ယေရှု၏ဟောပြောချက် ပျော်ရွှင်မှုမည်သို့တိုးပွားစေနိုင်

‘[ယေရှုသည်] တောင်ပေါ်သို့ တက်သွား . . . လျှင် တပည့်တို့သည် အထံတော်သို့ ရောက်လာကြ၏။ ထို့နောက် ကိုယ်တော် စတင်ဟောပြော သွန်သင်တော်မူ၏။’—မ. ၅:၁၊ ၂။

၁၊ ၂။ (က) ယေရှုသည် အဘယ်အခြေအနေအောက်တွင် တောင်ပေါ်တရားတော်ကို ဟောကြားခဲ့သနည်း။ (ခ) ယေရှုသည် ဟောပြောချက်ကို မည်သို့စတင်ခဲ့သနည်း။

ခုနှစ်ကား စီအီး ၃၁ တွင်ဖြစ်သည်။ ယေရှုသည် ဂါလိလဲတွင်ဟောပြောနေမှုကို ခေတ္တရပ်ဆိုင်းပြီး ဂျေရုဆလင်မြို့တွင် ပသခါပွဲတက်ရောက်သည်။ (ယော. ၅:၁) ဂါလိလဲသို့ပြန်လာကာ တမန်တော် ၁၂ ပါးကိုရွေးချယ်ရာတွင် ဘုရားသခင်လမ်းညွှန်ရန် တစ်ညလုံးဆုတောင်းခဲ့သည်။ နောက်နေ့တွင် လူအုပ်စုရုံးလာ၍ ယေရှုသည် ဖျားနာသူတို့ကို ကုသပေးတော်မူ၏။ ကိုယ်တော့်တပည့်များနှင့် အခြားသူတို့ရောက်ရှိနေရာ ကိုယ်တော်သည် တောင်စောင်းတစ်နေရာတွင်ထိုင်ပြီး စတင်သွန်သင်ခဲ့သည်။—မ. ၄:၂၃–၅:၂; လု. ၆:၁၂-၁၉။

^၂ ဘုရားသခင်နှင့် ကောင်းသောဆက်ဆံရေးရှိခြင်းမှရရှိသည့် ပျော်ရွှင်မှုကို ဖော်ပြခြင်းဖြင့် ယေရှုသည် ဟောပြောချက်—တောင်ပေါ်တရားတော်—ကို အစပြုခဲ့သည်။ (မဿဲ ၅:၁-၁၂ ကိုဖတ်ပါ။) ပျော်ရွှင်ခြင်းဟူသည် ‘အားရကျေနပ်ခြင်းမှ အူလှိုက်သည်းလှိုက် ဝမ်းမြောက်ဝမ်းသာဖြစ်သည့်အထိ ချမ်းမြေ့သာယာသောအခြေအနေတစ်ခုဖြစ်သည်။’ ယေရှုဆွေးနွေးခဲ့သည့် ပျော်ရွှင်မှုကိုးခုသည် ခရစ်ယာန်များပျော်ရွှင်ရသည့်အကြောင်းရင်းကို ပေါ်လွင်စေပြီး ယင်းဟောပြောချက်သည် လွန်ခဲ့သောနှစ်ပေါင်း ၂,၀၀၀ ခန့်ကကဲ့သို့ပင် ယနေ့အချိန်တွင် အကျိုးပြုဆဲဖြစ်သည်။ ယင်းမိန့်တော်မူချက်တစ်ခုစီကို ယခုသုံးသပ်ကြည့်ကြစို့။

“ဘုရားသခင်ကို မှီခိုရန်လိုကြောင်း သိမှတ်သူတို့”

၃။ ဘုရားသခင်ကို မှီခိုရန်လိုကြောင်းသိမှတ်ခြင်းသည် အဘယ်အရာကိုဆိုလိုသနည်း။

^၃ “ဘုရားသခင်ကို မှီခိုရန်လိုကြောင်း သိမှတ်သူတို့သည် ပျော်ရွှင်ကြ၏။ အကြောင်းမူကား ကောင်းကင်နိုင်ငံတော်သည် ထိုသူတို့၏နိုင်ငံဖြစ်၏။” (မ. ၅:၃) “ဘုရားသခင်ကို မှီခိုရန်လိုကြောင်း သိမှတ်သူတို့” က မိမိတို့သည် ဘုရားသခင်၏လမ်းညွှန်မှုနှင့် သနားကြင်နာမှုလိုကြောင်း အသိအမှတ်ပြုကြသည်။

၄၊ ၅။ (က) ဘုရားသခင်ကို မှီခိုရန်လိုကြောင်းသိမှတ်သူတို့သည် အဘယ်ကြောင့် ပျော်ရွှင်ကြသနည်း။ (ခ) ဘုရားသခင်၏လမ်းညွှန်မှုလိုအပ်ချက်ကို ကျွန်ုပ်တို့မည်သို့ဖြည့်စွက်နိုင်သနည်း။

