စာရှုသူများထံမှ မေးခွန်းလွှာ

ယခုအခါတွင် ယေရှုသည် အာမဂေဒုန်ကျရောက်မည့်အချိန်ကို သိတော်မူသလော။

ကိုယ်တော်သိတော်မူကြောင်း ယုံကြည်ခြင်းသည် အကျိုးသင့်အကြောင်းသင့် အလွန်ဖြစ်ပုံရသည်။

ဤမေးခွန်းအဘယ်ကြောင့်ပေါ်လာသနည်းဟု အချို့သူများ စဉ်းစားပေမည်။ မဿဲ ၂၄:၃၆ (သမ္မာ) တွင်တွေ့ရသည့် ယေရှု၏ ဤမိန့်တော်မူချက်ကြောင့် ဖြစ်ဖွယ်ရှိသည်– “ထိုနေ့ရက် အချိန်နာရီကိုကား အဘယ်သူမျှမသိ။ ကောင်းကင်တမန်တို့မသိ၊ သားတော်လည်းမသိ၊ ခမည်းတော်တစ်ပါးတည်းသာသိတော်မူသည်။” “သားတော်လည်းမသိ” ဟူသည် စကားစုကို သတိပြုမှတ်သားပါ။

အဆိုပါအခန်းငယ်သည် တမန်တော်များ၏ ဤမေးခွန်းကို ယေရှုပြန်လည်ဖြေကြားတော်မူသည့် အပိုင်းဖြစ်သည်– “ထိုအမှုအရာတို့သည် အဘယ်အချိန်တွင်ဖြစ်မည်ကိုလည်းကောင်း၊ ကိုယ်တော်၏ရောက်ရှိနေခြင်းနှင့် ဤစနစ်ဆုံးခန်း၏ နိမိတ်သည် အဘယ်နိမိတ်ဖြစ်မည်ကိုလည်းကောင်း ကျွန်ုပ်တို့အားအမိန့်တော်ရှိပါ။” (မဿဲ ၂၄:၃၊ ကဘ) “နိမိတ်” တွင်ပါဝင်ပေါင်းစပ်ထားသည့် သာဓကများနှင့်ပတ်သက်သော ကျော်ကြားသည့် ကိုယ်တော်၏ဤပရောဖက်ပြုချက်တွင် စစ်မက်များ၊ အစာခေါင်းပါးမှုများ၊ မြေငလျင်လှုပ်မှုများ၊ ခရစ်ယာန်စစ်များကို ညှဉ်းဆဲခြင်းနှင့် ကိုယ်တော်၏ရောက်ရှိနေခြင်းကို ညွှန်ပြမည့် ကမ္ဘာပေါ်ရှိ အခြားအရာများကို ကိုယ်တော်တင်ကူးမိန့်တော်မူခဲ့သည်။ ကိုယ်တော်၏နောက်တော်လိုက်များသည် ဤနိမိတ်အားဖြင့် ဆုံးခန်းနီးကြောင်း သိနိုင်ကြသည်။ ဤနီးကပ်မှုကို နွေကာလနီးကြောင်း ညွှန်ပြသော သင်္ဘောသဖန်းပင် အရွက်စကြွေသည့်အချိန်နှင့် ပုံခိုင်းတော်မူခဲ့သည်။ “ထိုနည်းတူ ထိုအကြောင်းအရာ အလုံးစုံတို့ကို မြင်ရလျှင် လူသားသည် တံခါးဝတိုင်အောင်အနီးသို့ရောက်တော်မူသည်ကို သိမှတ်ကြလော့” ဟု ကိုယ်တော် ထပ်ဆင့်၍မိန့်တော်မူခဲ့သည်။—မဿဲ ၂၄:၃၃။

သို့သော် အဆုံးရောက်မည့်အချိန်ကို ယေရှု အတိအကျမိန့်တော်မမူခဲ့ပါ။ ယင်းသို့မပြောဘဲ မဿဲ ၂၄:၃၆ တွင် ကျွန်ုပ်တို့ဖတ်ရသည့်အတိုင်း ကိုယ်တော်မိန့်မြွက်တော်မူခဲ့သည်။ ယင်းသည် သမ္မာကျမ်းစာတော် တွင် ဖတ်ရသည့်အတိုင်းဖြစ်ပြီး ခေတ်သစ်ကျမ်းစာများစွာတွင်လည်း အလားတူဖတ်ရသည်။ သို့သော်၊ ရှေးဘာသာပြန်ကျမ်းတချို့တွင် “သားတော်လည်းမသိ” ဟူသည့် စကားစု မပါချေ။

