခြေအနေပြန်လည်ရောက်ရှိသော သစ္စာရှိလူသားများအတွက် ကောင်းချီးမင်္ဂလာပါတကား။

၄။ ဘုရားသခင်သည်မိမိလူမျိုးတော်ဘောင်တွင် အဘယ်သို့သောအစီအစဉ် လုပ်ဆောင်နေတော်မူသနည်း။

^၄ တစ်ပါးအမျိုးသားကာလကုန်ဆုံးသည့် ၁၉၁၄ မှစ၍ယခုလက်ရှိ “အစီအစဉ်စနစ်ဆုံးခန်းချိန်” အတောအတွင်း ကမ္ဘာတစ်ဝန်းရှိ ယေဟောဝါ၏လူမျိုးတော်ဘောင်တွင် စီစဉ်ဖွဲ့စည်းမှုများစွာ ပြုလုပ်ခဲ့သည်။ (မဿဲ ၂၄:၃။ လုကာ ၂၁:၂၄) အနှစ်တစ်ထောင်မတိုင်မီပြုလုပ်သော ဤအဖွဲ့အစည်းဆိုင်ရာအစီအစဉ်ကို ကြီးမြတ်သောစည်းရုံးသူ ယေဟောဝါ၏အလိုတော်နှင့် ညွှန်ကြားချက်အတိုင်း လုပ်ဆောင်နေသည်။ ကိုယ်တော်၏မိန်းမတည်းဟူသော မယားကဲ့သို့သော ကောင်းကင်အဖွဲ့အစည်းတော်အားဖြင့် ယေရှုခရစ်အုပ်ချုပ်သည့် ကတိထားရာနိုင်ငံတော်သည် ၁၉၁၄ ခုနှစ်တွင်မွေးဖွားခဲ့သည်။ သမ္မာကျမ်းစာပရောဖက်ပြုချက် ပြည့်စုံခြင်းအားဖြင့် မှန်ကန်ကြောင်းထင်ရှားသည်။

၅။ ဗျာဒိတ် ၁၂:၅ တွင်အဘယ်အရာမွေးဖွားခြင်းကို တင်ကူးဟောပြောထားသနည်း။ ကင်းမျှော်စင် တွင်ဤအကြောင်းကိုအဘယ်အချိန်တွင် ပထမဦးဆုံးရှင်းပြခဲ့သနည်း။

^၅ ဤသို့ဖြင့် ဗျာဒိတ်၁၂:၅မှစကားသည် ဂုဏ်ကျက်သရေတင့်တယ်စွာဖြင့် ပြည့်စုံခဲ့လေသည်။ “ထိုမိန်းမသည် လူမျိုးတကာတို့ကို သံလှံတံနှင့်အုပ်စိုးလတံ့သော သားယောက်ျားကိုဖွားမြင်၏။ ထိုသားကိုဘုရားသခင့်ထံသို့လည်းကောင်း၊ ပလ္လင်တော်သို့လည်းကောင်း ချီယူတော်မူ၏။” ဘုရားသခင်၏မိန်းမ သားယောက်ျားဖွားမြင်ခြင်းသည် ခရစ်တော်အုပ်ချုပ်သည့် ယေဟောဝါ၏နိုင်ငံတော်ဖွားမြင်ခြင်းကို ပုံဆောင်သည်။ ဤအကြောင်းကို ၁၉၂၅ခု၊ မတ်လ ၁ ရက်၊ ကင်းမျှော်စင် တွင်ပထမဆုံးအကြိမ်ရှင်းပြခဲ့သည်။ ၁၉၁၄ ခုတွင်ကောင်းကင်ဘုံ၌ ဤမေရှိယနိုင်ငံတော် ဖွားမြင်ခြင်းသည် ၁၉၁၉ ခုမြေကြီးပေါ်တွင် ဇိအုန်၏ ‘သားသမီး’ ဆိုင်ရာ “လူမျိုး” ဖွားမြင်ခြင်းနှင့်မတူပေ။—ဟေရှာယ ၆၆:၇၊ ၈။

၆။ (က) နိုင်ငံတော်ဖွားမြင်ခြင်းသည် ယေရှုကြိုတင်ဟောပြောခဲ့သည့် အဘယ်လုပ်ငန်းကိုလုပ်ဆောင်ရန် လိုအပ်လာသနည်း။ (ခ) ဤလုပ်ငန်းလုပ်ဆောင်ရန် ယေဟောဝါ၏လူမျိုးတော် မည်သို့ပြုလုပ်ရန် လိုအပ်သနည်း။ သူတို့သည် အဘယ်သို့သောတပ်ဦးအဖြစ် ဖွဲ့စည်းထားသနည်း။

