သင် သိပါသလား

ကျမ်းစာထဲမှာသုံးနှုန်းထားတဲ့ “မိန်းမစိုး” ဆိုတာ ဘာအဓိပ္ပာယ်ရှိသလဲ

တစ်ခါတလေ၊ သင်းကွပ်ထားတဲ့ အမျိုးသားကို မိန်းမစိုးလို့ ခေါ်တယ်။ ကျမ်းစာခေတ်မှာ တချို့အမျိုးသားတွေကို အပြစ်ပေးတဲ့အနေနဲ့၊ သုံ့ပန်းအနေနဲ့၊ ကျွန်အနေနဲ့ သင်းကွပ်ကြတယ်။ အပျိုတော်နန်းဆောင်တွေ၊ မောင်းမနန်းဆောင်တွေကို ကြီးကြပ်ကွပ်ကဲဖို့ သင်းကွပ်ထားတဲ့အမျိုးသားတွေကို ယုံကြည်စိတ်ချစွာ အပ်နှင်းထားတယ်။ ဥပမာ၊ မိန်းမစိုးဟေဂဲနဲ့ ရှာရှဂါဇတို့ဟာ ဇခ်စိဇ် ၁ ဖြစ်ပုံရတဲ့ ပါးရှားဘုရင် အာရွှေရုရဲ့ အပျိုတော်တွေနဲ့ ဒုတိယအပျိုတော်တွေကို အုပ်ထိန်းသူတွေအဖြစ် တာဝန်ထမ်းဆောင်ခဲ့ကြတယ်။—ဧသတာ ၂:၃၊ ၁၄။

ဒါပေမဲ့ ကျမ်းစာမှာပါတဲ့ မိန်းမစိုးအားလုံးဟာ သင်းကွပ်ထားတဲ့သူတွေ မဟုတ်ပါဘူး။ မိန်းမစိုးဆိုတဲ့စကားလုံးကို အဓိပ္ပာယ်အမျိုးမျိုးနဲ့ သုံးကြတယ်။ တစ်ခါတလေ၊ နန်းတွင်းအရာရှိတွေကိုလည်း မိန်းမစိုးလို့ခေါ်တယ်ဆိုပြီး ကျမ်းပညာရှင်တချို့ ပြောကြတယ်။ အဲဒီသဘောမျိုးနဲ့ ယေရမိရဲ့အပေါင်းအဖော်ဖြစ်သူ ဧဗဒမေလက်အပြင် ဖိလိပ္ပုဟောပြောခဲ့တဲ့ အမည်မသိ အီသီယိုးပီးယားလူကိုပါ မိန်းမစိုးလို့ သုံးနှုန်းထားတာဖြစ်တယ်။ ဧဗဒမေလက်က ဘုရင်ဇေဒကိကို တိုက်ရိုက်စကားပြောခွင့်ရလို့ ရာထူးကြီးတဲ့နန်းတွင်းအရာရှိ ဖြစ်တယ်ဆိုတာ ထင်ရှားတယ်။ (ယေရမိ ၃၈:၇၊ ၈) ဒါ့အပြင် “ဂျေရုဆလင်မြို့ကို သွား၍ ဝတ်ပြု” တဲ့ အီသီယိုးပီးယားလူကိုလည်း နန်းတွင်းဘဏ္ဍာထိန်းဖြစ်တယ်လို့ ကျမ်းစာမှာဖော်ပြထားတယ်။—တမန်တော် ၈:၂၇။

ကျမ်းစာခေတ်က သိုးထိန်းတွေဟာ သိုးနဲ့ဆိတ်ကို ဘာကြောင့်ခွဲထားတာလဲ

အနာဂတ် တရားစီရင်ချိန်နဲ့ပတ်သက်ပြီး ယေရှု ဒီလိုဥပမာပေးခဲ့တယ်– ‘လူသားသည် မိမိဘုန်းတော်ကိုဆောင်လျက် ကြွလာတော်မူသောအခါ သိုးထိန်းသည် သိုးနှင့်ဆိတ်တို့ကို ခွဲခြားသကဲ့သို့ လူတို့ကို ခွဲခြားလိမ့်မည်။’ (မဿဲ ၂၅:၃၁၊ ၃၂) သိုးထိန်းတွေက သိုးနဲ့ဆိတ်ကို ဘာလို့ခွဲထားရတာလဲ။

ပုံမှန်အားဖြင့် နေ့ဘက်တွေမှာ သိုးနဲ့ဆိတ်ကို အတူတူထားပြီး စားကျက်မှာ ထိန်းကျောင်းကြတယ်။ ညဘက်မှာ သားရဲတိရစ္ဆာန်တွေနဲ့ သူခိုးတွေရဲ့ရန်ကနေ၊ အအေးဒဏ်ကနေ သိုးနဲ့ဆိတ်ကို ကာကွယ်ဖို့ ခြံဝင်းထဲ ပြန်မောင်းသွင်းကြတယ်။ (ကမ္ဘာဦး ၃၀:၃၂၊ ၃၃; ၃၁:၃၈-၄၀) ခြံဝင်းထဲရောက်တဲ့အခါ ယဉ်ပါးပြီးနုနယ်တဲ့သိုးတွေ၊ အထူးသဖြင့် သိုးမတွေနဲ့ သိုးကလေးတွေကို ရန်လိုတဲ့ဆိတ်တွေ အန္တရာယ်ပြုမှာစိုးလို့ သူတို့ကို သီးသန့်ခွဲထားရတယ်။ ဒါ့အပြင် “သားပေါက်ချိန်၊ နို့ညှစ်ချိန်နဲ့ သိုးမွေးညှပ်ချိန်” တွေမှာ သိုးနဲ့ဆိတ်ကို ခွဲထားတယ်လို့ (All Things in the Bible) စာအုပ်ထဲမှာ ဖော်ပြထားတယ်။ ရှေးအစ္စရေးလူတွေဟာ သိုးတွေကို မြင်နေကျ၊ ထိန်းကျောင်းနေကျဖြစ်လို့ သိုးနဲ့ဆိတ်ဥပမာကို ယေရှု သုံးလိုက်တာဖြစ်တယ်။