‘ဆိုးညစ်သောဤလူမျိုးဆက်’ မှ ကယ်တင်ခံရ

“ယုံကြည်ခြင်းမရှိ၊ ဖောက်ပြန်သောအမျိုး၊ ငါသည် သင်တို့နှင့်အတူအဘယ်မျှကာလပတ်လုံးနေရမည်နည်း။”—လုကာ ၉:၄၁။

၁ (က) ကျွန်ုပ်တို့၏ဒုက္ခသုက္ခကာလက အဘယ်အရာကို နိမိတ်ပြသနည်း။ (ခ) ကပ်ကျော်သူများနှင့်ပတ်သက်၍ ကျမ်းစာက ဘာပြောသနည်း။

ကျွန်ုပ်တို့သည် ဒုက္ခသုက္ခကာလတွင် အသက်ရှင်နေကြသည်။ မြေငလျင်လှုပ်မှုများ၊ ရေလွှမ်းမိုးမှုများ၊ ငတ်မွတ်ခေါင်းပါးမှုများ၊ ရောဂါဘယ၊ မတရားမှု၊ ဗုံးကြဲမှုများ၊ ကြောက်မက်ဖွယ် တိုက်ပွဲများ—ယင်းတို့နှင့် ထပ်တိုးလာသောအရာများက ကျွန်ုပ်တို့၏ ၂၀ ရာစုအတွင်း လူသားတို့ကို လွှမ်းခြုံလျက်ရှိသည်။ သို့သော် ရှိရှိသမျှတွင် အကြီးမားဆုံးဘေးဆိုးကြီးသည် မဝေးတော့သောအနာဂတ်တွင် ခြိမ်းခြောက်နေသည်။ ထိုအရာကား အဘယ်နည်း။ ယင်းကား “ကမ္ဘာဦးမှစ၍ယခုတိုင်အောင်မဖြစ်စဖူး၊ နောက်၌လည်းမဖြစ်လတ္တံ့သောကြီးစွာသောဒုက္ခ” ပင်တည်း။ (မဿဲ ၂၄:၂၁) သို့သော် ကျွန်ုပ်တို့ထဲမှ အများအပြားမှာ ရွှင်လန်းဖွယ်အနာဂတ်ကို ရှုမျှော်စောင့်စားကြပေမည်! အဘယ်ကြောင့်နည်း။ ဘုရားသခင့်နှုတ်ကပါဌ်တော်က “အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အထဲမှထွက်၍ အဘယ်သူမျှမရေတွက်နိုင်သော လူများအပေါင်း . . . ‘တို့သည် ကြီးစွာသောဆင်းရဲဒုက္ခအထဲက ထွက်မြောက်၍ . . . သူတို့သည် နောက်တစ်ဖန် ရေစာကိုမငတ်မမွတ်ရကြ။ . . . ဘုရားသခင်သည်လည်း သူတို့မျက်စိ၌မျက်ရည်ရှိသမျှတို့ကို သုတ်တော်မူမည်’” ဟု ဖော်ပြထားသောကြောင့်ပင်တည်း။—ဗျာဒိတ် ၇:၁၊ ၉၊ ၁၄-၁၇။

၂။ မဿဲ ၂၄၊ မာကု ၁၃၊ လုကာ ၂၁ တို့၏အစပိုင်းအခန်းငယ်များပါ ပရောဖက်ပြုချက်၏ အဘယ်ပဏာမပြည့်စုံမှု ဖြစ်ခဲ့သနည်း။

^၂ မဿဲ ၂၄:၃-၂၂၊ မာကု ၁၃:၃-၂၀၊ လုကာ ၂၁:၇-၂၄ တို့ပါ မှုတ်သွင်းခံမှတ်တမ်းက “ဤကပ်ကမ္ဘာကုန်ခြင်း” နှင့်ပတ်သက်သော ယေရှု၏ပရောဖက်ပြုချက်ဆိုင်ရာဖော်ပြချက်ကို စတင်တင်ပြထားသည်။a ဤပရောဖက်ပြုချက်သည် ကျွန်ုပ်တို့သက္ကရာဇ်၏ ပထမရာစုတွင် ယိုယွင်းဖောက်ပြန်သော ဂျူးအစီအစဉ်စနစ်အပေါ် ဦးစွာပြည့်စုံခဲ့ပြီး ဂျူးများအပေါ်တွင် မကြုံဖူးသည့် “ကြီးစွာသောဒုက္ခ” ကျရောက်ခြင်းဖြင့် အထွတ်အထိပ်သို့ရောက်ခဲ့သည်။ ယေရုရှလင်ဗိမာန်တွင် ဗဟိုပြုထားသည့် ဂျူးစနစ်၏ ဘာသာရေးနှင့် နိုင်ငံရေးအဆောက်အအုံတစ်ခုလုံးသည် ဖျက်သိမ်းခံခဲ့ရပြီး တစ်ဖန်ပြန်၍မပေါ်ပေါက်တော့ပါ။

၃။ ယနေ့ကျွန်ုပ်တို့သည် ယေရှုပရောဖက်ပြုချက်ကို အဘယ်ကြောင့် အရေးတကြီး ဂရုစိုက်လိုက်နာဖို့လိုအပ်သနည်း။

^၃ ယေရှု ပရောဖက်ပြုချက်ပထမအကြိမ်ပြည့်စုံရာတွင် ဖြစ်ပျက်သည့်အခြေအနေများကို သုံးသပ်ကြစို့။ ယင်းက ယနေ့အလားတူပြည့်စုံချက်ကို သာ၍နားလည်ရန် ကျွန်ုပ်တို့ကို ထောက်ကူမည်။ ယင်းက လူသားအားလုံးကို ခြိမ်းခြောက်နေသည့် ဆင်းရဲဒုက္ခတကာတို့တွင် အကြီးဆုံးသောဆင်းရဲဒုက္ခကို ကပ်ကျော်နိုင်ရန်အလို့ငှာ ယခုပင် အပြုသဘောလုပ်ဆောင်ခြင်းသည် မည်မျှအရေးကြီးကြောင်း ပြသမည်။—ရောမ ၁၀:၉-၁၃; ၁၅:၄; ၁ ကောရိန္သု ၁၀:၁၁; ၁၅:၅၈။