^၆ ယေဟောဝါသည် နိုင်ငံတော်အားဖြင့်စကြဝဠာတစ်ခွင် သက်ရောက်သောမိမိ၏ ဖြောင့်မတ်မှန်ကန်သော အချုပ်အခြာအာဏာတော်ကိုထင်ရှား စေတော်မူမည်။ ၄င်းနိုင်ငံတော်သည် မွေးဖွားခဲ့ပြီဖြစ်ရာ ဤသတင်းကို မြေကြီးတစ်ပြင်လုံးအနှံ့ ကြေညာထိုက်ပေသည်။ မိမိ၏အရူပ ‘ရောက်ရှိခြင်း’ သာဓကနှင့်စပ်လျဉ်း၍ ယေရှုမိန့်ကြားခဲ့သည့် အောက်ပါစကားပြည့်စုံရမည့် အချိန်ရောက်ရှိလာသည်။ “လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သော ဧဝံဂေလိတရားကို လောကီနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှအဆုံးသည်ဖြစ်လတံ့။” (မဿဲ ၂၄:၃၊ ၁၄) ကမ္ဘာချီ၍နိုင်ငံတကာတွင် စည်းလုံးညီညွတ်စွာဟောပြောနိုင်ရေးအတွက် ယေဟောဝါ၏စကြဝဠာအဖွဲ့အစည်းတော်၏ မျက်မြင်ရအပိုင်းကို ဖွဲ့စည်း ဖို့လိုအပ်လာသည်။ ထိုစဉ်ကဥက္ကဌဖြစ်သူ ဂျေ၊ အက်(ဖ်) ရပ်သဖော့ဒ် ကိုယ်စားပြုသည့် ကင်းမျှော်စင်သမ္မာကျမ်းစာနှင့်ဝေစာအသင်းသည် ဤကိစ္စကိုထောက်ခံခဲ့သည်။ ထို့ကြောင့်စစ်ကြီးအပြီး ၁၉၁၉ ခုနှစ်မှစ၍အသင်းမသည် သစ္စာရှိရှိထောက်ခံသူတို့ကို ပြန်လည်ရှင်သန်သောလူမျိုးအဖြစ် စည်းရုံးဖွဲ့စည်းခြင်းကို အားသွန်ခွန်စိုက်လုပ်ဆောင် လာခဲ့သည်။ တစ်ချိန်တည်း၌ အမြင့်မြတ်ဆုံးစည်းရုံးရှင် ယေဟောဝါ၏လမ်းညွှန်မှုနှင့် ကောင်းချီးရရှိရေးအတွက်လည်း ဆုတောင်းကြသည်။ ယေဟောဝါသက်သေများသည် ဒုတိယကမ္ဘာစစ်ကြီး၏ ဆင်းရဲဒုက္ခများကို ရင်ဆိုင်နေရသည့်ကြားမှ ဖက်ဆစ်များ၊ ဟစ်တလာ၏နာဇီလှုပ်ရှားမှုနှင့် ဗရင်ဂျီလှုပ်ရှားရေးအဖွဲ့တို့၏ ခါးသီးသောဆန့်ကျင်တိုက်ခိုက်ခြင်းခံရစေကာမူ ကမ္ဘာချီညီညွတ်သောတပ်ဦးဖြစ်လာကာ ရန်လိုသောလောကကြီးကို ရင်ဆိုင်ခုခံကြ၏။

၇။ (က) ယေဟောဝါ၏လူမျိုးတော်သည် အချင်းချင်းအဘယ်သို့သောဆက်ဆံရေး ထိန်းသိမ်းထားမှသာလျှင် ကြီးစွာသောဒုက္ခကို ကပ်ကျော်နိုင်မည်နည်း။ (ခ) ရေလွှမ်းမိုးဘေးကပ်ကျော်သူများသည် ကမ္ဘာချီရေဘေးကြီးမှအဘယ်သို့ ဖြတ်ကျော်ခဲ့ကြသနည်း။ သူတို့မည်သူတို့ကို ပုံဆောင်ကြသနည်း။

^၇ ဘိသိက်ခံအကြွင်းအကျန်တို့နှင့် “လူအုပ်ကြီး” တို့ဖြင့်ဖွဲ့စည်းထားသည့် ယေဟောဝါသက်သေများသည် စည်းလုံးသောအဖွဲ့အစည်းဖြစ်သည်။ အဖွဲ့အစည်းတစ်ရပ်အနေနှင့် သူတို့သာလျှင် အမြင့်ဆုံးစည်းရုံးရှင်၏ ကာကွယ်မှုအောက်တွင်ရှိပြီး၊ ကျမ်းစာမျှော်လင့်ချက်ကြောင့် စာတန်မာရ်နတ်စိုးမိုးသော ဤစနစ်ပေါ်ကျရောက်မည့်ဆဲဆဲ ပျက်စီးခြင်းကိုကပ်ကျော်ကြမည်။ (ဗျာဒိတ် ၇:၉-၁၇။ ၂ ကောရိန္သု ၄:၄) သူတို့သည်လူ့သမိုင်းတွင် အဆိုးဆုံးဘေးဒုက္ခမှ ကယ်တင်ခံရမည်ဟု ယေရှုမိန့်တော်မူခဲ့သည့် သူများဖြစ်လတံ့။ ယေရှုက နောဧလက်ထက်၌ဖြစ်သကဲ့သို့ မိမိပေါ်ထွန်းမည့်နေ့ရက်၌ဖြစ်လိမ့်မည်ဟု မိန့်တော်မူ၏။ နှစ်ပေါင်းများစွာအချိန်ယူ၍ ကြိုးပမ်းဆောက်လုပ်ပြီးစီးသည့် သင်္ဘောထဲတွင်ရှိသော လူရှစ်ယောက်သာလျှင် ကမ္ဘာချီရေလွှမ်းမိုးဘေးကြီးကို စည်းလုံးသောမိသားစုအဖြစ် ကပ်ကျော်ခဲ့သည်။ (မဿဲ ၂၄:၂၂၊ ၃၇-၃၉။ လုကာ ၁၇:၂၆-၃၀) နောဧ၏မိန်းမသည် ခရစ်တော်၏သတို့သမီးနှင့်ဆင်တူပြီး သူ့သားများနှင့်ချွေးမများသည် ယေရှု၏မျက်မှောက်ခေတ် “အခြားသိုး” များနှင့်ဆင်တူ၍ လူအုပ်ကြီးအဖြစ်တိုးပွားလျက်ရှိရာ နောက်ဆုံးအရေအတွက်မည်မျှရှိလာမည်ကို ကျွန်ုပ်တို့မသိချေ။ (ယောဟန် ၁၀:၁၆) သူတို့သည် သာ၍ကြီးမြတ်သောနောဧဖြစ်သော ယေရှုခရစ်၏လက်အောက်တွင် အနှစ်တစ်ထောင်အတွင်းသို့ ကပ်ကျော်ဝင်ရောက်လိုပါက ဘိသိက်ခံအကြွင်းအကျန်တို့နှင့် အတူဆက်လက်ဖွဲ့စည်းနေရကြမည်။ အကြွင်းအကျန်တို့သည် “ရွေးချယ်သောသူတို့” ပင်ဖြစ်ပြီး သူတို့အတွက်ကြောင့် “ကြီးစွာသောဒုက္ခ” ကာလကို တိုစေလိမ့်မည်ဖြစ်သည်။—မဿဲ ၂၄:၂၁၊ ၂၂။

