ယေဟောဝါက မိမိရဲ့နိုင်ငံတော်အားဖြင့် လူ့ပြဿနာအားလုံးကို ဖယ်ရှားပေးတော့မယ်။ ဒီသတင်းကောင်းကို လူတိုင်းကြားဖို့ လိုနေတယ်။ လူတိုင်းကို ဟောဖို့ နောက်လိုက်တွေကို ယေရှု မှာခဲ့တယ်။ (မဿဲ ၂၈:​၁၉၊ ၂၀) ဒီမှာကြားချက်ကို ယေဟောဝါသက်သေတွေ ဘယ်လို တုံ့ပြန်ကြသလဲ။

၁။ ဒီနေ့ခေတ်မှာ မဿဲ ၂၄:၁၄ ဘယ်လို ပြည့်စုံနေသလဲ။

“နိုင်ငံတော် သတင်းကောင်းကို လူနေထိုင်ရာ မြေတစ်ခွင်လုံးမှာ ဟောပြောရလိမ့်မယ်” လို့ ယေရှု ကြိုပြောတယ်။ (မဿဲ ၂၄:၁၄) အရေးကြီးတဲ့ ဒီအလုပ်ကို ယေဟောဝါသက်သေတွေ ဝမ်းမြောက်ဝမ်းသာ လုပ်ဆောင်နေတယ်။ ကမ္ဘာတစ်ဝန်းမှာ သတင်းကောင်းကို ဘာသာစကား ၁,၀၀၀ ကျော်နဲ့ ဟောနေပါတယ်။ ဒီလောက်ကြီးမားတဲ့ အလုပ်အတွက် စီစဉ်ဖွဲ့စည်းဖို့၊ ကြိုးစားအားထုတ်ဖို့ လိုတယ်။ ယေဟောဝါရဲ့ အကူအညီ မပါရင် မအောင်မြင်နိုင်ဘူး။

၂။ လူတွေကို ဟောဖို့ ဘယ်လို ကြိုးစားကြသလဲ။

လူတွေရှိတဲ့ နေရာတိုင်းမှာ ကျွန်တော်တို့ ဟောကြတယ်။ ပထမရာစုက ခရစ်ယာန်တွေလိုပဲ “တစ်အိမ်ပြီးတစ်အိမ် သွားပြီး” ဟောကြတယ်။ (တမန်တော် ၅:၄၂) ဒီလို စေ့စေ့စပ်စပ် ဟောတဲ့အတွက် နှစ်စဉ် လူသန်းနဲ့ချီကို ဟောနိုင်ခဲ့တယ်။ အိမ်မှာ လူတွေ အမြဲမရှိတဲ့အတွက် လူစုလူဝေး ရှိတဲ့နေရာတွေမှာလည်း ဟောကြတယ်။ ယေဟောဝါနဲ့ ဘုရားရည်ရွယ်ချက်အကြောင်း အခွင့်အရေး ရှာပြီး ပြောပြကြတယ်။

၃။ သတင်းကောင်းဟောဖို့ ဘယ်သူ့မှာ တာဝန်ရှိသလဲ။

ခရစ်ယာန်စစ်အားလုံး သတင်းကောင်းဟောဖို့ တာဝန်ရှိတယ်။ အသက်ရေးနဲ့ဆိုင်မှန်း သိလို့ အလေးအနက်ထားပြီး အတတ်နိုင်ဆုံး ဟောပြောကြတယ်။ (၁ တိမောသေ ၄:၁၆ ကို ဖတ်ပါ။) ဒီအတွက် အခကြေးငွေ မယူကြဘူး။ “အခမဲ့ ရထားတဲ့အတွက် အခမဲ့ ပေးကမ်းကြပါ” လို့ ကျမ်းစာ ဆိုထားတယ်။ (မဿဲ ၁၀:​၇၊ ၈) ဟောပြောခြင်းက ယေဟောဝါကို နာခံရာရောက်ပြီး ဘုရားကို စိတ်ရွှင်လန်းစေတဲ့အတွက် လူတိုင်း နားမထောင်ပေမဲ့ ဆက်ဟောကြတယ်။

ရှာဖွေလေ တွေ့ရှိလေ

၄။ လူတိုင်းကို ဟောဖို့ ကြိုးစားကြ

ဗီဒီယို။ “ကမ္ဘာမြေ အစွန်အဖျားအထိ” ဟောပြောပါ (၇:၃၃)