“အဆုံး”—မည်သည့်အခါတွင်နည်း

၄၊ ၅။ (က) စီ.အီး.ပထမရာစုရှိ ဘုရားသခင်ကိုကြောက်ရွံ့သောဂျူးများသည် ဒံယေလ ၉:၂၄-၂၇ ပါပရောဖက်ပြုချက်ကို အဘယ်ကြောင့်စိတ်ဝင်စားခဲ့ကြသနည်း။ (ခ) ဤပရောဖက်ပြုချက်သည် မည်သို့ပြည့်စုံခဲ့သနည်း။

^၄ ဘီ.စီ.အီး. ၅၃၉ ခုနှစ်ခန့်တွင် ဘုရားသခင်သည် မိမိ၏ ပရောဖက်ဒံယေလအား နှစ်များနှင့်ဆိုင်သည့် “သီတင်းခုနစ်ဆယ်” မှနောက်ဆုံး “သီတင်း” အတွင်းဖြစ်ပျက်မည့် အဖြစ်အပျက်များထဲမှ ရူပါရုံတစ်ခုကို ပေးခဲ့သည်။ (ဒံယေလ ၉:၂၄-၂၇) ဤ “သီတင်း” တို့သည် ပါးရှားဘုရင် အာတဇေရဇ်က ယေရုရှလင်မြို့ကို ပြန်ဆောက်ဖို့အမိန့်ထုတ်ခဲ့သည့် ဘီ.စီ.အီး. ၄၅၅ ခုနှစ်တွင် အစပြုခဲ့သည်။ နောက်ဆုံး “သီတင်း” သည် စီ.အီး. ၂၉ တွင် နှစ်ခြင်းခံကာ ဘိသိက်ပေးခံရသည့် မေရှိယတည်းဟူသော ယေရှုခရစ်ပေါ်ထွန်းခြင်းနှင့် စတင်ခဲ့သည်။b စီ.အီး. ပထမရာစုရှိ ဘုရားသခင်ကိုကြောက်ရွံ့သောဂျူးများသည် ဒံယေလပရောဖက်ပြုချက်ပါ ဤအချိန်ကာလ၏ ထူးခြားချက်ကို ကောင်းကောင်းသတိပြုမိခဲ့ကြသည်။ ဥပမာ၊ စီ.အီး. ၂၉ ခုနှစ်တွင် နှစ်ခြင်းဆရာ ယောဟန်၏ဟောပြောခြင်းကို နားထောင်ရန် စုပြုံရောက်လာကြသည့် လူအုပ်တို့နှင့်ပတ်သက်၍ လုကာ ၃:၁၅ က “လူများတို့သည် မျှော်လင့်၍ ယောဟန်သည် ‘ခရစ်တော်မှန်သည်၊ မမှန်သည်’ ကို နှလုံးထဲမှာ တွေးတောဆင်ခြင်ကြ” သည်ဟု ဖော်ပြသည်။

^၅ ၇၀ ခုမြောက် “သီတင်း” ပတ်သည် ဂျူးများအတွက် အထူးမျက်နှာသာပေးသည့် ခုနစ်နှစ်ဖြစ်ခဲ့ရမည်။ ယင်းသည် စီ.အီး. ၂၉ ခုနှစ်တွင်စတင်ကာ ယေရှု၏နှစ်ခြင်းနှင့် ဓမ္မအမှု၊ စီ.အီး. ၃၃ ခုနှစ်တွင်ကျရောက်သော “ထိုသီတင်းတစ်ဝက်တွင်” ကိုယ်တော်၏ ပူဇော်သကာအဖြစ် သေခြင်းနှင့် စီ.အီး ၃၆ ခုနှစ်အထိဖြစ်သော နောက်ထပ် “သီတင်းတစ်ဝက်” တို့ပါဝင်သည်။ ဤ “သီတင်း” အတွင်း ဘုရားသခင်ကို ကြောက်ရွံ့သောဂျူးများနှင့် ဂျူးဘာသာသို့ပြောင်းဝင်လာသူ တစ်ပါးအမျိုးသားများအတွက် ယေရှု၏ဘိသိက်ခံတပည့်တော်များဖြစ်လာခွင့်ကို သီးသန့်တိုးချဲ့ခဲ့သည်။ ထို့နောက် ကြိုတင်မသိထားသောနေ့စွဲဖြစ်သည့် စီ.အီး. ၇၀ ခုနှစ်တွင် တိတုကွပ်ကဲသော ရောမတပ်မဟာသည် အယူဖောက်ပြန်သောဂျူးစနစ်ကို လက်စတုံးဖျက်ဆီးပစ်ခဲ့သည်။—ဒံယေလ ၉:၂၆၊ ၂၇။

၆။ “ရွံရှာဖွယ်အရာ” သည် စီ.အီး. ၆၆ တွင် မည်သို့လှုပ်ရှားခဲ့ပြီး ခရစ်ယာန်များ မည်သို့တုံ့ပြန်ခဲ့ကြသနည်း။

^၆ သို့နှင့် ယေရုရှလင်ဗိမာန်တော်ကို ညစ်ညူးစေခဲ့ပြီး ဘုရားသခင့်သားတော်ရင်းကို သတ်ဖြတ်မှုတွင် ပူးပေါင်းကြံစည်ခဲ့ကြသည့် ဂျူးယဇ်ပုရောဟိတ်အဖွဲ့သည် သုတ်သင်ခံခဲ့ရသည်။ အမျိုးအနွယ်ဆိုင်ရာမှတ်တမ်းများလည်း ပျက်စီးသွားသည်။ ထိုအချိန်နောက်ပိုင်းတွင် မည်သည့်ဂျူးမျှ ယဇ်ပုရောဟိတ်အရာနှင့် ဘုရင်အရာ ဆက်ခံမှုကို တရားဝင်မဖော်ပြနိုင်တော့ချေ။ သို့သော် ဝမ်းသာစရာမှာ ဘိသိက်ခံဝိညာဏဂျူးများသည် ယေဟောဝါဘုရားသခင်၏ “ဂုဏ်ကျေးဇူးများကို ဖော်ပြစေခြင်းငှာ” တော်ဝင်ယဇ်ပုရောဟိတ်အဖွဲ့အဖြစ် သီးသန့်ခွဲခြားထားခြင်းခံရသည်။ (၁ ပေတရု ၂:၉) စီ.အီး. ၆၆ ခုနှစ်တွင် ရောမစစ်တပ်သည် ယေရုရှလင်ကို ဝိုင်းထားပြီး ဗိမာန်တော်ဝင်းကိုပင် တူးဖြိုခဲ့သည့်အခါတွင် ဤစစ်တပ်ကို “ပရောဖက်ဒံယေလဟောသည်အတိုင်း၊ ဖျက်ဆီးတတ်သောရွံရှာဖွယ်အရာသည် သန့်ရှင်းရာအရပ်ဌာနတွင်စိုက်နေ” ခြင်းအဖြစ် ခရစ်ယာန်များ သိမှတ်ကြသည်။ ယေရုရှလင်နှင့် ယုဒနယ်ရှိ ခရစ်ယာန်များသည် ယေရှု၏ပရောဖက်ပြုအမိန့်တော်ကို နာခံကာ အကာအကွယ်အတွက် တောင်တန်းဒေသများသို့ ထွက်ပြေးခဲ့ကြသည်။—မဿဲ ၂၄:၁၅၊ ၁၆; လုကာ ၂၁:၂၀၊ ၂၁။

