ခရစ်တော်ရောက်ရှိနေချိန်အတွင်း တိုးချဲ့လုပ်ဆောင်မှုများ

“ထိုအခါ လက်ယာတော်ဘက်၌ရှိသောသူတို့အား မင်းကြီးက ‘ငါ့ခမည်းတော်ထံ ကောင်းချီးမင်္ဂလာကိုခံသောသူတို့ ကမ္ဘာဦးကပင် သင်တို့အဖို့ပြင်ဆင်သောနိုင်ငံကို လာ၍အမွေခံကြလော့။”—မဿဲ ၂၅:၃၄။

၁ ခရစ်တော်၏ပါရိုစီးယားသည် အဘယ်နည်းဖြင့် “နောဧလက်ထက်” နှင့်တူသနည်း။

ခရစ်တော်ရောက်ရှိနေခြင်း—ကြာမြင့်စွာစောင့်ဆိုင်းလာခဲ့ရသည့်အဖြစ်အပျက်ပါတကား။ “အစီအစဉ်စနစ်အဆုံး” နှင့်ဆက်စပ်၍ယေရှုပြောခဲ့သော “နောဧလက်ထက်” နှင့်တူသောအချိန်သည် ၁၉၁၄ ခုနှစ်တွင်ရောက်ရှိလာခဲ့ပေပြီ။ (မဿဲ ၂၄:၃၊ ၃၇) သို့သော် ခရစ်တော်၏ရောက်ရှိနေခြင်း သို့မဟုတ် ပါရိုစီးယားသည် “သစ္စာနှင့်သတိပညာရှိသောကျွန်” ၏ဘိသိက်ခံအကြွင်းအကျန်များအတွက် မည်သည့်အဓိပ္ပာယ်ရှိသနည်း။ (မဿဲ ၂၄:၄၅၊ သမ) သူတို့သည် အလင်းဆောင်သူများအဖြစ် တိုး၍တက်ကြွလှုပ်ရှားလာကြရမည်ပါတကား။ အံ့ဖွယ်အမှုများဖြစ်ရန်အချိန်တန်ပေပြီ။ တစ်ခါမျှမဖြစ်ခဲ့ဖူးသေးသောစုသိမ်းခြင်းလုပ်ငန်းစတင်ပေတော့မည်။

၂။ မာလခိ ၃:၁-၅ ၏ပြည့်စုံချက်အရ အဘယ်သန့်စင်ခြင်းခံခဲ့ပြီနည်း။

^၂ ဦးစွာ ဤဘိသိက်ခံခရစ်ယာန်များသည် သန့်စင်ခြင်းခံရရန်လိုအပ်ခဲ့သည်။ မာလခိ ၃:၁-၅ တွင်ကြိုတင်ပြောထားသည့်အတိုင်း ယေဟောဝါဘုရားသခင်နှင့် ကိုယ်တော်၏ “ပဋိညာဉ်တမန်တော်” ယေရှုခရစ်တို့သည် ဝိညာဏဗိမာန်တော်ကိုစစ်ဆေးရန် ၁၉၁၈ ခုနှစ်ဆောင်းဦးရာသီတွင် ရောက်ရှိလာခဲ့ကြသည်။ တရားစီရင်မှုသည် “ဘုရားသခင်၏အိမ်တော်” တွင်စတင်ရန်ဖြစ်သည်။ (၁ ပေတရု ၄:၁၇) မာလခိ ၃:၃ တွင်ပြောသည့်အတိုင်း “[ယေဟောဝါသည်] ငွေကိုချွတ်၍သန့်ရှင်းစေသောသူကဲ့သို့ထိုင်လျက် ရွှေငွေကိုချွတ်သကဲ့သို့ လေဝိသားတို့ကိုချွတ်၍သန့်ရှင်းစေတော်မူ” မည်။ ယင်းကား သန့်စင်ခြင်းနှင့်သန့်ရှင်းစေခြင်းအချိန်ကာလဖြစ်ခဲ့သည်။

၃။ ဝိညာဏသန့်စင်ခြင်းခံရရန် အဘယ်ကြောင့်လိုအပ်ပါသနည်း။

^၃ ၁၉၁၈ ခုနှစ်တွင် အထွတ်အထိပ်သို့ရောက်ခဲ့သော ဤတရားစီရင်ရာအချိန်ကိုကျော်ဖြတ်ခဲ့ခြင်းအားဖြင့် ကျေးကျွန်အတန်းအစားမှ အကြွင်းအကျန်သည် လောကီနှင့်ဘာသာရေးညစ်ညမ်းမှုများမှ သန့်စင်ခံခဲ့ကြရသည်။ ယေဟောဝါသည် အဘယ်ကြောင့်သန့်စင်ပေးတော်မူသနည်း။ အကြောင်းမှာ၊ ကိုယ်တော်၏ဝိညာဏဗိမာန်တော် ပါဝင်ပတ်သက်နေသောကြောင့်ဖြစ်သည်။ ယင်းက ဗိမာန်တော်အစီအစဉ်နှင့်တူသော ယေရှုခရစ်၏ရန်ငြိမ်းစေသည့် ရွေးဖိုးပူဇော်သက္ကာကိုအခြေပြု၍ ယေဟောဝါကိုဝတ်ပြုသည့်အစီအစဉ်ဖြစ်သည်။ မြေကြီးမျှော်လင့်ချက်ရှိသည့် များပြားစွာသောဝတ်ပြုသူများသည် ထိုသို့စုသိမ်းခံရသည့်အခါ ကိုယ်တော်၏စကြဝဠာတစ်ခုလုံးပိုင်သအုပ်စိုးခွင့်ကို ရိုသေလေးစားသည့်နေရာ၊ ကိုယ်တော်၏မြင့်မြတ်သောနာမတော် သန့်ရှင်းစင်ကြယ်ခြင်းခံရသည့်နေရာ၊ ကိုယ်တော်၏ဖြောင့်မတ်သောပညတ်တော်များအား နာခံလိုက်လျှောက်သည့်နေရာကို သူတို့အားရှာတွေ့စေလိုသဖြင့် ကိုယ်တော်၏ဗိမာန်တော်ကို သန့်ရှင်းသည့်အခြေအနေတွင်ထားရှိစေလိုခြင်းဖြစ်သည်။ ထိုသို့အားဖြင့် သူတို့သည် ယေဟောဝါကိုကျေးဇူးတင်ကြပြီး ကိုယ်တော်၏မြင့်မြတ်သည့်ရည်ရွယ်တော်မူချက်များတွင် ပါဝင်လုပ်ဆောင်ကြမည်­ဖြစ်သည်။

