အခန်း ၁၃၁

နောက်ဆုံးကိုယ်ယောင်ထင်ရှားပြခြင်းနှင့် စီအီး ၃၃ ပင်တေကုတ္တေပွဲ

တစ်ချိန်တွင် တမန်တော် ၁၁ ပါးနှင့်ဂါလိလဲရှိတောင်တစ်ခု၌တွေ့ဆုံရန် ယေရှုစီစဉ်သည်။ အခြားတပည့်များလည်း ယင်းကိုသိပုံရပြီးလူ ၅၀၀ ကျော်စုရုံးလေသည်။ ယေရှုပေါ်လာပြီး သူတို့ကိုသွန်သင်သောအခါ မည်မျှပျော်ရွှင်ဖွယ်စည်းဝေးပွဲကြီးပါတကား။

အခြားအကြောင်းများနှင့်အတူ ဘုရားရှင်သည်မိမိအား ကောင်းကင်နှင့်မြေကြီးတွင်ရှိသမျှအာဏာကိုပေးအပ်ပြီးကြောင်း လူအုပ်ကြီးအားယေရှုရှင်းပြသည်။ “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက်၊ ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ဗတ္တိဇံကိုပေးကြလော့။ ငါသည်သင်တို့အား ပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမသြဝါဒပေးကြလော့” ဟုကိုယ်တော်တိုက်တွန်းခဲ့သည်။

စဉ်းစားကြည့်ပါ။ ယောက်ျား၊ မိန်းမနှင့်ကလေးအားလုံးသည် ဤတပည့်ဖြစ်စေခြင်းလုပ်ငန်းတာဝန်ကို တန်းတူရရှိကြသည်။ ဆန့်ကျင်သူများသည် သူတို့၏ဟောပြောခြင်းနှင့်သွန်သင်ခြင်းကို ရပ်တန့်စေရန်ကြိုးစားကြမည်။ သို့သော်ယေရှုက “ငါသည်လည်းကပ်ကမ္ဘာကုန်သည်တိုင်အောင် သင်တို့နှင့်အတူ အစဉ်မပြတ်ရှိသည်” ဟုအားပေးသည်။ ယေရှုသည် မိမိ၏နောက်လိုက်များ အမှုဆောင်ခြင်းတွင်ထောက်ကူပေးရန် သန့်ရှင်းသောဝိညာဉ်တော်အားဖြင့် သူတို့နှင့်အတူရှိသည်။

ယေရှုထမြောက်ပြီးအသက်ရှင်နေကြောင်း တပည့်များအားရက်ပေါင်း ၄၀ ပြသသည်။ ဤအချိန်အတွင်းယေရှုကသူတို့အား ဘုရားနိုင်ငံတော်အကြောင်းညွှန်ကြားပြီး တပည့်ဖြစ်ခြင်း၏တာဝန်များကို အလေးပေးမိန့်ဆိုသည်။ တစ်ချိန်တွင် ကိုယ်တော်သည်ယခင်မယုံကြည်သူမိမိ၏မိတူဖကွဲညီယာကုပ်အား ကိုယ်ယောင်ထင်ရှားပြခြင်းဖြင့် မိမိသည်အမှန်ပင်ခရစ်တော်ဖြစ်ကြောင်း စိတ်ချစေသည်။

တမန်တော်များသည် ဂါလိလဲတွင်ရှိစဉ် ယေရုရှလင်သို့ပြန်သွားရန် ယေရှုသူတို့အားညွှန်ကြားကြောင်းထင်ရှားသည်။ ထိုတွင်သူတို့နှင့်တွေ့ဆုံစဉ် သူတို့အား “ယေရုရှလင်မြို့မှမထွက်မသွားဘဲ ခမည်းတော်၏ကတိတော်ကိုငံ့နေမည်အကြောင်း . . . ငါဟောပြောသောစကားကို သင်တို့သည်ကြားသိရကြပြီ။ ယောဟန်သည်ရေ၌ဗတ္တိဇံကိုပေး၏။ သင်တို့သည်မကြာမမြင့်မီ သန့်ရှင်းသောဝိညာဉ်တော်၌ ဗတ္တိဇံကိုခံရကြလိမ့်မည်” ဟုမိန့်ဆိုသည်။

နောက်ပိုင်းတွင်ယေရှုသည်တပည့်များနှင့် တစ်ဖန်တွေ့ဆုံပြီး၊ မြို့ပြင်မှသံလွင်တောင်အရှေ့ဘက်ဆင်ခြေလျှောရှိ ဗေသနိရွာအထိခေါ်ဆောင်သွားသည်။ အံ့သြဖွယ်ကား မကြာမီ ကောင်းကင်သို့မိမိတက်ကြွတော့မည့်အကြောင်းပြောပြီးသော်လည်း ကိုယ်တော်၏နိုင်ငံတော်သည် မြေကြီးပေါ်တွင်တည်ထောင်မည်ဟု သူတို့ယုံကြည်ဆဲပင်။ ထို့ကြောင့်သူတို့က “သခင် . . . ယခုအခါကိုယ်တော်သည် ဣသရေလအမျိုးသားတို့အား နိုင်ငံကိုပြန်ပေးတော်မူမည်လော” ဟုမေး၏။

သူတို့နားလည်လွဲမှုကိုပြုပြင်မည့်အစား ယေရှုက “ခမည်းတော်၏တန်ခိုးအားဖြင့် စီရင်တော်မူသောအချိန်ကာလကိုသိရသောအခွင့်သည် သင်တို့၌မရှိ” ဟုသာဖြေကြားသည်။ ထို့နောက်သူတို့လုပ်ရမည့်အလုပ်ကို တစ်ဖန်အလေးအနက်ဆိုပြန်သည်။ “သင်တို့အပေါ်သို့ သန့်ရှင်းသောဝိညာဉ်တော် ဆင်းသက်သောအခါ သင်တို့သည်တန်ခိုးကိုခံရ၍ ယေရုရှလင်မြို့မှစသောယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။”