၇၊ ၈။ အဘယ် “နိမိတ်” ကို ခရစ်ယာန်များ တွေ့မြင်ခဲ့သော်လည်း အဘယ်အရာကို သူတို့ မသိဘဲရှိသနည်း။

^၇ ထိုသစ္စာရှိဂျူးခရစ်ယာန်များသည် ဒံယေလပရောဖက်ပြုချက်၏ပြည့်စုံချက်ကို တွေ့မြင်သိရှိခဲ့ကြပြီး “ဤကပ်ကမ္ဘာကုန်သောပုဗ္ဗနိမိတ်” ၏အစိတ်အပိုင်းအဖြစ် ယေရှုတင်ကူးမိန့်တော်မူခဲ့သည့် ကြေကွဲဖွယ်ကောင်းလှသော စစ်ပွဲများ၊ အစာငတ်မွတ်ခြင်း၊ ကပ်ရောဂါများ၊ မြေငလျင်လှုပ်မှုများနှင့် မတရားမှုများ၏ မျက်မြင်သက်သေဖြစ်ခဲ့ကြသည်။ (မဿဲ ၂၄:၃) သို့သော် ယေဟောဝါသည် ထိုယိုယွင်းဖောက်ပြန်သောစနစ်ကို အဘယ်အချိန်တွင် အမှန်တကယ်စီရင်ချက်ချမည်အကြောင်း သူတို့ကို ယေရှု မိန့်တော်မူခဲ့သလော။ မိန့်တော်မမူခဲ့ပါ။ အနာဂတ်တွင် ကိုယ်တော်၏ဘုရင်အဖြစ် ရောက်ရှိနေခြင်း၏ အထွတ်အထိပ်နှင့်ပတ်သက်သော မိမိပရောဖက်ပြုထားသည့်အချက်သည် ပထမရာစု “ကြီးစွာသောဒုက္ခ” နှင့်လည်း ကျိန်းသေသက်ဆိုင်ခဲ့သည်– “ထိုအချိန်နာရီကိုကား အဘယ်သူမျှမသိ။ ကောင်းကင်တမန်မသိ။ ငါ့ခမည်းတော်တစ်ပါးတည်းသာ သိတော်မူ၏။”—မဿဲ ၂၄:၃၆။

^၈ ဂျူးများသည် ဒံယေလပရောဖက်ပြုချက်မှ မေရှိယအနေနှင့် ယေရှုပေါ်ထွန်းချိန်ကို တွက်ချက်နိုင်ခဲ့မည်။ (ဒံယေလ ၉:၂၅) သို့တိုင် နောက်ဆုံးတွင် ဤအယူဖောက်ပြန်သောဂျူးအစီအစဉ်စနစ်ကို လွင်တီးခေါင်ဖြစ်စေခဲ့သည့် “ကြီးစွာသောဒုက္ခ” အတွက် မည်သည့်နေ့စွဲကိုမျှ မပေးထားပါ။ ယေရုရှလင်မြို့နှင့် ယင်း၏ဗိမာန်တော်ပျက်စီးပြီးနောက်ပိုင်းမှသာလျှင် ဤနေ့စွဲမှာ စီ.အီး. ၇၀ ဖြစ်ကြောင်း သူတို့သိရှိခဲ့ကြသည်။ သို့ရာတွင် သူတို့သည် ယေရှု၏ဤပရောဖက်ပြုစကားများကို သိရှိခဲ့သည်– ‘ထိုအခြင်းအရာ အလုံးစုံမဖြစ်မီ ယခုလူမျိုးဆက် မကွယ်မလွန်ရ။’ (မဿဲ ၂၄:၃၄၊ သမ) သိသာထင်ရှားသည်မှာ ဤတွင် ‘လူမျိုးဆက်’ နှင့်စပ်လျဉ်း၍အသုံးပြုခြင်းသည် ဒေသနာ ၁:၄ တွင်ပြောထားသည့်အတိုင်း ခေတ်ကာလများတစ်လျှောက် ပေါ်လာလိုက် လွန်သွားလိုက် ဆက်တိုက်ဖြစ်နေသည့် လူမျိုးဆက်များနှင့်မတူပါ။