အနှစ်တစ်ထောင်အတွင်းသို့ကပ်ကျော်ခြင်း

၈။ မိမိရောက်ရှိခြင်းဆိုင်ရာပရောဖက်ပြုချက်ကို နိဂုံးချုပ်ရာတွင်ယေရှုအဘယ်ဥပမာ ဟောကြားတော်မူခဲ့သနည်း။ ယင်းကိုနားလည်ခြင်းနှင့်စပ်လျဉ်း၍ ၁၉၃၅ ခုဇွန်လ ၁ ရက်နေ့သည် အဘယ်သို့အရေးပါသနည်း။

^၈ မဿဲခရစ်ဝင်ကျမ်းအရယေရှုသည် မိမိရောက်ရှိခြင်းဆိုင်ရာ နိမိတ်နှင့်ပတ်သက်သော ပရောဖက်ပြုချက်ကိုဥပမာတစ်ခုဖြင့် အဆုံးသတ်ထားသည်။ သိုးနှင့်ဆိတ်ဥပမာဟု အများအားဖြင့်ခေါ်ဆိုကြသည်။ တစ်ပါးအမျိုးသားကာလကုန်ဆုံးသည့် ၁၉၁၄ ခုနှစ်မှအစပြုသည့် ဤအစီအစဉ်စနစ် ဆုံးခန်းချိန်ဖြစ်သော ယခုအချိန်တွင် ၄င်းဥပမာပြည့်စုံလျက်ရှိသည်။ (မဿဲ ၂၅:၃၁-၄၆) ဥပမာထဲမှသိုးများမှာ လူအုပ်ကြီးဝင်များပင်ဖြစ်ကြောင်း သိရှိခြင်းနှင့်ပတ်သက်၍ ၁၉၃၅ခု၊ ဇွန်လ ၁ ရက်၊ စနေနေ့သည် အရေးပါသောနေ့ဖြစ်သည်။ ထိုနေ့၌ဝါရှင်တန်ဒီစီတွင် ယေဟောဝါသက်သေများ၏ စည်းဝေးပွဲကြီးတစ်ခု၌လူပေါင်း ၈၄၀ သည် ယေရှုခရစ်မှတစ်ဆင့် ယေဟောဝါထံအပ်နှံသည့် အထိမ်းအမှတ်အဖြစ် နှစ်ခြင်းခံခဲ့ကြသည်။ ဤသူတို့အနက်မှအများမှာ ဗျာဒိတ် ၇:၉-၁၇ ပေါ်အခြေပြုသော ဂျေ၊ အက်(ဖ်) ရပ်သဖော့ဒ်၏ဟောပြောချက်အပြီး၌ အထက်ပါအတိုင်းချက်ချင်း တုံ့ပြန်ခဲ့ကြခြင်းဖြစ်သည်။ ကောင်းသောသိုးထိန်း၏ အခြားသိုးများမှလူအုပ်ကြီးအဝင်ဖြစ်ရေးမှာ သူတို့၏ဆန္ဒပင်ဖြစ်သည်။ ဤသို့ဖြင့်နီးကပ်လာနေသည့် ကြီးစွာသောဒုက္ခကိုကျော်၍ ဤစနစ်၏အဆုံးကို အရှင်လတ်လတ်ဖြတ်သန်းကာ သိုးထိန်း—ရှင်ဘုရင် ယေရှုခရစ်၏အနှစ်တစ်ထောင် စိုးစံရာကာလအတွင်းသို့ ဝင်ရောက်မည့်အခွင့်အရေး ရရှိကြမည်။ နောက်ဆုံးတွင် ပရဒိသုမြေကြီးပေါ်တွင် ထာဝရအသက်ရရှိကြမည်။—မဿဲ ၂၅:၄၆။ လုကာ ၂၃:၄၃။

၉။ သိုးများအား “[သူတို့] အဖို့ပြင်ဆင်ထားသောနိုင်ငံကို” အမွေခံရန် အဘယ်ကြောင့်ဖိတ်ခေါ်သနည်း။ သူတို့သည် မင်းကြီး၏ညီတော်များအား ကောင်းမှုပြုရန်အဘယ်သို့သော အကောင်းဆုံးအနေအထား၌ ရှိသနည်း။