သူတို့ကြည့်ရှုစဉ်၊ ယေရှုသည်ကောင်းကင်သို့စတင်တက်ကြွပြီး မိုးတိမ်သည်ကိုယ်တော်ကိုဖုန်းကွယ်သွားလေ၏။ သွေးသားခန္ဓာပြောင်းလဲကာ နာမ်ဝိညာဉ်အဖြစ်တက်ကြွတော်မူခြင်းဖြစ်၏။ တမန်တော် ၁၁ ဦးသည်ကောင်းကင်သို့ကြည့်မျှော်နေစဉ် ဖြူစင်သောအဝတ်နှင့်လူနှစ်ယောက်သည် သူတို့အနားတွင်ပေါ်လာသည်။ ဤလူ့ခန္ဓာပြောင်းထားသောကောင်းကင်တမန်များက “အိုဂါလိလဲလူတို့၊ အဘယ်ကြောင့်ကောင်းကင်သို့ကြည့်မျှော်လျက်နေကြသနည်း။ သင်တို့နှင့်ခွာ၍ ကောင်းကင်သို့ဆောင်ယူခြင်းကိုခံတော်မူသော ထိုယေရှုသည် သင်တို့မျက်မှောက်၌ကောင်းကင်သို့ကြွသွားတော်မူသည့်နည်းတူ တစ်ဖန်ကြွလာတော်မူလတံ့။”

မြေကြီးမှအုတ်အော်သောင်းနင်းယေရှုထွက်ခွာသွားခြင်းမဟုတ်ဘဲ ကိုယ်တော်၏သစ္စာရှိတပည့်များသာကြည့်ရှုနေစဉ်ဖြစ်သည်။ ထိုနည်းတူပင် ယေရှုပြန်ကြွလာမည်။ ဘုရားသခင့်နိုင်ငံတော်တန်ခိုးနှင့် ကိုယ်တော်ပြန်ရောက်ရှိစပြုပြီဖြစ်ကြောင်း အုတ်အော်သောင်းနင်းမဟုတ်ဘဲ သစ္စာရှိတပည့်များသာပိုင်းခြားသိမြင်မည်။

ဤတွင်တမန်တော်များသည် သံလွင်တောင်မှဆင်း၍ကေဒြုန်ချိုင့်ကိုဖြတ်ပြီး ယေရုရှလင်သို့တစ်ဖန်ဝင်ကြ၏။ ယေရှု၏အမိန့်အတိုင်း ထိုတွင်သူတို့နေကြသည်။ ဆယ်ရက်ကြာပြီးနောက်စီအီး ၃၃ ဂျူးပင်တေကုတ္တေပွဲနေ့တွင် ယေရုရှလင်ရှိအိမ်အထက်ခန်း၌တပည့် ၁၂၀ စုဝေးစဉ် လေပြင်းကဲ့သို့အသံသည် တစ်ခဏခြင်းတွင်အိမ်တစ်ခုလုံးပြည့်လေ၏။ မီးကဲ့သို့သောလျှာများပေါ်လာပြီး ရောက်ရှိနေသူတိုင်းအပေါ်၌တည်ကာ တပည့်အားလုံးသည် အသီးသီးဘာသာစကားဖြင့်ပြောဆိုကြလေ၏။ ယင်းသည် ယေရှုကတိပြုခဲ့သည့် သန့်ရှင်းသောဝိညာဉ်တော်သွန်းလောင်းခြင်းတည်း။ မဿဲ ၂၈:၁၆-၂၀။ လုကာ ၂၄:၄၉-၅၂။ ၁ ကောရိန္သု ၁၅:၅-၇။ တမန်တော် ၁:၃-၁၅၊ ၂:၁-၄။

▪ ယေရှုသည် ဂါလိလဲရှိတောင်တွင် ခွဲခွါခါနီး မည်သူတို့အားညွှန်ကြားချက်ပေးသနည်း။ ယင်းညွှန်ကြားချက်များကား အဘယ်နည်း။

▪ ယေရှုသည်မိမိ၏နောက်လိုက်များအား မည်သည့်နှစ်သိမ့်မှုပေးပြီး ကိုယ်တော်သည်သူတို့နှင့်မည်သို့အတူရှိမည်နည်း။

▪ ယေရှုသည်ထမြောက်ပြီးနောက် မည်မျှကြာကြာမိမိ၏တပည့်များအား ကိုယ်ယောင်ထင်ရှားပြသနည်း။ သူတို့အားဘာသွန်သင်ပေးသနည်း။

▪ ယေရှုမသေမီတပည့်မဖြစ်သေးသူမည်သူထံ ကိုယ်ယောင်ထင်ရှားပြသနည်း။

▪ ယေရှုသည်မိမိတမန်တော်များနှင့် မည်သည့်နောက်ဆုံးစည်းဝေးခြင်းနှစ်ခုပြုသနည်း။ ထိုချိန်ခါတွင် ဘာဖြစ်ပျက်သနည်း။

▪ ယေရှုထွက်ခွာသွားသည့်နည်းတူ ပြန်လာမည်ဟုဆိုခြင်းကား မည်သို့နည်း။

▪ စီအီး ၃၃ ပင်တေကုတ္တေပွဲနေ့တွင် ဘာဖြစ်သနည်း။