‘ဤလူမျိုးဆက်’—ယင်းကားအဘယ်နည်း

၉။ ဂရိစကားလုံး ဂေနေအာ ကို အဘိဓာန်များက မည်သို့အနက်ဖွင့်ကြသနည်း။

^၉ သံလွင်တောင်ပေါ်တွင် ယေရှုနှင့်အတူထိုင်နေကြသော တမန်တော်လေးပါးတို့သည် “ဤကပ်ကမ္ဘာကုန်” ခြင်းအကြောင်းကို ကြားရသောအခါ ‘ဤလူမျိုးဆက်’ ဟူသည့်အသုံးအနှုန်းကို သူတို့မည်သို့နားလည်ခဲ့မည်နည်း။ ခရစ်ဝင်ကျမ်းများပါ ‘လူမျိုးဆက်’ ဟူသည့်စကားလုံးကို ဂရိစကားလုံးဖြစ်သည့် “ဂေနေအာ မှပြန်ဆိုထားရာ ယင်းကို လက်ရှိအဘိဓာန်များက ဤအသုံးနှုန်းများဖြင့် အနက်ဖွင့်ကြသည်– “ဘိုးဘေးတစ်ဦးတည်းမှ အမှန်စင်စစ် ဆင်းသက်လာသူများ။” (ဝေါ်လ်တာဘိုယာ၏ Greek-English Lexicon of the New Testament) “မွေးဖွားခံရသည့် မိသားစုတစ်စု; . . . မျိုးရိုးတစ်ခုမှဆင်းသက်လာသူများ . . . သို့မဟုတ် မျိုးနွယ်တစ်နွယ် . . . တစ်ခေတ်တည်းတွင် အသက်ရှင်ခဲ့ကြသည့် လူတစ်စုလုံး၊ မ. ၂၄:၃၄; မာ. ၁၃:၃၀; လု. ၁:၄၈; ၂၁:၃၂; ဖိ. ၂:၁၅ နှင့် အထူးသဖြင့် အချိန်ကာလအပိုင်းအခြားတစ်ခုတွင် အသက်ရှင်နေကြသည့် ဂျူးအနွယ်ဝင်များ။” (ဒဗလျူ. အီး. ဗိုင်း၏ Expository Dictionary of New Testament Words) “မျိုးရိုးတစ်ခုတည်းမှ မွေးဖွားလာသည့် မိသားစုတစ်စု; တစ်ခေတ်တည်းတွင် အသက်ရှင်ခဲ့ကြသည့် လူတစ်စုလုံး– မ. ၂၄. ၃၄; မာ. ၁၃. ၃၀; လု. ၁. ၄၈ . . . အထူးသဖြင့် အချိန်ကာလပိုင်း တစ်ခုတည်း တစ်ချိန်တည်းအသက်ရှင်ခဲ့သည့် ဂျူးအနွယ်တို့ကိုဖော်ပြရာတွင် အသုံးပြု။”—ဂျီ. အိတ်ချ်. သေယာ၏ Greek-English Lexicon of the New Testament.

၁၀။ (က) မဿဲ ၂၄:၃၄ ကိုကိုးကားရာတွင် ပညာရှင်နှစ်ဦးက အဘယ်ထပ်တူအဓိပ္ပာယ်ဖွင့်ဆိုချက်ကို ပေးသနည်း။ (ခ) ဓမ္မပညာဆိုင်ရာ အဘိဓာန်တစ်အုပ်နှင့် အချို့သောကျမ်းစာဘာသာပြန်များက ဤအဓိပ္ပာယ်ဖွင့်ဆိုချက်ကို မည်သို့ထောက်ခံသနည်း။

^၁၀ ဗိုင်းနှင့် သေယာနှစ်ဦးစလုံးတို့က ‘ဤလူမျိုးဆက်’ ကို “တစ်ခေတ်တည်းတွင် အသက်ရှင်ခဲ့ကြသည့် လူတစ်စုလုံး” အဖြစ် ပြန်ဆိုရာတွင် မဿဲ ၂၄:၃၄ ကိုကိုးကားသည်။ Theological Dictionary of The New Testament (၁၉၆၄) က ဤအဓိပ္ပာယ်ဖွင့်ဆိုချက်ကို ထောက်ခံကာ ဤသို့ဆိုသည်– “‘လူမျိုးဆက်’ (ဟေ ဂေနေအာအောတေး) ဟူသည့် ဝေါဟာရကို ယေရှုအသုံးပြုခြင်းသည် ကိုယ်တော်၏ကျယ်ပြန့်သည့် သဘောပါသောရည်ရွယ်ချက်ကို ဖော်ပြသည်– ကိုယ်တော်သည် လူသားထုတစ်ရပ်လုံးကို ရည်ရွယ်ပြီး အပြစ်တရားတွင် သူတို့၏တစ်စုတစ်စည်းတည်းရှိမှုကို သိရှိထားသည်။” အမှန်ပင် “အပြစ်တရားတွင် တစ်စုတစ်စည်းတည်းရှိမှု” သည် ယနေ့ဤလောကစနစ်ကို မှတ်သားပြသကဲ့သို့ ယေရှုမြေကြီးပေါ်ရှိစဉ်က ဂျူးလူမျိုးတွင်လည်း ထင်ရှားခဲ့သည်။c

၁၁။ (က) ဟေ ဂေနေအာအောတေး အသုံးပြုပုံကို ဆုံးဖြတ်ရာတွင် အဘယ်အခွင့်အာဏာပိုင်က ကျွန်ုပ်တို့ကို အခြေခံကျကျလမ်းညွှန်သင့်သနည်း။ (ခ) ဤအခွင့်အာဏာပိုင်သည် ထိုဝေါဟာရကို မည်သို့သုံးခဲ့သနည်း။

^၁၁ ယေရှုစကားများကို မှတ်တမ်းပြုစုရာတွင် ဂရိအသုံးအနှုန်း ဟေ ဂေနေအာအောတေး သို့မဟုတ် ‘ဤလူမျိုးဆက်’ ကို မှုတ်သွင်းခံ ခရစ်ဝင်ကျမ်းရေးသူများ အသုံးပြုပုံက ဤကိစ္စကိုလေ့လာနေသော ခရစ်ယာန်များ၏တွေးတောမှုကို အဓိကအားဖြင့် လမ်းညွှန်ပေးသည်။ ဤအသုံးအနှုန်းကို မလိုလားအပ်သောသဘောဖြင့် တစိုက်မတ်မတ်အသုံးပြုခဲ့သည်။ ထိုနည်းဖြင့် ယေရှုက ဂျူးဘာသာရေးခေါင်းဆောင်များကို “မြွေဆိုးအမျိုး” ဟုခေါ်ကာ ဂေဟင်္နာ၏တရားစီရင်ချက်သည် ‘ဤလူမျိုးဆက်’ အပေါ်သို့ ကျရောက်မည်ဖြစ်ကြောင်း ဆက်၍မိန့်တော်မူခဲ့သည်။ (မဿဲ ၂၃:၃၃၊ ၃၆၊ သမ) သို့သော် ဤတရားစီရင်ချက်သည် အရေခြုံဓမ္မဆရာများအတွက်သာ ကန့်သတ်ထားသလော။ လုံးဝမဟုတ်ပါ။ အချိန်အခါတော်တော်များများတွင် ယေရှု၏တပည့်တော်များသည် ‘ဤလူမျိုးဆက်’ နှင့်ပတ်သက်၍ ကိုယ်တော်မိန့်တော်မူပြီး ဤဝေါဟာရကို ကျယ်ပြန့်သည့်သဘောဖြင့် တစ်ပုံစံတည်းအသုံးပြုထားသည်ကို ကြားခဲ့ကြရသည်။ ထိုအရာကား အဘယ်နည်း။