^၉ သိုးကဲ့သို့သော ဤသူတို့အား “ဤလောကတည်သည်ကာလက [သူတို့] အဖို့ပြင်ဆင်ထားသောနိုင်ငံကိုလာ၍ အမွေခံကြလော့” ဟုအဘယ်ကြောင့်ခေါ်ဖိတ်ခံရသနည်း။ (NW) မင်းကြီးကသူတို့သည် မိမိ “ညီတော်များ” အားကောင်းမှုပြုခြင်းဖြင့် မိမိအားပြုရာရောက်သောကြောင့် ဖြစ်သည်ဟုမိန့်တော်မူ၏။ “ညီတော်များ” ဟူသောအသုံးအနှုန်းအားဖြင့် ဤအစီအစဉ်စနစ်၏ဆုံးခန်းချိန်၌ မိမိ၏ဝိညာဏညီတော်များမှ အကြွင်းအကျန်များသည် မြေကြီးပေါ်တွင် ကျန်ရှိနေဦးမည်ဟုဆိုလိုသည်။ သိုးထိန်းကဲ့သို့သောသူတို့သည် သိုးထိန်း-ရှင်ဘုရင် ယေရှုခရစ်၏ညီတော်များနှင့်အတူ သိုးအုပ်တစ်အုပ်တည်းဖြစ်နေသဖြင့် ထိုသူတို့မှအကြွင်းအကျန်တို့နှင့် ရင်းနှီးစွာပေါင်းသင်းနိုင်သည့်ပြင် သူတို့အားကောင်းမှုပြုနိုင်သည့် အကောင်းဆုံးအနေအထား၌ရှိကြသည်။ တည်ထောင်ပြီးဖြစ်သော နိုင်ငံတော်သတင်းတရားကို အဆုံးမတိုင်မီကမ္ဘာချီဟောပြောရာတွင် ယေရှု၏ညီတော်များကို ရုပ်ပစ္စည်းအားဖြင့်လည်း ထောက်မကူညီပေးကြသည်။ ဤနေရာတွင်သိုးများသည် သိုးထိန်းတစ်ပါးတည်းလက်အောက်တွင် သိုးအုပ်တစ်အုပ်အဖြစ် အကြွင်းအကျန်တို့နှင့်အတူ ဆက်လက်၍ပူးပေါင်းဖွဲ့စည်းခြင်းအခွင့်အရေးကို မြတ်နိုးတန်ဖိုးထားကြသည်။

၁၀။ သိုးများသည် “ဤလောကတည်သည်ကာလက [သူတို့] အဖို့ပြင်ဆင်ထားသော နိုင်ငံတော်ကိုအမွေခံ” ခြင်းမှာ အဘယ်အဓိပ္ပာယ်ရှိသနည်း။

^၁၀ “[သူတို့] အဖို့ပြင်ဆင်သောနိုင်ငံကို” အမွေခံခြင်းဆိုသည်မှာ ၄င်းသိုးများသည် ယေရှုခရစ်၊ ကိုယ်တော်.ညီများနှင့်အတူ ကောင်းကင်ဘုံတွင်အနှစ်တစ်ထောင် စိုးစံကြမည်ဟုဆိုလိုခြင်းမဟုတ်ပါ။ အနှစ်တစ်ထောင်စလျှင်စချင်း ဤသိုးတို့သည်နိုင်ငံတော်၏ မြေကြီးဆိုင်ရာပိုင်နက်နယ်ပယ်ကို အမွေခံကြမည်ဖြစ်သည်။ သူတို့သည်အာဒံနှင့်ဧဝတို့၏ သားမြေးများဖြစ်သောကြောင့် ခရစ်တော်အုပ်ချုပ်သည့် ဘုရားနိုင်ငံတော်သိမ်းပိုက်မည့် ဤမြေကြီးဆိုင်ရာနယ်ပယ်သည် ရွေးနှုတ်ခံရသောလူသား၏ “လောကတည်သည်ကာလ” မှစ၍ သူတို့အဖို့ပြင်ဆင်ထားရာ ဖြစ်ပေသည်။ ထို့ပြင်ဤသိုးများသည် မင်းကြီး၏မြေကြီးဆိုင်ရာ သားသမီးများဖြစ်လာကြသောကြောင့် ကိုယ်တော်သည်သူတို့၏ “ထာဝရအဘ” ဖြစ်လာတော်မူသည်။ သူတို့သည်ဘုရားနိုင်ငံတော်အောက်ရှိ မြေကြီးဆိုင်ရာနယ်ပယ်ကို အမွေခံရကြလတံ့။—ဟေရှာယ ၉:၆၊ ၇။

၁၁။ သိုးများသည်နိုင်ငံတော်ဘက်ရပ်တည်ကြောင်း အဘယ်သို့ပြသနည်း။ ယင်းအတွက်ကြောင့်အဘယ် ကောင်းချီးခံစားရကြသနည်း။

^၁၁ သိုးကဲ့သို့သောသူများသည် ပုံဆောင်ရာဆိတ်များနှင့်မတူဘဲ နိုင်ငံတော်ဘက်ရပ်တည်ကြောင်း သံသယကင်းစွာပြသကြသည်။ အဘယ်သို့အားဖြင့်နည်း။ အပြောအားဖြင့်သာမဟုတ်ဘဲ အလုပ်အားဖြင့်ပြသကြသည်။ မင်းကြီးသည်ကောင်းကင်ဘုံတွင် သူတို့မမြင်နိုင်သောအရှင်ဖြစ်သောကြောင့် နိုင်ငံတော်ကိုထောက်ခံသည့်အနေနှင့် ကိုယ်တော်အားတိုက်ရိုက်ကောင်းမှု မပြုနိုင်ကြချေ။ ထို့ကြောင့်မြေကြီးပေါ်တွင် ကျန်ကြွင်းလျက်ရှိသော ကိုယ်တော်၏ဝိညာဏညီတော်များအား ကောင်းမှုပြုကြသည်။ ဤသို့ကောင်းမှုပြုခြင်းကြောင့် ဆိတ်တို့၏မုန်းတီးမှု၊ ဆန့်ကျင်မှုနှင့် နှိပ်စက်ညှဉ်းပန်းမှုများ ခံရကြစေကာမူမိမိတို့သည် “ခမည်းတော်ထံမှ ကောင်းချီးမင်္ဂလာခံရသောသူတို့” ဖြစ်ကြောင်းမင်းကြီးထံမှသိရကြ၏။

၁၂။ ကပ်ကျော်မည့်သိုးများ မည်သူတို့ပြန်လာသည်ကို ကြိုဆိုခွင့်ရရှိမည်နည်း။ ဤနေရာတွင် အကြွင်းအကျန်အဝင်ဖြစ်သူတို့သည် အဘယ်စိတ်ကူးစိတ်သန်း ထားကြသနည်း။