^၄ ဘုရားသခင်ကို မှီခိုရန်လိုကြောင်းသိမှတ်သူတို့သည် ပျော်ရွှင်ကြ၏၊ “အကြောင်းမူကား ကောင်းကင်နိုင်ငံတော်သည် ထိုသူတို့၏နိုင်ငံဖြစ်၏။” ယေရှုကို မေရှိယအဖြစ်လက်ခံခြင်းက ကိုယ်တော်၏အစောပိုင်းတပည့်တို့အဖို့ ဘုရားသခင့်ကောင်းကင်နိုင်ငံတော်တွင် ကိုယ်တော်နှင့်အတူ အုပ်ချုပ်ခွင့်အလားအလာပွင့်ခဲ့သည်။ (လု. ၂၂:၂၈-၃၀) ကျွန်ုပ်တို့သည် ခရစ်တော်နှင့်အတူ ကောင်းကင်တွင်အမွေခံဖြစ်ခွင့် မျှော်လင့်ချက်ရှိသည်ဖြစ်စေ၊ ဘုရားသခင့်နိုင်ငံတော်အုပ်ချုပ်မှုအောက် မြေကြီးပရဒိသုတွင် ထာဝရအသက်ရှင်ခွင့်ကို မျှော်လင့်သည်ဖြစ်စေ ဘုရားသခင်ကိုမှီခိုရန်လိုကြောင်း အမှန်သိမှတ်ကြမည်ဆိုပါက ကျွန်ုပ်တို့ပျော်ရွှင်နိုင်ကြသည်။

^၅ များစွာသောသူတို့သည် ယုံကြည်ခြင်းမရှိ၊ မြင့်မြတ်သောအရာများကို တန်ဖိုးထားခြင်းမရှိကြသောကြောင့် ဘုရားသခင်၏လမ်းညွှန်မှုနှင့် သနားကြင်နာမှုလိုအပ်သည်ကို လူအားလုံး အသိအမှတ်ပြုကြမည်တော့မဟုတ်ပါ။ (၂ သက်. ၃:၁၊ ၂; ဟေဗြဲ ၁၂:၁၆) ဘုရားသခင်၏လမ်းညွှန်မှုလိုအပ်ချက်ကို ဖြည့်စွက်သည့်နည်းများတွင် သမ္မာကျမ်းစာကို ဝီရိယရှိရှိလေ့လာခြင်း၊ တပည့်ဖြစ်စေခြင်းလုပ်ငန်းတွင် ဇွဲထက်သန်စွာလုပ်ဆောင်ခြင်း၊ ခရစ်ယာန်အစည်းအဝေးများကို မှန်မှန်တက်ရောက်ခြင်းတို့ပါဝင်သည်။—မ. ၂၈:၁၉၊ ၂၀; ဟေဗြဲ ၁၀:၂၃-၂၅။

“ပျော်ရွှင်” ကြသော ဝမ်းနည်းပူဆွေးသူများ

၆။ မည်သူတို့သည် “ဝမ်းနည်းပူဆွေးသူတို့” ဖြစ်ကြပြီး သူတို့ အဘယ်ကြောင့် “ပျော်ရွှင်” ကြသနည်း။

^၆ “ဝမ်းနည်းပူဆွေးသူတို့သည် ပျော်ရွှင်ကြ၏။ အကြောင်းမူကား ထိုသူတို့သည် နှစ်သိမ့်မှုရကြလိမ့်မည်။” (မ. ၅:၄) “ဝမ်းနည်းပူဆွေးသူတို့” မှာ “ဘုရားသခင်ကို မှီခိုရန်လိုကြောင်း သိမှတ်” ကြသောလူများပင်ဖြစ်သည်။ မိမိတို့၏ဘဝအခြေအနေကို ညည်းညူသည့်သဘောဖြင့် ဝမ်းနည်းပူဆွေးကြသည်မဟုတ်ပါ။ သူတို့ဝမ်းနည်းပူဆွေးကြသည်မှာ မိမိတို့၏အပြစ်ရှိသောအခြေအနေ၊ လူ့မစုံလင်မှုကြောင့် တည်ရှိနေသည့်အခြေအနေများကြောင့် ဝမ်းနည်းခြင်းဖြစ်သည်။ ထိုသို့သောဝမ်းနည်းပူဆွေးသူတို့သည် အဘယ်ကြောင့် “ပျော်ရွှင်” ကြသနည်း။ အကြောင်းမှာ သူတို့သည် ဘုရားသခင်နှင့် ခရစ်တော်ကို ယုံကြည်ကြောင်းတင်ပြကြပြီး ယေဟောဝါနှင့် ရင်းနှီးသောဆက်ဆံရေးရှိခြင်းဖြင့် နှစ်သိမ့်မှုရရှိကြသောကြောင့်ဖြစ်သည်။—ယော. ၃:၃၆။

၇။ စာတန့်လောကနှင့်ပတ်သက်၍ ကျွန်ုပ်တို့ မည်သို့ယူမှတ်သင့်သနည်း။

^၇ စာတန့်လောကတွင် မဖြောင့်မတ်မှုများ ပျံ့နှံ့နေမှုကြောင့် ကျွန်ုပ်တို့တစ်ဦးစီသည် ဝမ်းနည်းပူဆွေးကြပါသလော။ ဤလောကကမ်းလှမ်းရာများနှင့်ပတ်သက်၍ ကျွန်ုပ်တို့ မည်သို့အမှန်ယူမှတ်ကြသနည်း။ တမန်တော်ယောဟန် ဤသို့ရေးခဲ့၏– “သွေးသားတပ်မက်ခြင်း၊ မျက်စိတပ်မက်ခြင်း၊ လောကစည်းစိမ်၌ ဝါကြွားခြင်းတည်းဟူသော လောက၌ရှိသမျှသောအရာတို့သည် ခမည်းတော်နှင့်မစပ်ဆိုင်။ လောကနှင့်သာ စပ်ဆိုင်၏။” (၁ ယော. ၂:၁၆) သို့သော် ယေဟောဝါအားကျွန်ုပ်တို့ဝတ်ပြုကိုးကွယ်မှုတွင် တဖြည်းဖြည်းနှင့် “လောကစိတ်ဓာတ်”—ဘုရားသခင်နှင့်ကင်းကွာနေသော လူ့အဖွဲ့အစည်းကိုလွှမ်းမိုးနေသည့် အဓိကလှုံ့ဆော်သောစွမ်းအား—၏လွှမ်းမိုးမှုခံနေရသည်ကို သတိထားမိပါက အဘယ်အရာပြုလုပ်သင့်သနည်း။ ထိုသို့ဖြစ်နေလျှင် စိတ်အားထက်သန်စွာ ဆုတောင်းကြစို့၊ ဘုရားသခင့်နှုတ်မြွက်တော်ကိုလေ့လာပြီး အကြီးအကဲများထံမှ အကူအညီယူကြစို့။ ကျွန်ုပ်တို့သည် ယေဟောဝါနှင့် ပို၍ရင်းနှီးလာသည့်အခါ ကျွန်ုပ်တို့အား ခက်ခဲဆင်းရဲစေသည့်အရာရှိသည့်ကြားမှ “နှစ်သိမ့်” မှုခံစားကြရမည်။—၁ ကော. ၂:၁၂; ဆာ. ၁၁၉:၅၂; ယာ. ၅:၁၄၊ ၁၅။