‘ဆိုးညစ်သောဤလူမျိုးဆက်’

၁၂။ ယေရှုတပည့်တော်များ ကြားနာခဲ့သည့်အတိုင်း ကိုယ်တော်သည် “ပရိသတ်” နှင့် ‘ဆိုးညစ်သောဤလူမျိုးဆက်’ ကို မည်သို့ဆက်စပ်ခဲ့သနည်း။

^၁၂ စီ.အီး. ၃၁ ခုနှစ်တွင် ယေရှု၏ကြီးမြတ်သောဂါလိလဲဓမ္မအမှုဆောင်စဉ်အချိန် ပသခါပွဲပြီးခါစတွင် “ပရိသတ်တို့” ကို ကိုယ်တော်ဤသို့ပြောကြောင်း ကိုယ်တော်၏တပည့်တော်များ ကြားခဲ့ကြရသည်– “ဤလူမျိုးကို အဘယ်ဥပမာနှင့်ပုံပြရအံ့နည်း။ ပွဲသဘင်၌ထိုင်နေသော သူငယ်တို့သည် မိမိသူငယ်ချင်းတို့အားအသံကိုလွှင့်၍ ‘ငါတို့သည် သာယာစွာတီးမှုတ်သော်လည်း သင်တို့သည်မကကြ။ ညည်းတွားစွာမြည်းတမ်းသော်လည်း မငိုကြွေးကြ’ ဟု ပြောဆိုသောသူငယ်တို့နှင့် ဤလူမျိုးသည်တူလှ၏။ အကြောင်းမူကား၊ ယောဟန်သည် မစားမသောက်ဘဲလာသည်ရှိသော်၊ သူတို့က ‘ဤသူသည်နတ်ဆိုးစွဲသောသူပါတကား’ ဟု ဆိုကြ၏။ လူသားသည် စားသောက်လျက်လာသည်ရှိသော် ‘ဤသူသည် စားကြူးသောသူ၊ စပျစ်ရည်သောက်ကြူးသောသူပါတကား။ အခွန်ခံသောသူနှင့် ဆိုးသောသူတို့ကို မိတ်ဆွေဖွဲ့သောသူပါတကား!’ ဟု ဆိုပြန်ကြ၏။” ထိုမဖြောင့်မမှန်သည့် “ပရိသတ်တို့” ကို စိတ်ကျေနပ်စေသည့်အရာတစ်ခုမျှမရှိပါတကား!—မဿဲ ၁၁:၇၊ ၁၆-၁၉။

၁၃။ ယေရှုသည် မိမိတပည့်တော်များရှေ့မှောက်တွင် မည်သူတို့ကို ‘ဆိုးညစ်သော ဤလူမျိုးဆက်’ အဖြစ် ခွဲခြားသိသာစေကာ ရှုတ်ချပြစ်တင်ခဲ့သနည်း။

^၁၃ စီ.အီး. ၃၁ နောက်ပိုင်းတွင် ယေရှုနှင့် ကိုယ်တော့်တပည့်တော်များသည် သူတို့၏ဒုတိယမြောက် ဂါလိလဲဟောပြောခြင်းခရီးစဉ်ကိုစတင်သောအခါ “အချို့သော ကျမ်းပြုဆရာနှင့် ဖာရိရှဲတို့က” နိမိတ်တစ်ခုပြရန် ယေရှုထံတောင်းဆိုခဲ့ကြသည်။ ကိုယ်တော်က သူတို့ကိုနှင့် ရောက်ရှိနေသည့် “ပရိသတ်တို့” ကို ဤသို့မိန့်တော်မူခဲ့သည်– “ဆိုးညစ်၍မျောက်မထားသောအမျိုးသည် နိမိတ်လက္ခဏာကိုတောင်းသည်မှာ ပရောဖက်ယောန၏နိမိတ်လက္ခဏာမှတစ်ပါး အဘယ်လက္ခဏာကိုမျှ သူတို့အားမပြရာ။ ယောနသည် ငါးကြီးဝမ်းထဲမှ သုံးရက်နေရသကဲ့သို့ လူသားသည် မြေကြီးထဲမှာ သုံးရက်နေရလတ္တံ့။ . . . ဆိုးညစ်သောဤလူမျိုး၌ ထိုနည်းတူဖြစ်လတ္တံ့။” (မဿဲ ၁၂:၃၈-၄၆) ရှင်းနေသည်မှာ ‘ဆိုးညစ်သောဤလူမျိုးဆက်’ တွင် ဘာသာရေးခေါင်းဆောင်များ၊ ယေရှု၏သေခြင်းနှင့် ရှင်ပြန်ထမြောက်ခြင်းဖြင့် ပြည့်စုံခဲ့သည့် နိမိတ်ကို ဘယ်တော့မျှသဘောမပေါက်ဘဲဖြစ်နေသည့် “ပရိသတ်” များပါဝင်သည်။d

၁၄။ ယေရှု၏တပည့်တော်များသည် ဇဒ္ဒုကဲများ၊ ဖာရိရှဲများနှင့်ပတ်သက်သော ကိုယ်တော်၏အဘယ်ရှုတ်ချပြစ်တင်မှုကို ကြားခဲ့ကြသနည်း။