ထပ်လောင်းသော အခွင့်အရေးများ

၄၊ ၅။ (က) ယေရှုခရစ်၏မေးခွန်းတစ်ခုသည် ယနေ့ကျေးကျွန်အတန်းစားအတွက် အဘယ်နည်းဖြင့် စိန်ခေါ်ချက်ဖြစ်သနည်း။ (ခ) “သစ္စာနှင့်သစ္စာပညာရှိကျေးကျွန်” နှင့် “အရှင်၏အိမ်သူအိမ်သား” ဟူသောအသုံးအနှုန်းများကို အဘယ်နည်းဖြင့် နားလည်ရမည်နည်း။ (ဂ) ကျေးကျွန်အား ယေရှုအဘယ်တာဝန်အပ်နှင်းသနည်း။

^၄ ၁၉၁၉ ခုနှစ်တွင် သန့်စင်ခံရပြီးသောကျေးကျွန်အတန်းအစားသည် လုပ်ငန်းတော်တိုးချဲ့ရန် မျှော်လင့်နိုင်ကြပေပြီ။ ၁၉၁၄ ခုနှစ်က သူတို့၏သခင်ယေရှုခရစ်သည် ကောင်းကင်နိုင်ငံတော်ကို လက်ခံရရှိခဲ့သည်။ မိမိ၏ “အိမ်သူအိမ်သား” အားလုံးကို စစ်ဆေးရန်ပြန်လည်ရောက်ရှိချိန်တွင် ဤမြေကြီးပေါ်တွင်ရှိခဲ့စဉ်ကမပိုင်ဆိုင်ခဲ့သော ဘုရင့်ဘုန်းအသရေဖြင့် ကိုယ်တော်ထင်ရှားသည်။ ကိုယ်တော်ဘာကိုတွေ့ခဲ့မည်နည်း။ ကျေးကျွန်အတန်းအစားသည် သခင်၏အကျိုးကိုလုပ်ဆောင်နေရာတွင် အလုပ်များနေကြပါသလော။ မဿဲ ၂၄:၄၅-၄၇ တွင် မှတ်တမ်းတင်ထားသည့်အတိုင်း ယေဟောဝါ၏မေရှိယအပေါ် မည်မျှချစ်ခင်စွဲလမ်းကြောင်း ပြန်လည်စစ်ဆေးရန် ဘိသိက်ခံတပည့်တော်တစ်ဦးစီအတွက် စိန်ခေါ်သည့်မေးခွန်းတစ်ခုကို ယေရှုမေးတော်မူခဲ့သည်။ “အရှင်သည် မိမိအိမ်သူအိမ်သားအပေါင်းတို့အား အချိန်တန်လျှင် အစားအသောက်တို့ကိုဝေဖန်စေခြင်းငှာအအုပ်အချုပ်ခန့်ထား၍ သစ္စာနှင့်လည်းကောင်း၊ သတိပညာနှင့်လည်ကောင်း ပြည့်စုံသောကျွန်ကား အဘယ်သူနည်း။ အကြင်ကျွန်သည် ထိုသို့ပြုလျက်နေသည်ကို အရှင်သည်ပြန်လာ၍တွေ့၏။ ထိုကျွန်သည်မင်္ဂလာရှိ၏။ ငါအမှန်ဆိုသည်ကား အရှင်သည်မိမိဥစ္စာရှိသမျှတို့ကို ထိုကျွန်၌အပ်လိမ့်မည်။”

^၅ ဤသစ္စာရှိကျေးကျွန်ဆိုင်ရာ ယေရှု၏ဖော်ပြချက်သည် လူတစ်ဦးတစ်ယောက်ကိုဆိုလိုနေခြင်းမဟုတ်သည်မှာ ထင်ရှားသည်။ သို့သော် ခရစ်တော်၏သစ္စာရှိဘိသိက်ခံအသင်းတော်တစ်ခုလုံး၊ အုပ်စုတစ်ခု အနေနှင့် ဖော်ပြနေခြင်းဖြစ်သည်။ အိမ်သူအိမ်သားများမှာ ခရစ်တော်၏နောက်တော်လိုက် တစ်ဦးချင်းကိုဆိုလိုသည်။ ယေရှုသည် မိမိ၏ဘိသိက်ခံနောက်တော်လိုက်များကို မိမိကိုယ်တိုင်၏အသွေးအားဖြင့် ဝယ်ယူရမည်ကိုသိသောကြောင့် သူတို့ကို မိမိ၏ကျေးကျွန်များဟု ဆီလျော်စွာစုစည်းဖော်ပြခဲ့ခြင်းဖြစ်သည်။ သူတို့နှင့်ပတ်သက်၍ ၁ ကောရိန္သု ၇:၂၃ တွင် “သင်တို့ [တစ်စုတစ်စည်းတည်းကိုပြောနေ] သည် အဖိုးနှင့်ဝယ်တော်မူသောသူဖြစ်၍ လူထံ၌အလိုအလျောက်ကျွန်မခံကြနှင့်” ဟုဖော်ပြထားသည်။ မိမိတို့အလင်းကိုထွန်းလင်းပြီး အခြားသူများကို တပည့်ဖြစ်လာရန်ပြုကာ ကိုယ်တော်၏အိမ်သူအိမ်သားများကို အချိန်တန်ဝိညာဏအစာပေးခြင်းအားဖြင့် သူတို့အားဆက်လက်၍ကျွေးမွေးသွားရန် ­မိမိ၏ကျေးကျွန်အား ယေရှုတာဝန်ပေးထားခဲ့သည်။