“နူးညံ့သိမ်မွေ့သူတို့” ပျော်ရွှင်ကြ

၈၊ ၉။ စိတ်နူးညံ့သိမ်မွေ့ခြင်းသည် အဘယ်အရာကို ဆိုလိုသနည်း၊ စိတ်နူးညံ့သိမ်မွေ့သူတို့သည် အဘယ်ကြောင့် ပျော်ရွှင်ကြသနည်း။

^၈ “နူးညံ့သိမ်မွေ့သူတို့သည် ပျော်ရွှင်ကြ၏။ အကြောင်းမူကား ထိုသူတို့သည် မြေကြီးကို အမွေရကြလိမ့်မည်။” (မ. ၅:၅) “နူးညံ့သိမ်မွေ့ခြင်း” သို့မဟုတ် စိတ်နူးညံ့ခြင်းသည် အားနည်းခြင်း သို့မဟုတ် ဟန်ဆောင်နူးညံ့သိမ်မွေ့ခြင်းကို ဆိုလိုသည်မဟုတ်ပါ။ (၁ တိ. ၆:၁၁) ကျွန်ုပ်တို့သည် စိတ်နူးညံ့သိမ်မွေ့ပါက ယေဟောဝါ၏အလိုတော်ကိုဆောင်ခြင်း၊ ကိုယ်တော်၏လမ်းညွှန်မှုကို လိုက်နာခြင်းအားဖြင့် ကျွန်ုပ်တို့၏စိတ်နူးညံ့မှုကို တင်ပြကြမည်ဖြစ်သည်။ ယုံကြည်သူချင်းများ၊ အခြားသူများနှင့် ကျွန်ုပ်တို့ဆက်ဆံပုံတွင်လည်း စိတ်နူးညံ့သိမ်မွေ့မှု ထင်ရှားမည်ဖြစ်သည်။ ထိုကဲ့သို့သောစိတ်နူးညံ့မှုသည် တမန်တော်ပေါလု၏ဆုံးမစကားနှင့် ကိုက်ညီသည်။—ရောမ ၁၂:၁၇-၁၉ ကိုဖတ်ပါ။

^၉ နူးညံ့သိမ်မွေ့သူတို့သည် အဘယ်ကြောင့် ပျော်ရွှင်ကြသနည်း။ အကြောင်းမှာ “ထိုသူတို့သည် မြေကြီးကို အမွေရကြလိမ့်မည်” ဟုနူးညံ့သိမ်မွေ့သူယေရှု မိန့်တော်မူခဲ့၏။ ကိုယ်တော်သည် မြေကြီးကို အဓိကအမွေခံထိုက်သူဖြစ်သည်။ (ဆာ. ၂:၈; မ. ၁၁:၂၉; ဟေဗြဲ ၂:၈၊ ၉) သို့သော် စိတ်နူးညံ့သိမ်မွေ့ကြသော “ခရစ်တော်၏အမွေခံဖက်” တို့သည်လည်း ကိုယ်တော်နှင့်အတူ မြေကြီးကိုအမွေခံကြသည်။ (ရော. ၈:၁၆၊ ၁၇) ယေရှုနိုင်ငံတော်၏ မြေကြီးဆိုင်ရာနယ်ပယ်တွင် အခြားနူးညံ့သိမ်မွေ့သူများစွာတို့သည် ထာဝရအသက်ကို မွေ့လျော်ခံစားကြရမည်။—ဆာ. ၃၇:၁၀၊ ၁၁။

၁၀။ နူးညံ့သိမ်မွေ့မှုမရှိပါက ကျွန်ုပ်တို့၏လုပ်ငန်းတော်အခွင့်ထူးများ၊ အခြားသူတို့နှင့် ကျွန်ုပ်တို့၏ဆက်ဆံရေးကို မည်သို့ထိခိုက်နိုင်သနည်း။