• ဟောပြောဖို့ ယေဟောဝါသက်သေတွေရဲ့ ကြိုးစားမှုနဲ့ပတ်သက်ပြီး ဘယ်အချက်ကို ကြိုက်သလဲ။

မဿဲ ၂၂:၃၉ နဲ့ ရောမ ၁၀:၁၃-၁၅ တို့ကို ဖတ်ပါ။ ပြီးတဲ့နောက် ဒီမေးခွန်းတွေကို သုံးသပ်ပါ။

• ဟောပြောခြင်းက လူလူချင်းကို ချစ်ကြောင်း ဘယ်လို ပြသလဲ။

• သတင်းကောင်း ဟောသူတွေကို ယေဟောဝါ ဘယ်လို သဘောထားသလဲ။​—အခန်းငယ် ၁၅ ကို ကြည့်ပါ။

၅။ ကျွန်တော်တို့ဟာ ဘုရားရဲ့ လုပ်ဖော်ဆောင်ဖက်တွေဖြစ်

ဟောပြောခြင်းကို ယေဟောဝါ လမ်းညွှန်နေကြောင်း တွေ့ကြုံမှုတွေက ဖော်ပြတယ်။ ဥပမာ၊ နယူးဇီလန်နိုင်ငံက ညီအစ်ကို ပေါလ်ဟာ မွန်းလွဲပိုင်း တစ်အိမ်တက်ဆင်း ဟောချိန်မှာ အမျိုးသမီးတစ်ဦးနဲ့ ဆုံတယ်။ တစ်ယောက်ယောက် လွှတ်ပေးပါလို့ ယေဟောဝါဘုရား နာမည်တပ်ပြီး မနက်ကပဲ ဆုတောင်းခဲ့သူပါ။ “နောက်သုံးနာရီအကြာမှာ သူ့အိမ်တံခါးရှေ့ကို ကျွန်တော် ရောက်နေပြီ” လို့ ပေါလ် ပြောပြတယ်။

၁ ကောရိန္သု ၃:၉ ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• နယူးဇီလန်နိုင်ငံက တွေ့ကြုံမှုအရ ဟောပြောခြင်းကို ယေဟောဝါ လမ်းညွှန်နေကြောင်း ဘယ်လို သိရသလဲ။

တမန်တော် ၁:၈ ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ဟောပြောခြင်းလုပ်ငန်း ပြီးမြောက်ဖို့ ယေဟောဝါရဲ့ အကူအညီ ဘာကြောင့် လိုသလဲ။

စိတ်ဝင်စားစရာအချက်

ပတ်စဉ် ကြားရက်အစည်းအဝေးမှာ ဟောပြောနည်းတွေ လေ့ကျင့်ပေးတယ်။ အဲဒီအစည်းအဝေးကို တက်ဖူးတယ်ဆိုရင် ဒီလေ့ကျင့်မှုကို ဘယ်လို ယူဆသလဲ။

၆။ ဟောပြောဖို့ ဘုရားမိန့်မှာချက်ကို နာခံကြ

ပထမရာစုမှာ သတင်းကောင်းဟောတာကို တားဆီးသူတွေ ရှိခဲ့တယ်။ ဒါပေမဲ့ ယေရှုနောက်လိုက်တွေက ‘ဟောပြောခွင့်ကို ခုခံကာကွယ်ပြီး တရားဥပဒေအရ အတည်ဖြစ်အောင် လုပ်ကြတယ်။’ (ဖိလိပ္ပိ ၁:၇) ယေဟောဝါသက်သေတွေလည်း အဲဒီအတိုင်း လုပ်ဆောင်ကြတယ်။a

ဗီဒီယို။ သတင်းကောင်းကို ဥပဒေအရ ကာကွယ်ကြ (၂:၂၈)

တမန်တော် ၅:၂၇-၄၂ ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ဘာကြောင့် လက်မလျှော့ဘဲ ဆက်ဟောရမလဲ။​ —အခန်းငယ် ၂၉၊ ၃၈၊ ၃၉ တို့ကို ကြည့်ပါ။