^၁၂ မင်းကြီး၏ဝိညာဏညီတော်များအား ကောင်းမှုပြုသည့်သိုးကဲ့သို့သောသူတို့မှ လူအုပ်ကြီးသည် အနှစ်တစ်ထောင်အတွင်းသို့ ကပ်ကျော်ဝင်ရောက်မည့် ဝမ်းမြောက်ဖွယ်အခွင့်အရေး ရရှိကြမည်။ အချိန်တန်သောအခါ အောက်မေ့ရာသင်္ချိုင်းများ၌ရှိသော လူသေများကို ကြိုဆိုခွင့်ရကြမည်။ (ယောဟန် ၅:၂၈၊ ၂၉၊ ၁၁:၂၃-၂၅) ထိုသူတို့တွင် သစ္စာရှိဘိုးဘေးများနှင့် ပရောဖက်များပါဝင်ကြမည်။ သူတို့သည် စောစောထမြောက်ခြင်းဖြစ်ဖွယ်ရှိသည့် “သာ၍မြတ်သောထမြောက်ခြင်းသို့ရောက်လိုသောငှာ” ယေဟောဝါ၏အချုပ်အခြာအာဏာပိုင်သမှုကို ထင်ရှားရေးအတွက် ဒုက္ခများစွာခံ၍ တည်ကြည်ခဲ့ကြသည်။ (ဟေဗြံ ၁၁:၃၅) ဟေဗြံအခန်းကြီး ၁၁ တွင်နာမည်စာရင်းနှင့်တကွ တစ်စိတ်တစ်ဒေသဖေါ်ပြထားသည့် ထမြောက်လာကြမည့် အဆိုပါသစ္စာရှိယောက်ျားမိန်းမတို့တွင် နှစ်ခြင်းဆရာယောဟန်လည်းပါဝင် ပေမည်။ (မဿဲ ၁၁:၁၁) ဘိသိက်ခံအကြွင်းအကျန်အချို့တို့က စီအီး ၃၃ ခုပင်တေကုတ္တေပွဲမတိုင်မီက သေလွန်ခဲ့ကြသောထိုသစ္စာရှိများ ထမြောက်လာသည်ကို ကြိုဆိုရမည့်အချိန်တိုင်အောင် အသက်ရှင်သွားကြမည်ဟု မျှော်လင့်ထားကြသည်။ ဘိသိက်ခံများထိုအခွင့်အရေး ရရှိကြမည်လော။

၁၃။ မြေကြီးပေါ်ရှင်ပြန်ထမြောက်လာသူတို့ကို ကြိုဆို၍စောင့်ရှောက်ရန် အကြွင်းအကျန်များ အဘယ်ကြောင့်ထိုနေရာတွင် ရှိနေစရာမလိုအပ်သနည်း။

^၁၃ ယင်းကားမလိုအပ်ချေ။ ကြီးစွာသောဒုက္ခ ကပ်ကျော်သူလူအုပ်ကြီးသည် ထိုအခြေအနေကိုကိုင်တွယ်ရန်နှင့် ထမြောက်လာသူတို့အား “ကောင်းကင်သစ်” အောက်ရှိ “မြေကြီးသစ်” နှင့်အကျွမ်းဝင်အောင် ကူညီပေးရန်လူအင်အားအလုံအလောက် ရှိနေပေမည်။ (၂ ပေတရု ၃:၁၃) ယခုအချိန်မှစ၍လူအုပ်ကြီးအား ဤအတွက်စီစဉ်ဖွဲ့စည်းထားပြီးဖြစ်သည်။ ယနေ့မြေကြီးပေါ်ရှိ ယေရှု၏ဝိညာဏညီတော်များအရေအတွက်မှာ ၈၇၃၄ လျော့လျော့သာရှိနေသဖြင့် မည်သို့ပင်ဖြစ်စေသူတို့အနက်မှ လူအများထမြောက်ခြင်းအတွက် ပြင်ဆင်ရေးလုပ်ငန်းအဝဝကိုထမ်းဆောင်နိုင်ကြမည့် ကပ်ကျော်မည့်သူတို့မှာ အလွန်နည်းပါးနေပေမည်။ (ယေဇကျေလ ၃၉:၈-၁၆) ထို့ကြောင့်ဤနေရာတွင် အရေအတွက်သန်းနှင့်ချီသောလူအုပ်ကြီးသည် အကောင်းဆုံးအသုံးတော်ခံကြပေမည်။ ထိုအခွင့်အရေးသည် သူတို့အတွက်ဖြစ်သည်မှာ ယုံမှားဖွယ်ရာမရှိပေ။

၁၄။ (က) လူအုပ်ကြီးမှအများသောသူတို့ကို အဘယ်အတွက်လေ့ကျင့်ပေးနေသနည်း။ သူတို့အထဲမှအများသောသူတို့သည် ယခုအခါတာဝန်ထမ်းဆောင်ရန် အဘယ်ကြောင့်လိုအပ်သနည်း။ (ခ) မကြာမမြင့်မီ အဘယ်အချင်းအရာ ဖြစ်ပျက်လာတော့မည်နည်း။ အခြားသိုးများအဘယ်အလုပ် လုပ်စရာရှိသနည်း။