၆။ ယေရှုစစ်ဆေးပြီးနောက် ကျေးကျွန်သည် အဘယ်နည်းဖြင့် ဆုချခံရသနည်း။

^၆ ခရစ်တော်ရောက်ရှိနေသည့်အချိန်မှစ၍ ၁၉၁၈ ခုနှစ်အထိ ကျေးကျွန်အတန်းအစားသည် လူများမနှစ်သက်ခြင်း၊ နှိပ်စက်ညှဉ်းပန်းခြင်းများကြားမှပင် အိမ်သူအိမ်သားများကို အချိန်တန်အစာကျွေးမွေးရန် အားထုတ်လာခဲ့ကြသည်။ သခင်စတင်စစ်ဆေးချိန်တွင် ယင်းအခြေအနေကိုတွေ့ရှိခဲ့သည်။ သခင်ယေရှုသဘောကျနှစ်သက်ခဲ့ပြီး ၁၉၁၉ ခုနှစ်တွင် သစ္စာရှိကျေးကျွန်အတန်းအစားအား ပျော်ရွှင်ကြောင်းကြေညာခဲ့သည်။ သခင်ခန့်အပ်သည့်အလုပ်ကိုလုပ်သည့်အတွက် ကျေးကျွန်ခံစားရသည့် နှစ်လိုဖွယ်ဆုကျေးဇူးကား အဘယ်နည်း။ ရာထူးတိုးခြင်းဖြစ်သည်။ မှန်ပါသည်။ သခင်၏အကျိုးစီးပွားတိုးတက်စေရေးအတွက် ပို၍ကြီးမားသည့်တာဝန်များပေးခဲ့သည်။ ယခုအခါသခင်သည် ကောင်းကင်ဘုရင်ဖြစ်နေသဖြင့် သူ၏မြေကြီးဆိုင်ရာပိုင်ဆိုင်မှုများသည် ပိုမို၍တန်ဖိုးရှိလာသည်။

၇၊ ၈။ (က) သခင်၏ ‘ဥစ္စာရှိရှိသမျှ’ ကားအဘယ်နည်း။ (ခ) ဤဥစ္စာများကို ကြီးကြပ်ပေးရာတွင် ကျေးကျွန်သည် အဘယ်အရာများ ပြုရသနည်း။

^၇ သို့ဆိုလျှင် “မိမိဥစ္စာရှိသမျှ” ကားအဘယ်နည်း။ ယင်းတို့သည် ကိုယ်တော်၏ကောင်းကင်ဘုရင်အခွင့်အာဏာတော်နှင့်ဆက်စပ်နေသော ခရစ်တော်၏ဥစ္စာဖြစ်လာသည့် မြေကြီးဆိုင်ရာဝိညာဏအရာအားလုံးဖြစ်ကြောင်းထင်ရှားသည်။ ယင်းတို့တွင် ခရစ်တော်၏တပည့်များဖြစ်စေခြင်းလုပ်ငန်းမလွဲမသွေပါဝင်ပြီး ကမ္ဘာတစ်ခွင်ရှိလူမျိုးအားလုံးကိုအုပ်စိုးမည့် တည်ထောင်ပြီးသောဘုရားသခင့်နိုင်ငံတော်၏ကိုယ်စားလှယ်များဖြစ်ရသည့် ထူးမြတ်လှသောအခွင့်အရေးကြီးဖြင့်လုပ်ဆောင်ရခြင်းဖြစ်သည်။

^၈ သခင့်ပစ္စည်းဥစ္စာများကိုကြီးကြပ်စောင့်ရှောက်ရမည့် ထိုရာထူးတိုးမြှင့်ခြင်းသည် ကျေးကျွန်အတန်းအစားအတွက် ဘုရားသခင့်နိုင်ငံတော်လုပ်ငန်းပြီးမြောက်ရန်ပို၍ အချိန်နှင့်အာရုံစိုက်ရန်လိုအပ်သည်။ မှန်ပါသည်။ ထိုလုပ်ငန်းအတွက် လိုအပ်သောကိရိယာတန်ဆာပလာများကို ပိုမိုကြီးကျယ်စွာတိုးချဲ့ရန်ဖြစ်သည်။ ယခုအခါ လုပ်ငန်းခွင်သည် ကမ္ဘာတစ်ခွင်လုံးနှင့်အမျှ—လောကီနိုင်ငံအရပ်ရပ်ရှိသမျှ—ကျယ်ဝန်းသည်။

သိုးတို့ကို စုသိမ်းခြင်း

၉။ ကျေးကျွန်၏တိုးချဲ့လုပ်ဆောင်မှုများမှ အဘယ်အကျိုးဖြစ်ထွန်းခဲ့ပြီနည်း။

^၉ နာခံမှုအပြည့်အဝဖြင့် ခရစ်တော်၏သစ္စာနှင့်သတိပညာရှိသောကျေးကျွန်အတန်းအစားသည် သူတို့၏လုပ်ငန်းကို တိုးချဲ့ခဲ့သည်။ ရလဒ်ကားအဘယ်နည်း။ ဘိသိက်ခံ ၁၄၄,၀၀၀ မှနောက်ဆုံးသောသူတို့သည် စုသိမ်းခြင်းခံရသည်။ ထိုအခါ ဗျာဒိတ် ၇:­၉-၁၇ တွင်ယောဟန်မှတ်တမ်းတင်ထားသောရူပါရုံများသည် စိတ်လှုပ်ရှားဖွယ်၊ စိတ်အားတက်ကြွဖွယ် ပြည့်စုံနေသည်။ အထူးသဖြင့် ၁၉၃၅ ခုနှစ်မှစ၍ ဤရူပါရုံမှန်မှန်တိုးတက်ပြည့်စုံလာသည်ကို ကျေးကျွန်အတန်းအစား ဝမ်းမြောက်စွာတွေ့ကြုံခံစားလာခဲ့ကြရသည်။ ကမ္ဘာအရပ်ရပ်မှနေ၍ သန်းပေါင်းများစွာသော “လူအုပ်ကြီး” သည် ယေဟောဝါကိုဝတ်ပြုသူများအနေနှင့် ကိုယ်တော်၏ဝိညာဏဗိမာန်တော်တံတိုင်းအတွင်း နေရာယူနေကြသည်။ ­ယေဟောဝါ၏ကောင်းကင်တမန်က ဤလူအုပ်ကြီးကို “အဘယ်သူမျှမရေမတွက်နိုင်” ဟုယောဟန်အားပြောခဲ့သည်။ ယေဟောဝါ၏ဝိညာဏဗိမာန်သို့ ကျေးကျွန်အတန်းအစားခေါ်ဆောင်လာရမည့်လူများအရေအတွက်မှာ အကန့်အသတ်မရှိကြောင်းကိုဆိုလိုသည်။ လမ်းပွင့်နေသေးသရွေ့ သူတို့ကိုစုသိမ်းခြင်းလုပ်ငန်းဆက်လက်ဖြစ်ထွန်းနေမည်သာဖြစ်သည်။