ဥပမာ၊ ကက်သလစ် ဒူးဝေး ဘာသာပြန်ကျမ်းတွင် “ထိုနေ့နာရီကိုကား မည်သူမျှမသိ၊ ကောင်းကင်တမန်တို့မသိ၊ ခမည်းတော်တစ်ပါးတည်းသာ သိတော်မူ၏” ဟု ဖတ်ရသည်။ ယုဒသန်ဘာသာပြန်ကျမ်း တွင်လည်း အလားတူဖတ်ရသည်။ “သားတော်လည်းမသိ” ဟူသည့်စာသားကို မာကု ၁၃:၃၂ တွင်တွေ့ရသော်လည်း ထိုကျမ်းချက်တွင်မူ အဘယ်ကြောင့် မပါလာသနည်း။ အဆိုပါဘာသာပြန်ကျမ်းနှစ်ခုကို ပြင်ဆင်ခဲ့သည့် ၁၇ ရာစုအစပိုင်းအချိန်၌ ဘာသာပြန်များပြန်ဆိုဖို့ယူသည့် လက်ရေးမိတ္တူများတွင် ဤအသုံးအနှုန်းမပါသောကြောင့်ဖြစ်သည်။ သို့သော် ထိုအချိန်အတောအတွင်း ရှေးဂရိလက်ရေးမိတ္တူများကို တွေ့ ရှိခဲ့သည်။ မဿဲ၏မူရင်းကျမ်းရေးချိန်နှင့် ပို၍နီးသည့် အဆိုပါမိတ္တူများတွင် မဿဲ ၂၄:၃၆ ၌ “သားတော်လည်းမသိ” ဟူသည့် စကားစု ပါရှိသည်။

စိတ်ဝင်စားစရာမှာ ကက်သလစ် ယေရုရှလင်ကျမ်းစာ တွင် လက်တင် ဗားဂိတ် ကျမ်းက ဤအသုံးအနှုန်းကို ချန်လှပ်ထားခဲ့ရခြင်းမှာ “ဓမ္မပညာဆိုင်ရာ အကြောင်းများကြောင့်ဖြစ်ဖွယ်ရှိသည်” ဟုဆိုထားသည့် အောက်ခြေမှတ်ချက်တစ်ခုနှင့်အတူ ဤစကားစုကို ထည့်သွင်းထားသည်။ မှန်လိုက်လေခြင်း! သုံးပါးတစ်ဆူကို ယုံကြည်ကြသော ဘာသာပြန်များနှင့် မိတ္တူကူးယူသူများသည် ခမည်းတော်တွင်ရှိသည့် သိရှိမှုမျိုး ယေရှုတွင်မရှိကြောင်း ဖော်ပြသည့် စကားစုကို ချန်လှပ်ထားရန် သွေးဆောင်ခံရနိုင်သည်။ ယေရှုနှင့် ကိုယ်တော့်ခမည်းတော်တို့သည် သုံးပါးပေါင်းဘုရားအဝင်ဖြစ်ကြပါမူ တစ်စုံတစ်ခုသောကိစ္စကို ကိုယ်တော်မသိဘဲ မည်သို့ ဖြစ်နိုင်ပါမည်နည်း။

အလားတူစွာ ဘီ.အမ်. မက်ထ်စ်ဂါးပြုစုသည့် A Textual Commentary on the Greek New Testament က ဤသို့ဆိုသည်– “နှောင်းပိုင်း ဘိုင်ဇန်တင်ကျမ်း အပါအဝင် မဿဲနှင့်ပတ်သက်သည့် [လက်ရေးမိတ္တူ] သက်သေအများစုတွင် ‘သားတော်လည်းမသိ’ ဟူသည့်စကားစုမပါချေ။ တစ်ဖက်တွင်မူ အလက်ဇန္ဒြာယန်းကျမ်းပုံစံ၊ ဝက်စတန်းကျမ်းပုံစံနှင့် ကက်စရီးယန်းကျမ်းပုံစံ၏ အကောင်းဆုံးနမူနာများတွင် ဤစကားစု ပါရှိသည်။” မာကု ၁၃:၃၂ တွင် “ဤစကားလုံးများကို ထပ်ထည့်ထားခြင်းဖြစ်သည်ဟု ယူဆရန်ထက် ယင်းတို့ကပေါ်ပေါက်စေသည့် အယူဝါဒဆိုင်ရာ အခက်အခဲကြောင့် ထိုစကားလုံးများကို ထုတ်ပစ်ခြင်း ဖြစ်ကြောင်း ယူဆခြင်းသည် ပို၍လက်ခံနိုင်ဖွယ်ဖြစ်သည်။” ကျွန်ုပ်တို့စာလုံးစောင်းထား။