^၁၄ စီ.အီး. ၃၂ ခုနှစ်၏ပသခါပွဲပြီးနောက်တွင် ယေရှုနှင့် ကိုယ်တော့်တပည့်တော်များသည် ဂါလိလဲလူများနေရပ်ဖြစ်သည့် မာဂဒလရွာသို့ ဝင်လာသည့်အခါတွင် ဇဒ္ဒုကဲများနှင့် ဖာရိရှဲများသည် ယေရှုထံမှ နိမိတ်တစ်ခုကို ထပ်မံတောင်းခံကြပြန်သည်။ ကိုယ်တော်က သူတို့ကို ဤသို့ထပ်၍မိန့်တော်မူသည်– “ဆိုးညစ်၍မျောက်မထားသောအမျိုး [“လူမျိုးဆက်၊” ကဘ] သည် နိမိတ်လက္ခဏာကို တောင်းသည်မှာ ပရောဖက်ယောန၏နိမိတ်လက္ခဏာမှတစ်ပါး အဘယ်လက္ခဏာကိုမျှ သူတို့အားမပြရာ။” (မဿဲ ၁၆:၁-၄) ဤဘာသာရေးအရေခြုံများသည် ‘ဆိုးညစ်သောဤလူမျိုးဆက်’ အဖြစ် ယေရှုရှုတ်ချခဲ့သည့် ဤသစ္စာမဲ့ “ပရိသတ်တို့” ၏ ခေါင်းဆောင်များအနေနှင့် အမှန်ပင်အပြစ်တင်ထိုက်ဆုံးသောသူများ ဖြစ်သည်။

၁၅။ ယေရှုကိုယ်ယောင်ထွန်းလင်းခြင်းမတိုင်မီကလေးနှင့် ပြီးနောက်မကြာမီအချိန်တို့တွင် ကိုယ်တော်နှင့် တပည့်တော်များသည် ‘ဤလူမျိုးဆက်’ နှင့် မည်သို့တွေ့ကြုံရင်ဆိုင်ရသနည်း။

^၁၅ ဂါလိလဲနယ်ဓမ္မအမှုလက်စသတ်ခါနီးတွင် ယေရှုသည် ဤပရိသတ်နှင့် မိမိ၏တပည့်တော်များကို ထံတော်ပါးသို့ ခေါ်ကာ ဤသို့မိန့်မြွက်ခဲ့သည်– “မျောက်မထားသော ဤလူမျိုးဆိုးတွင် အကြင်သူသည် ငါ့ကိုလည်းကောင်း၊ ငါ့စကားကိုလည်းကောင်းရှက်၏၊ လူသားသည် . . . ထိုသူကို ရှက်တော်မူလတ္တံ့။” (မာကု ၈:၃၄၊ ၃၈) ထို့ကြောင့် ထိုအချိန်ရှိ နောင်တမရသောဂျူးလူထုကြီးသည် “မျောက်မထားသောဤလူမျိုးဆိုး” ကို မွေးထုတ်ပေးခဲ့ကြောင်း ရှင်းနေပါသည်။ [စိစစ်ရေးပယ်]နောက် ရက်အနည်းငယ်အကြာ ယေရှုကိုယ်ယောင်ထွန်းလင်းပြီးနောက်တွင် ယေရှုနှင့်ကိုယ်တော့်တပည့်တော်များသည် “လူအစုအဝေးရှိရာသို့ရောက်ကြ” ရာ လူတစ်ဦးက မိမိသားကို ကုသပေးရန် ကိုယ်တော်ကို တောင်းခံသည်။ ယေရှုဤသို့ညည်းညူခဲ့သည်– “ယုံကြည်ခြင်းမရှိ၊ ဖောက်ပြန်သောအမျိုး၊ ငါသည် သင်တို့နှင့်တကွအဘယ်မျှကာလပတ်လုံး နေရမည်နည်း။ သင်တို့ကို အဘယ်မျှကာလပတ်လုံး သည်းခံရမည်နည်း။”—မဿဲ ၁၇:၁၄-၁၇; လုကာ ၉:၃၇-၄၁။

၁၆။ (က) ယုဒနယ်တွင် ယေရှုသည် “ပရိသတ်တို့” ကို တစ်ဖန် မည်သို့ပြစ်တင်ရှုတ်ချသနည်း။ (ခ) ‘ဤလူမျိုးဆက်’ သည် ရာဇဝတ်မှုအပေါင်းတွင် အဆိုးဆုံးသောရာဇဝတ်ကို မည်သို့ကျူးလွန်ခဲ့ကြသနည်း။

^၁၆ ယင်းသည် ယုဒနယ်တွင် ဖြစ်နိုင်ပြီး စီ.အီး. ၃၂ ခုနှစ် သကေနေပွဲပြီးနောက်တွင် ယေရှုပတ်ပတ်လည်၌ “လူအစုအဝေးတို့သည် ထူထပ်လျက်ရှိကြသောအခါ” ကိုယ်တော်က သူတို့ကိုထပ်မံ၍ ဤသို့ရှုတ်ချပြစ်တင်ပြန်သည်– “ဤလူမျိုးသည် ဆိုးညစ်သောအမျိုးဖြစ်၏။ နိမိတ်လက္ခဏာကို တောင်းသည်မှာ ပရောဖက်ယောန၏နိမိတ်လက္ခဏာမှတစ်ပါး အဘယ်လက္ခဏာကိုမျှ သူတို့အားမပြရာ။” (လုကာ ၁၁:၂၉) နောက်ဆုံးတွင် ဘာသာရေးခေါင်းဆောင်များက ယေရှုကို စစ်ဆေးရန် ခေါ်သွားသောအခါ ပိလတ်သည် ကိုယ်တော်ကိုလွှတ်ပေးရန် ကြိုးစားခဲ့သည်။ မှတ်တမ်းက ဤသို့ဆိုသည်– “လူအစုအဝေးတို့သည် ဗာရဗ္ဗကိုတောင်း၍ ယေရှုကိုသတ်စေခြင်းငှာ ယဇ်ပုရောဟိတ်အကြီးတို့နှင့် လူအကြီးအကဲတို့သည် လူများကို တိုက်တွန်းသွေးဆောင်ကြ၏။ . . . ပိလတ်မင်းကလည်း ‘သို့ဖြစ်လျှင် ခရစ်ဟုခေါ်ဝေါ်သော ယေရှုကို အဘယ်သို့ပြုရမည်နည်း’ ဟုမေးပြန်သော်၊ ထိုသူအပေါင်းတို့က ‘သူသည်လက်ဝါးကပ်တိုင်မှာ ရိုက်ထားခြင်းကို ခံပါလေစေ’ ဟုဆိုကြ၏။ မြို့ဝန်မင်းကလည်း ‘အဘယ်ကြောင့်နည်း။ အဘယ်အပြစ်ကိုပြုဘိသနည်း’ ဟု မေးလျှင် ‘ထိုသူသည် လက်ဝါးကပ်တိုင်မှာ ရိုက်ထားခြင်းကိုခံပါလေစေ!’ ဟု လူများတို့သည် သာ၍ဟစ်ကြ၏။” ‘ဆိုးညစ်သောဤလူမျိုးဆက်’ သည် ယေရှုကို သေစေလိုကြသည်တကား!—မဿဲ ၂၇:၂၀-၂၅။