၁၀။ ယနေ့ ကျေးကျွန်သည် အဘယ်မေတ္တာပါလုပ်ငန်းတွင် ပါဝင်နေသနည်း။

^၁၀ သစ္စာရှိကျေးကျွန်အတန်းအစားသည် အစဉ်တစိုက်တိုးတက်နေသော “အခြားသိုးများ” ကိုစောင့်ရှောက်ရန် ကြီးလေးသောတာဝန်ရှိသည်။ အကြောင်းမှာ လူမျိုးအသီးသီးမှသိုးနှင့်တူသောဤလူများကို သခင်ယေရှုအလွန်ချစ်မြတ်နိုးတော်မူကြောင်း သူတို့သိကြသည်။ သူတို့သည် ကိုယ်တော်၏သိုးတော်စုဖြစ်ကြသည်။ (ယောဟန် ၁၀:၁၆။ တမန်တော် ၂၀:၂၈။ ၁ ပေတရု ၅:၂-၄) ထိုကြောင့် သခင်နှင့်သိုးများကိုချစ်သောမေတ္တာအားဖြင့် ကျေးကျွန်အတန်းအစားသည် သူတို့၏ဝိညာဏလိုအပ်ရာများကို ပျော်ရွှင်စွာစောင့်ရှောက်ပေးကြသည်။

၁၁-၁၃။ ကျေးကျွန်၏လုပ်ဆောင်မှုနှင့်ပတ်သက်၍ ကင်းမျှော်စင်အသင်း၏ဥက္ကဌက အဘယ်လျောက်ပတ်သောစကားများ ပြောဆိုခဲ့သနည်း။

^၁၁ မှန်ပါသည်၊ ကျေးကျွန်များ၏အလင်းဆောင်သည့်လုပ်ငန်းတွင် အကြီးကျယ်ဆုံးအပိုင်းကဏ္ဍမှာ ဘုရားသခင့်နိုင်ငံတော်၏မြေကြီးဆိုင်ရာလက်အောက်ခံများဖြစ်သည့် ဤသူများကိုစုသိမ်းခြင်းဖြစ်သည်။ သစ္စာရှိကျေးကျွန်အတန်းအစား၏ အစဉ်တစိုက်တိုးတက်နေသော လုပ်ဆောင်မှုအကြောင်းဆွေးနွေးရာတွင် ထိုစဉ်ကအသင်းမ၏ဥက္ကဌ အက်ဖ်၊ ဒဗလျူ၊ ဖရန့်စ် သည် ၁၉၉၂ ဒီဇင်ဘာလတွင်မသေလွန်မီက ဤသို့ပြောခဲ့သည်။

^၁၂ “ကျွန်တော့်ရဲ့ ၉၉ နှစ်သက်တမ်းတစ်လျှောက်မှာ ယေရှုခရစ်ဟာ တစ်ချိန်လုံး အဖွဲ့အစည်းကိုပို၍ပို၍အံ့ဖွယ်ကောင်းလောက်အောင်အသုံးပြုလာတာကို ကြုံတွေ့ရပါတယ်။ အဖွဲ့အစည်းကို လူသားသက်သက်ကလမ်းညွှန်နေတာမဟုတ်ဘဲ သခင်ခရစ်တော်ယေရှုကဦးဆောင်နေတာပဲဖြစ်ရမယ်။ ကျွန်တော်တို့ထင်ခဲ့ဖူးတာထက် များစွာသာလွန်ပြီး ကြီးကျယ်ခမ်းနားစွာနဲ့အံ့ဖွယ်ကောင်းလောက်အောင် အကျိုးဖြစ်ထွန်းနေတာကိုတွေ့ရလို့ဖြစ်တယ်။ ဒီနေ့၊ ကျွန်ုပ်တို့မှာ ကမ္ဘာတစ်ဝန်းကိုကျယ်ပြန့်သွားတဲ့ အဖွဲ့အစည်းတစ်ခုရှိတယ်။ ကမ္ဘာ့တောင်ခြမ်း၊ မြောက်ခြမ်း၊ အရှေ့နဲ့အနောက်တွေမှာ အကျိုးဖြစ်ထွန်းနေကြတယ်။ ဒီလိုမှတ်သားလောက်ဖွယ်တိုးပွားမှုအတွက် တာဝန်ယူနိုင်သူတစ်ဦးပဲရှိရမယ်—သစ္စာနဲ့သတိပညာရှိကျေးကျွန်အတန်းအစားရဲ့တာဝန်ခံ၊ ­ဘုရားသခင်ရဲ့သားတော်ပဲဖြစ်တယ်။ ကိုယ်တော်ဟာ မိမိတာဝန်တွေကို အရည်အချင်းပြည့်ဝစွာလုပ်ဆောင်နေတဲ့အတွက် အဲဒါက ကျွန်တော်တို့သက်သေခံမှု ဒီလောက်ကြီး ကျယ်ပြန့်နိုင်ခြင်းပါပဲ။