^၁၀ ယေရှုကဲ့သို့ပင် ကျွန်ုပ်တို့သည် စိတ်နူးညံ့သိမ်မွေ့သင့်သည်။ သို့သော် ကျွန်ုပ်တို့ကို ရန်လိုတတ်သူတစ်ဦးအဖြစ် သိထားကြပါက အသို့နည်း။ ရန်ထောင်၊ ရန်မူတတ်သည့်သဘောထားကြောင့် လူတို့သည် ကျွန်ုပ်တို့ကို ရှောင်ကြပေမည်။ ကျွန်ုပ်တို့သည် အသင်းတော်တွင် တာဝန်များရလိုသော ညီအစ်ကိုများဖြစ်မည်ဆိုပါက ရန်လိုတတ်သည့်သဘောထားက ကျွန်ုပ်တို့ကို အရည်အချင်းမပြည့်မီစေပါ။ (၁ တိ. ၃:၁၊ ၃) ပေါလုက တိတုအား ခရိကျွန်းရှိခရစ်ယာန်များသည် “ရန်လိုခြင်းမပြုဘဲ လူအပေါင်းတို့အား အကျိုးသင့်အကြောင်းသင့်သဘောနှင့် နူးညံ့သိမ်မွေ့ခြင်းကို အတတ်နိုင်ဆုံး တင်ပြရန်” သတိပေးဖို့ပြောခဲ့သည်။ (တိ. ၃:၁၊ ၂) ထိုကဲ့သို့သောနူးညံ့သိမ်မွေ့မှုသည် အခြားသူများအဖို့ ကောင်းချီးတစ်ခုဖြစ်သည်။

“ဖြောင့်မတ်ခြင်းတရား” ကိုသူတို့ဆာငတ်ကြ

၁၁-၁၃။ (ခ) ဖြောင့်မတ်ခြင်းတရားကိုငတ်မွတ်ခြင်းသည် အဘယ်အရာကိုဆိုလိုသနည်း။ (ခ) ဖြောင့်မတ်ခြင်းတရားကို ငတ်မွတ်သူတို့သည် မည်သို့ “ဝပြော” ကြသနည်း။

^၁၁ “ဖြောင့်မတ်ခြင်းတရားကို ဆာငတ်သူတို့သည် ပျော်ရွှင်ကြ၏။ အကြောင်းမူကား ထိုသူတို့သည် ဝပြောကြလိမ့်မည်။” (မ. ၅:၆) ယေရှု၏စိတ်တွင်ရှိခဲ့သော “ဖြောင့်မတ်ခြင်းတရား” မှာ ဘုရားသခင့်အလိုတော်ဆောင်ကာ ပညတ်တော်များကို လိုက်နာခြင်းဖြင့် မှန်ကန်ရာကိုလုပ်ဆောင်သည့် အရည်အချင်းဖြစ်သည်။ ဆာလံဆရာက ဘုရားသခင်၏ ဖြောင့်မတ်သောစီရင်တော်မူချက်များကို “တောင့်တသောအားဖြင့် . . . စိတ်နှလုံးကြေကွဲလျက်ရှိပါ၏” ဟုဆိုခဲ့သည်။ (ဆာ. ၁၁၉:၂၀) ကျွန်ုပ်တို့သည် ဖြောင့်မတ်ခြင်းတရားကို ဆာငတ်သည်အထိ ယင်းကိုအလွန်တန်ဖိုးထားပါသလော။

^၁၂ ဖြောင့်မတ်ခြင်းတရားကို ဆာငတ်သူတို့သည် ပျော်ရွှင်ကြမည်ဟု ယေရှုမိန့်တော်မူခဲ့၏၊ အကြောင်းမှာ ထိုသူတို့သည် “ဝပြော” သို့မဟုတ် အပြည့်အဝစိတ်ကျေနပ်ကြမည်ဖြစ်သည်။ စီအီး ၃၃ ပင်တေကုတ္တေပွဲနေ့ပြီးနောက် ယင်းသို့ဖြစ်လာနိုင်ခဲ့သည်၊ ထိုအချိန်တွင် ယေဟောဝါ၏သန့်ရှင်းသောစွမ်းအားတော်က ‘ဖြောင့်မတ်ခြင်းအကြောင်းကို လောကအား ထင်ရှားစွာဖော်ပြ’ ခဲ့၍ဖြစ်သည်။ (ယော. ၁၆:၈) သန့်ရှင်းသောစွမ်းအားတော်အားဖြင့် ခရစ်ယာန်ဂရိကျမ်းစာစောင်များကို လူတို့ရေးသားစုဆောင်းရန် ဘုရားသခင်မှုတ်သွင်းတော်မူခဲ့ပြီး ယင်းကျမ်းစောင်တို့သည် “ဖြောင့်မတ်စေရန်ဆုံးမခြင်း” တွင်အလွန်အကျိုးရှိသည်။ (၂ တိ. ၃:၁၆) ဘုရားသခင့်စွမ်းအားတော်သည် ကျွန်ုပ်တို့အား “စစ်မှန်သောဖြောင့်မတ်ခြင်း . . . နှင့်အညီ ဘုရားသခင်၏ အလိုတော်အတိုင်း ဖန်ဆင်းခံရသောစရိုက်သစ်ကိုဝတ်ဆင်” ရန်လည်း တတ်စွမ်းနိုင်သည်။ (ဧ. ၄:၂၄) ယေရှု၏ရွေးနုတ်ဖိုးပူဇော်ရာယဇ်ကိုအခြေခံကာ မိမိတို့၏အပြစ်များခွင့်လွှတ်ခံရဖို့ နောင်တစိတ်နှင့်ရှာဖွေသူတို့သည် ဘုရားသခင်ရှေ့ ဖြောင့်မတ်သောအနေအထားရနိုင်ကြောင်းသိရခြင်းသည် နှစ်သိမ့်မှုဖြစ်စေသည်မဟုတ်လော။—ရောမ ၃:၂၃၊ ၂၄ ကိုဖတ်ပါ။