အနှစ်ချုပ်

လူအားလုံးကို သတင်းကောင်း ဟောဖို့ နောက်လိုက်တွေကို ယေရှု ညွှန်ကြားတယ်။ ယေဟောဝါကလည်း ကူညီပေးနေတယ်။

ပြန်လည်သုံးသပ်ခြင်း

• ကမ္ဘာတစ်ဝန်းမှာ သတင်းကောင်းကို ဘယ်သူတွေ ဟောနေသလဲ။

• ဟောပြောခြင်းက လူလူချင်းကို ချစ်ကြောင်း ဘယ်လို ပြသလဲ။

• သတင်းကောင်းဟောရင် ပျော်မယ် ထင်သလား။ ဘာကြောင့်လဲ။

လေ့လာစရာ ထပ်ဖွေရှာ

မြို့ကြီးတွေမှာ ယေဟောဝါ သက်သေတွေ ဘယ်လို ဟောနေသလဲ ရှုစားကြည့်ပါ။

ပါရီမြို့ လူစည်ကားတဲ့နေရာမှာ လူထုရှေ့ သက်သေခံခြင်း (၅:၁၁)

ဒုက္ခသည်တွေကို ယေဟောဝါသက်သေတွေ ဘယ်လို ကူညီပေး ကြသလဲ။

ဒုက္ခသည်တွေရဲ့ ဘုရားရေးရာတောင့်တမှုကို ဖြည့်ဆည်းပေး (၅:၅၉)

အချိန်ပြည့်အမှုဆောင်တစ်ဦးရဲ့ ကျေနပ်စရာဘဝအကြောင်း နားထောင်ကြည့်ပါ။

ဒီအလုပ် ရွေးခဲ့လို့ ပျော်ရွှင်ရ (၆:၂၉)

သတင်းကောင်း ဟောခွင့်ရစေတဲ့ တရားရုံး ဆုံးဖြတ်ချက်တွေအကြောင်း ဖတ်ကြည့်ပါ။

‘နိုင်ငံတော်သတင်းဟောသူတွေ တရားရုံးမှာ အမှုတင်ပြ’ (နိုင်ငံတော် စိုးစံပြီ၊ အခန်း ၁၃)

ခရစ်ယာန်တွေဟာ နှစ်ခြင်းခံဖို့ လိုတယ်လို့ ယေရှု သင်ပေးတယ်။ (မဿဲ ၂၈:​၁၉၊ ၂၀ ကို ဖတ်ပါ။) နှစ်ခြင်းဆိုတာ ဘာလဲ။ နှစ်ခြင်းခံနိုင်ဖို့ ဘာလုပ်ရမလဲ။

၁။ နှစ်ခြင်းဆိုတာ ဘာလဲ။

“နှစ်ခြင်း” ဆိုတာ “ရေထဲ နှစ်တယ်” လို့ အဓိပ္ပာယ်ရတဲ့ ဂရိစကားလုံးကနေ လာတယ်။ ယေရှု နှစ်ခြင်းခံချိန်မှာ ဂျော်ဒန်မြစ်ထဲ စုံးစုံးနစ်သွားတယ်။ အဲဒီနောက် “ရေထဲကနေ ပေါ်လာ” တယ်။ (မာကု ၁:​၉၊ ၁၀) ခရစ်ယာန်စစ်တွေလည်း နှစ်ခြင်းခံတဲ့အခါ ရေမှာ စုံးစုံးနှစ်ကြတယ်။

၂။ နှစ်ခြင်းခံတာက ဘာကို ဖော်ပြသလဲ။

နှစ်ခြင်းခံတာက ယေဟောဝါဘုရားဆီ ကိုယ့်ကိုယ်ကိုယ် ဆက်ကပ်အပ်နှံပြီးဖြစ်ကြောင်း ဖော်ပြတယ်။ ဆက်ကပ်အပ်နှံတယ်ဆိုတာ နှစ်ခြင်းမခံခင် တစ်ယောက်တည်းသီးသန့် ဆုတောင်းပြီး ယေဟောဝါကို ထာဝစဉ် ဝတ်ပြုလိုကြောင်း ပြောခြင်း ဖြစ်တယ်။ ယေဟောဝါကိုပဲ ဝတ်ပြုမယ်၊ ဘဝမှာ အလိုတော်ကို ဦးစားထားမယ်လို့ ကတိပေးတယ်။ “ကိုယ့်ကိုယ်ကိုယ် ငြင်းပယ်” ဖို့၊ ယေရှုရဲ့ စံနမူနာနဲ့ သွန်သင်ချက်တွေကို “အမြဲလိုက်” ဖို့ ဆုံးဖြတ်တယ်။ (မဿဲ ၁၆:၂၄) ဆက်ကပ်အပ်နှံခြင်းနဲ့ နှစ်ခြင်းက ယေဟောဝါနဲ့ရော ညီအစ်ကို/မတွေနဲ့ပါ ရင်းနှီးတဲ့ဆက်ဆံရေး ရှိစေတယ်။