^၁၃ “ဒီကိစ္စဟာ လူတစ်ဦးတစ်ယောက်အပေါ်မှာမူတည်တာမဟုတ်ပါဘူး။ ကျွန်တော်တို့မှာ သီအိုကရက်တစ်ဆန်တဲ့အဖွဲ့အစည်းတစ်ခုရှိတယ်။ အဲဒါကို သီအိုကရက်တစ်အမူအကျင့်၊ ဘုရားသခင်လမ်းညွှန်တဲ့ပုံစံနဲ့လှုပ်ရှားလည်ပတ်တယ်။ ကင်းမျှော်စင်သမ္မာကျမ်းစာနဲ့ဝေစာအသင်းကို စတင်တည်ထောင်သူမှအစ ဘယ်လူသားတစ်ဦးတစ်ယောက်ကမှ ဒီကမ္ဘာချီပြီးစီးအောင်မြင်မှုအတွက် နာမည်မယူနိုင်ပါဘူး။ အဲဒါတကယ့်အံ့ချီးဖွယ်ရာသာဖြစ်တယ်။” လူအုပ်ကြီးအဝင်အားလုံးတို့သည် ညီအစ်ကိုဖရန့်စ်၏ ထိုယူမှတ်ခံစားမှုများအတိုင်း စိတ်ပါလက်ပါသဘောမတူကြပေလော။ မှန်ပါသည်။ သူတို့သည် သစ္စာရှိကျေးကျွန်အတန်းအစား၏တိုးချဲ့သည့်လုပ်ရပ်များအတွက် ကျေးဇူးအတင်ဆုံးလူများဖြစ်ကြသည်အမှန်။

ဘုရားသခင့်နိုင်ငံ၏ လက်အောက်ခံသားများ

၁၄၊ ၁၅။ (က) ငွေကြေးဥစ္စာများဥပမာတွင် ယေရှုအဘယ်အရာကိုဖော်ပြသနည်း (မဿဲ ၂၅:၁၄-၃၀)။ (ခ) လျော်ကန်စွာဖြင့် မဿဲ အခန်းကြီး ၂၅ တွင်အဘယ်အကြောင်းပါသနည်း။

^၁၄ မဿဲအခန်းကြီး ၂၅ ပါယေရှု၏သိုးနှင့်ဆိတ်ပုံဥပမာသည် ဘုရားသခင့်နိုင်ငံတော်၏မြေကြီးပေါ်ရှိလက်အောက်ခံများကိုစုသိမ်းခြင်းဆိုင်ရာ ဤကြီးကျယ်သည့်လုပ်ငန်းကို ဖော်ပြသည်။ ထိုပုံဥပမာမတိုင်မီပေးသော ငွေကြေးဥစ္စာများဥပမာတွင် မိမိနှင့်အတူကောင်းကင်နိုင်ငံတော်တွင် အုပ်ချုပ်ရန်မျှော်လင့်သူများသည် ကိုယ်တော်၏မြေကြီးဆိုင်ရာပစ္စည်းဥစ္စာများကို တိုးပွားအောင်လုပ်ဆောင်ရမည်ဖြစ်ကြောင်း ကိုယ်တော်ဥပမာပေးခဲ့သည်။ အလွန်ဆီလျော်စွာပင် ကိုယ်တော်၏နောက်ဥပမာတစ်ခုတွင် မိမိ၏ကောင်းကင်နိုင်ငံတော်လက်အောက်ခံ ဖြစ်လိုသူများအတွက်လိုအပ်ချက်ကို ယေရှုပုံဖော်ခဲ့သည်။

^၁၅ မဿဲ ၂၅:၃၁-၃၃ ပါဤမှတ်ချက်ကို သတိထားကြည့်ပါ။ “လူသားသည် မိမိဘုန်းအာနုဘော်ကိုဆောင်လျက် သန့်ရှင်းသောကောင်းကင်တမန်များအခြံအရံတို့နှင့်တကွ ကြွလာတော်မူသောအခါ ဘုန်းရှိသောပလ္လင်တော်ပေါ်မှာထိုင်၍ ရှေ့တော်၌လူမျိုးအပေါင်းတို့ကိုစုဝေးစေသဖြင့် သိုးထိန်းသည် သိုးနှင့်ဆိတ်တို့ကိုတခြားစီခွဲထားသကဲ့သို့ လူအပေါင်းတို့ကိုအသီးအခြားခွဲ၍ သိုးတို့ကိုလက်ယာတော်ဘက်၊ ဆိတ်တို့ကိုလက်ဝဲတော်ဘက်၌ထားတော်မူလတ္တံ့။”

၁၆။ လူမျိုးတို့သည် မည်သို့စုသိမ်းခံရပြီး လူတို့သည် အဘယ်နည်းဖြင့် ခွဲခြားခံရသနည်း။

^၁၆ ယေရှုသည် ဘုန်းအသရေခံစားရာသို့ ၁၉၁၄ ခုနှစ်တွင်ရောက်ရှိခဲ့သည်။ ကိုယ်တော်သည် ကောင်းကင်တမန်အားလုံးနှင့်အတူ မိမိ၏ရန်သူနတ်ဆိုးများကို တိုက်ခိုက်ချေမှုန်းပြီးနှင်ထုတ်ခြင်းအားဖြင့် ဆက်၍စစ်ဆင်နွှဲခဲ့သည်။ ကိုယ်တော်၏နောက်ပုံဥပမာတစ်ခုက ဘုန်းရှိသောပလ္လင်ပေါ်တွင်ယေရှုထိုင်ခြင်းက ကိုယ်တော်၏ရောက်ရှိနေရာကာလအတွင်း တရားစီရင်သည့်အနေအထားကိုပုံဆောင်ကြောင်း ကျွန်ုပ်တို့အား နားလည်စေသည်။ ရှေ့တော်၌လူမျိုးအပေါင်းကိုစုသိမ်းခြင်းက ယေရှုသည် မိမိ၏အစုအစည်းအဝင်အဖြစ် လူမျိုးအားလုံးကိုလက်ခံကြောင်း ပုံဆောင်သဘောအရဆိုလိုသည်။ ယင်းအစုအစည်းသည် သိုးနှင့်ဆိတ်များရောနှောထားရာဖြစ်သည်။ ပကတိသိုးများကို ဆိတ်များမှခွဲထုတ်ရန် တစ်ရက်၏အစိတ်အပိုင်းသာကြာမည်ဖြစ်သော်လည်း စာရိတ္တဆိုင်ရာလွတ်လပ်မှုရှိသူ ကမ္ဘာချီလူသားများကို ခွဲခြားရာတွင် များစွာပို၍ကြာရှည်ပေလိမ့်မည်။ အကြောင်းမှာ ခွဲခြားခြင်းသည် သူတို့တစ်ဦးစီ၏လုပ်ရပ်ပေါ်တွင်မူတည်သောကြောင့်ဖြစ်သည်။