^၁၃ ကျွန်ုပ်တို့သည် မြေကြီးမျှော်လင့်ချက်ရှိပါက ဖြောင့်မတ်ခြင်းတရားကိုဆာငတ်မှုသည် ဖြောင့်မတ်သောအခြေအနေအောက် ကမ္ဘာပေါ်ထာဝရအသက်ခံစားရချိန်တွင် အပြည့်အဝစိတ်ကျေနပ်ကြမည်ဖြစ်သည်။ ဤအတောအတွင်း ကျွန်ုပ်တို့သည် ယေဟောဝါ၏စံနှုန်းများနှင့်အညီနေထိုင်ရန် စိတ်ဆုံးဖြတ်ထားကြစို့။ “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားကို ဦးစွာရှာလျက်နေကြလော့” ဟုယေရှုမိန့်တော်မူခဲ့၏။ (မ. ၆:၃၃) ထိုသို့ပြုလုပ်ခြင်းက ကျွန်ုပ်တို့သည် ဘုရားသခင်၏ဝတ်ပြုရေးနှင့် ဆက်နွှယ်သောလုပ်ဆောင်မှုများစွာကို လုပ်ဆောင်စေပြီး ပျော်ရွှင်မှုဖြစ်စေမည်။—၁ ကော. ၁၅:၅၈။

“သနားကြင်နာတတ်သူတို့” ပျော်ရွှင်ကြရသည့်အကြောင်းရင်း

၁၄၊ ၁၅။ သနားကြင်နာမှုကို ကျွန်ုပ်တို့ မည်သို့တင်ပြနိုင်သနည်း၊ “သနားကြင်နာတတ်သူတို့” သည် အဘယ်ကြောင့် ပျော်ရွှင်ကြသနည်း။

^၁၄ “သနားကြင်နာတတ်သူတို့သည် ပျော်ရွှင်ကြ၏။ အကြောင်းမူကား ထိုသူတို့သည် သနားကြင်နာခြင်း ခံရကြလိမ့်မည်။” (မ. ၅:၇) “သနားကြင်နာတတ်သူတို့” သည် ထောက်ထားစာနာမှု၏လှုံ့ဆော်မှုကြောင့် အခြားသူတို့ကို သနားကြင်နာသည်။ ယေရှုသည် လူများကိုသနားသောကြောင့် သူတို့၏ဆင်းရဲဝေဒနာများကို အံ့ဖွယ်နည်းဖြင့် သက်သာစေခဲ့သည်။ (မ. ၁၄:၁၄) ယေဟောဝါသည် နောင်တရသူတို့ကို သနားကြင်နာစွာခွင့်လွှတ်သကဲ့သို့ လူတို့သည် မိမိတို့အားပြစ်မှားသူတို့ကို ခွင့်လွှတ်သည့်အခါ တရားရေးသဘောအရ သနားကြင်နာမှုကို ထင်ရှားပြကြသည်။ (ထွ. ၃၄:၆၊ ၇; ဆာ. ၁၀၃:၁၀) ထိုကဲ့သို့သောနည်းဖြင့်ရော အခွင့်မသာသူတို့ကို သက်သာရာရစေသည့် ကြင်နာသောအပြောအဆို၊ အပြုအမူတို့အားဖြင့်ပါ သနားကြင်နာမှုကို ကျွန်ုပ်တို့တင်ပြနိုင်ကြသည်။ သနားကြင်နာမှုတင်ပြသည့် နည်းလမ်းကောင်းတစ်ခုမှာ အခြားသူတို့အား သမ္မာကျမ်းစာအမှန်တရား ဝေမျှခြင်းဖြစ်သည်။ ယေရှုသည် လူအုပ်ကိုသနားသောကြောင့် “များစွာသွန်သင်တော်မူ” ခဲ့သည်။—မာ. ၆:၃၄။

^၁၅ “သနားကြင်နာတတ်သူတို့သည် ပျော်ရွှင်ကြ၏။ အကြောင်းမူကား ထိုသူတို့သည် သနားကြင်နာခြင်း ခံရကြလိမ့်မည်” ဟုဆိုခဲ့သော ယေရှု၏မိန့်တော်မူချက်ကို သဘောတူရန် ကျွန်ုပ်တို့တွင် အကြောင်းရင်းရှိ၏။ ကျွန်ုပ်တို့သည် အခြားသူတို့ကို သနားကြင်နာစွာဆက်ဆံပါက သူတို့လည်း ကြင်နာစွာတုံ့ပြန်လာနိုင်ဖွယ်ရှိသည်။ ကျွန်ုပ်တို့သည် အခြားသူတို့ကို သနားကြင်နာမှုတင်ပြပါက ကျွန်ုပ်တို့အား ဘုရားသခင်တရားစီရင်ချိန်တွင် ကိုယ်တော်သည် ကျွန်ုပ်တို့ကို ပြင်းထန်စွာစီရင်ရန် ရွေးချယ်မည်မဟုတ်ပါ။ (ယာ. ၂:၁၃) အပြစ်များမှခွင့်လွှတ်ခံရမှုနှင့် ထာဝရအသက်သည် သနားကြင်နာတတ်သူတို့အတွက်သာဖြစ်သည်။—မ. ၆:၁၅။

“စိတ်နှလုံးဖြူစင်သူတို့” ပျော်ရွှင်ရသည့်အကြောင်းရင်း

၁၆။ “စိတ်နှလုံးဖြူစင်” ခြင်းဟူသည် အဘယ်အရာကိုဆိုလိုသနည်း၊ ယင်းအရည်အသွေးပိုင်ဆိုင်သူတို့သည် မည်သို့အားဖြင့် “ဘုရားသခင်ကိုမြင်ရ” ကြသနည်း။