၃။ နှစ်ခြင်းခံတဲ့အထိ တိုးတက်အောင် ဘာလုပ်ရမလဲ။

နှစ်ခြင်းမခံခင် ယေဟောဝါအကြောင်း လေ့လာပြီး ယုံကြည်ခြင်း ခိုင်ခံ့အောင် ကြိုးစားရမယ်။ (ဟီဘရူး ၁၁:၆ ကို ဖတ်ပါ။) အသိပညာနဲ့ ယုံကြည်ခြင်း တိုးများလာတာနဲ့အမျှ ယေဟောဝါကို ပိုချစ်လာမယ်။ ဘုရားအကြောင်း ဟောပြောချင်လာမယ်။ ဘုရားစံနှုန်းအတိုင်း နေထိုင်ချင်လာမယ်။ (၂ တိမောသေ ၄:၂။ ၁ ယောဟန် ၅:၃) ဘုရား နှစ်သက်မှုရဖို့ ‘ဘုရားနဲ့ ထိုက်တန်စွာ လျှောက်လှမ်း’ နေပြီဆိုရင် အသက်တာကို ဆက်ကပ်အပ်နှံပြီး နှစ်ခြင်းခံချင်စိတ် ပေါ်လာမယ်။​—ကောလောသဲ ၁:​၉၊ ၁၀။a

ရှာဖွေလေ တွေ့ရှိလေ

၄။ ယေရှုရဲ့ နှစ်ခြင်းကနေ သိရတဲ့အချက်တွေ

ယေရှုရဲ့ နှစ်ခြင်းအကြောင်း ပိုသိနိုင်ဖို့ မဿဲ ၃:၁၃-၁၇ ကို ဖတ်ပါ။ ပြီးတဲ့နောက် ဒီမေးခွန်းတွေကို သုံးသပ်ပါ။

• ယေရှု နှစ်ခြင်းခံတုန်းက မွေးကင်းစအရွယ်လား။

• ယေရှု ဘယ်လို နှစ်ခြင်းခံခဲ့သလဲ။ ရေဖျန်းရုံပဲလား။

ယေရှု နှစ်ခြင်းခံပြီးတာနဲ့ ဘုရားပေးထားတဲ့အလုပ်ကို စလုပ်တယ်။ လုကာ ၃:၂၁-၂၃ နဲ့ ယောဟန် ၆:၃၈ တို့ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ယေရှု နှစ်ခြင်းခံပြီးတာနဲ့ ဘာကို အဓိကလုပ်ဆောင်သလဲ။

၅။ နှစ်ခြင်းခံခြင်းဟာ လက်လှမ်းမီနိုင်တဲ့ ပန်းတိုင်ဖြစ်

ဆက်ကပ်အပ်နှံပြီး နှစ်ခြင်းခံဖို့ ဖြစ်နိုင်ပါ့မလားလို့ တွေးမိနိုင်တယ်။ ယေဟောဝါအကြောင်း ဆက်လေ့လာပြီး ဘုရားကို သိကျွမ်းလာတာနဲ့အမျှ ဒီအရေးကြီးတဲ့ ဆုံးဖြတ်ချက် ချဖို့ ယုံကြည်မှု ပိုရှိလာမယ်။ အဲဒီလိုလုပ်ခဲ့သူတွေအကြောင်း သိနိုင်ဖို့ ဗီဒီယို ဖွင့်ပါ။

ဗီဒီယို။ ယေဟောဝါနဲ့ ရင်းနှီးအောင် ကြိုးစားပါ (၁:၁၁)