၁၇။ “ကောက်ကျစ်သော ဤလူမျိုး” မှ အချို့တို့သည် ပင်တေကုတ္တေပွဲနေ့၌ ပေတရု၏ဟောပြောချက်ကို မည်သို့တုံ့ပြန်ခဲ့ကြသနည်း။

^၁၇ ဘာသာရေးခေါင်းဆောင်များသည် ‘ယုံကြည်ခြင်းမရှိ၊ ဖောက်ပြန်သောလူမျိုးဆက်’ ကို သွေးထိုးလှုံ့ဆော်ပေးခြင်းဖြင့် သခင်ယေရှုခရစ်ကို သေကြောင်းကြံမှုတွင် အဓိကအပိုင်းမှပါဝင်ခဲ့ကြသည်။ နောက် ရက်ငါးဆယ်အကြာ၊ စီ.အီး. ၃၃ ခုနှစ်၏ ပင်တေကုတ္တေပွဲနေ့တွင် တပည့်တော်များသည် သန့်ရှင်းသောဝိညာဉ်တော်ကို ရရှိကာ ဘာသာစကားအမျိုးမျိုးဖြင့် စတင်ဟောပြောကြသည်။ ထိုစကားသံများကို ကြားသောအခါ “လူများတို့သည် စုဝေးလာကြ” ပြီး တမန်တော်ပေတရုက “ယေရုရှလင်မြို့သားနှင့် ယုဒလူအပေါင်းတို့” ဟု သူတို့ကိုရည်ရွယ်ကာ ဤသို့ပြောသည်– “ထိုယေရှုကို သင်တို့သည် ဖမ်းဆီး၍ မတရားသောသူတို့လက်ဖြင့် လက်ဝါးကပ်တိုင်၌ရိုက်၍ ကွပ်မျက်ကြပြီ။” နားထောင်သူများထဲမှ အချို့တို့သည် မည်သို့တုံ့ပြန်ခဲ့ကြသနည်း။ “လူတို့သည် လွန်စွာပူပင်သောကရောက်” ကြ၏။ ထို့နောက်ပေတရုက သူတို့ကို နောင်တယူကြရန် မေတ္တာရပ်ခံခဲ့သည်။ သူသည် “အခြားသောစကားအများဖြင့် သက်သေခံလျက် ‘ကောက်ကျစ်သောဤလူမျိုးမှ ထွက်မြောက်ကြလော့’ ဟု တိုက်တွန်းနှိုးဆော်လေ၏။” တုံ့ပြန်မှုကား အရေအတွက် သုံးထောင်ခန့်ရှိသည့် “ထိုစကားကို အသင့်နှလုံးသွင်းမိသောသူတို့သည် ဗတ္တိဇံကိုခံ” ကြသည်။—တမန်တော် ၂:၆၊ ၁၄၊ ၂၃၊ ၃၇၊ သတင်းကောင်း၊ ၄၀၊ သမ၊ ၄၁။

‘ဤလူမျိုးဆက်’ ကို မှတ်သားဖော်ပြခြင်း

၁၈။ ‘ဤလူမျိုးဆက်’ ဟူသည့်ဝေါဟာရကို ယေရှုအသုံးပြုရာတွင် မည်သည့်အရာကို တစိုက်မတ်မတ် ရည်ညွှန်းသနည်း။

^၁၈ ယေရှုသည် မိမိတပည့်တော်များရှေ့မှောက်တွင် ‘လူမျိုးဆက်’ ကို အဘယ်ကြောင့် ဤမျှ အကြိမ်ကြိမ်ရည်ညွှန်းရပါသနည်း။ ကိုယ်တော်၏စကားများမှ မည်သည့်အရာကို သူတို့နားလည်ခဲ့ပါသနည်း– ‘ထိုအခြင်းအရာ အလုံးစုံမဖြစ်မီ ယခုလူမျိုးဆက် မကွယ်မလွန်ရ။’ ယေရှုသည် မိမိပုံသေယူထားသည့် ‘ဤလူမျိုးဆက်’ ဟူသည့်ဝေါဟာရအသုံးအနှုန်းကို မပြောင်းခဲ့ပါ၊ ယင်းဝေါဟာရကို ဂျူးလူမျိုးအဖြစ် ဖွဲ့စည်းပါဝင်သော တစ်ခေတ်တည်းသား လူအုပ်များနှင့် သူတို့၏ ‘မျက်ကန်းလမ်းပြများ’ ကို အစဉ်တစိုက်ရည်ညွှန်းခဲ့သည်။ (မဿဲ ၁၅:၁၄) ‘ဤလူမျိုးဆက်’ သည် ယေရှုတင်ကူးမိန့်မြွက်ထားသည့် ဒုက္ခသုက္ခရှိရှိသမျှကို ခံခဲ့ကြရပြီးနောက် ယေရုရှလင်မြို့ပေါ်သို့ကျရောက်သော မနှိုင်းစာနိုင်သည့် “ကြီးစွာသောဒုက္ခ” ဖြင့် ဇာတ်သိမ်းသွားကြသည်။—မဿဲ ၂၄:၂၁၊ ၃၄။

၁၉။ ဂျူးစနစ်၏ “ကောင်းကင်နှင့်မြေကြီး” သည် မည်သည့်အချိန်တွင် မည်သို့အားဖြင့် ဇာတ်သိမ်းသွားသနည်း။