^၁၆ “စိတ်နှလုံးဖြူစင်သူတို့သည် ပျော်ရွှင်ကြ၏။ အကြောင်းမူကား ထိုသူတို့သည် ဘုရားသခင်ကို မြင်ရကြလိမ့်မည်။” (မ. ၅:၈) ကျွန်ုပ်တို့သည် “စိတ်နှလုံးဖြူစင်သူတို့” ဖြစ်မည်ဆိုလျှင် ကျွန်ုပ်တို့နှစ်သက်မြတ်နိုးရာများ၊ လိုအင်ဆန္ဒများ၊ သဘောထားများတွင် သန့်ရှင်းစင်ကြယ်မှု ထင်ရှားနေမည်။ “စင်ကြယ်သောနှလုံးမှ . . . ထွက်ပေါ်လာသော ချစ်ခြင်းမေတ္တာ” ကိုကျွန်ုပ်တို့တင်ပြကြမည်။ (၁ တိ. ၁:၅) အတွင်းစိတ်သန့်ရှင်းသောကြောင့် ကျွန်ုပ်တို့သည် “ဘုရားသခင်ကို မြင်ရကြလိမ့်မည်။” “[ဘုရားသခင်] ကိုမြင်လျှင် အသက်ရှင်ရသောလူ တစ်စုံတစ်ယောက်မျှမရှိ” သောကြောင့် ယေဟောဝါအား ပကတိမြင်ရခြင်းကို မဆိုလိုပါ။ (ထွ. ၃၃:၂၀) သို့သော် ယေရှုသည် ဘုရားသခင်၏အရည်အသွေးများကို စုံလင်စွာတင်ပြခဲ့သောကြောင့် “ငါ့ကိုမြင်သောသူသည် ခမည်းတော်ကိုမြင်၏” ဟုကိုယ်တော်ပြောနိုင်ခဲ့သည်။ (ယော. ၁၄:၇-၉) ယေဟောဝါကိုဝတ်ပြုကိုးကွယ်ကြသော မြေကြီးပေါ်ရှိသူတို့အနေနှင့် ကျွန်ုပ်တို့သည် ကျွန်ုပ်တို့၏အကျိုးအတွက် ကိုယ်တော်၏လုပ်ဆောင်မှုကို ဂရုပြုမိခြင်းအားဖြင့် “ဘုရားသခင်ကိုမြင်” နိုင်ကြသည်။ (ယောဘ ၄၂:၅) ဘိသိက်ပေးခံရသောခရစ်ယာန်များအဖို့ ဘုရားသခင်ကိုမြင်ရခြင်းသည် ဝိညာဉ်အသက်တာသို့ရှင်ပြန်ထမြောက်ပြီး ကောင်းကင်ခမည်းတော်ကို ပကတိတွေ့မြင်ရချိန်တွင် အထွတ်အထိပ်သို့ရောက်သည်။—၁ ယော. ၃:၂။

၁၇။ စိတ်နှလုံးဖြူစင်သူဖြစ်ခြင်းက ကျွန်ုပ်တို့အပေါ် အဘယ်အကျိုးသက်ရောက်မှုရှိမည်နည်း။

^၁၇ စိတ်နှလုံးဖြူစင်သူသည် ကိုယ်ကျင့်တရားစင်ကြယ်ပြီး ယေဟောဝါရှေ့ စင်ကြယ်သည့်အနေအထားတွင်ရှိသောကြောင့် ယေဟောဝါအမြင်တွင် မသန့်ရှင်းသည့်အရာများ ထိုသူ၌မရှိပါ။ (၅ ရာ. ၂၈:၉; ဟေရှာ. ၅၂:၁၁) ကျွန်ုပ်တို့သည် စိတ်နှလုံးဖြူစင်သူဖြစ်ပါက ကျွန်ုပ်တို့ပြောဆိုရာ၊ လုပ်ဆောင်ရာတို့သည် သန့်ရှင်းမည်ဖြစ်ပြီး ယေဟောဝါအဖို့ကျွန်ုပ်တို့၏အမှုဆောင်ခြင်းသည် အရေခြုံဟန်ဆောင်မှုဖြစ်မည်မဟုတ်ပါ။

“ငြိမ်သက်စေသူတို့” သည် ဘုရားသခင်၏သားများဖြစ်လာကြ

၁၈၊ ၁၉။ “ငြိမ်သက်စေသူတို့” သည် မိမိတို့ကိုယ်တိုင် မည်သို့ကျင့်ကြံပြုမူကြသနည်း။

^၁၈ “ငြိမ်သက်စေသူတို့သည် ပျော်ရွှင်ကြ၏။ အကြောင်းမူကား ထိုသူတို့သည် ‘ဘုရားသခင်၏သားများ’ ဟုအခေါ်ခံရကြလိမ့်မည်။” (မ. ၅:၉) “ငြိမ်သက်စေသူတို့” ကို သူတို့လုပ်ဆောင်မည့်အရာ၊ သူတို့မလုပ်ဆောင်မည့်အရာတို့ဖြင့် ခွဲခြားသတ်မှတ်ကြသည်။ ကျွန်ုပ်တို့သည် ယေရှုစိတ်ထဲတွင်ရှိသော လူစားမျိုးဖြစ်မည်ဆိုလျှင် အသင့်အတင့်နေပြီး ‘အဆိုးကို အဆိုးနှင့်တုံ့ပြန်ကြမည်မဟုတ်ပါ။’ ကျွန်ုပ်တို့သည် အခြားသူတို့ကို “ကောင်းမှုပြုရန် အစဉ်ကြိုးစားအားထုတ်ကြ” သည်။—၁ သက်. ၅:၁၅။