ယောဟန် ၁၇:၃ နဲ့ ယာကုပ် ၁:၅ တို့ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• နှစ်ခြင်းခံဖို့ အသင့်ဖြစ်အောင် ဘာက ကူညီပေးနိုင်သလဲ။

1. က။ ယေဟောဝါကို ထာဝစဉ် ဝတ်ပြုလိုကြောင်း ပြောပြီး ဆက်ကပ်အပ်နှံကြ

2. ခ။ နှစ်ခြင်းခံတာက ဘုရားဆီ ဆက်ကပ်အပ်နှံပြီးဖြစ်ကြောင်း လူတွေရှေ့ ဖော်ပြခြင်းဖြစ်

၆။ နှစ်ခြင်းခံတဲ့အခါ ယေဟောဝါရဲ့ မိသားစုဝင် ဖြစ်လာ

နှစ်ခြင်းခံတဲ့အခါ စည်းလုံးတဲ့ ကမ္ဘာချီမိသားစုဝင် ဖြစ်လာတယ်။ ဘယ်နေရာမှာပဲ နေပါစေ၊ ဘယ်လိုနောက်ခံပဲ ရှိပါစေ ကျွန်တော်တို့ဟာ ယုံကြည်ချက် တူကြတယ်။ ကျမ်းစာစံနှုန်းအတိုင်း နေထိုင်ကြတယ်။ ဆာလံ ၂၅:၁၄ နဲ့ ၁ ပေတရု ၂:၁၇ တို့ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ဒီကျမ်းချက်တွေအရ နှစ်ခြင်းခံရင် ဘာအကျိုးကျေးဇူးတွေ ရမလဲ။

အနှစ်ချုပ်

ခရစ်ယာန်တွေ နှစ်ခြင်းခံဖို့ လိုတယ်လို့ ယေရှု သင်ပေးတယ်။ နှစ်ခြင်းခံနိုင်ဖို့ ယေဟောဝါကို အခိုင်အမာ ယုံကြည်ရမယ်။ ဘုရားစံနှုန်းအတိုင်း နေထိုင်ရမယ်။ ဘုရားဆီ ဆက်ကပ်အပ်နှံရမယ်။

ပြန်လည်သုံးသပ်ခြင်း

• နှစ်ခြင်းဆိုတာ ဘာလဲ။ နှစ်ခြင်းခံဖို့ ဘာကြောင့် အရေးကြီးသလဲ။

• ဆက်ကပ်အပ်နှံခြင်းနဲ့ နှစ်ခြင်း ဘယ်လို ဆက်စပ်နေသလဲ။

• ဆက်ကပ်အပ်နှံပြီး နှစ်ခြင်းခံနိုင်ဖို့ ဘာတွေ လုပ်ရမလဲ။

လေ့လာစရာ ထပ်ဖွေရှာ

နှစ်ခြင်းခံတယ်ဆိုတာ ဘာကို ဆိုလိုသလဲ။ ဘာကို မဆိုလိုဘူးလဲ။

“နှစ်ခြင်းခံတယ်ဆိုတာ ဘာအဓိပ္ပာယ်လဲ” (ဝက်ဘ်ဆိုက် ဆောင်းပါး)

နှစ်ခြင်းခံတဲ့အထိ တိုးတက်အောင် ဘာလုပ်ရမလဲ ဖတ်ကြည့်ပါ။

“ယေဟောဝါကို ချစ်တဲ့မေတ္တာက နှစ်ခြင်းခံဖို့ လှုံ့ဆော်” (ကင်းမျှော်စင်၊ မတ် ၂၀၂၀)

နှစ်ခြင်းခံဖို့ လူတစ်ဦးကို ဘာက လှုံ့ဆော်ပေးသလဲ ဖတ်ကြည့်ပါ။

‘အမှန်တရားကို ကိုယ်တိုင် ရှာဖွေဖို့ အားပေးခဲ့’ (ကင်းမျှော်စင် ဖေဖော်ဝါရီ ၁၊ ၂၀၁၃)

နှစ်ခြင်းခံဖို့ ပန်းတိုင်ထားတာ ဘာကြောင့် အကျိုးရှိသလဲ။ ဘယ်လို အသင့်ပြင်နိုင်သလဲ။

“ငါနှစ်ခြင်းခံသင့်သလား” (လူငယ်များအမေး၊ အတွဲ ၂၊ အခန်း ၃၇)