အစောပိုင်းကျသော လက်ရေးမိတ္တူများ၏ အဆိုပါ “အကောင်းဆုံးနမူနာများ” က သိရှိခြင်းနှင့်ပတ်သက်၍ ကျိုးကြောင်းညီညွတ်သော တိုးသိနားလည်မှုရရှိရန် ထောက်ကူပေးသည်။ ဆုံးခန်းကာလ၏အချိန်နာရီကို ကောင်းကင်တမန်များ မသိ; သားတော် လည်းမသိ; ခမည်းတော် တစ်ပါးတည်းသာသိတော်မူသည်။ ယင်းသည် မဿဲ ၂၀:၂၃ တွင်တွေ့ရသည့် ယေရှု၏စကားတော်များနှင့်ရှေ့နောက်ညီညွတ်သည်။ ဤကျမ်းချက်တွင် ကိုယ်တော်က ဘုရားသခင့်နိုင်ငံတော်တွင် ထင်ရှားသည့်ရာထူးများကို ပေးရန် မိမိ၌အခွင့်အာဏာမရှိသော်လည်း ခမည်းတော်တွင်မူ အခွင့်အာဏာရှိကြောင်း ဝန်ခံခဲ့သည်။

ထို့ကြောင့် ယေရှုကိုယ်တော်တိုင်၏စကားများက ကိုယ်တော်မြေကြီးပေါ်တွင်ရှိစဉ်အခါ ‘ဤလောကအဆုံး’ ၏နေ့ရက်ကို သိတော်မမူခဲ့ကြောင်း တင်ပြတော်မူခဲ့သည်။ ထိုနောက်ပိုင်းအချိန်တွင် ကိုယ်တော်သိရှိတော်မူခဲ့သလော။

ဗျာဒိတ် ၆:၂ က ယေရှုသည် မြင်းဖြူစီးပြီး “အောင်မြင်လျက်လည်းကောင်း၊ [“အပြီးသတ်၊” ကဘ] အောင်မြင်ခြင်းငှာလည်းကောင်း” ချီတက်သွားနေသူဖြစ်ကြောင်း ဖော်ပြထားသည်။ နောက်၌ပါလာသည့် မြင်းစီးသမားများသည် ၁၉၁၄ ခုနှစ်တွင် စတင်ဖြစ်ပွားသည့် ပထမကမ္ဘာစစ်ကတည်းက ကျွန်ုပ်တို့တွေ့ ကြုံခဲ့ရသော စစ်မက်များ၊ အစာငတ်ဘေးများနှင့် ကပ်ရောဂါများကို ကိုယ်စားပြုသည်။ ၁၉၁၄ တွင် ယေရှုသည် ဘုရားသခင့်ကောင်းကင်နိုင်ငံတော်ဘုရင်အဖြစ် နန်းတင်ခံရကြောင်း၊ ကိုယ်တော်သည် ကမ္ဘာပေါ်ရှိဆိုးသွမ်းမှုကို ဆန့်ကျင်သည့် ရောက်လာတော့မည့်တိုက်ပွဲတွင် ဦးဆောင်မည့်သူဖြစ်ကြောင်း ယေဟောဝါသက်သေများ ယုံကြည်ကြသည်။ (ဗျာဒိတ် ၆:၃-၈; ၁၉:၁၁-၁၆) ယေရှုသည် ယခုအချိန်တွင် ဘုရားသခင့်နာမတော်ဖြင့် အောင်ပွဲဆင်မည့်သူတစ်ဦးအဖြစ် အာဏာပေးအပ်ခြင်းခံထားရသူဖြစ်ရကား အဆုံးရောက်လာမည့်အချိန်ဖြစ်သည့် “[“အပြီးသတ်၊” ကဘ] အောင်မြင်ခြင်း” ခံယူမည့်အချိန်ကို ခမည်းတော်က မိန့်တော်မူပြီးဖြစ်သည်မှာ အကျိုးသင့်အကြောင်းသင့်ဖြစ်ပုံရသည်။

ကမ္ဘာပေါ်တွင်ရှိသည့် ကျွန်ုပ်တို့ကို ထိုနေ့ရက် ပြောမထားသောကြောင့် ယေရှု၏ဤစကားများသည် ကျွန်ုပ်တို့နှင့် သက်ဆိုင်နေဆဲဖြစ်သည်– “ထိုနေ့ရက်ကာလသည် အဘယ်အခါကျရောက်မည်ကို သင်တို့မသိကြသဖြင့် သတိနှင့်စောင့်နေကြလော့။ နိုးနိုးကြားကြားရှိကြလော့။ . . . ဤသို့ သင်တို့အား သတိပေးသည်အတိုင်း ခပ်သိမ်းသောသူတို့အားလည်း ငါသတိပေး၏။ သတိနှင့်စောင့်နေကြလော့။”—မာကု ၁၃:၃၃-၃၇၊ သတင်းကောင်း။