^၁၉ မဿဲ ၅:၉ တွင် “ငြိမ်သက်စေသူတို့” ဟုပြန်ဆိုထားသော ဂရိအသုံးအနှုန်းမှာ စာသားအရ “ရန်ငြိမ်းစေသူများ” ဟုအဓိပ္ပာယ်ရှိသည်။ ငြိမ်သက်စေသူတို့တွင်ပါဝင်ရန် ကျွန်ုပ်တို့သည် ငြိမ်သက်မှုကို စိတ်အားထက်သန်စွာ တိုးပွားစေရမည်။ ရန်ငြိမ်းစေသူများသည် “မိတ်ဆွေတို့ကိုကွဲပြားစေ” သည့်အရာတစ်စုံတစ်ခုကိုမျှ မလုပ်ဆောင်ကြပါ။ (သု. ၁၆:၂၈) ငြိမ်သက်စေသူတို့အနေနှင့် ကျွန်ုပ်တို့သည် “လူအပေါင်းနှင့် သင့်မြတ်စွာနေရန် . . . အစဉ်ကြိုးစားအားထုတ်ကြ” ရာတွင် အပြုသဘောဆောင်သောအရာများကို လုပ်ဆောင်ကြသည်။—ဟေဗြဲ ၁၂:၁၄။

၂၀။ ယခုအချိန်တွင် မည်သူတို့သည် “ဘုရားသခင်၏သားများ” ဖြစ်ကြပြီး အခြားမည်သူတို့သည်လည်း နောက်ဆုံးတွင် ဘုရားသခင်၏သားသမီးများ ဖြစ်လာကြမည်နည်း။

^၂၀ ငြိမ်သက်စေသူတို့သည် ပျော်ရွှင်ကြ၏၊ အကြောင်းမူကား “ထိုသူတို့သည် ‘ဘုရားသခင်၏သားများ’ ဟုအခေါ်ခံရကြလိမ့်မည်။” ဘိသိက်ပေးခံရသည့် တည်ကြည်သောခရစ်ယာန်များကို ယေဟောဝါမွေးစားခဲ့ပြီး သူတို့သည် “ဘုရားသခင်၏သားများ” ဖြစ်ကြသည်။ သူတို့သည် ခရစ်တော်ကိုယုံကြည်ကြောင်း တင်ပြကြပြီး “ချစ်ခြင်းမေတ္တာနှင့် ငြိမ်သက်ခြင်း၏ ဘုရားသခင်” အား နှလုံးအကြွင်းမဲ့ဝတ်ပြုကိုးကွယ်ကြသောကြောင့် ယေဟောဝါ၏သားသမီးများအဖြစ် ကိုယ်တော်နှင့် ရင်းနှီးသောဆက်ဆံရေး ရှိပြီးသူများဖြစ်ကြသည်။ (၂ ကော. ၁၃:၁၁; ယော. ၁:၁၂) ငြိမ်သက်စေသူတို့ဖြစ်ကြသည့် ယေရှု၏ “အခြားသိုး” တို့ကောအသို့နည်း။ ယေရှု၏အနှစ်တစ်ထောင်အုပ်ချုပ်ချိန်အတွင်း ယေရှုသည် သူတို့၏ “ထာဝရအဘ” ဖြစ်မည်၊ သို့သော် ယင်းအုပ်ချုပ်ချိန်ပြီးနောက် ယေရှုကိုယ်တော်တိုင်သည် ယေဟောဝါအားလက်အောက်ခံမည်ဖြစ်၍ ထိုသူတို့သည် အပြည့်ဝဆုံးသဘောဖြင့် ဘုရားသခင်၏သားသမီးများ ဖြစ်လာကြမည်။—ယော. ၁၀:၁၆; ဟေရှာ. ၉:၆; ရော. ၈:၂၁; ၁ ကော. ၁၅:၂၇၊ ၂၈။

၂၁။ ကျွန်ုပ်တို့သည် ‘စွမ်းအားတော်အားဖြင့် အသက်ရှင်နေ’ ကြသည်ဆိုလျှင် မည်သို့ပြုမူကြမည်နည်း။

^၂၁ ကျွန်ုပ်တို့သည် ‘စွမ်းအားတော်အားဖြင့် အသက်ရှင်နေ’ ကြသည်ဆိုလျှင် အသင့်အတင့်နေတတ်ခြင်းသည် ကျွန်ုပ်တို့၏အရည်အသွေးများထဲတွင်တစ်ခုဖြစ်ပြီး ယင်းကို အခြားသူတို့ အလွယ်တကူမြင်တွေ့နိုင်မည်။ ကျွန်ုပ်တို့သည် “အချင်းချင်းပြိုင်ဆိုင်” သို့မဟုတ် “အမျက်ထွက်အောင် . . . ဆွ” သောသူများ ဖြစ်ကြမည်မဟုတ်ပါ။ (ဂလ. ၅:၂၂-၂၆၊ ခမ) ယင်းအစား ကျွန်ုပ်တို့သည် “လူအားလုံးနှင့်သင့်မြတ်” ရန်ကြိုးစားကြသည်။—ရော. ၁၂:၁၈။

နှိပ်စက်ညှဉ်းပန်းခံရသော်လည်း ပျော်ရွှင်

၂၂-၂၄။ (က) ဖြောင့်မတ်ခြင်းတရားကြောင့် နှိပ်စက်ခံရသူတို့ ပျော်ရွှင်ရသည့် အကြောင်းရင်းများမှာ အဘယ်နည်း။ (ခ) နောက်လေ့လာရန်ဆောင်းပါးနှစ်ခုတွင် အဘယ်အကြောင်းကို သုံးသပ်ကြမည်နည်း။

