သန့်ရှင်းသူတို့၏ကိုယ်ခန္ဓာများစွာပေါ်ထွက်လာကြ
“မြေငလျင်လှုပ်ပြီး ကျောက်တုံးကြီးများကွဲထွက်ကုန်သည်။ အောက်မေ့ဖွယ်သင်္ချိုင်းဂူများပွင့်၍ သေနေသောသန့်ရှင်းသူတို့၏ကိုယ်ခန္ဓာများစွာသည် ပေါ်ထွက်လာကြသည်။ (ကိုယ်တော်ထမြောက်တော်မူပြီးနောက် အောက်မေ့ဖွယ်ရာသင်္ချိုင်းဂူများကြားမှ လူများထွက်လာကြပြီး သန့်ရှင်းသောမြို့တော်ထဲသို့ဝင်သွားကြလျှင်) သူတို့ကို လူများစွာမြင်ကြ၏။” (မဿဲ ၂၇:၅၁–၅၃၊ ကဘ ) ကက်သလစ်ကျမ်းပညာရှင် ကားလ်စတပ်ဘ်က ဤအဖြစ်အပျက်ကို ယေရှုသေဆုံးချိန်တွင် “ထူးဆန်းအနက်နဲဆုံး” အဖြစ်အပျက်ဟုခေါ်သည်။ ဘာဖြစ်ပျက်ခဲ့သနည်း။
အီပီဖားနီးယပ်စ်နှင့် အခြားသောရှေးချာ့ချ်ခေါင်းဆောင်များက သန့်ရှင်းသူများသည် စာသားအတိုင်းအသက်ရှင်လာကြပြီး ရှင်ပြန်ထမြောက်သောယေရှုနှင့်အတူ ကောင်းကင်သို့သွားကြသည်ဟု သွန်သင်ကြသည်။ ဩဂတ်စ္စတင်း၊ သီအိုဖီလက်တပ်စ်နှင့် ဇီဂဘဲနပ်စ်တို့က ထိုသန့်ရှင်းသူများသည် ခေတ္တယာယီရှင်ပြန်ထမြောက်ခြင်းကိုရကြပြီး နောက်ပိုင်းတွင် မိမိတို့၏သင်္ချိုင်းဂူများသို့ ပြန်ရောက်ရှိသွားကြသည်ဟု ယုံကြည်ကြသည်။ ဒုတိယအယူအဆသည် “ကျယ်ကျယ်ပြန့်ပြန့်အသိအမှတ်ပြုခြင်းကိုမခံရ” ဟုကျမ်းပညာရှင် အဲရစ်ဖက်ရှာကပြောသည်။ မဿဲ ၂၇:၅၂၊ ၅၃ ကိုဖော်ပြရာတွင် ခေတ်ကျမ်းစာဘာသာပြန်များစွာက ရှင်ပြန်ထမြောက်ခြင်းဖြစ်ပျက်ခဲ့သည်ဟု စွဲမှတ်စေသည်။ ကမ္ဘာသစ်ဘာသာပြန်ကျမ်း ကမူ မြေငလျင်လှုပ်ခြင်း၏ အကျိုးဆက်များနှင့်ပတ်သက်၍ညွှန်ပြရာတွင် ထိုအတိုင်းမဟုတ်ပါ။ အဘယ်ကြောင့်နည်း။
ပထမတစ်ချက်အနေနှင့် “သန့်ရှင်းသူများ” သည်မည်သူများပင်ဖြစ်စေကာမူ ပေါ်ထွက်လာသည်မှာ သူတို့ မဟုတ်ဘဲ သူတို့၏ကိုယ်ခန္ဓာ သို့မဟုတ် အလောင်းများကိုသာ မဿဲပြောခဲ့ခြင်းဖြစ်သည်။ ဒုတိယတစ်ချက်အနေနှင့် ဤကိုယ်ခန္ဓာများသည် အသက်ပြန်ရှင်လာသည်ဟု သူမပြောခဲ့ပါ။ သူတို့ပေါ်ထွက်လာသည်ဟုသာပြောခဲ့သည်။ “ပေါ်ထွက်” အဓိပ္ပာယ်ရှိသော ဂရိကြိယာစကားလုံး အဲဂီရို သည် အသက်ပြန်ရှင်ခြင်းကို အမြဲမရည်ညွှန်းပေ။ အဓိပ္ပယ်များစွာအနက် တွင်းထဲမှ “ဆွဲထုတ်” သည်၊ မြေကြီးမှ “ထလာ” သည်ဟူ၍လည်း အဓိပ္ပာယ်သက်ရောက်သည်။ (မဿဲ ၁၂:၁၁။ ၁၇:၇။ လုကာ ၁:၆၉) ယေရှုသေဆုံးစဉ်က ဖြစ်ပျက်ပြောင်းလဲမှုသည် ဂူများကိုပွင့်စေပြီး သက်မဲ့ကိုယ်ခန္ဓာများကို အပြင်သို့စင်ထွက်စေသည်။ ယင်းသို့ မြေငလျင်လှုပ်စဉ်အဖြစ်အပျက်များကို ဂရိစာရေးဆရာ အေးလိယက်စ်အရစ္စတီးဒီးစ်က စီအီးဒုတိယရာစုတွင် ပြန်လည်ဖော်ပြပြီး ၁၉၆၂ ခုနှစ်ကလည်း ကိုလံဘီယာတွင် ပြန်လည်ထုတ်ဖော်တင်ပြခဲ့သည်။