^၁၄ လူအုပ်ကြီးမှများစွာသောသူတို့ကို အသင်းတော်တာဝန်များထမ်းဆောင်ရန်အတွက် လေ့ကျင့်ပေးလျက်ရှိပြီး ကမ္ဘာတစ်ဝှန်းတွင် ဘုရားအဖွဲ့အစည်းဆောင်ရွက်နေသော ဆောက်လုပ်ရေးအစီအစဉ်များအားဖြင့်လည်း လေ့ကျင့်ပေးလျက်ရှိသည်။ ယခုကမ္ဘာပေါ်တွင်လုပ်ငန်းစီမံခန့်ခွဲနေသော ယေဟောဝါ၏အဖွဲ့အစည်းတော်တွင် သာ၍ကြီးလေးသောတာဝန်များ ထမ်းဆောင်ရန်လူအုပ်ကြီးထဲမှ ခန့်အပ်ခံရသောဝိညာဉ်ရေးဘက် ပါရမီရင့်ကျက်သည့်အမှုဆောင်များ တိုးတက်များပြားလာသည်ကို တွေ့ရသည်မှာအားတက်ဖွယ် ကောင်းပေသည်။ ဘိသိက်ခံများမှကျန်ကြွင်းသူတို့သည် အသက်ကြီးရင့်ပြီဖြစ်ရာ တာဝန်ကိုထမ်းဆောင်နိုင်သည့်ခွန်အား ဆုတ်ယုတ်လာကြသည်။ မင်းကြီး၏ဤညီတော်များသည် အခြားသိုးများမှဝိညာဏအရည်အချင်းရှိသော အကြီးအကဲများနှင့်ဓမ္မအမှုထမ်းများ အဖွဲ့အစည်းဘက်တွင်မေတ္တာဖြင့်ပေးလာသည့် အကူအညီကိုဝမ်းမြောက်စွာ ကြိုဆိုကြသည်။ များမကြာမီမဟာဗာဗုလုန်သည် ကမ္ဘာ့ဇာတ်ခုံပေါ်မှ ဖယ်ရှားခံရတော့မည်။ ၄င်းနောက် ဗျာဒိတ် ၁၉:၁-၈ တွင်ဖော်ပြထားသည့်အတိုင်း ကောင်းကင်ဘုံတွင်သိုးသငယ်နှင့် ၁၄၄၀၀၀ သောသတို့သမီးတို့၏မင်္ဂလာဆောင်ပွဲ ကျင်းပပြီးစီးပေလိမ့်မည်။ အခြားသိုးများသည်လည်း ကောင်းကင်သစ်အောက်ရှိမြေကြီးသစ်အနေနှင့် ယေဟောဝါအတွက်ချီးမွမ်းခြင်းဖြစ်စေရန် မြေကြီးတစ်ပြင်လုံးကို လူတို့နေထိုင်ရာပရဒိသုဘုံ ဖြစ်လာသည်အထိ ပြန်လည်ထူထောင်ရေးလုပ်ငန်းကြီးကို မင်းကြီးကိုယ်စားဆောင်ရွက်ကြလိမ့်မည်။—ဟေရှာယ ၆၅:၁၇။ ဟေရှာယ ၆၁:၄-၆ နှင့်နှိုင်းယှဉ်ပါ။

၁၅။ လူအုပ်ကြီးသည် အနှစ်တစ်ထောင်အတွင်း အဘယ်အလားအလာများကို မျှော်လင့်ကြသနည်း။

^၁၅ ခရစ်တော်အနှစ်တစ်ထောင် စိုးစံချိန်အတွင်းရွေးနှုတ်ခံရသောလူသေများ ထမြောက်လာကြသောအခါ ကပ်ကျော်သည့်လူအုပ်ကြီးသည် အထူးဂုဏ်ယူစရာကောင်းသော မဟာအခွင့်အရေးရရှိကြပေမည်။ ထိုအချိန်တွင်သူတို့သည် မင်းကြီး၏သားသမီးများ ဖြစ်လာကြမည်။ သူတို့အနက်မှ မင်းကြီး၏သားများဖြစ်သူတို့သည် မင်းညီမင်းသားရာထူးရရှိကြမည်။ ဒါဝိဒ်မင်းကြီး၏သားများသည် တာဝန်အမျိုးမျိုး၌မင်းသားမှူးမတ်များအဖြစ် ထမ်းဆောင်ကြသကဲ့သို့ပင်ဖြစ်သည်။a ဤအချက်ကယေဟောဝါ၏ဘိသိက်ခံ “ရှင်ဘုရင်” ကိုရည်ညွှန်းစပ်ဆိုထားသည့်ဆာလံ ၄၅ ကိုသတိရစေ၏။

၁၆။ ဆာလံ ၄၅သည်မည်သူအားစင်စစ် ရည်ညွှန်းသနည်း။ အဘယ်သက်သေအထောက်အထား ရှိသနည်း။

^၁၆ ဆာလံ ၄၅ သည်မည်သည့်ရှင်ဘုရင်ကို အမှန်ရည်ညွှန်းသနည်း။ ယေရှုခရစ်ဖြစ်သည်။ ဟေဗြဲ ၁:၉ ကဆာလံ ၄၅:၇ ကိုကိုးကားခြင်းအားဖြင့် ဤအချက်ကိုထောက်ခံထားသည်။ ဤသို့ဖတ်ရ၏။ “ကိုယ်တော်သည် ဖြောင့်မတ်ခြင်းတရားကိုနှစ်သက်၍ မတရားသောအမှုကိုမုန်းတော်မူ၏။ ထို့ကြောင့်အိုဘုရားသခင်၊ ကိုယ်တော်၏ဘုရားသခင်သည် ကိုယ်တော်၏အပေါင်းအဖော်တို့ထက် ကိုယ်တော်ကိုချီးမြှောက်၍ ဝမ်းမြောက်ခြင်းဆီနှင့် ဘိသိက်ပေးတော်မူပြီ။” ထို့ကြောင့်ဆာလံ ၄၅:၁၆ သည်ဘုန်းပွင့်သောယေရှုခရစ်ကို အမှန်ပင်ရည်ညွှန်းခြင်းဖြစ်သည်။ “ကိုယ်တော်၏အဘများကိုယ်စား သားများကိုရ၍ မြေကြီးတစ်ပြင်လုံးတွင် မင်းအရာ၌ခန့်ထားတော်မူလိမ့်မည်။”