^၂၂ “ဖြောင့်မတ်ခြင်းတရားကြောင့် နှိပ်စက်ညှဉ်းပန်းခံရသူတို့သည် ပျော်ရွှင်ကြ၏။ အကြောင်းမူကား ကောင်းကင်နိုင်ငံတော်သည် ထိုသူတို့၏နိုင်ငံဖြစ်၏။” (မ. ၅:၁၀) ယင်းကို အကျယ်ချဲ့ကာ ယေရှုဤသို့ထပ်၍မိန့်တော်မူ၏– “ငါ့ကြောင့် လူတို့၏ရှုတ်ချခြင်း၊ ညှဉ်းဆဲခြင်း၊ မဟုတ်မမှန်ပြစ်တင်ပြောဆိုခြင်း ခံရသည့်အခါ သင်တို့သည် ပျော်ရွှင်ကြ၏။ ကောင်းကင်ဘုံ၌ သင်တို့၏ဆုလာဘ်သည် ကြီးမြတ်သောကြောင့် ပျော်ရွှင်မြူးထူးကြလော့။ သင်တို့ရှေ့က ပရောဖက်များကိုလည်း ထိုနည်းအတိုင်း ညှဉ်းဆဲခဲ့ကြပြီ။”—မ. ၅:၁၁၊ ၁၂။

^၂၃ ခရစ်ယာန်များသည် ဘုရားသခင်၏ရှေးပရောဖက်များကဲ့သို့ “ဖြောင့်မတ်ခြင်းတရားကြောင့်” ရှုတ်ချပြောဆို၊ နှိပ်စက်ညှဉ်းပန်း၊ မဟုတ်မမှန်ပြစ်တင်ပြောဆိုခံရမည်ကို မျှော်လင့်ကြသည်။ သို့သော် ကျွန်ုပ်တို့သည် ထိုကဲ့သို့သောစမ်းသပ်မှုများကို တည်ကြည်စွာခံရပ်ခြင်းဖြင့် ယေဟောဝါ၏နှစ်သက်လက်ခံမှု၊ ကိုယ်တော့်ကိုဂုဏ်တင်မှုဖြစ်စေသည်ဟူသည့် စိတ်ကျေနပ်မှုကို ခံစားကြရသည်။ (၁ ပေ. ၂:၁၉-၂၁) ဆင်းရဲခက်ခဲမှုခံရခြင်းက ယခု သို့မဟုတ် အနာဂတ်တွင် ယေဟောဝါအမှုတော်ဆောင်ခြင်းမှရသည့် ကျွန်ုပ်တို့၏ရွှင်လန်းမှုကို မလျှော့ပါးသွားစေနိုင်ပါ။ ကောင်းကင်နိုင်ငံတော်တွင် ခရစ်တော်နှင့်အတူအုပ်ချုပ်ခွင့်ရသည့် ပျော်ရွှင်မှုကိုဖြစ်စေ၊ ယင်းအစိုးရ၏ မြေကြီးပေါ်ရှိလက်အောက်ခံတစ်ဦးအနေနှင့် ထာဝရအသက်ခံစားရသည့် ရွှင်လန်းမှုကိုဖြစ်စေ မလျော့နည်းသွားစေနိုင်ပါ။ ထိုကဲ့သို့သောကောင်းချီးများသည် ဘုရားသခင့်မျက်နှာသာ၊ စေတနာ၊ ရက်ရောမှုတို့၏အထောက်အထားဖြစ်သည်။

^၂၄ တောင်ပေါ်တရားတော်မှ သင်ယူစရာ များစွာရှိသေးသည်။ သင်ခန်းစာအမျိုးမျိုးကို နောက်လေ့လာရန်ဆောင်းပါးနှစ်ခုတွင် သုံးသပ်ထားပါသည်။ ယေရှုခရစ်၏ ထိုမိန့်တော်မူချက်များကို ကျွန်ုပ်တို့ မည်သို့ကျင့်သုံးနိုင်ပုံကို ကြည့်ကြစို့။

သင်မည်သို့ဖြေဆိုမည်နည်း

• “ဘုရားသခင်ကို မှီခိုရန်လိုကြောင်း သိမှတ်သူတို့သည်” အဘယ်ကြောင့် ပျော်ရွှင်ကြသနည်း။

• “နူးညံ့သိမ်မွေ့သူတို့” ပျော်ရွှင်ရသည့် အကြောင်းရင်းများမှာ အဘယ်နည်း။

• ခရစ်ယာန်များသည် နှိပ်စက်ညှဉ်းပန်းခံရသော်လည်း အဘယ်ကြောင့် ပျော်ရွှင်ကြသနည်း။

• ယေရှုကြေညာခဲ့သော အဘယ်ပျော်ရွှင်မှုက သင့်ကို အထူးစွဲမှတ်စေသနည်း။

[စာမျက်နှာ ၇ ပါ ရုပ်ပုံ]

ယေရှုပေါ်လွင်အောင်ဖော်ပြခဲ့သော ပျော်ရွှင်မှုကိုးခုသည် ထိုအချိန်ကကဲ့သို့ ယနေ့အချိန်တွင်လည်း အကျိုးပြု

[စာမျက်နှာ ၈ ပါ ရုပ်ပုံ]

သနားကြင်နာမှုတင်ပြရန် နည်းလမ်းကောင်းတစ်ခုမှာ အခြားသူတို့အား သမ္မာကျမ်းစာအမှန်တရားဝေမျှခြင်းဖြစ်