အဖြစ်အပျက်ဆိုင်ရာ ဤရှုမြင်သုံးသပ်ချက်သည် သမ္မာကျမ်းစာ၏သွန်သင်ချက်နှင့်ကိုက်ညီသည်။ ၁ ကောရိန္သု အခန်းကြီး ၁၅ တွင် ရှင်ပြန်ထမြောက်ခြင်းဆိုင်ရာ ယုံကြည်လောက်သောအထောက်အထားများကို တမန်တော်ပေါလုပေးခဲ့သည်။ သို့သော် မဿဲ ၂၇:၅၂၊ ၅၃ မှတ်တမ်းကိုမူ သူလုံးဝမထည့်ထားပါ။ အခြားကျမ်းရေးသူများလည်း ထို့အတူပင်ဖြစ်သည်။ (တမန်တော် ၂:၃၂၊ ၃၄) ယေရှုသေဆုံးစဉ် ပေါ်ထွက်လာသောအလောင်းများသည် အီပီဖားနီးယပ်စ်ယူဆသကဲ့သို့ အသက်ရှင်လာခြင်းမဖြစ်နိုင်ပါ။ အကြောင်းမှာ ယင်းနောက်ပိုင်းသုံးရက်မြောက်မှသာလျှင် ယေရှုသည် “သေခြင်းမှထွက်လာသူတို့တွင် သားဦး” ဖြစ်လာခြင်းဖြစ်သည်။ (ကောလောသဲ ၁:၁၈၊ ကဘ ) သန့်ရှင်းသူများဟုလည်းခေါ်သော ဘိသိက်ခံခရစ်ယာန်များသည် ပထမရာစုတွင်မဟုတ်ဘဲ ခရစ်တော်ရောက်ရှိချိန်အတွင်း အဦးဆုံးရှင်ပြန်ထမြောက်ခြင်းခံရရန် ကတိပေးခြင်းခံရကြသည်။—၁ သက်သာလောနိတ် ၃:၁၃။ ၄:၁၄–၁၇။
ကျမ်းစာအနက်ဖွင့်သူအများစုက အခန်းငယ် ၅၂ သည် မြေငလျင်ကြောင့် ဂူများကွဲပွင့်ပြီး လောလောလတ်လတ်သင်္ဂြိုဟ်ထားသောအလောင်းများ ပေါ်ထွက်လာသည်ဟု အကြံပြုကြသော်လည်း အခန်းငယ် ၅၃ ကိုရှင်းပြရာတွင် အခက်တွေ့ကြသည်။ ဥပမာအားဖြင့် ဂျာမန်ကျမ်းပညာရှင် သီအိုဘောလ်ဒေရှာစလ်က “ဂူများပွင့်လာပြီး သေဆုံးနေသောသန့်ရှင်းသူတို့၏အလောင်းများစွာသည် ထူမ,ခြင်းခံရကြသည်” ဟုဘာသာပြန်ဆိုထားသည်။
ယေရှုရှင်ပြန်ထမြောက်ခံရပြီးနောက်မှ “သန့်ရှင်းသောမြို့ထဲသို့ဝင်သွား” သူများကား မည်သူများနည်း။ အထက်တွင်တွေ့ခဲ့သည့်အတိုင်း ပေါ်ထွက်လာသောအလောင်းများမှာ သက်မဲ့အဖြစ်ဆက်လက်တည်ရှိဆဲဖြစ်သည်။ ထို့ကြောင့် သင်္ချိုင်းဂူများသို့လာရောက်ပြီး ယေရုရှလင်မြို့တွင်းသို့ သတင်းများသယ်ဆောင်သွားသူများကို မဿဲရည်ညွှန်းနေခြင်းဖြစ်ရမည်။ ထို့ကြောင့် ကမ္ဘာသစ်ဘာသာပြန်ကျမ်း ၏ဖော်ပြချက်သည် ကျမ်းစာနားလည်မှုကို ပိုမိုနက်ရှိုင်းစေပြီး ရှင်ပြန်ထမြောက်ခြင်းနှင့်ပတ်သက်၍ ကျမ်းစာဖတ်သူများကို ရှုပ်ထွေးမှုမဖြစ်စေပါ။