^၁၉ ပထမရာစုတွင် ယေဟောဝါသည် ဂျူးလူမျိုးကို တရားစီရင်ခဲ့သည်။ သားတော်အားဖြင့်ဖြစ်သည့် ယေဟောဝါ၏ကရုဏာပါသောပြင်ဆင်ပေးချက်ကို ယုံကြည်ခြင်းတင်ပြသည့် နောင်တယူသောသူများသည် “ကြီးစွာသောဒုက္ခ” မှ ကယ်တင်ခံခဲ့ရသည်။ ယေရှုစကားများအတိုင်းပင် ပရောဖက်ပြုထားသည့်အရာအားလုံး ဖြစ်ပျက်ခဲ့ရာ သို့နှင့် ဂျူးအစီအစဉ်စနစ်၏ “ကောင်းကင်နှင့် မြေကြီး”—ယင်း၏ဘာသာရေးခေါင်းဆောင်များနှင့် ဆိုးညစ်သောလူ့အဖွဲ့အစည်းအပါအဝင် လူမျိုးတစ်မျိုးလုံး—သည် ဇာတ်သိမ်းသွားခဲ့သည်။ ယေဟောဝါ စီရင်ချက်ချခဲ့သည်တကား!—မဿဲ ၂၄:၃၅; ၂ ပေတရု ၃:၇၊ နှိုင်းယှဉ်။

၂၀။ အဘယ်အချိန်တန်သြဝါဒသည် ခရစ်ယာန်အားလုံးနှင့် အရေးတကြီးသက်ဆိုင်သနည်း။

^၂၀ ယေရှု၏ပရောဖက်ပြုစကားများကို ဂရုစိုက်ခဲ့သည့်ဂျူးများက မိမိတို့၏ကယ်တင်ခြင်းသည် ‘လူမျိုးဆက်’ တစ်ခု၏သက်တမ်း သို့မဟုတ် နေ့စွဲသတ်မှတ်ထားသည့် “အချိန်ကာလ” တစ်ခုခုကို တွက်ချက်ကြည့်ခြင်းပေါ်တွင် မူမတည်ဘဲ ဤဆိုးသော တစ်ခေတ်တည်းသားလူမျိုးဆက်မှ သီးခြားနေကာ ဘုရားသခင့်အလိုတော်ကို ဇွဲရှိရှိလုပ်ဆောင်ခြင်းအပေါ်တွင် မူတည်နေကြောင်း အသိအမှတ်ပြုခဲ့ကြသည်။ ယေရှုပရောဖက်ပြုချက်၏ ဤနိဂုံးစကားများသည် ကျွန်ုပ်တို့အချိန်တွင် ဖြစ်ပျက်မည့် အကြီးစားပြည့်စုံမှုနှင့် သက်ဆိုင်သော်လည်း ပထမရာစု ဂျူးခရစ်ယာန်များသည်လည်း ဤသြဝါဒကို လိုက်နာခဲ့ရသည်– “ထို့ကြောင့် သင်တို့သည် ဖြစ်လတ္တံ့သောအမှုအရာတို့နှင့် ကင်းလွတ်၍ လူသားထံသို့ရောက်ခြင်းကို ခံထိုက်သောသူဖြစ်သည်ဟု မှတ်တော်မူမည်အကြောင်း၊ အစဉ်ဆုတောင်းလျက်စောင့်နေကြလော့။”—လုကာ ၂၁:၃၂-၃၆; တမန်တော် ၁:၆-၈။

၂၁။ မဝေးတော့သောအနာဂတ်တွင် အဘယ်ရုတ်ခြည်းဖြစ်ပေါ်တိုးတက်မှုကို ကျွန်ုပ်တို့မျှော်လင့်နိုင်သနည်း။

^၂၁ ယနေ့ “ထာဝရဘုရား၏နေ့ကြီးနီးပြီ။ . . . အလျင်အမြန်လာ၏။” (ဇေဖနိ ၁:၁၄-၁၈; ဟေရှာယ ၁၃:၉၊ ၁၃) ရုတ်တရက်ပင် ယေဟောဝါကိုယ်တော်တိုင် ကြိုတင်သတ်မှတ်ထားသော “အချိန်နာရီ” ၌ ကမ္ဘာ့ဘာသာရေး၊ နိုင်ငံရေး၊ စီးပွားရေးအင်အားစုများနှင့်အတူ ဇွတ်တရွတ်နိုင်သော “ဆိုးညစ်၍ မျောက်မထားသောအမျိုး” အဖြစ် ဖွဲ့စည်းထားသောလူများအပေါ်သို့ ကိုယ်တော်၏ဒေါသကို ကျရောက်စေမည်။ (မဿဲ ၁၂:၃၉; ၂၄:၃၆; ဗျာဒိတ် ၇:၁-၃၊ ၉၊ ၁၄) သင်သည် “ကြီးစွာသောဒုက္ခ” မှ မည်သို့လွတ်မြောက်မှု ရနိုင်သနည်း။ ကျွန်ုပ်တို့၏နောက်ဆောင်းပါးက အဖြေပေးမည်ဖြစ်ပြီး အနာဂတ်အတွက် အလွန်ကောင်းသောမျှော်လင့်ချက်ကို ပြောပြမည်။

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ ဒံယေလ ၉:၂၄-၂၇ ပြည့်စုံချက်မှ ကျွန်ုပ်တို့အဘယ်အရာသိနားလည်ရသနည်း။

◻ ကျမ်းစာအသုံးပြုပုံအရ လက်ရှိအဘိဓာန်များက ‘ဤလူမျိုးဆက်’ ကို မည်သို့အနက်ဖွင့်သနည်း။

◻ ယေရှုသည် ‘ဤလူမျိုးဆက်’ ဟူသည့် ဝေါဟာရကို မည်သို့တစိုက်မတ်မတ်အသုံးပြုခဲ့သနည်း။

◻ မဿဲ ၂၄:၃၄၊ ၃၅ သည် ပထမရာစုတွင် မည်သို့ပြည့်စုံခဲ့သနည်း။

[စာမျက်နှာ ၁၂ ပါ ရုပ်ပုံ]

ယေရှုသည် ‘ဤလူမျိုးဆက်’ ကို အထိန်းအကွပ်မရှိသော ကလေးအုပ်နှင့် နှိုင်းယှဉ်ခဲ့

[စာမျက်နှာ ၁၅ ပါ ရုပ်ပုံ]

ယေဟောဝါတစ်ပါးတည်းသာ ဆိုးသွမ်းသောဂျူးစနစ်အပေါ် စီရင်ချက်ချသည့် အချိန်နာရီကို ကြိုသိတော်မူသည်