၁၇။ ရှင်ဘုရင်ယေရှုခရစ်သည် အဘယ်အရာနှင့်မည်သူတို့ကို အထူးစိတ်ဝင်စားတော်မူသနည်း။

^၁၇ ယေရှုအနေဖြင့် မြေကြီးဆိုင်ရာအတိတ်ဘဝထက် အနာဂတ်တွင်အုပ်ချုပ်ခြင်းကို ပို၍စိတ်ဝင်စားဖို့ရာ အကြောင်းရှိပေသည်။ အတိတ်ကိုကိုယ်တော်မေ့တော်မမူပေ။ အထူးသဖြင့် အာဗြဟံ၏ အမျိုးအနွယ်အားဖြင့် လူမျိုးအပေါင်းတို့ကိုကောင်းချီးပေးမည့် ယေဟောဝါ၏ကတိတော်တွင် ပါဝင်ခဲ့ကြသော ကိုယ်တော်၏လူသား ဘိုးဘေးတော်တို့ကိုမေ့တော်မမူပေ။ သို့သော်ယခုကိုယ်တော်သည် ရှင်ဘုရင်တင်မြှောက်ပေးသူ ယေဟောဝါဘုရားရှင်၏ ရည်ရွယ်ချက်နှင့်အညီ လက်တစ်ကမ်းအနာဂတ်ကိုသာ အဓိကစိတ်ဝင်စားတော်မူသည်။ ထို့ကြောင့်ယေရှု၏ မြေကြီးသားသမီးများ အထူးသဖြင့်လက်တော်အောက်တွင် မင်းညီမင်းသားတာဝန်များထမ်းဆောင်ရန် အရည်အချင်းပြည့်စုံသည့်သားများသည် ကိုယ်တော်၏မြေကြီးဘိုးဘေးတော်တို့ထက် တာဝန်ယူဆောင်ရွက်ကြပါလိမ့်မည်။

၁၈။ ယေရှုသည်မြေကြီးဆိုင်ရာ ဘိုးဘေးများထက် မင်းညီမင်းသားများဖြစ်သော သားတော်များအား ပို၍စိတ်ဝင်စားကြောင်းဆာလံ ၄၅:၁၆ ကိုဘာသာပြန်ကျမ်းအချို့က အဘယ်သို့လေးနက်ပေါ်လွင်စေသနည်း။

^၁၈ ဘိုးဘေးတော်တို့ထက် မင်းညီမင်းသားဖြစ်သောသားများ၌ ယေရှုအထူးစိတ်ဝင်စားခြင်းကို ဘာသာပြန်ကျမ်းအမျိုးမျိုးက အလေးအနက်ဖော်ပြကြသည်။ အောက်ပါတို့မှာဆာလံ ၄၅:၁၆ ကိုပြန်ဆိုပုံအချို့ဖြစ်သည်။ “ကိုယ်တော်၏သားတော်တို့သည် ဘိုးဘေးတော်တို့အရိုက်အရာကို ဆက်ခံ၍တစ်ပြည်လုံးတွင် မင်းသားများဖြစ်ကြပါလိမ့်မည်။” (Moffatt) “ကိုယ်တော်၏ဘိုးဘေးအရိုက်အရာကို ကိုယ်တော်၏သားများဆက်ခံရလိမ့်မည်။ ပြည်တော်တစ်ခွင်တွင် မင်းသားများဖြစ်စေတော်မူလိမ့်မည်။” (အခန်းငယ် ၁၇ The New American Bible) “ဘိုးဘေးတို့ကိုယ်စား သားများပေါ်ထွန်းပါလိမ့်မည်။ မြေတစ်ပြင်လုံးတွင် မင်းသားများဖြစ်စေတော်မူမည်။”—စင်မြူရယ်ဘက်စတား နှင့်သားများထုတ်ဝေသော The Septuagint Version

၁၉။ လူအုပ်ကြီးမှအချို့အမျိုးသားများ ယခုအဘယ်အသင်းတော်တာဝန်များ ထမ်းဆောင်နေကြသနည်း။ ရှင်ဘုရင်ယေရှုခရစ်သည် အနှစ်တစ်ထောင်စိုးစံရာကာလအတွင်း၌ သူတို့အားအဘယ်ရာထူး၌ ခန့်အပ်ဖွယ်ရှိသနည်း။

^၁၉ ကျွန်ုပ်တို့ဝမ်းမြောက်စရာကား မင်းသားလောင်းတို့သည်ယခုပင် ကျွန်ုပ်တို့အလယ်တွင် ရှိနေခြင်းဖြစ်သည်။ ကောင်းသောသိုးထိန်းယေရှုခရစ်၏ အသံတော်ကိုနားထောင်သော အခြားသိုးတို့တွင် သူတို့ကိုတွေ့ရသည်။ ၁၉၃၅ မှစ၍ အထူးသဖြင့် ဝါရှင်တန်ဒီစီ၌ကျင်းပသော ယေဟောဝါသက်သေများ၏စည်းဝေးကြီးတွင် ဗျာဒိတ် ၇:၉-၁၇ ကိုရှင်းပြသည့် အသံတော်ကို နားထောင်လာခဲ့ကြသည်။ ယနေ့ဆိုလျှင် အခြားသိုးများမှဤလူအုပ်ကြီးအဝင် ထောင်ပေါင်းများစွာသည် ကမ္ဘာတစ်ဝှန်းနိုင်ငံဒေသပေါင်း ၂၁၂ ခုတွင်အသင်းတော် ၆၀၁၉၂ ကျော်၌ အကြီးအကဲများ သို့မဟုတ် ကြီးကြပ်မှူးများအဖြစ် အမှုတော်ထမ်းဆောင်နေကြသည်။ ဤသူတို့သည်မြေကြီးပေါ်တွင် ကျန်ကြွင်းနေသည့်ယေရှု၏ဝိညာဏညီတော်များနှင့်အတူ ဆက်လက်ပူးပေါင်းဖွဲ့စည်းနေခြင်းအားဖြင့် ကတိထားရာမြေကြီးသစ်ကို ရှင်ဘုရင်ယေရှုခရစ်အနှစ်တစ်ထောင် စိုးစံရာကာလအတွင်း၌ ကိုယ်တော်၏မြေကြီးဆိုင်ရာသားတော်များအဖြစ် အပြည့်အဝမွေးစားခြင်းခံရမည့် မျှော်လင့်ချက်ရှိကြသည်။ (၂ ပေတရု ၃:၁၃) သားတော်များအနေနှင့် သူတို့သည်မြေကြီးသစ်တွင် အမှုတော်ထမ်းဆောင်ရန် မင်းသားများအဖြစ် ခန့်အပ်ခံရကြမည်။