၁၇။ ယနေ့အခြေအနေသည် လူအားလုံးအတွက် အဘယ်ကြောင့် အရေးကြီးသနည်း။

^၁၇ ပုံဥပမာတွင် သိုးထိန်းဘုရင်သည် သိုးများကို လက်ယာဘက်၊ ဆိတ်များကို လက်ဝဲဘက်တွင်ထားတော်မူသည်။ လက်ယာဘက်သည် မျက်နှာသာရတရားစီရင်ချက်၏အကျိုးရလဒ်—ထာဝရအသက်—ရမည့်ဘက်ဖြစ်လာသည်။ လက်ဝဲဘက်မူ မျက်နှာသာမရသောစီရင်ချက်—ထာဝရဖျက်ဆီးခြင်း—ခံရမည့်ဘက်ဖြစ်သည်။ ယင်းနှင့်စပ်လျဉ်း၍ ဘုရင့်ဆုံးဖြတ်ချက်သည် လူသားများအားလုံးအတွက် အရေးကြီးသောအခြေအနေဖြစ်သည်။

၁၈။ ဘုရင်၏မျက်မြင်မရသောအဖြစ်က မည်သူကိုမျှ အဘယ်ကြောင့်ဆင်ခြေပေးနိုင်စရာမဖြစ်သနည်း။

^၁၈ နန်းထိုင်နေတော်မူသောလူသားရောက်ရှိနေချိန်၊ သို့မဟုတ် ပါရိုစီးယားကာလအတွင်း ကိုယ်တော်အားမျက်စိဖြင့်မမြင်နိုင်ကြသည့်အတွက် မည်သူတစ်ဦးတစ်ယောက်မျှဆင်ခြေမတက်နိုင်ပါ။ ယနေ့ ကျေးကျွန်အတန်းအစားနှင့်ပူးပေါင်း၍ ဘုရားသခင့်နိုင်ငံတော်သတင်းကောင်းကို ကမ္ဘာချီကြွေးကြော်လျက် မိမိတို့၏အလင်းကိုထွန်းလင်းနေကြသူ သိုးကဲ့သို့သူများ တိုး၍တိုး၍များပြားလာပါသည်။ သူတို့၏သက်သေခံခြင်းသည် မြေကြီးစွန်းများအထိရောက်ရှိသည်အမှန်။—မဿဲ ၂၄:၁၄။

၁၉။ သိုးနှင့်ဆိတ်ပုံဥပမာတွင် သိုးအတန်းစား၏ အဘယ်အရည်အချင်းများကို ပုံဖော်ပြထားပါသနည်း။

^၁၉ သိုးအတန်းစားကို သိုးထိန်းဘုရင်သည် ကောင်းချီးကြွယ်ဝသည့်အနာဂတ်နှင့် အဘယ်ကြောင့်ဆုချတော်မူရသနည်း။ ဘုရားသခင့်နိုင်ငံတော်သတင်းဟောပြောခြင်းလုပ်ငန်းကို စိတ်နှလုံးအကြွင်းမဲ့ သူတို့ထောက်ခံအားပေးပြီး ကိုယ်တော်၏ဘိသိက်ခံညီအစ်ကိုများကို သူတို့ကြင်နာမှုပြခြင်း—ယင်းကို မိမိအားပြုသကဲ့သို့ ယေရှုမှတ်ယူခြင်း—ကြောင့်ဖြစ်သည်။ ထိုကြောင့် တော်ဝင်လူသားက သူတို့အား ဤသို့မိန့်တော်မူသည်။ “ငါ့ခမည်းတော်ထံကောင်းချီးမင်္ဂလာကိုခံသောသူတို့ ကမ္ဘာဦးကပင် သင်တို့အဖို့ပြင်ဆင်သောနိုင်ငံကို လာ၍အမွေခံကြလော့။”—မဿဲ ၂၅:၃၄။ ၂၈:၁၉၊ ၂၀။

ဘုရင်ကို အကူအညီပေးခြင်း

၂၀၊ ၂၁။ သိုးများသည် ဘုရားသခင့်နိုင်ငံတော်ဘက်ရပ်တည်နေကြောင်း အဘယ်သာဓကပြသနည်း။

^၂၀ ဤသိုးများအား ဘုရားသခင့်နိုင်ငံတော်၏မြေကြီးဘုံကိုအမွေခံရန် ဘုရင်ကခေါ်ဖိတ်လိုက်သောအခါ သူတို့အံ့သြမှုကိုတင်ပြကြသည်။ သူတို့က ကိုယ်တော်အား ‘သခင်၊ ကိုယ်တော်ဤသို့ဖြစ်တော်မူသည်ကို ကျွန်ုပ်တို့သည်အဘယ်အခါ၌တွေ့၍ ဤအရာများကိုလုပ်ပါသနည်း’ ဟုမေးလျှောက်ကြ၏။ ကိုယ်တော်က “ငါအမှန်ဆိုသည်ကား သင်တို့သည် ဤသူတည်းဟူသောငါ့ညီတို့တွင် အငယ်ဆုံးသောသူတစ်ယောက်အားပြုကြသမျှကို ငါ့အားပြုကြပြီ” ဟုပြန်၍ဖြေကြားခဲ့သည်။ (မဿဲ ၂၅:၄၀) ယေရှုရှင်ပြန်ထမြောက်သည့်နေ့တွင် မာဂဒလမာရိအားကိုယ်ယောင်ထင်ရှားပြခဲ့စဉ်က မိမိ၏ဝိညာဏညီများအကြောင်းပြောဆိုခဲ့သည်။ “ငါ့ညီတို့ရှိရာသို့သွားလော့” ဟုသူမအားကိုယ်တော်မိန့်တော်မူခဲ့သည်။ (ယောဟန် ၂၀:၁၇) မျက်မြင်မရရောက်ရှိချိန်အတွင်း ယေရှု၏­ဝိညာဏညီတော် ၁၄၄,၀၀၀ မှအကြွင်းအကျန်အနည်းငယ်သာ မြေကြီးပေါ်တွင် လူ့အသွေးအသားအဖြစ်အသက်ရှင်လျက်ရှိသည်။

^၂၁ ကောင်းကင်တွင် မမြင်နိုင်သည့်အဖြစ်သို့ကိုယ်တော်ရောက်ရှိနေသည်ဖြစ်ရာ သိုးကဲ့သို့သောသူများသည် သွယ်ဝိုက်သောနည်းအားဖြင့်သာ ယေရှုအားဤအမှုများကိုပြုခဲ့ကြသည်။ နန်းထိုင်နေသောကိုယ်တော်အား သူတို့၏ယုံကြည်ခြင်းမျက်စိအားဖြင့်သာ မြင်နိုင်ကြသည်။ မိမိနှင့်ကောင်းကင်အမွေခံဘက်ဖြစ်လာကြမည့် မိမိ၏ဝိညာဏညီများကိုကူညီထောက်ပံ့ရန်ကြိုးစားခဲ့သမျှအတွက် သူတို့အား ယေရှုကျေးဇူးတင်ချီးမွမ်းခဲ့သည်။ မိမိ၏ညီများကိုပြုသမျှတို့သည် မိမိကိုယ်တိုင်အားပြုသည်ဟုကိုယ်တော်ယူမှတ်သည်။ သိုးကဲ့သို့သောသူများသည် ခရစ်တော်၏ညီတော်များအဖြစ် သူတို့အားအသိအမှတ်ပြုကြသောကြောင့် စိတ်လိုကိုယ်လျောက်ကောင်းမှုပြုကြခြင်းဖြစ်သည်။ ယေရှု၏ဝိညာဏညီတော်များသည် ­ယေဟောဝါနိုင်ငံတော်၏သံတမန်များဖြစ်ကြကြောင်းကို သူတို့သဘောပေါက်ကြပြီး နိုင်ငံတော်ဘက်တွင်ရပ်တည်သူများဖြစ်ကြောင်း သူတို့အခိုင်အမာသက်သေထူလိုကြသည်။

၂၂။ သိုးအတန်းစားသည် အဘယ်နည်းဖြင့် ဆုချခံရသနည်း။ (ဗျာဒိတ် ၇:၁၄-၁၇ နှိုင်းယှဉ်။)

^၂၂ ဤသိုးကဲ့သို့သောသူများသည် မိမိ၏သားတော်ရောက်ရှိနေချိန်အတွင်း ပေါ်ပေါက်လာမည်ဖြစ်ကြောင်း ယေဟောဝါကြို၍သိမြင်တော်မူသည်။ ယေဟောဝါသည် သူတို့အတွက် ကောင်းချီးကြွယ်ဝသည့်ဆုကျေးဇူးများသိုထားပေးသည်။ ယေဟောဝါ၏­ဘုရင်ယေရှုခရစ် အနှစ်တစ်ထောင်အုပ်စိုးသောကာလအတွင်း လူအုပ်ကြီးသည် ဤမြေကြီးပေါ်တွင် ငြိမ်သက်ခြင်းကောင်းချီးများကို အမွေခံစားကြရမည်။

၂၃။ ဘုရင့်ညီတော်များကို သိုးများသည် အဘယ်နည်းဖြင့် သိသိနှင့်ကူညီပေးသနည်း။

^၂၃ ခရစ်တော်ရောက်ရှိနေခြင်းနှင့်သက်ဆိုင်သော သမ္မာကျမ်းစာပရောဖက်ပြုချက်များနှင့်တကွ ယေရှု၏သိုးနှင့်ဆိတ်ပုံဥပမာကို ကျွန်ုပ်တို့စဉ်းစားလိုက်သောအခါ ကျွန်ုပ်တို့ဘာကိုသိနားလည်ရသနည်း။ ဤသို့တည်း။ ဘုရင့်ညီတော်များမှ တစ်ဦးတစ်ယောက်ကို မသိလိုက်ဘဲ၊ သို့မဟုတ် မတော်တဆကောင်းမှုပြုခြင်းဖြင့် လူတစ်ဦးအား ဘုရားသခင်နှင့်ကိုယ်တော့်ဘုရင်ရှေ့ ဖြောင့်မတ်သောသိုးအဖြစ်သို့ရောက်စေသည်မဟုတ်ပါ။ သိုးအတန်းအစားအဝင်ဖြစ်သူတို့သည် နန်းထိုင်ဘုရင်ကို မိမိတို့၏ပကတိမျက်စိဖြင့်မမြင်ရသည့်တိုင် မိမိတို့ဘာလုပ်နေကြသည်ကို သိ ကြသည်။ သူတို့သည် ­ဘုရင့်ညီတော်များကို ရုပ်ပိုင်းအရသာမက ဝိညာဏရေးရာအရပါ အကူအညီပေးရန်ကြိုးစားနေကြသည်။ မည်သို့အားဖြင့်နည်း။ ­ဘုရားသခင့်နိုင်ငံတော်သတင်းကောင်းဟောပြောခြင်းနှင့် ခရစ်တော်၏တပည့်များဖြစ်လာရန် ကျမ်းစာသင်အံမှုများကျင်းပပေးခြင်းအားဖြင့် သူတို့ကိုကူညီထောက်ပံ့ပေးကြသည်။ ထို့ကြောင့် ယနေ့ အလင်းဆောင်သည့်ဘုရားသခင့်နိုင်ငံတော်ကြွေးကြော်သူ လေးသန်းကျော်ရှိနေသည်။

တိုးချဲ့လုပ်ဆောင်မှုများ

၂၄။ အဘယ်မေတ္တာပါလုပ်ရပ်များက ကျေးကျွန်အတန်းစားကို ယနေ့အပျော်ရွှင်ဆုံးလူများ ဖြစ်စေခဲ့ပြီနည်း။