၂၀။ (က) မြေကြီးပေါ်ရှိခန့်အပ်ခံရသူတို့အပေါ်မင်းကြီး အဘယ်စိတ်သဘောထားရှိတော်မူသနည်း။ (ခ) လူအုပ်ကြီးသည် မည်သူတို့ပြန်လာသည်ကို ကြိုဆိုရကြမည်နည်း။ ပြန်လာသူတို့အဘယ်အခွင့်အရေး ခံစားရကြမည်နည်း။

^၂၀ မင်းကြီးယေရှုခရစ်သည် မျက်မှောက်ခေတ်ယေဟောဝါသက်သေများ အသင်းတော်မှသစ္စာရှိသော အခြားသိုးများထမ်းဆောင်နေသည့်ကြီးကြပ်မှုကို ယခုအသိအမှတ်ပြုသည့်နည်းတူ အသစ်ခန့်အပ်ခံရသည့် ဤမင်းသားများကိုဝမ်းမြောက်စွာ အသိအမှတ်ပြုတော်မူမည်။ အခြားသိုးများမှ လူအုပ်ကြီးအဝင်ဖြစ်သော ယောက်ျားမိန်းမအားလုံးသည် ယေရှု၏အသံတော်ကိုကြား၍ သေရာမှပြန်ရှင်လာသူတို့ကို ကြိုဆိုရမည့်ရင်ဖိုဖွယ်အခွင့်အရေး ရရှိကြမည်။ ထမြောက်လာသူတို့သည် ကမ္ဘာချီပရဒိသုအသွင်သို့ ပြောင်းလဲပြီးသောသန့်စင်သည့် ကမ္ဘာမြေကြီးပေါ်တွင် စုံလင်သောလူ့ဘဝကို ထာဝစဉ်ခံစားကြရပေမည်။ (ယောဟန် ၅:၂၈၊ ၂၉) မျက်နှာသာတော်ခံစားရသည့် ထမြောက်လာသူတို့တွင် ယေရှုခရစ်၏ရွေးနှုတ်ခံရသော ဘိုးဘေးများပါဝင်ပေလိမ့်မည်။ ဤသူတို့သည် “သာ၍မြတ်သောထမြောက်ခြင်း” ရရှိရေးအတွက် သေသည်တိုင်အောင် ယေဟောဝါဘုရားရှင်အပေါ် သစ္စာစောင့်သိရန် အသင့်ရှိခဲ့သူများဖြစ်သည်။ (ဟေဗြဲ ၁၁:၃၅) သို့ရာတွင် ရွေးနှုတ်ရှင်—ဘုရင် ယေရှုခရစ်စိုးစံရာ အနှစ်တစ်ထောင်အတွင်း၌ လူ့စုံလင်ခြင်းအဆင့်သို့ မြှင့်တင်ခံရခြင်းသည် အစမျှသာဖြစ်သည်။ အနှစ်တစ်ထောင်အကုန်တွင် မူလအခြေအနေသို့ ပြန်လည်ရောက်ရှိပြီးသော လူသားများအပေါ်ကျရောက်မည့် နောက်ဆုံးစမ်းသပ်ခြင်းအတောအတွင်း ယေဟောဝါ၏လက်တော်အောက်တွင် တစ်စုတစ်စည်းတည်း ဆက်လက်၍ဖွဲ့စည်းနေသွားခြင်းအားဖြင့် သူတို့သည်ယေဟောဝါစကြဝဠာအဖွဲ့အစည်းတော်၏ မြေကြီးဆိုင်ရာအပိုင်းအနေနှင့် ပရဒိသုတွင်အဆုံးမရှိသော အသက်တာခံစားနိုင်သူများဖြစ်ကြောင်း သက်သေတင်ပြနိုင်ကြပေသည်။—မဿဲ ၂၅:၃၁-၄၆။ ဗျာဒိတ် ၂၀:၁–၂၁:၁။

[အောက်ခြေမှတ်ချက်များ]

သင်မည်သို့ဖြေမည်နည်း

▫ လူသားအပေါင်းတို့ကိုကောင်းချီးပေးရန် အဘယ်အချိန်ကာလကိုယေဟောဝါ လျာထားတော်မူသနည်း။

▫ အချင်းချင်းအဘယ်သို့သော ဆက်ဆံရေး၌ဆက်လက်တည်ရှိနေပါမှ ကြီးစွာသောဒုက္ခကို ကပ်ကျော်နိုင်မည်နည်း။

▫ ‘ဤလောကတည်သည်ကာလမှစ၍ သူတို့အဖို့ပြင်ဆင်ထားသော နိုင်ငံတော်ကိုလာ၍ အမွေခံ’ ခြင်းသည် အဘယ်အဓိပ္ပာယ်ရှိသနည်း။

▫ အနှစ်တစ်ထောင်အတောအတွင်း၌ လူအုပ်ကြီးသည်အဘယ်အခွင့်အရေး ခံစားရကြမည်နည်း။