^၂၄ သစ္စာရှိကျေးကျွန်အတန်းအစားပြုလုပ်ခဲ့သည့် အလုပ်မွန်များအကြောင်းကို ပြန်လည်သုံးသပ်ကြည့်ကြစို့။ ပထမအနေနှင့် ကျေးကျွန်အတန်းအစားသည် သခင့်ဥစ္စာပစ္စည်းအားလုံး—မြေကြီးပေါ်ရှိဘုရားသခင့်နိုင်ငံတော်အကျိုးစီးပွားများ—အပ်နှင်းခံရကြပြီး ထိုပစ္စည်းဥစ္စာများသည် ဆက်လက်တိုးပွားနေသည်။ ဒုတိယအချက်မှာ ကျေးကျွန်အတန်းအစားသည် အိမ်သူအိမ်သားများကိုသာမက အစဉ်တိုးပွားနေသောလူအုပ်ကြီးတစ်ရပ်လုံးကို ဝိညာဏအစာကျွေးမွေးနေသည်။ တတိယအချက်မှာ ကျေးကျွန်အတန်းအစားသည် ဘုရားသခင့်နိုင်ငံတော်အလင်းထွန်းလင်းခြင်းတွင် ဦးဆောင်နေသည်။ စတုတ္ထတစ်ခုမှာ ကျေးကျွန်၏အကြီးကျယ်ဆုံးလုပ်ငန်းတိုးချဲ့မှုမှာ အခြားသိုးများမှ လူအုပ်ကြီးကိုစုသိမ်းပြီး သူတို့အား ယေဟောဝါ၏ဝိညာဏဗိမာန်တော်သို့ ခေါ်ဆောင်လာခဲ့ခြင်းဖြစ်သည်။ ပဉ္စမမှာ သိုးကဲ့သို့သောသူများ၏စိတ်နှလုံးအကြွင်းမဲ့အထောက်အပံ့အားဖြင့် ကျေးကျွန်သည် ကမ္ဘာတစ်ခွင်လုံးရှိဌာနခွဲအဖွဲ့အစည်းများအတွက်နှင့် အမေရိကန်နိုင်ငံရှိဌာနချုပ်အတွက်ပါ အဆောက်အအုံများကို တိုးချဲ့ဆောက်လုပ်ပေးလျက်ရှိသည်။ ထိုမေတ္တာပါသည့်လုပ်ရပ်များသည် ကျေးကျွန်အား ယနေ့လောကတွင် အပျော်ရွှင်ဆုံးသူများဖြစ်စေသည်။ အခြားသူသန်းပေါင်းစွာကိုလည်း ပျော်ရွှင်စေခဲ့ကြပြီ။ သမာဓိရှိကျေးကျွန်၏ တိုးချဲ့လုပ်ဆောင်မှုများကို ညွှန်ကြားသော ယေဟောဝါဘုရားသခင်နှင့် ယေရှုခရစ်တို့ကို သူတို့အားလုံးကျေးဇူးတင်ကြသည်တကား။

၂၅။ သိုးတို့သည် ကျေးကျွန်အတန်းအစားကို အဘယ်မျှော်လင့်ချက်ဖြင့် မည်သို့ဆက်ထောက်ပံ့ကူညီပေးနိုင်သနည်း။

^၂၅ ကျေးကျွန်အတန်းအစားသည် ဘုရားပေးတာဝန်များကို ယခင်ကထက်သာ၍ကြိုးစားလုပ်ဆောင်လျက်ရှိသည်။ “ကြီးစွာသောဒုက္ခ” မတိုင်မီ ကျန်ကြွင်းသောအချိန်ကာလပိုင်းသည် ကုန်သလောက်ရှိနေပြီ။ (မဿဲ ၂၄:၂၁) ဘုရားသခင်၏သိုးများသည် ကိုယ်တော့်သိုးထိန်းဘုရင်၏မျက်နှာသာခံစားရရန် လက်ယာဘက်တွင် ရှိနေခြင်းသည် မည်မျှအရေးကြီးလှသည်တကား။ ထို့ကြောင့် သစ္စာနှင့်သတိပညာရှိကျေးကျွန်အား စိတ်ဇောထက်သန်စွာဖြင့် ဆက်လက်၍ကူညီထောက်မကြစို့။ ဤသို့ပြုခြင်းအားဖြင့်သာလျှင် မကြာတော့သည့်တစ်နေ့တွင် သိုးကဲ့သို့သောသူများအားလုံးတို့သည် “ငါ့ခမည်းတော်ထံကောင်းချီးမင်္ဂလာကိုခံသောသူတို့၊ ကမ္ဘာဦးကပင်သင်တို့အဖို့ပြင်ဆင်သောနိုင်ငံကို လာ၍အမွေခံကြလော့” ဟူသောရွှင်လန်းဖွယ်စကားများကို ကြားနိုင်ကြမည်တည်း။

သင်ဖြေဆိုနိုင်သလော

◻ ဘုရင်နန်းထိုင်သည့်နောက် အဘယ်တရားစီရင်ခြင်းကို ဦးဆုံးပြုခဲ့သနည်း။

◻ မဿဲ ၂၄:၄၅-၄၇ သည် မျက်မှောက်အချိန်တွင် ­မည်သို့ပြည့်စုံခဲ့ပြီနည်း။

◻ တိုးချဲ့လုပ်ဆောင်မှုများနှင့်ပတ်သက်၍ ကျေးကျွန်အတန်းအစားနှင့်လူအုပ်ကြီးသည် အဘယ်အရာကို အလွန်ကျေးဇူးတင်သနည်း။

◻ မဿဲ ၂၅:၃၄-၄၀ သည်ပါရိုစီးယားအတွင်း မည်သို့ပြည့်စုံနေသနည်း။

[စာမျက်နှာ ၁၆ ပါ ရုပ်ပုံ]

သခင်အရှင်သည် သစ္စာရှိကျေးကျွန်အား မိမိ၏ဥစ္စာရှိရှိသမျှကို အပ်နှင်းတော်မူသည်

[စာမျက်နှာ ၁၈ ပါ ရုပ်ပုံ]

လူသားများကို တရားစီရင်ခြင်းငှာ ယေရှုသည် ဘုန်းတန်ခိုးဖြင့် နန်းထိုင်တော်မူ၏